အခန်း ၄၃၁

အခန်း ၄၃၁ ဧကရာဇ်ဂြိုဟ် နှင့် အရှင်သခင်ဂြိုဟ်

ဧရာမစစ်သင်္ဘော(တိုက်လေယာဥ်)ကြီးများသည် ၎င်းတို့၏ စစ်ပွဲမုဒ်ကို ဖွင့်လှစ်လိုက်ပြီး အလယ်တွင်ရှိသော ယဉ်ကျေးမှုဂြိုဟ်နှစ်ခုဆီသို့ ဦးတည်သွားကြချေ၏။

အာကာသထဲတွင် အလွန်မြန်ဆန်သော အရှိန်ဖြင့် ခရီးသွားရသည့် ဖိအားမှာ ကြီးမားလှပေသည်။

တားဆီးမရနိုင်သော အနက်ရောင်သံမဏိရေစီးကြောင်းကြီးကဲ့သို့ ၎င်းတို့ကို မည်သူမျှ တားဆီးနိုင်စွမ်း မရှိခဲ့ချေ။

စကြဝဠာကို ဖြတ်သန်းသွားလာရာတွင် အကယ်၍ ဘေးမှနေ၍ ကြည့်ရှုနိုင်မည်ဆိုပါက ၎င်းသည် အလွန်အံ့မခန်းဖြစ်စေမည့် အတွေ့အကြုံတစ်ခု ဖြစ်ပေလိမ့်မည်။

...

ဧကရာဇ်ဂြိုဟ်။

ကုန်းမြေထက် သမုဒ္ဒရာဧရိယာက များစွာပိုမိုကျယ်ဝန်းပြီး ၎င်း၏ဂြိုလ်နှင့် ကွာဝေးသော အကွာအဝေးမှာ ကမ္ဘာမြေနှင့် သိပ်မကွာခြားလှသော ဂြိုဟ်တစ်လုံး ဖြစ်၏။

ထို့ပြင် ထိုဂြိုဟ်သည် ကမ္ဘာမြေထက်ပင် ပို၍ကြီးမားနေသေးပေသည်။

ယဉ်ကျေးမှုအဆင့် ၁.၅ သည် ၎င်းတို့၏ ဂြိုဟ်ပတ်ဝန်းကျင်ရှိ နေရာများကို စူးစမ်းလေ့လာရန်နှင့် အခြားဂြိုဟ်များပေါ်သို့ ဆင်းသက်နိုင်ရန်ပင် လုံလောက်သော ပံ့ပိုးမှုဖြစ်ချေသည်။

ဤဂြိုဟ်ပေါ်ရှိ သတ္တဝါများသည် မယုံနိုင်လောက်အောင် ကွဲပြားကြသော်လည်း မရေမတွက်နိုင်သော သတ္တဝါများထဲမှ မျိုးစိတ်တစ်ခုကတော့ ထင်ရှားပေါ်လွင်နေ၏။ တိရစ္ဆာန်ခေါင်းနှင့် လူသားကဲ့သို့ ခန္ဓာကိုယ်ရှိသော သတ္တဝါမျိုး ဖြစ်ပေသည်။

ထိုမျိုးစိတ်သည် အလွန်ထူးဆန်းလှသည်။ ၎င်းတို့သည် ခြေနှစ်ချောင်းဖြင့် လမ်းလျှောက်ကြသော်လည်း ပုံပန်းသဏ္ဍာန်အမျိုးမျိုးရှိကြပြီး အချို့မှာ ကြောက်မက်ဖွယ်ကောင်းသော ရုပ်ရည်မျိုးပင် ရှိကြချေ၏။

"အရှင်မင်းကြီး"

"ဂလက်ဆီထဲမှာ အမည်မသိ အရာဝတ္ထုတစ်ခုကို တွေ့ရှိထားပါတယ်...ကျွန်တော်တို့ရဲ့ ဧကရာဇ်ဂြိုဟ်ဆီကို ဦးတည်လာနေပါတယ်"

"ကျွန်တော်တို့ရဲ့ လက်ရှိနည်းပညာနဲ့ သူတို့ကို ပစ်မှတ်ထားလို့ မရသလို စောင့်ကြည့်ဖို့လည်း မဖြစ်နိုင်ပါဘူး"

"စတင်တွေ့ရှိတဲ့အချိန်မှာ တစ်ဖက်က တမင်သက်သက် အားနည်းချက်တစ်ခု ဖန်တီးပေးလိုက်သလိုပါပဲ"

ထိုချိန်တွင် တိမ်တိုက်များကြား၌ မြင့်မားစွာတည်ရှိနေသော ဧရာမနန်းတော်ကြီးတစ်ခုအတွင်း ရွှေဝါရောင်ဖုံးလွှမ်းနေသော သတ္တဝါတစ်ဦးသည် အမြင့်ဆုံးနေရာ၌ ထိုင်နေပေသည်။

ဤသက်ရှိသတ္တဝါသည် အောက်တွင်ရှိသော အခြားသတ္တဝါများနှင့် ဆင်တူသော်လည်း ဤရွှေရောင်သတ္တဝါသည် အခြားသူများကဲ့သို့ ကြမ်းကြုတ်ခြင်းမရှိကြောင်း ထင်ရှားလှပေ၏။

သူ၏ ရုပ်သွင်သည် အမှန်တကယ်အားဖြင့် လူသားတစ်ဦး၏ ပုံစံနှင့် ပို၍နီးစပ်နေချေသည်။

"အင်း"

"ဘာတွေ ဖြစ်နေတာလဲ"

"ငါတို့က အရှင်သခင်ဂြိုဟ်နဲ့ ငြိမ်းချမ်းရေးကာလတစ်ခုကို ဝင်ရောက်နေတာလေ...ဒါဆို ဘာလို့ အခုလိုတွေ ဖြစ်နေရတာလဲ"

"ဒါက အရှင်သခင်ဂြိုဟ်က တီထွင်လိုက်တဲ့ နည်းပညာအသစ်များလား" ဂြိုဟ်၏အရှင်သခင်က ဩရှရှအသံဖြင့် မေးမြန်းလိုက်၏။

"အရှင်မင်းကြီး...ဒါ လုံးဝ မဖြစ်နိုင်ပါဘူး"

"ဘာလို့လဲဆိုတော့ အရှင်သခင်ဂြိုဟ်ရဲ့ ယဉ်ကျေးမှုနဲ့ နည်းပညာအဆင့်က ကျွန်တော်တို့နဲ့ ယှဉ်လို့ရတဲ့အဆင့်မှာပဲ ရှိနေလို့ပါ"

"အခုလေးတင် တွေ့ရှိခဲ့တဲ့ အချက်အလက်တွေအရ ဒီလက်နက်က အရမ်းမြင့်မားတဲ့ ယဉ်ကျေးမှုအဆင့်တစ်ခုက ဖြစ်တယ်လို့ ဖော်ပြနေပါတယ်"

"အလွန်မြန်ဆန်တဲ့ အရှိန်ပါပဲ"

"ဆိုလိုတာက အဲ့ဒါ အရှင်သခင်ဂြိုဟ်ဆီကလာတာ မဟုတ်ပါဘူး...တခြားနေရာက ယဉ်ကျေးမှုတစ်ခုဆီကလာတာ ဖြစ်ရပါမယ်" လက်အောက်ငယ်သားက သတင်းပို့လိုက်သည်။

"ဘာ"

"တခြား ဂလက်ဆီတစ်ခုက ယဉ်ကျေးမှုတစ်ခု လာရောက်လည်ပတ်တာလား"

"ဒါကတော့"

ဧကရာဇ်မင်းသည် မတ်တပ်ရပ်လိုက်ရာ သူ၏ကိုယ်မှ စူးရှတောက်ပသော ရွှေရောင်အလင်းတန်းများ ပေါက်ကွဲထွက်လာ၏။ အောက်ဘက်ရှိ သူ၏အမတ်များအားလုံးမှာ ကြောက်ရွံ့တုန်လှုပ်စွာဖြင့် ဝပ်တွားခယသွားကြချေသည်။

ဧကရာဇ်၏ သွေးသားမျိုးနွယ်မှ ထွက်ပေါ်လာသော ကြီးမားလှသည့် ဖိအားကြီးနှင့် ရင်ဆိုင်ရချိန်တွင် သူတို့သည် အနည်းငယ်မျှ ဆန့်ကျင်လိုသည့် အတွေးကိုပင် မမွေးမြူနိုင်ခဲ့ကြပေ။

"ဒါက တခြားဂြိုလ် ယဉ်ကျေးမှုတစ်ခုက လာရောက်လည်ပတ်တာဆိုတော့...ငါက ဧကရာဇ်တစ်ပါးအနေနဲ့ ကိုယ်တိုင်ကိုယ်ကျ သွားကြည့်သင့်တာပေါ့" ဧကရာဇ်က ယုံကြည်မှုအပြည့်ဖြင့် ပြောလိုက်၏။

"အရှင်မင်းကြီး...ဒါက မသင့်တော်ပါဘူး"

"ဒီ ဂြိုဟ်သားယဉ်ကျေးမှုရဲ့ နည်းပညာက အရမ်းအဆင့်မြင့်လွန်းနေပါတယ်"

"သူတို့က မိတ်ဆွေလား ရန်သူလားဆိုတာ ငါတို့ မသိရသေးပါဘူး...တကယ်လို့ အရှင်မင်းကြီး ထွက်သွားမယ်ဆိုရင် အရမ်း အန္တရာယ်များပါလိမ့်မယ်"

"အရှင်မင်းကြီးက ဧကရာဇ်ဂြိုဟ်ရဲ့ အုပ်စိုးရှင်ပါ...တကယ်လို့ အရှင်မင်းကြီး တစ်ခုခုဖြစ်သွားခဲ့ရင် ဒါက ဧကရာဇ်ဂြိုဟ်အတွက် အကြီးအကျယ် ပျက်စီးဆုံးရှုံးမှု ဖြစ်သွားပါလိမ့်မယ်" လက်အောက်ငယ်သားများက အလျင်အမြန် တားမြစ်လိုက်ကြသည်။

"မလိုဘူး"

"မင်းတို့ရဲ့ တွေးခေါ်ပုံက အရမ်းရိုးရှင်းလွန်းနေတယ်"

"သူတို့ဂြိုဟ်သားယဉ်ကျေးမှုရဲ့ နည်းပညာက ငါတို့ထက် အများကြီး ပိုပြီး အဆင့်မြင့်တယ်"

"ငါတို့ရဲ့ ခွဲခြားသတ်မှတ်မှုအရ ငါတို့ယဉ်ကျေးမှုအဆင့်က ၁ ဆိုရင်...သူတို့ရဲ့ ယဉ်ကျေးမှုအဆင့်က ၂ ဖြစ်ရလိမ့်မယ်"

"တစ်နည်းအားဖြင့် ပြောရရင်...သူတို့က ငါတို့ကို အချိန်မရွေး ဖျက်ဆီးပစ်နိုင်တယ်"

"တကယ်လို့ ဒီအချိန်မှာ ငါတို့က ရန်လိုတဲ့ ရပ်တည်ချက်ကို ယူလိုက်မယ်ဆိုရင်...ဒါက သေချာပေါက် ငါတို့အတွက် အန္တရာယ်ကို အမြင့်ဆုံးအထိ တိုးသွားစေလိမ့်မယ်"

"ငါတို့ အခု ပြင်းထန်တဲ့ ရပ်တည်ချက်ကို ယူလို့မရဘူး...ငါတို့က ဖော်ရွေစွာနဲ့ သူတို့ရဲ့ ရည်ရွယ်ချက်ကို သိအောင် ကြိုးစားရမယ်" အခြားသူများ၏ ကန့်ကွက်မှုများကို ပယ်ချကာ ဧကရာဇ်က အခိုင်အမာ ပြောဆိုလိုက်၏။

"မှန်လှပါ"

"အရှင်မင်းကြီးက ပညာရှိလှပါတယ်"

ဧကရာဇ်ဂြိုဟ်တွင် ဧကရာဇ်၏ ဆုံးဖြတ်ချက်များကို မည်သူမျှ မေးခွန်းထုတ်ရဲခြင်း လုံးလုံးလျားလျား မရှိပေ။

အဘယ်ကြောင့်ဆိုသော် ဧကရာဇ်များသည် အခြားသူများနှင့်မတူဘဲ အင်အားအကောင်းဆုံး သွေးသားမျိုးရိုး အမွေအနှစ်နှင့် အမြင့်မားဆုံး ဉာဏ်ရည်ဉာဏ်သွေးများဖြင့် မွေးဖွားလာကြသောကြောင့် ဖြစ်၏။

ဧကရာဇ်ဂြိုဟ်၏ လက်ရှိအခြေအနေသို့ ဖွံ့ဖြိုးတိုးတက်လာမှုသည် ဧကရာဇ်၏ ဆုံးဖြတ်ချက်များနှင့် ကြီးမားကျယ်ပြန့်သော အမိန့်ပေးမှုများကြောင့် လုံးလုံးလျားလျား ဖြစ်ပေါ်လာခြင်း ဖြစ်ပေသည်။

ဧကရာဇ်ချမှတ်သည့် ဆုံးဖြတ်ချက်တိုင်းသည် ဧကရာဇ်ဂြိုဟ်အတွက် မေးခွန်းထုတ်စရာမလိုသည့် အမြင့်မြတ်ဆုံးသော အရာများ ဖြစ်ချေသည်။

ဧကရာဇ်က ထိုသို့ပြောဆိုလိုက်ချိန်တွင် အမတ်များအားလုံးသည် သူ့အား တားမြစ်ရန် ကြိုးပမ်းနေမှုများကို ရပ်တန့်လိုက်ကြ၏။

အချိန်တိုင်းတွင် ဧကရာဇ်သည် စကြဝဠာ၏ နိယာမများကို အကောင်းဆုံး နားလည်သူဖြစ်ပြီး ဧကရာဇ်ဂြိုဟ်တခုလုံးတွင် အပညာရှိဆုံး သတ္တဝါလည်း ဖြစ်ပေသည်။

သူတို့၏ သာမန်ဘဝများသည် ဧကရာဇ်၏ ဘဝနှင့် လုံးလုံးလျားလျား နှိုင်းယှဉ်၍ မရနိုင်ချေ။

ဧကရာဇ်က အမိန့်ပေးပြီးနောက် သူသည် လူအချို့ကို ခေါ်ဆောင်ကာ ပျံသန်းရေးယာဉ်တစ်စီးပေါ်သို့ တက်ရောက်ပြီး အာကာသထဲသို့ ချက်ချင်း ဦးတည်ထွက်ခွာသွားလေတော့သည်။

အာကာသထဲသို့ ရောက်ရောက်ချင်းပင် သတင်းစကားတစ်ခုကို ရုတ်တရက် ကြားလိုက်ရ၏။

"ရွှေကြေးခွံ ဘုရင်ကြီး...ရှင်လည်း ဒီမှာ ရှိနေလိမ့်မယ်လို့ မမျှော်လင့်ထားဘူး" ထိုအသံမှာ အမျိုးသမီးတစ်ဦး၏ အသံဖြစ်ပြီး ဧကရာဇ်ဂြိုဟ်၏ ရွှေကြေးခွံဘုရင်က သူမကို လှည့်ကြည့်လိုက်သည်။

မြင်တွေ့ရသမျှမှာ လက်အောက်ငယ်သားများစွာနှင့်အတူ အာကာသထဲသို့ ရောက်ရှိလာသော အနက်ရောင်ဆံပင်နှင့် အမျိုးသမီးတစ်ဦးသာ ဖြစ်ပေသည်။

"အရှင်သခင်ဂြိုဟ်ရဲ့ ဂြိုလ်အရှင်သခင် ဂျူလီ...မင်းလည်း လာခဲ့တာပဲ"

"မင်းက ဂုဏ်သရေရှိ ဧည့်သည်တော်တွေကို ကြိုဆိုဖို့ ဒီကို ရောက်နေတာလား" ရွှေကြေးခွံက မေးလိုက်၏။

ဤ ဂျူလီ ဆိုသူသည် လက်ရှိတွင် ဧကရာဇ်ဂြိုဟ်အတွက် သေချာပေါက် အကြီးမားဆုံး ခြိမ်းခြောက်မှုကြီး ဖြစ်ပေသည်။

သူမသည် အရှင်သခင်ဂြိုဟ်၏ ဂြိုလ်အရှင်သခင်ဖြစ်ပြီး အရှင်သခင်ဂြိုဟ်၏ နည်းပညာယဉ်ကျေးမှု ဖွံ့ဖြိုးတိုးတက်ရေးတွင် အရေးပါသော အခန်းကဏ္ဍမှ ပါဝင်နေသူ ဖြစ်၏။

သူမ၏ အစွမ်းထက်သော မျိုးနွယ်စုသည် အထူးသွေးသားမျိုးရိုးကို ပိုင်ဆိုင်ထားပြီး ၎င်းကို သူမ၏ အနက်ရောင်ဆံပင်များက ကိုယ်စားပြုနေချေသည်။

ထို့ပြင် ရွှေကြေးခွံနှင့် နှိုင်းယှဉ်ပါက ဂျူလီ၏ ရုပ်သွင်နှင့် ခန္ဓာကိုယ်ပုံစံသည် လူသားတစ်ဦးနှင့် များစွာပို၍ နီးစပ်နေပုံရပေသည်။

ပြိုင်ဘက်နှစ်ဦး တွေ့ဆုံချိန်တွင် ခနဲ့တဲ့တဲ့ စကားအချို့ ပြောဆိုကြခြင်းမှာ ရှောင်လွှဲ၍ မရနိုင်သောအရာ ဖြစ်၏။

"ငါ့လူတွေက ပြောကြတယ်...ဒီ ဂြိုဟ်သားယဉ်ကျေးမှုက ရှင်တို့ရဲ့ ဧကရာဇ်ဂြိုဟ်က ဖန်တီးထားတဲ့ လက်နက်တစ်ခုတဲ့"

"ငါကတော့ ပြောလိုက်ပါတယ်...ရှင်တို့ရဲ့ အမှိုက်လို ဦးနှောက်တွေနဲ့ ငါတို့ စောင့်ကြည့်လို့မရတဲ့ နည်းပညာထုတ်ကုန်တွေကို ဘယ်လိုလုပ်ပြီး ဖန်တီးနိုင်မှာလဲလို့"

"အဲ့ဒါက တကယ်ကို ရယ်စရာကောင်းလွန်းတယ်မဟုတ်လား" ဂျူလီက ခနဲ့တဲ့တဲ့ လေသံဖြင့် ပြောလိုက်သည်။

"ဟားဟား"

"ကြည့်ရတာ မင်းက ငါတွေးသလိုမျိုးပဲ တွေးနေပုံရတယ်"

"ငါလည်း အခုလေးတင် ပြောနေတာ...အရှင်သခင်ဂြိုဟ်က အဲ့ဒီ အမှိုက်ကောင်တွေက ဒီလောက် အဆင့်မြင့်တဲ့ ထုတ်ကုန်မျိုးကို ဘယ်လိုလုပ်ပြီး ထုတ်လုပ်နိုင်မှာလဲလို့"

"ဂျူလီ...မင်းက တကယ်ကို စမတ်ကျတယ်...အနည်းဆုံးတော့ မင်းအဖေထက် ပိုပြီး ပညာရှိတယ်"

"ငါ မင်းနဲ့ တိုက်ခိုက်လာတာ နှစ်တွေအတော်ကြာပြီ...ဒါက တော်တော်လေး ပျော်စရာကောင်းတယ်"

"တကယ်လို့ ငါတို့သာ မတူညီတဲ့ အင်အားစုနှစ်ခုရဲ့ အုပ်စိုးရှင်တွေ မဟုတ်ခဲ့ဘူးဆိုရင်...မင်းကို ငါ့ကလေး ကိုယ်ဝန်ဆောင်ခိုင်းလိုက်ပြီ" ရွှေကြေးခွံက မောက်မာစွာဖြင့် ပြောလိုက်၏။

"ဟမ်...ငါကလည်း ရှင့်ကို မျိုးပွားဖို့ ကိရိယာတစ်ခုအဖြစ် ငါတို့ အရှင်သခင်ဂြိုဟ်အတွက် အသုံးပြုချင်မိမှာပဲ"

"ကောင်းပြီ...ငြင်းခုန်နေတာကို ရပ်လိုက်တော့...အခုက ဒါတွေ ပြောနေရမယ့် အချိန်မဟုတ်ဘူး"

"ဒီ ဂြိုဟ်သားယဉ်ကျေးမှုက အရမ်း အစွမ်းထက်တယ်...ဒါက ငါတို့ ခုခံနိုင်စွမ်းထက် ကျော်လွန်နေတာ သေချာတယ်"

"တကယ်လို့ သူတို့က ငါတို့ကို ဆန့်ကျင်လာရင် ဘာလုပ်မလဲ" ဂျူလီက ရွှေကြေးခွံကို ကြည့်လိုက်သည်။

"ရိုးရှင်းပါတယ်...သူတို့ကို အညံ့ခံလိုက်မယ်...ပြီးရင် ငါတို့က မင်းကို သတ်ပစ်မယ်"

"ဧကရာဇ်ရဲ့ ခရီးစဉ် ချောမွေ့ပြီး ဘေးကင်းဖို့ သေချာနေသရွေ့ ဒါက လုံလောက်ပါတယ်" ရွှေကြေးခွံက ပြောလိုက်၏။

"ဟီးဟီး...ငါတို့ တွေးတာချင်း တူသွားတယ်" ဂျူလီက သူ့ကို ဆက်မကြည့်တော့ဘဲ နေလိုက်သည်။

ခဏကြာ စောင့်ဆိုင်းပြီးနောက် ဂြိုလ်အရှင်သခင်နှစ်ဦးသည် ကြောက်မက်ဖွယ်ကောင်းသော စစ်သင်္ဘောကြီး ရှေ့မှ ဖြည်းညှင်းစွာ ချဉ်းကပ်လာသည်ကို မြင်တွေ့လိုက်ရချေပြီ။

သံမဏိရေစီးကြောင်းကြီးသည် အာကာသနှင့်ပင် ပေါင်းစပ်သွားပုံရပြီး လေဟာနယ်အာကာသပင်လျှင် ၎င်း၏ အလေးချိန်အောက်၌ တုန်လှုပ်သွားရလောက်အောင် ကြောက်မက်ဖွယ် ဖိအားများကို ထုတ်လွှတ်နေပေသည်။

အစွမ်းအထက်ဆုံး ဂြိုလ်အရှင်သခင်များပင်လျှင် စစ်သင်္ဘောက အနည်းငယ်မျှ လှုပ်ရှားလိုက်ပါက သူတို့ ဖျက်ဆီးခံရတော့မည်အလား ကြီးမားလှသော ဖိအားကို ခံစားလိုက်ကြရ၏။

"ဟူး...အရမ်း အားကောင်းတဲ့ ဖိအားပဲ..."

"ဒါက ပိုမြင့်မားတဲ့ ယဉ်ကျေးမှုတစ်ခုရဲ့ ဖိအားလား"

"အဆုံးမရှိတဲ့ တွင်းနက်ကြီးက ငါ့ကို အကြောက်တရားတွေနဲ့ ပြည့်နှက်သွားစေတာပဲ" ရွှေကြေးခွံနှင့် ဂျူလီတို့က အာမေဍိတ်သံ ပြုလိုက်ကြသည်။

"ဒီအပေါ်မှာ အကဲဖြတ်ရရင်...ရောက်လာတဲ့ ယဉ်ကျေးမှုက အလွန် ကြောက်မက်ဖွယ်ကောင်းတဲ့ အရာတစ်ခု ဖြစ်ရမယ်"

ရောက်ရှိလာသော အမွှာဂြိုဟ်နှစ်ခုမှ နေထိုင်သူအားလုံးသည် လုံးလုံးလျားလျား ကြောက်ရွံ့တုန်လှုပ်မှုများဖြင့် ပြည့်နှက်နေခဲ့ကြပေသည်။