အခန်း ၁၉၈
Vol. 20 Ch. 198
🍄 Chapter 198
အိမ်တွင် ချန်မေ့လန်သည်လည်း ပြဿနာတစ်ခုနှင့် ရင်ဆိုင်နေရသည်။
ချန်တကုန်းသည် နှစ်သစ်ကူးအားလပ်ရက်အတွက် ဇာတိရွာသို့ ပြန်သွားခဲ့ပြီး ကျင်းပေါင်တစ်ယောက်တည်းသာ ဆောက်လုပ်ရေး လုပ်ငန်းခွင်ကို စောင့်ရှောက်ရန် ကျန်ရစ်ခဲ့သည်။
ယမန်နေ့ညက ကျင်းပေါင်သည် အိပ်မောကျနေသဖြင့် မည်သည့်အရာကိုမျှ သတိမထားမိခဲ့ချေ။
နံနက်မိုးလင်း၍ နိုးလာသောအခါ လုပ်ငန်းခွင်ရှိ နိုင်လွန်ကြိုးများအားလုံး အဖြတ်ခံထားရပြီး ဝါးငြမ်းများနှင့် သံမဏိပိုက်ကလစ်များရှိ ဝက်အူများအားလုံး ဖြုတ်ချခံထားရကြောင်း သူ တွေ့ရှိခဲ့ရသည်။
နှစ်သစ်ကူးမတိုင်မီက ချန်တကုန်းသည် ပစ္စည်းများ သယ်ယူရ လွယ်ကူစေရန် လျှပ်စစ်သုံးဘီးဆိုင်ကယ် တစ်စီး ဝယ်ယူခဲ့သည်။
ယမန်နေ့ညက သုံးဘီးဆိုင်ကယ်၏ တာယာလေးဘီးလုံး အပေါက်ဖောက်ခံခဲ့ရသည်။
ချန်တကုန်းနှင့် ကျိုးချောင်ဖန်တို့သည် ချန်မေ့လန်ကို လာရောက်တွေ့ဆုံခဲ့ကြ၏။
ချန်တကုန်းက တိုက်ရိုက်ပင် ပြောဆိုလာ၏။
“မေ့လန်၊ ယန်ကျောက်ကို စုံစမ်းစစ်ဆေးခိုင်းလိုက်၊ ဆောက်လုပ်ရေး လုပ်ငန်းခွင်မှာ ဒီလိုကိစ္စမျိုးဖြစ်တာက တစ်ယောက်ယောက်က ငါတို့ကို မနာလိုဖြစ်ပြီး ပြဿနာရှာချင်လို့ပဲ ဖြစ်ရမယ်၊
ငါတို့ မိသားစုမှာ ရဲတစ်ယောက် ရှိနေတာတောင် ငါတို့က ဒီအတိုင်း အနိုင်ကျင့်ခံနေရမှာလား”
အဆိုးမြင်တတ်သော ကျိုးချောင်ဖန်ကလည်း ဝင်ပြောလာသည်။
“မေ့လန်၊ ငါတို့ ဒီပရောဂျက်ကို စွန့်လွှတ်လိုက်တာ ပိုကောင်းမယ်ထင်တယ်”
“ပါးစပ်ပိတ်ထားစမ်းပါ၊ နင် စကားမပြောလို့ ဘယ်သူကမှ နင့်ကို ဆွံ့အတယ်လို့မထင်ပါဘူး”
ချန်တကုန်းက ကျိုးချောင်ဖန်ကို ဆူပူကြိမ်းမောင်းလိုက်သည်။
ကျိုးချောင်ဖန် အသက်ပြင်းပြင်း တစ်ချက်ရှူလိုက်သည်။
မည်သို့ပင်ဆိုစေ မိသားစု ကိစ္စများတွင် သူမ ပါဝင်ပြောဆိုခွင့် မရှိသဖြင့် တိတ်တဆိတ်သာ နေရတော့သည်။
“အစ်ကို၊ ဒီကိစ္စကို လောလောဆယ်မျိုသိပ်ထားလိုက်ပါဦး၊ မတိုင်ပါနဲ့၊
ဒီနေ့ကစပြီး အစ်ကိုနဲ့ ကျင်းပေါင် လုပ်ငန်းခွင်မှာ ဆက်မနေကြနဲ့တော့၊ လောလောဆယ် နေဖို့နေရာတစ်ခု သွားငှားထားလိုက်ပါ၊
ဆုံးရှုံးမှုတွေကို ကျွန်မ တာဝန်ယူပြီး ဒီကိစ္စကိုလည်း ကျွန်မပဲ ရှင်းလိုက်ပါ့မယ်”
ချန်မေ့လန်က ပြောလိုက်သည်။
ချန်တကုန်းမှာ နားမလည်နိုင်အောင် ဖြစ်သွားရသည်။
သူ၏ ဆေးတံကို အားရပါးရ ဖွာရှိုက်လိုက်ပြီးနောက် မေးလိုက်၏။
“မေ့လန်၊ နင် ဘယ်သူ့ကို သွားရန်စမိလို့လဲ၊ ငါက လူတွေကို ရန်စတတ်တဲ့သူမဟုတ်ဘူး၊
ပြီးတော့ ငါ ငှားထားတဲ့ အလုပ်သမားတွေ အားလုံးကလည်း သဘောကောင်းကြပါတယ်၊ ငါ သူတို့ကို ဘယ်တုန်းကမှ ညစ်ပတ်ပြီးမဆက်ဆံခဲ့ဖူးဘူး”
ဤဖြစ်ရပ်မှာ အလွန်ကြီးမားသောကိစ္စ မဟုတ်သော်လည်း စောင့်ကြည့်ကင်မရာမှတ်တမ်းများ မရှိချေ။
လူသူကင်းမဲ့သော ဆောက်လုပ်ရေးလုပ်ငန်းခွင်ဖြစ်သဖြင့် မျက်မြင်သက်သေများလည်း မရှိပေ။
အကယ်၍ သူတို့ တိုင်ကြားခဲ့လျှင် ရဲက မည်သို့ စုံစမ်းစစ်ဆေးနိုင်မည်နည်း။
ထို့အပြင် ယနေ့တွင် ခိုးယူမှုသာ ဖြစ်သည်။
အကယ်၍ သူတို့ တိုင်ကြားပြီး မနက်ဖြန် ရဲရောက်လာပါက ပြစ်မှုကျူးလွန်သူများအား ဒေါသထွက်စေပြီး နောက်တစ်ကြိမ်တွင် လူတစ်ဦးဦးကို အန္တရာယ်ပြုရန် ဆုံးဖြတ်လာပါက မည်သို့ လုပ်မည်နည်း။
ကျင်းပေါင်နှင့် အစ်ကိုဖြစ်သူတို့၏ အသက်များက ဤပစ္စည်းများထက် ပို၍တန်ဖိုးလေသည်။
ဖန်ရှန်က တစ်စုံတစ်ယောက်ကို ခိုင်းစေခဲ့ခြင်းဖြစ်ကြောင်း ချန်မေ့လန်၏ရင်တွင်း၌ ရှင်းလင်းစွာ သိရှိနေလေသည်။
ဤသို့ လုပ်ဆောင်ရခြင်း၏ အကြောင်းရင်းမှာ သူမကို အရှက်ခွဲရန် သူမအထက်တွင် မည်သူရှိကြောင်း ပြသရန်နှင့် တုန်းဖန်အုပ်စု၏ပရောဂျက်ကို လက်မခံရဲအောင် ခြိမ်းခြောက်ရန်ပင်ဖြစ်သည်။
ဖန်ရှန်သည် ချန်မေ့လန်ကို မည်သူ့ထက်မဆို ပို၍မုန်းတီးနေသည်။
သူမသည် ထိုအချိန်က အတွင်းခံတစ်ထည်ဖြင့် ယန်ရှီရှန်း၏ ကျောက်မီးသွေးတွင်းကို တိုက်ရိုက်ပိတ်ပစ်ခဲ့ရာ ယခုဆိုလျှင် တစ်နှစ်နီးပါး ကြာမြင့်ခဲ့ပြီဖြစ်သည်။
ချီတုန်မိန် ကလေးခိုးယူရန် သွားရောက်ခဲ့သော်လည်း ကလေးကို မရရှိခဲ့သည့်အပြင် ဖန်ရှန်၏ချွေးမကိုပါ ထိုလုပ်ငန်းစဉ်တွင် ပါဝင်ပတ်သက်စေခဲ့၏။
၎င်းမှာ နောက်ထပ်ကျရှုံးမှုတစ်ခုပင် ဖြစ်သည်။
ယခု ချန်မေ့လန်က ဖန်ရှန်၏ဝင်ငွေလမ်းကြောင်းကို ဖြတ်တောက်လိုနေပြန်သည်။
ဖန်ရှန်က သူမအား ကားဖြင့် တိုက်သတ်ရန် လူမလွှတ်ဘဲ ဆောက်လုပ်ရေး လုပ်ငန်းခွင်တွင် ပျက်စီးမှုအနည်းငယ်မျှသာ ဖြစ်ပေါ်စေခဲ့ခြင်းမှာ ယန်ကျောက်သည်လည်း ဥပဒေစိုးမိုးရေးဌာနတွင် ရှိနေသောကြောင့် သတိထားနေခြင်းဖြစ်သည်။
ဤကဲ့သို့သော ကိစ္စမျိုးကို ကိုင်တွယ်ဖြေရှင်းရန် ချန်မေ့လန်တွင် နည်းလမ်းမရှိချေ။
သူမ၏ မျှော်လင့်ချက်များကို ယန်ကျောက်အပေါ်တွင်သာ ပုံအပ်ထားရတော့သည်။
ယန်ကျောက်က ထိုဒေသခံ မြွေဟောက်ကြီး ဖန်ရှန်အား တကယ်ဖြုတ်ချနိုင်ရန်သာ သူမ မျှော်လင့်မိသည်။
နှစ်သစ်ကူး သတ္တမနေ့တွင် ယန်ကျောက် အိမ်ပြန်ရောက်လာသည်။
“ဖေဖေ၊ ဖေဖေ ဘာပြောလိုက်တယ်”
တံခါးအပြင်ဘက်မှ ရှောင်ဝမ်၏ ရုတ်တရက် အော်ဟစ်သံကို ကြားလိုက်ရသည်။
ယန်ကျောက်က အိမ်ထဲ ဝင်လာပြီး ပြတ်သားစွာ ပြောလိုက်၏။
“စန္ဒရားတစ်လုံး ဝယ်မယ်”
“မေမေ ကြားလား၊ ဖေဖေက ယွမ်ယွမ်အတွက် စန္ဒရားတစ်လုံး ဝယ်ပေးချင်တယ်လို့ ပြောတယ်”
ရှောင်ဝမ်သည် တံခါးပေါက်မှ ခုန်ပေါက်ကာ ဝင်လာလေသည်။
ယွမ်ယွမ်က ဝိုး” ဟု အာမေဍိတ်သံ ပြုလိုက်ပြီး ရှောင်ဝမ်အား ပြောလိုက်၏။
“ဖေဖေ ဆုကြေးငွေ ရလာတာဖြစ်ရမယ်”
ရှောင်ဝမ်ကလည်း ယွမ်ယွမ်အတွက် အကြောင်းပြချက်တစ်ခု ကူညီဖန်တီးပေးလိုက်သည်။
“ဟုတ်တယ်၊ ဖေဖေ ဆုကြေးငွေအများကြီး ရလာတာ ဖြစ်ရမယ်၊ အဲဒါကြောင့် ယွမ်ယွမ်ကို စန္ဒရားဝယ်ပေးချင်တာ”
“ရှင် တကယ်ပဲ ဆုကြေးငွေ ရလာတာလား”
ချန်မေ့လန် အနည်းငယ် သံသယဝင်သွားသည်။
ယန်ကျောက်က ပြန်လည်ဖြေကြားလိုက်၏။
“ပိုက်ဆံက ရှီရှန်းဆီက ရတာပါ”
ချန်မေ့လန်က ပြတ်သားစွာ ငြင်းဆိုလိုက်သည်။
“မဖြစ်နိုင်တာ၊ ယန်ရှီရှန်းရဲ့ ပိုက်ဆံတွေ အားလုံးက ယွမ်ယွမ်ရဲ့ အများပိုင်ငွေစာရင်းထဲမှာလေ၊
သူက ဘယ်ကနေ ပိုက်ဆံ ရလာမှာလဲ၊ ရှင့်ရဲ့ စစ်တပ်ကရတဲ့ ဆုကြေးငွေပဲဖြစ်ရမယ်”
ယန်ကျောက်က ထပ်မံ အတည်ပြုလိုက်သည်။
“ပိုက်ဆံက ရှီရှန်းဆီက ရတာပါ”
ချန်တကုန်းက ဝင်ပြောလိုက်၏။
“ယန်ကျောက်က နှိမ့်ချလွန်းနေတာပါကွာ”
ကျိုးချောင်ဖန်ကလည်း ထောက်ခံလိုက်သည်။
“ရှီရှန်းက အရမ်းကပ်စေးနဲတဲ့သူလေ၊ ကွာရှင်းတုန်းက မေ့လန်ကို တစ်ပြားမှမပေးခဲ့ဘူး၊ အခုကျမှ သူ့ကို ဘယ်လိုလုပ် ပိုက်ဆံပေးမှာလဲ၊ ပေးပါဦးမယ်အားကြီးကြီး”
ယန်ရှီရှန်းကဲ့သို့ ကပ်စေးနဲသော လူတစ်ယောက်က ယွမ်ယွမ်အား ယွမ်တစ်သောင်းခွဲတိတိ ပေးမည်ဆိုသည်ကို မိသားစုဝင်တစ်ယောက်မျှ မယုံကြည်လိုကြချေ။
ထို့ကြောင့် ချန်မေ့လန် ကိုယ်တိုင်ပင်လျှင် ထိုငွေမှာ ယန်ကျောက်၏ဆုကြေးငွေ ဖြစ်သည်ဟု အလိုအလျောက် ယူဆလိုက်လေသည်။
ယန်ကျောက်အနေဖြင့် အိမ်သို့ ပစ္စည်းများယူဆောင်လာခြင်းမှာ သဘာဝကျပေသည်။
ယွမ်ယွမ်အတွက် စန္ဒရားဝယ်ပေးလိုသော ဖထွေးသည် သူ့တာဝန်ကို အလွန် ကောင်းမွန်စွာ ထမ်းဆောင်နေခြင်းပင်ဖြစ်သည်။
ယွမ်ယွမ်တွင် စန္ဒရားတစ်လုံး ရှိသင့်သော်လည်း ချန်မေ့လန်ထံမှ ပြီးခဲ့သည့်ခြောက်လအတွင်း ကတိစကား အလွတ်များသာ ရရှိခဲ့သည်။
သူမ၏ လက်ထဲတွင် ငွေမရှိရုံသာမက ဆောက်လုပ်ရေး လုပ်ငန်းခွင်တွင်လည်း ပစ္စည်းများစွာ ဆုံးရှုံးခဲ့ရပြီး အားလုံးကို အစားထိုးရန်အတွက် ငွေပေးချေရဦးမည်ဖြစ်သည်။
“စန္ဒရား ဝယ်လို့ရပါတယ်၊ ကျွန်မ ငွေရလာရင် ရှင့်ကို ပြန်ဆပ်ပါ့မယ်”
သူမ ပြုံးလိုက်ပြီး ကလေးများ သတိမထားမိခိုက် ယန်ကျောက်၏နားနားသို့ ကပ်ကာ တိုးတိုးလေး ခေါ်လိုက်၏။
“ကျေးဇူးတင်ပါတယ် တတိယအစ်ကို”
မျက်စိတစ်မှိတ်အတွင်းမှာပင် ယန်ကျောက်၏ နားရွက်များမှာ နီရဲလာရုံသာမက ယုန်နားရွက်များ ထောင်မတ်သွားသကဲ့သို့ ဖြစ်သွားသည်။
ကလေးများအားလုံး ရှိနေသဖြင့် သူက လှည့်ကာ အခန်းထဲမှ အလျင်အမြန် ထွက်သွားလေသည်။