အခန်း ၁၁၁

အခန်း ၁၁၁ ထူးခြားမှုမရှိပါက မတော်တဆမှုသာ ဖြစ်ပေမည်

ဗီရိုနီးစ်၏ စကားသံ အဆုံးတွင် အမှတ် ငါး စုံစမ်းစစ်ဆေးရေးအဖွဲ့ရှိ လူတိုင်း၏ မျက်မှောင်များက အလိုအလျောက် ကျုံ့ဝင်သွားလေသည်။

သြဂတ်စ်သည်လည်း ထိုအထဲတွင် အပါအဝင် ဖြစ်ပေသည်။ ဗီရိုနီးစ်က ဤအချက်ကို သြဂတ်စ်အား ကြိုတင် အသိပေးထားခြင်း မရှိခဲ့ချေ။

ရိုအန်က လက်ထဲရှိ အချက်အလက်များကို လှန်လှောကြည့်ရှုလိုက်၏။ စက္ကန့်အနည်းငယ်ကြာ စဉ်းစားပြီးနောက် ခေါင်းမော့ကာ မေးမြန်းလိုက်လေသည်။

"ခေါင်းဆောင်... ဒီ အီဗန်ဒါ ဒေးဗစ်က ကျွန်တော်တို့ အက်ဖ်ဘီအိုင်နဲ့ တစ်ခုခု ပတ်သက်နေလို့လား..."

ဗီရိုနီးစ်က ခေါင်းယမ်းပြလိုက်လေသည်။

"သိရသလောက်တော့ ဘာမှ မပတ်သက်ဘူး..."

ဘေးနားရှိ မိုနာက တစ်စုံတစ်ခုကို သတိရသွားဟန်ဖြင့် မျက်နှာအမူအရာ အနည်းငယ် ပျက်ယွင်းစွာ ဝင်ရောက်မေးမြန်းလာ၏။

"ဒါဆို ဒီ အီဗန်ဒါ ဒေးဗစ်က ဝါရှင်တန်က အရာရှိတစ်ယောက်ယောက်နဲ့ ဆွေမျိုးတော်စပ်နေတာလား..."

မှတ်တမ်းထဲတွင် ထိုအချက်ကို ဖော်ပြထားခြင်း မရှိပေ။ ဗီရိုနီးစ်က မိုနာ၏ စကားထဲမှ ဆိုလိုရင်းကို နားလည်သဖြင့် ခေါင်းယမ်းလိုက်ပြီး တည်ကြည်သော မျက်နှာထားဖြင့် ရှင်းပြလေသည်။

"မှတ်တမ်းထဲမှာတော့ အဲဒီအချက် မပါဘူး... အားလုံးပဲ... ဒီတစ်ခေါက် တာဝန်က ပုံမှန် စစ်ဆေးရမယ့် ကိစ္စတစ်ခုပါပဲ... မနေ့ညက အီဗန်ဒါ ဒေးဗစ် ကြုံတွေ့ခဲ့ရတဲ့ ယာဉ်တိုက်မှုကို မတော်တဆမှု ဟုတ်မဟုတ် သေချာအောင် စစ်ဆေးပေးရုံနဲ့တင် လုံလောက်ပြီ... နားလည်ကြရဲ့လား..."

အမှတ် ငါး စုံစမ်းစစ်ဆေးရေးအဖွဲ့မှ စုံထောက်များအားလုံးက တညီတညွတ်တည်း ခေါင်းညိတ်ပြလိုက်ကြ၏။

"နားလည်ပါပြီ..."

ဗီရိုနီးစ်က သြဂတ်စ်ဘက်သို့ ခေါင်းစောင်းကြည့်လိုက်လေသည်။

"သြဂတ်စ်... နောက်ပိုင်းကိစ္စတွေကို တာဝန်ယူလိုက်တော့..."

သြဂတ်စ်က ချက်ချင်း တုံ့ပြန်လိုက်ပေသည်။

"ပြဿနာမရှိပါဘူး ခေါင်းဆောင်..."

သြဂတ်စ်၏ တည်ငြိမ်သော အဖြေကို ကြားသောအခါ ဗီရိုနီးစ်က ကျေနပ်စွာ ခေါင်းညိတ်ပြ၏။ ထို့နောက် ရိုအန်ကို တစ်ချက် အကဲခတ်ကြည့်ပြီး အမှတ် ငါး စုံစမ်းစစ်ဆေးရေးအဖွဲ့၏ ရုံးခန်းဆောင်ထဲမှ လှည့်ထွက်သွားလေသည်။

ဗီရိုနီးစ်၏ ကျောပြင် ပျောက်ကွယ်သွားသည်နှင့် တစ်ပြိုင်နက် သြဂတ်စ်က လက်ထဲရှိ ဖိုင်တွဲကို စားပွဲပေါ်သို့ ပစ်ချလိုက်လေသည်။

"ကဲ... အားလုံးပဲ... ဒီအမှုက ကြည့်ရတာ သိပ်ပြီး ရှုပ်ထွေးမယ့်ပုံ မပေါ်ဘူး..."

နောက်ဆက်တွဲ လုပ်ငန်းစဉ်များကို စတင် ခွဲဝေချထားပေးရန် ပြင်ဆင်နေစဉ် ရိုအန်နှင့် လေစီ နှစ်ဦးက တစ်ခုခု ပြောလိုဟန်ဖြင့် ရုတ်တရက် လက်ထောင်ပြလာကြ၏။

သြဂတ်စ်၏ မျက်မှောင်များ ပင့်တက်သွားပေသည်။

"ဘာဖြစ်လို့လဲ... မင်းတို့နှစ်ယောက်က သဲလွန်စတွေကို ဒီလောက်မြန်မြန် ရှာတွေ့သွားတာလား..."

ရိုအန်က ပြုံးလိုက်ပြီး လေစီ့ဘက်သို့ အကြည့်ရွှေ့လိုက်လေသည်။

"သဲလွန်စဆိုတာကတော့ ဟုတ်တယ်... ဒါပေမဲ့ ဒီအမှုနဲ့ သက်ဆိုင်တာတော့ မဟုတ်ဘူး..."

လေစီက အချိန်ဆွဲမနေတော့ဘဲ စားပွဲပေါ်ရှိ လက်ပ်တော့ကို ကောက်ကိုင်လိုက်၏။ ယမန်နေ့ညက အိုဂဒန် နှင့် ဆုံတွေ့ခဲ့ရပုံကို သြဂတ်စ်အား အကျဉ်းချုပ် ရှင်းပြလိုက်လေသည်။

လေစီ၏ ရှင်းပြချက် အဆုံးတွင် သြဂတ်စ် တစ်ယောက် အံ့အားသင့်သွားပြီးနောက် သွားပေါ်အောင် ပြုံးလိုက်လေသည်။

"မင်း တော်တော်လေး ကံကောင်းတာပဲ လေစီ... မနေ့ညက ထီလက်မှတ် အချို့လောက် ဝင်ဝယ်သွားဖို့ အချိန်မရခဲ့ဘူးလား..."

လေစီက ပခုံးတွန့်ပြလိုက်၏။

"ခဏနေရင် သွားဝယ်ဖို့ ဆုံးဖြတ်ထားတယ်... ဒီ အိုဂဒန်ကို ဘယ်လို ဆက်လုပ်ကြမလဲ..."

"သူ့ကို ချက်ချင်း သွားဖမ်းရမှာပေါ့..."

အိုဂဒန်၏ ဆုကြေးငွေမှာ ဒေါ်လာ ၄၀၀,၀၀၀ ခန့် ရှိပေသည်။ ငွေများလာသည်ကို မည်သူက ငြင်းဆန်မည်နည်း။ သြဂတ်စ်က ခဏတာ စဉ်းစားပြီးနောက် ရက်ဒ်၏ ပခုံးကို ပုတ်ကာ လေစီ့ဘက်သို့ လှည့်ပြောလိုက်လေသည်။

"မင်းတို့နှစ်ယောက် အတူတူ သွားကြ... လုံခြုံရေးကို ဂရုစိုက်ပြီး သတိထားဖို့တော့ လိုမယ်..."

ရက်ဒ်နှင့် လေစီ နှစ်ဦးလုံးက ခေါင်းညိတ်ကာ လက်ခံလိုက်ကြ၏။

"ကောင်းပါပြီ ခေါင်းဆောင်..."

ရက်ဒ်နှင့် လေစီ နှစ်ဦး လက်နက်တိုက်ဘက်သို့ ထွက်သွားသည်ကို ကြည့်ပြီးနောက် သြဂတ်စ်က ရိုအန်ဘက်သို့ လှည့်လာခဲ့ချေသည်။

"ရိုအန်... ယာဉ်တိုက်မှုက မတော်တဆမှု ဟုတ်မဟုတ် စစ်ဆေးရမယ့် အမှုကိုတော့ မင်းနဲ့ မိုနာဆီ လွှဲပေးလိုက်ပြီ..."

ရိုအန်က ခေါင်းညိတ် လက်ခံလိုက်ပြီးနောက် သက်ပြင်းရှည်ကြီးကို ချလိုက်ပေသည်။

"ပြဿနာ မရှိပါဘူး..."

ရိုအန်က အိုဂဒန်ကို ဖမ်းဆီးသည့် ကိစ္စတွင် ပါဝင်ချင်နေ၍ မဟုတ်ချေ။ အိုဂဒန်နှင့် ပတ်သက်သော သဲလွန်စများကို အစောပိုင်းကတည်းက ရိုအန်ကိုယ်တိုင် ရှာဖွေတွေ့ရှိခဲ့ခြင်း ဖြစ်သည်။ ထိုကောင်ကို ဖမ်းမိသွားပါက ရိုအန်လည်း ငွေတစ်မိုက်တစ်ခဲ ရရှိမည် ဖြစ်ပေသည်။

ရိုအန် သက်ပြင်းချရခြင်း၏ အဓိက အကြောင်းရင်းမှာ ယခု ယာဉ်တိုက်မှု ကြောင့်သာ ဖြစ်၏။ ထိုအမှုတွဲကို မြင်လိုက်ရသည်နှင့် တစ်ပြိုင်နက် ရိုအန်၏ စိတ်ထဲတွင် အလိုလို သိမြင်နေသော ခံစားချက်တစ်ခု ပေါ်ထွက်လာခဲ့ချေသည်။

'ထူးခြားမှုမရှိဘူးဆိုရင်တောင် ဒီယာဉ်တိုက်မှုက ရိုးရိုး မတော်တဆမှုတော့ မဖြစ်နိုင်ဘူး...'

သေဆုံးသူ အီဗန်ဒါ ဒေးဗစ်၏ နေအိမ်တွင် ဖြစ်လေသည်။

ဧည့်ခန်းထဲတွင် အီဗန်ဒါ၏ ဇနီး တန်နီယာ ၏ မျက်လုံးများက နီရဲလျက်ရှိပြီး ရှိုက်ကြီးတငင် ငိုကြွေးနေပေသည်။

"မနေ့ညက အီဗန်ဒါ ကားမောင်းလာတုန်း ရုတ်တရက် ထွက်လာတဲ့ တိရစ္ဆာန် တစ်ကောင်ကောင်ကို ရှောင်လိုက်ရာကနေ လမ်းဘေးက သစ်ပင်ကြီးကို ဝင်တိုက်မိသွားတာ ဖြစ်နိုင်တယ်လို့ နယူးယောက် ရဲတပ်ဖွဲ့က ပြောသွားတယ်... အဲဒီအချိန်က ကျွန်မ ညစာ လုပ်ထားပြီး အိမ်ကနေ အီဗန်ဒါ့ကို စောင့်နေခဲ့တာ... ဒါပေမဲ့ တကယ်တမ်း ဖြစ်လာတော့..."

ယမန်နေ့ညက ဖြစ်ပွားခဲ့သော ယာဉ်တိုက်မှု နေရာမှာ နယူးယောက်မြို့ ဆင်ခြေဖုံးရှိ သစ်တောအုပ်ငယ်လေး တစ်ခုအတွင်းတွင် ဖြစ်သည်။ အီဗန်ဒါ မောင်းနှင်လာသော ကားသည် လမ်းဘေးရှိ သစ်ပင်ကြီးတစ်ပင်ကို ဝင်တိုက်မိသွားခဲ့၏။ ကားခေါင်းပိုင်းမှာ အပေါ်သို့ ပင့်တက်သွားပြီး ယာဉ်မောင်းဖြစ်သူ အီဗန်ဒါ၏ ဦးခေါင်းတွင် ပြင်းထန်သော ဒဏ်ရာရရှိကာ ပွဲချင်းပြီး သေဆုံးသွားခဲ့ခြင်း ဖြစ်ပေသည်။

တန်နီယာ၏ ဘေးတွင် ထိုင်နေသော မိုနာက တစ်ရှူးတစ်ရွက်ကို ဆွဲထုတ်၍ ကမ်းပေးလိုက်လေသည်။

"စိတ်မကောင်းပါဘူး..."

ရိုအန်ကမူ တန်နီယာ၏ ခွင့်ပြုချက်ကို ရယူပြီးနောက် အီဗန်ဒါ၏ စာကြည့်ခန်းထဲသို့ ဝင်ရောက်သွားခဲ့၏။

တန်နီယာကို အတန်ကြာ နှစ်သိမ့်ပေးပြီးနောက် တန်နီယာ၏ စိတ်လှုပ်ရှားမှုများ အနည်းငယ် တည်ငြိမ်သွားသည်ကို မိုနာ မြင်တွေ့လိုက်ရသည်။ ထို့ကြောင့် အသံကို ညင်သာစွာ ထား၍ မေးမြန်းလိုက်ပေသည်။

"တန်နီယာ... အီဗန်ဒါက ဘာအလုပ်လုပ်တာလဲ... အစိုးရနဲ့ရော ပတ်သက်မှု ရှိနေလား..."

တန်နီယာက တစ်ရှူးဖြင့် မျက်နှာပေါ်ရှိ မျက်ရည်စများကို သုတ်ဖယ်လိုက်ပြီး တိုးတိတ်သော အသံဖြင့် ဖြေကြားလာ၏။

"အီဗန်ဒါက ဓာတ်ပုံ သတင်းထောက် တစ်ယောက်ပါ... ကျွန်မတို့ လက်ထပ်ခဲ့တာ တစ်နှစ်ပဲ ရှိသေးတယ်... အီဗန်ဒါရဲ့ အလုပ်နဲ့ ပတ်သက်ပြီး ကျွန်မကို ပြောပြလေ့ သိပ်မရှိပါဘူး..."

တန်နီယာ ပြောပြသွားသော အချက်အလက်များမှာ အမှတ် ငါး စုံစမ်းစစ်ဆေးရေးအဖွဲ့မှ ကြိုတင် ရှာဖွေထားသော အချက်အလက်များနှင့် အခြေခံအားဖြင့် တူညီနေပေသည်။

မိုနာက စက္ကန့်အနည်းငယ်ကြာ စဉ်းစားပြီးနောက် တိုးတိတ်သော အသံဖြင့် ဆက်လက် မေးမြန်းလိုက်လေသည်။

"အီဗန်ဒါ မသေခင်က တစ်ယောက်ယောက်နဲ့ ပြဿနာ ဖြစ်ထားတာမျိုး ရှိလား... ဒါမှမဟုတ် အီဗန်ဒါ့ကို ထိခိုက်အောင် လုပ်မယ့်သူ ရှိတယ်လို့ရော ပြောပြဖူးလား..."

တန်နီယာက ခေါင်းကို ဆက်တိုက် ယမ်းပြလိုက်၏။

"အီဗန်ဒါရဲ့ စိတ်သဘောထားက အရမ်းကောင်းတာပါ... ဒေါသထွက်လေ့လည်း မရှိဘူး... အဲဒီအချက်ကြောင့်ပဲ ကျွန်မ အီဗန်ဒါ့ကို လက်ထပ်ခဲ့တာ... အီဗန်ဒါက လုပ်ဖော်ကိုင်ဖက်တွေနဲ့လည်း ဆက်ဆံရေး အရမ်းကောင်းတယ်... သူတို့ အားလုံးနဲ့ ကျွန်မ တွေ့ဖူးပါတယ်... ဘယ်သူကမှ အီဗန်ဒါအပေါ် ရန်ငြိုးထားမယ့်ပုံ မပေါ်ပါဘူး..."

မိုနာက မျက်မှောင် အနည်းငယ် ကျုံ့လိုက်ပြီး ထပ်မံ မေးမြန်းလိုက်ပေသည်။

"အီဗန်ဒါရဲ့ မကြာသေးခင်က အလုပ်ကိစ္စတွေကိုရော တန်နီယာ သိထားတာများ ရှိလား..."

အီဗန်ဒါ၏ အလုပ်အကိုင်မှာ ဓာတ်ပုံ သတင်းထောက်ဖြစ်ကြောင်း သိလိုက်ရသည့် အချိန်တွင် မိုနာ၏ စိတ်ထဲ၌ ခန့်မှန်းချက် တစ်ခု ပေါ်ထွက်လာခဲ့ချေသည်။

'အီဗန်ဒါ တစ်ယောက် ရိုက်ကူးခွင့် မရှိတဲ့ အရာတွေကိုများ သွားရိုက်မိပြီး လူသတ် ပိတ်ပင်ခံရတာများလား...'

တန်နီယာက စကားပြောနေရင်းမှ ရုတ်တရက် မျက်နှာအမူအရာ ပြောင်းလဲသွားပြီး နောက်ဆုံးတွင် တစ်စုံတစ်ခုကို သတိထားမိသွားဟန် ရှိလေသည်။

"ကျွန်မ ခုနက ပြောသလိုပဲ... အီဗန်ဒါက သူ့အလုပ်ကိစ္စတွေကို ကျွန်မကို ပြောပြလေ့ သိပ်မရှိဘူး... မကြာသေးခင်က အီဗန်ဒါ ခရီးတစ်ခု ထွက်သွားတယ်... အချိန်ကတော့ တစ်ပတ်တောင် မပြည့်ပါဘူး... နေပါဦး... အက်ဖ်ဘီအိုင်က ဘာလို့ ဒီမေးခွန်းတွေကို လာမေးနေရတာလဲ... ဘာလို့ ဒီယာဉ်တိုက်မှု အကြောင်းကို လာစစ်ဆေးနေရတာလဲ..."

တန်နီယာက စိုးရိမ်တကြီးဖြင့် မိုနာ၏ ပခုံးကို တင်းကျပ်စွာ ဆုပ်ကိုင်ထားသည်ကို မြင်သောအခါ စာကြည့်ခန်းထဲမှ ထွက်လာသော ရိုအန်က ညင်သာသော အသံဖြင့် ဝင်ရောက် ရှင်းပြလိုက်၏။

"ကျေးဇူးပြုပြီး စိတ်အေးအေး ထားပါ ဒေးဗစ် ကတော်... ဒါတွေက လုပ်ရိုးလုပ်စဉ် စစ်ဆေးမေးမြန်းမှုတွေပါပဲ..."

ရိုအန်၏ စကားကို ကြားပြီးနောက် တန်နီယာမှာ ခေတ္တမျှ တိတ်ဆိတ်သွားပြီးနောက် ဆုပ်ကိုင်ထားသော လက်ကို လွှတ်ပေးကာ ဖြည်းညင်းစွာ ခေါင်းညိတ်ပြလိုက်ပေသည်။

"ကောင်းပါပြီ..."

နောက်ထပ် မေးခွန်းအချို့ကို ဆက်လက် မေးမြန်းပြီးနောက် ရိုအန်က ရိုအန်၏ လိပ်စာကတ်ကို တန်နီယာထံ ပေးအပ်လိုက်လေသည်။ နောက်ပိုင်းတွင် တစ်စုံတစ်ခုကို သတိရလာပါက ဖုန်းဆက် အကြောင်းကြားနိုင်ကြောင်း ပြောပြခဲ့ပေသည်။ ထို့နောက် ရိုအန်နှင့် မိုနာ နှစ်ဦးသည် အီဗန်ဒါ၏ နေအိမ်မှ ထွက်ခွာလာခဲ့ကြလေသည်။

အက်စ်ယူဗီ ကား၏ ယာဉ်မောင်းဘေးခုံတွင် ဝင်ထိုင်ပြီးနောက် မိုနာက လက်ပ်တော့ကို ဖွင့်ကာ စာရိုက်နေရင်း မေးမြန်းလာလေသည်။

"တန်နီယာ ဆီက ရတဲ့ အချက်အလက်တွေ အရဆိုရင်တော့ ဒါက ရိုးရိုး မတော်တဆ ယာဉ်တိုက်မှု သက်သက်ပါပဲ... ရှင်ရော ရိုအန်... ခုနက ဘာတွေများ ရှာတွေ့ခဲ့သေးလဲ..."

ယာဉ်မောင်းခုံတွင် ထိုင်နေသော ရိုအန်က ကားစက်နှိုးလိုက်ပြီး ခေါင်းယမ်းပြလိုက်၏။

"စာကြည့်ခန်းထဲမှာတော့ အသုံးဝင်မယ့် အချက်အလက် ဘာမှ မတွေ့ခဲ့ဘူး... လက်ပ်တော့ကလည်း အီဗန်ဒါနဲ့အတူ အမြဲ ရှိနေတာလေ... ဒါပေမဲ့ ခုနက တန်နီယာ ပြောသွားတဲ့ အထဲမှာ အီဗန်ဒါ မကြာသေးခင်က ခရီးထွက်ခဲ့တယ် ဆိုတာပါတယ်... အီဗန်ဒါ ခရီးထွက်ခဲ့တဲ့ နေရာနဲ့ အသေးစိတ် အချက်အလက်တွေကို စုံစမ်းကြည့်ဖို့ လိုမယ်လို့ ထင်တယ်..."

"ကျွန်မ ရှာနေပြီ..."

မိုနာက လက်ထဲရှိ ကွန်ပျူတာကို လက်ညိုးထိုးပြကာ မိုနာကိုယ်တိုင် အလုပ်လုပ်နေကြောင်း အချက်ပြလိုက်ပေသည်။

ရိုအန်က အိတ်ကပ်ထဲမှ ဖုန်းကို ထုတ်ကြည့်လိုက်ပြီးနောက် မျက်မှောင်ပင့်ကာ ဆက်ပြောလိုက်၏။

"ကျွန်တော်ဆီကို သတင်း နှစ်ခု ဝင်လာတယ်... အီဗန်ဒါ ယာဉ်တိုက်မှု ဖြစ်ခဲ့တဲ့ ကားကို ဂျေးကော့ ဖက်ဒရယ် ရုံးအဆောက်အအုံဆီ စပြီး ရွှေ့ပြောင်းနေပြီတဲ့... ဒါပေမဲ့ အီဗန်ဒါရဲ့ ရုပ်အလောင်းကတော့ နယူးယောက် ရဲတပ်ဖွဲ့ဆီမှာပဲ ရှိသေးတယ်... အဲဒါကြောင့် ကျွန်တော်တို့ အရင်ဆုံး နယူးယောက် ရဲတပ်ဖွဲ့ဆီ သွားပြီး အီဗန်ဒါရဲ့ ရုပ်အလောင်းကို စစ်ဆေးရမယ်... ပြီးမှ သူ့ရဲ့ လက်ပ်တော့ကို ယူပြီး ဂျေးကော့ ဖက်ဒရယ် ရုံးအဆောက်အအုံကို ပြန်ကာ ကားကို သွားစစ်ကြတာပေါ့..."

မိုနာက ရိုအန်အား ပြဿနာမရှိကြောင်း လက်ဟန်ခြေဟန်ဖြင့် အိုကေ အချက်ပြလိုက်၏။ မိုနာ၏ လက်ချောင်းဆယ်ချောင်းမှာ ကီးဘုတ်ပေါ်တွင် လျင်မြန်စွာ လှုပ်ရှားနေလေသည်။ ထိုအရာကို မြင်သောအခါ ရိုအန်က ကားလီဗာကို အရှိန်မြှင့် နင်းလိုက်ရာ အမည်းရောင် အက်စ်ယူဗီ ကားကြီးသည် နယူးယောက် ရဲတပ်ဖွဲ့ ရှိရာ အရပ်သို့ ဦးတည် ပြေးထွက်သွားပေတော့သည်။

နယူးယောက် ရဲတပ်ဖွဲ့၏ ရုပ်အလောင်း စစ်ဆေးရေး အခန်းအတွင်းတွင် ဖြစ်ပေသည်။ ရိုအန်နှင့် မိုနာ နှစ်ဦး၏ လာရင်းကိစ္စကို သိရှိပြီးနောက် လူဖြူ မှုခင်းဆေးပညာရှင် အဘိုးကြီးက လက်နှစ်ဖက်ကို ဖြန့်ပြလိုက်၏။

"ဒီလူကြီးရဲ့ သေဆုံးရတဲ့ အကြောင်းရင်းကတော့ ရှင်းပါတယ်... ယာဉ်တိုက်မှုကြောင့် သူ့ရဲ့ ဦးခေါင်းနဲ့ ရင်ဘတ်ပိုင်းမှာ ပြင်းထန်တဲ့ ဒဏ်ရာတွေ ရသွားပြီး နောက်ဆုံးမှာ သေဆုံးသွားတာပါပဲ..."

ရိုအန်က မေးစေ့ကို ပွတ်သပ်ကာ စက္ကန့်အနည်းငယ်ကြာ စဉ်းစားပြီးနောက် ခေါင်းစောင်း၍ မေးလိုက်လေသည်။

"ဒါဆို သွေးစစ်ချက် အဖြေကရော... တစ်ခုခုများ ထူးခြားတာ တွေ့ရသေးလား..."

ထိုစကားကို ကြားသောအခါ မှုခင်းဆေးပညာရှင် အဘိုးကြီးက ပြုံးလိုက်ပြီး လက်ဖျောက်တစ်ချက် တီးလိုက်ပေသည်။

"မေးတတ်တယ်ကွ…”