အခန်း ၁၂၈

အခန်း ၁၂၈ နေရာမှာပင် သွေးအန်သွားခြင်း။

ဖုန်းချလိုက်ပြီးနောက် လေစီက လေကို ခပ်ပြင်းပြင်း တစ်ချက် ရှူသွင်းလိုက်လေသည်။ ထို့နောက် သူမရှေ့တွင် အပြုံးမျက်နှာဖြင့် ရပ်နေသော တယ်ရီကို စူးရဲစွာ စိုက်ကြည့်ကာ ဒေါသတကြီးဖြင့် စကားဆိုလိုက်၏။

"မဒမ် ဟယ်လွိုက်စ်ရဲ့ လက်အောက်ငယ်သား... တယ်ရီ မဟုတ်လား... ဒီနေ့ ကိစ္စကို ငါ့ရင်ထဲမှာ သေသေချာချာ မှတ်ထားလိုက်မယ်"

စကားဆုံးသည်နှင့် တယ်ရီ ပြန်ပြောမည့်စကားကိုပင် မစောင့်တော့ဘဲ လေစီက သေနတ်ကို သိမ်းဆည်းကာ ထိုနေရာမှ ခပ်မြန်မြန် ထွက်ခွာသွားခဲ့ပေသည်။ အမြန် မသွား၍လည်း မဖြစ်ချေ။ လေစီမှာ ပရော်ဖက်ရှင်နယ် လေ့ကျင့်မှုမျိုး ခံယူထားခြင်း မရှိသဖြင့် သူမကိုယ်သူမ ဒေါသ မထိန်းနိုင်မည်ကို စိုးရိမ်နေခဲ့လေသည်။

လေစီ၏ ပြေးထွက်သွားသော ကျောပြင်ကို ကြည့်ရင်း တယ်ရီက ခပ်ဟဟ ရယ်မောလိုက်၏။ ထို့နောက် နှုတ်ခမ်းကို သပ်ကာ လှည့်၍ တိုက်ခန်း အဆောက်အအုံ အတွင်းသို့ ဝင်ရောက်သွားခဲ့ပေသည်။

သို့သော် ဓာတ်လှေကား တံခါး ပိတ်သွားသည့် စက္ကန့်ပိုင်းလေး အတွင်းမှာပင် လေစီ ပြေးသွားသော ဦးတည်ရာကို တွေးမိသွားပြီးနောက် တယ်ရီ၏ မျက်နှာအမူအရာ ချက်ချင်း ပြောင်းလဲသွားချေသည်။

"သောက်ကျိုးနည်း... ဖြစ်နိုင်တာက"

ခေါင်းထဲမှ ခန့်မှန်းချက်များကို တွေးမိသွားသောအခါ တယ်ရီ၏ မျက်နှာထားမှာ ရေညှစ်ချလို့ ရမတတ် မည်းမှောင်သွားပြီး ဓာတ်လှေကား ခလုတ်ကို ရူးသွပ်နေသူ တစ်ဦးအလား ဆက်တိုက် နှိပ်နေခဲ့လေတော့သည်။

ခဏအကြာတွင် တယ်ရီသည် လေစီ ပြေးသွားသော လမ်းကြောင်းအတိုင်း လိုက်သွားကာ မျက်နှာချင်းဆိုင်ရှိ တိုက်ခန်း အဆောက်အအုံ၏ အောက်ခြေသို့ အပြေးအလွှား ရောက်ရှိသွားခဲ့ပေသည်။ တယ်ရီ တစ်ယောက် ဘယ်သွားရမှန်း မသိဖြစ်နေချိန်မှာပင် လူနာတင်ယာဉ် တစ်စီးက တယ်ရီ၏ ဘေးတွင် ရုတ်တရက် လာရောက် ရပ်တန့်သွားလေသည်။ ထိုမြင်ကွင်းကို မြင်သောအခါ တယ်ရီ၏ မျက်ဝန်းများ အရောင်လက်သွားပြီး သူနာပြုများ၏ နောက်သို့ အလျင်အမြန် လိုက်ပါကာ ဓာတ်လှေကားပေါ်သို့ တက်သွားခဲ့ချေသည်။

ထို့နောက် ခေါင်မိုးပေါ်သို့ ရောက်ရှိသွားသောအခါ ရိုအန်နှင့် လေစီတို့ နှစ်ဦးပေါင်း၍ လက်ထိတ် ခိုင်ခိုင်မာမာ ခတ်ခံထားရသော ဂျက်ကွဲကို လူနာတင်စင်ပေါ်သို့ တင်နေသည့် မြင်ကွင်းကို တယ်ရီ မြင်တွေ့လိုက်ရလေတော့သည်။ တယ်ရီမှာ ဆွံ့အလျက် ဘာစကားမျှ မပြောနိုင်အောင် ဖြစ်သွားခဲ့ပေသည်။

နဖူးပေါ်ရှိ မရှိသော ချွေးများကို သုတ်ဟန်ဆောင်လိုက်ရင်း လေစီက ဤနေရာသို့ ရောက်ရှိလာသော တယ်ရီကို မြင်လိုက်ရသောအခါ မျက်ဝန်းများ အရောင်လက်သွားလေသည်။ တယ်ရီ၏ ပုံစံကို အတုခိုးကာ ချောင်းတစ်ချက် ဟန့်လိုက်ပြီးနောက် လေစီက ဘေးနားတွင် လက်ပ်တော့ ကွန်ပျူတာ ပွေ့ချီကာ ရပ်နေသော မိုနာကို လက်ညှိုးထိုးပြရင်း ပြုံး၍ စကားဆိုလိုက်၏။

"မင်းတို့ စီအိုင်အေ တွေက မိုနာ့ကို လာရှာတာ မဟုတ်လား... အခု မိုနာ ဒီမှာ ရှိနေပြီ... ဘာမေးချင်တာ ရှိလဲ... အခု မေးလို့ ရပြီ"

စောစောကမှ လေစီ ရှင်းပြသော အဖြစ်အပျက်များကို ကြားထားရသည့် ရိုအန်နှင့် မိုနာတို့က အချင်းချင်း မျက်လုံးချင်း ဆုံလိုက်ကြပြီးနောက် တယ်ရီထံသို့ အကြည့်များ တစ်ပြိုင်နက်တည်း ပို့လွှတ်ကာ အပြုံးကိုယ်စီ ဖန်တီးလိုက်ကြပေသည်။

ရိုအန်နှင့် မိုနာတို့၏ မျက်နှာပေါ်ရှိ အမူအရာများကို မြင်လိုက်ရသောအခါ တယ်ရီ၏ မျက်နှာမှာ ဒေါသကြောင့် နီရဲတက်လာခဲ့လေသည်။ အချိန်အတန်ကြာ တိတ်ဆိတ်နေပြီးနောက် တယ်ရီ၏ ပါးစပ်မှ စကားတစ်ခွန်းသာ အနိုင်နိုင် ထွက်ကျလာခဲ့ချေသည်။

"သောက်ကျိုးနည်း"

အခြားတစ်ဖက် အဝေးတစ်နေရာရှိ ဂျေးကော့ ဖက်ဒရယ် ရုံးအဆောက်အအုံ၏ အစည်းအဝေးခန်းမ တစ်ခု အတွင်း၌ ဖြစ်လေသည်။

ကုလားထိုင်ပေါ်တွင် ထိုင်နေသော မဒမ် ဟယ်လွိုက်စ် သည် မိမိ၏ မျက်နှာချင်းဆိုင်တွင် ထိုင်နေသော ဗီရိုနီးစ်ကို ကြည့်ရင်း စိတ်ထဲတွင် အလွန်အမင်း မကျေမချမ်း ဖြစ်နေခဲ့ချေသည်။ ခေါင်းငုံ့ကာ စာရွက်စာတမ်းများကို ကိုင်တွယ် ဖြေရှင်းနေသော ဗီရိုနီးစ်၏ မျက်နှာပေါ်တွင် မည်သည့် အမူအရာမျှ မရှိသော်လည်း တကယ့် လက်တွေ့တွင်မူ မဒမ် ဟယ်လွိုက်စ် အပေါ် အလွန်တရာ ဒေါသထွက်နေခဲ့ပေသည်။

ယခုအချိန်မှာ ရုံးဆင်းချိန် ရောက်ရှိနေပြီ ဖြစ်၏။ ပုံမှန် အခြေအနေ အရ ဆိုလျှင် ဗီရိုနီးစ် တစ်ယောက် မိမိ၏ နေအိမ်သို့ ပြန်ရောက်ကာ အနားယူရန် ပြင်ဆင်နေလောက်ပြီ ဖြစ်လေသည်။ သို့သော် မကြာမီက မဒမ် ဟယ်လွိုက်စ် သည် ဒေမွန်တီကို စစ်ဆေးမေးမြန်းရန် ခေါ်ယူခဲ့သဖြင့် ဗီရိုနီးစ်မှာ အိမ်ပြန်ရာ လမ်းမှနေ၍ ဤနေရာသို့ အလျင်အမြန် ကားလှည့်ပြန်လာခဲ့ရခြင်း ဖြစ်ချေသည်။

ထိုသို့ အမြန် ပြန်လာခဲ့သော်လည်း စီအိုင်အေ အဖွဲ့က ဒေမွန်တီကို အမည်မသိ ဆေးရည် တစ်မျိုး အသုံးပြုလိုက်သေးပေသည်။ အကယ်၍ သြဂတ်စ်သာ လျင်မြန်စွာ မတုံ့ပြန်နိုင်ခဲ့ပါက ဒေမွန်တီ တစ်ယောက် နောက်ပိုင်းတွင် မည်သို့သော အခြေအနေမျိုး ရောက်ရှိသွားမည်ကို မည်သူမျှ မသိနိုင်တော့ချေ။

အစောပိုင်းက ပြောဆိုထားသည့်အတိုင်း ဤအမှုအခင်းကို မနက်ဖြန်တွင် စီအိုင်အေ ထံ လွှဲပြောင်းပေးရမည် ဖြစ်လေသည်။ သို့သော် ဒေမွန်တီမှာ ဖက်ဒရယ် ရှေ့နေရုံး ဝင်ပေါက် ဗုံးပေါက်ကွဲမှု၏ တရားခံ တစ်ဦး ဖြစ်နေသည့်အပြင် အက်ဖ်ဘီအိုင် မှ ဖမ်းဆီးထားသူလည်း ဖြစ်သဖြင့် အက်ဖ်ဘီအိုင် ကသာ သူ့ကို တရားရုံးသို့ ပို့ဆောင်ရမည် ဖြစ်ပေသည်။

ဤသည်မှာ အလွန် ကြီးမားလှသော လုပ်ရပ်တစ်ခု ဖြစ်ချေသည်။ ထို့ကြောင့် ဤကိစ္စ မပြီးဆုံးမီ အချိန်အထိ ဒေမွန်တီကို လုံးဝ အသေခံ၍ မဖြစ်ပေ။ မဒမ် ဟယ်လွိုက်စ် အလွန်တရာ ဒေါသထွက်ပြီး ခွန်အားမဲ့သလို ခံစားနေရခြင်းမှာလည်း ဤအချက်ကြောင့်ပင် ဖြစ်လေသည်။ ခြေတစ်လှမ်း မှားသည်နှင့် ခြေလှမ်းတိုင်း မှားယွင်းသွားခဲ့ရချေပြီ။

ယခင် အကျင့်များအရ ဆိုလျှင် ဒေမွန်တီ ကဲ့သို့သော ခေါင်းမာလွန်းသူများကို ရင်ဆိုင်ရချိန်တွင် မဒမ် ဟယ်လွိုက်စ် သည် စီအိုင်အေ ၏ လျှို့ဝှက် နည်းလမ်းများကို အသုံးပြုကာ ဒေမွန်တီကို ငိုယို အော်ဟစ်လျက် သတင်းအချက်အလက်များ ထုတ်ဖော် ပြောဆိုလာစေရန် လုပ်ဆောင်ပြီးလောက်ပြီ ဖြစ်ပေသည်။

သို့သော် ရိုအန် ဂရင်းဝုဒ် ဟူသော ကောင်လေးကို လျစ်လျူရှု မိခဲ့ခြင်းကြောင့် မဒမ် ဟယ်လွိုက်စ် အနေဖြင့် ထိုသို့ လုပ်ဆောင်ခွင့် မရရှိတော့သည့် အပြင် အလွန်တရာ ခံစစ်ဆန်သော အခြေအနေ တစ်ရပ်ထဲသို့ ကျဆင်းသွားခဲ့ရလေသည်။ စီအိုင်အေ ၏ ဒေသဆိုင်ရာ အကြီးအကဲ တစ်ဦး ဖြစ်သူ သူမသည် ယခုအခါတွင် ဗီရိုနီးစ် ဟူသော ဌာနခွဲမှူး တစ်ဦး၏ မျက်နှာရိပ် မျက်နှာကဲကို စောင့်ကြည့်နေရပြီ ဖြစ်ချေ။

ထိုအချက်ကို တွေးမိသွားသောအခါ မဒမ် ဟယ်လွိုက်စ် ၏ လက်သည်းများမှာ လက်ဝါးပြင် အတွင်းသို့ နက်ရှိုင်းစွာ စိုက်ဝင်သွားခဲ့ပေသည်။ စီအိုင်အေ ၏ လျှို့ဝှက် နည်းလမ်း အားလုံးကို ရိုအန် ၏ ကိုယ်ပေါ်တွင် တစ်လှည့်စီ အသုံးပြုပစ်လိုက်ချင်စိတ်များ တဖွားဖွား ပေါ်ပေါက်လာခဲ့လေသည်။

သို့သော် စုံစမ်းရရှိထားသော အချက်အလက်များ အရ ရိုအန် သည် ဉာဏ်ရည် ထက်မြက်ရုံ သာမက ကိုယ်ခံပညာ စွမ်းရည်လည်း မြင့်မားကာ အကဲခတ် စူးစမ်းမှု အားကောင်းပြီး ခွန်အားဗလ ပြည့်စုံသူ ဖြစ်ကြောင်း သိရှိထားရချေသည်။ ထို့အပြင် ဗီရိုနီးစ် ၏ အလေးပေးမှုကိုပါ ရရှိထားသေးပေသည်။ ထို့ကြောင့် ယခင်က အခြားသူများ အပေါ် အသုံးပြုခဲ့သော သာမန် နည်းလမ်းများကို ရိုအန် ၏ အပေါ်တွင် လုံးဝ အသုံးပြု၍ မရနိုင်တော့ချေ။

ရိုအန် ကို ဒုက္ခပေးချင်ပါက ရိုအန် ၏ အားနည်းချက်ကို ပစ်မှတ်ထားသော သီးသန့် စီမံကိန်း တစ်ခုကို ရေးဆွဲရမည် ဖြစ်လေသည်။ သို့သော် ယခုအချိန်တွင် မဒမ် ဟယ်လွိုက်စ် မှာ ဂျက်ကွဲကို ဖမ်းဆီးရန် အလွန် လောနေသဖြင့် ထိုကိစ္စအတွက် အချိန် လုံးဝ မပေးနိုင်သေးပေ။

'ဒါပေမဲ့ စုံစမ်းထားတဲ့ အချက်အလက်တွေ အရ ဆိုရင်... ရိုအန် ဂရင်းဝုဒ် နဲ့ မိုနာ အီဗန် တို့ကြားက ဆက်ဆံရေးက နည်းနည်း ပိုပြီး ရင်းနှီးနေပုံပဲ'

ထိုအချက်ကို တွေးမိသောအခါ မဒမ် ဟယ်လွိုက်စ် ၏ နှုတ်ခမ်းထောင့်တွင် အေးစက်သော အပြုံးတစ်ခု ပေါ်လာခဲ့ချေသည်။

'ငါ ခုနက မိုနာ အီဗန် ဆီကို လူလွှတ်လိုက်တာ အတော်ပဲ... သူ့ကိုသာ ခေါ်လာနိုင်ခဲ့ရင်... နောက်ပိုင်းကျရင်...'

မိုနာ ကို ဗီရိုနီးစ် က အလေးမထားခဲ့သည့် အပြင် မိုနာ ၏ ဖခင် ဖြစ်သူ ဂျာဗာရီ အီဗန် မှာလည်း နိုင်ငံခြားတွင် တာဝန် ထမ်းဆောင်နေဆဲ ဖြစ်လေသည်။ ထိုအချက်ကို စဉ်းစားမိသွားသောအခါ မဒမ် ဟယ်လွိုက်စ် ၏ မျက်ဝန်းအိမ် အတွင်းတွင် အေးစက်စက် အလင်းတန်း တစ်ခု ဖြတ်ပြေးသွားခဲ့ပေသည်။

"မဒမ် ဟယ်လွိုက်စ်"

ထိုအချိန်မှာပင် အစည်းအဝေး စားပွဲပေါ်ရှိ စာရွက်စာတမ်းများကို ကိုင်တွယ် ဖြေရှင်းပြီးစီးသွားသော ဗီရိုနီးစ် က ညောင်းညာနေသော ပခုံးကို အနည်းငယ် ပွတ်သပ်လိုက်၏။ ထို့နောက် ခေါင်းကို တစ်ချက် စောင်းကာ အေးစက်သော လေသံဖြင့် မေးမြန်းလိုက်လေသည်။

"ရှင်တို့ ဒီည ဘယ်အချိန်ထိ စုံစမ်းနေဦးမှာလဲ"

ဤလူစု မထွက်ခွာမချင်း ဗီရိုနီးစ် လည်း အိမ်ပြန်၍ ရမည် မဟုတ်ချေ။ အဓိက အကြောင်းရင်းမှာ နောက်တစ်ကြိမ် ဒေမွန်တီကို စစ်ဆေးမေးမြန်းရာတွင် သူတို့က ဆေးဝါးများ ထပ်မံ အသုံးပြုပြီး ဒေမွန်တီ သေဆုံးသွားမည်ကို စိုးရိမ်သောကြောင့် ဖြစ်ပေသည်။ အကယ်၍ တစ်ဖက်လူက ဒေမွန်တီကို ဆက်လက် စစ်ဆေးမေးမြန်းမည် ဆိုပါက သူမ ကိုယ်တိုင် အနီးကပ် ကြီးကြပ်ရမည်ဟု ဗီရိုနီးစ် ဆုံးဖြတ်ထားပြီး ဖြစ်လေသည်။

အခြား အကြောင်းရင်း တစ်ခုမှာမူ မကြာမီက သြဂတ်စ် က သူမထံ ဖုန်းဆက်ကာ ရိုအန် နှင့် လေစီ တို့က ဂျက်ကွဲ၏ အရိပ်အယောင်ကို ခန့်မှန်း ရှာဖွေတွေ့ရှိသွားပြီ ဖြစ်ကြောင်းနှင့် ယခုအခါ ဖမ်းဆီးရန် သွားရောက်နေပြီ ဖြစ်ကြောင်း သတင်းပို့ထားသောကြောင့် ဖြစ်ချေသည်။

ဂျက်ကွဲကို မဖမ်းမိခဲ့လျှင် ထားလိုက်တော့မည် ဖြစ်သော်လည်း အမှန်တကယ် ဖမ်းမိခဲ့ပါက တရားခံနှင့် လုပ်ဆောင်ချက် ဂုဏ်သတင်းများကို မဒမ် ဟယ်လွိုက်စ် က လုယူသွားခြင်းမျိုး လုံးဝ အဖြစ်မခံနိုင်ကြောင်း ဗီရိုနီးစ် အာမခံထားရမည် ဖြစ်ပေသည်။ မည်သို့ပင် ဆိုစေကာမူ ယနေ့အချိန် ကုန်ဆုံးသွားခြင်း မရှိသေးသဖြင့် ဤအမှုအခင်းမှာ အမှတ် ငါး စုံစမ်းစစ်ဆေးရေးအဖွဲ့ ၏ လက်အောက်တွင် ရှိနေဆဲပင် ဖြစ်လေသည်။

"ဌာနခွဲမှူး"

ဗီရိုနီးစ် ၏ စကားကို ကြားသောအခါ မဒမ် ဟယ်လွိုက်စ် က တစ်ဖက်လူကို တစ်ချက် စောင်းကြည့်လိုက်ပြီး မျက်နှာသေဖြင့် စကားဆိုလိုက်၏။

"ဒီ အဆောက်အအုံက အက်ဖ်ဘီအိုင် တစ်ခုတည်း ပိုင်တာ မဟုတ်ဘူး... ငါ ထွက်သွားမှာပါ... မင်း လူကို အလောတကြီး နှင်ထုတ်စရာ မလိုပါဘူး"

မဒမ် ဟယ်လွိုက်စ် သည် တယ်ရီ ကို မိုနာ ၏ အိမ်သို့ သဲလွန်စ ရှာဖွေရန် စေလွှတ်လိုက်သည့် တစ်ချိန်တည်းမှာပင် အခြား လက်အောက်ငယ်သားများကို ပိုမို ပြင်းထန်သော စစ်ဆေးမေးမြန်းရေး ဆေးရည် သွားယူရန် စေခိုင်းထားခဲ့ပေသည်။ အကယ်၍ တယ်ရီ ဘက်မှ သဲလွန်စ မရရှိခဲ့ပါက ဒေမွန်တီ သည် ဂျက်ကွဲကို ဖမ်းဆီးရန် အရေးကြီးသော ထိုးဖောက် ဝင်ရောက်နိုင်မည့် အချက် တစ်ချက် ဖြစ်လာမည် ဖြစ်သဖြင့် မဒမ် ဟယ်လွိုက်စ် အနေဖြင့် ဒေမွန်တီကို လွှတ်ပေးရန် လုံးဝ ရည်ရွယ်ထားခြင်း မရှိချေ။

"ဟွန့်"

ဗီရိုနီးစ် က ထိုစကားကို ကြားသောအခါ နှာခေါင်းရှုံ့လိုက်လေသည်။ သူမ စကားပြောရန် ပြင်လိုက်ချိန်မှာပင် သူမနှင့် မဒမ် ဟယ်လွိုက်စ် တို့၏ မိုဘိုင်းဖုန်းများက ရုတ်တရက် တစ်ပြိုင်နက်တည်း မြည်လာခဲ့ပေသည်။

ဖုန်းမြည်သံနှင့် အတူ အချင်းချင်း တစ်ချက်စီ စောင်းကြည့်လိုက်ကြပြီးနောက် လူနှစ်ဦးစလုံး နေရာမှ ထရပ်ကာ အစည်းအဝေး ခန်းမ၏ တောင်နှင့် မြောက် ထောင့်အသီးသီးသို့ လျှောက်သွားကြပြီး ဖုန်းကိုင်လိုက်ကြချေသည်။

စက္ကန့် အနည်းငယ် ကြာပြီးနောက် ဗီရိုနီးစ် ၏ မျက်နှာပေါ်တွင် အပြုံးတစ်ခု ပေါ်လာခဲ့ပြီး မဒမ် ဟယ်လွိုက်စ် ၏ မျက်နှာထားမှာမူ မျက်စိတစ်မှိတ် အတွင်း မည်းမှောင်သွားခဲ့လေသည်။ သူတို့ နှစ်ဦး လက်ခံရရှိသော ဖုန်းများမှာ ရိုအန် နှင့် တယ်ရီ တို့ထံမှ အသီးသီး ဖြစ်ပေသည်။ သို့သော် သတင်းစကားမှာမူ တစ်ခုတည်းသာ ဖြစ်၏။ ၎င်းမှာ ဂျက်ကွဲကို အောင်မြင်စွာ ဖမ်းဆီးရမိပြီ ဟူသော သတင်းပင် ဖြစ်ချေသည်။

"အရမ်း ကောင်းတယ် ရိုအန်"

ဗီရိုနီးစ် က လှည့်ကာ အစည်းအဝေး ခန်းမ၏ မျက်နှာချင်းဆိုင် ထောင့်ရှိ အဘွားအိုကို တစ်ချက် ကြည့်လိုက်လေသည်။ သူမ၏ မျက်နှာပေါ်ရှိ အပြုံးကို ဖြည်းညင်းစွာ ရုပ်သိမ်းလိုက်သော်လည်း အသံမှာမူ မသိမသာ ပိုမို ကျယ်လောင်လာခဲ့ပေသည်။

"မင်း ဒီနေ့ တော်တော် ပင်ပန်းသွားပြီ... ကိစ္စတွေ ပြီးရင် အိမ်ပြန်ပြီး ကောင်းကောင်း အနားယူလိုက်ပါ... မနက်ဖြန် ညနေပိုင်းမှာ သတင်းစာ ရှင်းလင်းပွဲ တစ်ခု လုပ်မယ်... အဲဒီအချိန်ကျရင် မင်း ငါနဲ့အတူ တက်ရောက်ရမယ်"

ဗီရိုနီးစ် က သတင်းစာ ရှင်းလင်းပွဲပါ ကျင်းပဦးမည်ဟု ကြားလိုက်ရသောအခါ မူလကတည်းက မှောင်မည်းနေသော မဒမ် ဟယ်လွိုက်စ် ၏ မျက်နှာထားမှာ ပိုမို ဆိုးရွားသွားခဲ့ချေသည်။ တယ်ရီ၏ ဖုန်းကို ချက်ချင်း ချလိုက်ပြီးနောက် လှည့်ကာ ဒေါသတကြီးဖြင့် စကားဆိုလိုက်၏။

"ဌာနခွဲမှူး... မင်း"

အဘွားအို၏ စကား မဆုံးခင်မှာပင် ဗီရိုနီးစ် က ဖုန်းချလိုက်ပြီး အစည်းအဝေး စားပွဲဆီသို့ လျှောက်သွားရင်း အသံကျယ်ကျယ်ဖြင့် ပြောဆိုလိုက်လေသည်။

"မဒမ် ဟယ်လွိုက်စ်... ဂျက်ကွဲ အတွက် ဆုကြေးငွေ ဒေါ်လာ တစ်သန်းကို ပေးဖို့ မမေ့ပါနဲ့ဦး"

စကားဆုံးသည်နှင့် ဗီရိုနီးစ် က စားပွဲပေါ်ရှိ ဖိုင်တွဲကို ပွေ့ချီလိုက်ပြီး နှုတ်ခမ်းထောင့်တွင် အပြုံးတစ်ခု ဖန်တီးကာ ဤအစည်းအဝေး ခန်းမ အတွင်းမှ ထွက်ခွာသွားခဲ့ပေသည်။ မည်သို့ပင် ဆိုစေကာမူ ဖက်ဒရယ် ရှေ့နေရုံး၏ တံခါးကို ဗုံးခွဲခဲ့သော အမှုကြီး တစ်ခု ဖြစ်သဖြင့် သတင်းစာ ရှင်းလင်းပွဲ ကျင်းပခြင်းမှာ လွန်ကျူးသည်ဟု မဆိုနိုင်ချေ။

"မင်း"

အစည်းအဝေး ခန်းမ အတွင်း၌ မိမိ အနေဖြင့် ရိုအန် ဟူသော ကောင်လေးကို ဆုကြေးငွေပါ ပေးရဦးမည်ဟု ကြားလိုက်ရသောအခါ မဒမ် ဟယ်လွိုက်စ် ၏ မျက်နှာအရောင်များ မျိုးစုံ ပြောင်းလဲသွားခဲ့လေတော့သည်။

နောက်တစ်စက္ကန့်တွင် အသက်ရှူမှားသွားကာ မဒမ် ဟယ်လွိုက်စ် ၏ မျက်စိရှေ့တွင် ရုတ်တရက် မှောင်မိုက်သွားပြီး ခန္ဓာကိုယ်မှာ အနောက်ဘက်သို့ လဲကျသွားခဲ့ချေသည်။

ထိုကိစ္စ ဖြစ်ပွားပြီးနောက် မဒမ် ဟယ်လွိုက်စ် ကို ဆေးရုံသို့ ပို့ဆောင်ကာ အောင်မြင်စွာ ကယ်တင်နိုင်ခဲ့ပေသည်။ သို့သော် သူမမှာ အသက်အရွယ် ကြီးရင့်နေပြီ ဖြစ်သဖြင့် ယခုကဲ့သို့ ရုတ်တရက် လဲကျသွားမှုကြောင့် လက်မောင်းနှင့် ပေါင် အစရှိသည့် နေရာများတွင် အရိုးကျိုးသည့် ဒဏ်ရာများ ရရှိသွားခဲ့လေသည်။

ထို့အပြင် ရှေ့နေရုံး ဝင်ပေါက် ဗုံးပေါက်ကွဲမှုနှင့် ပတ်သက်၍ စီအိုင်အေ အနေဖြင့် ပြည်သူလူထုနှင့် ရန်သူ အင်အားစုများ၏ ပါးစပ်ကို ပိတ်ရန် လူတစ်ယောက် အတိအကျ လိုအပ်နေခဲ့ချေသည်။ ထို့ကြောင့် ဆေးရုံတွင် လဲလျောင်းနေသော မဒမ် ဟယ်လွိုက်စ် သည် ကာယကံရှင် ကိုယ်တိုင် မရှိသည့် အခြေအနေတွင်ပင် သူမ၏ သဘောတူညီချက် မပါဘဲ ဤပြဿနာကြီးကို အလွန် ဂုဏ်ယူဝင့်ကြွားစွာ လက်ခံရယူလိုက်ရလေတော့သည်။

ဤကိစ္စကို သိရှိသွားပြီးနောက် မဒမ် ဟယ်လွိုက်စ် မှာ နေရာမှာပင် သွေးများ အန်ကျလာပြီး ခွဲစိတ်ခန်း အတွင်းသို့ နောက်တစ်ကြိမ် တွန်းပို့ခံလိုက်ရပေသည်။ သို့သော် ယခုတစ်ကြိမ်တွင်မူ သူမ အနေဖြင့် သေမင်းနှင့် အသက်လုပွဲကို မအောင်နိုင်ခဲ့တော့ချေ။ လူကိုယ်တိုင် ပြန်ထွက်မလာတော့ဘဲ အဖြူအမည်း ဓာတ်ပုံသာ ချိတ်ဆွဲခံလိုက်ရလေတော့သည်။

အခြားတစ်ဖက် အဝေးတစ်နေရာရှိ ရှက်ဗလက် ကားကြီး အတွင်း၌ ရိုအန် သည် ဖုန်းချလိုက်ပြီးနောက် မျက်မှောင်အနည်းငယ် ကျုံ့လိုက်၏။

"သတင်းစာ ရှင်းလင်းပွဲ ဟုတ်လား”