အခန်း ၃၈၄

အခန်း (၃၈၄) ချောက်ကမ်းပါးတွင် ချိတ်ဆွဲထားသောလှေကား

မေလအစောပိုင်းတွင် ရှောင်တန်သည် နေ့ခင်းဘက်၌ ပွဲစဉ်များကစားခြင်းမှလွဲ၍ အဆင့်တက်ရန် အချိန်သိပ်မရခဲ့သလို ညဘက်တွင်လည်း လေ့ကျင့်ရေး သိပ်မလုပ်ဖြစ်ခဲ့ချေ။ လက်ရှိတွင် သူ့အဆင့်မှာ ‘ငရဲတပ်ဦး’ ဂိုဏ်းထဲ၌ အနိမ့်ဆုံးဖြစ်နေပေသည်။

ဂိုဏ်းထဲတွင် အဆင့်အမြင့်ဆုံးမှာ ဖုန်းပုကြွယ်ပင် ဖြစ်နေဆဲဖြစ်သည်။ သူသည် ထိုအသုံးမကျသော ဇီးရိုးအမျိုးအစားမှော်ဖျက်ဆီးရေးစက်ကို အစာကျွေးရန် အတွေ့အကြုံမှတ် (EXP) ရရှိမည့် အခွင့်အရေးများစွာကို ဖြုန်းတီးခဲ့သော်လည်း အဆင့် ၃၇ သို့ ရောက်ရှိနေဆဲ ဖြစ်သည်။ ဤသည်မှာ အားလပ်ချိန်ပိုများခြင်း၏ အကျိုးကျေးဇူးပင်ဖြစ်သည်...။ ပြီးခဲ့သည့်လကုန်ပိုင်းက ကြိုးစားပမ်းစား လုပ်ဆောင်ခဲ့မှုကြောင့် သူသည် ယခုလအလယ်တွင် ဝတ္ထုမူကြမ်းကို အောင်မြင်စွာ တင်သွင်းနိုင်ခဲ့သဖြင့် မကြာသေးမီက ဂိမ်းကစားချိန် တော်တော်များများ ရရှိထားခြင်း ဖြစ်သည်။

ဒုတိယအဆင့်အမြင့်ဆုံးမှာ ရီရူလီဖြစ်ပြီး အဆင့် ၃၆ တွင် ရှိသည်။ သူမ၏ ခွန်အားမှာ ပြောစရာမလိုအောင် ကောင်းမွန်လှပြီး ဇာတ်လမ်းပြီးမြောက်မှုနှုန်းလည်း မနည်းလှချေ။ ထို့အပြင် သူမသည် ရံဖန်ရံခါတွင် အတွေ့အကြုံနှစ်ဆကတ်များကိုလည်း အသုံးပြုလေ့ရှိသည်။

ရီရူယွီကမူ ရှောင်တန်နှင့် အဆင့်အတူတူပင်ဖြစ်ပြီး အဆင့် ၃၅ ရှိသော်လည်း မကြာသေးမီက ဂိမ်းထဲတွင် အချိန်ပိုများ ရှိနေခဲ့သဖြင့် အတော်လေး အတွေ့အကြုံအမှတ် အသာစီးရနေကာ အဆင့် ၃၆ သို့ရောက်ရန် အလွန်နီးစပ်နေပြီဖြစ်သည်။ ရှောင်တန်ကမူ အဆင့်တက်ရန်အတွက် အတွေ့အကြုံမှတ် နှစ်သန်းနီးပါး လိုအပ်နေသေးသည်။

ပြိုင်ဆိုင်မှု အလွန်ပြင်းထန်သော ပိုးအိမ်တိုက်ပွဲတွင် အဆင့် ၃၅ ရှိနေခြင်းက များစွာ အားသာချက်မရှိလှချေ။ ဆီမီးဖိုင်နယ်သို့ တက်လှမ်းလာနိုင်ခဲ့ကြသော ကစားသမားများသည် လွန်ခဲ့သည့် နှစ်ပတ်အတွင်း ယေဘုယျအားဖြင့် အဆင့် ၃၅ သို့မဟုတ် ထိုထက်မြင့်သောအဆင့်များသို့ ရောက်ရှိနေကြပြီ ဖြစ်သည်။ အဆင့် ၃၈ အထက် ရောက်နေသူအချို့လည်း ရှိသော်လည်း အတော်လေး နည်းပါး၏။

သို့သော်လည်း သည်းထိတ်ရင်ဖို သုခဘုံဂိမ်းသည် အဆင့်တစ်ခုတည်းဖြင့်သာ အင်အားကို ဆုံးဖြတ်သော ဂိမ်းမျိုးမဟုတ်ချေ။ ကျွမ်းကျင်မှုကဏ္ဍ ၊ ဘွဲ့အမည်များ၊ စကေးများ ၊ ပစ္စည်းကိရိယာများ၊ နည်းဗျူဟာ၊ နည်းစနစ်၊ လက်ငင်းစွမ်းဆောင်ရည်နှင့် အခြားသောအချက်များစွာသည် အောင်ပွဲအပေါ် လွှမ်းမိုးနိုင်စွမ်း ရှိကြသည်။

ဆီမီးဖိုင်နယ် မစတင်မီ ရှောင်တန်၏ လက်ရှိ ဇာတ်ကောင်အချက်အလက်များကို လေ့လာကြည့်ကြပါစို့။

အမည် - ဝမ်တန်ကျိ၊ အဆင့် - ၃၅

ဘွဲ့အမည် - လေပြင်းညအိပ်မက်ဆိုး၊ ဘွဲ့စွမ်းရည် - ပျံသန်းသွားသော ညအိပ်မက်ဆိုး၏ ခြေရာတစ်ခု၊ အတွေ့အကြုံမှတ် - ၁,၅၈၀,၀၀၀/၃,၅၀၀,၀၀၀၊ စကေးမှတ် - ၁၀,၁၀၀၊ ဂိမ်းဒင်္ဂါး - ၃,၇၆၅,၀၀၀။

ကျွမ်းကျင်မှုများ - အထွေထွေ C၊ လက်မှုပညာ D၊ ထောက်လှမ်းရေး C၊ တိုက်ခိုက်ရေး B၊ ပစ်ခတ်ရေး D၊ ကုသရေး E၊ စိတ်ဝိဉာဉ်အတတ် E၊ ဆင့်ခေါ်ခြင်း N/A။

ပစ္စည်းသိုလှောင်အိတ် ၁၀/၂၀ - မိုင်းတွင်းလုပ်သားဦးထုပ်၊ ဝင်ချက်စတာသေနတ်၊ သလင်းကျောက်တုံး၊ အသက်အမှတ်ပြန်လည်ဖြည့်တင်းဆေး (အကြီး) * ၅၊ အသက်အမှတ်ပြန်လည်ဖြည့်တင်းဆေး (အလတ်) * ၅၊ သွေးတိတ်ပတ်တီး * ၅၊ အဆိပ်ဖြေဆေး * ၅၊ အေးခဲဆန့်ကျင်ဆေး * ၅၊ အပူလောင်နာပျောက်ဆေး * ၅၊ ကောင်းကင်နှင့်မြေကြီးကို ပြောင်းပြန်လှန်ခြင်း နတ်ဘုရားနည်းစနစ်။

ပစ္စည်းကိရိယာများ - အားသွင်းသုံးမြှောင့်ဓားမြှောင်၊ ကြောင်ဒေါသ၊ ညှိုးနွမ်းချပ်ဝတ်၊ သမင်သားရေဖိနပ်၊ ဝံပုလွေလည်ဆံမွေး ခြေနင်း၊ လျှို့ဝှက်ဓားသွား၊ လျှို့ဝှက်မြှားတို။

သိုလှောင်ခန်း ၂/၁၀ - အတွေ့အကြုံနှစ်ဆကတ် (၂၄ နာရီ)*၃၀၊ ဂိမ်းဒင်္ဂါးနှစ်ဆကတ် (၂၄ နာရီ)*၃၀။

စကေးများ ၅/၁၂ - (မိစ္ဆာလင်းနို့ သရဲအရိပ်) ၊ ဧည့်သည်တော်၏ အမြစ်မဲ့ရိုက်ချက်- စိတ်မပူပါနဲ့၊ လေငြိမ်၍ ဖုန်မှုန့်နံ့သာ ပြယ်လွင့်ခြင်း၊ ပြောင်းပြန်ဓားသွား ဝဲဂယက်ခုတ်ချက်၊ ဝိညာဉ်နူတ်အရိပ်။

ဤသည်မှာ ချမ်းသာသူတို့၏ ပြင်ဆင်မှုပုံစံပင် ဖြစ်သည်။ လိုအပ်သည်ဖြစ်စေ၊ မလိုအပ်သည်ဖြစ်စေ အိတ်တွင်းပစ္စည်းနေရာကို အရင်ဆုံး အကွက် ၂၀ အထိ မြှင့်တင်ထားခြင်းဖြစ်သည်။ အိတ်ထဲတွင် အခြေအနေမျိုးစုံကို ကုသနိုင်မည့် အသုံးအဆောင်ပစ္စည်းများ အပြည့်ရှိနေပြီး ၎င်းတို့အားလုံးမှာ ဈေးဆိုင်မှ ဝယ်ယူထားခြင်းဖြစ်ကာ ကုန်သွားလျှင် ထပ်ဝယ်ရုံသာ ဖြစ်သည်။

ဤနေရာတွင် “အတွေ့အကြုံနှစ်ဆကတ်” နှင့် “ဂိမ်းဒင်္ဂါးနှစ်ဆကတ်” တို့အကြောင်းကို ဖော်ပြရန် လိုအပ်ပါသည်။ ဤအရာများသည် အကန့်အသတ်မရှိ ထပ်ဆင့်စုပေါင်းနိုင်သော အထူးအိုင်တမ်များ ဖြစ်သည်။ သင့်အနေဖြင့် အခုရေ ၃၀၀၀ ခန့် ဝယ်ယူထားလျှင်ပင် အမျိုးအစားတူညီနေသရွေ့ ၎င်းတို့အားလုံးကို ပစ္စည်းအကွက် တစ်ကွက်တည်းတွင်သာ စုစည်းထားနိုင်ပေသည်။

ထို့အပြင် သင်တို့ သတိပြုမိပြီးဖြစ်သည့်အတိုင်း ရှောင်တန်၏ ပစ္စည်းသိုလှောင်အိတ်ထဲတွင် အလွန်မျက်စိကျစရာကောင်းသော အရာတစ်ခု ရှိနေခြင်းဖြစ်သည်...။ ၎င်းမှာ ကောင်းကင်နှင့်မြေကြီးကို ပြောင်းပြန်လှန်ခြင်း နတ်ဘုရားနည်းစနစ် ဖြစ်သည်။ ဤအရာသည် သာမန်စကေးကတ်တစ်ခုမဟုတ်ဘဲ သိုင်းကျမ်းစာအုပ်တစ်အုပ်နှင့် တူညီနေပေသည်။ ၎င်းကို သင်ယူရန် လိုအပ်ချက်များမှာ အလွန်ပင် မြင့်မားလွန်းလှသည်။ တိုက်ခိုက်ရေးကျွမ်းကျင်မှု အဆင့် B နှင့် စိတ်ဝိညာဉ်အတတ် အဆင့် C လိုအပ်ပြီး ဇာတ်ကောင်သည် အဆင့် ၃၀ သို့မဟုတ် ထိုထက် မြင့်မားရမည် ဖြစ်သည်။

ရှောင်တန်အနေဖြင့် ချန်လင်ဓားပြိုင်ပွဲ ဇာတ်လမ်းထဲတွင် လွှဲပြောင်း၍မရသော ဤစကေးကို ရရှိခဲ့သည်မှာ တစ်လနီးပါး ရှိသွားခဲ့ပြီ ဖြစ်သည်။ သူ၏ ပစ္စည်းသိုလှောင်အိတ်ထဲတွင် နေရာပြည့်နေသောကြောင့် ၎င်းကို သိုလှောင်ခန်းထဲသို့ မထည့်ဘဲ သူနှင့်အတူ အမြဲဆောင်ထားခဲ့ခြင်း ဖြစ်သည်။

မကြာသေးမီက ကစားခဲ့သော ပိုးကောင်စစ်ပွဲ ပွဲစဉ် ၅၀ အတွင်း ရှောင်တန်သည် သူ၏ တိုက်ခိုက်ရေးကျွမ်းကျင်မှုကို အဆင့် B သို့ မြှင့်တင်နိုင်ခဲ့သော်လည်း သူ၏ စိတ်ဝိညာဉ်အတတ်မှာမူ လုံးဝ တိုးတက်လာခြင်းမရှိချေ။ သို့သော်လည်း ဤအရာက နားလည်ပေးနိုင်စရာ ရှိပါသည်။ သူ့တွင် စိတ်ဝိညာဉ်အတတ်ဆိုင်ရာ စွမ်းရည်တစ်ခုမျှ မရှိသဖြင့် သဘာဝကျကျ ၎င်းကို မမြှင့်တင်နိုင်ခြင်း ဖြစ်သည်။ သူ၏ လက်ရှိ E အဆင့်မှာ ထူးခြားဆန်းပြားသော ဇာတ်လမ်းများထဲတွင် သရဲတစ္ဆေများနှင့် ဆုံတွေ့ခဲ့ရသော အတွေ့အကြုံများကြောင့် တဖြည်းဖြည်း စုဆောင်းမိလာခဲ့ခြင်းသာ ဖြစ်သည်...။

ဖုန်းပုကြွယ်က ရှောင်တန်အား သူ၏ စိတ်ဝိညာဉ်အတတ်ကို မြှင့်တင်ရန် အကြံပြုခဲ့ဖူးသော်လည်း ကံမကောင်းစွာဖြင့် စိတ်ဝိညာဉ်အတတ်စကေးများနှင့် ဆင့်ခေါ်စကေးများသည် တူညီစွာပင် ရှားပါးလှပြီး လေလံဈေးကွက်တွင် ရရှိနိုင်သောအရာများမှာလည်း မတန်တဆ ဈေးကြီးလွန်းကာ အသုံးမဝင်လှချေ။ ခြောက်လှန့်သေတ္တာထဲက စိတ်ဝိညာဉ်အတတ်စကေးများကို ကြည့်မည်ဆိုလျှင်လည်း ၎င်းတို့၏ ဈေးနှုန်း၊ ဝိသေသလက္ခဏာများနှင့် အဆင့်တို့ကို ထည့်သွင်းစဉ်းစားသည့်အခါ ရှောင်တန်နှင့် ကိုက်ညီမည့်အရာကို ရှာဖွေရန် အမှန်တကယ် ခက်ခဲလှသည်။ မည်သို့ပင်ဖြစ်စေ စကေးအမှတ်များကို ငွေဖြင့် ဝယ်မရနိုင်သလို ၎င်းတို့ကို တမင်တကာ မြှင့်တင်ရန် ကြိုးစားခြင်းကလည်း ဆန့်ကျင်ဘက်ရလဒ်များကိုသာ ဖြစ်ပေါ်စေနိုင်လေသည်။ ထို့ပြင် ရှောင်တန်အနေဖြင့် အစ်ကိုကြွယ်ကဲ့သို့... ခြောက်လှန့်သေတ္တာထဲတွင် ပစ္စည်းကိရိယာများကို အပုံလိုက်စုဆောင်းပြီး နာရီပေါင်းများစွာ ထိုင်ကြည့်ကာ အလွတ်ကျက်မှတ်ပြီး စစ်ထုတ်နေရင်း အားလုံးကြည့်ပြီးမှ မိမိနှင့် အကိုက်ညီဆုံးအရာကို ပြန်လည်ရွေးချယ်နိုင်မည့် စိတ်ရှည်မှုမျိုး မရှိပါချေ...။

အတိုချုပ်ပြောရလျှင် ရှောင်တန်၏ စိတ်ဝိညာဉ်အတတ်စွမ်းဆောင်ရည် အားနည်းမှုကြောင့် အလွန်အမင်း စွမ်းအားကြီးပုံရသော ကောင်းကင်နှင့်မြေကြီးကို ပြောင်းပြန်လှန်ခြင်းနတ်ဘုရားနည်းစနစ်မှာမှာ အသုံးမဝင်သော အလှပြပစ္စည်းတစ်ခု ဖြစ်နေခဲ့ရသည်။ ၎င်းမှာ ဟာရန်မန်ဂါထဲမှ သူရဲကောင်းမလေးကဲ့သို့ သူမကို ကမ်းလှမ်းထားသော်လည်း စားသုံးမရနိုင်သောအရာ ဖြစ်နေခြင်းဖြစ်သည်။ ၎င်းကို သူတစ်ပါးအား ပေးပစ်ရန်လည်း မဖြစ်နိုင်သလို အတင်းအကျပ် သင်ယူရန်လည်း မရချေ။ လွှင့်ပစ်လိုက်ရန်ကျတော့လည်း နှမြောစရာ ကောင်းလွန်းလှသည်။ ထိုသို့သော စိတ်ပျက်အားငယ်ရမှုမှာ ဖော်ပြရန် ခက်ခဲပေသည်။

မှန်ပေသည် ဤစကေးကို ဘယ်တုန်းကမှ မရရှိခဲ့သလိုမျိုး ဟန်ဆောင်နေခြင်းက အကောင်းဆုံး ဖြစ်ပေလိမ့်မည်။ ရှောင်တန်သည် အတော်အတန် ကျွမ်းကျင်သော ကစားသမားတစ်ဦး ဖြစ်နေပြီဖြစ်သည်။ သူ့ထံတွင် စကေးများစွာ မရှိသလို သူ၏ ပစ္စည်းကိရိယာများမှာလည်း ပြည့်စုံအဆင့် သို့မဟုတ် ထိုထက်မြင့်သော အဆင့်တွင် မရှိသော်လည်း သူသည် ဆီမီးဖိုင်နယ်သို့ ရောက်အောင် တိုက်ခိုက်လာနိုင်ခြင်းအားဖြင့် သူ၏ ထူးကဲလှသော တိုက်ခိုက်ရေးပါရမီကို သက်သေပြသခဲ့ပြီးသား ဖြစ်သည်။

...

“ပိုးအိမ်တိုက်ပွဲ၏ ပထမပွဲစဉ် စတင်တော့မည် ဖြစ်သည်။ သင့်အချက်အလက်များကို စက္ကန့်သုံးဆယ်အတွင်း စာရင်းသွင်းလုပ်ဆောင်ပါမည်။ ကျေးဇူးပြု၍ လော့ဂ်အင်နေရာမှ မထွက်ခွာပါနှင့်”

“ဂိမ်းမစမီ ဆယ်စက္ကန့် အချိန်နောက်ပြန်ရေတွက်ခြင်း စတင်ပါပြီ - ၉၊ ၈၊ ၇... ၂၊ ၁”

စနစ်အသံ၏ အချိန်ရေတွက်ခြင်း ပြီးဆုံးသွားသည်နှင့် ရှောင်တန်ရှိနေသော ဓာတ်လှေကားမှာ စတင် ရွေ့လျားသွားတော့သည်။

“နက်ရှိုင်းတဲ့ တောအုပ်ရဲ့ အမှောင်ထုကြီးထဲမှာ ပိုးအိမ်က သုံးကြိမ်တိုင်တိုင် အိပ်စက်တယ်၊ လက်ချောင်းတွေကြားက နူးညံ့မှုဟာ သန်မာမှုအဖြစ် အကြိမ်တစ်ရာမက ပုံသွင်းခံလိုက်ရပြီ”

မရင်းနှီးလှသည့် အဖွင့်ကဗျာစာသားများက သူ့နားထဲတွင် ပဲ့တင်ထပ်သွား၏။

“ဒေါင်းလုဒ် ပြီးဆုံးပါပြီ။ သင်သည် လက်ရှိတွင် အထွတ်အထိပ်ပြိုင်ပွဲ - ပိုးအိမ်တိုက်ပွဲတွင် ပါဝင်ယှဉ်ပြိုင်နေခြင်း ဖြစ်သည်”

“ဤမုဒ်တွင် ဇာတ်လမ်းမိတ်ဆက်၊ ဘေးထွက်/လျှို့ဝှက်တာဝန်များနှင့် အထူးကမ္ဘာ့အမြင်တို့ ပါဝင်မည် မဟုတ်ပါ”

“ဇာတ်လမ်းအောင်မြင်မှု ဆုလာဘ် - အနိုင်ရသူများအုပ်စုသို့ တက်လှမ်းခွင့် ရရှိမည်”

“အဓိကတာဝန် စတင်ပါပြီ”

“ပြိုင်ဘက်ကို သတ်ဖြတ်ပါ”

ချလွင် ဝှစ်ရှ်။

စနစ်၏ အကြောင်းကြားစာ ရပ်တန့်သွားပြီးနောက် ဓာတ်လှေကားမှာ ထူးဆန်းသော အသံနှစ်ချက် ထွက်ပေါ်လာပြီး ထို့နောက်တွင်မူ ကြောက်မက်ဖွယ်ကောင်းသော တုန်ခါမှုတစ်ခု ဖြစ်ပေါ်လာတော့သည်။

ရှောင်တန်သည် ခြေလှမ်းအနည်းငယ် ချော်လဲလုနီးပါး ဖြစ်သွားခဲ့သော်လည်း သူ့ဟန်ချက်ကို လျင်မြန်စွာ ပြန်ထိန်းနိုင်လိုက်သည်။ ယခုတွင် သူ၏ လှုပ်ရှားမှုများမှာ လျင်မြန်ဖြတ်လတ်ပြီး အသံတိတ်ကာ သဘာဝကျကျဖြင့် အားစိုက်ထုတ်စရာပင် မလိုတော့ချေ။ သူသည် ဆူပွက်သောင်းကျန်းနေသော ပင်လယ်ပြင်ပေါ်က လှေငယ်တစ်စင်းပေါ်တွင် မတ်တပ်ရပ်နေရလျှင်ပင် တည့်မတ်စွာ နေနိုင်စွမ်း ရှိပေသည်။ ဓာတ်လှေကား၏ တုန်ခါမှုဖြင့်တော့ သူ့ကို တုန်လှုပ်စေနိုင်မည် မဟုတ်ချေ။

ကျွီးးး။

ဓာတ်လှေကား တံခါးများ ပွင့်ဟသွား၏။

ရိုးတွင်းခြင်ဆီအထိ အေးစက်လှသော လေပြင်းတစ်ချက်သည် အသားကို ဓားဖြင့် ခြစ်လိုက်သကဲ့သို့ ဖြတ်သန်းဝင်ရောက်လာလေသည်။ ဓာတ်လှေကား၏ အပြင်ဘက်တွင်မူ နှင်းပွင့်များဖြင့် ဖြူဖွေးနေခဲ့သည်။

ရှောင်တန်သည် သူ့လက်ကို လျင်မြန်စွာမြှောက်လိုက်ပြီး သူ့လည်ပင်းနောက်က ဦးထုပ် (လုပ်ကြံသတ်ဖြတ်သူဝတ်စုံ၏ အနောက်ဘက်တွင် ဦးထုပ်ပါရှိသည်) ကို ဆွဲယူကာ ခေါင်းပေါ်ဆောင်းလိုက်ရင်း အပြင်ဘက်ကို စူးစိုက်ကြည့်လိုက်သည်။

ဤဇာတ်လမ်း၏ အပြင်အဆင်မှာ အမှန်တကယ်ပင် နှင်းဖုံးတောင်တန်းကြီးတစ်ခုပေါ်တွင် ဖြစ်သည်။ တောင်ထိပ်များသည် မြင့်မားမတ်စောက်လှပြီး ခန့်ညားထည်ဝါလှသည်။ အေးစက်လှသော နှင်းထုများကြားတွင် လေပြင်းများနှင့် နှင်းမုန်တိုင်းများမှာ အော်ဟစ်မြည်ဟည်းနေကြသည်။ မမြင်နိုင်သော သောင်းကျန်းတတ်သည့် နှင်းမုန်တိုင်းကြီးသည် ထိန်းချုပ်မရသော သားရဲတစ်ကောင်ကဲ့သို့ အမြင့်ပေ နှစ်ထောင်ကျော်ရှိသော ဤအထီးကျန်ကန္တာရကြီးတွင် ၎င်း၏ ပိုလျှံနေသော စွမ်းအင်များကို ထုတ်လွှတ်နေခဲ့သည်။

ရှောင်တန်သည် အခြေအနေကို စစ်ဆေးရန် အပြင်သို့ ချောင်းကြည့်လိုက်ရာ သူမျှော်လင့်ထားသည့်အတိုင်း... သူ ရှိနေသော ဓာတ်လှေကားမှာ ဝေဟင်အလယ်တွင် ချိတ်ဆွဲထားခြင်း ဖြစ်သည်။

သူ တုံ့ဆိုင်းမနေဘဲ ဓာတ်လှေကား၏ အပေါ်ဘက်အစွန်းကို ချက်ချင်းလှမ်းကိုင်လိုက်ပြီး နောက်ဂျွမ်းထိုးကာ ဓာတ်လှေကားထိပ်ပေါ်သို့ ခုန်တက်လိုက်သည်။ ထို့နောက်တွင်မူ ထိုနေရာ၌ ဆောင့်ကြောင့်ထိုင်ရင်း ပတ်ဝန်းကျင်ကို လှည့်ပတ်ကြည့်ရှုလိုက်လေသည်။

အတော်လေး ထူးဆန်းသောမြင်ကွင်းတစ်ခုက သူ့မျက်စိရှေ့တွင် ပေါ်ထွက်လာခဲ့သည်။ နှင်းများဖုံးလွှမ်းနေသော တောင်တန်းများကြားတွင် ပန်းကန်လုံးတစ်လုံးခန့် ထုရှိသော ထူထဲသည့် အနက်ရောင်စတီးကေဘယ်ကြိုးကြီးတစ်ချောင်းသည် ပတ်ဝန်းကျင်ကို ဖြတ်သန်းဆွဲဆန့်ထား၏။ ထိုကေဘယ်ကြိုးတွင် ဓာတ်လှေကားနှစ်စင်း ချိတ်ဆွဲထားပြီး တစ်စင်းမှာ ရှောင်တန် မတ်တပ်ရပ်နေသော ဓာတ်လှေကားဖြစ်ကာ အခြားတစ်စင်းမှာမူ မီတာငါးဆယ်ခန့်အကွာတွင် ချိတ်ဆွဲထားပေသည်။ ဤဓာတ်လှေကားနှစ်စင်းသည် ပြင်းထန်သော လေပြင်းဒဏ်ကြောင့် ကြိုးတွင် ချိတ်ဆွဲထားသော ခေါင်းလောင်းများကဲ့သို့ ယိမ်းထိုးလှုပ်ရှားနေကြလေသည်...။

နှင်းများနှင့် လေမုန်တိုင်းများကြားတွင် ကွယ်ပျောက်နေသဖြင့် ကေဘယ်ကြိုး၏ အစွန်းနှစ်ဖက်မှာ ဘယ်ဆီဘယ်ဝယ်သို့ ဦးတည်နေကြောင်းကို မြင်ရရန် မဖြစ်နိုင်ချေ။ သေချာသောအချက်မှာ ဤနေရာသည် မြေပြင်နှင့် အလွန်ဝေးကွာပြီး အကယ်၍ သူပြုတ်ကျသွားခဲ့ပါက... နှင်းထုပေါ်သို့ ကျသည်ဖြစ်စေ အေးခဲနေသော မြေပြင်နှင့် ဆောင့်မိသည်ဖြစ်စေ ရလဒ်မှာ သေချာပေါက် သေဆုံးခြင်းသာ ဖြစ်ပေလိမ့်မည်။

“ငါတို့က ဒီစတီးကေဘယ်ကြိုးပေါ်မှာ တိုက်ခိုက်ရမှာလား...”

ရှောင်တန် စိတ်ထဲတွင် တွေးလိုက်မိသည်။

“ဒါကတော့ တော်တော်လေး မဆီမဆိုင်ပဲ...”

ထိုအခိုက်အတန့်တွင် မျက်နှာချင်းဆိုင် ဓာတ်လှေကားထဲမှ လူတစ်ယောက် ထွက်ပေါ်လာလေသည်။ ထိုသူ၏ တုံ့ပြန်မှုမှာ ရှောင်တန်နှင့် အတူတူပင် ဖြစ်သည်။ သူသည်လည်း ဓာတ်လှေကားထိပ်ပေါ်သို့ ခုန်တက်လိုက်သည်။ သို့သော်လည်း သူသည် ရှောင်တန်ထက် စက္ကန့်အနည်းငယ် နောက်ကျပြီးမှ ပေါ်ထွက်လာခြင်းဖြစ်ရာ သူထွက်လာသည်နှင့် ချက်ချင်းပစ်သတ်ခံရမည်ကို စိုးရိမ်ပြီး စိတ်ထဲတွင် ရုန်းကန်နေခဲ့ရဟန် ရှိသည်။

ရှောင်တန်မှာမူ ထိုသို့သော အခြေအနေမျိုးကို စိတ်မပူချေ။ ဓာတ်လှေကားမှာ ဝေဟင်အလယ်တွင် ချိတ်ဆွဲခံထားရကြောင်း သူ သဘောပေါက်လိုက်သည့်အချိန်ကတည်းက သူ့ပြိုင်ဘက်သည် ပစ်ခတ်မှုကျွမ်းကျင်သော ကစားသမားတစ်ဦး မဖြစ်နိုင်ကြောင်း သူကောက်ချက်ချခဲ့ပြီး ဖြစ်သည်။ အကြောင်းပြချက်မှာ ရိုးရှင်းပါသည်။ အကယ်၍ ကစားသမားနှစ်ဦးအနက် တစ်ဦးက ပျံသန်းနိုင်ခြင်း၊ လေဟုန်စီးနိုင်ခြင်း သို့မဟုတ် ကြီးမားသော တာဝေးတိုက်ခိုက်မှုစွမ်းရည်မျိုး ပိုင်ဆိုင်ထားပါက စနစ်သည် ယခုကဲ့သို့မြေပုံမျိုးကို ဖန်တီးပေးလိမ့်မည် မဟုတ်သောကြောင့် ဖြစ်သည်။

ထိုအခိုက်အတန့်တွင် ကစားသမားနှစ်ဦးသည် မိမိတို့၏ သက်ဆိုင်ရာ ဓာတ်လှေကားထိပ်များပေါ်မှနေ၍ တစ်ဦးကိုတစ်ဦး စူးစိုက်ကြည့်ရှုလိုက်ကြပြီး သူတို့စိတ်ထဲက ရေရွတ်သံများမှာလည်း ထပ်တူကျနေကြသည်။

“ဟိုဘက်ကကောင်လည်း သေချာပေါက် အနီးကပ်တိုက်ခိုက်ရေးသမားပဲ ဖြစ်မယ်...”