အခန်း ၂၂၆

အခန်း ၂၂၆

“ဟုတ်တယ်။ ဒါက ရေသူမလေးပဲ။ ငါလည်း ဒီလိုသတ္တဝါမျိုးကို ဒီနေရာမှာ တွေ့ရလိမ့်မယ်လို့ မထင်ထားခဲ့ဘူး။”

ကျန်းဟန်က ထွက်ပြေးသွားသော ရေသူမလေးကို ကြည့်ရင်း ဖြည်းညှင်းစွာ ပြောလိုက်သည်။

ဤကောင်လေးသည်လည်း လူသားပုံသဏ္ဌာန်ရှိသော သားရဲအမျိုးအစား ဖြစ်ပြီး ပင်လယ်ကြမ်းပြင်ရှိ အပင်တစ်မျိုးမှ မွေးဖွားလာခြင်းဖြစ်သည်ဟု ဆိုကြသည်။ ၎င်းသည် ပန်းမန်၊ သစ်ပင်၊ အပင်များမှ မွေးဖွားလာသော သားရဲများ၏ မွေးဖွားပုံမျိုးနှင့် တူညီသော်လည်း ၎င်းတို့မှာ မျိုးနွယ်စုချင်း မတူဘဲ များစွာ ပိုမို ရှားပါးသည်။

ကျန်းဟန်က သူ အံ့အားသင့်မိသည်ဟု ပြောသော်လည်း အမှန်တကယ်တော့ သူ အလွန်အမင်း အံ့ဩသွားခြင်းမျိုး မဟုတ်ပေ။ အဘယ်ကြောင့်ဆိုသော် သူသည် သွေးအိုင်ထဲသို့ ရေဓာတ်အရင်းအမြစ် အနည်းငယ်ကို ထည့်သွင်းခဲ့သဖြင့် ရေဓာတ်အမျိုးအစား သားရဲများကို သေချာပေါက် ဆွဲဆောင်နိုင်မည် ဖြစ်သောကြောင့်ပင်။

သို့သော် ၎င်းမှာ ရေသူမလေးတစ်ကောင် ဖြစ်နေလိမ့်မည်ဟုတော့ သူ မထင်ထားခဲ့ချေ။ ထို့အပြင် ဤရေသူမလေးမှာ တော်တော်လေး ထူးဆန်းပုံရသည်။ ၎င်းသည် ချီစွမ်းအင်များအား စားသုံးရသည်ကိုလည်း သဘောကျပုံရသည်။

“မီးနတ်ဘုရားခွေး သွားဖမ်းလိုက်။”

လီဇီဝေသည် ကျန်းဟန် ရေသူမလေးကို ဖမ်းဆီးနိုင်ရန် ကူညီပေးလိုသဖြင့် မီးနတ်ဘုရားခွေးကို ချက်ချင်း လွှတ်လိုက်၏။

“မလုပ်နဲ့၊ မလုပ်နဲ့။ ငါ့ဟာငါ ကိုင်တွယ်လို့ရတယ်။”

ကျန်းဟန်က သူ၏လက်ကို အလျင်အမြန် ဝှေ့ယမ်းကာ လီဇီဝေ၏ လှုပ်ရှားမှုကို တားဆီးလိုက်သည်။

“နင် အဲဒါကို မလိုချင်ဘူးလား။”

လီဇီဝေက အနည်းငယ် နားမလည်နိုင်သည့် အမူအရာဖြင့် မေးလိုက်၏။

“အဲလိုမဟုတ်ဘူး။ ငါ့ဘာသာပဲ သူ့ရဲ့ ယုံကြည်မှုကို ရအောင်ယူနိုင်တယ်။ မင်း ဒီမှာပဲနေ။ မလှုပ်နဲ့။”

ကျန်းဟန်က လက်ပြလိုက်ပြီး ဖြည်းညှင်းစွာ ရှေ့သို့ လျှောက်သွားကာ ရေသူမလေးကို ကြည့်ပြီး ပြောလိုက်သည်။

“မင်း ဆက်ပြီး မစားချင်တော့ဘူးလား။”

သူသည် သူ၏လက်ကို ဆန့်ထုတ်လိုက်ရာ ၎င်း၏လက်တွင် သူကိုင်တွယ်ခဲ့ဖူးသော မူလရေစွမ်းအင်အရင်းအမြစ်မှ ကျန်ရှိနေသေးသည့် ထူးခြားသော အရှိန်အဝါများစွာ ရှိနေဆဲ ဖြစ်သည်။

လီဇီဝေ လိုက်မလာသည်ကို မြင်သောအခါ ရေသူမလေးသည် သူမ၏ခြေလှမ်းများကို ဖြည်းညှင်းစွာ ရပ်တန့်လိုက်ပြီး ကျန်းဟန်ကို လှည့်ကြည့်လာခဲ့သည်။

ကျန်းဟန်သည် ရုပ်ရည်ချောမောရုံသာမက ထူးခြားသော စရိုက်လက္ခဏာလည်း ရှိသည်။ နဂါး၏စွမ်းအားဖြင့် အာဟာရဖြည့်တင်းထားသော သူ၏ ရုပ်ခန္ဓာသည်လည်း ရေသူမလေးအား အထူးတလည် ရင်းနှီးကျွမ်းဝင်မှု အာရုံတစ်ခုကို ပေးစွမ်းနိုင်၏။

ရေစွမ်းအင်အရင်းအမြစ်၏ ဆွဲဆောင်မှုနှင့်ပေါင်းစပ်လိုက်သောအခါ ၎င်းသည် ချက်ချင်း ထွက်မပြေးတော့ဘဲ ခေါင်းကိုလှည့်၍ ကျန်းဟန်ကို အဝေးမှ စောင့်ကြည့်နေခဲ့သည်။

“မင်းက အရမ်းဉာဏ်ကောင်းတယ်ဆိုတာ ငါသိပါတယ်။ ငါပြောချင်တာက မငါး ဒီလိုကျဉ်းမြောင်းတဲ့ နေရာလေးမှာ ပျင်းနေပြီ မဟုတ်လား။ ငါနဲ့အတူ လိုက်ခဲ့...ငါတို့ ပင်လယ်ကြီးနဲ့ မင်း တစ်ခါမှမမြင်ဖူးသေးတဲ့ ကျယ်ပြောတဲ့ ကမ္ဘာကြီးကို သွားကြည့်ကြမယ်။ ငါက တစ်နေရာတည်းမှာ ပိတ်လှောင်ခံရတာကို အမုန်းဆုံးပဲ။ မင်းလည်း အတူတူပဲလို့ ငါထင်တယ်။ လွတ်လပ်မှုကို တောင့်တပြီး ပျံသန်းချင်တဲ့ စိတ်ဝိညာဉ်တစ်ခုကို ပိုင်ဆိုင်ထားတယ် မဟုတ်လား။”

ကျန်းဟန်က လက်ကို ဆန့်ထုတ်ကာ ရေသူမလေးကို ပြောလိုက်၏။ ဤသည်မှာ သူ့နှလုံးသားထဲမှ လာသည့် စကားတစ်ခွန်း ဖြစ်သည်။

“အီယာ...”

ရေသူမလေးသည် စက္ကန့်အနည်းငယ်မျှ စဉ်းစားနေပုံရပြီးနောက် ကျန်းဟန်၏ လက်ကို ညွှန်ပြကာ အသံပြုလိုက်၏။

“နင် ငါ့နောက်လိုက်ရင် နေ့တိုင်း ဗိုက်ဝအောင် စားရမလားလို့ မေးနေတာလား။”

ကျန်းဟန်က နားမလည်နိုင်သဖြင့် မေးလိုက်သည်။

“အီယာ..။”

ရေသူမလေးက မျှော်လင့်ချက်အပြည့်ရှိသော အမူအရာဖြင့် ခေါင်းညိတ်ပြလာခဲ့လေသည်။

“ဒေါပေါ့။ မင်းသာ ငါ့နောက်လိုက်မယ်ဆိုရင် ငါ မင်းကို သေချာပေါက် ဗိုက်ဆာအောင် မလုပ်ဘူး။”

ကျန်းဟန်က ပြုံးကာ ခေါင်းညိတ်လိုက်ပြီး အစားအစာကသာ အလက်တွေ့ကျဆုံးအရာ ဖြစ်သည်ဟု တွေးလိုက်မိသည်။ ဤကောင်လေးက အခြားအရာများကို လုံးဝ ဂရုမစိုက်ချေ။

သို့သော် အစားအစာကိုသာ ဂရုစိုက်သည့် ဤကဲ့သို့ ရိုးရှင်းသော အကောင်မျိုးက အစားအစာသာ လုံလောက်လျှင် ယဉ်ပါးအောင် မွေးမြူရန် ပို၍ပင် လွယ်ကူသေးပေသည်။

ဝူးခနဲ အသံနှင့်အတူ ရေသူမလေးသည် သူမ၏ပါးစပ်ကို ဖွင့်ကာ လေထဲမှ စုပ်ယူလိုက်ရာ ကျန်းဟန်၏ လက်ပေါ်တွင် ကျန်ရှိနေသော အပြာရောင် မူလအရှိန်အဝါများအားလုံး ၎င်း၏ ပါးစပ်ထဲသို့ စုပ်ယူခြင်း ခံလိုက်ရတော့သည်။

“ငါ့ဆီမှာ ဒါမျိုးတွေ အများကြီး ရှိသေးတယ်။”

ကျန်းဟန်က အပြုံးတစ်ခုဖြင့် ပြောကာ သိုလှောင်သေတ္တာထဲသို့ လက်နှိုက်ပြီး ကိုင်တွယ်လိုက်ရာ သူ၏လက်တွင် အပြာရောင် မူလရေစွမ်းအင်အရင်းအမြစ်၏ အရှိန်အဝါများ ထပ်မံ စွန်းထင်သွားပြန်သည်။

“အီယာ...”

၎င်းကို မြင်သောအခါ ရေသူမလေး၏ မျက်လုံးများ ပြူးကျယ်သွားခဲ့သည်။ ကျန်းဟန်တွင် တကယ့်ကို အရသာရှိသော အရာများ ရှိနေခြင်း ဖြစ်သည်။

၎င်းသည် ချက်ချင်းပင် နောက်ထပ်တစ်ကြိမ် အားရပါးရ စုပ်ယူလိုက်ပြီး ကျန်းဟန်၏ လက်ချောင်းထိပ်များမှ မူလအရှိန်အဝါ နောက်ထပ်တစ်မျှင်ကို စုပ်ယူသွားခဲ့သည်။

သို့သော် ထို့နောက် မကြာမီမှာပင် ကျန်းဟန်သည် သူ၏လက်တွင် မူလအရှိန်အဝါ အနည်းငယ်ကို ထပ်မံ စွန်းထင်စေခဲ့ပြန်သည်။ အကြိမ်အနည်းငယ် ပြုလုပ်ပြီးနောက် ရေသူမလေးသည် ကျန်းဟန်ထံသို့ တဖြည်းဖြည်း ချဉ်းကပ်လာခဲ့ပြီး နောက်ဆုံးတွင်တော့ ၎င်းကို စုပ်ယူရန်အတွက် သူ၏လက်ချောင်းကို ဖက်တွယ်ထားတော့လေသည်။

“ငါ့နောက်ကို လိုက်ခဲ့ပါ။ အရသာရှိတဲ့ အရာတွေ အများကြီး စားရစေမယ်။”

ကျန်းဟန်က ပြုံးကာ ပြောလိုက်ပြီး အခြား ရေဓာတ်အမျိုးအစား မှော်ပစ္စည်းများကို ထုတ်ယူလိုက်သော်လည်း ၎င်းတို့ထဲမှ တစ်ခုမျှ မူလ ရေစွမ်းအင်အရှိန်အဝါလောက် ထိရောက်မှုမရှိချေ။

မျှော်လင့်ထားသည့်အတိုင်းပင် လျိူယွဲ့ ပြောခဲ့သည်မှာ အမှန်ပင်။ ဤရေစွမ်းအင်အရင်းအမြစ်သည် ရေအမျိုးအစား သားရဲများအတွက် လွန်စွာကြီးမားသော ဆွဲဆောင်မှုတစ်ခု ရှိနေ၏။

တစ်နာရီကျော်ခန့် အချိန်ဖြုန်းပြီးနောက် ရေသူမလေးသည် ကျန်းဟန်၏ နောက်လိုက်လေး ဖြစ်လာခဲ့ပြီး သူ့နောက်မှနေ၍ “အီယာ... အီယာ” ဟု အသံပြုကာ လိုက်ပါလာတော့သည်။

“မင်းရဲ့ အချက်အလက်တွေကို ငါ တစ်ချက်လောက် စစ်ဆေးကြည့်ရအောင်။”

ကျန်းဟန်က ၎င်းအား မူလအရှိန်အဝါ အနည်းငယ်ကို ဦးစွာ ပေးလိုက်ပြီးနောက် ၎င်း၏ အချက်အလက်များကို စကင်ဖတ်ရန် သူ၏ ပိုကီဒက်စ်ကို ထုတ်ယူလိုက်တော့သည်။

[သားရဲ] : ရေသူမလေး

[မျိုးနွယ်] : ပင်လယ်သားရဲ၊ ရေသူမ

[ဓာတ်သဘာဝ] : ရေ၊ လျှို့ဝှက်ဆန်းကြယ်ခြင်း၊ ချီလမ်းစဉ်၊ လျှို့ဝှက်ဆန်းကြယ်ခြင်း - ကံတရား။

[အဆင့်] : လက်ရွေးစင်အဆင့် အစောပိုင်းအဆင့်

[အလားအလာ] : ကြယ်သုံးပွင့် (မူလက ကြယ်ငါးပွင့်ဖြစ်သော်လည်း နှစ်ပွင့်ကုန်ဆုံးသွားခဲ့သဖြင့် သုံးပွင့်သာ ကျန်ရှိတော့သည်။)

[ထူးခြားချက်] : ချီကြေးခွံ

လျှို့ဝှက်ဆန်းကြယ်ခြင်း စွမ်းရည်ဖြစ်သည်။ ရေသူမလေးသည် ၎င်း၏ ကြေးခွံများကို သန်မာစေရန်အတွက် အထူးချီများကို စုပ်ယူနိုင်သည်။ ကြေးခွံတစ်ခု သန်မာလာတိုင်း ၎င်း၏ ရေစွမ်းအင် စွမ်းရည်များ၏ စွမ်းအားမှာ အတိုင်းအတာတစ်ခုအထိ မြင့်တက်လာလိမ့်မည်။

ကံတရား: လျှို့ဝှက်ဆန်းကြယ်သည့် ပင်ကိုယ်စွမ်းရည် ဖြစ်သည်။ ရေသူမလေးသည် ကံတရားကြောင့် နေ့စဉ် ထူးခြားကောင်းမွန်သော အစားအစာတစ်နပ်ကို ရရှိလိမ့်မည်။

[ကျွမ်းကျင်မှု] : ရေဘောလုံး

[ဆင့်ကဲပြောင်းလဲမှု] : မသိရှိရသေးပါ။

[မိတ်ဆက်] : ပင်လယ်သမုဒ္ဒရာမှ လာသော ရေသူမလေးဖြစ်ပြီး နေ့စဉ် အစားအစာကောင်း တစ်နပ်ကို ကောက်ရရုံသာဖြစ်သည့် လွန်စွာ အသုံးမဝင်သော ကံတရား စွမ်းရည်ကို ပိုင်ဆိုင်ထားသည်။ ထို့အပြင် ချီကြေးခွံ စွမ်းရည်မှာလည်း ကြီးထွားမှု လွန်စွာ နှေးကွေးပြီး စွမ်းအင်အပိုဆုမှာလည်း သိပ်မများလှသဖြင့် ရေစွမ်းအင် တိုက်ခိုက်ရေး စွမ်းရည်ပိုင်းတွင် ထူးခြားထင်ရှားခြင်းမရှိချေ။ သို့သော် ရေသူမလေးသည် ဉာဏ်ရည်မြင့်မားပြီး သင်ယူနိုင်စွမ်း အားကောင်းလှသဖြင့် ကျွမ်းကျင်မှုမျိုးစုံကို သင်ယူနိုင်သည်။

ကျန်းဟန်သည် ရေသူမလေး၏ အချက်အလက်များကို ကြည့်ပြီးနောက် အနည်းငယ် အံ့အားသင့်သွား၏။ ဤကောင်လေးသည် အမှန်တကယ်ပင် ကြယ်ငါးပွင့် အလားအလာ ရှိနေပြီး နောင်တွင် အဆင့် ၅ ဧကရာဇ်အဆင့်သို့ ရောက်ရှိနိုင်စွမ်း ရှိသည်။

သို့သော် ၎င်း၏ ထူးခြားချက်များသည် သာမန်လူများအတွက်မူ အနည်းငယ် အသုံးမဝင်ချေ။ ရေစွမ်းအင် အထူးပြု စွမ်းရည်အချို့လောက် စွမ်းအားမကြီးမားချေ။

ဥပမာအားဖြင့် ကျော်ကြားလှသော ရေစွမ်းအင် ပင်ကိုယ်စွမ်းရည်ချက်ဖြစ်သည့် ရေသံကြိုးသည် တိုက်ခိုက်မှုတိုင်းတွင် ရေသံကြိုးတစ်ချောင်းကို ဖန်တီး၍ ရန်သူကို ထိန်းချုပ်နိုင်သည်။ ရေစက်ထိုးဖောက်ခြင်းကျောက်တုံး စွမ်းရည်သည်လည်း တိုက်ခိုက်မှုတိုင်းကို ထပ်ဆင့်ပေါင်းစပ်ပေးပြီး စွမ်းရည် ထိမှန်သည့် အကြိမ်ရေများလေလေ စွမ်းအား ပိုမိုကြီးမားလေလေ ဖြစ်သည်။ သို့မဟုတ် မိုးရွာသွန်းခြင်း စွမ်းရည်သည် ၎င်းကို အသက်သွင်းလိုက်သည်နှင့် ထိုဧရိယာအတွင်း မိုးရွာသွန်းစေကာ အခြားစွမ်းအင် တည်ရှိမှုများကို ဖိနှိပ်ထားနိုင်သည်။ အကယ်၍ ၎င်းသည် ဧကရာဇ်အဆင့်သို့ ရောက်ရှိနိုင်ပါက ဤထူးခြားချက်သည် ရေဘုရင့်နိုင်ငံအဖြစ်သို့ ဆင့်ကဲပြောင်းလဲသွားမည် ဖြစ်သည်။

သို့သော် ကျန်းဟန်အတွက်မူ ဤစွမ်းရည်နှစ်ခုသည် လတ်တလောတွင် အလွန်အမင်း စွမ်းအားမကြီးမားသေးသော်လည်း ၎င်းတို့နှစ်ခုစလုံးမှာ ရှားပါးသော လျှို့ဝှက်ဆန်းကြယ်ခြင်း စွမ်းရည်များ ဖြစ်ကြသည်။ သူ၏ အံ့ဖွယ်ဆင့်ကဲပြောင်းလဲခြင်း ပါရမီနှင့်ဆိုလျှင် နောင်တစ်ချိန်တွင် ပိုမိုစွမ်းအားကြီးမားသော လျှို့ဝှက်ဆန်းကြယ်ခြင်း စွမ်းရည်အဖြစ် ဆင့်ကဲပြောင်းလဲသွားနိုင်ပေသည်။

အရေးကြီးဆုံးအချက်မှာ လျှို့ဝှက်ဆန်းကြယ်ခြင်း အခြေခံ ပါဝင်နေခြင်း ဖြစ်သည်။ မဟုတ်ပါက အံ့ဖွယ်ဆင့်ကဲပြောင်းလဲခြင်း ပါရမီ ရှိနေလျှင်ပင် ဘာမှမရှိရာမှ အသစ်တစ်ခုကို ဖန်တီးရန် ခဲယဉ်းလှပေသည်။

လျှို့ဝှက်ဆန်းကြယ်ခြင်းသည် စိတ်ဝိညာဉ်ဝါးမြိုခြင်း၊ ကံတရားတို့နှင့်အတူ အရှားပါးဆုံးသော စွမ်းအင်ကြီးသုံးမျိုးတွင် ပါဝင်သည်။

လျှို့ဝှက်ဆန်းကြယ်ခြင်းသည် တိုင်းတာ၍မရနိုင်သော စွမ်းအား၊ ကံကြမ္မာနှင့် ဆင်တူသော စွမ်းထက်သည့် သက်ရောက်မှုများကို ပိုင်ဆိုင်ထားသော်လည်း လျှို့ဝှက်ဆန်းကြယ်ခြင်း စွမ်းရည်အများစုမှာ အထူးတလည် အဓိပ္ပာယ်မရှိဘဲ ထူးဆန်းလှသည်။

သို့သော် ၎င်းတို့ စွမ်းအားကြီးမားလာသည့်အခါတွင်မူ တကယ့်ကို ထိတ်လန့်စရာ ကောင်း၏။ ဥပမာအားဖြင့် လွန်စွာကျော်ကြားလှသော လျှို့ဝှက်ဆန်းကြယ်ခြင်း ကျွမ်းကျင်မှုတစ်ခုမှာ ရတနာရှာဖွေခြင်းဖြစ်ပြီး ၎င်းမှာ လက်ရွေးစင်အဆင့် ရတနာအမိုက်လိုက်ကြွက်၏ စွမ်းရည် ဖြစ်သည်။ ထိုသားရဲသည် သက်ဆိုင်ရာ သဲလွန်စများ ရှိနေသရွေ့ မည်သည့် ရတနာသိုက်ကိုမဆို ရှာဖွေတွေ့ရှိနိုင်သည်ဟု ဆိုကြသည်။

စိတ်ဝိညာဉ်ဝါးမြိုခြင်းမှာမူ ပို၍ပင် လျှို့ဝှက်ဆန်းကြယ်သေးသည်။ ထိုသို့သော သားရဲများသည် မည်သည့် စိတ်ဝိညာဉ်စွမ်းအား သို့မဟုတ် စွမ်းအင်ကိုမဆို ဝါးမြိုနိုင်ပြီး ကြောက်မက်ဖွယ်ကောင်းကာ ကြီးမားသော အင်အားကို ဖြစ်ပေါ်စေနိုင်သည်ဟု ဆိုကြ၏။ သို့သော်လည်း မည်သူမျှ တစ်ခါမှ မမြင်ဖူးကြသဖြင့် လူအများစုက ထိုအမျိုးအစား အမှန်တကယ် မတည်ရှိနိုင်ဟုပင် ယုံကြည်ထားကြသည်။

ကံတရား၏ ဒဏ္ဍာရီများမှာမူ ပို၍ပင် စိတ်ကူးယဉ်ဆန်လှသည်။ ထိုသို့သော သားရဲများသည် ကံတရားကို မြင်တွေ့နိုင်သည်ဟု ဆို၏။ ၎င်းတို့ တတ်မြောက်ထားသော ကျွမ်းကျင်မှုများနှင့် စွမ်းရည်များသည်လည်း လူတစ်ယောက်၏ ကံဇာတာကို ပြောင်းလဲပေးနိုင်စွမ်း ရှိကြသည်။ အကယ်၍ ၎င်းတို့ထဲမှ တစ်ကောင်ကိုသာ ရရှိခဲ့လျှင် ကောင်းကင်ဘုံ၏ ဂုဏ်ယူရသော ကံတရား၏ လုံးဝဥဿုံ သားသမီးစစ်စစ်အဖြစ်သို့ ချက်ချင်း ခုန်တက်သွားနိုင်မည် ဖြစ်သည်။

“မဆိုးဘူး။ ငါ့နောက်ကို လိုက်ခဲ့လို့ရတယ်။”

ကျန်းဟန်သည် ဤရေသူမလေးကို လောလောဆယ် သိမ်းဆည်းထားရန် ဆုံးဖြတ်လိုက်၏။

အမှန်တော့ သူသည် ထိန်းချုပ်မှုစွမ်းရည် ကောင်းမွန်သော သားရဲတစ်ကောင်ကိုသာ လိုအပ်ခြင်း ဖြစ်သော်လည်း သားရဲကောင်းများနှင့် ထိပ်တိုက်တိုးရန်မှာ ခဲယဉ်းလှသည်။ ဤနေရာသည် နိုင်ငံတော်အဆင့် ၂ သားရဲထိန်းချုပ်ခြင်း ဥယျာဉ်မျှသာ ဖြစ်သဖြင့် အထူးတလည် ကောင်းမွန်လွန်းသော သားရဲများစွာတော့ မရှိချေ။

“အီယာ...”

ရေသူမလေးသည် ကြည်လင်ပြတ်သားသော အသံလေးဖြင့် အော်ဟစ်လိုက်ပြီး ၎င်း၏ မျက်လုံးများကမူ ကျန်းဟန်၏ လက်ကိုသာ စူးစိုက်ကြည့်နေဆဲပင်။