အခန်း ၁၀၀၉

အခန်း (၁၀၀၉) - အိမ်ပြင်ထွက်စရာမလိုဘဲ လောကတစ်ခွင် စူးစမ်းနိုင်သော အိပ်မက်ကမ္ဘာ၊ အသိပညာများအား တိုက်ရိုက်ထည့်သွင်းပေနိုင်သော အံဖွယ် (၁)

ယခင်က သူ မပြောပြချင်၍ မဟုတ်ဘဲ ပဋိညာဉ်၏ ကန့်သတ်ချက်များကြောင့်သာ ပြောမပြနိုင်ခဲ့ခြင်း ဖြစ်၏။

ထိုသို့မဟုတ်ပါက ပဋိညာဉ်ဖောက်ဖျက်မှု ဖြစ်သွားမည်ဖြစ်ပြီး အိပ်မက်ဆိုးအမှတ်အသား၏ အပြစ်ပေးခြင်းကို ခံရပေမည်။

"ဒီလောက် အတင်းအကျပ်ခိုင်းစေတဲ့ ပဋိညာဉ်မျိုး ရှိနေတာလား..."

"အိပ်မက်ကမ္ဘာက တကယ်တမ်း ဘာအသုံးဝင်လို့လဲ..."

ကျိုးယီသည် ချက်ချင်းပင် အလွန်တရာ သိချင်စိတ် ပြင်းပြသွားခဲ့သည်။ အိပ်မက်ကမ္ဘာ၏ ကန့်သတ်ချက်များက ဤမျှလောက် များပြားနေသည်ဆိုလျှင် အိပ်မက်ကမ္ဘာကို ပိုင်ဆိုင်ထားသူက အိပ်မက်ကမ္ဘာ၏ သတင်းများ ပေါက်ကြားသွားပြီး ကြီးမားသော ကပ်ဘေးတစ်ခုကို ဆွဲဆောင်မိမည်ကို အလွန်စိုးရိမ်နေကြောင်း ဖော်ပြနေသည် မဟုတ်ပါလော။

ထို့ကြောင့် ဤနည်းလမ်းကို အသုံးပြုမှသာလျှင် အိပ်မက်ကမ္ဘာအကြောင်း ပေါက်ကြားမှုကို ရှောင်ရှားနိုင်မည် ဖြစ်၏။

ဤသည်က အိပ်မက်ကမ္ဘာမှာ အလွန်တရာ အရေးကြီးကြောင်း ဖော်ပြနေလေသည်။

သေခြင်းနှင့်ရှင်ခြင်းကို အဆုံးအဖြတ်ပေးနိုင်သော အဆင့်အထိ ရောက်ရှိနေခြင်းကြောင့်သာ ဤမျှ အရေးတယူ ပြုလုပ်နေခြင်း ဖြစ်ရပေမည်။

"အိပ်မက်ကမ္ဘာက သေချာပေါက် အရမ်းအရေးကြီးတာပေါ့..."

"အကယ်လို့ အိပ်မက်ကမ္ဘာသာ မရှိဘူးဆိုရင် မင်းရဲ့မိဘတွေဖြစ်တဲ့ ငါတို့က ဒီလောက်မြန်မြန် ရွှေအမြုတေအဆင့် ကျင့်ကြံသူတွေ ဖြစ်လာနိုင်မှာ မဟုတ်ဘူး..."

"အိပ်မက်ကမ္ဘာပေါ်လာတာက ငါတို့ လူသားမျိုးနွယ်အတွက် အရမ်းကြီးမားတဲ့ တွန်းအားတစ်ခု ဖြစ်လာတယ်လို့ ပြောလို့ရတယ်..."

"ငါတို့က အိပ်မက်ကမ္ဘာထဲမှာ ရှိနေရင် လက်တွေ့ကမ္ဘာမှာ ဖြစ်ပျက်သမျှအရာအားလုံးကို ပုံတူကူးယူပြီး လေ့ကျင့်လို့ရတယ်..."

"ဥပမာအနေနဲ့ ဆေးဖော်စပ်တာကို ပုံတူကူးပြီး လေ့ကျင့်လို့ရတယ်... အဆောင်လက်ဖွဲ့ဆွဲတာ... တိုက်ခိုက်တာ စတာတွေကို ပုံတူကူးလို့ရတယ်..."

"ပြီးတော့ ငါတို့က အိပ်မက်ကမ္ဘာထဲမှာ လုံလောက်တဲ့ အတွေ့အကြုံတွေ စုဆောင်းမိသွားရင် အဲဒီအတွေ့အကြုံတွေကို လက်တွေ့ကမ္ဘာထဲကို ယူဆောင်လာလို့ရတယ်..."

"အိပ်မက်ကမ္ဘာ ပေါ်လာပြီးကတည်းက ဖုန်းရှီးကျွန်းက ဆေးဖော်စပ်ပညာရှင်တွေနဲ့ အဆောင်ပညာရှင်တွေရဲ့ အရေအတွက်က အဆမတန် တိုးလာခဲ့တယ်..."

ကျိုးယီ၏ဖခင်က အလွန်တရာ ခံစားချက်ပြင်းပြစွာဖြင့် ပြောလိုက်၏။

ပုံမှန်အားဖြင့်ဆိုရလျှင် သူသည် ဤဘဝတွင် ဆေးဖော်စပ်ပညာရှင်တစ်ယောက် ဖြစ်လာရန် ခဲယဉ်းပေမည်။

မည်သို့ပင်ဆိုစေကာမူ ဆေးဖော်စပ်ပညာရှင်တစ်ယောက် ဖြစ်လာရန်အတွက် အစောပိုင်း ကုန်ကျစရိတ်မှာ အလွန်တရာ များပြားလွန်းလှသဖြင့် သာမန်မိသားစုတစ်ခုက တတ်နိုင်စွမ်းမရှိပေ။

သို့သော်ငြား အိပ်မက်ကမ္ဘာ ပေါ်လာပြီးနောက်ပိုင်းတွင် ကန့်သတ်ချက်များမှာ မည်မျှအထိ လျော့ကျသွားခဲ့မှန်းပင် မသိတော့ချေ။

သူသည် အိပ်မက်ကမ္ဘာထဲတွင် ဆေးဖော်စပ်ခြင်းကို လုံးဝ ပုံတူကူးယူ၍ လေ့ကျင့်နိုင်သည်။

ဆေးဖော်စပ်ခြင်းကို နည်းပညာပိုင်းဆိုင်ရာ ကျွမ်းကျင်သွားမှသာ လက်တွေ့ကမ္ဘာတွင် ဆေးဖော်စပ်ခြင်းကို ပြုလုပ်နိုင်သည်။

ထိုသို့လုပ်ဆောင်ခြင်းဖြင့် သူ၏ဆေးဖော်စပ်မှု အောင်မြင်နိုင်စွမ်းသည် အဆမတန် တိုးတက်လာမည် ဖြစ်၏။

ဆေးဖော်စပ်ပညာရှင်တစ်ယောက်ဖြစ်လာရန် လမ်းကြောင်းပေါ်တွင် ကုန်ကျစရိတ် မည်မျှလောက် သက်သာသွားခဲ့မှန်းပင် မသိနိုင်တော့ချေ။

"လက်တွေ့ကမ္ဘာမှာ ဖြစ်ပျက်သမျှ အရာအားလုံးကို ပုံတူကူးယူပြီး လေ့ကျင့်လို့ရတယ် ဟုတ်လား..."

ကျိုးယီ၏ သူငယ်အိမ်များ ကျုံ့ဝင်သွားခဲ့သည်။

သူသည် ခန္ဓာပေါင်းစည်းခြင်းအဆင့် ကျင့်ကြံသူတစ်ယောက်အနေဖြင့် သေချာပေါက် လူမိုက်တစ်ယောက် မဟုတ်သောကြောင့် လူသားမျိုးနွယ် ကျင့်ကြံသူများအတွက် အိပ်မက်ကမ္ဘာ၏ ကြီးမားသော အသုံးဝင်မှုကို ပထမဆုံးအချိန်မှာပင် သတိပြုမိသွားခဲ့သည်။

အကယ်၍ လူတိုင်းသာ အိပ်မက်ကမ္ဘာကို အသုံးပြုနိုင်မည်ဆိုပါက လူသားမျိုးနွယ် ကျင့်ကြံသူများ၏ အရေအတွက်နှင့် စုစုပေါင်း စွမ်းအားတို့သည် အံ့မခန်း တိုးတက်လာမည် ဖြစ်၏။

အချိန်ကြာလာသည်နှင့်အမျှ လူသားမျိုးနွယ်၏ စွမ်းအားသည် မည်သည့်အဆင့်အထိ ရောက်ရှိသွားမည်ကို သူ စိတ်ကူးကြည့်၍ပင် မရနိုင်တော့ပေ။

"အိပ်မက်ကမ္ဘာက လက်တွေ့ကမ္ဘာမှာ ဖြစ်ပျက်တာတွေကို ပုံတူကူးယူနိုင်ရုံတင် မကဘူး..."

"တစ်ချိန်တည်းမှာပဲ သင်ယူလေ့လာဖို့အတွက် အထွတ်အမြတ်နေရာတစ်ခုလည်း ဖြစ်တယ်..."

"မင်းက အိပ်မက်ကမ္ဘာထဲမှာ ကျင့်စဉ်တွေ၊ ပညာရပ်တွေ အမျိုးမျိုး ဝယ်ယူလို့ရတယ်..."

"ဒီပညာရပ်တွေက မင်းရဲ့သိစိတ်ပင်လယ်ထဲကို ချက်ချင်း ဝင်ရောက်သွားနိုင်ပြီး မင်းကို ပညာရပ်တစ်ခု ချက်ချင်း တတ်မြောက်သွားစေနိုင်တယ်..."

"မင်းအတွက် ကျင့်ကြံဖို့ အချိန်ဘယ်လောက်တောင် သက်သာသွားမလဲဆိုတာ မသိနိုင်တော့ဘူးလို့ ပြောလို့ရတယ်..."

"ဒါပေမဲ့ ဒါက အဆင့်နိမ့်ပညာရပ်လေးတွေ အတွက်ပဲပေါ့... နတ်ဘုရားစွမ်းရည်တွေ ဆိုရင်တော့ ကိုယ်တိုင်ကျင့်ကြံဖို့ လိုအပ်သေးတယ်..."

"ဒါတောင်မှ ဒါက ငါတို့ ကျင့်ကြံတဲ့အချိန်ကို အများကြီး သက်သာစေတာပဲ..."

ကျိုးယီ၏မိခင်က ပြုံးလိုက်ရင်း အိပ်မက်ကမ္ဘာ၏ ဒုတိယမြောက် အသုံးဝင်မှုဖြစ်သော တိုက်ရိုက်အသိပညာထည့်သွင်းပေးခြင်း အကြောင်းကို ပြောပြလိုက်သည်။

အမှန်စင်စစ်အားဖြင့် ဤသည်မှာ ‘စာအုပ်ကူ’၏ စွမ်းအားမှ လာခြင်းဖြစ်၏။

‘စာအုပ်ကူ’နှင့် ‘အိပ်မက်ဝိညာဉ်ကူ’တို့သည် တစ်ခုနှင့်တစ်ခု ပေါင်းစပ်နိုင်သည်။

အသိပညာများကို တိုက်ရိုက်ထည့်သွင်းပေးသည့်အခါ ‘စာအုပ်ကူ’၏ စွမ်းအားကို အသုံးပြု၍ အသိပညာများကို သွင်းပေးနိုင်သည်။

ဤသို့ဆိုလျှင် မရေမတွက်နိုင်သော လူသားမျိုးနွယ် ကျင့်ကြံသူများအတွက် အဆင်ပြေသွားမည်ဖြစ်ပြီး လူသားကျင့်ကြံသူများအတွက် လေ့လာသင်ယူရမည့် အချိန်များစွာကို သက်သာစေမည် မဟုတ်ပါလော။

မှန်ပေ၏၊ ပိုမိုရှုပ်ထွေးသော နတ်ဘုရားစွမ်းရည်များနှင့် ပညာရပ်များအတွက်မူ လူသားမျိုးနွယ် ကျင့်ကြံသူများကိုယ်တိုင် လေ့လာသင်ယူကာ သဘောတရားကို နားလည်အောင် ကြိုးစားရန် လိုအပ်နေဆဲပင်။

တိုက်ရိုက်အသိပညာ မထည့်သွင်းပေးနိုင်၍ မဟုတ်ဘဲ သာမန်လူသားမျိုးနွယ် ကျင့်ကြံသူများ၏ ဦးနှောက်မှာ ထိုမျှသာရှိသောကြောင့် ဖြစ်လေသည်။ အကယ်၍ အတင်းအကျပ် အသိပညာများ ထည့်သွင်းပေးလိုက်မည်ဆိုပါက တစ်ဖက်လူ၏ ဦးနှောက်ကို ပေါက်ကွဲသွားစေမည်သာ။

ထိုသို့ဆိုလျှင် အကျိုးနှင့်အပြစ် လုပ်ဆောင်ရကျိုးနပ်မည် မဟုတ်တော့ချေ။

"ဘာ..."

ထိုစကားကို ကြားသောအခါ ကျိုးယီ၏ စိတ်ထဲတွင် မုန်တိုင်းထန်နေသည့်အလား လှိုင်းလုံးကြီးများ ရိုက်ခတ်သွားပြီး ဘာပြောရမှန်းပင် မသိတော့ချေ။

အိပ်မက်ကမ္ဘာရှိနေခြင်းကို အဘယ်ကြောင့် တင်းကျပ်စွာ ကန့်သတ်ထားပြီး အပြင်လူများကို မသိစေသနည်းဆိုသည်ကို သူ ချက်ချင်းပင် နားလည်သွားခဲ့သည်။

အကယ်၍ အိပ်မက်ကမ္ဘာရှိနေကြောင်းကို အခြားမျိုးနွယ်စုများသာ သိရှိသွားပါက လူသားမျိုးနွယ်သည် မျိုးပြုတ်မည့်ကပ်ဘေးနှင့် ရင်ဆိုင်ရ‌ပေမည်။

ဤသည်က သာမန် အင်မော်တယ်ရတနာများနှင့် နှိုင်းယှဉ်၍ ရနိုင်သောအရာ မဟုတ်ပေ။

အစစ်အမှန်ဝိညာဉ်များပင်လျှင် ဤကိစ္စကို သိသွားပါက အစုလိုက်အပြုံလိုက် ရောက်ရှိလာကြမည်ဖြစ်ပြီး ထိုအချိန်ကျလျှင် ဖုန်းရှီးကျွန်းတစ်ခုလုံး မြေကြီးနှင့် တစ်ပြေးညီ ဖြစ်သွားနိုင်ချေရှိသည်။

"အဖေ... ဒီအိပ်မက်ကမ္ဘာက အင်မော်တယ်ရတနာများ ဖြစ်နေမလား..."

ကျိုးယီတစ်ယောက် မနေနိုင်ဘဲ မေးလိုက်သည်။ သူ မည်သို့ပင် တွေးတောစဉ်းစားစေကာမူ မည်သည့်မှော်ရတနာက ဤအချက်ကို လုပ်ဆောင်နိုင်မည်ဆိုသည်ကို မတွေးတတ်တော့ချေ။ ဒဏ္ဍာရီထဲမှ အင်မော်တယ်ရတနာများသာလျှင် ဤကဲ့သို့ လုပ်ဆောင်နိုင်ပေလိမ့်မည်။

"အမှန်အတိုင်းပြောရရင် ဒါက ငါတို့ ကျင့်ကြံသူအများစုရဲ့ ခန့်မှန်းချက်ပဲ... ဒါက သေချာပေါက် အင်မော်တယ်ရတနာတစ်ခုရဲ့ စွမ်းအားပဲ ဖြစ်ရမယ်..."

"ဘိုးဘေးကျိုးက ငယ်ငယ်ရွယ်ရွယ်နဲ့ သတ္တမအဆင့် အစီအရင်ပညာရှင်၊ သတ္တမအဆင့် ဆေးဖော်စပ်ပညာရှင်တွေ ဖြစ်လာတာက အိပ်မက်ကမ္ဘာနဲ့ အကြီးအကျယ် သက်ဆိုင်နေတယ်... အိပ်မက်ကမ္ဘာရဲ့ အကူအညီကို ရရှိခဲ့လို့ ဒီနေ့အထိ ကြီးထွားလာခဲ့တာပဲ..."

"ဒါပေမဲ့ အခု ဘိုးဘေးကျိုးက ဒီအင်မော်တယ်ရတနာကို ထုတ်ယူပြီး လူသားမျိုးနွယ် ကျင့်ကြံသူအားလုံးကို ပံ့ပိုးပေးဖို့ ဆန္ဒရှိနေတာဆိုတော့ ဒါက ငါတို့အတွက် သေချာပေါက် နှိုင်းယှဉ်လို့မရတဲ့ အကျိုးကျေးဇူးတစ်ခုပဲ..."

"ဒါက ငါတို့ လူသားမျိုးနွယ်ရဲ့ အကြီးမားဆုံးသော အခြေခံအုတ်မြစ်လည်း ဖြစ်တယ်... ဒါကြောင့် ဒီကိစ္စကို လုံးဝ ပေါက်ကြားလို့ မဖြစ်ဘူး..."

ကျိုးယီ၏ဖခင်က အလွန်တရာ တည်ကြည်လေးနက်သော မျက်နှာထားဖြင့် ပြောလိုက်၏။

အိပ်မက်ကမ္ဘာ၏ တည်ရှိမှုက မည်မျှပင် အံ့ဩတုန်လှုပ်ဖွယ်ကောင်းကြောင်းကို သူ သေချာပေါက် နားလည်ထားသည်။

အစစ်အမှန်ဝိညာဉ် မျိုးနွယ်စုများပင်လျှင် အိပ်မက်ကမ္ဘာကို မပိုင်ဆိုင်နိုင်သော်လည်း လူသားမျိုးနွယ်ကမူ ပိုင်ဆိုင်ထားခဲ့ပြီ ဖြစ်၏။

ဆိုရိုးစကားအတိုင်း လူမှာ အပြစ်မရှိသော်လည်း တန်ဖိုးကြီးရတနာ ပိုင်ဆိုင်ထားခြင်းကပင် အပြစ်တစ်ခု ဖြစ်နေလေသည်။

ကံကောင်းထောက်မစွာဖြင့် ယခု ဖုန်းရှီးကျွန်းမှာ ကျွန်းကို ပိတ်ဆို့ထားသည့် အခြေအနေတွင် ရှိနေပြီး မည်သည့် လူသားမျိုးနွယ်ကျင့်ကြံသူမှ ထွက်ခွာခွင့် မရှိပေ။

ထို့ကြောင့် အချိန်တိုအတွင်းတွင် အိပ်မက်ကမ္ဘာ၏ သတင်းများ ပေါက်ကြားသွားမည်ကို စိုးရိမ်ရန် မလိုအပ်တော့ချေ။

အကယ်၍ သစ္စာဖောက်လုပ်ချင်လျှင်ပင် လုံးဝ လုပ်ဆောင်နိုင်မည် မဟုတ်ပေ။

"သိပါပြီ အဖေ..."

ကျိုးယီက လေးနက်စွာ ခေါင်းညိတ်လိုက်သည်။ သူ၏ စိတ်ထဲတွင် အလွန်တရာ ခံစားချက်ပြင်းပြနေခဲ့၏။

ထိုကျိုးစွေ့မှာ အမှန်တကယ် လောကကြီးတစ်ခုလုံးကို ရင်ဝယ်ပိုက်ထားနိုင်သူဖြစ်ပြီး စိတ်သဘောထား ကြီးမြတ်လွန်းလှပေသည်။

သာမန် လူသားမျိုးနွယ်ကျင့်ကြံသူများသာ ဤကဲ့သို့သော အထွတ်အမြတ်ရတနာကို ရရှိပါက မည်သူကများ ဝှက်မထားဘဲနေမည်နည်း။ လုံးဝ ပေါက်ကြားခံမည် မဟုတ်ပေ။

အခြားကျင့်ကြံသူများ လောဘတက်လာပြီး လူသတ်ကာ ရတနာလုယူရန် ကြိုးစားလာမည်ကို အလွန်ကြောက်ရွံ့ကြမည် ဖြစ်၏။

သို့သော်ငြား ထိုဘိုးဘေးကျိုးကမူ လူတိုင်း အသုံးပြုနိုင်စေရန် တိုက်ရိုက်ပင် ထုတ်ပေးထားခဲ့လေသည်။

ဤကဲ့သို့သော စိတ်သဘောထားမျိုးကို လူတိုင်း ပိုင်ဆိုင်ထားခြင်း မဟုတ်ပေ။

"ဒါနဲ့ အဖေ... အိပ်မက်ကမ္ဘာထဲမှာ တကယ်တော့ ဘယ်လိုပုံစံမျိုး ရှိတာလဲ..."

ကျိုးယီက သိချင်စိတ်ဖြင့် မေးလိုက်၏။

သူသည် အိပ်မက်ကမ္ဘာထဲသို့ ချက်ချင်းဝင်ရောက်ကာ အိပ်မက်ကမ္ဘာ၏ အခြေအနေမှာ မည်သို့ရှိနေသည်ကို ရှင်းရှင်းလင်းလင်း သိချင်နေသော်လည်း သတင်းအချက်အလက်အားလုံးကို ရှင်းလင်းစွာ စုံစမ်းပြီးမှသာ အိပ်မက်ကမ္ဘာထဲသို့ ဝင်ရောက်ချင်နေဆဲ ဖြစ်သည်။

ဤသည်မှာ ‘ရန်သူကိုသိ၍ မိမိကိုယ်ကိုသိပါက စစ်ပွဲတစ်ရာတိုက်လျှင် တစ်ရာနိုင်သည်’ ဆိုသည့်အတိုင်းပင်။

သူသည် ဤအချိန်လေးအတွင်းတွင် လုံးဝ အလျင်စလို မဖြစ်ပေ။

"ဒါကတော့ အိပ်မက်ကမ္ဘာကို အပိုင်းနှစ်ပိုင်း ခွဲခြားထားတယ်..."

"ပထမအပိုင်းကတော့ ပင်မကမ္ဘာပဲ... ပင်မကမ္ဘာဆိုတာက လက်တွေ့ကမ္ဘာကြီးကို ရောင်ပြန်ဟပ်ထားတာဖြစ်ပြီး လက်တွေ့ကမ္ဘာကြီးရဲ့ အရာအားလုံးကို ပုံတူကူးယူထားတယ်... အခြေခံအားဖြင့်တော့ လက်တွေ့ကမ္ဘာနဲ့ သိပ်မကွာဘူး..."

"တကယ်လို့ မင်းအခု အိပ်မက်ကမ္ဘာထဲ ဝင်သွားမယ်ဆိုရင် ပင်မကမ္ဘာထဲကို ဝင်ရောက်သွားလိမ့်မယ်... အဲဒါက ကြယ်ကွဲပင်လယ်နဲ့ ခွန်ဖန်ပင်လယ်ဒေသကို ရောင်ပြန်ဟပ်ထားတာပဲ... ပြီးတော့ ခွန်ဖန်ပင်လယ်ဒေသကို ရာခိုင်နှုန်းပြည့် ပုံတူကူးယူထားတယ်..."

ကျိုးယီ၏ဖခင်က ရှင်းပြလိုက်တော့သည်။