သွေးစွန်းသော ညတစ်ည

ထန်ရှု ဖုန်းချလိုက်ပြီးနောက် ထန်ဝေနှင့်ရွှဲ့ကျီ၏ မျက်နှာပေါ်မှ စပ်စုလိုသောအမူအရာကို ကြည့်လိုက်သည် ။ သူက ခပ်ဖျော့ဖျော့ ပြုံးပြပြီး

"စိတ်အေးအေးထားပါ။ ဆယ်ယောက်လောက်ပဲ ခေါ်တယ်ဆိုပေမယ့် သူတို့က လူငါးဆယ် ဒါမှမဟုတ် တစ်ရာနဲ့ ယှဉ်နိုင်တယ်။ ကျွန်တော်တို့ရဲ့ နောက်ထပ်လုပ်ဆောင်မှုတွေက အောင်မြင်ရမယ်။”

"သူတို့က ဟောင်မိသားစုရဲ့ လူတွေလား" ရွှဲ့ကျီ စူးစမ်းလိုက်သည်။

“မဟုတ်ဘူး။” ထန်ရှုက ခေါင်းခါလိုက်ရင်း "သူတို့က ကျွန်တော့်လူတွေပဲ။"

"နင် ပြောတာကို ငါနားမလည်ဘူး … ထန်ရှု။" ရွှဲ့ကျီ စိတ်ရှုပ်သွားရင်း

"သူတို့က နင့်ရဲ့လူတွေလို့ နင်ပြောတာလား။ နင်က လူတချို့ကို လေ့ကျင့်ပေးနေတာလား။"

“ဟုတ်တယ်။ ကျွန်တော်က အမှန်တကယ် လူတချို့ကို လေ့ကျင့်ပေးနေတာ အမှန်ပဲ။”

ထန်ရှုက ခပ်ဖျော့ဖျော့ပြုံးကာ ပြောသည်။

“မိသားစုရဲ့ ဘိုးဘေးတွေက ကျွန်တော့်ကို မတွေ့ခင်မှာ ကျွန်တော် ကိုယ်ပိုင်လုပ်ငန်းကို စလုပ်နေပြီ။ ကိုယ့်လူတွေကို မရွေးချယ်ထားပဲနဲ့ လုပ်ငန်းကို ဆက်လုပ်ဖို့က အရမ်းခက်ခဲပါတယ်။”

"နင် တကယ်ပဲ ကိုယ်ပိုင်စီးပွားရေးလုပ်နေတာလား။" ရွှဲ့ကျီ အံ့သြသွားသည်။

ထန်ဝေက ပြောပြသည်။

“အန်တီရွှဲ့ … ဒီကိစ္စကို မိသားစုထဲက လူနည်းစုကပဲ သိတယ်။ တကယ်တော့ မိသားစုနဲ့ မတွေ့ခင် အထက်တန်းကျောင်းတက်တုန်းကတည်းက ညီလေးက ကုမ္ပဏီတစ်ခု ထူထောင်ပြီး လုပ်ငန်းတစ်ခု စလုပ်ခဲ့တာပါ။ သူ့ကို အထင်မသေးပါနဲ့။ ကမ္ဘာပေါ်မှာ အံ့သြစရာအကောင်းဆုံး ရွှေမန်နေဂျာဖြစ်တဲ့ ခန်းရှကတောင် ကျွန်တော့်ညီရဲ့အလုပ်ကို ကူညီလုပ်ပေးတဲ့သူပဲ။”

"ခန်းရှလား။ ထန်ရှု … နင်က ခမ်းနားသော ထန်လုပ်ငန်းစုရဲ့ သူဋ္ဌေးလား...။"

"အမှန်ပါပဲ။" ထန်ရှုက အပြုံးနှင့် ပြောသည်။ "ခမ်းနားသော ထန်လုပ်ငန်းစုက တကယ်ပဲ ကျွန်တော့်ကုမ္ပဏီပါ။ ဒါပေမယ့် အရင်းအနှီးအများကြီး မြှုပ်နှံထားပြီး အခုမှ စရုံရှိသေးတာမို့  အမြတ်မထွက်သေးဘူး။”

ယခုအချိန်တွင် ရွှဲ့ကျီသည် ထန်ရှုအား ကြည့်သောပုံစံသည် ယခင်ကနှင့် ထပ်မံ ကွဲပြားသွားပြန်ချေပြီဖြစ်သည်။ ထန်ရှု၏နည်းဗျူဟာ၊ စွမ်းပကားနှင့် စစ်အင်အားအတွက် သူမ ဝန်ခံပြီး ချီးကျူးခဲ့သည်။ သို့သော်  စီးပွားရေးနှင့် ပတ်သက်ပါက သူမက ထန်ရှုထက် ပိုကျွမ်းကျင်သည်ဟု ထင်ခဲ့မိသည်။ သို့သော် ထန်ရှုသည် အမှန်တကယ်ပင် ခမ်းနားသော ထန်စီးပွားရေးလုပ်ငန်းစု၏ သူဋ္ဌေးကြီးဖြစ်လိမ့်မည်ဟု သူမ တစ်ခါမျှ မထင်ခဲ့မိပေ။ ခန်းရှပင်လျှင် သူ့အတွက် အလုပ်လုပ်ပေးရန် သဘောတူထားခဲ့သည်။

ခန်းရှက မည်သူဖြစ်ပါသနည်း။ သူမသည် တရုတ်နိုင်ငံရှိ စီးပွားရေးလုပ်ငန်းရှင်များအားလုံး၏ အိပ်မက်ထဲတွင် တောင့်တကြသော ရွှေမန်နေဂျာဖြစ်သည်။ စီးပွားရေးလောကတွင် သူမ၏ နာမည်ကျော်ကြားမှုသည် စာရင်းဝင်ကုမ္ပဏီများ၏ သူဋ္ဌေးကြီးများထက် ပိုမိုထင်ရှားလှသည်။

"အံ့အားသင့်စရာပဲ။"

ရွှဲ့ကျီထံတွင် သူမပြောချင်သော စကားထောင်ပေါင်းများစွာ ရှိသော်လည်း နောက်ဆုံးတွင် သူမသည် ထိုစကားတစ်ခွန်းကိုသာ ပြောနိုင်ခဲ့သည်။

ထန်ရှုက ထူးခြားချက်မရှိသော အပြုံးဖြင့် တုန့်ပြန်လိုက်ပြီး

"အားလုံး အနားယူထားကြပါ။ ကျွန်တော် စစ်ဆင်ရေးအစီအစဉ်ကို စဉ်းစားဖို့ လိုတယ်။ ဟောင်မိသားစုဆီက သတင်းတစ်ခုခုရရင် ဒီညမှာ ကျွန်တော်တို့ လှုပ်ရှားမယ်။"

"နင်က စပြီးလှုပ်ရှားမှာလား။" ရွှဲ့ကျီ အံ့သြသွားသည်။

"ကမ္ဘာ့အကောင်းဆုံး ခံစစ်ပုံစံက အမြဲတမ်း တိုက်ခိုက်ခြင်းပဲ။" ထန်ရှုက ခေါင်းညိတ်ရင်း

“မနေ့က အောင်ပွဲရခဲ့ပေမယ့် ယောင်နဲ့ စွန်းမိသားစုတွေက ငြိမ်နေမှာ မဟုတ်ဘူး။ ဒီလိုအခြေအနေမျိုးမှာ ဦးအောင်တိုက်ခိုက်ရမှာ ဖြစ်သလို တိုက်ခိုက်ဖို့အတွက် အကောင်းဆုံးအချိန်ပါပဲ။”

ရွှဲ့ကျီနှင့် ထန်ဝေတို့သည် တညီတညွတ်တည်း ခေါင်းညိတ်ပြလိုက်ကြသည်။ ထန်ရှု၏သုံးသပ်ချက်သည် ကျိုးကြောင်းသင့်သည်ဟု သူတို့ပြောနိုင်သည်။ စစ်ပွဲတွင် ရန်သူကို အငိုက်ဖမ်း တိုက်ခိုက်ခြင်းဖြင့် ဖမ်းနိုင်ပေသည်။

နှစ်နာရီကြာပြီးနောက် ထန်ရှုသည် အခန်းထဲမှ ထွက်လာသည်။ ယောင်နှင့်စွန်းမိသားစုများ၏ အင်အားအခြေအနေနှင့်ပတ်သက်၍ သူသိထားသမျှ အချက်များနှင့်အတူ တိုက်ပွဲအစီအစဉ်တစ်ရပ်ကို ရေးဆွဲခဲ့သည်။ အစီအစဉ်သည် ပြီးပြည့်စုံသည်ဟု သူ မပြောရဲချေ။ သို့တိုင် စစ်ဆင်ရေးအစီအစဉ်ကို ကောင်းမွန်စွာ အကောင်အထည်ဖော်နေသရွေ့ ယောင်နှင့် စွန်းမိသားစုများကို ကြီးမားသော ထိုးနှက်ချက် သက်ရောက်စေမည်ဟု သူယုံကြည်ထားသည်။

"ထန်ရှု … လူဆယ်ယောက်ရောက်လာပြီ။"

ထန်ရှု ထွက်လာသည်ကိုမြင်ပြီးနောက် အခန်းအပြင်တွင် အကြာကြီးစောင့်နေသည့် ရွှဲ့ကျီက အမြန်သတင်းပို့လိုက်သည်။

ထန်ရှုက ခေါင်းညိတ်ပြကာ စစ်ဆင်ရေးအစီအစဉ်အား ရွှဲ့ကျီကို လှမ်းပေးရင်း

“ဒါလေး တစ်ချက် အရင်ကြည့်ပါဦး။ အဲ့ဒီမှာ ပြဿနာလောက်မရှိဘူးလို့ ထင်ရင် ဒီအစီအစဉ်အတိုင်း ကျွန်တော်တို့ စတင်လုပ်ဆောင်မယ်။ ကျွန်တော် သူတို့ကို အရင်တွေ့လိုက်ဦးမယ်။"

ထို့နောက် ထန်ရှုသည် အဆောက်အဦးထဲမှ ထွက်လာခဲ့သည်။ အပြင်သို့ရောက်သောအခါ လှံကဲ့သို့ ဖြောင့်တန်းနေသော လူဆယ်ယောက်တန်းကို တွေ့လိုက်ရသဖြင့် သူ တိတ်တဆိတ် ခေါင်းညိတ်မိသည်။

"မင်းတို့အထဲမှာ ဂူလန် (အထီးကျန်ဝံပုလွေ)က ဘယ်သူလဲ။"

"ငါက ဂူလန်ပါ။ သူဌေးကို သတင်းပို့ပါတယ်။”

ပိန်ပိန်ပါးပါး လူတစ်ယောက်က ရှေ့သို့ ခြေတစ်လှမ်းတိုးကာ လေးစားစွာ ပြောလိုက်သည်။

"မင်းရဲ့အရှိန်ကို ငါအရမ်းကျေနပ်တယ်။" ထန်ရှုက ခေါင်းညိတ်ပြီး ပြောသည်။

"အခုအနားယူပြီး ဒီညနောက်လာမည့် အမိန့်ကို စောင့်ပါ။"

“ဟုတ်။” ဂူလန်က လေးနက်သောလေသံဖြင့် ပြန်ပြောသည်။

နေဝင်ရီတရောအချိန်တွင် ရွှဲ့ကျီ၏ အချက်အလက်များထက် ပိုမိုအသေးစိတ်သော၊ သူတို့၏ ထောက်လှမ်းရေးက စုဆောင်းထားသည့် အချက်အလက်များကို ပေးပို့ဖို့ ဟောင်ပင်းချန်က လူတစ်ယောက်ကို စေလွှတ်လိုက်သည်။

ထန်ရှုနှင့် အခြားလူများက ၎င်းတို့ကို ဖတ်ပြီးနောက် သူ ယခင်ပြုလုပ်ခဲ့သော တိုက်ခိုက်ရေးအစီအစဉ်ကို ပြန်လည်ပြင်ဆင်ခဲ့သည်။

"ညီလေး … အားလုံးပြင်ဆင်ပြီးပြီ။ မင်းရဲ့အမိန့်ကို ငါတို့ အခုစောင့်နေတယ်။"

ထန်ဝေသည် အပြင်ဘက်မှ ဝင်လာကာ လေးနက်သော လေသံဖြင့် ပြောလိုက်သည်။

ထန်ရှုခေါင်းညိတ်လိုက်သည်။ အဆောက်အဦးအပြင်သို့ ထွက်လာသောအခါ အတန်းတစ်တန်းလျှင် လူဆယ်ယောက်ပါသော လူငါးတန်းကို မြင်လိုက်ရသဖြင့် ကျေနပ်စွာ ခေါင်းညိတ်ပြီး

“ငါ့ရဲ့ တိုက်ခိုက်ရေးအစီအစဉ်ကို မင်းတို့ မြင်ပြီးပြီ။ ဒီနေ့ည ငါတို့အဖွဲ့ သုံးဖွဲ့ခွဲမယ်။ ပထမနဲ့ ဒုတိယပစ်မှတ်တွေကို တိုက်ခိုက်ဖို့ လူအယောက် ၂၀ ပါဝင်တဲ့အဖွဲ့တစ်ဖွဲ့ကို လီရှောင်ကျီက ဦးဆောင်ပါ။ ဂူလန်က တတိယနဲ့ စတုတ္ထပစ်မှတ်တွေကို တိုက်ခိုက်ဖို့ လူ ၂၀ ပါအခြားတစ်ဖွဲ့ကို ဦးဆောင်ပါ။ ပဉ္စမနဲ့ ဆဋ္ဌမပစ်မှတ်တွေကို တိုက်ခိုက်ဖို့ လူဆယ်ဦးပါတဲ့ အဖွဲ့ကိုတော့ ငါ ကိုယ်တိုင် ဦးဆောင်မယ်။ ဒီနေ့ည တာဝန်ကတော့ ယောင်နဲ့ စွန်းမိသားစုတွေရဲ့ အမာခံနယ်မြေခြောက်ခုကို သိမ်းပိုက်မယ်။ သူတို့ရဲ့ မိသားစုစီးပွားရေးလုပ်ငန်းတွေကို အလင်းတန်းလို အရှိန်နှုန်းနဲ့ ဖျက်ဆီးကြမယ်။ ကားတွေ၊ လက်နက်တွေ အကုန်ပြင်ဆင်ပြီးပြီ။ ထိခိုက်သေဆုံးမှုတွေကို လျှော့ချဖို့ ခိုးဝင်တိုက်ခိုက်မှုတွေကိုပဲ သုံးမယ်။ ရန်သူက ငါတို့ကို မတွေ့သေးသရွေ့ တတ်နိုင်သမျှ သေနတ်တွေ မသုံးပါနဲ့။”

“ငါတို့ရဲ့ စစ်ဆင်ရေးကို ညဆယ်နာရီတိတိ စတင်မယ်။ မင်းတို့တွေ ပစ်မှတ်နေရာကိုရောက်သွားတဲ့အခါ ပစ်မှတ်တွေရဲ့ သီးခြားအခြေအနေတွေကို ရှင်းရှင်းလင်းလင်း စူးစမ်းလေ့လာပြီး ပုံမှန်မဟုတ်တဲ့ အခြေအနေတစ်ခုခုရှိခဲ့ရင် အချိန်မရွေး ငါ့ကို သတင်းပို့ပါ။"

ချက်ခြင်းပင် ထန်ရှုသည် သူ့၏လက်အား ဝှေ့ယမ်းခဲ့ရာ လီရှောင်ကျီနှင့် ဂူလန်၏တပ်ဖွဲ့များသည် စက်ရုံမှ အမြန်မောင်းထွက်သွားကြသည်။

ထန်ရှု၏အနားတွင် ရပ်နေသည့် ထန်ဝေက လေးနက်စွာ ပြောလိုက်သည်။

“ညီလေး … ငါ တိုက်ပွဲမှာ ပါဝင်ရမယ်။ မင်းရဲ့အဖွဲ့နောက်ကို ငါ လိုက်မယ်။ မင်းနဲ့ငါနှစ်ယောက်လုံးက ထန်မိသားစုဝင်တွေပါ။ မင်း စစ်တိုက်ဖို့ သွားနိုင်ရင် ငါလည်း လုပ်နိုင်တယ်။”

"ဒါဆို ငါတို့အားလုံးသွားကြရင် ဒီနေရာကို ဘယ်သူက တာဝန်ယူမှာလဲ။"

ထန်ရှုက မေးလိုက်သည်။

"ထန်ရှု … ထန်ဝေကို နင်နဲ့အတူ လိုက်ခွင့်ပြုလိုက်ပါ။ ဒီနေရာကို ငါနဲ့ထားခဲ့လိုက်။" ရွှဲ့ကျီက ဝင်ပြောသည်။

ထန်ရှုက ခေါင်းညိတ်ပြရင်း

"ဒါဆို ငါတို့နဲ့လိုက်ခဲ့။ ဒါပေမယ့် မင်း ငါ့အနားမှာပဲ နေရမယ်။ အန္တရာယ်ရှိတဲ့ အခြေအနေမျိုးကြုံလာရင် ချက်ချင်းပြန်ဆုတ်ရမယ်။"

"ပြဿနာမရှိပါဘူး။"

ထန်ဝေက ကျေနပ်စွာ ပြုံးပြလိုက်သည်။

ကွမ်မြို့ အင်ပါရီယယ် နိုက်ကလပ်…

စွန်းမိသားစုအကြီးအကဲ၏ ညီငယ်ဖြစ်သူ စွန်းဖေးလုံသည် သူ၏သူငယ်ချင်းများနှင့် အရက်သောက်နေသည်ကို မိန်းမပျိုလေးများမှ ဝိုင်းအုံလျက် အလွန်အကျူး ဝန်ဆောင်မှုများ ပေးနေသည်။

“ဒီကွမ်မြို့က တကယ်ကောင်းတဲ့နေရာပါ။ အနောက်မြောက်မှာရှိတဲ့ ငါတို့နေရာထက် အများကြီး ပိုကောင်းပါတယ်။ သူဋ္ဌေးစွန်း … ငါတို့တွေ သူငယ်ချင်းဖြစ်ခဲ့တာ ဆယ်နှစ်ကျော်ပြီ ဟုတ်လား။ ငါတို့ ဒီကိုလာချင်တယ်လို့ မင်းကို အကြိမ်ကြိမ်ပြောခဲ့ပေမယ့် မင်းတစ်ခုခုနဲ့ မအားလပ်ဘူးဖြစ်နေတယ်လို့ မင်း အမြဲပြောခဲ့တယ်။ ဒါပေမယ့် ဒီတစ်ခေါက် ကွမ်မြို့ကိုရောက်လာတော့ တကယ်ပဲ ငါတို့ကို စိတ်မပျက်စေဘူးပဲ။”

လည်ပင်းတွင် ရွှေဆွဲကြိုးဝတ်ထားသည့် ထိပ်ပြောင်ပြောင် လူလတ်ပိုင်းအရွယ် အမျိုးသားတစ်ဦးက မိန်းကလေးတစ်ဦးကို ပွေ့ဖက်ရင်း ကျယ်လောင်စွာ ရယ်မောလိုက်သည်။

စွန်းဖေးလုံ၏ နှုတ်ခမ်းထောင့်တွင် အပြုံးတစ်ခု ပေါ်လာပြီး

“ဒါက ဆယ်နှစ်ကျော်ခဲ့ပြီ။ ဒါပေမယ့် မင်းတို့အားလုံးက အလုပ်များတဲ့လူတွေဆိုတော့ ငါ့ကို ဂရုစိုက်ဖို့ ဘယ်အချိန်ယူနိုင်မှာလဲ။ ထန်မိသားစုကို တိုက်ခိုက်ဖို့ ငါတို့ စွန်းမိသားစုက ယောင်မိသားစုနဲ့ ပူးပေါင်းလိုက်လို့ မဟုတ်ဘူးလား။ မင်းကို လာကူညီခိုင်းရင်တောင် မင်းက ဒီမှာရှိမှာမဟုတ်ဘူး။"

"ဟား…ဟား…ဟား…"

“ဟဲ…ဟဲ…ဟဲ…”

စွန်းဖေးလုံမှ ဖိတ်ကြားထားသော လူကြီးများသည် ဝိုင်သောက်ရင်း ရယ်မောကြသည်။

ဘန်း…

တံခါးသည် ကန် ဖွင့်ခံရပြီး အသံတိတ်သေနတ်များ ကိုင်ဆောင်ထားသော လူ၆ယောက် ဝင်လာကာ ပစ်ခတ်သည်။ ရှေ့ဆုံးမှ လူလတ်ပိုင်းအရွယ် အမျိုးသားသည် သေနတ်သမားကောင်းတစ်ဦးဖြစ်ပြီး ၎င်း၏ပစ်ခတ်မှုအရှိန်သည် လွန်စွာမြန်ဆန်လှသည်။ သူတစ်ယောက်တည်းကပင် အခန်းထဲရှိ လေးယောက်အနက်မှ နှစ်ယောက်အား တစ်ပြိုင်နက်တည်း သတ်လိုက်သည်။ စွန်းဖေးလုံပတ်လည်ရှိ လူလေးဦးပင် ပြန်လည်တိုက်ခိုက်ရန် အခွင့်အလမ်းမရှိခဲ့ချေ။ အားလုံးသေဆုံးသွားခဲ့သည်။

ထိုသေနတ်သမားခြောက်ယောက်သည် မိန်းမပျိုလေးများအား အသက်ရှင်ခွင့်ပေးခဲ့သည်။ စွန်းဖေးလုံနှင့် အခြားလူများအား အလျင်အမြန် သတ်ပြီးနောက် အခန်းထဲမှ ချက်ချင်း ထွက်သွားကြသည်။ အပြင်ဘက်ရှိ ကော်ရစ်ဒါတွင် လူသေအလောင်းလေးလောင်း ပြုတ်ကျခဲ့ပြီး အင်ပါရီယယ်နိုက်ကလပ်တစ်လျှောက်လုံး လူဒါဇင်နှင့်ချီကာ သေဆုံးခဲ့ပြီး အများစုမှာ ဓားဖြင့် ထိုးသတ်ခံရခြင်းဖြစ်သည်။

"ဆုတ်မယ်။ ဒုတိယပစ်မှတ်ကို အမြန်သွားရအောင်။”

လူအများဆုံးသတ်ခဲ့တဲ့ လူလတ်ပိုင်းအမျိုးသားကို ကြည့်ရင်း လီရှောင်ကျီက လေးနက်သည့် အသံဖြင့် တီးတိုး ပြောလိုက်သည်။

ကွမ်မြို့  ကြယ်နီရေချိုးစင်တာ …

ရေချိုးခြင်း ဖျော်ဖြေရေးစင်တာများသည် ယနေ့ခေတ်တွင် စီးပွားရေးကောင်းမွန်ပြီး လာရောက်လည်ပတ်သူ အများအပြားသည် အမျိုးသမီးများကို ရှာဖွေကြသည်။ စွန်းမိသားစု၏ တာဝန်ခံ မန်နေဂျာသည် ရုံးခန်းတွင် ထိုင်နေသည်။ သူ၏ဘေးတွင် ထိုင်နေသော မိန်းမလှလေးတစ်ယောက်က မန်နေဂျာအား ပြုံးပြရင်း ကော်ဖီခွက်ကို မွှေနေခဲ့သည်။

ည ၁၀ နာရီ…

ဧည့်သည်တော်အများအပြားသည် ရေချိုးစင်တာအနီး နေရာများရှိ လူမိုက်များဆီသို့ ရောက်ရှိလာကြသည်။ သူတို့၏ ဓားနှင့်တွေ့သူတိုင်းနီးပါး ပြင်းထန်စွာ သေဆုံးသွားရသဖြင့် ထိုသူတို့၏လုပ်ရပ်များသည် ကြမ်းတမ်းရက်စက်လှသည်။ တစ်မိနစ် သို့မဟုတ် နှစ်မိနစ်အတွင်းမှာပင် လူမိုက်ဒါဇင်ပေါင်းများစွာ အသတ်ခံခဲ့ရပြီးဖြစ်သည်။

ဘန်း…

ရုံးခန်းတံခါးသည် တွန်းဖွင့်ခြင်း ခံလိုက်ရသည်။ တစ်စုံတစ်ယောက်၏ အရိပ်သည် အတွင်းဘက်သို့ လျှပ်စီးတန်းသဖွယ် ရိပ်ကနဲ ဝင်ရောက်လာသည်။ ဂူလန်၏လက်ထဲတွင်ရှိသော ဓားမြှောင်က စွန်းမိသားစု၏ တာဝန်ခံမန်နေဂျာ၏ သေကွင်းသေကွက်အား တိတိကျကျ ထိုးဖောက်လိုက်စဉ်တွင် အခန်းတွင်းမှ မိန်းကလေးက အော်ဟစ်လိုက်သဖြင့် ဂူလန်သည် သူမအား သတိလစ်အောင် ပြုလုပ်လိုက်ပြီးနောက် လှည့်ထွက်သွားသည်။

ကွမ်မြို့ ရွှေတည်းခိုစံအိမ်…

စွန်းမိသားစုမှ ထိန်းချုပ်ထားသည့် ဧရိယာတွင် ရှိသော သီးသန့်ကလပ်လေးတစ်ခုဖြစ်သည်။ ထိုနေရာ၏ တာဝန်ခံမှာ စွန်းမိသားစု၏ထူးချွန်သော မျိုးဆက်သစ် စွန်းရှောင်ယုဖြစ်သည်။ သို့သော်လည်း ဤနေရာ၌ စွန်းမိသားစုမှ ပိုင်ဆိုင်သည့် လက်နက်ကိုင်တပ်ဖွဲ့များစွာ ရှိသည်။ အများစုမှာ စစ်မှန်သော ကိုယ်ခံပညာစွမ်းရည်ကို ပိုင်ဆိုင်ထားသည့် စွန်းမိသားစုမှ လေ့ကျင့်ပေးထားသော ကျွမ်းကျင်သူများဖြစ်သည်။ စံအိမ်၏နောက်ဖေးသည် လူနေရပ်ကွက်တစ်ခုဖြစ်သည့်အပြင် ကျွမ်းကျင်သူများအတွက် ပုံမှန်လေ့ကျင့်ရေးနေရာ ဖြစ်ပြီး အများသူငှာအတွက် မဖွင့်လှစ်ချေ။

ယနေ့ညတွင် သည်နေရာလေးသည် အလွန်တိတ်ဆိတ်ငြိမ်သက်ကာ အေးချမ်းလှပေသည်။

ထန်မိသားစုအား တိုက်ခိုက်ရန် စွန်းနှင့် ယောင်မိသားစုများအကြား မကြာသေးမီက မဟာမိတ်ဖွဲ့ခဲ့မှုအရ စွန်းမိသားစုလက်အောက်ရှိ ဤသိုင်းပညာရှင်အဖွဲ့သည် အမိန့်စောင့်ဆိုင်းနေစဉ်အတွင်း ၎င်းတို့၏စွမ်းအင်ကို ပြန်လည်ရယူရန်နှင့် ပြန်လည်တည်ဆောက်ရန်အတွက် စောစီးစွာအနားယူခဲ့ကြသည်။

ယခုအချိန်တွင် စွန်းရှောင်ယုသည် အမျိုးသမီးတစ်ဦးနှင့် အိပ်ရာထက်အချစ်ပွဲ ဆင်နွှဲနေသောကြောင့် အနားယူခြင်းမရှိသေးပေ။

ဒုတ်…

ချွန်ထက်သော မစ်ဆူဘီရှီ စစ်သုံးဓားတစ်ချောင်းသည် ၎င်း၏ နောက်ကျောကို စိုက်ဝင်လာခဲ့သည်။

ဓားကို ဆွဲထုတ်လိုက်သည့်အခိုက်အတန့်တွင် စွန်းရှောင်ယု၏မျက်နှာသည် ဖြူဖျော့သွားခဲ့သည်။ သူ ရုတ်တရက် မော့ကြည့်မိရာ သူ၏ကုတင်ဘေးတွင် ရပ်နေသောသူသည် အသက်အတော်ငယ်မှန်း သိလိုက်ရသဖြင့် ထိတ်လန့်တုန်လှုပ်သွားခဲ့သည်။

"မင်း ဘယ်သူလဲ…"

သူသည် အလွန်လျင်မြန်စွာ လျှောဆင်းလိုက်ပြီး အချက်ပေးသည့်အနေဖြင့် အော်ပြောလိုက်သည်။

သူ၏စိတ်ဝိညာဉ်အာရုံအောက်တွင် စွန်းမိသားစုလက်အောက်ရှိ သိုင်းပညာရှင် ဒါဇင်ပေါင်းများစွာသည် အိပ်မောကျနေစဉ်အတွင်း တစ်ယောက်ပြီးတစ်ယောက် အသတ်ခံနေရသည်ကို သိရှိနေရသဖြင့် ထန်ရှု၏ နှုတ်ခမ်းထက်တွင် အပြုံးတစ်ခု ပေါ်လာသည်။ သူက အေးစက်သော လေသံဖြင့် ပြောလိုက်သည်။

"စွန်းရှောင်ယု … မင်းတို့က စွန်းမိသားစုရဲ့ သေဆုံးတဲ့သူတွေထဲမှာ ပထမဆုံးကောင်တွေပဲ။ ဒါပေမယ့် မင်း စိတ်ချပါ။ မင်းရဲ့ခရီးမှာ မင်းရဲ့မျိုးနွယ်စုကလည်း ပူးပေါင်းလာတော့မှာပါ။။ မင်းတို့စွန်းမိသားစုက ကွမ်းယန်ပြည်နယ်ကနေ မကြာခင် ပျောက်ကွယ်သွားပြီး ဘယ်တော့မှ ထပ်ပြီး ပြန်ပေါ်လာမှာမဟုတ်ဘူးလို့ ငါအာမခံတယ်။"

ထန်ရှု၏စကားများ မပျောက်ကွယ်သွားသေးခင် စွန်းရှောင်ယု၏မျက်ခုံးမွှေး၂ဖက်အကြားသို့  မစ်ဆူဘီရှီစစ်သုံးဓားသည် လျှပ်စီးတန်းအလင်းသဖွယ် မြန်ဆန်စွာဖြင့် ထိုးစိုက်သွားခဲ့သည်။ တစ်ချိန်တည်းမှာပင် ထန်ရှုသည် ခေါင်းအုံးအောက်မှ သေနတ်ကို ဆွဲထုတ်ရန် ကြိုးပမ်းနေသည့် အဝတ်ဗလာနှင့်အမျိုးသမီး၏ဝမ်းဗိုက်ကို ကန်ထည့်လိုက်သည်။ သူမအား ကန်လိုက်ပြီးနောက် ထန်ရှုသည် စွမ်းရှောင်ယု၏မျက်ခုံး၂ခုအကြားတွင် စိုက်ဝင်နေသော မစ်ဆူဘီရှီစစ်သုံးဓားကို ဆွဲထုတ်ရန် ဘေးသို့ ရွေ့သွားခဲ့သည်။ ပြီးနောက် ထိုအမျိုးသမီး၏ နှလုံးသားတည့်တည့်အား ထိုးစိုက်လိုက်သည်။

ယောက်ျား မိန်းမ မခွဲခြားဘဲ ရန်သူသည် ရန်သူပင်။ ထို့ပြင် အမျိုးသမီးများသည် အမျိုးသားများထက် တစ်ခါတရံတွင် ပိုကြောက်စရာကောင်းသည်ဆိုသည်ကို ထန်ရှု ကောင်းကောင်း သိပေသည်။

ထန်ရှု၏မျက်နှာသည် ရုတ်တရက် ပြောင်းလဲသွားသည်။ သူ၏စိတ်ဝိညာဉ်အာရုံ ဖြန့်ကျက်မှုအောက်တွင် လုပ်ကြံသတ်ဖြတ်မှုများအား လုပ်ဆောင်နေသူ သူ၏လူနှစ်ဦးသည် အခန်းတစ်ခုတွင် လူသတ်ပြီးချိန်၌ ရန်သူတစ်ဦးမှ တွေ့ရှိခဲ့သည်။ ထိုလူသည် ခိုးဝင်တိုက်ခိုက်မှုကို သတိပြုမိပြီး တန်ပြန်တိုက်ခိုက်ရန်အတွက် ၎င်း၏သေနတ်ကို ထုတ်လုဆဲဆဲဖြစ်သည်။

***