စိတ်ဓာတ်အားငယ်ခြင်း

မင်းကို ပြုံးပြနေသောသူများကို မရိုက်ပါနှင့် ဟူသော ရှေးဆိုရိုးစကားတစ်ခွန်း ရှိပေသည်။ သူ့အနီးသို့ အပြုံးဖြင့် ရောက်လာသော ချူယွမ်ကို ကြည့်ရင်း ထန်ရှု၏စိတ်ထဲတွင် အနည်းငယ် ကူကယ်ရာမဲ့သလို ခံစားလိုက်ရသည်။ အထူးသဖြင့် ရွှယ်ယုက ရှန်ဟိုင်းသို့ သူ့နှင့်အတူ တွယ်ကပ်လိုက်ပါလာပြီး သည်ချူယွမ်ကလည်း သူမကို စွဲလမ်းနေခဲ့သည်မှာ သိသာထင်ရှားပေရာ သည်ငတိကို သူ မတွေ့ချင်ပေ။ သို့သော်လည်း မောင်းထုတ်ရန် အကြောင်းပြချက်လည်း မရှိပေ။

"မင်း ငါ့ကို သေချာစုံစမ်းနေပုံရတယ် မစ္စတာချူ…"

ထန်ရှုသည် စိတ်ထဲတွင် ရှိနေသောအရာများကို မျက်နှာထက်တွင် မဖော်ပြဘဲ ပြောလိုက်သည်။

ချူယွမ်သည် ထိုနေရာသို့ ရောက်နေခဲ့သည်မှာ ၁၀မိနစ်ကြာခဲ့ပြီဖြစ်သော်လည်း တံခါးဝမှ လူထွားကြီးနှစ်ဦးက အစောင့်နတ်ဘုရားများသဖွယ် သူ့အား မဝင်စေရန် ဟန့်တားထားသောကြောင့် အပြင်တွင်သာ နေနေခဲ့ရသည်။ ထန်ရှု ရောက်လာသောအခါ သူက ပြုံးလျက်

"မင်း ငါ့ကို အထင်လွဲနေတာ မစ္စတာထန်။ မင်း ရှန်ဟိုင်းတက္ကသိုလ်မှာ ကျောင်းတက်နေတာ ငါ သိတယ်လေ။ ဒါကြောင့် မင်းဆီကို လာလည်ချင်တယ်။ ဒါ့ပေမယ့် မင်းရဲ့ကျောင်းထဲကို ငါ လာလည်ရင် မသင့်တော်ဘူး။ ဒါကြောင့် မင်းရဲ့အိမ်လိပ်စာကို ရှာဖို့ ငါ့လူတွေကို ပြောခဲ့တာ။"

ထန်ရှုက ခေါင်းညိတ်ပြပြီး ချူယွမ်ကို အထဲသို့ ခေါ်သွားသည်။ အန်တီကျန်းအား လက်ဖက်ရည် စီစဉ်ပေးရန် ပြောလိုက်ပြီး ဧည့်ခန်းမှာ ထိုင်လိုက်ကြသည်။ စီးကရက်တစ်လိပ် မီးညှိဖွာရှိုက်ပြီးနောက် ထန်ရှုက တည်ငြိမ်စွာ မေးလိုက်သည်။

“မနေ့က ရှန်ဟိုင်းကို ပြန်ရောက်တာ။ ဒီနေ့ ငါ့ဆီ လာလည်တာ အရေးတကြီးကိစ္စရှိလား။"

ချူယွမ် ပြန်ဖြေခါနီးဆဲဆဲတွင် အပြင်ကနေ မိုအားဝူ တံခါးဖွင့်ဝင်လာသည်။ သူက ချူယွမ်အား တစ်ချက် ကြည့်လိုက်ပြီးနောက် ထန်ရှုဆီသို့ လျင်မြန်စွာ သွားလိုက်ပြီး အနားကပ်ကာ တီးတိုးပြောလိုက်သည်။ "သူဌေး … မီးအားပေးစက် တပ်ဆင်ပြီးပြီ။ အချိန်မရွေး သုံးလို့ရတယ်။"

“ကောင်းပြီ။ နောက်မှ တွေ့မယ်။” ထန်ရှုက ပြောသည်။

မိုအားဝူက ခေါင်းညိတ်ပြီး ထွက်သွားသည်။

"တောင်းပန်ပါတယ် ငါ့လူက ငါ့ကို အကြောင်းကြားစရာ ရှိနေလို့ပါ။ ကျေးဇူးပြု၍ ဆက်ပြောပါ။” ထန်ရှုက အနည်းငယ် ပြုံးပြပြီး ပြောလိုက်သည်။

ချူယွမ်က မတုန်မလှုပ် အမူအရာဖြင့်

"ငါတို့ အကြိမ်နည်းနည်းပဲ တွေ့ဖူးတာ ငါ သိပါတယ် မစ္စတာထန်။ ဒါပေမယ့် ငါ တကယ် ရိုးရိုးသားသား မင်းနဲ့ သူငယ်ချင်းဖြစ်ချင်တာပါ။ ငါ့အဖေက ငါ့ကို ငယ်စဉ်ကတည်းက သင်ပေးခဲ့တာ ဟင်္သာပြဒါးနဲ့ ထိတွေ့ရင် ဘယ်သူမဆို အနီရောင်ဖြစ်သွားလိမ့်မယ်တဲ့။ တိုတိုပြောရရင်တော့ အရည်အချင်းရှိတဲ့ သူတစ်ယောက်နဲ့ သူငယ်ချင်းဖြစ်ခြင်းက ကိုယ့်ကိုယ်ကိုယ် ဖိအားတွေများစွာ ပေးသလိုဖြစ်ပြီး စဉ်ဆက်မပြတ်တိုးတက်နေစေမှာပါ။”

ထိုသို့ပြောပြီးနောက် သူသည် အိတ်ကပ်ထဲမှ အဝါရောင် ဖဲစဖြင့် ထုပ်ပိုးထားသော တစ်စုံတစ်ခုကို ယူလိုက်ပြီး ထန်ရှု၏အရှေ့ရှိ လက်ဖက်ရည်စားပွဲပေါ်တွင် တင်လိုက်သည်။

“ဒါက လွန်ခဲ့တဲ့ နှစ်ပေါင်းများစွာက ငါ စုဆောင်းထားတဲ့ ပစ္စည်းလေးတစ်ခုပါ။ ငါ မင်းကို ပေးမယ့် လက်ဆောင်လေးတစ်ခုပါပဲ မစ္စတာထန်…။"

ထန်ရှုက မျက်လုံးများကို မှေးစင်းကာ ခပ်ဖွဖွ ပြုံးလိုက်ပြီး

“မင်းရဲ့အဆင့်အတန်းအရဆိုရင် ဒီလက်ဆောင်လေးတစ်ခုက မရိုးရှင်းလောက်ဘူး။ ဟုတ်တယ်မလား မစ္စတာချူ။ ကောင်းတာ မပြုလုပ်ဘဲ ဆုလာဘ်ကို မရနိုင်ဘူးလို့ လူတွေက ပြောကြတယ်။ မင်းရဲ့ ရည်ရွယ်ချက်အစစ်အမှန်ကို ဖုံးကွယ်ထားသေးရင် ငါတို့က သူငယ်ချင်းမဖြစ်ရုံတင် မကဘူး ငါတို့ အချင်းချင်း ရန်သူတွေ ဖြစ်သွားကြလိမ့်မယ်လို့ ငါ ခံစားရတယ်။"

ချူယွမ်က တွေကနဲ စိုက်ကြည့်ပြီး ချက်ချင်းပင် ခါးသီးသော အပြုံးဖြင့် ပြန်ပြောလာသည်။

"မစ္စတာထန်က ငါ့စိတ်ထဲမှာ ရှိနေတာနဲ့ ပတ်သက်ပြီး စေ့စေ့စပ်စပ် စိုးရိမ်နေပုံရတယ်။ မှန်ပါတယ် … ငါ့မှာ ဒီကိုလာရတဲ့ အဓိကအကြောင်းအရင်း ၃ ချက်ရှိတယ်။ ပထမဆုံးအနေနဲ့ မင်းရဲ့သူငယ်ချင်းဖြစ်နိုင်မယ်လို့ ငါ မျှော်လင့်တယ်။ ငါတို့တွေက မျက်နှာသာပေးမှုတွေ၊ လူမှုဆက်ဆံရေးတွေနဲ့ အုပ်ချုပ်တဲ့ လူ့အဖွဲ့အစည်းမှာ နေထိုင်နေကြတာလေ။ သူငယ်ချင်းများစွာရှိတာက နည်းလမ်းများစွာကို ပိုင်ဆိုင်ထားတာနဲ့ ညီမျှတယ်။ ဒုတိယအနေနဲ့ ထူးဆန်းတဲ့တံခါးများက ကြုံခဲ့တဲ့ မတော်တဆမှုတစ်ခုကို ငါ သိထားတယ်။ ဒီမတော်တဆမှုက မင်းနဲ့ သက်ဆိုင်ပုံရတယ် မစ္စတာထန်။ အဲ့ဒီအတွက် လူတစ်ယောက်ကို ငါ အာမခံပေးချင်ပါတယ်။ သူမက ငါ့ကို အချိန်အတော်ကြာ သင်ပေးခဲ့ပြီး ငါ့ရဲ့ဆရာတစ်ပိုင်းလို့ သတ်မှတ်လို့ရပါတယ်။"

"သူမက ဘယ်သူလဲ။" ထန်ရှု မျက်ခုံးပင့်ကာ မေးလိုက်သည်။

“သီရိစစ်တုရင်သူတော်စင်ပါ” ချူယွမ်က ပြောသည်။

ထန်ရှု၏အမူအရာသည် အေးစက်သွားကာ ခေါင်းခါလိုက်ပြီး

"အမြစ်ပြတ် မရှင်းလင်းဘဲ ပေါင်းပင်တွေကို ချန်ထားခဲ့ရင် အနာဂတ်မှာ အဆုံးမရှိတဲ့ဒုက္ခတွေကိုပဲ ရနေလိမ့်မယ်။ သူမ အရင်က ကမ်းဇတ်အမဲလိုက်ကွင်းကနေ ဘာကြောင့် ထွက်ခွာခဲ့ရတာလဲဆိုတာကို ငါ အရမ်းသိချင်နေပြီး သူမက ငါ့လက်ထဲမှာ မသေသေးပေမယ့် ငါ့ရဲ့ရန်သူ ဖြစ်နေပါသေးတယ်။ ချူယွမ် … အခု ငါ မင်းကို တစ်ခုမေးမယ်။ အကယ်၍ တစ်စုံတစ်ယောက်က ဧကရာဇ်ဥယျာဉ်ကို ဖြိုဖျက်ပြီး မင်းရဲ့ ဆွေမျိုးအားလုံးကို သတ်ခဲ့မယ်ဆိုရင် ဒီသွေးစွန်းတဲ့ လက်စားချေတာကို မင်းရော စွန့်လွှတ်နိုင်မလား။”

ချူယွမ် ခဏလောက် တွေဝသွေားရင်း ချူယွမ်က ခေါင်းခါပြီး သက်ပြင်းချရင်း

"အခု မင်း ဒီကိစ္စကို ရှင်းရှင်းလင်းလင်း ပြောထားပြီးပြီဆိုတော့ ငါသာ ပါဝင်ပတ်သက်နေသေးရင် ကိုယ့်ကိုယ်ကိုယ်  ဘာကောင်းမှန်း မသိတဲ့လူပဲ ဖြစ်သွားလိမ့်မယ်။ ငါက မင်းရဲ့ပြိုင်ဘက် လုံးဝမဟုတ်ဘူး။ သူ သေရမယ်ဆိုရင် ချိနဲ့တဲ့ သက်ကြီးရွယ်အိုတွေနဲ့ သူ့မိသားစုရဲ့ ကလေးတွေကို ပြုစုစောင့်ရှောက်ခြင်းလိုမျိုး ငါ ကိုင်တွယ်ဖြေရှင်းနိုင်တဲ့ တခြားကိစ္စတွေကိုပဲ ငါ လုပ်ပေးနိုင်တယ်။"

ထန်ရှုက ချူယွမ်အား စူးစမ်းသည့်အကြည့်ဖြင့် အကဲခတ်လိုက်ပြီး

"ဘေးဆိုးတွေမဖြစ်စေချင်ရင် ဘယ်ကိစ္စက အရေးကြီးလဲဆိုတာ မင်း သိဖို့လိုတယ်။ ဧကရာဇ်ဥယျာဉ်က အန္တိမစည်းလုံးညီညွတ်မှု ဒါမှမဟုတ် ဝိဇ္ဇာသုံးပါးထဲက မြင့်မြတ်သော အဆက်အနွယ် ဟုတ်မဟုတ်ကို ငါ မစွက်ဖက်သလို ဒီကိစ္စမှာ မင်း ဝင်ရောက်စွက်ဖက်တာ မလုပ်ရင် ပိုကောင်းမယ်။ ဒါပေါ့ … ငါလည်း ကျိုးကြောင်းမဆီလျော်တာ မလုပ်ပါဘူး။ အဲ့ဒီမိသားစုရှစ်ခုရဲ့စွန့်ပစ်ခံတွေကနေ မွေးထုတ်ပေးတဲ့ သာမန်လူကောင်းတွေလည်း ရှိပါသေးတယ်။”

ချူယွမ်သည် ထန်ရှုကို လေးလေးနက်နက် အကဲခတ်ပြီး မတုန်မလှုပ်အမူအရာဖြင့်

“ငါ နားလည်ပါတယ်။”

"ဒါဆို မင်းရဲ့ တတိယ ရည်ရွယ်ချက်ကို ပြောပါဦး။" ထန်ရှုက ဆက်မေးသည်။

"ကျောက်စိမ်းအလှမယ်လည်း မင်းနဲ့အတူ ရှန်ဟိုင်းကို လာတယ်လို့ ငါ ကြားတယ် မစ္စတာထန်။" ချူယွမ်က ဆိုသည်။

“ဟဲဟဲ…” ထန်ရှုက ရုတ်တရက် ပြုံးလိုက်သည်။ ထိုင်နေရာမှထကာ ဧည့်ခန်းတံခါးဆီသို့ လျှောက်သွားရင်း

“ဧကရာဇ်ဥယျာဉ်က ရှန်ဟိုင်းမှာ နှစ်အတော်ကြာ အမြစ်တွယ်နေပြီးပြီ … မျက်စိတွေ နားတွေ ပွင့်နေတဲ့ နက်ရှိုင်းတဲ့ အခြေခံအုတ်မြစ်တွေ ရှိနေပြီးသားဆိုတော့ ဒီလိုအသေးအဖွဲကိစ္စလေးတောင် မင်းမျက်လုံးကနေ မလွတ်ဘူး။ မင်း ဒီကို ရောက်ကတည်းက ရွှယ်ယု မျက်နှာကာ မဝတ်တော့ဘူးဆိုတာ မင်း သိသင့်တယ် မဟုတ်လား။”

ချူယွမ်၏နှလုံးသားများ တုန်လှုပ်သွားပြီး စိတ်အတွင်း၌ စိတ်ပျက်အားငယ်သွားရသည်။ ထန်ရှုနှင့် ရွှယ်ယုတို့ လေဆိပ်မှ ထွက်ခွာသွားသော ဓာတ်ပုံကို သူ မြင်တွေ့ခဲ့ရပြီး ထိုအမျိုးသမီး၏အလွန်လှပသော မျက်နှာလေးဖြင့် သူ ဆွဲဆောင်မှု ခံလိုက်ရသော်လည်း ထိုအမျိုးသမီးမှာ ရွှယ်ယုဖြစ်သည်ကို ၁၀၀% သူ မသေချာခဲ့ပေ။

သို့သော် ယခုတွင်မူ ထန်ရှုထံမှ အတည်ပြုချက်ကို ကြားလိုက်ရသဖြင့် သူ့တွင် အခွင့်အရေး မရှိတော့ကြောင်း သူ သိလိုက်ရချေပြီ။ ထန်ရှုသည် ကျောက်စိမ်းအလှမယ်ကို လုံးဝ စိတ်မဝင်စားသော်လည်း သူမ၏ စရိုက်လက္ခဏာနှင့် သူမ၏မျိုးရိုးထုံးစံအရ သူနှင့်အတူရှိနေရန် မဖြစ်နိုင်ပေ။ သူ့နှလုံးသားထဲတွင် နာကျင်နေရသော်လည်း သည်ရလဒ်အား ပြောင်းလဲပစ်နိုင်သည့် စွမ်းအား သူ့တွင် မရှိသေးပါချေ။

သူက ထန်ရှု၏အနောက်သို့ လိုက်လာရင်း ဖြူလျော်နေသော သွင်ပြင်ဖြင့် ရုတ်တရက် ပြောလိုက်သည်။

"မင်း ငါ့အကြောင်း ရှင်းရှင်းလင်းလင်းသိသင့်တယ် မစ္စတာထန်။ ရွှယ်ယုနဲ့ ငါက ငယ်စဉ်ကတည်းက တစ်ယောက်နဲ့တစ်ယောက် သိခဲ့ကြတာမို့ သူ ဆုံးဖြတ်ချက်ချပြီးပြီဆိုတော့ အဲ့ဒီဆုံးဖြတ်ချက်ကို ငါ လေးစားသွားမှာပါ။ အနာဂတ်မှာ မင်း သူ့ကို ကောင်းကောင်း ဆက်ဆံပေးနိုင်မယ်လို့ ငါ မျှော်လင့်ပါတယ်။"

ထန်ရှု ခန်းမထဲသို့ ဝင်ခါနီးတွင် သူ၏အရှိန်သည် ရုတ်တရက်ရပ်တန့်သွားပြီး ချူယွမ်၏ မလိုလားသော အမူအရာကို လှည့်ကြည့်လိုက်သည်။ ထို့နောက် သူက ပေါ့ပါးသော အပြုံးကို ပြုံးလိုက်ပြီး

"ရွှယ်ယုက ငါ့မျက်လုံးထဲမှာ ဘာမှ အရေးမကြီးပါဘူး။ ငါ့ကို ထပ်မနှောင့်ယှက်ဖို့ သူ့ကို မောင်းထုတ်ဖို့ ကြိုးစားခဲ့ပေမယ့် မအောင်မြင်ခဲ့ဘူး။ သူမကို ထွက်သွားစေပြီး ဒီတစ်သက်မှာ ဘယ်တော့မှ ပြန်မတွေ့ဖို့ မင်း ဆွဲဆောင်နိုင်ရင် မင်းရဲ့ ခင်မင်မှုကို ငါ လက်ခံပေးမယ်လေ။"

ဘာ…

ချူယွမ်၏နှလုံးသားများ တုန်လှုပ်သွားပြီး အရှက်ကွဲသွားသလို ခံစားလိုက်ရသည်။ သူ ပိုးပန်းချင်သည့် အမျိုးသမီးက တစ်ဖက်သား၏ အမြင်တွင် မထင်မှတ်ဘဲ အရေးမကြီးဘူးတဲ့လား။ သူသည် မာနကြီးပြီး သူ့ကိုယ်သူ အထင်ကြီးသူ ဖြစ်သော်ငြားလည်း ယခုအခါတွင် မိန်းကလေးတစ်ယောက်ကြောင့် အတန်ပင် စိတ်ပျက်အားငယ်နေရသည်။

"ငါ စိတ်မကောင်းပါဘူး။ ငါ့မှာ ဒါမျိုးလုပ်ပေးနိုင်တဲ့ အရည်အချင်းမရှိဘူး။” ချူယွမ်က အသက်ပြင်းပြင်း တစ်ချက်ရှူပြီး ပြောလိုက်ရင်း သူ့မျက်နှာတွင် ခါးသီးသော အရိပ်အယောင်များ ရှိနေပေသည်။

ထန်ရှုက ပြန်လှည့်လျှောက်သွားရင်း ခေါင်းယမ်းလိုက်ကာ

"ငါ လုပ်စရာတစ်ခု ရှိတယ်။ ဒါကြောင့် မင်းကို လိုက်မပို့တော့ဘူး မစ္စတာချူ။ ရွှယ်ယု နေထိုင်တဲ့ နေရာကိုလည်း မင်း သိမယ်လို့ ငါ ယုံကြည်တယ်။ မင်း သူ့ကို နောက်ပိုင်း တွေ့ချင်တဲ့အချိန်တိုင်း မင်း သူ့ကို ရှာနိုင်တယ်။"

ထိုစကားပြောပြီးနောက် ထန် ရှုသည် ဧည့်ခန်းမှ ဖြတ်သွားကာ စင်္ကြံန်၏ဆန့်ကျင်ဘက်တံခါးဆီသို့ ရောက်လာသည်။ ထို့နောက် အခန်းတံခါးကို ဖွင့်ကာ ပတ်ပတ်လည်ကို ကြည့်လိုက်သည်။ အခန်းထဲရှိ အခြားအရာအားလုံးအား ရှင်းလင်းထားပြီးဖြစ်ပြီး အတွင်းတွင် မီးအားပေးစက်ကို တပ်ဆင်ထားသော်လည်း အထူဝါယာကြိုးနှစ်ချောင်းကို ပလပ်စတစ်တံဆိပ်ဖြင့် အလုံပိတ်ထားဆဲဖြစ်သည်။

ထန်ရှုက ထွက်သွားရန် ပြောခဲ့သော်လည်း ချူယွမ်သည် မထွက်ခွာခဲ့ပေ။ တခဏ တုံ့ဆိုင်းသွားသော်လည်း သူ့နောက်သို့ လိုက်ပါလာဆဲဖြစ်သည်။

"မင်း ထွက်မသွားဘူးလား။" ထန်ရှုက သူ့ကုတ်အင်္ကျီကို ချွတ်လိုက်ပြီး လှည့်ကြည့်လိုက်သည်။

ချူယွမ်က သူ့လက်များကို ဖြန့်ကာ ခါးခါးသီးသီး ပြုံးလိုက်ရင်း

“မင်းကို ငါ ပေးခဲ့တဲ့ လက်ဆောင်ကို မင်း မကြည့်ရသေးဘူးလေ မစ္စတာထန်။ သေချာပေါက် သဘောကျမယ်လို့ ငါ အာမခံပါတယ်။”

ထန်ရှု၏မျက်နှာပေါ်တွင် အံ့သြနေသော အမူအရာတစ်ခု ပေါ်လာပြီး တခဏ တိတ်ဆိတ်သွားကာ ပြန်ပြောလိုက်သည်။

"ဒါက ကောင်းတဲ့အရာတစ်ခုမို့လို့ ငါ ကြည့်ဖို့ စောင့်မျှော်နေမှာပါ။ ဒါနဲ့ ဒီပစ္စည်းကို အရင်က မြင်ဖူးလား။ ကမ္ဘာပေါ် မှာ လျှပ်စစ်ဓာတ်အား ၁.၂ ဂဂ္ဂါဝပ်အထိ ထုတ်လုပ်ပေးနိုင်တဲ့ အစွမ်းထက်ဆုံး မီးအားပေးစက်လေ။ ပင်မစက်ကိရိယာ ဘွိုင်လာတွေ၊ ရေနွေးငွေ့တာဘိုင်တွေနဲ့ မီးစက်က ကမ္ဘာပေါ် မှာ အရည်အသွေးအကောင်းဆုံးပဲ။ ငါ ဘာလုပ်ချင်လဲ မင်း သိလား။"

"ဟင့်အင်း … ငါ မသိဘူး။" ချူယွမ်က စိတ်ရှုပ်သွားသော အမူအရာဖြင့် ပြောသည်။

“ငါက သန့်ရှင်းမှုကို လုပ်ရတာ နှစ်သက်တဲ့ ယောကျာ်းတစ်ယောက်လို မဟုတ်ပေမယ့် သန့်ရှင်းမှုကိုတော့ နှစ်သက်ပါတယ်။ ရေနဲ့ရေချိုးရတာ ပျင်းစရာကောင်းပြီး ငါ ချိုးချင်သလိုမျိုး မသန့်ရှင်းပေးနိုင်မှာကို ကြောက်တယ်။ လျှပ်စစ်နဲ့ ရေချိုးရင် ကောင်းမယ်လို့ မင်း ထင်လား။”

ထန်ရှုက ပြုံးကာ ပြောလိုက်သည်။

လျှပ်စစ်နဲ့ ရေချိုးတာလား…

ချူယွမ်က မပြုံးနိုင်တော့ဘဲ

“မင်း ငါ့ကို နောက်နေတာမလား မစ္စတာထန်။ လျှပ်စစ်စီးကြောင်းနဲ့ ရေချိုးနိုင်သူက အင်မော်တယ် တစ်ယောက် ဖြစ်နေပြီ။”

ထန်ရှုက ခေါင်းယမ်းလိုက်ပြီး သူ့အဝတ်အစားတွေကို အမြန်ချွတ်လိုက်ရာ အတွင်းခံဘောင်းဘီတစ်ထည်သာ ကျန်တော့သည့်အချိန်တွင် အခန်းထဲတွင် ရှိနေသော မိုအားဝူကို ခေါင်းညိတ်ပြလိုက်သည်။ မီးအားပေးစက် စတင်မောင်းချိန်တွင် ကြမ်းပြင်ပေါ်ရှိ ဝါယာကြိုး နှစ်ချောင်းသည် အနည်းငယ်လှုပ်ခါသွားသည်။ ထန်ရှုက ဝိုင်ယာကြိုးများ၏အဆုံးကို ဆွဲကိုင်ကာ ပလတ်စတစ်အလုံပိတ်ကို ဆွဲဖြုတ်လိုက်သဖြင့် ၎င်းမှ ပြင်းထန်သောလျှပ်စီးကြောင်းများ ထွက်လာသည်ကို ချက်ချင်း ခံစားလိုက်ရသည်။

"အဲ့ဒါက ဗို့အား ၁၀,၀၀၀ပါ သူဌေး။ အစကနေ စက်ရဲ့ အပြင်းထန်ဆုံးအခြေအနေထိ စတင်နိုင်တယ်။” ပြသထားသောနံပါတ်ကိုကြည့်ရှုပြီးနောက် မိုအားဝူက နက်ရှိုင်းသောအသံဖြင့်ပြောကြားခဲ့သည်။

ထန်ရှုက ခေါင်းညိတ်လိုက်ပြီး ထူထဲသော ဝါယာကြိုးနှစ်ချောင်းကို သူ့ရင်ဘတ်ပေါ်သို့ တိုက်ရိုက်ချိတ်လိုက်သည်။ ပြင်းထန်သော လျှပ်စီးကြောင်းသည် ဤအခိုက်အတန့်တွင် သူ့ခန္ဓာကိုယ်ကို လျှပ်တပြက်အတွင်း စီးဝင်သွားသည်။ သို့သော် ထိုအရာက ထန်ရှုအား မျက်ခုံးအနည်းငယ်သာ တွန့်သွားစေရုံမျှသာ ဖြစ်ပြီး အပြင်းထန်ဆုံးသော လက်ရှိအခြေအနေဖြစ်သည့် ဗို့အား ၁၀,၀၀၀သည် သူ့အား အနည်းငယ်သာ ထုံကျင်သွားစေနိုင်ပြီး ပုရွက်ဆိတ်ကိုက်ခံရသကဲ့သို့ သူ၏လက်ချောင်းများနှင့် ခြေချောင်းများတွင် အနည်းငယ်သာ နာကျင်ခံစားရသည်။

ရှူး…

ချူယွမ်၏မျက်လုံးများသည် ပြူးကျယ်စွာ စိုက်ကြည့်နေရင်း ပြုတ်ကျလုမတတ် ဖြစ်နေသည်။ သူသည် လျှပ်စီးအား၊ လျှပ်စီးကြောင်းနှင့် ပတ်သက်သော ဗဟုသုတများစွာ ရှိသူဖြစ်သည်။ လူ့ခန္ဓာကိုယ်တွင် ကပ်နေသော ဤကဲ့သို့ အပြင်းထန်ဆုံးသော လက်ရှိအခြေအနေသည် ထိုလူကို ချက်ချင်း ဓာတ်လိုက်မည်မှာ သေချာသည်။ သို့သော် ထန်ရှုတွင် လျှပ်စစ်ဓာတ်အား တွယ်ကပ်လိုက်သောအခါ …ဘာမှ မဖြစ်သွားဘူးလား…။

"နှစ်ဆ…" ထန်ရှုက မတုန်မလှုပ် အမူအရာဖြင့် ပြောလိုက်သည်။

ချူယွမ်၏စိတ်နှလုံးတုန်လှုပ်သွားပြီး ကြောက်ရွံ့ထိတ်လန့်သော အမူအရာတစ်ခု သူ့မျက်နှာပေါ်တွင် ချက်ချင်းပေါ်လာသည်။ ထန်ရှု၏အမိန့်ကို ကြားပြီးနောက် သူ၏ခြေထောက်များ ပျော့ခွေလာရပေသည်။

"ဗို့အား ၂၀,၀၀၀ သူဌေး။ သူ့ရဲ့ အပြင်းထန်ဆုံး လက်ရှိအနေအထားကို စတင်နေပါပြီ။”  ဓာတ်အားပေးစက်ကို လည်ပတ်ပြီးနောက် အတန်ငယ် တည်ငြိမ်နေပုံရသော မိုအားဝူက ပြောလိုက်သည်။

ထန်ရှုသည် သူ့ခန္ဓာကိုယ်မှ ကြိုးနှစ်ချောင်းကို မဖယ်ရှားခဲ့ပေ။ ပြင်းထန်သောလျှပ်စီးကြောင်းသည် သူ့ကိုယ်တွင်းသို့ တိုးဝင်လာသည်နှင့်အမျှ ပိုမိုပြင်းထန်လာသည်ကို သူ ခံစားရမိသည်။ လျှပ်စီးအားကြောင့် သူ့ခန္ဓာကိုယ်ထဲရှိ ပုန်းကွယ်နေသော မသန့်စင်မှုတချို့ မီးလောင်သွားသည်ကိုပင် သူ ရှင်းရှင်းလင်းလင်း သိလိုက်ရပေသည်။

ထို့နောက်တွင်တော့ သူ့၏နှလုံးခုန်နှုန်းက မြန်လာပြီး သွေးလည်ပတ်မှုနှုန်းကလည်း အရင်ကထက် နည်းနည်း မြန်လာခဲ့သည်။ ထုံကျင်သော ခံစားမှုသည်လည်း ပိုမိုပြင်းထန်လာပြီး သူ့ခန္ဓာကိုယ်အတွင်းရှိ ဆဲလ်များ ကွဲထွက်ကာ ပြင်းထန်လာသည်ကို ခံစားရနိုင်သည်။ ဒါတောင် … အဲ့ဒါက နည်းနည်းလေးသာ ရှိသေးသည်။

"နောက်ထပ် နှစ်ဆ …" ထန်ရှုက လေးနက်သော လေသံဖြင့် ပြောသည်။

ချူယွမ်က တုန်လှုပ်နေသော ခန္ဓာကိုယ်ကို မထိန်းနိုင်ဘဲ အော်လိုက်သည်။

"မလုပ်နဲ့…။"

မိုအားဝူက သူ့ကို လုံးဝ လျစ်လျူရှုပြီး ဗို့အား ၄၀,၀၀၀ အထိ တိုးမြှင့်လိုက်သည်။ သူတို့သူဌေးက သူ၏ခန္ဓာကိုယ်ပေါ်တွင် လက်ရှိပြုလုပ်နေသော စမ်းသပ်မှုနှင့်အတူ မျှော်လင့်ချက်တချို့ သူ ခံစားနေရသည်။ ထန်ရှုက လျှပ်စစ်စီးကြောင်းကို အသုံးချပြီး ခန္ဓာကိုယ်ကို လေ့ကျင့်မည့် အကြံအစည်အား တစ်ချိန်က သူ့ကို ပြောပြထားဖူးပေရာ ထိုအရာက ဖြစ်နိုင်ချေ ရှိလာသည့်အခါ သူတို့အား ကျင့်ကြံသူများအဖြစ် အကျိုးကျေးဇူးများစွာ ဆောင်ကြဉ်းပေးလာပေလိမ့်မည်။

***