ကောင်းကင်လမ်းစဉ်၏အုပ်စိုးသူ

“ယူချင်း... ငါ့ကို ဒီနေရာကို ချိပ်ပိတ်ဖို့ ကူညီပေး”

ရီဖူရှင်း ပြောလိုက်၏။ သူ၏တောင်းဆိုမှုသည် အကြောင်းနှစ်ခုရှိသည်။ ပထမတစ်ခုမှာ သူသည် အခြားသူများကို မနှောင့်ယှက်လို၍ ဖြစ်သည်။ ဒုတိယတစ်ခုမှာ သူသည် အခြားသူများ နှောင့်ယှက်မည်ကို မလိုချင်၍ ဖြစ်သည်။ ထိုမှသာ သူသည် အေးအေးဆေးဆေး လေ့လာနိုင်မည်ဖြစ်သည်။

“ကောင်းပြီ”

ယူချင်း ခေါင်းညိတ်လိုက်သည်။ ထို့နောက် သူ့ခန္ဓာကိုယ်ပေါ်တွင် ဒီမွန်းအရှိန်အဝါ တလိပ်လိပ် ထွက်ပေါ်လာ၏။ ဒီမွန်းဝိညာဉ်စွမ်းအားသည် ရုတ်တရက် ဒီမွန်းနံရံတစ်ခုအဖြစ် ပြောင်းလဲသွားပြီး ထိုနေရာကို ချိပ်ပိတ်လိုက်လေသည်။

ရီဖူရှင်းသည် ဒီမွန်းနတ်ဘုရား၏ခန္ဓာကိုယ်အရှေ့တွင် တင်ပျဉ်ခွေထိုင်လိုက်သည်။ ၎င်းသည် နတ်ဘုရားအုပ်စိုးလက်နက်၏ ထွင်းဖောက်ခြင်းကို ခံထားရဆဲဖြစ်သည်။ သူသည် မျက်လုံးများကို ပိတ်လိုက်ပြီး သူ၏အာရုံကို ထုတ်လွှတ်လိုက်သည်။ မဟာလမ်းစဉ်အရှိန်အဝါများ အပြင်သို့ ထွက်သွားပြီး နတ်ဘုရားအုပ်စိုးလက်နက်ကို ဝန်းရံသွားပြီး ထိုလက်နက်အတွင်းရှိ စွမ်းအားကို တိတ်တဆိတ် လေ့လာနေလေသည်။

ထိုအခိုက်တွင် ရီဖူရှင်းသည် လောကအစစ်အမှန်နှင့် သီးခြားဖြစ်နေသည်ဟု ထင်ရသည်။ သူ၏အာရုံလောကထဲတွင် နတ်ဘုရားအုပ်စိုးလက်နက်သာ ရှိနေသည်။

ထိုအာရုံလောကထဲတွင် နတ်ဘုရားအုပ်စိုးလက်နက်သည် ကောင်းကင်ထက်မှ ပြုတ်ကျလာပြီး မြေကြီးအတွင်းသို့ နက်နက်ရှိုင်းရှိုင်းဖောက်ဝင်သွားကာ ကောင်းကင်နှင့် မြေကြီးကြားတွင် လူးလားသွားလာနေသည်။ ထိုသို့ဖြင့် ၎င်းသည် နတ်ဘုရားများနှင့် ဒီမွန်းများကို ဖိနှိပ်ထားပြီး ဒီမွန်းအရှင်ကို ဤနေရာတွင် ချိပ်ပိတ်ထားလေသည်။

ရီဖူရှင်း၏အသိစိတ်သည် ဝေဝါးဝါးပုံရိပ်တစ်ခုအဖြစ် ပြောင်းလဲသွားသည်ဟု ထင်ရပြီး နတ်ဘုရားအုပ်စိုးလက်နက်အောက်တွင် ရပ်ကာ ၎င်းကို မော့ကြည့်နေသည်။ မဟာလမ်းစဉ်၏ မဟာစည်းမျဉ်းထွက်ပေါ်လာ၏။ ၎င်းသည် မဟာလမ်းစဉ်၏ အုပ်စိုးသူဟုပင် ထင်ရသည်။

ထိုနတ်ဘုရားအုပ်စိုးလက်နက်သည် မဟာလမ်းစဉ်၏ ဝိညာဉ်စွမ်းအားတစ်ခု ဖြစ်ပုံမပေါ်ဘဲ ကောင်းကင်လမ်းစဉ်၏ စည်းမျဉ်းများကို ကိုယ်စားပြုသည်ဟု ထင်ရလေသည်ဟု ရီဖူရှင်း တွေးလိုက်သည်။ ကောင်းကင်လမ်းစဉ်၏ စည်းမျဉ်းများကို အသုံးပြု၍ ဒီမွန်းအရှင်ကို ဖိနှိပ်ထားရခြင်းကို ကြည့်လျှင် ဒီမွန်းအရှင်၏စွမ်းအားသည် မည်မျှကြောက်မက်ဖွယ်ကောင်းကြောင်း  သိနိုင်ပေသည်။ ထိုအရာသည် သူခန့်မှန်းထားသကဲ့သို့ပင်။

အတိတ်က ထိုတိုက်ခိုက်မှုသည် ကောင်းကင်လမ်းစဉ်က ထုတ်လွှတ်လိုက်သော တိုက်ခိုက်မှု ဖြစ်နိုင်သည်။

ရီဖူရှင်း၏ ခန္ဓာကိုယ်အတွင်းမှနေ၍ သစ်ကိုင်းများ၊ သစ်ရွက်များ ထွက်ပေါ်လာပြီး လောကရှေးဟောင်းသစ်ပင်သည် နတ်ဘုရားအုပ်စိုးလက်နက်ဆီသို့ ထွက်သွားသည်။ ရုတ်တရက် ရီဖူရှင်းသည် နတ်သစ်ပင်တစ်ပင်အဖြစ် ပြောင်းလဲသွားသည်ဟု ထင်ရပြီး ၎င်း၏ အဆုံးမဲ့ သစ်ကိုင်းများ၊ သစ်ရွက်များသည် နတ်ဘုရားအုပ်စိုးလက်နက်ဆီသို့ သွားနေကြကာ နတ်ဘုရားအုပ်စိုးလက်နက်အတွင်းရှိ စည်းမျဉ်းအရှိန်အဝါများကို တစ်တိတိ ဝါးမျိုနေလေသည်။ နတ်ဘုရားအုပ်စိုးလက်နက်အတွင်းသို့ တိုက်ရိုက် ပေါင်းစည်းနေသည့် သစ်ကိုင်းများနှင့် သစ်ရွက်များလည်း ရှိပေသည်။

ထိုရှေးဟောင်းသစ်ပင်သည် မည်သည်နည်း။ ရီဖူရှင်း တွေးလိုက်သည်။ သူ ပထမဆုံး ရောက်လာစဉ်က သူ၏ စိတ်ဝိညာဉ်သည် အနည်းငယ် တုံ့ပြန်ခဲ့ပြီး သူသည် လောကရှေးဟောင်းသစ်ပင်နှင့် ထိုနတ်ဘုရားအုပ်စိုးလက်နက်သည် ဆက်နွယ်နေရမည်ဟု ခံစားမိခဲ့သည်။

သူ စိတ်ဝိညာဉ်ကို ထုတ်လွှတ်လိုက်သောအခါ ၎င်းသည် နတ်ဘုရားအုပ်စိုးလက်နက်မှ စွမ်းအားနှင့် တူညီသောစွမ်းအားတစ်ခု ရှိနေပုံပေါ်၏။ ထိုနှစ်ခုသည် တစ်ခုနှင့်တစ်ခု အမှန်ပင် စတင်ရောယှက်နေကြသည်။

ထိုလောကရှေးဟောင်းသစ်ပင်သည်လည်း မဟာလမ်းစဉ်၏ စည်းမျဉ်းများမှ မွေးဖွားလာသော သစ်ပင်တစ်ပင် ပေလော။ ထို့ကြောင့် ၎င်းသည် နတ်ဘုရားအုပ်စိုးလက်နက်နှင့် အဆင့်တူသည် စွမ်းအား ရှိနေခြင်းလော။

သို့ဆိုလျှင် မည်သူက သူ့ကို ထိုစိတ်ဝိညာဉ်ကို ပေးခဲ့ခြင်းနည်း။

ရီဖူရှင်းသည် ထိုမေးခွန်းကို သူ့ကိုယ်သူ တစ်ကြိမ်မက မေးခဲ့ဖူးလေသည်။ သို့သော် သူသည် အဖြေကို ရှာမတွေ့သေးပေ။ ယခုတွင် သူသည် ဤလောက၏ အမှန်တရားကို တဖြည်းဖြည်း သိလာရပြီဖြစ်သော်လည်း သူ၏မွေးဖွားမှုနှင့် ပတ်သက်သော ဆန်းကြယ်မှုသည် သူနှင့် အလှမ်းဝေးနေဆဲဖြစ်သည်။

လောကရှေးဟောင်းသစ်ပင်သည် အလျင်အမြန် အဆုံးမရှိ ကြီးထွားနေပြီး နတ်ဘုရားအုပ်စိုးလက်နက်တစ်လျှောက်လျှောတက်သွားပြီး မိုးကောင်းကင်အထက်သို့ တက်သွားကာ ၎င်းနှင့် ပေါင်းစည်းလိုက်သည်။ ဘေးတွင် ရပ်နေသော ယူချင်းသည်ပင် သူမြင်လိုက်ရသောအရာကြောင့် အတော်လေး စိတ်လှုပ်ရှားသွားသည်။

ယခုတွင် သူတို့သည် ယခင်နှစ်များကကဲ့သို့ ဆယ်ကျော်သက်များ မဟုတ်ကြတော့ပေ။ သူသည် ထိုနတ်ဘုရားအုပ်စိုးလက်နက်က မည်ကဲ့သို့သော နတ်ပစ္စည်းဖြစ်သည်ကို သိပေသည်။ ထိုနတ်ဘုရားအုပ်စိုးလက်နက်သည် ဒီမွန်းအရှင်တစ်ပါးကိုပင် အကျဉ်းချထားနိုင်စွမ်းရှိသည်။ သို့သော် ရီဖူရှင်း၏ စိတ်ဝိညာဉ်နှင့် ပတ်သတ်သော အဖြေသည် အဘယ်နည်း။

သူငယ်ရွယ်စဉ်က သူ၏အဖေသည် ရီဖူရှင်းကို ကူညီပေးရန် သူ့ကို ပြောခဲ့သည်။ သူ၏အဖေသည် ရီဖူရှင်းက မည်မျှထူးခြားသည်ကိုသိသော တစ်ဦးတည်းသောသူ ဖြစ်ပေမည်။

တောက်ပသော နတ်အလင်းသည် ကောင်းကင်ထက်အထိ တက်သွားပြီး ယူချင်းသည်လည်း ကြောက်မက်ဖွယ် ဒီမွန်းဝိညာဉ်စွမ်းအားတစ်ခုကို ထုတ်လွှတ်ကာ ကောင်းကင်အထက်မှ အောက်ဘက်အထိ ကာရံလိုက်သည်။ ထိုသို့လုပ်ခြင်းမှာ ယင်းမြင်ကွင်းကို ပြင်ပလောကမှ မမြင်နိုင်အောင် ကာလိုက်ခြင်းဖြစ်သည်။

ရီဖူရှင်း နတ်ပစ္စည်းတစ်ခုကို ဝါးမျိုရန် ကြိုးစားခြင်းသည် ယခုမှ ပထမဆုံးအကြိမ်မဟုတ်ပေ။ လွန်ခဲ့သော နှစ်ပေါင်းများစွာက သူသည် ယင်ဓာတ်စွမ်းအားကို ဝါးမျိုခဲ့သည်။ သို့သော် လက်ရှိ သူ၏အဆင့်သည် ထိုစဉ်က အဆင့်နှင့် မတူတော့ပေ။ သို့ပင်လျှင် သူ့အနေဖြင့် နတ်ဘုရားအုပ်စိုးလက်နက်ကို ဝါးမျိုနိုင်ရန် မလွယ်ချေ။

လောကရှေးဟောင်းသစ်ပင်၏ ဝိညာဉ်စွမ်းအားသည် ထိုလက်နက်အတွင်းသို့ ဖြည်းဖြည်းချင်း ဝင်ရောက်နေပြီး ၎င်းနှင့် တစ်သားတည်းဖြစ်စေရန် ကြိုးစားနေလေသည်။ နတ်ဘုရားအုပ်စိုးလက်နက်၏အထက်တွင် အတော်လေး မထင်ရှားသော အံ့အားသင့်ဖွယ် မဟာလမ်းစဉ်စည်းမျဉ်းတစ်ခု၏ ဝိညာဉ်စွမ်းအားရှိနေ၏။ သူသည် ၎င်းကို ချက်ချင်း နားမလည်နိုင်ပေ။ ထို့ကြောင့် သူသည် နတ်ဘုရားအုပ်စိုးလက်နက်ကို သူ၏ သက်စောင့်ဟော်နန်းလောကအတွင်းသို့ ဆွဲသွင်းရန်သာ တတ်နိုင်လေသည်။

အချိန်သည် ဖြည်းဖြည်းချင်း ကုန်ဆုံးသွား၏။ ကျယ်ပြောသော အာကာပြင်ထဲတွင် လောကရှေးဟောင်းသစ်ပင်၏ ဝိညာဉ်စွမ်းအားသည် ကောင်းကင်အထိရောက်ရှိနေပြီး နတ်ဘုရားအုပ်စိုးလက်နက်နှင့် ပေါင်းစည်းနေသည်။ ကြောက်မက်ဖွယ် ထစ်ချုန်းသံများထွက်ပေါ်လာပြီး မြေပြင်သည် တုန်ခါလာကာ မိုးကောင်းကင်၏ မဟာလမ်းစဉ်သည်လည်း တုန်ခါလာလေသည်။ အပြင်ဘက်မှ ကျင့်ကြံသူအားလုံးသည် သူတို့အထက်ရှိ ကောင်းကင်တွင် ရစ်ဝဲနေသော ဒီမွန်းတိမ်တိုက်များကို မော့ကြည့်လိုက်ကြသည်။ ထိုတိမ်တိုက်များသည် ယူချင်းလုပ်နေခြင်းဖြစ်ပြီး ဒီမွန်းကျင့်ကြံသူများသည် ထိုလုပ်ရပ်ကို မကျေနပ်ကြပေ။

သို့သော် ထိုအခိုက်တွင် သူတို့သည် ထိုဒီမွန်းတိမ်တိုက်များ၏နောက်တွင် ကြောက်မက်ဖွယ် ပြောင်းလဲမှုတစ်ခု ဖြစ်ပေါ်နေကြောင်း အာရုံခံမိလိုက်ကြသည်။

ရီဖူရှင်း၏မျက်လုံးများသည် တင်းတင်းကျပ်ကျပ် မှိတ်နေဆဲဖြစ်ပြီး သူ၏စွမ်းအားကြီးဝိညာဉ်စွမ်းအားသည် နတ်ဘုရားအုပ်စိုးလက်နက်ကို ဝါးမျိုနေလေသည်။ ကောင်းကင်နှင့် မြေကြီးကို ဖြတ်သန်းနေသော နတ်ဘုရားအုပ်စိုးလက်နက်သည် အပြင်းအထန် စတင်တုန်ခါလာပြီးနောက် ပျောက်ကွယ်သွားသည်။

ထို့နောက်တွင် ရီဖူရှင်း၏ သက်စောင့်ဟော်နန်း၏ လောကထဲတွင် ‌လောကရှေးဟောင်းသစ်ပင်သည် ကောင်းကင်ကို ကာရံသွား၏။ သို့သော် စွမ်းအားကြီး နတ်ဘုရားအုပ်စိုးလက်နက်တစ်ခုသည် ရှေးဟောင်းသစ်ပင်အထက်တွင် ရှိနေပြီး အတုမဲ့စွမ်းအားတစ်ခုကို အပြင်ဘက်သို့ ထုတ်လွှတ်နေလေသည်။

နတ်ဘုရားအုပ်စိုးလက်နက် ပျောက်ကွယ်သွားသည့်အခိုက်တွင် ဖော်ပြ၍မရနိုင်လောက်အောင် ကြောက်မက်ဖွယ်ကောင်းသော ဒီမွန်းဝိညာဉ်စွမ်းအားတစ်ခု ထွက်ပေါ်လာလေသည်။ ၎င်းကို ဆက်ဖိနှိပ်ထားမည့် စွမ်းအား မရှိတော့သည့်ပုံပင်။ ဒီမွန်းတိမ်တိုက်များသည် အချိန်တစ်ခုအထိ ကောင်းကင်တွင် ရစ်သိုင်းနေဆဲဖြစ်ပြီး စွမ်းအားကြီး ဒီမွန်းဝိညာဉ်စွမ်းအားတစ်ခုသည် အကန့်အသတ်မဲ့ အာကာပြင်ထဲတွင် ပြည့်နှက်သွားပြီး ယူချင်း ထုတ်လွှတ်ထားသော ဒီမွန်းအရှိန်အဝါကို တိုက်ရိုက် တွန်းဖယ်လိုက်သည်။

နတ်ဆိုးအင်ပါယာနန်းတော်မှ ကျင့်ကြံသူများသည် အပြေးအလွှားရောက်ရှိလာကြပြီး နတ်ဘုရားအုပ်စိုးလက်နက် ပျောက်ကွယ်သွားပြီဖြစ်ကြောင်း မြင်လိုက်ကြသောအခါ အပြင်းအထန် ရင်ခုန်လာကြလေသည်။

ရီဖူရှင်းသည် အမှန်ပင် အောင်မြင်သွားပေပြီ။ ယူချင်းသည် သူ့ကို ဤနေရာသို့ ဖိတ်ခေါ်ခဲ့ပြီး သူသည် နတ်ဘုရားအုပ်စိုးလက်နက်ကို ဖယ်ရှားနိုင်ခဲ့သည်။

သို့သော် ထိုအခိုက်တွင် သူတို့သည် ထိုဒီမွန်းဝိညာဉ်စွမ်းအားကိုသာ ပို၍အာရုံစိုက်နေကြလေသည်။ ထိုအခိုက်တွင် ဒီမွန်းနတ်ဘုရား၏ ငြိမ်သက်နေသောခန္ဓာကိုယ်အထက်တွင် အတုမဲ့ ဒီမွန်းလမ်းစဉ်ဝိညာဉ်စွမ်းအားတစ်ခု ရှိနေ၏။ ဒီမွန်းနတ်ဘုရားသည် ပြန်လည်အသက်ဝင်လာသည်ဟုပင် ထင်ရသည်။ နတ်ဆိုးအင်ပါယာနန်းတော်မှ ကျင့်ကြံသူများသည် အချိန်တစ်ခုအထိ ရင်တုန်နေကြသည်။

နတ်ဘုရားအုပ်စိုးလက်နက်သည် စွမ်းအားကြီးသော်လည်း ဒီမွန်းအရှင်၏ဝိညာဉ်စွမ်းအားကို ဖျက်ဆီးမပစ်နိုင်ဘဲ ဖိနှိပ်ရုံသာ ဖိနှိပ်ထားနိုင်ခဲ့လေသည်။ ယခုတွင် ၎င်းသည် ပျောက်ကွယ်သွားပြီဖြစ်၍ ဒီမွန်းအရှင်၏ ဝိညာဉ်စွမ်းအားသည် လွတ်မြောက်သွားပြီဖြစ်ကာ နတ်ဆိုးအင်ပါယာနန်းတော်မှ ကျင့်ကြံသူအားလုံးသည် စကားမပြောနိုင်လောက်အောင်ပင် အံ့အားသင့်နေကြသည်။ ထိုဒီမွန်းအရှင်သည် ရှေးခေတ်မှ ဒီမွန်းနတ်ဘုရားဖြစ်ပြီး နတ်ဆိုးလောက၏ ဘိုးဘေးဖြစ်သည်။ ရှေးခေတ်တွင် သူသည် ကောင်းကင်လမ်းစဉ်နှင့် တိုက်ပွဲတွင် နတ်ဆိုးလောကကို ဦးဆောင်ခဲ့ပြီး ကာရူရာအိမ်တော်ကို ဖျက်ဆီးပစ်ခဲ့သည်။

အကယ်၍ နတ်ဘုရားအုပ်စိုးလက်နက်ကြောင့်သာ မဟုတ်လျှင် ကာရူရာဘုရင်သည် ဒီမွန်းအရှင်ကို အနိုင်ယူနိုင်မည်မဟုတ်ဘဲ အစိတ်စိတ်အမွှာမွှာဖြစ်ကာ သေဆုံးသွားခဲ့မည်ဖြစ်သည်။

မယုံနိုင်လောက်အောင် အားကောင်းသော ဒီမွန်းဝိညာဉ်စွမ်းအားတစ်ခုသည် ထိုနေရာကို လွှမ်းခြုံထားသည်။ သူတို့အားလုံးသည် အခြားလောကသို့ ရောက်နေသည်ဟုပင် ထင်ရ၏။ နတ်ဆိုးသူတော်စင် ယန်ကွေ့ရီသည် ရီဖူရှင်းကို ကြည့်ကာ ပြောလိုက်၏။

“မင်း အခု သွားလို့ရပါပြီ”

ရီဖူရှင်းသည် နတ်ဘုရားအုပ်စိုးလက်နက်ကို ယူသွားနိုင်ပြီဖြစ်သည်။ ထို့ကြောင့် သူသည် ရီဖူရှင်းကို အတော်လေး ရှိန်နေလေသည်။ မကြာသေးခင်က သူသည် သူတို့အနေဖြင့် ရီဖူရှင်းကို ကြိုးစားကြည့်ခွင့်ပြုပြီး ရီဖူရှင်း လုပ်နိုင်ခဲ့သည်နှင့် သူ့ကိုထွက်သွားခိုင်းလျှင် အကောင်းဆုံးဖြစ်မည်ဟု တွေးခဲ့သည်။ အကယ်၍ သူသာ ဤနေရာတွင် ဆက်နေ,နေပါက သူသည် ဒီမွန်းအရှင်၏ ဝိညာဉ်စွမ်းအားကိုလည်း အမွေဆက်ခံသွားနိုင်ပေလိမ့်မည်။ သို့ဆိုလျှင် နတ်ဆိုးအင်ပါယာနန်း‌တော်သည် အလွန်အရှက်ရသွားမည်ဖြစ်သည်။

ထို့ကြောင့် သူ၏ဦးစားပေးသည် ရီဖူရှင်းကို ထွက်သွားဖို့ တောင်းဆိုရန်ဖြစ်သည်။

ထို့အပြင် ရီဖူရှင်းသည် အမြဲ သူအလိုရှိသည်ကို ရရှိခဲ့သည်။ ယခုတွင်လည်း နတ်ဘုရားအုပ်စိုးလက်နက်သည် သူ့အပိုင်ဖြစ်သွားပေပြီ။ ထိုအရာသည် ရီဖူရှင်းအတွက် အကျိုးအမြတ်အကြီးစားဖြစ်ကြောင်း သံသယဖြစ်ဖွယ် မရှိပေ။ ၎င်းသည် ဒီမွန်းအရှင်ကိုပင် ဖိနှိပ်နိုင်ခဲ့သော နတ်ဘုရားအုပ်စိုးလက်နက်ဖြစ်သည်။ သူတို့သည် နတ်ဘုရားအုပ်စိုးလက်နက်ကို မရရှိခဲ့သော်လည်း ၎င်းအတွင်း၌ ကြီးမားသော စွမ်းအားရှိနေကြောင်း တွေးကြည့်နိုင်ပေသည်။

ရီဖူရှင်းသည် ယန်ကွေ့ရီကို ကြည့်လိုက်ပြီး ယန်ကွေ့ရီ၏ စိုးရိမ်မှုကို နားလည်သွားသည်။ ယန်ကွေ့ရီ မည်သို့မှ မပြောလျှင်လည်း သူသည် ဒီမွန်းအရှင်၏ ဝိညာဉ်စွမ်းအားကို မည်သည့်အခါမှ တပ်မက်မည်မဟုတ်ပေ။

ဒီမွန်းအရှင်၏ဝိညာဉ်စွမ်းအားသည် ယူချင်းနှင့် သက်ဆိုင်သည်ဖြစ်ရာ သူသာ ရယူသင့်ပေသည်။

ရီဖူရှင်းသည် နောက်သို့လှည့်လိုက်ပြီး ထိုဒီမွန်းအရှိန်အဝါအောက်မှ ထွက်ကာ အဝေးရှိ ဟင်းလင်းပြင်သို့ သွားလိုက်လေသည်။ ထိုအချိန်တွင် ကာရူရာအိမ်တော်၏ ဘုံကျောင်းသည် ဒီမွန်းဝိညာဉ်စွမ်းအား၏ အပြည့်အဝလွှမ်းခြုံမှုကို ခံထားရပြီဖြစ်သည်။ ရီဖူရှင်း ကြည့်လိုက်ရာ ဒီမွန်းအရှိန်အဝါကြားတွင် ဒီမွန်းတစ်ကောင်၏ တော်ဝင်အရိပ်တစ်ခု ဖြစ်ပေါ်လာသည်ကို တွေ့လိုက်ရ၏။ မိုးကောင်းကင်ထက်တွင် ဒီမွန်းတိမ်တိုက်များ တလိမ့်လိမ့် ရစ်ဝဲနေသည်။

နတ်ဘုရားအုပ်စိုးလက်နက်၏ ဖိနှိပ်မှု မရှိတော့သောအခါ ထိုနေရာရှိ ဒီမွန်းအရှိန်အဝါသည် အပြည့်အဝ ပြန်အသက်ဝင်လာပေပြီ။ ပတ်ဝန်းကျင်တွင် ဒီမွန်းအလင်း တောက်ပနေပြီး ထိုမြင်ကွင်းသည် အလွန်အံ့အားသင့်တုန်လှုပ်ဖွယ် ကောင်းနေလေသည်။

‘အဲဒါတွေအားလုံးက မင်းအတွက်ပဲ...’

ရီဖူရှင်း တွေးလိုက်သည်။ ထို့နောက် သူသည် သူရှိနေသောနေရာမှ တိုက်ရိုက်ပျောက်ကွယ်သွားသည်။ စီဝေ့အင်ပါယာနန်းတော်၏ လုံခြုံရေးအတွက် သူကိုယ်တိုင် ကြီးကြပ်ရန် လိုအပ်နေဆဲဖြစ်သည်။ ထို့အပြင် ဤနေရာတွင်လည်း လောလောလတ်လတ်တွင် မည်သည့်ရလဒ်မှ ထွက်လာဦးမည်မဟုတ်ချေ။ ပို၍အရေးကြီးသည်မှာ နတ်ဆိုးအင်ပါယာနန်းတော်မှ ကျင့်ကြံသူတော်တော်များများသည် သူ့ကို ရန်လိုနေကြသည်။ သူသည် နတ်ဘုရားအုပ်စိုးလက်နက်ကို ယူနိုင်ခဲ့သဖြင့် နတ်ဆိုးအင်ပါယာနန်းတော်မှ လူများသည် မည်ကဲ့သို့ အမြင်ကြည်နိုင်မည်နည်း။

သို့‌သော် ထိုအရာသည် သူတို့ကတိပေးခဲ့သောအရာဖြစ်သည်။ ယခုတွင် သူတို့၌ သူ့ကိုအရေးစိုက်နေရန် အချိန်မရှိပေ။

ရီဖူရှင်းသည် မဟော်ရာဂီအမွေအနှစ်နယ်မြေသို့ ပြန်ရောက်သောအခါ စီဝေ့အင်ပါယာနန်းတော်နှင့် အနောက်အင်ပါယာနန်းတော်တို့မှ ကျင့်ကြံသူများသည် ကျင့်ကြံနေဆဲဖြစ်ကြောင်း တွေ့လိုက်ရ၏။ ရီဖူရှင်းပြန်ရောက်လာသောအခါ သူတို့သည် နတ်ဆိုးလောကမှ ကျင့်ကြံသူများသည် သူ့ထံမှ မည်သည့်အရာလိုချင်ခဲ့ကြောင်းကို အနည်းငယ် စိတ်ဝင်စားနေကြသည်။

သို့သော် ရီဖူရှင်းသည် မည်သူနှင့်မှ စကားမပြောလိုက်ဘဲ နေရာတစ်ခုကို ရှာကာ သီးခြားကျင့်ကြံလိုက်သည်။

သူ၏အပြုအမူသည် အားလုံး၏စိတ်ဝင်စားမှုကို ပို၍တိုးသွားစေ၏။ ရီဖူရှင်းသည် တစ်စုံတစ်ခု ရရှိခဲ့ခြင်းဖြစ်ပေမည်။ မဟုတ်လျှင် သူသည် ထိုမျှ အလောတကြီး သီးခြားကျင့်ကြံမည်မဟုတ်ပေ။

ထိုအချိန်တွင် ရီဖူရှင်းသည် သူ၏မျက်လုံးများကို မှိတ်ထား၏။ သူ၏အသိစိတ်သည် သူ၏သက်စောင့်ဟော်နန်းလောကအတွင်းသို့ ဝင်သွားသည်။ ထိုအခိုက်တွင် ထိုလောကသည် ပြင်ပလောကအစစ်အမှန်နှင့် နီးနီးစပ်စပ် တူညီနေသည်။ သူ၏အသိစိတ်သည် ဝေဝါးဝါးအရိပ်တစ်ခုအဖြစ် ပြောင်းလဲသွားပြီး လောကရှေးဟောင်းသစ်ပင်နှင့် နတ်ဘုရားအုပ်စိုးလက်နက်ကို ကြည့်နေလေသည်။ ထိုနှစ်ခုအကြားတွင် မည်ကဲ့သို့ ဆက်နွယ်မှုရှိသနည်းဟု သူတွေးလိုက်သည်။

ထိုနတ်ဘုရားအုပ်စိုးလက်နက်တွင် မည်သည့် မဟာလမ်းစဉ်၏ စွမ်းအားမှ ရှိနေပုံမပေါ်ပေ။ သို့သော် အဘယ်ကြောင့် ၎င်းသည် ဒီမွန်းအရှင်၏ ဝိညာဉ်စွမ်းအားကို ဖိနှိပ်ထားနိုင်ခဲ့သနည်း။ သူ ထိုနတ်ဘုရားအုပ်စိုးလက်နက်ကို ယူလိုက်သည့်အခိုက်တွင် ဒီမွန်းအရှင်၏ ဝိညာဉ်စွမ်းအားသည် ပေါက်ကွဲထွက်ပေါ်လာခဲ့သည်။ ထို့ကြောင့် ထိုဝိညာဉ်စွမ်းအားသည် ထိုအချိန်အထိ နတ်ဘုရားအုပ်စိုးလက်နက်၏ ဖိနှိပ်မှုကို ခံထားရကြောင်း ထင်ရှား၏။

နတ်ဘုရားအုပ်စိုးလက်နက်သည် ကောင်းကင်လမ်းစဉ်စွမ်းအား၏ ပြယုဂ်အစစ်အမှန်တစ်ခုပင်လော။ ရီဖူရှင်း သူ့ဘာသာ တွေးတောလိုက်သည်။ အုပ်စိုးသူသည် စည်းမျဉ်းများကို ကိုယ်စားပြုပေသည်။ ကောင်းကင်လမ်းစဉ်၏ အုပ်စိုးသူသည် ကောင်းကင်လမ်းစဉ်၏ စည်းမျဉ်းများကို ကိုယ်စားပြုရန် ကောင်းကင်လမ်းစဉ်၏ ဝိညာဉ်စွမ်းအားမှ ပြောင်းလဲလာခဲ့ခြင်းပေလော။

သူသည် နတ်ဘုရားအုပ်စိုးလက်နက်ကို ပြန်လည်သိမ်းဆည်းလိုက်၏။ ထိုလက်နက်သည် မဟာအင်ပါယာအဆင့်လက်နက်တစ်ခုမဟုတ်ကြောင်း သူသိရှိခဲ့လေသည်။ ၎င်းသည် ထုလုပ်ထားသော လက်နက်တစ်ခုမဟုတ်ပေ။ ၎င်းသည် ယင်ဓာတ်စွမ်းအားကဲ့သို့ ကောင်းကင်လမ်းစဉ်မှ မွေးဖွားလာခဲ့ခြင်း ဖြစ်နိုင်ပေသည်။

အမှန်တွင် ရီဖူရှင်းသည် ထိုကဲ့သို့သော နတ်လက်နက်မျိုးကို ယခင်က မြင်ခဲ့ဖူးသည်။ ဆေးအင်ပါယာသည် ဝမ်ရှန်းမျှော်စင်ကို ပိုင်ဆိုင်ပေသည်။ ၎င်းသည် သမိုင်းမတင်မီခေတ်ကတည်းက ရှိခဲ့သောအရာဖြစ်သော်လည်း ပြီးပြည့်စုံသောပစ္စည်းတစ်ခု မဟုတ်ပေ။ ၎င်းသည် ပြီးပြည့်စုံသောပစ္စည်း၏ တစ်စိတ်တစ်ပိုင်းသာ ဖြစ်နိုင်သည်။ ထို့ကြောင့် ၎င်းသည် ပြီးပြည့်စုံသောပုံစံရှိသည့် ဤနတ်ဘုရားအုပ်စိုးလက်နက်လောက် စွမ်းအားမကြီးပေ။

အုပ်စိုးသူသည် အုပ်စိုး၏။

ကောင်းကင်လမ်းစဉ်ကို အုပ်စိုးသူသည် ကောင်းကင်လမ်းစဉ်၏ စည်းမျှဉ်းများကို အုပ်စိုးနိုင်သည်ဟူသော အဓိပ္ပာယ်လော။

ရီဖူရှင်းသည် တိတ်တဆိတ် လေ့လာဆင်ခြင်နေပြီး ဈာန်ဝင်စားနေလေသည်။