တားမြစ်နယ်မြေ

အခန်း (၄၄၄) : တားမြစ်နယ်မြေ

ဝမ်ဝေ့က ပြန်ရောက်လာပြီးနောက် အိမ်ပြန်ဖို့ အလျင်မလိုပေ။ ထိုအစား သူက လေဟာနယ်သင်္ဘောဖြင့် ဖြည်းဖြည်းချင်း ပြန်လာခဲ့သည်။ သူက တိတ်ဆိတ်သည့် အခိုက်အတန့်ကို အခွင့်အရေးယူကာ သူ့ကိုယ်သူ တွေးတောနေမိသည်။

စစ်ဆေးမှုဟု ခေါ်ဆိုသည့်အရာက သူ ထင်ထားသည်ထက် ပိုမိုခက်ခဲနေလေသည်။ အကယ်၍ သူတောင်းစားအိုကြီး ပြောသည့်အတိုင်းသာ ဖြစ်ခဲ့လျှင် သူ တွေ့ဆုံဖူးသည့် သူအားလုံးက သူ့အား ဆန့်ကျင်လာနိုင်သည်။ ထိုအချက်ကို တွေးမိရုံဖြင့် လူများစွာကို သံသယလွန်ကဲမှု ဖြစ်လာစေလိမ့်မည်ဖြစ်သော်လည်း သူ မပါပေ။ သူ့ စိတ်အခြေအနေက တည်ငြိမ်နေဆဲဖြစ်ကာ ကိစ္စများကို အကျိုးအကြောင်း ဆင်ခြင်နိုင်သေး၏။

သူက သူ့မိတ်ဆွေ သို့မဟုတ် မိသားစုသည် သူ့အား ဆန့်ကျင်လိမ့်မည်ဟု မထင်ပေ။ သို့သော်လည်း သူက ထိုကိစ္စအပေါ် သတိထားရမည်။ ပြောရလျှင် ဤကမ္ဘာတွင် ဝိညာဉ်ထိန်းချုပ်ရေးပညာရပ်မျိုး ရှိနေသည် မဟုတ်ပါလော။

မည်သို့ဖြစ်လာမည်ကို မည်သူက သိထားမည်နည်း။

ထို့နောက် ဝမ်ဝေ့၏ စိတ်ထဲ အလျင်အမြန်တွက်ချက်ကာ စိတ်ဝိညာဉ်အမှုန်ပေါင်း ၁၀ဘီလီယံကို အသုံးပြုပြီး သတင်းအချက်အလက်များစွာကို စုစည်းပြီး အတွေးများစွာ ဖြစ်ပေါ်လာသည်။

ရုတ်ချည်းဆိုသလို သူက တစ်စုံတစ်ခုကို တွေးလိုက်မိ၏။

တိထျန်း ငါ့အပေါ်  ဒီကံအပြစ်ကြွေးကို ထားခဲ့တာက ဒီစစ်ဆေးမှုကြောင့်များလား။ ငါ တားမြစ်ခံဆိုတာကို သူက သိထားတာ ဖြစ်နေနိုင်တယ်။

အဲဒါဆို သူ့ရဲ့ အဆုံးသတ် ရည်ရွယ်ချက်ကဘာလဲ။ သူက ငါ့ကို ဒီကံအပြစ်ကြွေးမဖယ်ရှားနိုင်ဘူးလို့ ထင်နေတာတော့ မဖြစ်နိုင်ဘူး။ ငါ လွတ်နေတဲ့ အရာတစ်ခုခုတော့ ရှိရမယ်။

ကံအပြစ်ကြွေးက စစ်ဆေးမှုရဲ့ ခက်ခဲနှုန်းကို တိုးမြှင့်လာစေတာများလား။ ဒါမှမဟုတ် တခြားတစ်ခုများလား …

ဝမ်ဝေ့က အဖြေထွက်မလာပေ။ သို့သော် ထိုသတင်းအချက်အလက်သည် အရေးကြီးသည်ဟု ကောက်ချက်ချထားနိုင်သည်။ ထိုစစ်ဆေးမှုထဲတွင် မဟာဧကရာဇ်အဆင့်မျိုးက သူ့အား အကွက်ကျကျ လုပ်ကြံနေသည့်အတွက် ထိုအရာကို အောင်မြင်ဖို့ ဉာဏ်ပညာ သို့မဟုတ် အသိဉာဏ်ကို လိုအပ်ကြောင်း ကောက်ချက်ချလိုက်သည်။

သို့သော်လည်း သူ့အင်အားက လျော့ကျသွားလို့ မဖြစ်သေးပေ။

ဝမ်ဝေ့က အိမ်ကို ပြန်လာဖို့ ငါးနာရီ အချိန်ယူခဲ့သည်။ ထိုစဉ် သူက နောက်ထပ် လုပ်ရမည့်အစီအစဉ်ကို ပဏာမအစီအစဉ် ရေးဆွဲထားပြီးသားဖြစ်၏။ သူ အိမ်သို့ ပြန်ရောက်လာသည်နှင့် သူ့မိသားစုအား သူ သိခဲ့ရသမျှအရာအားလုံးကို ပြောပြလိုက်သည်။

“ စစ်ဆေးမှု အမျိုးအစားတဲ့လား” ဝူဟုန်က တွေးလိုက်သည် “ ဒီလိုဆိုရင် ကျွန်မက ကူညီကောင်း ကူညီပေးနိုင်တယ်။”

သူမက ကပ်ဘေးဧကရာဇ်ကို အမှတ်ရသွားသည်။ ကပ်ဘေး သို့မဟုတ် စမ်းသပ်ချက်များကို ဆွဲဆောင်သည့် ထူးထူးဆန်းဆန်း ရုပ်ခန္ဓာမျိုးဖြင့် မွေးဖွားလာသူဖြစ်ကာ ထိုအကြောင်းအရင်းကြောင့် သူ မည်သည့်နေရာသွားစေကာမူ ဆိုးဆိုးရွားရွား ဖြစ်ပျက်လေ့ ရှိသည်။

တစ်ကြိမ်တွင် သူက တောအုပ်မှ ထွက်လာစဉ် ဥက္ကာပျံတစ်ခု သူ့အပေါ် ကျရောက်လာလေ၏။ ထိုအရာကို ရင်ဆိုင်ဖို့အတွက် သူသည် မိုးမြေမှ စမ်းသပ်ချက်အားလုံးကို တားဆီးပေးနိုင်သည့် အသုံးအဆောင်ပစ္စည်းတစ်မျိုးကို ဖန်တီးခဲ့သည်။

တကယ်လို့ ငါ မှတ်မိတာသာ မှန်တယ်ဆိုရင် သူ ထွက်မသွားခင် အမွေအနှစ်ကို ချန်ထားခဲ့တယ်။ အဲဒီအသုံးအဆောင်ပစ္စည်းက အထဲမှာ ရှိနေနိုင်တယ်။

သူမ၏ ရှင်းပြချက်ကို နားထောင်ပြီးသည့်နောက်တွင် သူမက ထိုအရာကို ယူဖို့ ထွက်သွားသည့်အတွက် ဝမ်ဝေ့က စိတ်သက်သာရာရမိသွားသည်။ သူ့မိသားစုအတွက်မူ ဤသို့သော အခြေအနေမျိုးတွင် သူ့အား စိတ်ခံစားချက် အထောက်အပံ့နှင့် သူ လိုအပ်သည့် အရင်းအမြစ်များ ပေးရုံမှလွဲ၍ မတတ်နိုင်ကြပေ။

ဝမ်ဝေ့က သူတောင်းစားအိုကြီး ပေးထားသည့် သတင်းအချက်အလက်များကို ပေးလိုက်သည်။ ထို့နောက် သူက ထိုစစ်ဆေးမှုအတွက် ပြင်ဆင်ဖို့ ပြင်လိုက်၏။

ပထမဦးစွာ သူက တိထျန်း၏ အိပ်စက်သူများကို စစ်ဆေးကြည့်လိုက်သည်။

သူတို့ကို ရှာဖွေတွေ့ရှိပြီးသည့်နောက်တွင် စစ်ဆေးကြည့်ခဲ့ပြီး ယုမျိုးနွယ်တွင်လည်း တစ်ယောက်ယောက်ကို စေလွှတ်ကာ အတူတူလုပ်ဆောင်ခဲ့သည်။ သူတို့တိုက်ပွဲအပြီးတွင် သူက ထပ်မံစစ်ဆေးကြည့်ခဲ့၏။

ဝမ်ဝေ့က သူ့စွမ်းရည်အောက်မှ လွတ်မြောက်သွားခဲ့သည့် လူတချို့ကို တွေ့ရှိခဲ့သည်။ ယခုတွင် သူက ပိုမိုအားကောင်းနေပြီဖြစ်ကာ ကံစွမ်းအားကို ပိုမိုနားလည်ထားပြီဖြစ်သောကြောင့် ထပ်မံစစ်ဆေးကြည့်လိုက်သည်။

တိထျန်းက သူ့အား ကံကြွေးဖြင့် လုပ်ကြံနေသည်ဟု ခန့်မှန်းပြီးသည့်နောက်တွင် သူက မည်သည့်အခွင့်အရေးမှ မပေးလိုပေ။ ဤတစ်ကြိမ်တွင် သူ့ရှာဖွေမှုက အချည်းနှီးဖြစ်သွားသောကြောင့် စိတ်ပျက်သွားစေသလို စိတ်သက်သာရာရသွားစေသည်။

ထိုအရာကို လုပ်ဆောင်သွားပြီးသည်နှင့် ဝမ်ဝေ့က နောက်အစီအစဉ်ကို အာရုံစိုက်ထားလိုက်သည်။ သူက စစ်ဆေးမှုအကြောင်း သိထားသော်လည်း မည်သည့်ပုံစံ၊ မည်သို့ကျော်ဖြတ်ရမည်ကို မသိထားသည်က ပြဿနာ ဖြစ်၏။

ထို့ကြောင့် သူက လျှို့ဝှက်မှတ်တမ်းခန်းသို့ သွားကာ တားမြစ်ခံ ဖြစ်ခဲ့ဖူးသည့် မဟာဧကရာဇ်များ၏ ဘဝဇာတ်ကြောင်းကို ဖတ်ရှုလိုက်သည်။ ကံဆိုးစွာဖြင့် ထိုကိစ္စရပ်များက အသေးစိတ် ဖော်ပြမထားသည့် အတွက် သူ့အနေနှင့် သတင်းအချက်အလက် မရလိုက်ပေ။

သို့သော်လည်း သူက သူတို့အားလုံးသည် သူတို့၏ ကျင့်ကြံရေးခရီးစဉ်တွင် ဆိုးဆိုးရွားရွား ဖြစ်ရပ်မျိုး ကြုံတွေ့ခဲ့ရကြောင်း သတိပြုမိလိုက်၏။ ထိုအရာက စစ်ဆေးမှု၏ ရလဒ် ဖြစ်နိုင်သလို အားကောင်းသည့် လူများ၏ ဘဝပုံစံလည်း ဖြစ်နေနိုင်သည်။

လျှို့ဝှက်မှတ်တမ်းခန်းမှ ထွက်လာပြီးနောက် ဝမ်ဝေ့က စဉ်းစားနေသည့် အမူအရာမျိုး ဖြစ်နေသည်။

နောက်ဆုံးတော့ ငါ ဂမ္ဘီရအပေါ် မှီခိုရမှာပဲ။

ထို့နောက် သူက ကောင်းကင်အား မော့ကြည့်ကာ ညအခါ ရောက်နေပြီဖြစ်ကြောင်း သိလိုက်သည်။ ရက်အနည်းငယ် ကုန်လွန်သွားပြီဖြစ်၏။

“ သူမက ဘာလို့ ပြန်မလာသေးပါလိမ့်” သူက ခေါင်းခါကာ ရေရွတ်လိုက်ပြီးနောက် အစီအစဉ်အား ဆက်လက်လုပ်ဆောင်လိုက်သည်။

သူ့တောင်သို့ ပြန်လည်ရောက်လာပြီးသည့်နောက်တွင် ရွှေရောင်သတ္တုလုံးအား ထုတ်ယူလိုက်သည်။ ထိုအရာက သူ အနောက်ပိုင်းကုန်းမြေတွင် သောင်းကျန်းခဲ့စဉ်အခါက ရရှိထားသည့် ကုသိုလ်ကောင်းမှု ဖြစ်ပေသည်။ သူက မိစ္ဆာများစွာကို သတ်ဖြတ်ခဲ့သည့်အတွက် ရရှိထားသည့်ပမာဏက အနည်းငယ် များပေသည်။

“ ဒါပေမဲ့ ဒါက မလုံလောက်သေးဘူးလို့ ထင်တယ်”

ဝမ်ဝေ့က သူ အသက်ရှင်နိုင်ချေ သို့မဟုတ် သဲလွန်စကို ရှာဖွေနိုင်ဖို့အတွက် ဂမ္ဘီရအစွမ်းကို ထုတ်ဖော်လိုက်သည်။

ကံဆိုးစွာဖြင့် မည်သည့်အရာမှ ရှာမတွေ့ခဲ့ပေ။  ထို့နောက် သူက ကုသိုလ်အား အသုံးပြုကာ ဂမ္ဘီရအစွမ်းကို တိုးမြှင့်လိုက်သည်။ သို့သော် သူထင်ထားသလိုမျိုး မလုံလောက်သေးပေ။

သူက မရပ်တန့်ဘဲ ဆေးဝါးဖော်စပ်ရေး အခန်းသို့ မဝင်ခင် ဆေးပင်တချို့ကို ရယူခဲ့သည်။ သူက အစီအရင် ဗဟိုချက်ကို ထုတ်လိုက်ပြီး အခန်းထဲတွင် ထားကာ သူ လိုအပ်သည့်ဆေးပင်များကို အလယ်တွင် ထားလိုက်သည်။

ထို့နောက် သူက ထိုအရာများကို ဆေးလုံးအဖြစ် စတင်သန့်စင်လိုက်၏။ ထူးခြားသည့်အရာမှာ ဖြစ်စဉ်တစ်ခုလုံးအတွင်း ဝမ်ဝေ့က ဆေးပြင်းမီးဖိုကို တစ်ကြိမ်တစ်ခါမှပင် အသုံးမပြုခဲ့ပေ။ သူ အလယ်တွင် ထားထားသည့် အစီအရင်က မီးတောက်တစ်ခု ထွက်ပေါ်လာပြီး ဆေးပင်များမှ အညစ်အကြေးများကို ဖယ်ရှားပေးသွားသည်။

သူက အစီအရင်ကို အသုံးပြုကာ ထိုဆေးလုံးအတွက် အံ့ဖွယ်သင်္ကေတများကို ရေးထွင်းလိုက်သည်။

ဝမ်ဝေ့ လုပ်ဆောင်သည်က သူ မူလဆေးလုံးတာအိုဂိုဏ်းထဲ ဝင်ရောက်ကျူးကျော်စဉ်အခါက ပေါ်လာခဲ့သည့် အတွေးတစ်ခု ဖြစ်၏။ အစီအရင်မှတဆင့် မိုးမြေ၏ အသန့်စင်ဆုံးစွမ်းအားကို ငှားယူကာ ပင်ကိုတစ်ပိုင်းဆေးလုံးကို ဖော်စပ်ခြင်း ဖြစ်သည်။

ထိုအရာ ပြီးဆုံးသွားသည်နှင့် ဆေးလုံးက ကောင်းကင်သို့ ပျံသန်းသွားပြီး ဆေးလုံးစမ်းသပ်ချက်ကို ခံယူခဲ့သည်။ ထို့နောက် ချက်ချင်းဆိုသလို ဝမ်ဝေ့ ထင်ထားသည့်အတိုင်း ထိုနည်းလမ်းအသစ်ကို မိုးမြေမှ အသိအမှတ်ပြုကာ သူ့အား ကုသိုလ် ချီးမြှင့်လာလေ၏။ ထိုအရာက အရည်အသွေးကောင်းမွန်သည့် ခရမ်းရောင် ဖြစ်၏။

ယခင်နှစ်ထောင်ပိုင်းအတွင်း မူလဆေးလုံးတာအိုဂိုဏ်းသည် အတုအယောင် ပင်ကိုဆေးလုံး ဖော်စပ်သည့်နည်းလမ်းအား ဖြန့်ဖြူးခဲ့သည်။ ထိုနည်းလမ်းမှတဆင့် ဆေးဝါးပညာရှင်တချို့သည် ပြည့်စုံအရည်အသွေးထက် ကောင်းမွန်သည့် ဆေးလုံးများကို ဖန်တီးနိုင်ကြသောကြောင့် ပြည့်စုံအရည်အသွေးအထက်တွင် အကြွင်းမဲ့ အရည်အသွေးဟူ၍ အသစ်တစ်ခု ထွက်ပေါ်လာခဲ့သည်။

ထိုအပြုအမူက ဂိုဏ်းအတွက် ကုသိုလ်နှင့် ကံကောင်းမှုများစွာကို ရယူခဲ့သည်။ ကံဆိုးစွာဖြင့် တာအိုအခွင့်အလမ်းဂိုဏ်းက သူတို့သည် အကြွင်းမဲ့ဆေးလုံးကို ဖန်တီးဖို့ ပိုမိုကောင်းမွန်သည့်နည်းလမ်းကို ဖန်တီးထားကြောင်း သတင်းထုတ်လွှင့်လိုက်သည့်အခါ သူတို့၏ တစ်ဦးတည်း လက်ဝါးအုပ်လိုသည့်အစီအစဉ်က ပျက်စီးသွားလေသည်။

ကံကောင်းစွာဖြင့် ဤနည်းလမ်းက အစီအရင်အပေါ် နားလည်မှုတချို့ လိုအပ်နေသည့်အတွက် ယခင်ထက်အသုံးပြုဖို့ရာ ပိုမိုခက်ခဲစေသည်။ မည်သို့ပင်ဆိုစေကာမူ မူလဆေးလုံးတာအိုဂိုဏ်းက သူတို့ရရှိသည့် အဆုံးမဲ့ အကျိုးအမြတ်များသည် အနည်းဆုံးတော့ လျှော့ချခံလိုက်ရကြောင်း သတိပြုမိကြသည်။

ဝမ်ဝေ့က ကျင့်ကြံရေးအခန်းအတွင်း ဆုံမှတ်ဖွင့် ဆေးလုံးကို ဘေးဖယ်လိုက်သည်။ ကုသိုလ်စတေးမှုဖြင့် သူက သတင်းအချက်အလက်တစ်ခု ရရှိလိုက်သည်။ သို့သော် သူက မပျော်ပေ။

သူ့ ဂမ္ဘီရ ရလဒ်မှာ အလွန်ရိုးရှင်းလှသည်။ တားမြစ်နယ်မြေဖြစ်၏။ သူ ကုသိုလ်မည်မျှအသုံးပြုစေကာမူ အဖြေတစ်ခုတည်းသာ ရရှိလာသည်။ ရလဒ်က မည်မျှအန္တရာယ်များကြောင်း ထည့်မပြောရသေးပေ။ ထိုနေရာများသို့ သွားနိုင်မည့်လူ ရှိမည်လား။ သူက သူ့ဘာသာသူ သက်ပြင်းချပြီးသည့်နောက်တွင် စတင်ပြင်ဆင်လိုက်သည်။

မည်သို့ပင်ဖြစ်စေကာမူ ထိုအရာက သူ အသက်ရှင်ဖို့အတွက် တစ်ခုတည်းသော အခွင့်အရေး သို့မဟုတ် သဲလွန်စ ဖြစ်၏။

ကမ္ဘာတွင် တားမြစ်နယ်မြေ ၆ ခုရှိပြီး အနောက်ပိုင်း သန့်စင်ကောင်းချီးနယ်မြေ၊ သွေးမြေ၊ ငရဲကမ္ဘာ၊ တာအိုသင်္ချိုင်းမြေ၊ ဝါးမျိုရေးနယ်မြေနှင့် ဖရိုဖရဲအချိန်နယ်မြေတို့ ဖြစ်ကြသည်။ ဝမ်ဝေ့က သူ့အား ကူညီပေးနိုင်သည့် နေရာများမှ သုံးခုကို ဖယ်ရှားလိုက်သည်။ ငရဲကမ္ဘာ၊ ဝါးမျိုရေးနယ်မြေနှင့် ဖရိုဖရဲအချိန်နယ်မြေတို့ ဖြစ်သည်။

ဝူဟုန်က သူ ထာဝရဧကရာဇ် မဖြစ်လာခင်အထိ ငရဲကမ္ဘာအနား ခြေမချရန် သတိပေးခဲ့သည်။ ထို့ကြောင့် သူက သတိကြီးကြီး ထားထားသည်။ ကျန်သည့်နှစ်ခုအတွက်မူ သူတို့က တားမြစ်နယ်မြေများကြား မရဏနယ်မြေဟု ခေါ်ဆိုနိုင်လောက်အောင် နာမည်ဆိုးဖြင့် ကျော်ကြားလှသည်။

တခြားအရာများနှင့် ပတ်သက်လာသည့်အခါ ကျင့်ကြံသူများက ဝင်ရောက်နိုင်ပြီး ကံအပြောင်းအလဲအခွင့်အရေးတချို့ကိုပင် ရယူနိုင်ကြသည်။ ထိုအရာက တာအိုသင်္ချိုင်းမြေသည်လည်း အပါအဝင် ဖြစ်၏။

သို့သော်လည်း ကျန်နှစ်ခုကမူ ကွဲပြားပေသည်။

ဝါးမျိုရေးနယ်မြေက နာမည်အတိုင်း ကြောက်မက်ဖွယ် ဝါးမျိုရေးစွမ်းအားရှိသည့် နေရာတစ်ခုဖြစ်သည်။ သွေးသား၊ ဝိညာဉ်နှင့် စွမ်းအား ရှိထားသည့် အရာ သို့မဟုတ် သက်ရှိများက ချက်ချင်း ဝါးမျိုခံရလိမ့်မည်။

မှတ်တမ်းများအရ အထဲတွင် ဘာမှမရှိပေ။ စွမ်းအားမရှိသလို စည်းမျဉ်းမရှိဘဲ အရာအားလုံး ဝါးမျိုခံထားရသည်။

ဖရိုဖရဲအချိန် နယ်မြေနှင့် ပတ်သက်လာသည့်အခါ အချိန်စွမ်းအားက ဖရိုဖရဲ ဖြစ်နေလေ၏။

ထိုအထဲသို့ ဝင်ရောက်သူတိုင်း ချက်ချင်း အသက်ကြီးသွားပြီး သေဆုံးသွားကြခြင်းဖြ စ်နိုင်သလို သန္ဓေသားအထိ ပြန်လည်ငယ်ရွယ်သွားပြီး ကမ္ဘာမှပျောက်ကွယ်သွားခြင်းအထိ ဖြစ်နိုင်သည်။

“ ဒီနေရာတွေရဲ့ လျှို့ဝှက်ချက်ကို အမှန်တကယ် သိချင်မိတယ်” ဝမ်ဝေ့က ရေရွတ်လိုက်ပြီးနောက် ထွက်သွားလိုက်သည်။ သူက မြောက်ပိုင်းကုန်းမြေရှိ သွေးမြေဆီ ဦးတည်လိုက်သည်။

အဝင်ဝတွင် သူက ဤနေရာတွင် ကံအပြောင်းအလဲ ရှိမည်လားဟု စစ်ဆေးကြည့်လိုက်သည်။ ရလဒ်က ကြားနေသာ ဖြစ်၏။ ထို့ကြောင့် သူက ထွက်လာလိုက်သည်။ ထို့နောက်သူက အနောက်ပိုင်းကုန်းမြေသို့ သွားကာ အနောက်ပိုင်း သန့်စင်ကောင်းချီးနယ်မြေ အဝင်ဝတွင်လည်း အတူတူ လုပ်ဆောင်လိုက်သည်။

သူ့ကို အံ့အားသင့်သွားစေသည်က သူ့တွက်ချက်မှုသည် ကံအပြောင်းအလဲ အခွင့်အရေး စောင့်ကြိုနေကြောင်း ပြသနေလေ၏။ ထိုရလဒ်ဖြင့် သူက သူ့ဂမ္ဘီရသည် ဤတားမြစ်နယ်မြေကို ရည်ညွှန်းကြောင်း သဘောပေါက်လိုက်သည်။

သူက ချက်ချင်း ဝင်မသွားသေးဘဲ အိမ်သို့ ပြန်ကာ ထိုနယ်မြေအကြောင်းကို လေ့လာကြည့်လိုက်သည်။ သို့သော်လည်း လျှို့ဝှက်မှတ်တမ်းခန်းသို့ မသွားခင် သူ့အား တုန်လှုပ်သွားစေသည့် သတင်းစကားကို လက်ခံရရှိလိုက်သည်။

ဤသည်က ဝူဟုန်ဆီမှ ဖြစ်ကာ သူမသည် ပိတ်မိနေကြောင်း ပြောထားခြင်း ဖြစ်၏။