နတ်စွမ်းအားတိုက်ခိုက်မှု

နှင်တံသုံးချက်မြောက် ကျရောက်လာသောအခါ ကောင်းကင်တွင် ရှိသည့် နှင်တံပုံရိပ်များ အားလုံးက စုစည်းသွားကာ နှင်တံတစ်ခုတည်း ဖြစ်လာခဲ့သည်။ ကျယ်ပြောသည့် နယ်မြေက နှင်တံသုံးချက်လမ်းစဥ်နယ်မြေအဖြစ် ပြောင်းလဲသွားပေသည်။ မဟာလမ်းစဥ် စွမ်းအားများ အားလုံးက ပြိုကျပျက်စီးတော့မည် ဖြစ်သည်။ ကြောက်မက်ဖွယ် နတ်မီးလျှံများ၊ ရှေးဟောင်းနဂါးဖီးနစ်တို့၏ ပုံရိပ်ယောင်များနှင့် မရေတွက်နိုင်သော ဓားပုံရိပ်များက ထိုလမ်းစဥ်နယ်မြေအတွင်း ဖျက်ဆီးပစ်ခံလိုက်ရသည်။

မသဲကွဲသော အသံတစ်ခု ထွက်ပေါ်လာသည်။ သူတို့က အဝေး၌ ရှိနေလျှင်ပင် ပတ်ဝန်းကျင်ရှိ ကျင့်ကြံသူများ အားလုံးသည် ထိုနှင်တံစွမ်းအားက မည်မျှကြောက်မက်ဖွယ် ကောင်းသည်ကို ခံစားမိကြပေသည်။ ၎င်းက နတ်ဘုရားတစ်ပါး၏ တိုက်ခိုက်မှုကဲ့သို့ပင် ဖြစ်သည်။

ဘုန်း...

ကြီးမားသည့် နတ်ဖီးနစ်က ဒွန်ဟောင်တိယွမ်၏ နောက်တွင် ပေါ်ပေါက်လာသည်။ မရှုံးနိမ့်နိုင်သော နတ်ဘုရားမတစ်ပါးကဲ့သို့ သူမ၏ ခန္ဓာကိုယ်က မီးလျှံများဖြင့် လောင်ကျွမ်း နေခဲ့သည်။ ထိန်းချုပ်ခြင်းနတ်စွမ်းအားက ပျံ့နှံ့လွှမ်းခြုံလာပြီး တတိယမြောက်နှင်တံ၏ ခွန်အားကို ထိန်းချုပ်ရန် ကြိုးစားလာသည်။ သို့သော် မသဲကွဲသည့် အသံက ဆက်လက် ပေါက်ကွဲထွက်နေပြီး ရပ်တန့်သွားခြင်း မရှိပေ။ အရောင်မဲ့ သဏ္ဌာန်မဲ့သည့် ထိန်းချုပ်ခြင်းနတ်စွမ်းအားက ဖြန့်ကျက်လာကာ နတ်ဘုရားအုပ်စိုးလက်နက်၏ မြစိမ်းရောင်စွမ်းအားတို့ဖြင့် ထိပ်တိုက်တွေ့ဆုံခဲ့သည်။ ထိန်းချုပ်ထားမှုတို့ ရှိနေသော်လည်း ထိုအဖျက်စွမ်းအားတိုက်ခိုက်မှုကို တားဆီးနိုင်ခြင်းမရှိပေ။

ဒွန်ဟောင်တိယွမ်သည် သူမက နှင်တံသုံးချက်လမ်းစဥ်နယ်​မြေအတွင်း ကျရောက်သွားသည်ဟု ခံစားမိခဲ့ပေသည်။ နှင်တံပုံရိပ်များစွာက နှင်တံတစ်ခုတည်းအဖြစ် ပေါင်းစည်းသွားလျှင်ပင် သူမသည် နေရာအနှံ့၌ မရေတွက်နိုင်သော နှင်တံများရှိနေသလို ခံစားနေရဆဲ ဖြစ်သည်။ ထိုသည်မှာ နယ်မြေထိန်းချုပ်မှုသဘောတရားဖြစ်ပြီး သူမကို ဖိနှိပ်ထားခဲ့သည်။

ရှေးဟောင်းနဂါး၏ ဝိညာဥ်က နိုးထလာသလို ထင်မှတ်ရသည်။ စူးဂှသည့် နဂါးအော်မြည်သံက မရေတွက်နိုင်သော လူများ၏ နားစည်ကို တုန်ခါသွားစေခဲ့သည်။ ထိန်းချုပ်ခြင်း နတ်စွမ်းအားက နဂါးအော်မြည်သံနှင့်အတူ ဖြတ်သန်းလွှမ်းခြုံလာကာ နတ်ဘုရားကပ်ဘေးအဆင့်အောက်မှ ကျင့်ကြံသူများက သူတို့၏ တိုက်ပွဲစွမ်းရည်ကို တိုက်ရိုက်ဆုံးရှုံးသွားခဲ့ပေသည်။ မဟာလမ်းစဥ် နတ်ဘုရားကပ်ဘေးအား ကျော်​ဖြတ်နိုင်ခဲ့သည့် ကျင့်ကြံသူများသည်ပင် လှုပ်ရှားရန် ခက်ခဲသည်ကို တွေ့ရှိလိုက်ရသည်။ သူတို့က တင်းကျပ်စွာ ထိန်းချုပ်ခံထားရပေသည်။ ထိုသည်မှာ သူတို့က တိုက်ရိုက်တိုက်ခိုက်ခံရသူများ မဟုတ်ဘဲ ဘေးမှရပ်ကြည့်နေသူများသာ ဖြစ်ပေသည်။ ရီဖူရှင်း ရင်ဆိုင်နေရသော စွမ်းအားမျိုးက မည်သို့ဖြစ်မည်ကို ခန့်မှန်းကြည့်နိုင်ကြပေသည်။

သို့ဆိုလျှင်ပင် ရီဖူရှင်းက အသာစီးရနေဆဲ ဖြစ်သည်။ သူက နောက်ပြန်မဆုတ်ရုံမျှမက ထိတ်လန့်တုန်လှုပ်ဖွယ် တိုက်ခိုက်မှုကိုပင် ထုတ်လွှတ်ခဲ့သေး၏။

ရှေးဟောင်းနဂါး၏ စွမ်းအားက မည်မျှ ကြောက်မက်ဖွယ် ကောင်းသနည်း။ ၎င်းက သမိုင်းတွင် အားအကောင်းဆုံး နတ်စွမ်းအားဖြစ်သည်။ ထိန်းချုပ်ခြင်းနတ်စွမ်းအားကို ထုတ်လွှတ်လိုက်သည့်အခါ ၎င်းသည် ရှေးဟောင်းဖီးနစ်နတ်ဓားကို တွန်းအားပေး၍ စစ်မှန်သည့် ဖီးနစ်နတ်ဓားအဖြစ် ပြောင်းလဲသွားစေသည်။ ၎င်းသည်  နတ်ဖီးနစ်မီးလျှံတို့ဖြင့် လောင်ကျွမ်းနေပြီး ထျန်းရှင်းစွမ်းအားလည်း ပါဝင်နေသည်။ ယင်းက အတားအဆီးမရှိဘဲ ရှေ့သို့ ဆက်လက်ထိုးဖောက်နေခဲ့ပြီး ကြီးမားသည့် နတ်ဓားနှင့် ကျရောက်လာနေသည့် နတ်ဘုရားအုပ်စိုးလက်နက်တို့က ကောင်းကင်တွင် ထိပ်တိုက်တွေ့ဆုံခဲ့ပေသည်။

ထိုအချိန်တွင် ဖျက်ဆီးခြင်းလေမုန်တိုင်းက လွှမ်းခြုံလာ၏။ မဟာလမ်းစဥ်နတ်အလင်းတို့က အရာအားလုံးကို ဖြတ်သန်းတောက်ပလာပြီး ထိတ်လန့်တုန်လှုပ်ဖွယ် စွမ်းအားလှိုင်းများ ဖြစ်ပေါ်လာစေသည်။

ဘန်း... ဘန်း...

ထိုမုန်တိုင်းကြောင့် လူများစွာ နောက်သို့ လွင့်စင်သွားခဲ့ရသည်။ ထိုစွမ်းအင်လှိုင်းက သူတို့ကို လွင့်စင်သွားအောင်လုပ်နိုင်ရုံမျှမက သွေးများကိုပင် အန်ထုတ်မိစေခဲ့သည်။ အင်ပါယာအဆင့်အင်အားစုများမှ ထိပ်သီးပုဂ္ဂိုလ်များသည် သူတို့ဘေးမှ ကျင့်ကြံသူများကို ကာကွယ်ရန်အတွက် အစွမ်းထက်သည့် နယ်မြေစွမ်းအားကို ထုတ်လွှတ်လိုက်ကြသည်။ ဖျက်ဆီးခြင်းမုန်တိုင်း ရောက်ရှိလာသည့်အခါ ထိုအကာအကွယ်နယ်မြေ၌ အက်ကြောင်းများ ပေါ်ပေါက်လာသည်။

တိဟောက်နှင့် အခြားထိပ်သီးပုဂ္ဂိုလ်များက မုန်တိုင်းအတွင်း ရပ်နေခဲ့ကြပြီး တည်ငြိမ်ကာ မားမားမတ်မတ် ရှိနေဆဲဖြစ်သော်လည်း ထိုတိုက်ခိုက်နေသည့် အစွမ်းထက်ကျင့်ကြံသူနှစ်ယောက်ကို ကြည့်နေသည့် သူတို့၏ အမူအရာများက သိသာထင်ရှားစွာ မည်းမှောင်နေခဲ့သည်။ ရီဖူရှင်း နှင့် ဒွန်ဟောင်တိယွမ် နှစ်ယောက်လုံး၏ တိုက်ပွဲစွမ်းရည်က အလွန် ထိတ်လန့်အံ့သြဖွယ် ကောင်းပေသည်။ သူတို့သည် ဒွန်ဟောင်တိယွမ်၌ ထိုသို့သော စွမ်းရည်မျိုးရှိနိုင်သည်ကို အံ့အားသင့်ခြင်းမရှိပေ။ အဆုံးမှာတော့ သူမက အရှင်ဒွန်ဟောင်၏ သမီးဖြစ်လေသည်။ သူမသည် ငယ်စဥ်ကတည်းကပင် အရှင်ဒွန်ဟောင်၏ သင်ကြားပြသပေးမှုကို ခံယူခဲ့ရပြီး နတ်စွမ်းအားကို ဆက်ခံခဲ့သည့်အတွက် သူမတွင် အလွန် အားကောင်းသည့် ဝှက်ဖဲရှိနေသည်မှာ ပုံမှန်ပင်ဖြစ်သည်။

သို့သော် ရီဖူရှင်းက အင်ပါယာရီချင်၏ မျိုးဆက်ဖြစ်လျှင်ပင် သူသည် အမွေအနှစ်ဖြစ်စေ လမ်းညွှန်ပြသပေးမှုဖြစ်စေ ခံယူခဲ့ရဖူးခြင်း မရှိပေ။ သူ၏ ကျင့်ကြံခြင်းအရင်းအမြစ်များက ဒွန်ဟောင်တိယွမ်နှင့် မယှဥ်နိုင်လောက်အောင် ကွာခြားလွန်းပေသည်။ သူက အရာအားလုံးကို အောင်မြင်ရန် ကိုယ်တိုင် လုပ်ဆောင်ခဲ့ရပြီး တစ်လှမ်းချင်း လျှောက်လှမ်းခဲ့ရင်း ယခုကဲ့သို့ အလွန် ထိတ်လန့်စရာကောင်းသည့် ကြောက်မက်ဖွယ် စွမ်းရည်တို့ကို ထုတ်ဖော်ပြသနိုင်ခဲ့သည်။

ဖျက်ဆီးခြင်းမုန်တိုင်းက ဖြတ်သန်းသွားသည့်အခါ စစ်မှန်သည့် ဖီးနစ်နတ်ဓားက ကွဲအက်သွားခဲ့သည်။ နတ်ဘုရားအုပ်စိုးလက်နက်သည်လည်း တဖြေးဖြေး အက်ကြောင်းများဖြစ်ပေါ်လာသည်။ သို့သော် ထိုကြောက်မက်ဖွယ်မုန်တိုင်းက တိုက်ခိုက်နေသူနှစ်ယောက်ထံ တိုးဝင်သွားနေဆဲ ဖြစ်၏။ ရီဖူရှင်း၏ နတ်ခန္ဓာက နောက်သို့ ခြေလှမ်းအနည်းငယ် ဆုတ်ခွာသွားရသည်။ ကျယ်လောင်သည့် အသံထွက်ပေါ်လာပြီးနောက် သူက ကောင်းကင်၌ ခြေလှမ်းကို မြဲမြံအောင်ရပ်ကာ သူ့ကိုယ်သူ တည်ငြိမ်အောင် ထိန်းညှိလိုက်သည်။

ထိုစဥ်တွင် ဒွန်ဟောင်တိယွမ်၏ ခန္ဓာကိုယ်သည်လည်း နောက်သို့ လွင့်စင်သွားခဲ့သည်။ သူမက မသဲမကွဲညည်းညူလိုက်ရင်း ပါးစပ်ထောင့်မှ သွေးတို့စီးကျလာသည်။

သူမက ခေါင်းကို မော့လိုက်သည်။ သူမ၏ လှပသောအသွင်အပြင်က အနည်းငယ် မှေးမှိန်သွားသလို ထင်မှတ်ရပြီး သူမ၏ မျက်ခုံးနှစ်ခုကြား၌ ရှိသော နတ်ဖီးနစ် ပုံရိပ်သည်လည်း အနည်းငယ် ဝေဝါးသွားသည်။ သူမ၏ လှပသော မျက်လုံးများက ရီဖူရှင်းကို ကြည့်နေခဲ့သည်။ ရီဖူရှင်းသည် ထိုအခိုက်တွင် သူမ၏ မျက်လုံးများထဲတွင် ရှုပ်ထွေးသည့် ခံစားချက်တို့ ဖြတ်ပြေးသွားသည်ကို ခံစားမိလိုက်သော်လည်း ၎င်းက တခဏအတွင်း ပျောက်ကွယ်သွားကာ ပုံမှန်အတိုင်း ပြန်ဖြစ်သွားသည်။ သူမက သူ့ကို အေးစက်စွာ စိုက်ကြည့်နေခဲ့သည်။

ထိုလေမုန်တိုင်းက နောက်ဆုံး၌ ဖြတ်ကျော်သွားခဲ့ပြီး လူတိုင်းက ပင့်သက်ရှိုက်လိုက်ကြသည်။ သူတို့၏ နှလုံးသားများက ပြင်းထန်စွာ ခုန်ပေါက်နေခဲ့သည်။ သူတို့က တိုက်ပွဲနေရာသို့ ကြည့်လိုက်သည့်အခါ သူတို့က ပို၍ပင် တုန်လှုပ်သွားခဲ့ပေသည်။ ဤတိုက်ပွဲက သူတို့ကို အလွန်အမင်း သက်ရောက်စေခဲ့သည်။

ရီဖူရှင်းက ထိန်းချုပ်ခြင်းနတ်စွမ်းအားကို အသက်သွင်းခဲ့သည့် ဒွန်ဟောင်တိယွမ်အား နောက်ဆုတ်သွားရအောင် ဖိအားပေးခဲ့သည်။

မျှော်မှန်းထားသလိုပင် ယခု ရီဖူရှင်းက အထွတ်အထိပ်တွင် ရပ်တည်ရန် အရည်အချင်းပြည့်မီပြီး အခြားလူများနှင့် အင်ပါယာအဆင့်အတန်းကို ယှဥ်ပြိုင်နိုင်ပေသည်။ ဤပြိုင်ဘက်ကင်းပုဂ္ဂိုလ်များတွင် မည်သူက မဟာအင်ပါယာဖြစ်ရန် လမ်းစဥ်ပေါ်သို့ ခြေချနိုင်လိမ့်မည်နည်း။

“ရှင် ရရှိထားတဲ့ နတ်ဘုရားအုပ်စိုးလက်နက်က ဘယ်လိုစွမ်းအားမျိုးလဲ။”

ဒွန်ဟောင်တိယွမ်က ရီဖူရှင်းကို အေးစက်သည့် အသံနှင့် မေးလိုက်သည်။

“မင်းသမီး မင်း သိချင်တယ်ဆို ကျုပ် မင်းကို သီးသန့်ပြောပြရင်ရော ဘယ်လိုလဲ။”

ရီဖူရှင်းက အေးစက်စွာ သရော်ရင်း ပြန်ဖြေလိုက်သည်။ နတ်ဘုရားအုပ်စိုးလက်နက် စွမ်းအားက သူ၏ သက်စောင့်ဝိညာဥ်နှင့် လိုက်ဖက်ညီပေသည်။ သူသည် လွန်ခဲ့သောနှစ်များတွင် ထိုစွမ်းအားကို အဆက်မပြတ်လေ့လာနေခဲ့ပြီး သူ၏ လမ်းစဥ်အဖြစ်သို့ ပြောင်းလဲခဲ့သည်။ ယင်းက စွမ်းအားအမျိုးအစားတစ်ခုမျှသာမဟုတ်သလို မည်သည့် လမ်းစဥ်နှင့်မျှလည်း သက်ဆိုင်ခြင်းမရှိပေ။ သို့သော် သူက ၎င်းကို ဒွန်ဟောင်တိယွမ်ထံသို့ ပြောပြလိမ့်မည်မဟုတ်ချေ။ ထို့အပြင် ဤနေရာ၌ အစွမ်းထက်ပုဂ္ဂိုလ်များစွာ ရှိနေသေးသည်။ အမှန်ပြောရလျှင် ဒွန်ဟောင်တိယွမ်က ထိုသို့ မေးသည်မှာ အနည်းငယ် ထူးဆန်းပေသည်။

သူတို့ စကားပြောနေစဥ် ထိတ်လန့်တုန်လှုပ်ဖွယ် အရှိန်အဝါတစ်ခု ရုတ်တရက် ဖြန့်ကျက်လာသည်။ တောက်ပသည့် အလင်းတို့က ထိုနေရာကို လွှမ်းခြုံလာပြီး လူအများက မော့ကြည့်လိုက်ကြသည်။ သူတို့သည် အလွန်တောက်ပသည့် နတ်အလင်းတို့ဖြင့် လွှမ်းခြုံခံထားရသော တိဟောက်၏ ပုံရိပ်က ကောင်းကင်ထက်၌ ပေါ်ပေါက်လာသည်ကို မြင်တွေ့လိုက်ရသည်။

ထိုအချိန်တွင် ကောင်းမြတ်သည့် အရှိန်အဝါတို့က ကောင်းကင်နှင့် မြေကြီးကြား ပေါ်ပေါက်လာသည်။ လောကတစ်ခုလုံးမှ စွမ်းအားတို့က သူ့ခန္ဓာကိုယ်နှင့် ပေါင်းစပ်သွားပုံရသည်။

တိဟောက်သည်လည်း တိုက်ခိုက်တော့မည်လား။

သန့်စင်မြင့်မြတ်သည့် ပုံရိပ်တစ်ခု ပေါ်ပေါက်လာသည်။ တိဟောက်သည် လောကကြီးကို အစိုးရသည့် နတ်လူသားအဖြစ်သို့ ပြောင်းလဲသွားခဲ့သည်။ သူက ကောင်းကင်ထက်တွင် ရပ်နေခဲ့ပြီး လောကအတွင်းမှ စွမ်းအားများအားလုံးကို အသုံးပြုနိုင်သကဲ့သို့ပင် ဖြစ်သည်။ ထိုကောင်းမြတ်သည့် အရှိန်အဝါတို့က လောက၏ အမှန်တရားလမ်းစဥ်ပင် ဖြစ်သည်။ သူသည် ဤလောက၏ နတ်ဘုရားတစ်ပါးဖြစ်ပြီး လောကအတွင်းမှ စွမ်းအားများအားလုံးကို ထိန်းချုပ်နိုင်ပုံရလေသည်။

ထိုသည်မှာ လူသားဘုံ၏ စွမ်းအားဖြစ်သည့် နတ်လူသားစွမ်းအား ဖြစ်သည်။

ရီဖူရှင်းက မျက်မှောင်ကြုတ်လိုက်သည်။ ထိုပေါက်ကွဲထွက်လာသည့်စွမ်းအားတို့က သူ့ထံသို့ တည့်မတ်စွာ ကျရောက်လာသည်။ သူသည် ယခုလေးတင်မှ ဒွန်ဟောင်တိယွမ်နှင့် ပြင်းထန်သောတိုက်ပွဲကို ဆင်နွှဲပြီးရုံသာ ရှိသေးသော်လည်း တိဟောက်သည် ယခင်က ဒွန်ဟောင်တိယွမ်မှ ရီချင်းယောင်ကို တိုက်ခိုက်သကဲ့သို့ တိုက်ပွဲတွင် ပါဝင်လာတော့မည် ဖြစ်သည်။

ကြည့်ရသည်မှာ ကောလာဟလများက အမှန်ဖြစ်ပုံရသည်။ လူသားဘုံ၏ လူသားဘိုးဘေးက မဟာမိတ်လက်ထပ်ပွဲ ပြုလုပ်ချင်နေပြီး အရှင်ဒွန်ဟောင်အား အမှန်တကယ် တောင်းဆိုခဲ့ခြင်း ဖြစ်နိုင်သည်။ သူက ဒွန်ဟောင်တိယွမ်နှင့် မဟာမိတ်ဖွဲ့ရန် ရှေ့တိုးလာခဲ့သည်။ သူက တစ်ခုခုကို ရည်ညွှန်းဖော်ပြရန် ကြိုးစားနေသည်လား။

ကြီးမားသော နတ်ဓားများက ကောင်းကင်၌ ရုတ်တရက် ပေါ်ပေါက်လာသည်။ မှုန်မှိုင်းသော လေထုက အဆုံးမဲ့လေဟာနယ်ကို ဖုံးလွှမ်းထားပြီး ကြီးမားသည့် နတ်ဓားများက အစွမ်းထက်ကျင့်ကြံသူများ၏ ခေါင်းထက်တွင် ရစ်ဝဲသွားသည်။ ၎င်းတို့က ရီဖူရှင်းဘက်သို့ ချိန်ရွယ်ထားသည်။

“ရီဖူရှင်း မင်းက ကိုယ့်သဘောနဲ့ကိုယ် အမှောင်ထုနဲ့ မဟာမိတ်ဖွဲ့မှတော့ လူသားဘုံက အမှောင်ထုကို ဖယ်ရှားရှင်းလင်းဖို့ လုပ်ရုံအပြင် မရှိဘူးပဲ။”

တိဟောက်က ကြေညာလိုက်သည်။ သူ၏ အသံက ကောင်းကင်ကိုပင် တုန်ခါသွားစေသည်။ နတ်လူသားအဖြစ် သူ၏ ပြောင်းလဲမှုက ကြီးမားသည့် စွမ်းအားတို့ကို ထုတ်ဖော်လာနိုင်သည်။ သူက လက်ညှိုးညွှန်လိုက်သည့်အခါ ကြောက်မက်ဖွယ် ပေါက်ကွဲသံများ ထွက်ပေါ်လာသည်။ လောကဓားက ရီဖူရှင်းအား သတ်ဖြတ်ရန် အောက်သို့ ထိုးဆင်းလာကာ အောက်သို့ ထိုးဆင်းလာသည်။ ရီဖူရှင်း၏ လက်ထဲမှ နတ်ဘုရားအုပ်စိုးလက်နက်က လေဟာနယ်ကို ထိုးဖောက်ကာ ချက်ချင်းပင် ကြောက်မက်ဖွယ် နတ်စွမ်းအားနယ်မြေတစ်ခု ဖြစ်ပေါ်လာသည်။ ကြီးမားသည့် နတ်ဓားက အောက်သို့ ထိုးဆင်းလာသော်လည်း နယ်မြေကို မချိုးဖျက်နိုင်ခဲ့ပေ။ ၎င်းက နတ်စွမ်းအားနယ်မြေ၏ အပြင်၌သာ ရပ်တန့်သွားသည်။

သို့သော် တိဟောက်က မရပ်တန့်ခဲ့ပေ။ အကန့်အသတ်မဲ့သည့် လောက၏ စွမ်းအားက နတ်ဓားများအတွင်းသို့ ပြီးပြည့်စုံစွာ ပေါင်းစပ်ပြီး ရီဖူရှင်းကို ထိုးစိုက်ရန် အရူးအမူး ပြေးဝင်လာသည်။