သေစေနိုင်သော တိုက်ခိုက်မှုတစ်ခု

မဟာအင်ပါယာငါးပါးသည် ရီအင်ပါယာနန်းတော်အပြင်ဘက် ကောင်းကင်ထဲရှိ ကွဲပြားသောနေရာများတွင် ထွက်ပေါ်လာကြသည်။ ကောင်းကင်ထက်တွင် အလင်းလွှာတစ်ခု ထွက်ပေါ်လာပြီး ကောင်းကင်ကို ကာရံကာ ကျယ်ပြောသော နယ်မြေတစ်ခွင်ကို လွှမ်းခြုံသွားသည်။

ရီဖူရှင်းမှာလည်း အထက်အာကာပြင်တွင် ပြန်ပေါ်လာ၏။ ကျယ်ပြောသော ကောင်းကင်နှင့် မြေကြီးသည် ပိတ်ဆို့ခံထားရပေပြီ။ တစ်ဘက်မှမဟာအင်ပါယာများသည် သူ ဗုဒ္ဓရောင်ဝါခြေလှမ်းဖြင့် သွားနိုင်သည်ထက် ပို၍ကျယ်သော အကွာအဝေးကို အတွေးတစ်ချက်ဖြင့် ပိတ်ဆို့နိုင်ပေသည်။ ထိုအရာသည် မဟာအင်ပါယာ၏ဝိညာဉ်စွမ်းအားပင်။

လူရိပ်အသီးသီးသည် အောက်ဘက်မှနေ၍ ကောင်းကင်သို့ လျင်မြန်စွာ ပျံတက်လာကြသည်။ ရီအင်ပါယာနန်းတော်မှ ကျင့်ကြံသူအားလုံးသည်လည်း ဤနေရာသို့ လာနေကြ၏။

ကောင်းကင်ထဲရှိ တိမ်တိုက်များ ပြောင်းလဲသွား၏။ ကြောက်မက်ဖွယ် မဟာလမ်းစဉ်အရှိန်အဝါတစ်ခုသည် မြည်ဟည်းကာ တလိပ်လိပ်တက်လာသည်။ အစိမ်းရောင်နတ်အလင်းသည် ကောင်းကင်နှင့် နေလုံးကို ကာရံသွား၏။ ရီဖူရှင်းသည် မဟာအင်ပါယာငါးပါးကို ငုံ့ကြည့်လိုက်ပြီး စွမ်းအားကို အာရုံခံလိုက်၏။ မဟာအင်ပါယာငါးပါးသည် ကွဲပြားသောနေရာများတွင် ရပ်နေကြသည်။ သူတို့၏ခန္ဓာကိုယ်များတွင် ကွဲပြားသော အငွေ့အသက်များ ရှိနေသော်လည်း တူညီမှုများလည်း ရှိနေသည်။ သူတို့ ပေါင်းစည်းညီညွတ်လာ၏။ သူတို့သည် လောကကြီးကို ပိုင်းခြားလိုက်ပြီး ဤနယ်မြေသည် အမှီအခိုကင်းသော နယ်မြေတစ်ခုဖြစ်လာသည်ဟု ရီဖူရှင်း ခံစားနေရသည်။

သူတို့တစ်ယောက်စီသည် လုံးဝကွဲပြားကြသည်။ သူတို့သည် သူတို့၏ကိုယ်ပိုင်နယ်မြေများ၏ နတ်ဘုရားများဖြစ်ကြသည်။

ထိုငါးယောက်သည် တစ်ချိန်က မဟာအင်ပါယာများ ဖြစ်ခဲ့ကြသဖြင့် သူတို့ထံတွင် မဟာအင်ပါယာအရှိန်အဝါ ရှိပေသည်။ ထို့အပြင် သူတို့သည် မဟာအင်ပါယာဖြစ်ရခြင်း၏ အဓိပ္ပာယ်ကို သိကြသည်။ ထို့ကြောင့် သူတို့၏အရှိန်အဝါသည် အတင်းလုပ်ယူထားသည်ဟု မထင်ရဘဲ သဘာဝကျနေသည်။

ကျင့်ကြံသူများသည် ကျင့်ကြံနေစဉ်တွင် လောကကြီးနှင့် တစ်သားတည်းဖြစ်လာရန် လိုအပ်၏။ ရန်ဟောင်များ မျှော်မှန်းသောအခြေအနေသည် နေမင်း၊ လမင်းနှင့်အတူ တောက်ပနိုင်ရန်၊ လောကကြီးကဲ့သို့ အသက်ရှည်နိုင်ရန်နှင့် သူတို့၏ကိုယ်ပိုင်ဝိညာဉ်စွမ်းအားက ကောင်းကင်၏ ဝိညာဉ်စွမ်းအားဖြစ်လာနိုင်ရန်ဖြစ်သည်။ သူတို့၏ဝိညာဉ်စွမ်းအားက လောကကြီး၏ဝိညာဉ်စွမ်းအားနှင့် လမ်းစဉ်တို့ကို ကိုယ်စားပြုသည့် အခြေအနေသည် ကျင့်ကြံသူများ မျှော်မှန်းသော အထွတ်အထိပ်အဆင့်ဖြစ်သည်။

သို့သော် ယခုတွင် ရီဖူရှင်းသည် အလွန်ကွဲပြားသော အရှိန်အဝါတစ်ခုကို ခံစားနေရသည်။ ထိုအရှိန်အဝါသည် သူသိသော ကျင့်ကြံခြင်းအကြောင်းအားလုံးနှင့် ဆန့်ကျင်နေ၏။ သူတို့သည် ပေါင်းစည်းညီညွတ်သွားပြီဖြစ်၏။ ထို့အပြင် သူတို့သည် အဆုံးစွန်ထိ ကျင့်ကြံခဲ့ပြီးဖြစ်၍ သူတို့၏ကိုယ်ပိုင်လောကကိုသာ ကိုယ်စားပြုသင့်ပေသည်။ သူတို့သည် အမှီအခိုကင်းကာ ကိုယ်ပိုင်ဖြစ်တည်မှုရှိကြလေသည်။

“လောကထဲတွင် မည်သည့်လမ်းစဉ်မှ မရှိ”

ရီဖူရှင်းသည် မဟာအင်ပါယာရှန့်ကျား ထွင်းထားသော စာလုံးများကို တွေးလိုက်သည်။ ထိုအခြေအနေသည် ကျင့်ကြံခြင်း၏အထွတ်အထိပ်လော။

ရီဖူရှင်း တွေးတောနေစဉ်တွင် မဟာအင်ပါယာငါးပါးသည် သူ့ကို တိုက်ခိုက်ရန် ဟန်ပြင်နေကြသည်။ ကောင်းကင်အင်ပါယာကျန်းက ခေါင်းမော့၍ ကောင်းကင်ထက်သို့ ကြည့်လိုက်၏။ အားကောင်းသော နတ်စွမ်းအားက ကောင်းကင်ကို ချိပ်ပိတ်ထားပြီး ရီဖူရှင်း၏ ဗုဒ္ဓရောင်ဝါခြေလှမ်းကို အသုံးမဝင် ဖြစ်နေစေသည်။ သူ လှုပ်ရှားရန် ကြိုးစားလိုက်ချိန်တွင် ကောင်းကင်သည် နတ်စွမ်းအား၏ ချိပ်ပိတ်မှုကို ခံထားရကြောင်း သိခဲ့ရသည်။ အဆုံးမဲ့ သင်္ကေတများသည် နတ်အလင်းဖြင့် တောက်ပနေ၏။ ၎င်းတို့သည် အလွန် လင်းလက်နေသည်။

ရီဖူရှင်း၏ခန္ဓာကိုယ်သည်လည်း နတ်အလင်းဖြင့် တောက်ပလာ၏။ အစိမ်းရောင်အလင်းက သူ့ကို လွှမ်းခြုံသွားပြီး သူ၏တိုက်ပွဲဝင်ပုံစံ ထွက်ပေါ်လာ၏။ သူသည် ဟင်းလင်းပြင်ကို ချိုးဖောက်ရန် နတ်ဘုရားအုပ်စိုးလက်နက်ကို ဝှေ့ယမ်းလိုက်၏။ အာကာပြင်ထဲတွင် ပေါက်ကွဲသံများ အဆက်မပြတ် ထွက်ပေါ်လာ၏။ သို့သော် သူ့အောက်တွင် ကောင်းကင်အင်ပါယာကျန်းက သူ၏စိတ်ကို အသုံးပြုလိုက်ရာ နတ်လှံပုဆိန်တစ်ချောင်း ထွက်ပေါ်လာ၏။ ၎င်းသည် တောက်ပသော နတ်အလင်း ဖြာထွက်နေ၏။ ထို့နောက် ၎င်း ထိုနေရာမှ ပျောက်ကွယ်သွား၏။ ၎င်းသည် နေရာအကွာအဝေးကို လျင်မြန်စွာ ဖြတ်သန်းသွား၍ သတ်ဖြတ်ရန် ပျံတက်သွားသည်။

ဝုန်း...

ကြောက်မက်ဖွယ် ဖောက်ထွင်းစွမ်းအားသည် အာကာပြင်ကို ကွဲအက်သွားစေသည်။ တောက်ပသော ရွှေရောင်နတ်လှံပုဆိန်သည် ကောင်းကင်ထဲတွင် ပြည့်နှက်နေသော နတ်ဘုရားအုပ်စိုးလက်နက်ပုံရိပ်များကို ထိခတ်သွား၏။ ၎င်းသည် နတ်ဘုရားအုပ်စိုးလက်နက်၏ တိုက်ခိုက်မှုကို တိုက်ရိုက် ထွင်းဖောက်သွားသည်။ နတ်ဘုရားအုပ်စိုးလက်နက်သည် စစ်မှန်သော နတ်လက်နက်တစ်ခု မဟုတ်ပေ။ ၎င်းသည် စည်းမျဉ်းမှ ဖြစ်‌ပေါ်လာခြင်းသော်လည်း လုံလောက်အောင် စွမ်းအားမကြီးသေးချေ။ ၎င်းသည် ကောင်းကင်အင်ပါယာကျန်း၏ နတ်စွမ်းအားနှင့် အဆင့်မတူသေးပေ။

ဒွန်ဟောင်တိယွမ်၊ တိဟောက်နှင့် အခြားစွမ်းအားကြီးကျင့်ကြံသူများသည် ယခင်က နတ်စွမ်းအားကို လေ့လာကျင့်ကြံခဲ့ကြသော်လည်း နတ်ဘုရားတစ်ပါး၏ နတ်စွမ်းအားနှင့် လုံးဝကွဲပြားပေသည်။ အကယ်၍ ဤနေရာတွင် ဒွန်ဟောင်တိယွမ် သို့မဟုတ် တိဟောက် ရှိနေလျှင်ပင် ရလဒ်သည် အတူတူသာ ဖြစ်ပေမည်။ ထိုနတ်စွမ်းအားကို ရပ်တန့်၍ မရပေ။

သူတို့၏ သူတို့နတ်စွမ်းအားကို အသုံးပြုမှုကို ဒွန်ဟောင်တိယွမ်နှင့် အခြားဆက်ခံသူများက လုံးဝ မယှဉ်နိုင်လောက်ပေ။ ဤအရာသည် အခြေအနေခြင်း ကွဲပြားမှုဖြစ်ပြီး မည်သို့မှ ပြင်ဆင်၍ မရပေ။

ရီဖူရှင်းသည် ထပ်မံ လွင့်ပျံထွက်သွား၏။ သူ သွေးအန်သွားပြီး သူ၏အရှိန်အဝါသည်လည်း အားနည်းလာသည်။ သို့သော် သူသည် ကောင်းကင်ထက်တွင် ရပ်နေဆဲဖြစ်သည်။

ထို့ကြောင့် ကောင်းကင်အင်ပါယာကျန်းတို့အုပ်စု အံ့အားသင့်သွား၏။ ရီဖူရှင်းသည် ဤမျှ သန်မာပေသည်။ သူတို့သည် သူတို့၏တိုက်ခိုက်မှုများက မည်မျှ ပြင်းထန်ကြောင်း သိ၏။ သူတို့၏လက်ရှိ နတ်စွမ်းအားကိုသုံး၍ တိုက်ခိုက်လိုက်သော တိုက်ခိုက်မှုတစ်ခုသည် တိုက်ခိုက်ခံရသူ၏ တိုက်ခိုက်စွမ်းရည်ကို ဆုံးရှုံးသွားစေမည်ဖြစ်ပြီး သူ့ခန္ဓာကိုယ်အတွင်းရှိ လမ်းစဉ်ကို ဖျက်ဆီးသွားမည်ဖြစ်သည်။

အဝေးမှ ကျင့်ကြံသူများစွာသည်လည်း ဤနေရာသို့ လှမ်းကြည့်နေကြသည်။ သူတို့တော်တော်များများသည် စီဝေ့ကြယ်ကောင်းကင်နှင့် မူလဘုံမှ ကျင့်ကြံသူများဖြစ်ကြသည်။ သူတို့သည် အစောက အစုလိုက်၊ အပြုံလိုက် သတ်ဖြတ်မှုတစ်ခုနှင့် တွေ့ကြုံခဲ့ရသည်။ ယခုတွင် သူတို့သည် ရီဖူရှင်းပင် ပြန်မတိုက်ခိုက်နိုင်ကြောင်း တွေ့လိုက်ရသဖြင့် စိတ်ဓာတ်ကျသွားကြသည်။

လာရောက် တိုက်ခိုက်ခဲ့သော ထိုကျင့်ကြံသူအနည်းငယ်သည် ဤမျှသန်မာသော အခြေအနေသို့ ရောက်နေပြီလော။ သူတို့သည် ကောင်းကင်နတ်ဘုရားများကဲ့သို့ပင်။

အခြားနယ်မြေများမှ ကျင့်ကြံသူများလည်း ခပ်သုတ်သုတ် ရောက်ရှိလာကြ၏။ သူတို့သည် ကောင်းကင်ထက်မှ မြင်ကွင်းကို မြင်လိုက်သောအခါ လွန်စွာ အံ့အားသင့်သွားကြသည်။ ကောင်းကင်ဒေသ၏ ရှေးဟောင်းနတ်ဘုရားကလန်ငါးခုသည် ရီဖူရှင်းကို လိုက်လံသတ်ဖြတ်ရန် ရောက်လာကြပေသည်။

တစ်ချိန်တုန်းက ရှေးဟောင်းနတ်ဘုရားကလန်ခြောက်ခု ဖြစ်ခဲ့၏။ သို့သော် ရီဖူရှင်းသည် ရှေးဟောင်းနတ်ဘုရားကလန်တစ်ခုကို ရှင်းထုတ်ပစ်ခဲ့သည်။ ထျန်းယန်မြို့ ပျက်သုဉ်းခဲ့ပြီး အရှင်ထျန်းယန် အသတ်ခံခဲ့ရသည်။ ထို့ကြောင့် ရှေးဟောင်းနတ်ဘုရားကလန်ငါးခုက လာရောက်တိုက်ခိုက်ခြင်းကို အံ့ဩစရာမရှိပေ။ သူတို့သည် သူတို့လည်း အရှင်ထျန်းယန်၏ ခြေရာအတိုင်း လိုက်ရမည်ကို စိုးရိမ်နေကြခြင်းပင်။ သူတို့သည် ရီဖူရှင်း မသေမချင်း စိတ်အေးနိုင်မည် မဟုတ်ပေ။

အောက်ဘက်တွင် လင်လုံ၊ ရှီးချီယောင်နှင့် အခြားသူများသည် ပျံတက်သွားရန် ကြိုးစားလိုက်ကြ၏။ သို့သော် သူတို့ တားဆီးခံလိုက်ရ၏။ သူတို့သည် တိုက်ခိုက်မှုများကို မကာရံနိုင်ခဲ့ပေ။ အခြားမဟာအင်ပါယာလေးပါးသည် နတ်စွမ်းအားကို အသုံးပြု၍ သူတို့လမ်းကို ပိတ်ဆို့ထားလေသည်။ သူတို့သည် ကွဲပြားသောနေရာများတွင် ရပ်နေကြပြီး ကောင်းကင်အင်ပါယာကျန်းကို ကြည့်လိုက်ကြသည်။ ကောင်းကင်အင်ပါယာကျန်းက ရီဖူရှင်းအား သတ်မည်ကို ကြည့်ရန် သူတို့ အဆင့်သင့်ဖြစ်နေပေပြီ။

သို့သော် ထိုတိုက်ခိုက်မှုက မလုံလောက်ခဲ့ပေ။ ရီဖူရှင်းသည် အတော်လေး ဇွဲကြီးပေသည်။ တစ်ချိန်က ရှေးဟောင်းနတ်ဘုရားကလန်များကို ခြိမ်းခြောက်နိုင်ခဲ့သူ ပီသပေ၏။ သို့သော် သူမည်မျှ သန်မာစေကာမူ ယခုတွင် သူသည် သူတို့အတွက် ပုရွက်ဆိတ်တစ်ကောင်သာဖြစ်သည်။ ယနေ့တွင် သူသေရပေမည်။

“ဇွဲကြီးတာပဲ...”

ကောင်းကင်အင်ပါယာကျန်းက ပြောလိုက်၏။ ရုတ်ခြည်းအတွင်း နတ်စွမ်းအားသည် ကျယ်ပြောသော လောကကို လွှမ်းခြုံသွားသည်။ အကန့်အသတ်မဲ့ ဟင်းလင်းပြင်ထဲတွင် လွန်စွာထက်ရှသောအရှိန်အဝါတစ်ခုဖြင့် ပြည့်နှက်သွား၏။ မရေမတွက်နိုင်အောင် များပြားသော နတ်လှံပုဆိန်များ ထွက်ပေါ်လာ၏။ လှံပုဆိန်တစ်လက်စီတိုင်းသည် နတ်စွမ်းအားမှ ဖြစ်ပေါ်လာခြင်းဖြစ်ပြီး ကောင်းကင်ကို ထွင်းဖောက်နိုင်သော နတ်အလင်းဖြင့် တောက်ပနေသည်။ ကောင်းကင်အင်ပါယာကျန်း၏အရှေ့ရှိ နတ်လှံပုဆိန်က ပို၍ပင် တောက်ပနေလေသည်။ ၎င်းသည် ရီဖူရှင်းထံသို့ နတ်အလင်းတန်း (၁၀,၀၀၀) ဖြာထုတ်လိုက်သည်။

‘အိုး...သွားပြီ’

စက်ကွင်းအပြင်မှ ကျင့်ကြံသူအားလုံးသည် ထိုမြင်ကွင်းကို မြင်လိုက်သောအခါ ထိုသို့ တွေးလိုက်ကြ၏။ သူတို့သည် ရီဖူရှင်း၏ ကျဆုံးခန်းကို ကြည့်နေရသလိုပင်။

ကောင်းကင်ထဲတွင် ရီဖူရှင်း၏ ဧရာမတိုက်ပွဲဝင်ပုံစံ ဖြစ်ပေါ်လာ၏။ သူသည် နတ်ဘုရားအုပ်စိုးလက်နက်၏ စွမ်းအားကို ထုတ်လိုက်၏။ တစ်ချိန်တည်းမှာပင် ကောင်းကင်ထဲ၌ မရေမတွက်နိုင်အောင် များပြားသော အာကာသနတ်အစီအရင်များ ထွက်ပေါ်လာလေသည်။ ဧရာမ အာကာသဘီးလုံးကြီးသည်လည်း တိုက်ခိုက်မှုအားလုံးကို ဝါးမျိုနိုင်ပုံပေါ်လေသည်။ သို့သော် နတ်လှံပုဆိန်အားလုံး၏ အလင်းများနှင့် ယှဉ်ကြည့်သောအခါ အားလုံးသည် မရဏအရှိန်အဝါကို ခံစားလိုက်ကြရသည်။

ထို ထူးကဲထက်မြက်သော ကျင့်ကြံသူသည် ဤတိုက်ပွဲတွင် ရှေးဟောင်းနတ်ဘုရားငါးပါး၏ လက်ချက်ဖြင့် သေတော့မည့်ပုံပင်။

“မဟုတ်ဘူး...”

အောက်ဘက်ကောင်းကင်တွင် အသံတိုးတိုးတစ်သံ ထွက်ပေါ်လာ၏။ ထိုအသံသည် လွန်စွာ တိုးညင်းပေသည်။ ထိုလူသည် အော်လိုက်ခြင်း မဟုတ်ပေ။ အသံထဲတွင် ကြေကွဲမှုဖြင့် ပြည့်နှက်နေသည်။ ထိုအသံသည် အမျိုးသမီးများ၏အသံပင်။ အောက်ဘက်ကောင်းကင်တွင် လှပသော မျက်နှာများစွာ ထွက်ပေါ်လာပြီး သူမတို့အားလုံးသည် စိတ်အားငယ်စွာ မော့ကြည့်လိုက်ကြသည်။ သူမတို့သည် တိုက်ပွဲအတွင်း၌ ဝင်ပါရန်ပင် အရည်အချင်းမမီပေ။

ရုတ်တရက် မိုးစတင်ရွာသွန်းလာသည်။ မိုးစက်များသည် အဆုံးမဲ့၏။ ကောင်းကင်က ငိုကြွေးနေသကဲ့သို့ပင်။ တစ်ချိန်တည်းမှာပင် နတ်ဓားတစ်ချောင်းသည် လေထုကို ဖြတ်သန်းသွားပြီး ကောင်းကင်ထက်သို့ သတ်ဖြတ်ရန် ပျံတက်သွားသည်။ ၎င်းသည် နတ်စွမ်းအားအကာအရံနှင့် ထိခတ်သွားကာ အကာအရံကို ထွင်းဖောက်လိုက်သည်။

သို့သော် တစ်ချိန်တည်းမှာပင် ကောင်းကင်ထဲရှိ နတ်လှံပုဆိန်အားလုံးသည်လည်း ထွင်းဖောက်သွားပြီး ကောင်းကင်ထဲတွင် မရေမတွက်နိုင်အောင် များပြားသော နတ်အလင်းတန်းများ ပြည့်နှက်သွားစေ၏။ ရွှေရောင်အလင်းတန်းများသည် ကောင်းကင်ထဲတွင် မိုးကုပ်စက်ဝိုင်းကဲ့သို့ အကွေးပုံစံများ ထွက်ပေါ်လာစေ၏။ မိုးကောင်းကင်သည်ပင် ထိုးဖောက်ခံခဲ့ရပေသည်။

ရီဖူရှင်းသည် ထိုတိုက်ခိုက်မှု၏ အလယ်ဗဟိုတွင် ရှိနေ၏။ မျက်လုံးပေါင်းများစွာသည် သူ့ကို စိုက်ကြည့်နေကြပြီး ထိုအဖျက်တိုက်ခိုက်မှုကို ကြည့်ရှုနေကြလေသည်။