သမိုင်းတွင်မည့် မြင်ကွင်းတစ်ခု

အရှင်ဟောင်ထျန်း မဟာအင်ပါယာဖြစ်လာကတည်းက ထိုသတင်းသည် နတ်ဘုရားကုန်းမြေတစ်ခွင်တွင် ပျံ့နှံ့နေခဲ့ပြီဖြစ်သည်။ ရီအင်ပါယာနန်းတော်အပြင်မှ ကျင့်ကြံသူများစွာသည် ယာယီ ပုန်းရှောင်ရန်အတွက် ထွက်သွားကြပြီဖြစ်သည်။ သူတို့သည် အတိတ်က ရှေးဟောင်းနတ်ဘုရားကလန်မဟာမိတ်များ လာရောက်တိုက်ခိုက်ခဲ့စဉ်ကကဲ့သို့ ဘေးဒုက္ခမျိုးကို ခံရမည်ကို စိုးရိမ်ခဲ့ကြသည်။

သို့သော် စွမ်းအားကြီးကျင့်ကြံသူများစွာ ကျန်ခဲ့လေသည်။ သူတို့သည် ရီအင်ပါယာနန်းတော်အပေါ်တွင် နက်ရှိုင်းစွာ ယုံကြည်ကြပြီး သေရေး၊ ရှင်ရေး အခြေအနေတစ်ခုနှင့် ရင်ဆိုင်နေရသော်လည်း ကျန်နေခဲ့ရန်သာ ရွေးချယ်ခဲ့ကြ၏။

ယခုတွင် လူပေါင်းများစွာသည် ကောင်းကင်သို့ မော့ကြည့်လိုက်ကြသည်။ တလက်လက် တောက်ပနေသော ရွှေရောင်နတ်အလင်းတန်းတစ်ခုသည် ရီအင်ပါယာနန်းတော်ကို ဗဟိုပြု၍ ကျယ်ပြော၍ အကန့်အသတ်မဲ့သော နယ်မြေပေါ်သို့ အလင်းဖြာချလိုက်သည်။ ဧရာမ ရွှေရောင်အခေါင်းကြီးများသည် လေထဲတွင် ဝဲနေ၏။ ၎င်းတို့သည် ရီအင်ပါယာနန်းတော်မှ ကျင့်ကြံသူများ၏ အလောင်းများကို လာရောက်သိမ်းဆည်းသကဲ့သို့ပင်။

အရှင်ဟောင်ထျန်းသည် ပြန်ရှင်သန်လာခဲ့ပြီး အင်ပါယာအဆင့်သို့ တက်လှမ်းနိုင်ခဲ့ပြီဖြစ်သည်။ သူသည် သူပြန်ရောက်လာမှုကို ကြေညာရန် လက်ရှိလောကထဲရှိ အကျော်ကြားဆုံးလူတစ်ယောက်ဖြစ်သော ရီဖူရှင်းကို အရင်ဆုံး စတေးပစ်မည်ဖြစ်သည်။

ရီအင်ပါယာနန်းတော်မှ ကျင့်ကြံသူအားလုံးသည် အပြင်သို့ ထွက်လာကြပြီး ရီအင်ပါယာနန်းတော်အထက်သို့ ပျံတက်ကာ ကောင်းကင်သို့ ကြည့်လိုက်ကြသည်။

ဝုန်း...

ကျယ်လောင်သော အသံတစ်သံ ထွက်ပေါ်လာပြီး ကောင်းကင်နှင့် မြေကြီး တုန်ခါသွားသည်။ ကောင်းကင်ထက်တွင် အပေါက်တစ်ပေါက် ထွက်ပေါ်လာပြီး ကျယ်ပြောသော ရွှေရောင်လမ်းကြောင်းတစ်ခု ပွင့်သွားသည်။ ရွှေရောင်လမ်းကြောင်း၏ တစ်ဘက်အစွန်းတွင် စွမ်းအားကြီးပုဂ္ဂိုလ်တစ်စု ရှိနေ၏။ သူတို့သည် အားကောင်းသော သတ်ဖြတ်လိုသည့်အငွေ့အသက်များနှင့် အောက်ဘက် ကောင်းကင်သို့ ငုံ့ကြည့်လိုက်ကြသည်။

ထိုလူများသည် အမှန်ပင် ဟောင်ထျန်းကလန်မှ စွမ်းအားကြီးပုဂ္ဂိုလ်များ ဖြစ်ပေသည်။ သူတို့ကလန်၏ အရှင်ဟောင်ထျန်းသည် အင်ပါယာအဆင့်သို့ ရောက်သွားပြီဖြစ်၍ သူတို့သည် ယခုတွင် ဂုဏ်ရှိန်တိုးတက်လာခဲ့ပြီဖြစ်သည်။

ယခုတွင် ဟောင်ထျန်းကလန်သည် အင်ပါယာအဆင့် အင်အားစုတစ်စု ဖြစ်လာပေပြီ။ မကြာခင်တွင် သူတို့ကလန်သည် လောကအတွင်းရှိ ထိပ်တန်းအင်အားစုများထဲမှ တစ်ခုဖြစ်လာကာ ဂုဏ်ရှိန်ပြောင်လာမည်ဖြစ်သည်။

သူတို့ နှစ်ပေါင်းများစွာ မျှော်လင့်ခဲ့ရသော မျှော်လင့်ချက်သည် နောက်ဆုံးတွင် အမှန်ဖြစ်လာခဲ့ပေပြီ။

ကောင်းကင်မှနေ၍ ပိုတောက်ပသော နတ်အလင်း ကျဆင်းလာသည်။ ကောင်းကင်လမ်းကြောင်းအလယ်တွင် ပြိုင်ဘက်ကင်းပုဂ္ဂိုလ်တစ်ဦး ထွက်ပေါ်လာ၏။ သူသည် အခြားလောကတစ်ခုတွင် ရှိနေသည်ဟု ထင်ရ၏။ သို့သော် အောက်ဘက်ကောင်းကင်မှ ကျင့်ကြံသူများသည် သူ့ကို ရှင်းရှင်းလင်းလင်း မြင်ရပေသည်။

သူသည် မဟာအင်ပါယာတစ်ပါးပင်။ အရှင်ဟောင်ထျန်း ပြန်လာခဲ့ပေပြီ။

သူသည် မဟာအင်ပါယာတစ်ပါးအဖြစ် ပြန်လာခြင်းဖြစ်၍ သူ၏ဟန်ပန်အရှိန်အဝါတို့သည် များစွာ ပြောင်းလဲသွားပြီဖြစ်သည်။ သူသည် အလွန်အရှိန်အဝါကြီးမားနေပြီး အောက်ဘက်သို့ ငုံ့ကြည့်သည်။ သူသည် ထိုနေရာတွင် ရပ်နေရုံဖြင့်ပင် ကောင်းကင်များကို ကိုယ်စားပြုသကဲ့သို့ ဖြစ်နေသည်။ သက်ရှိအားလုံးသည် သူ့အောက်တွင်သာ ရှိသည်။

ရီအင်ပါယာနန်းတော်မှ ကျင့်ကြံသူများနှင့် ပတ်ဝန်းကျင်မှ ကျင့်ကြံသူများသည် သူတို့အရှေ့ရှိ မြင်ကွင်းကို မြင်လိုက်ရသောအခါ မျှော်လင့်ချက် ကင်းမဲ့သွားကြသည်။ မဟာအင်ပါယာ၏အရှိန်အဝါသည် သူတို့ကို စွမ်းအားမဲ့သကဲ့သို့ ခံစားနေရစေသည်။ အတိတ်တွင် မဟာအင်ပါယာဖြစ်လာမည့်သူများသည်ပင် ပြိုင်ဘက်ကင်းဖြစ်ခဲ့ပြီး မည်သူမှ သူတို့ကို မတားဆီးနိုင်ခဲ့ပေ။

ပြီးပြည့်စုံသွားသော မဟာအင်ပါယာတစ်ပါးဆိုလျှင်မူ ဆိုဖွယ်ပင်မရှိပေ။

မဟာအင်ပါယာအားလုံးသည် ပြိုင်ဘက်ကင်းပေသည်။ ရှေးနတ်ဘုရားခေတ်တွင် မဟာအင်ပါယာများ များစွာ ရှိခဲ့သော်လည်း ထိုမဟာအင်ပါယာဖြစ်လာသူများသည် လူပေါင်းများစွာ၏ အထွတ်အထိပ်သို့ ရောက်နိုင်ခဲ့သူများသာဖြစ်သည်။ သူတို့သည် လမ်းစဉ်ကို ပြောင်းလဲခဲ့ပြီး လောကအတွင်းရှိ ကောင်းကင်လမ်းစဉ်၏ ဒြပ်ထည်ရှိသောကိုယ်ပွားများ ဖြစ်လာခဲ့သည်။

ထို့နောက်တွင် သူတို့သည် ရွှေရောင်ရောင်အခေါင်းများ တုန်ခါသွားပြီး ကောင်းကင်ထက်မှနေ၍ ရီအင်ပါယာနန်းတော်ဆီသို့ တည့်တည့်မတ်မတ် ကျဆင်းလာသည်ကို တွေ့လိုက်ကြရသည်။

ထိုရွှေရောင်အခေါင်းများသည် ရပ်တန့်၍ မရနိုင်ဘဲ ပြိုင်ဘက်ကင်း စွမ်းအားတစ်ခုကို သယ်ဆောင်ထားသည်ဟု ထင်ရ၏။

ထို့နောက် တစ်ချိန်တည်းမှာပင် ပုဂ္ဂိုလ်အချို့သည် ကောင်းကင်ကို ထိုးဖောက်သွား၏။ ဓားဧကရာဇ်အရှင်နှင့် သူ၏ဓားသည် မဟာစွမ်းအားဖြင့် ပြည့်နှက်သွားသည်။ သူသည် ကောင်းကင်ကို ထိုးဖောက်သွားပြီး ရွှေရောင်အခေါင်းတစ်ခုကို ထိုးစိုက်လိုက်၏။

အခြားတစ်နေရာတွင်လည်း မျက်မမြင်ထျယ်သည် သူ့လက်ထဲရှိ ကောင်းကင်တုန်ဟည်းနတ်တူကို မမြှောက်လိုက်ပြီး ရွှေရောင်အခေါင်းတစ်ခုကို ရိုက်ချလိုက်ပြီး သစ်သားများကို ကျိုးကြေသွားစေသည်။

ဂူတုံးလျှိုသည် လက်တစ်ဘက် ဆန့်တန်းလိုက်၏။ ထိုအခါ ဒီမွန်းနတ်ဘုရားများစွာ တစ်ပြိုင်တည်း ဟိန်းဟောက်လိုက်သကဲ့သို့ အသံများ ထွက်ပေါ်လာ၏။ ကြောက်မက်ဖွယ် နတ်စွမ်းအား စတင် ထိုးတက်သွားပြီး အခေါင်းတစ်ခုကို ဖျက်ဆီးပစ်လိုက်လေသည်။

လင်လုံသည် ပို၍ တိုက်ရိုက်ဆန်သည်။ သူမသည် ကောင်းကင်ထက်သို့ တိုက်ရိုက်ပျံတက်သွားပြီး အခေါင်းတစ်ခုကို လက်သီးတစ်ချက်ဖြင့် ဖျက်ဆီးပစ်လိုက်သည်။

ထို့နောက် ရုတ်ခြည်းပင် ကျဆင်းလာသော ရွှေရောင်အခေါင်းများအားလုံးသည် ရီအင်ပါယာနန်းတော်မှ လူများ၏ ဖျက်ဆီးခြင်းကို ခံလိုက်ရလေသည်။ ပတ်ဝန်းကျင်မှ စွမ်းအားကြီးကျင့်ကြံသူများအားလုံး ရင်တုန်သွားကြသည်။ လက်ရှိတွင် ရီအင်ပါယာနန်းတော်သည် အလွန် စွမ်းအားကြီးနေသည်။

ထို့အပြင် သူတို့ထဲမှ စွမ်းအားအကြီးဆုံးသူများဖြစ်သော ရီဖူရှင်းနှင့် အနောက်အင်ပါယာတို့သည် ယခုအထိ မလှုပ်ရှားကြသေးပေ။

သို့သော် ထို့ကြောင့်လည်း လူများစွာသည် ပို၍ စိတ်ဓာတ်ကျနေခြင်းဖြစ်သည်။ အနာဂတ်တွင် ဤကဲ့သို့ အင်အားကြီးသော ရီအင်ပါယာနန်းတော်သည် မည်မျှအထိ အင်အားကြီးလာမည်ကို သူတို့ တွေးပင်မကြည့်နိုင်ပေ။

သို့သော် မဟာအင်ပါယာသည် ရီအင်ပါယာနန်းတော်ကို ဖျက်ဆီးလိုနေပြီး ၎င်းကို အထွတ်အထိပ်အထိ ရောက်စေတော့မည် မဟုတ်ပေ။

အခေါင်းများ ပျက်စီးသွား၏။ သို့သော် ကောင်းကင်ထက်ရှိ ဟောင်ထျန်းကလန်မှ စွမ်းအားကြီး ကျင့်ကြံသူများသည် အောက်ဘက်သို့ ငုံ့ကြည့်နေဆဲဖြစ်သည်။ အဆုံးမဲ့ နတ်အလင်းဖြာကျနေပြီး မဟာအရှိန်အဝါတစ်ခု ကျဆင်းလာ၏။ ထို့နောက် ကြောက်မက်ဖွယ် ပေါက်ကွဲသံများ ထွက်ပေါ်လာကာ ကောင်းကင်ထဲတွင် ဟောင်ထျန်းနတ်ချိပ်စည်း ထွက်ပေါ်လာ၏။ ၎င်းသည် ကောင်းကင်တစ်ခွင်လုံးနှင့် နေလုံးကို ကာရံသွားပြီး နတ်ဘုရားကုန်းမြေ‌ပေါ်သို့ ကျဆင်းလာလေသည်။

ကောင်းကင်ထက်တွင် ဧရာမအပေါက်ကြီးတစ်ပေါက် ပွင့်လာပြီး နတ်ချိပ်စည်းလည်း ကျဆင်းလာသည်။ ကျယ်ပြောသော ကုန်းမြေမှ ကျင့်ကြံသူများသည် အထက်သို့ မော့ကြည့်လိုက်သော်လည်း နတ်ချိပ်စည်းကိုသာ မြင်နိုင်ပေသည်။ ၎င်းသည် လွန်စွာကြောက်မက်ဖွယ်ကောင်းသော အဖျက်နတ်အလင်းနှင့် ကျဆင်းလာပြီး သက်ရှိအားလုံးကို ဖျက်ဆီးပစ်လိုနေသည်ဟုပင် ထင်ရသည်။

လူပေါင်းများစွာ၏ ခန္ဓာကိုယ်များ တုန်ခါသွားကြသည်။ အချို့သည် ထိုနေရာမှနေ၍ အသည်းအသန် ထွက်ပြေးရန် ကြိုးစားလိုက်သည်။ သို့သော် နတ်ချိပ်စည်းသည် ကောင်းကင်တစ်ခွင်လုံးကို လွှမ်းခြုံထားပေသည်။ ပြေးစရာမြေမရှိပေ။ သူတို့သည် သေခြင်းတရားကို မျှော်လင့်ချက်ကင်းမဲ့စွာ စောင့်နေရုံသာ ရှိတော့သကဲ့သို့ ဖြစ်နေသည်။

၎င်းသည် ဟောင်ထျန်းနတ်ချိပ်စည်း အစစ်အမှန်ဖြစ်၏။ ၎င်းသည် တစ်ချက်တည်းဖြင့် ကောင်းကင်တစ်ခွင်လုံးကို လွှမ်းခြုံသွားပြီး ရပ်တန့်၍ မရတော့ပေ။ သက်ရှိအားလုံးသည် ဟောင်ထျန်းနတ်ချိပ်စည်းအောက်တွင် သေဆုံးရပေတော့မည်။

ရုတ်တရက် ထိုနေရာတွင် မိုးစတင်ရွာလာသည်။ လူတစ်ယောက်သည် ကျဆင်းလာသည့် အရှိန်အဝါများကို ဆန့်ကျင်၍ ကောင်းကင်ကို လွှမ်းခြုံသွားသော ဟောင်ထျန်းနတ်ချိပ်စည်းဆီသို့ ပျံတက်သွားလိုက်သည်။ အနောက်အင်ပါယာ တိုက်ခိုက်လိုက်ခြင်းပင်။ သူသည် မိုးစက်နတ်ဓားနှင့် ထိုးချလိုက်၏။ ဓားချက်သည် ဧရာမနတ်ချိပ်စည်းကို တိုက်ရိုက်ထိုးမိသွားသည်။ မရေမတွက်နိုင်အောင် များပြားသော မိုးစက်များသည် နတ်ချိပ်စည်းကြီးကို ထိုးစိုက်သွားကြ၏။ ၎င်းချိပ်စည်းပေါ်တွင် အရာများ ထွက်ပေါ်လာ၏။ သို့သော် နတ်ချိပ်စည်းပေါ်တွင် နတ်အလင်းတောက်ပနေဆဲပင်။ ၎င်းသည် ထိုးဖောက်၍ မရနိုင်ပေ။ တစ်ချိန်တည်းမှာပင် အနောက်အင်ပါယာအပေါ်သို့ မဟာနတ်အရှိန်အဝါ ကျဆင်းလာပြီး သူ့ကို ဖိချလိုက်သည်။ သူသည် အလင်းတန်းတစ်ခုအဖြစ် ပြောင်း၍ ရီအင်ပါယာနန်းတော်ဆီသို့ ပြန်လာလိုက်သည်။

ဝုန်း...

ကြောက်မက်ဖွယ် တုန်ခါမှုများ ဆက်လက်ဖြစ်ပေါ်နေသည်။ တောက်ပသောအလင်း ဖြာကျလာပြီး လူများစွာသည် မြေပေါ်တွင် ပြားပြားဝပ်သွားကြသည်။ ကျင့်ကြံခြင်းအဆင့်မမြင့်သော လူအချို့သည် ခပ်အုပ်အုပ်ပင် ညည်းတွားလိုက်ကြသည်။ သူတို့၏ခန္ဓာကိုယ်များသည် ဖိနှိပ်ခံရကာ ကျိုးကြေသွားတော့မည်ဟု ခံစားနေရလေသည်။ ထိုနတ်ချိပ်စည်းထဲတွင် ဟောင်ထျန်းနတ်စွမ်းအား ပါဝင်ပေသည်။

လက်ရှိတွင် ကောင်းကင်တစ်ခွင်လုံး ဖိနှိပ်ကျဆင်းလာသကဲ့သို့ပင်။ ကျဆင်းလာသော အရှိန်အဝါသည် မည်မျှ ‌ကြောက်မက်ဖွယ်ကောင်းမည်ကို တွေးကြည့်နိုင်ပေသည်။

အကယ်၍ ထိုချိပ်စည်းသာ အောက်သို့ ရောက်လာလျှင် အားလုံးသည် သေဆုံးကာ အမှုန့်ဖြစ်သွားမည်ဖြစ်သည်။

မဟာအင်ပါယာတစ်ပါးသည် အတွေးတစ်ချက်ဖြင့်ပင် မရေမတွက်နိုင်သော အသက်ရှိများကို သတ်ပစ်နိုင်စွမ်းရှိပေသည်။ ထိုစကားသည် ပိုပြောခြင်းမဟုတ်ပေ။

“အဲဒါက တကယ် အမှန်ပဲလား”

လူများစွာသည် စိတ်အားငယ်သွားကြသည်။ သူတို့သည် ကျဆင်းလာသည့် ဟောင်ထျန်းနတ်ချိပ်စည်းကို ကြည့်နေကြ၏။ ၎င်းသည် သူတို့ ခေါင်းအထက်သို့ပင် ရောက်နေပြီး သူတို့အပေါ် ကျလာတော့မည်ဟု ထင်ရသည်။

လူအချို့သည် မျက်လုံးများပင် မှိတ်လိုက်ကြပြီး ထိုအမှန်တရားကို လက်ခံလိုက်ကြသည်။ ဆိုးဝါးသော မုန်တိုင်းတစ်ခုသည် သူတို့ကို ရိုက်ခတ်သွားပြီး သူတို့၏ခန္ဓာကိုယ်များပေါ်သို့ အရှိန်အဝါ ကျဆင်းလာလေသည်။ သူတို့သည် သေခြင်းတရားကို မြင်လိုက်ရပေပြီ။

ထိုစဉ် ရီအင်ပါယာနန်းတော်ဘက်၌ အလင်းတန်းတစ်ခု ထွက်ပေါ်လာ၏။ အလင်းသည် အထက်သို့ ဆက်တက်သွား၏။ ရီအင်ပါယာနန်းတော်မှ ကျင့်ကြံသူအားလုံးသည် အလင်းကို လိုက်ကြည့်လိုက်ကြသည်။

ဝုန်း...

ကြောက်မက်ဖွယ် ဆူညံသံတစ်သံ ထွက်ပေါ်လာပြီး လောကကြီး ပြိုပျက်သွားသကဲ့သို့ ကောင်းကင်သည် အပြင်းအထန် တုန်ခါသွားသည်။

စွမ်းအားကြီးကျင့်ကြံသူများသည် အပြင်းအထန် ရင်ခုန်နေကြသည်။ ကြောက်မက်ဖွယ် ဟောင်ထျန်းနတ်ချိပ်စည်းသည် အမှန်ပင် ရပ်တန့်သွားပေပြီ။ နတ်ချိပ်စည်းအောက်တွင် သေးငယ်သောလူတစ်ဦး ထွက်ပေါ်လာ၏။ သို့သော် ကောင်းကင်ကို တွန်း၍ နတ်ချိပ်စည်းကို ရပ်တန့်ခဲ့သူမှာ ထိုသေးငယ်သောလူပင်ဖြစ်သည်။

မရေမတွက်နိုင်အောင် များပြားသော အလင်းတန်းများ ဖြာထွက်လာပြီး ဧရာမဟောင်ထျန်းနတ်ချိပ်စည်းသည် အလယ်မှစ၍ အက်ကြောင်းများ ထွက်ပေါ်လာလေသည်။ ၎င်းသည် အစိတ်စိတ်အမွှာမွှာ ကွဲအက်သွားပြီး ကျယ်လောင်သော ပေါက်ကွဲသံများနှင့်အတူ အလင်းတန်း အများအပြား ထွက်ပေါ်လာ၏။ ဟောင်ထျန်းနတ်ချိပ်စည်းသည် လုံးဝ ပျက်စီးသွားပေပြီ။

လူပေါင်းများစွာသည် ကောင်းကင်ထက်ရှိ ငွေဖြူရောင်ဆံပင်နှင့်လူကို ကြည့်လိုက်ကြသည်။ သူတို့သည် အလွန် ရင်ခုန်မြန်နေကြလေသည်။

“ဘာဖြစ်သွားတာလဲ”

လူများစွာသည် စိတ်အားငယ်စွာဖြင့် မျက်စိများ ပိတ်ထားမိခဲ့ကြသည်။ ယခုတွင် မုန်တိုင်း ပျောက်ကွယ်သွားပြီး ကောင်းကင်အရှိန်အဝါလည်း အမှန်ပင် ပျောက်ကွယ်သွားပေပြီ။ သူတို့သည် ကောင်းကင်ထိပ်တွင် ရပ်နေသော လူတစ်ယောက်ကို တွေ့လိုက်၏။ သူသည် မကြီးမားသော်လည်း ကောင်းကင်နတ်ဘုရားတစ်ပါးကဲ့သို့ ရီအင်ပါယာနန်းတော်အထက်တွင် ကောင်းကင်ကို တားဆီးထားပေသည်။

သူသည် ကောင်းကင်ထက်သို့ ကြည့်လိုက်၏။ သူ၏အကြည့်သည် လေထုကို ဖောက်ထွင်းသွားပြီး ဤအာကာပြင်အပြင်ရှိ အရှင်ဟောင်ထျန်းကို တိုက်ရိုက် ငေးကြည့်သည်။

ထိုမြင်ကွင်းသည် နှစ်ပေါင်းများစွာကြာလျှင်ပင် လူများစွာ၏ စိတ်များထဲတွင် စွဲထင်နေဦးမည်သာ။ ဤမြင်ကွင်းသည် မေ့မရနိုင်သော မြင်ကွင်းတစ်ခုပင်။

***