ဟောင်ထျန်း၏ တိုက်ခိုက်စွမ်းရည်

အရှင်ဟောင်ထျန်း၏ မျက်နှာသည် အောက်ဘက်ကောင်းကင်ရှိ ရီဖူရှင်းကို စိုက်ကြည့်နေသည်။ သူ၏ ကြီးမားသော မျက်နှာကြီးသည် ကောင်းကင်နှင့် တစ်သားတည်းဖြစ်နေသည်။ ၎င်းသည် မဟာအင်ပါယာစီဝေ့ ကြယ်တာရာကောင်းကင်အဖြစ် ပြောင်းလဲသွားပုံနှင့် ဆင်တူပေသည်။

ယခုတွင် သူသည် ကျယ်ပြောသော ကောင်းကင်အဖြစ် ပြောင်းလဲသွားပြီဖြစ်ပြီး မဟာလမ်းစဉ် နတ်စက်ကွင်းတစ်ခုကို ဖန်တီးထားလေသည်။ ဤကောင်းကင်သည် သူ၏ စကြဝဠာလောကဖြစ်သွားပေပြီ။

သို့သော် ယခုတွင် သူ့မျက်နှာ၌ အေးစက်သော သတ်ဖြတ်လိုသည့်အငွေ့အသက် ရှိနေလေသည်။ ရီဖူရှင်းသည် အင်ပါယာဖြစ်လာနိုင်မည့်အဆင့်တွင်သာ ရှိသေးသော်လည်း သူ၏တိုက်ခိုက်မှုကို အမှန်ပင် တားဆီးနိုင်ခဲ့သည်။ အရှင်ဟောင်ထျန်းသည် အောက်ဘက်သို့ တိုက်ခိုက်မှုများ ပစ်လွှတ်လိုက်သော်လည်း ရီဖူရှင်းကို ထိခိုက်အောင် မလုပ်နိုင်သေးပေ။ ထို့ကြောင့် ရီဖူရှင်းသည် မည်မျှ ကြောက်မက်ဖွယ်ကောင်းကြောင်း သိနိုင်ပေသည်။

အကယ်၍ ရီဖူရှင်းသာ မဟာအင်ပါယာတစ်ပါး ဖြစ်လာလျှင် သူ မည်သို့ ဆက်ရှင်သန်နိုင်ပါမည်နည်း။

ထိုသို့ဖြစ်လာလျှင် သေခြင်းတရားကသာ စောင့်ကြိုနေမည်ဖြစ်သည်။

ရှေးနတ်ဘုရားခေတ်တွင် မဟာအင်ပါယာများကြား၌ ကွဲပြားမှုများ ရှိခဲ့သည်။ ထိုကွဲပြားမှုသည် အဆင့်တူ ကျင့်ကြံသူများအကြားမှ ကွဲပြားမှုကဲ့သို့ ဖြစ်သည်။

အချို့လူများသည် ထူးကဲရန် ကံကြမ္မာပါလာခဲ့သူများပင်။

ရီဖူရှင်း၏ခန္ဓာကိုယ်ပေါ်သို့ ပို၍ ကြောက်မက်ဖွယ်ကောင်းသော အရှိန်အဝါတစ်ခု ကျဆင်းလာသည်။ ၎င်းသည် သူ၏ မဟာလမ်းစဉ် နတ်စက်ကွင်းပင်။ ဟောင်ထျန်းနတ်စွမ်းအားသည် နေရာအနှံ့တွင် ရှိနေသည်။

များစွာသော အကန့်အသတ်မဲ့ ရွှေရောင်ကျောက်တိုင်ကြီးများသည် ကောင်းကင်ထက်တွင် ထွက်ပေါ်လာ၏။ ကျောက်တိုင်တစ်တိုင်ချင်းစီတွင် လှပသော နတ်သင်္ကေတများ ထွင်းထားပြီး ၎င်းတို့သည် တောက်ပနေသည်။

ကြောက်မက်ဖွယ် နတ်စွမ်းအား ထွက်ပေါ်လာပြီး ကောင်းကင်ထဲသို့ မွန်းကျပ်ဖွယ်ဖိအားတစ်ခု စိမ့်ဝင်ပျံ့နှံ့သွားသည်။

ထိုစဉ်တွင် ရီဖူရှင်းသည် အကန့်အသတ်မဲ့သော လေးလံမှုကို ခံစားလိုက်ရ၏။ ထိုတိုက်ခိုက်မှုသည် အစောက ကျဆင်းလာခဲ့သော နတ်အလင်းထက်ပင် ပို၍ ကြောက်မက်ဖွယ် ကောင်းပေသည်။

သေစမ်း...

အရှင်ဟောင်ထျန်း တွေးလိုက်သည်။ ထို့နောက် ရုတ်ခြည်းပင် ကျောက်တိုင်များသည် ရီဖူရှင်းထံသို့ တိုက်ရိုက် အပြင်းအထန် ကျဆင်းသွားလေတော့သည်။ ၎င်းတို့သည် ကြားမှ အကွာအဝေးကို တမဟုတ်ခြင်း ဖြတ်သန်းကာ ရုတ်ခြည်းအတွင်း ရောက်ရှိသွား၏။ အရှင်ဟောင်ထျန်းသည် သူ၏ မဟာလမ်းစဉ် နတ်စက်ကွင်းထဲတွင် အရှင်သခင်ဖြစ်သည်။ စွမ်းအင်အားလုံးသည် သူ၏ထိန်းချုပ်မှုအောက်တွင် ရှိနေသည်။ ဤနေရာသို့ ရောက်လာသော ကျင့်ကြံသူအားလုံး၏ အသက်များသည်လည်း သူ၏ထိန်းချုပ်မှုအောက်တွင်သာ ရှိနေမည်ဖြစ်သည်။

ထိုကြောက်မက်ဖွယ် ဖိအား ကျဆင်းလာသည်။ ရီဖူရှင်း၏ ခန္ဓာကိုယ်သည် ရုတ်တရက် ကြီးထွားလာပြီး ဧရာမကောင်းကင်နတ်ဘုရားတစ်ပါးအဖြစ် ပြောင်းလဲသွား၏။ သူ့ခန္ဓာကိုယ် ပတ်ပတ်လည်တွင် နတ်အလင်း စီးဆင်းနေလေသည်။ သူသည် ခေါင်းမော့၍ အထက်ကောင်းကင်သို့ ကြည့်လိုက်၏။ နေနှင့်လ၏ နတ်အလင်းများ စီးဆင်းလာပြီး နေနှင့်လ နတ်စွမ်းအား ထွက်ပေါ်လာ၏။ ၎င်းသည် တိုက်ခိုက်မှုကို ခေတ္တမျှ တားဆီးနိုင်လိုက်သော်လည်း ကျောက်တိုင်များကို ဆက်၍ မကျဆင်းစေရန် မတားဆီးနိုင်လိုက်ပေ။ ထို ကြောက်မက်ဖွယ် နတ်စွမ်းအားသည် ဤနေရာရှိ လောကလမ်းစဉ်ကို ကိုယ်စားပြုပေသည်။

ရုတ်တရက် ရီဖူရှင်း၏ နတ်ဘုရားကဲ့သို့ ခန္ဓာကိုယ်တွင် မရေမတွက်နိုင်အောင် များပြားသော လက်များ ထွက်ပေါ်လာ၏။ သူက လက်တစ်ထောင်ဗုဒ္ဓအဖြစ် ပြောင်းလဲသွားသည့်ပုံပင်။ လက်ပေါင်းများစွာသည် တစ်ချိန်တည်း မြောက်လာကြသည်။ ထိုအခိုက်တွင် သူ့ခန္ဓာကိုယ်အတွင်းရှိ နတ်စွမ်းအားသည် ခက်ထန်စွာ ဟိန်းလိုက်ပြီး လက်များအတွင်းသို့ ဝင်ရောက်သွားသည်။

သူသည် သူ၏ကိုယ်ပိုင် ကောင်းကင်လမ်းစဉ်အသေးစားကို ကျင့်ကြံခဲ့သည်။ သူ၏စွမ်းအားသည် အပြင်လောကမှ လာခြင်းမဟုတ်ဘဲ သူ့ကိုယ်တွင်းရှိ လောကမှ လာခြင်းဖြစ်သည်။

ရီဖူရှင်းသည် ရှေ့သို့ မျက်နှာမူလိုက်ပြီး သူ၏လက်နှစ်ဘက်ကို ကောင်းကင်သို့ မြှောက်လိုက်သည်။ ရုတ်ခြည်းပင် သိန်းချီသော လက်များသည် တူညီသော လှုပ်ရှားမှုကို လုပ်လိုက်ကြ၏။ သူတို့သည် ကောင်းကင်ကို ရိုက်လိုက်ကြသည်။ မရေမတွက်နိုင်သော လက်များသည် တစ်ချိန်တည်းမှာပင် ကြောက်မက်ဖွယ် နတ်ချိပ်စည်းတစ်ခုကို တွန်းထုတ်လိုက်သည်။ ၎င်းတို့သည် ထောင်ချီသော ဗုဒ္ဓများ တစ်ပြိုင်တည်း ထွက်ပေါ်လာသည်ဟု ထင်ရ၏။

ဝုန်း...

မြေကြီးကိုပင် တုန်ခါသွားစေသည့် အသံကြီးတစ်သံ ထွက်ပေါ်လာ၏။ ဟောင်ထျန်းနတ်စွမ်းအား ပါဝင်သော ကျောက်တိုင်များ ကျဆင်းလာပြီး လက်များက တွန်းတင်လိုက်သော နတ်ချိပ်စည်းနှင့် တိုက်မိသွားသည်။ ထိုထိတိုက်မှုမှနေ၍ အလွန်ကြောက်မက်ဖွယ်ကောင်းသော တုန်ခါသံတစ်ခု ထွက်ပေါ်လာ၏။ ကောင်းကင်ပင် ကွဲအက်လာတော့မည်ဟု ထင်ရသည်။

ရီဖူရှင်း၏ နတ်ချိပ်စည်းအတွင်း၌ ပါဝင်သော နတ်စွမ်းအားသည် လောကနတ်စွမ်းအားဖြစ်သည်။ ၎င်းကို ထာဝရဗုဒ္ဓကောင်းကင်ချိပ်စည်းကဲ့သို့ ပစ်လွှတ်လိုက်သောအခါ ထောင်ချီသော လောကများ ထိုးတက်သွားသကဲ့သို့ပင် ဖြစ်သည်။ ကောင်းကင်လမ်းစဉ်အသေးစားသည် ယခုအထိ မပြီးပြည့်စုံသေးသော်လည်း ၎င်းထဲရှိ နတ်စွမ်းအားသည် လွန်စွာ စွမ်းအားကြီးပေသည်။

ဝုန်း...ဝုန်း...ဝုန်း...

တုန်လှုပ်ဖွယ် ပေါက်ကွဲသံများ ပျံ့နှံ့သွားပြီး ပတ်ဝန်းကျင်အာကာပြင်သည် ကွဲအက်တော့မလို ဖြစ်နေသည်။ ကျဆင်းလာသော အဆုံးမဲ့ ကျောက်တိုင်များသည် နတ်ချိပ်စည်းနှင့်အတူ ပျက်စီးသွားပြီး မိုင်သန်းချီ အဝန်းအဝိုင်းကို တုန်ခါသွားစေ၏။ သို့သော် ဤမဟာလမ်းစဉ် နတ်စက်ကွင်းထဲတွင် အခြား မည်သည့်ကျင့်ကြံသူမှ ရှိမနေပေ။ ထို့ကြောင့် အပြစ်ကင်းသောသူများ မထိခိုက်သွားချေ။

မဟုတ်လျှင် ထိုကဲ့သို့သော ကြောက်မက်ဖွယ် တိုက်ခိုက်မှုတစ်ခုသည် ကြီးစွာသော အပျက်အစီး၊ အသေအပျောက်များကို ဖြစ်သွားစေမည်ဖြစ်သည်။

ထို့နောက် ကောင်းကင်ထက်တွင် ရွှေရောင်ပုံချပ်တစ်ခု ထွက်ပေါ်လာ၏။ ပုံချပ်ထဲတွင် များစွာသော သင်္ကေတများ ပါပြီး သင်္ကေတတစ်ခုစီတွင် ဟောင်ထျန်းစွမ်းအား ပါဝင်ပေသည်။

ဝုန်း...

သင်္ကေတများ အဆက်မပြတ် ကျဆင်းလာ၏။ သင်္ကေတတစ်ခုစီတိုင်းတွင် မယုံနိုင်လောင်သော စွမ်းအားပါဝင်၏။ ကောင်းကင်တစ်စိတ်တစ်ပိုင်း ကျဆင်းလာသည်ဟုပင် ထင်ရသည်။ ထိုကျဆင်းလာသော သင်္ကေတများထဲတွင် ဟောင်ထျန်းစွမ်းအား စုဝေးနေရာ ၎င်းတို့သည် အလွန် ကြောက်မက်ဖွယ် ကောင်းနေသည်။

ထို့အပြင် ၎င်းသည် အဆုံးမရှိပေ။

အရှင်ဟောင်ထျန်း၏ မျက်နှာသည် ကောင်းကင်ထက်တွင် ရှိနေဆဲဖြစ်သည်။ သူ၏မျက်လုံးများသည် အေးစက်နေပြီး ထီမထင်ဟန်ရှိကာ သတ်ဖြတ်လိုသည့်အရိပ်အယောင်ဖြင့် တောက်ပနေလေသည်။ သူသည် ဤ မဟာလမ်းစဉ် နတ်စက်ကွင်းထဲတွင် အရှင်သခင်ဖြစ်သည်။ သူသည် ကောင်းကင်ပင်။

ထိုပုံချပ်သည် သူဖန်တီးထားသော စွမ်းအားအကြီးဆုံး နတ်အတတ်ဖြစ်သည်။ ဟောင်ထျန်းပုံချပ်တွင် အားကောင်းသော သတ်ဖြတ်လိုသည့်အငွေ့အသက် ပါဝင်ပြီး နတ်စက်ကွင်းတစ်ခုအတွင်းရှိ အသက်ရှိအားလုံးကို သတ်ဖြတ်ပစ်နိုင်ပေသည်။

ရီဖူရှင်း၏ လက်တစ်ထောင်သည် ထပ်မံ တိုက်ခိုက်လိုက်သည်။ မရေမတွက်နိုင်အောင် များပြားသော နတ်ချိပ်စည်းများ ပျံထွက်သွားသည်။ နတ်ချိပ်စည်းများသည် ဟောင်ထျန်းသင်္ကေတများနှင့် ထိခတ်သွားပြီး အပြင်းအထန် ကွဲအက်ပျက်စီးသွားကြသည်။ သို့သော် ကောင်းကင်တွင် ဟောင်ထျန်းသင်္ကေတများနှင့် ပြည့်နှက်နေဆဲပင်။ ၎င်းတို့သည် အဆုံးမရှိပေ။ အကယ်၍ သူသာ သူ့လက်များနှင့် နတ်ချိပ်စည်းများကို ဆက်၍ တိုက်ခိုက်နေရလျှင် ရလဒ်ကို ဆုံးဖြတ်ပြီးသကဲ့သို့ ဖြစ်သွားပေလိမ့်မည်။ သူသည် သံသယမရှိ ရှုံးနိမ့်သွားမည်ဖြစ်သည်။

အတွေးတစ်ချက်ဖြင့် သူ့ရှေ့ရှိ အာကာပြင်သည် တွန့်ခေါက်သွားသည်။ ထို့နောက် ကြောက်မက်ဖွယ် အာကာသဝဲကတော့ကြီးတစ်ခု လျင်မြန်စွာ ထွက်ပေါ်လာ၏။ တုန်လှုပ်ဖွယ် အာကာသဝဲကတော့ကြီးသည် လျင်မြန်စွာ ပြန့်ကားလာသည်။ ကျဆင်းလာသော ကြောက်မက်ဖွယ် သင်္ကေတများသည် ၎င်းအတွင်းသို့ တိုက်ရိုက်ဝင်ရောက်သွားကာ ပျောက်ကွယ်သွားသည်။ အာကာသဝဲကတော့ထဲမှနေ၍ ကျယ်လောင်သော အသံများ ထွက်ပေါ်လာ၏။

အာကာသဝဲကတော့ကြီးသည် သင်္ကေတများကို အဆက်မပြတ် ဝါးမျိုပစ်နေပြီး အပြင်းအထန် တုန်ခါနေ၏။ ရီဖူရှင်း၏ခန္ဓာကိုယ်မှနေ၍ နတ်စွမ်းအား ထွက်ပေါ်လာ၏။ သန်းထောင်ချီသော သင်္ကေတများ အာကာသဝဲကတော့အတွင်းသို့ ဝင်သွား၏။ ထို ကြောက်မက်ဖွယ် ဝဲကတော့ကြီးသည် အောက်ခြေမရှိသော တွင်းကြီးတစ်တွင်းကဲ့သို့ပင်။

“လောကအဆင့် စည်းမျဉ်းနတ်စွမ်းအား”

အရှင်ဟောင်ထျန်းသည် ရီဖူရှင်းကို ငုံ့ကြည့်လိုက်၏။ သူ၏မျက်လုံးများသည် ရေခဲတမျှ အေးစက်နေသည်။ ရီဖူရှင်းသည် ယခင်ကပင် သူ၏ စွမ်းအားကြီး တိုက်ခိုက်စွမ်းရည်များနှင့် ကွဲပြားသော မဟာလမ်းစဉ်စည်းမျဉ်းနတ်စွမ်းအားကို ထုတ်ပြခဲ့ပြီးဖြစ်သည်။ ယနေ့တွင် သူသည် ရီဖူရှင်းနှင့် တိုက်ပွဲမှနေ၍ ထိုတိုက်ခိုက်စွမ်းရည်များနှင့် ကွဲပြားမှုကို ပို၍ နက်နက်ရှိုင်းရှိုင်း ခံစားခဲ့ရလေသည်။

ရီဖူရှင်းသည် ကွဲပြားသော စည်းမျဉ်းနတ်စွမ်းအားတစ်မျိုးကို လေ့လာခဲ့သည်။ သူသည် သူ၏လမ်းစဉ်ကို ဖျက်ဆီး၍ အဆင့်တက်ခဲ့သည်။ သူ ကျင့်ကြံသော လမ်းစဉ်သည် တစ်ခုတည်းမဟုတ်ပေ။ ၎င်းသည် လောကအဆင့်ရှိသည့် ပြီးပြည့်စုံသော ကောင်းကင်လမ်းစဉ်တစ်ခုဟု ထင်ရသည်။

ထိုသို့သာဖြစ်ပါက ရီဖူရှင်း၏ ကျင့်ကြံခြင်းသည် ဘယ်တွင် အဆုံးသတ်သနည်း။

သူ၏ နောက်ဆုံးပုံစံသည် မည်မျှ စွမ်းအားကြီးမည်နည်း။

အကယ်၍ ရီဖူရှင်းသာ မဟာအင်ပါယာတစ်ပါး ဖြစ်လာပါက ကျန်သည့် သူတို့အတွက် မည်သည့် အနာဂတ်မှ ရှိမည် မဟုတ်ပေ။ ရှေးနတ်ဘုရားခေတ်တွင် ရီဖူရှင်းကဲ့သို့သော လူများသည် ကောင်းကင်နှင့် ယှဉ်ပြိုင်ခဲ့ကြသော ကျင့်ကြံသူများ ဖြစ်ပေသည်။

‘ငါ သူ့ကို ဆက်ပြီး အသက်ရှင်ခွင့် ပေးထားလို့ မရဘူး’

အရှင်ဟောင်ထျန်း တွေးလိုက်သည်။

ဟောင်ထျန်းပုံချပ်က ဆက်၍ တိုက်ခိုက် နေစဉ်တွင် အရှင်ဟောင်ထျန်းသည် ကောင်းကင်ထက်တွင် မဟာလမ်းစဉ်အဖြစ် တိုက်ရိုက် ပြောင်းလဲသွား၏။ သူသည် ကောင်းကင်နှင့် တစ်သားတည်း ဖြစ်လာပြီး ကောင်းကင်သည် သူ့ခန္ဓာကိုယ်အဖြစ် ပြောင်းလဲသွား၏။ သို့တည်းမဟုတ် သူ့ခန္ဓာကိုယ်သည် ကောင်းကင်အဖြစ် ပြောင်းလဲသွားသည်ဟု ဆိုရပေမည်။

ရီဖူရှင်းသည် အားကောင်းသော အရှိန်အဝါကို ခံစားလိုက်ရ၏။ သူသည် ကောင်းကင်ထက်သို့ မော့ကြည့်သည်။ အရှင်ဟောင်ထျန်းသည် ကောင်းကင်အဖြစ် ပြောင်းလဲသွားပြီးဖြစ်သည်။ ထိုကဲ့သို့သော စွမ်းအားမျိုးသည် ကြီးမားပေသည်။ သူ သူ၏ခန္ဓာကိုယ်ကို မည်မျှပင် ကြီးလာအောင် လုပ်စေကာမူ ကောင်းကင်အောက်တွင် သူသည် ပုရွက်ဆိတ်တစ်ကောင်ကဲ့သို့သာ ဖြစ်နေဦးမည်ဖြစ်ပြီး လွန်စွာ သေးငယ်နေမည်ဖြစ်သည်။

ကောင်းကင်ထက်တွင် ဧရာမ အရှင်ဟောင်ထျန်းသည် သူ၏လက်ကို ဆန့်တန်းလိုက်ပြီး သူ့အောက်ရှိ ရီဖူရှင်းကို လှမ်း၍ ဆုပ်ကိုင်လိုက်သည်။

အရှင်ဟောင်ထျန်းသည် ကောင်းကင်အဖြစ် ပြောင်းလဲသွားပြီဖြစ်၍ သူ၏လက်သည်လည်း ကောင်းကင်လက်ဖြစ်သည်။ ၎င်းသည် အာကာပြင်တစ်ခွင်လုံးကို ကာရံသွားပြီး ၎င်းကျဆင်းလာသောအခါ ပုန်းရန် နေရာမရှိပေ။ ဦးတည်ရာတိုင်းသည် လက်လှမ်းမှီသည့် အဝန်းအဝိုင်းအတွင်း၌ ရှိနေသည်။ ရီဖူရှင်းသည် သူ၏ တိုးမြှင့်ထားသော လှုပ်ရှားမှုစွမ်းရည်ကို သုံးမည်ဆိုလျှင်ပင် ဤဧရာမလက်ဝါးကြီးဆီမှ လွတ်နိုင်မည် မဟုတ်ပေ။

ကျယ်လောင်သော ကြောက်မက်ဖွယ် ပေါက်ကွဲသံများ ထွက်ပေါ်လာပြီး ကောင်းကင်လက်ဝါးသည် နီး၍ နီး၍ လာလေသည်။ ရီဖူရှင်း၏ခေါင်းအထက်ရှိ ကောင်းကင်သည် မည်းမည်းမှောင်လာ၏။ နေအလင်းရောင်သည် ကောင်းကင်လက်ကြီး၏ ကာရံမှုကို ခံလိုက်ရခြင်းပင်။ အကယ်၍ သူသာ ထိုလက်ကြီး၏ ဖမ်းဆုပ်မှုကို ခံလိုက်ရပါက ပုရွက်ဆိတ်တစ်ကောင် အရွယ်အစားမျှသာ ရှိပေလိမ့်မည်။ အရှင်ဟောင်ထျန်း ထိုလက်ကို ဆုပ်လိုက်လျှင်ပင် သူ့ကို ဖျစ်ညှစ်နိုင်မည်၊ မနိုင်မည်ကို သူမသိချေ။

***