လှံတစ်ချက်နှင့် လောကကို ထိတ်လန့်စေခြင်း 

ရီဖူရှင်းသည် ကောင်းကင်အောက်မှ နတ်ဝင်္ကပါအစီအရင်ကို မြင်လိုက်ရသည်။ သူက လက်ကို မြှောက်ကာ ကောင်းကင်ထက်သို့ လက်ဝါးအား တွန်းပို့လိုက်၏။ ချက်ချင်းပင် အဆုံးမဲ့နတ်အလင်းတို့ တောက်ပလာခဲ့သည်။ ကောင်းကင်အစွန်းတွင် နတ်ဘုရားချိပ်စည်းတံဆိပ်တစ်ခု ပေါ်ပေါက်လာသည်။ ၎င်းက လေးထောင့်ကျသည့် နတ်ဘုရားချိပ်စည်းတံဆိပ်ဖြစ်သည်။ ဤနတ်ဘုရားချိပ်စည်းက အလွန် လျင်မြန်လှသော အရှိန်နှင့် ကြီးမားလာပြီး ရီဖူရှင်း၏ ခန္ဓာကိုယ်နှင့် ပေါင်းစပ်သွားသည်။

ဘုန်း...

ချက်ချင်းပင် နတ်အလင်းတို့က ကောင်းကင်ကို ထိုးဖောက်လာခဲ့သည်။ လေးထောင့်ချိပ်စည်းတံဆိပ်က ကျယ်ပြောသောလေဟာနယ်ကို ဖုံးလွှမ်းသွားကာ အဆုံးမဲ့နတ်ဝင်္ကပါအဖြစ် ပြောင်းလဲသွား၏။ နတ်အက္ခရာများက လှည့်ပတ်နေပြီး မျက်နှာပြင်တွင် ခမ်းနားလှပသည့် သင်္ကေတများ ပေါ်ပေါက်လာသည်။

ယခင်က ရီဖူရှင်း တစ်ယောက်တည်း တံခါးပိတ်ကျင့်ကြံစဥ်တွင် ကောင်းကင်လမ်းစဥ်က နတ်ဘုရားချိပ်စည်းတစ်ခု ဖန်တီးခဲ့သည်။ ၎င်းကို ကောင်းကင်ချိပ်စည်းဟု ခေါ်၏။ ထို့နောက် ရီဖူရှင်းက ကောင်းကင်ချိပ်စည်းမှ ယခု မြင်တွေ့နေရသော လောကနတ်ဘုရားချိပ်စည်းဟူသည့် နတ်ဘုရားနည်းစနစ်ကို နားလည်သဘောပေါက်ခဲ့သည်။

အက္ခရာသင်္ကေတများက ခုန်ထွက်လာသလို ထင်မှတ်ရကာ ၎င်းတို့တွင် ပြင်းထန်သည့် နတ်စွမ်းအားများ ပါဝင်နေသည်။ ကောင်းကင်ရှိ နတ်ဝင်္ကပါမှ စီရင်ခြင်းအလင်းတန်းတို့ ကျဆင်းလာသည့်အခါ တစ်လောကလုံးက အော်မြည်နေခဲ့သည်။

မရေတွက်နိုင်သော စီရင်ခြင်းအလင်းတို့က တပြိုင်တည်းကျဆင်းလာကာ လောကနတ်ဘုရားချိပ်စည်းပေါ် ဆင်းသက်လာသည်။ ကြောက်မက်ဖွယ် အမှောင်အက်ကြောင်းများစွာ ကောင်းကင်တွင် ပေါ်ပေါက်လာကာ လေဟာနယ်ကို အပိုင်းပိုင်း စုတ်ဖြဲနေသကဲ့သို့ ဖြစ်​လေသည်။ ၎င်းက အစစ်အမှန် ကမ္ဘာပျက်ကပ်နေ့ကဲ့သို့ အလွန် ကြောက်မက်ဖွယ်ကောင်းလှသည်။

မရေတွက်နိုင်သည့် စီရင်ခြင်းအလင်းတန်းတို့က လောကနတ်ဘုရားချိပ်စည်းအား ရိုက်ခတ်သွားပြီး တဖြေးဖြေး ထိုးဖောက်လာသည်။ သို့သော် ၎င်းကို တိုက်ရိုက်ဖျက်ဆီးပစ်နိုင်ခြင်း မရှိပေ။

“နန်းတော်သခင်ရီက ပိုပြီး အားကောင်းလာတာပဲ။”

အောက်ဘက်ရှိ ကျင့်ကြံသူများအားလုံးက အံသြမှင်တက်သွားကြသည်။ သူက အမှန်တကယ်ပင် ထိုကဲ့သို့ ကြောက်မက်ဖွယ် ကောင်းသည့် တိုက်ခိုက်မှုကို ပိတ်ဆို့တားဆီးနိုင်ခဲ့သည်။ ထိုသည်မှာ ယနေ့ ရီဖူရှင်းက မည်မျှ အားကောင်းလာကြောင်း သိသာထင်ရှားစေသည်။ ဤသည်မှာ မဟာအင်ပါယာခုနစ်ပါး မဟာမိတ်တစ်ယောက်ဖြစ်ပြီး တစ်ယောက်ချင်းစီက ဟောင်ထျန်းအရှင်ထက်ပိုပြီး အားကောင်းသည်။

ကျင့်ကြံသူများသည် သူတို့၏ တိုက်ခိုက်မှုအဆင့်ကို ခန့်မှန်းနိုင်ခြင်းမရှိပေ။ ထိုသည်မှာ သူတို့ သိရှိနိုင်သည့် အဆင့်ကို ကျော်လွန်နေသည်။

ရီဖူရှင်းက လက်ကို မြှောက်လိုက်ပြီး အကန့်အသတ်မဲ့ လောကနတ်ဘုရားချိပ်စည်းအား ရှေ့သို့ ရိုက်ထုတ်လိုက်သည်။ ချက်ချင်းပင် မရေတွက်နိုင်သော ရှေးဟောင်းအက္ခရာများက အဆုံးမဲ့လောကနတ်ဘုရားချိပ်စည်းမှ ခွဲထွက်လာကာ ကောင်းကင်အစွန်းသို့ ကျရောက်သွားသည်။

မဟာအင်ပါယာခုနစ်ပါး၏ အဖြူရောင်စွမ်းအင်လုံးများက ကောင်းကင်အောက်ဘက်သို့ ထိုးဆင်းလာသည်။ ၎င်းတို့က တစ်ချိန်တည်းတွင် ရောက်ရှိလာပြီး တူညီစွာ လှုပ်ရှားကြလိုက်ကြကာ ချက်ချင်းပင် ကောင်းကင်အောက်ရှိ နတ်ဝင်္ကပါအား ကြောက်မက်ဖွယ် လက်နက်များဖြင့် တိုက်ခိုက်လိုက်သည်။ သူတို့၏ လက်များထဲတွင် လှံရှည်ခုနစ်လက် ပေါ်ပေါက်လာ၏။

လှံရှည်များတွင် ပြိုင်ဘက်ကင်း စီရင်ခြင်းအလင်းတို့ဖြင့် တောက်ပနေခဲ့သည်။ ၎င်းတို့က စစ်မှန်သည့် စီရင်ခြင်းနတ်ဘုရားများ၏ လှံများကဲ့သို့ ကြီးမားလှသည်။ လှံများကို ကိုင်စွဲထားကာ သူတို့က ကောင်းကင်အောက်သို့ ဦးတည်လာပြီး နတ်အလင်းတန်းခုနစ်ခုအဖြစ် ပြောင်းလဲသွား၏။ ချက်ချင်းပင် ပို၍တောက်ပသည့် အလင်းတို့က နတ်ဝင်္ကပါမှ ပေါက်ကွဲထွက်လာကာ အောက်ဘက်ရှိ လောကနတ်ဘုရားချိပ်စည်းထံ ပြင်းထန်စွာ ထိုးဆင်းလာပေသည်။

သူတို့က လှံများကို ထိုးစိုက်လိုက်သည့် တစ်ချိန်တည်းတွင် ရီဖူရှင်းသည်လည်း လက်ကို ဆန့်ထုတ်လိုက်သည်။ သူ့အနီးတွင် အနန္တကောင်းကင်ခွင်းနတ်ဓားများ ဖြစ်ပေါ်လာပြီး သူ၏ လက်ထဲ၌လည်း လှံတစ်ချောင်း ပေါ်ပေါက်လာသည်။

အဖြူရောင်ဝတ်စုံက တဖျတ်ဖျတ် လွင့်နေပြီး ငွေရောင်ဆံပင်တို့က ကခုန်နေကာ လက်ထဲတွင် လှံရှည်တစ်လက်ကို ကိုင်စွဲထားသည့် ရီဖူရှင်းက လောက၏ စစ်မှန်သော နတ်ဘုရားတစ်ပါးကဲ့သို့ပင် ဖြစ်သည်။ အောက်ဘက်ရှိ ကျင့်ကြံသူများက သူ၏ နောက်ကျောကို ကြည့်ကာ ထိုအခိုက်အတန့်တွင် ရီဖူရှင်းက ပြိုင်ဘက်ကင်းနေသည်ဟု ခံစားမိလိုက်ကြသည်။ စီရင်ခြင်းနတ်ဘုရားခုနစ်ပါး ရှိလျှင်ပင် မည်သည့်အရေးနည်း။

မရေတွက်နိုင်သော လူများက လက်သီးများကို ကျစ်ကျစ်ဆုပ်လိုက်ကာ သူတို့ကိုယ်ထဲမှ သွေးများဆူပွက်လာသည်ကို ခံစားလိုက်ကြရသည်။ ယခင် သူတို့ခံစားခဲ့ရသည့် အကြောက်တရားများက မျှော်လင့်စောင့်စားခြင်းအဖြစ် ပြောင်းလဲသွား၏။ သူတို့က ရီဖူရှင်း၏ အခမ်းနားအကြီးကျယ်ဆုံး တိုက်ပွဲကို မျှော်လင့်စောင့်စားနေကြပေသည်။

ရီဖူရှင်း၏ လက်က အနည်းငယ် လှုပ်ရှားသွားသည်။ မဟာအင်ပါယာခုနစ်ပါး၏ တိုက်ခိုက်မှုများ ကျရောက်လာသည့် အခိုက်အတန့်တွင် အနန္တကောင်းကင်ခွင်းနတ်ဓားတို့က ကောင်းကင်ထက်သို့ ထိုးတက်သွားခဲ့သည်။ တစ်ချိန်တည်းတွင် သူ့ခန္ဓာကိုယ်က အလင်းတန်းအဖြစ် ပြောင်းလဲသွားပြီး ကောင်းကင်ထက် တည့်မတ်စွာ လိုက်သွားခဲ့သည်။

ဘန်း...

မဟာအင်ပါယာခုနစ်ပါး တိုက်ခိုက်လိုက်သည့် အခိုက်အတန့်တွင် သန်းချီသော စီရင်ခြင်းနတ်အလင်းတန်းတို့က လောကနတ်ဘုရားချိပ်စည်းပေါ်သို့ တပြိုင်တည်း ကျရောက်လာသည်။ နတ်ဘုရားချိပ်စည်းက ချက်ချင်း ဖျက်ဆီးပစ်ခံလိုက်ရသည်။ စီရင်ခြင်းနတ်ဘုရားခုနစ်ပါးက အဆုံးမဲ့ စီရင်ခြင်းအလင်းတို့ကို သယ်ဆောင်ကာ အောက်သို့ ဆက်လက်ဆင်းလာနေပြီး ကောင်းကင်အား ဖြိုခွဲဖျက်ဆီးကာ အောက်ဘက်ရှိကျင့်ကြံသူများအားလုံးကို သတ်ဖြတ်ချင်နေခဲ့သည်။

သို့သော် တစ်ချိန်တည်းနီးပါးတွင် အဆုံးမဲ့သော ကောင်းကင်ခွင်းနတ်ဓားတို့က ကောင်းကင်သို့ ထိုးတက်သွားကာ စီရင်ခြင်းအလင်းတို့ကို ဆန့်ကျင်တိုက်ခိုက်လာသည်။ ထိုအခိုက်တွင် လောကကြီးက ဖျက်ဆီးခံရတော့မလိုပင် ဖြစ်သည်။

ဤသည်မှာ ရီဖူရှင်းနှင့် နတ်ဘုရားခုနစ်ပါးကြားမှ စစ်မှန်သော တိုက်ပွဲဖြစ်သည်။

စီရင်ခြင်းနတ်ဘုရားခုနစ်ပါးက သူတို့၏ လှံများကို အသုံးပြုကာ လေဟာနယ်ကို ချိပ်ပိတ်ကာ ရီဖူရှင်းအား တိုက်ခိုက်လိုက်သည်။ သူတို့က သူ့ကို စီရင်ချင်နေကြပေသည်။

သို့သော် ထိုအခိုက်အတန့်တွင် ရီဖူရှင်းကလည်း သူ့လက်ထဲမှ လှံကို မြှောက်ကာ ထိုးစိုက်လိုက်သည်။

လှံ၏တိုက်ခိုက်မှုက ထိတ်လန့်တုန်လှုပ်ဖွယ်ပင် ဖြစ်သည်။

လှံနည်းစနစ်က ကောင်းကင်ကို လွှမ်းခြုံသွားခဲ့သည်။

မသဲကွဲသည့် အသံတစ်ခုက လေဟာနယ်အတွင်း ပျံ့နှံ့သွားသည်။ မရေတွက်နိုင်သော စီရင်ခြင်းအလင်းတို့ ကျဆင်းလာကာ အလွန် ပြင်းထန်သည့် သတ်ဖြတ်လိုစိတ်များနှင့် ရီဖူရှင်းအား တိုက်ခိုက်လိုက်သည်။ သို့သော် ရီဖူရှင်းက လှံကို ထိုးစိုက်လိုက်သည့် အခိုက်အတန့်တွင် အချိန်နှင့် လေဟာနယ်က ပျက်ယွင်းသွားသည်။ ၎င်းက လောကကြီးကို ဝါးမြိုပစ်လိုက်ပုံရသည်။ အရာအားလုံးကို ပျက်စီးသွားစေနိုင်သည့် ဖျက်ဆီးခြင်းမုန်တိုင်းက ချက်ချင်း ပေါက်ကွဲထွက်လာကာ သန်းချီသည့် စီရင်ခြင်းနတ်အလင်းတို့က ဖျက်ဆီးခြင်းမုန်တိုင်း၏ ဝါးမြိုခြင်းကို ခံခဲ့ရသည်။

စီရင်ခြင်းနတ်ဘုရားခုနစ်ပါး၏ လှံများက ပျက်စီးသွားခဲ့သည်။ ကြီးမားလှသည့် စီရင်ခြင်းလှံက မရေတွက်နိုင်သော အပိုင်းအစများအဖြစ် စုတ်ဖြဲခံလိုက်ရကာ အချိန်နှင့်လေဟာနယ် မုန်တိုင်းအတွင်း စုပ်ယူခံလိုက်ရသည်။ သူတို့၏ ခန္ဓာကိုယ်များက နတ်အလင်းတို့ဖြင့် တောက်ပနေခဲ့သည်။ သူတို့က အန္တရာယ်ကို ခံစားမိခဲ့ပြီး ထိုဖျက်ဆီးခြင်းမုန်တိုင်းအတွင်းမှ ထွ​က်ပြေးချင်ခဲ့ကြသည်။ စီရင်ခြင်းစွမ်းအားတို့က ရီဖူရှင်း၏ လှံဖြင့် တိုက်ဖျက်ချေမှုန်းခံလိုက်ရသည်။

ဘုန်း....

ကြီးမားသည့် ပေါက်ကွဲသံနှင့်အတူ လောကက ကွဲထွက်သွားခဲ့သည်။ စီရင်ခြင်းနတ်ဘုရားခုနစ်ပါး၏ ခန္ဓာကိုယ်များက အပိုင်းအစများအဖြစ် စုတ်ဖြဲခံလိုက်ရသည်။ ရီဖူရှင်း၏ လှံရှည်က အနက်ရောင်တွင်းပေါက်ကဲ့သို့ တစ်ဖက်လူ၏ ဖျက်ဆီးခြင်း တိုက်ခိုက်မှုအပါအဝင် အရာအားလုံးကို ဝါးမြိုပစ်လိုက်သည်။

ကောင်းကင်အင်ပါယာခုနစ်ပါး၏ ခန္ဓာကိုယ်များက တွန့်ရှုံ့သွားကာ နောက်တခဏတွင် ပျောက်ကွယ်သွားခဲ့ပြီး မည်သည်မှ မကျန်ခဲ့တော့အောင် ဖျက်ဆီးခံလိုက်ရသည်။

လှံက ဖြတ်သန်းသွားခဲ့ပြီး ရီဖူရှင်း၏ ခန္ဓာကိုယ်က ကောင်းကင်ထက်တွင် ပေါ်ပေါက်လာသည်။ သူ့လမ်းကြောင်းအတွင်းမှ အရာအားလုံးက ဖုန်မှုန့်များအဖြစ် ပြောင်းလဲသွားခဲ့ပေသည်။ စီရင်ခြင်းအလင်းမုန်တိုင်းက အစအနမကျန်အောင် ပျောက်ကွယ်သွားခဲ့ပြီး ကောင်းကင်အောက်ဘက်ရှိ နတ်ဝင်္ကပါသည်လည်း ပြိုကွဲပျက်စီးသွားခဲ့သည်။ ၎င်းသည် မည်သည့်အခါကမှ တည်ရှိခဲ့ခြင်းမရှိသလိုပင် ဖြစ်၏။

ထိုကျယ်ပြောသော လေဟာနယ်အတွင်း ရီဖူရှင်း၏ ပုံရိပ်သာလျှင် ကောင်းကင်၌ ရပ်နေခဲ့သည်။ သူ၏ အဖြူရောင်ဝတ်စုံက တဖျတ်ဖျတ် လွင့်နေခဲ့ပြီး ငွေရောင်ဆံပင်ရှည်တို့က လေမုန်တိုင်းအတွင်း ကခုန်နေသည်။ လူတိုင်းက သူ့ကို ကြည့်လိုက်သည့်အခါ သူ၏ ဆံပင်တစ်မျှင်ချင်းစီတိုင်းကပင် သန့်ရှင်းနေသ​ည်ကို မြင်လိုက်ရပေသည်။ သူက စစ်မှန်သည့် ကောင်းကင် နတ်ဘုရားတစ်ပါး ဖြစ်သည်။ သူ၏ ဆံပင်တစ်မျှင်ချင်းစီတိုင်းကပင် လက်နက်တစ်ခု ဖြစ်နိုင်ပေသည်။

သူက လှံတစ်ချက်တည်းနှင့် မဟာအင်ပါယာခုနစ်ပါးကို သတ်ဖြတ်ပစ်ခဲ့သည်။

ထိုကဲ့သို့သော အ​ဖြစ်အပျက်ကို ယခင်က မကြားဖူးခဲ့သော်လည်း ယနေ့ သူတို့က မျက်မြင်တွေ့ခဲ့ရပြီ ဖြစ်သည်။ ရီအင်ပါယာနန်းတော်အပြင်ဘက်မှ ကျင့်ကြံသူများ အားလုံးက ထိုကဲ့သို့ အလွန် အံ့သြဖွယ်ရာ မြင်ကွင်းကို မြင်ခွင့်ရသည်မှာ ကံကောင်းပေသည်။

ထိုမှတ်ဉာဏ်မှာ သူတို့အတွက် ထာဝရဖျောက်ဖျက်နိုင်စွမ်း ရှိတော့မည်မဟုတ်သည့် မှတ်ဉာဏ်များဖြစ်လာပေလိမ့်မည်။ မရေတွက်နိုင်သော နှစ်များစွာကြာပြီးနောက်၌ပင် သူတို့က ထိုမြင်ကွင်း ပြန်တွေးမိသည့်အခါ စိတ်လှုပ်ရှားကာ သွေးများဆူပွက်နေဆဲ ဖြစ်လိမ့်မည် ဖြစ်ကာ ကမ္ဘာကို တုန်လှုပ်စေခဲ့သည့် ရီဖူရှင်း၏ ထိုတိုက်ပွဲကို မြင်တွေ့ခဲ့ရခြင်းအား အလွန် ဂုဏ်ယူသလို ခံစားကြရပေလိမ့်မည်။

လက်ရှိကမ္ဘာပေါ်တွင် လူတိုင်း၏ အာရုံက လက်ရှိ ကောင်းကင်အင်ပါယာ၏ ဆွဲဆောင်မှုကို ခံထားကြရသည်။ သူတို့သည် မူလဘုံအတွင်း မျိုးဆက်တစ်ဆက်၏ ထိပ်ဆုံးတွင် ပြိုင်ဘက်ကင်းအရည်အချင်းတို့နှင့် ယှဥ်ပြိုင်ဘက်မရှိ ရပ်တည်နေသည့် မကောင်းဆိုးဝါးဆန်သော ပုဂ္ဂိုလ်တစ်ဦး ရှိနေသည်ကို မေ့လျော့နေကြသည်။

ယနေ့တိုက်ပွဲတွင် သူက အင်ပါယာခုနစ်ပါးကို လှံတစ်ချက်နှင့် သတ်ဖြတ်ပစ်ခဲ့သည်။ သူ့ကို မည်သူက ယှဥ်နိုင်ပါမည်နည်း။

ရီဖူရှင်းက သူတို့၏ ယုံကြည်ရာ သူတို့၏ နတ်ဘုရားဖြစ်သည်။

၎င်းက အခြားသူများတင်မကပေ။ ရီအင်ပါယာနန်းတော်၏ အဓိကပုဂ္ဂိုလ်များသည်ပင် ထိုလှံချက်ကြောင့် ထိတ်လန့်သွားသဖြင့် စကားပြောရန်ပင် မေ့သွားခဲ့ရသည်။ ဤလှံတိုက်ခိုက်မှုက အလွန် လှပပေသည်။ ၎င်းက အင်ပါယာခုနစ်ယောက်ကိုပင် သတ်ဖြတ်နိုင်ခဲ့သည်။ လှံချက်၏အောက်တွင် လွှမ်းမိုးနိုင်စွမ်းရှိသည့် စီရင်ခြင်းနတ်ဘုရားခုနစ်ပါးက ထွက်ပြေးရန် အခွင့်အရေးပင် မရလိုက်ဘဲ နေရာမှာတင် အသတ်ခံလိုက်ရပေသည်။ သူတို့သည် ဤနေရာ၌ ချက်ချင်း သေဆုံးသွားရလိမ့်မည်ဟု မည်သည့်အခါမှ ထင်မှတ်ထားခဲ့ခြင်း မရှိပေ။

“ပြီးသွားတဲ့ခေတ်ကို လွဲချော်သွားပေမယ့် ကံကောင်းစွာနဲ့ ဒီခေတ်ကိုတော့ မျက်မြင်တွေ့လိုက်ရပြီ။”

ဓားဧကရာဇ်အရှင်က ရေရွတ်လိုက်သည်။ သူ့မျက်လုံးများထဲ၌ အပြုံးတစ်ခု ပေါ်ပေါက်လာသည်။ သူသည် ယခင်ခေတ်မှ အံ့သြမှင်တက်ဖွယ် ပုဂ္ဂိုလ်များနှင့် လွဲချော်ခဲ့ရသော်လည်း ရီဖူရှင်း၏ ထိပ်ဆုံးသို့ သွားရောက်နေသည့် ခရီးစဥ်အား မျက်မြင်တွေ့ခဲ့ရပေသည်။

ယခင်က သူသည် ကောင်းကင်မင်းသမီးက ပြိုင်ဘက်ကင်းပြီး သူမ မရှိသည့် ကမ္ဘာကြီးက အရောင်အသွေးကင်းမဲ့နေလိမ့်မည်ဟု ပြောခဲ့ဖူးသည်။

မူလဘုံသည်လည်း ရီဖူရှင်း မရှိလျှင် အနှစ်သာရကင်းမဲ့နေပေလိမ့်မည်။