အင်ပါယာခြောက်ပါးနှင့် ယှဉ်နိုင်သည်

နတ်ဘုရားအဆင့်ရှိသည့် စွမ်းအားကြီး ကျင့်ကြံသူတစ်စုသည် ကျယ်ပြောသော ဟင်းလင်းပြင်ကို လွန်စွာလျင်မြန်သည့် အမြန်နှုန်းဖြင့် ဖြတ်သန်းနေသည်။ သူတို့သည် အာကာသလမ်းကြောင်းကိုပင် ဖြတ်ကာ မူလဘုံသို့ ဝင်ရောက်သွားကြသည်။

ရီဖူရှင်းနှင့် အရှင်ဒွန်ဟောင်တို့သည် ရှေ့တွင် ဖြစ်သည်။ သူတို့သည် အလင်းတန်းနှစ်ခုအဖြစ် ပြောင်းလဲနေပုံပင်။

ရီဖူရှင်းသည် အလင်းတန်းတစ်ခုအဖြစ် ပြောင်းလဲကာ အဆုံးမဲ့ ကြယ်တာရာကောင်းကင်ကို ဖြတ်သန်းနေသည်။

ထာဝရဓားသခင်သည် သူ့နောက်မှ ကပ်ပါလာသည်။ သူသည် ဓားတစ်ချောင်းပုံစံဖြင့် ပျံသန်းနေပြီး လွန်စွာ လျင်မြန်ပေသည်။

ထိုစဉ်တွင် ထာဝရဓားသခင်၏ တစ်ကိုယ်လုံးသည် ကောင်းကင်ဇီဝိန်ခြွေနတ်ဓားတစ်ချောင်းကဲ့သို့ တလက်လက်တောက်ပလာသည်။ သူက လက်ချောင်းမြှောက်၍ ကောင်းကင်သို့ ညွှန်လိုက်၏။ အထက်ကောင်းကင်သည် ရုတ်ခြည်းပင် စတင် ပြောင်းလဲလာသည်။

“ခုတ်”

သူ သူ့လက်ကို ဝှေ့ယမ်းလိုက်သည့်အခိုက်တွင် ကောင်းကင်မှနေ၍ ဓားတစ်ချောင်းသည် အာကာသနဂါးငွေ့တန်းကဲ့သို့ ကျဆင်းလာလေသည်။ ထိုဓားသည် အချိန်နှင့်နေရာ ဓားကဲ့သို့ပင်။ ၎င်းသည် အချိန်နှင့်နေရာကို ဖြတ်ကျော်ကာ ရီဖူရှင်းနှင့် အရှင်ဒွန်ဟောင်ကို ခုတ်ချလိုက်သည်။ ၎င်းသည် နောက်မှ ထွက်လာသော်လည်း အရင်ရောက်သွားခဲ့သည်။ ရီဖူရှင်းနှင့် အရှင်ဒွန်ဟောင်တို့သည် အာကာပြင်ကို ကြောက်မက်ဖွယ်အရှိန်ဖြင့် ဖြတ်သန်းနေသော်လည်း ဓားလမ်းစဉ်တိုက်ခိုက်မှု၏ အဝန်းအဝိုင်းအတွင်းမှာပင် ရှိနေသေးပေသည်။

သူတို့နှစ်ဦးစလုံး စွမ်းအားကြီးသော ဓားဝိညာဉ်စွမ်းအားကို ခံစားလိုက်ရ၏။

ရီဖူရှင်းနှင့် အရှင်ဒွန်ဟောင်တို့သည် သူတို့၏ခန္ဓာကိုယ်များမှနေ၍ နတ်စွမ်းအား ထုတ်လွှတ်လိုက်ကြသည်။ ထုတ်ဖော်ခြင်းနတ်စွမ်းအားသည် ကျယ်ပြောသောအာကာပြင်ကို လွှမ်းခြုံသွားပြီး ဝင်ရောက်လာသည့် ဓားကို အနည်းငယ် ဟန့်တားလိုက်သည်။ သို့သော် ၎င်းသည် အချိန်နှင့်နေရာကို ဖြတ်ကျော်နိုင်သော ထိုဓားကို မတားဆီးနိုင်ပေ။

ဓားဝိညာဉ်စွမ်းအားသည် သတ်ဖြတ်ရန် ဆက်၍ ကျဆင်းနေသည်။ သို့သော် တစ်ချိန်တည်းမှာပင် ရီဖူရှင်းမှာလည်း သူ၏ မဟာလမ်းစဉ်နတ်စက်ကွင်းကို ထုတ်လွှတ်လိုက်သည်။ သူ့ခန္ဓာကိုယ်ကိုဗဟိုပြု၍ စက်ကွင်းသည် လောကတစ်ခုအဖြစ် ပြောင်းလဲသွား၏။ ဓားဝိညာဉ်စွမ်းအား ခုတ်ချလိုက်သောအခါ အချိန်နှင့်နေရာသည် ပရမ်းပတာဖြစ်လာပြီး ထိုဓားအပေါ် သက်ရောက်သွားသည်။

သို့ပေသည့် ထိုဓားသည် ဦးတည်ရာ မပြောင်းသေးပေ။ ၎င်းသည် သူတို့ကို တိုက်ရိုက် ခုတ်ချလိုက်သည်။ ထိုဓားသည် မည်မျှ ကြောက်မက်ဖွယ်ကောင်းကြောင်း တွေးကြည့်နိုင်ပေသည်။ ၎င်းသည် သူ့နတ်စက်ကွင်း၏ စည်းမျဉ်းများကိုပင် ခုတ်ဖြတ်နိုင်လေသည်။ တစ်နည်းဆိုရလျှင် ၎င်းသည် အချိန်နှင့်နေရာ စည်းမျဉ်းများကို ခုတ်ဖြတ်နိုင်ပေသည်။

ထိုဓား ခုတ်ချလိုက်သောအခါ ကျယ်ပြောသော အကာပြင်တွင် လှပသော ဓားရောင်ကွေးတစ်ခု ဖြစ်ပေါ်သွားပြီး ဟင်းလင်းပြင်ကို နှစ်ခြမ်းဖြတ်ပစ်လိုက်လေသည်။ ထို့နောက် ၎င်းသည် အတုမဲ့ စွမ်းအားအရှိန်အဝါရှိသော ဓားမြစ်တစ်စင်းအဖြစ် ပြောင်းလဲသွား၏။

ရီဖူရှင်းသည် ထိုဓားကို ကြည့်လိုက်၏။ ထို့နောက် သူသည် သူ့လက်ထဲရှိ ဓားကို ဝှေ့ယမ်းလိုက်သည်။ နတ်ဘုရားအားလုံး၏ မျက်စိအောက်တွင် ရီဖူရှင်းသည် ဓား(၈၁)ချောင်းကို ရုတ်ခြည်း ထုတ်လွှတ်လိုက်သည်။ ဓားတစ်ချောင်းစီတိုင်းသည် လွန်စွာခက်ထန်သော ဓားများဖြစ်ကြသည်။ ၎င်းတို့သည် ပြီးပြည့်စုံသော ဓားများလည်း ဖြစ်ကြသည်။

“သူက ဘယ်လိုလုပ် အရမ်းမြန်နေရတာလဲ...”

ထိုမဟာအင်ပါယာများသည် ရီဖူရှင်းရှိသော အာကာပြင်နှင့် မတူသော အာကာပြင်တွင် ရှိနေသကဲ့သို့ နားမလည်နိုင်ဖြစ်နေကြသည်။ ထာဝရဓားသခင်၏ ဓားသည် လွန်စွာ လျင်မြန်၏။ သူ့ဓားသည် တစ်လောကလုံးရှိ အမြန်ဆုံးဓားများထဲမှ တစ်ချောင်းဖြစ်ပေသည်။ သို့သော် ထိုအခိုက်တွင် ထိုဓားသည် နှေးသွားသည်ဟု သူတို့ ခပ်ရေးရေး အာရုံခံမိသည်။

သို့တည်းမဟုတ် ထာဝရဓားသခင်၏ ဓားသည် နှေးသွားခြင်းမဟုတ်ဘဲ ရီဖူရှင်းတွင် အချိန်ပိုရှိခဲ့၍ ဖြစ်နိုင်သည်။

“အချိန်စည်းမျဉ်း”

အားလုံး ရင်တုန်သွားကြသည်။ ရီဖူရှင်းသည် အချိန်စည်းမျဉ်းကို အသုံးချကာ အချိန်စီးဆင်းနှုန်းကို ပြောင်းလဲခဲ့သည်။ ထို့ကြောင့် သူ့တွင် အချိန်ပိုရသဖြင့် ဓား(၈၁)ချောင်းကို တစ်ပြိုင်တည်း ပစ်လွှတ်နိုင်ခဲ့ခြင်းပင်။

ဓားဝိညာဉ်စွမ်းအားတန်း(၈၁)တန်းသည် အချိန်နှင့်နေရာကို ကျော်ဖြတ်နိုင်သော အာကာသနဂါးငွေ့တန်းဓားဖြင့် ထိခတ်သွားသည်။ အဝေးရှိ ကြယ်တာရာများပင် ဓားဝိညာဉ်စွမ်းအားကြောင့် အစိတ်စိတ်အမွှာမွှာ ဖြစ်သွားကြသည်။ တစ်ချိန်တည်းမှာပင် ရီဖူရှင်း၏ မဟာလမ်းစဉ်နတ်စက်ကွင်းသည် ပြန့်ကားလာပြီး သူ၏နတ်စွမ်းအားက နတ်ဘုရားအားလုံးကို လွှမ်းခြုံသွားသည်။

သူ့နောက်သို့ လိုက်လာသော ထိုနတ်ဘုရားများသည် ယခုတွင် ရီဖူရှင်း၏ မဟာလမ်းစဉ်နတ်စက်ကွင်း၏ လွှမ်းခြုံမှုကို ခံလိုက်ရပေပြီ။

သူတို့အားလုံးသည် သူတို့၏ ကိုယ်ပိုင်စည်းမျဉ်းစွမ်းအားများကို တစ်ချိန်တည်း ထုတ်လိုက်ကြသည်။ ရုတ်ခြည်းပင် ကျယ်ပြောအာကာပြင်တွင် လွန်စွာ ပရမ်းပတာဆန်၍ ခက်ထန်သော နတ်စွမ်းအားများဖြင့် ပြည့်နှက်သွားသည်။

ဝုန်း...

ကြောက်မက်ဖွယ် ပေါက်ကွဲသံတစ်သံ ထွက်ပေါ်လာ၏။

ကောင်းကင်ထဲတွင် ဟင်းလင်းပြင်၏ ဘုရင်ကဲ့သို့ လွန်စွာ ကြီးမားသော ပုံရိပ်ကြီးတစ်ခု ထွက်ပေါ်လာ၏။ ၎င်းသည် လူသားဘိုးဘေး၏ပုံရိပ်ပင်။ ၎င်းကို ထိုနေရာရှိ ရင်းမြစ်နတ်လျှပ်စီးက ဝန်းရံထားပြီး ကြောက်မက်ဖွယ် ရင်းမြစ်လျှပ်စီးဓားများသည် ရီဖူရှင်းနှင့် အရှင်ဒွန်ဟောင်တို့ထံသို့ တိုက်ရိုက် ကျဆင်းလာလေသည်။

ထာဝရဓားသခင်သည် လုံလောက်အောင် စွမ်းအားကြီးသော်လည်း လူသားဘိုးဘေးသည် ဆက်၍ စောင့်မနေလိုပေ။ ရီဖူရှင်းသည် လွန်စွာကြောက်မက်ဖွယ်ကောင်းသော အစွမ်းကို ပိုင်ဆိုင်ထားသည်။ ထို့အပြင် သူသည် ကောင်းကင်လမ်းစဉ်နှင့် ပေါင်းစည်းပြီးနောက်တွင် သူ၏စွမ်းရည်များမှာ လက်ရှိ အင်ပါယာခြောက်ပါးနှင့်ပင် ယှဉ်နိုင်လာပေသည်။

ဝှစ်...

ရီဖူရှင်းသည် ဟင်းလင်းပြင်ကို တိုက်ရိုက် ဖြတ်သန်းသွား၏။ ကျဆင်းလာသော ရင်းမြစ်လျှပ်စီးဓားများသည် သူ့ကို မထိမှန်နိုင်ကြပေ။

အခြားမဟာအင်ပါယာတစ်ပါးကလည်း တိုက်ခိုက်လိုက်၏။ ဤအကန့်အသတ်မဲ့သော လောက၏ အာကာပြင်သည် ရုတ်ခြည်း ရပ်တန့်သွားသည်ဟု ထင်ရ၏။ အရာအားလုံး လှုပ်ရှားမှု ရပ်သွားသည်။ ထိပ်တန်းမဟာအင်ပါယာတစ်ပါးသည် သူ၏ကိုယ်ပိုင်မဟာလမ်းစဉ်နတ်စက်ကွင်းကို ထုတ်လွှတ်လိုက်၏။ ထိုကန့်သတ်စွမ်းအားအောက်တွင် ရီဖူရှင်း ထွက်ပေါ်လာလေသည်။

ရင်းမြစ်လျှပ်စီးဓားတစ်ချောင်းသည် သူ့ခန္ဓာကိုယ်ထံသို့ တိုက်ရိုက်ကျဆင်းလာသည်။ ၎င်းသည် သူ့အပေါ်သို့ တန်းတန်းမတ်မတ် ကျလာခြင်းပင်။

ရီဖူရှင်းသည် နတ်စွမ်းအားကို အဆုံးစွန်ထိ ထုတ်လိုက်သည်။ အာကာပြင်ကို ချိပ်ပိတ်ထားသော နတ်စွမ်းအား စုတ်ဖြဲခံလိုက်ရ၏။ သူ ကောင်းကင်သို့ လက်ချောင်းညွှတ်လိုက်၏။ ထို့နောက် လွန်စွာ လွှမ်းမိုးအားကြီးသော ကောင်းကင်အင်ပါယာဓားသည် ရင်းမြစ်လျှပ်စီးဓားနှင့် ထိခတ်သွားသည်။ ဓားနှစ်ချောင်းစလုံးသည် လွန်စွာခိုင်မာကာ စွမ်းအားကြီးပြီး အပြင်းအထန် တိုက်ခိုက်နေကြပေသည်။

ရီဖူရှင်း ထုတ်လွှတ်လိုက်သော ကောင်းကင်အင်ပါယာဓားသည် သူ၏နတ်စွမ်းအား ပါဝင်သော ကောင်းကင်အင်ပါယာဓားဖြစ်သည်။

လူသားဘိုးဘေးသည် ကောင်းကင်အင်ပါယာဓားနှင့် ရင်းမြစ်လျှပ်စီးဓားနှစ်ချောင်းလုံး ကျိုးပျက်သွားသည်ကို ကြည့်သည်။ ထို့ကြောင့် သူ အံ့အားသင့်သွားပေသည်။ သူ၏ ရင်းမြစ်လျှပ်စီးဓားသည် လောကထဲရှိ စွမ်းအားအကြီးဆုံး တိုက်ခိုက်မှုများထဲမှ တစ်ခုဖြစ်သည်။ သို့သော် ရီဖူရှင်း၏ ကောင်းကင်အင်ပါယာဓားသည် ၎င်းနှင့် ယှဉ်နိုင်ပေသည်။

ကောင်းကင်အင်ပါယာဓားတွင် ပါဝင်သော နတ်စွမ်းအားသည် အရာအားလုံးကို ဖျက်ဆီးနိုင်ပုံပင်။ ရင်းမြစ်လျှပ်စီးဓားသည်ပင် ဖျက်ဆီးခံလိုက်ရ၏။

ဒွန်ဟောင်၏ သားတော်သည် ဤနှစ်ပိုင်းအတွင်း ကြောက်မက်ဖွယ်အဆင့်တစ်ခုအထိ တိုးတက်လာသည့်ပုံပင်။

ဒေါင်...

ရုတ်တရက် ကောင်းကင်ထဲတွင် ခေါင်းလောင်းမြည်သံ ထွက်ပေါ်လာ၏။ ထိုအသံသည် လွန်စွာ ရှည်ပြီး အဝေးထိ ပျံ့နှံ့သွားသည်။ ထိုအသံ၏ ပဲ့တင်ထပ်မှုသည် အာကာပြင်ကို ကွဲအက်သွားစေပြီး အာကာပြင်ကို ရပ်တန့်နေစေသည့် နတ်စွမ်းအားကို ပြိုပျက်သွားစေ၏။ နတ်ဘုရားအားလုံးသည် ရီဖူရှင်းကို ကြည့်လိုက်ကြ၏။ ရီဖူရှင်း၏ခန္ဓာကိုယ်ပတ်ပတ်လည်တွင် ရှေးဟောင်းကြေးခေါင်းလောင်းများ ရှိနေသည်ကို မြင်လိုက်ကြရသည်။ ထိုရှေးဟောင်းခေါင်းလောင်းအားလုံးတွင် အတုမဲ့ နတ်စွမ်းအား ပါဝင်ပေသည်။ ရှေးဟောင်းခေါင်းလောင်းများမှနေ၍ နတ်အလင်းတန်းများ ကျဆင်းသွားပြီး အရာအားလုံးနှင့် အာကာပြင်ကို ဖျက်ဆီးပစ်လိုက်လေသည်။

နတ်ဘုရားများသည် ရီဖူရှင်း၏ စွမ်းအားကို ကြောက်ရွံ့သဖြင့် လူစုမခွဲဝံ့ကြပေ။ မဟာအင်ပါယာအချို့တိုက်ခိုက်နေစဉ်တွင် ကျန်သူများသည် ရပ်နေနိုင်ပေသည်။  ထို့အပြင် သူတို့နှင့် ရီဖူရှင်းသည် တော်တော်လှမ်းပေသည်။ သို့သော် ထိုမဟာအင်ပါယာများသည် တစ်ယောက်နှင့်တစ်ယောက် တကွဲတပြား မနေဝံ့ကြပေ။ သူတို့သာ တကွဲတပြားဖြစ်နေလျှင် ရီဖူရှင်းသည် အစောကကဲ့သို့ တိုက်ခိုက်မှုမျိုးနှင့် မဟာအင်ပါယာတစ်ပါးကို သတ်ပစ်လိုက်မည်ကို သူတို့ စိုးရိမ်နေကြသည်။

ရှေးဟောင်းကြေးခေါင်းလောင်းများသည် အဆက်မပြတ် လည်ပတ်နေ၏။ ထို့အပြင် နတ်အလင်းများလည်း လှည့်ပတ်နေသည်။ အာကာပြင်ကို ရပ်တန့်နေစေသော နတ်စွမ်းအားသည် အဆက်မပြတ် ကွဲအက်ပျက်စီးနေသည်။

နတ်ခေါင်းလောင်းတိုင်းသည် အဖျက်စွမ်းအား ဖြာထုတ်လိုက်ကြသည်။

“သူ့ရဲ့ တိုက်ခိုက်စွမ်းရည်က ဒီလောက်တောင် ကြီးတာလား”

နတ်ဘုရားများသည် ရီဖူရှင်းကို ငေးကြည့်လိုက်ကြ၏။ ခေတ်သစ်မှ ထိုဂျူနီယာမဟာအင်ပါယာသည် အမှန်ပင် ဤမျှ စွမ်းအားကြီးပေသည်။ သူသည် ရှေးဟောင်းအင်ပါယာများက ပူးပေါင်းတိုက်ခိုက်နေသည့် ဤအခြေအနေမှာပင် ရှေးဟောင်းအင်ပါယာများကို ခြိမ်းခြောက်နိုင်သေးပေသည်။

အကယ်၍ သူတို့သာ ရီဖူရှင်းကိုသတ်ရန်အတွက် တစ်ကိုယ်တော် လာခဲ့လျှင် သူတို့ထဲမှ အနည်းငယ်သာ ရီဖူရှင်းနှင့် တစ်ယောက်ချင်း တိုက်ခိုက်နိုင်ပေလိမ့်မည်။

အရှင်ဒွန်ဟောင်သည်ပင် အနည်းငယ် အံ့အားသင့်နေသည်။ သူသည် သူ့ရှေ့ရှိ ငွေဖြူရောင်ဆံပင်နှင့်လူကို ကြည့်သည်။ သူ့မျက်လုံးများထဲတွင် အားရကျေနပ်သည့် အရိပ်အယောင်များ ရှိနေသည်။ သူသည် သူမ၏ပုံရိပ်ကို မြင်နေရသကဲ့သို့ပင်။

ဤမတိုင်ခင်က သူသည် ရီဖူရှင်းနှင့် လက်ရည်စမ်းခဲ့သည်။ ထို့ကြောင့် ရီဖူရှင်းသည် သူ့အဆင့်ထက် မနိမ့်တော့ကြောင်း သူသိပေသည်။ သို့ဖြစ်၍ သူတို့နှစ်ယောက်သည် ဤနတ်ဘုရားများနှင့် ရင်ဆိုင်ဝံ့ခဲ့ခြင်းဖြစ်သည်။ ယင်းသည် ကြီးမားသော ယုံကြည်မှုပင်။

သို့ပင်လျှင် သူသည် ရီဖူရှင်းကို လျှော့တွက်ခဲ့မိသေးကြောင်း သိသွားသည်။ ရီဖူရှင်းသည် သူထင်ထားသည်ထက် ပို၍စွမ်းအားကြီးနေသည်။

ထို့ကြောင့် အရှင်ဒွန်ဟောင်သည် လောလောဆယ်တွင် ရီဖူရှင်းကို မကူသေးခြင်းပင်။ သူသည် ရီဖူရှင်း မည်သည့်အဆင့်တွင် ရှိနေကြောင်း မြင်လိုပေသည်။

“စကြဝဠာဖျက်ဆီးခေါင်းလောင်း”

လူသားဘိုးဘေးသည် ရီဖူရှင်း၏ခန္ဓာကိုယ်ကို ကြည့်လိုက်၏။ စကြဝဠာဖျက်ဆီးခေါင်းလောင်းသည် ကောင်းကင်အင်ပါယာ၏ စွမ်းရည်ဖြစ်သည်။ ၎င်းသည် ဟင်းလင်းပြင်ကိုပင် ဖျက်ဆီးပစ်နိုင်သည်။ သို့သော် ရီဖူရှင်း၏လက်ထဲတွင် ထိုစကြဝဠာဖျက်ဆီးခေါင်းလောင်းသည် ရီဖူရှင်း ကျွမ်းကျင်သော စည်းမျဉ်းနတ်စွမ်းအားနှင့် ပြီးပြည့်စုံစွာ ပေါင်းစည်းနေသည်။ ၎င်း၏စွမ်းအားသည် တုန်လှုပ်ဖွယ်ကောင်းလောက်အောင် အားကြီးပြီး အာကာပြင်ကို ရပ်တန့်နေစေသည့် နတ်စွမ်းအားကို တိုက်ရိုက်စုတ်ဖြဲသွားသည်။