ဘာလဲ

ဝမ်ဝေ့က အနာဂတ်ဗုဒ္ဓခန္ဓာကိုယ် ပြဿနာကို ဖြေရှင်းပြီးသည့်နောက်တွင် ကောင်းကင်ရုပ်ခန္ဓာနှစ်ခုကို ရရှိနိုင်မည့် နည်းလမ်းအား စတင်တွက်ချက်ကြည့်လိုက်သည်။

ပထမအဆင့်တွင် သူက လင်းဖန်အား ဖမ်းဆီးနိုင်ခဲ့သည့် အနာဂတ်ကို မြင်လိုက်ရသည်။ သူ့ကို အံ့အားသင့်သွားစေသည်က တွက်ဆမှု အကြိမ်တစ်ရာထဲတွင် နှစ်ခုက သူ ရှုံးနိမ့်သွားလေသည်။

ဒီလူက ငါ့ကို နိုင်ဖို့ နှစ်ရာခိုင်နှုန်း ရှိနေတာလား…

ဝမ်ဝေ့က ထိုအရာကို မအံ့ဩမိပေ။ အကြောင်းမှာ တိုက်ပွဲသည် ရာနှုန်းပြည့် အာမခံထားခြင်းမရှိကြောင်း သိထားလေသည်။ သို့သော်လည်း လင်းဖန်သည် သူ့ကို အနိုင်ရရှိဖို့ မည်သည့်ဝှက်ဖဲများ ရှိနေသည်ကို သိချင်မိ၏။

ကံဆိုးစွာဖြင့် သူ မြင်သည့် အနာဂတ်က ဝေဝါးနေကာ အကြမ်းဖျင်း ပုံရိပ်ကိုသာ မြင်တွေ့နိုင်လေသည်။ သူက အချိန်စည်းမျဉ်းကို နားမလည်သေးသည့်အတွက်ကြောင့်လား ဒါမှမဟုတ် ကောင်းကင်တာအိုက ဝင်စွက်ဖက်သည့်အတွက်ကြောင့်လား သို့မဟုတ် လင်းဖန်ကိုယ်တိုင်က သူ့ကိုယ်သူ ကာကွယ်နိုင်လောက်အောင် အချိန်စည်းမျဉ်းကို နားလည်သဘောထား၍လားတော့ မသိပေ။

ထိုသုံးခုလုံးပေါင်းစပ်နေသည်လည်း ဖြစ်နိုင်ချေ ရှိ၏။

မည်သို့ပင်ဆိုစေကာမူ သူက ထိုတိုက်ပွဲရလဒ်ကို မြင်တွေ့နိုင်သေးသည်။ အောင်မြင်မှု ၉၈ ကြိမ်ထဲ သူက လင်းဖန်ကို ဆယ်ကြိမ် ဖမ်းမိခဲ့ပြီး ကျန်သည့် အကြိမ်များက သူထွက်ပြေးသွားခဲ့သည်။

ထို့နောက် ဝမ်ဝေ့က ထိုလူ၏ ခန္ဓာကိုယ်ကို လေ့လာဖို့ စမ်းသပ်ချက်အမျိုးမျိုး၊ အတွေးအခေါ်အမြောက်အများနှင့် အချိန်စက်ဝန်းအမြောက်အများ ဖြတ်ကျော်အပြီးတွင် ဝမ်ဝေ့က အောင်မြင်သည့် နည်းလမ်းကို ရှာတွေ့ခဲ့သည်။

သူက လင်းဖန်၏ ဟွင်သွမ်း ရုပ်ခန္ဓာကို ရယူဖို့ ကံကြမ္မာရုပ်သေးရုပ် ရုပ်ခန္ဓာအား လက်လျှော့ခဲ့သည်။ ထို့နောက် သူက ကံကြမ္မာတာအိုကို ကျင့်ကြံ၏။ ထိုနည်းလမ်းအား အသုံးပြုကာ သူသည် သေဆုံးမှုကို မမြင်ရတော့ဘဲ စမ်းသပ်ချက်ကို အောင်မြင်သွားလေသည်။

သို့သော်လည်း သူက ဓားမော့ကိုင်ဆောင်သူ၏ ဇစ်မြစ်ကို ရှာမတွေ့ခဲ့ပေ။ ထိုအရာက ထူးဆန်းလာသည်။ မည်သို့ပင်ဆိုစေကာမူ ဝမ်ဝေ့က ထိုနည်းလမ်းကို အသုံးမပြုတော့ပေ။

သူက ရုပ်ခန္ဓာနှစ်ခု လိုချင်မိ၏။

ထို့ကြောင့် သူက လိုချင်သည့်အဖြေ တွေ့သည့်အထိ ဆက်တိုက် တွက်ချက်လိုက်သည်။

ကောင်းကင်ရုပ်ခန္ဓာများက ခန္ဓာကိုယ်အတွင်း စည်းမျဉ်းအပိုင်းအစ ကိန်းအောင်းနေပြီး ပိုင်ရှင်၏ အခြေခံအုတ်မြစ်ကို အားကောင်းစေရင်း ကျင့်ကြံနှုန်း၊ တိုက်ပွဲခွန်အားကို တိုးမြင့်စေကာ စည်းမျဉ်းကို နားလည်ဖို့ ကူညီပေးနိုင်သည်။

ထို့ကြောင့် ဝမ်ဝေ့က သူ့ကမ္ဘာဦးစိတ်ဝိညာဉ်အား အသုံးပြုကာ ဟွင်သွမ်းစည်းမျဉ်းအပိုင်းအစကို ရယူဖို့ ကြိုးစားခဲ့သည်။ ကံဆိုးစွာဖြင့် စည်းမျဉ်းအပိုင်းအစသည် ဝိညာဉ်ကို ဆေးကြောသွားပြီး ဒုတိယစည်းမျဉ်း အပိုင်းအစသည် ငြင်းဆန်မှုကို ဖြစ်လာစေ၏။

ထို့ကြောင့် သူက သူ့စိတ်ဝိညာဉ်အမှုန်များဖြင့် ကိုယ်ပွားတစ်ခု ဖန်တီးလိုက်သည်။ သူက ထိုအတွင်းမှ ကံကြမ္မာ အငွေ့အသက်ကိုပင် ဖယ်ရှားလိုက်၏။ သို့သော် ထိုနည်းလမ်းက အလုပ်မဖြစ်ဘဲ ဆက်တိုက် ငြင်းဆန်ခံနေရဆဲသာဖြစ်၏။

အဆုံးသတ်တွင် ဝမ်ဝေ့က သူ့ကမ္ဘာဦးစိတ်ဝိညာဉ်အား နှစ်ပိုင်းခွဲလိုက်ပြီး ပင်မနှင့် အခွဲဝိညာဉ်ဟူ၍ ဖြစ်သည်။

ပင်မဝိညာဉ်က ကံကြမ္မာစည်းမျဉ်းအပိုင်းအစ ပါရှိနေပြီး သူက သူတို့၏ စိတ်ဝိညာဉ်အမှုန် အခြေအနေသို့ ပြန်လည်ရောက်ခွင့်ပေးလိုက်သည်။

အခွဲဝိညာဉ်အတွက်မူ ဟွင်သွမ်းစည်းမျဉ်းအပိုင်းအစ ပါဝင်နေ၏။ ထိုနည်းလမ်းက အောင်မြင်လုနီးပါးဖြစ်ခဲ့သော်လည်း နောက်ဆုံးမိနစ်ပိုင်းတွင် ကျရှုံးသွားလေသည်။

ထို့ကြောင့် ဝမ်ဝေ့က သူ အကြောင်းအရင်း ရှာမတွေ့ခင်အထိ တွက်ချက်လိုက်သည်။

အခွဲဝိညာဉ်သည် ရုပ်ပိုင်းဆိုင်ရာခန္ဓာကိုယ်နှင့် ဆက်နွယ်မှုလိုအပ်ပြီး ထိုအခြေကျရာသည် ဟွင်သွမ်းစည်းမျဉ်းအပိုင်းအစကို ကိုင်ဆောင်ဖို့လိုအပ်ပေသည်။ ထို့ကြောင့် သူက ခန္ဓာကိုယ်အတွင်း အခြေတည်ရာ ကျောက်စူးအဖြစ် ဒုတိယနှလုံးသားကို ဖန်တီးလိုက်ရသည်။

နောက်ဆုံးတွင် သူက ဟွင်သွမ်းရုပ်ခန္ဓာနှင့် ကံကြမ္မာရုပ်သေးရုပ် ရုပ်ခန္ဓာနှစ်ခုလုံးရှိခြင်းကို အောင်မြင်သွားသည်။ ထိုနည်းလမ်း၏ တစ်ခုတည်းသော နောက်ဆက်တွဲမှာမူ သူ့ဝိညာဉ်ကို ခွဲလိုက်သည့်အတွက် ပြန်လည်ကုသဖို့ အချိန်တချို့ လိုအပ်လေသည်။

မည်သို့ပင်ဆိုစေကာမူ သူက မသေဆုံးဘဲ စစ်ဆေးမှုကို အောင်မြင်သွားလေသည်။ ဓားမော့ကိုင်ဆောင်သူက ပေါ်ထွက်မလာပေ။

ဝမ်ဝေ့က ကောင်းကင်တာအို၏ အကွက်ချမှု မရှိဘဲ နှစ်ဦးသားက ဘယ်တော့မှ မတွေ့ဆုံနိုင်ပေ။ ထို့ကြောင့် သူ သို့မဟုတ် သူမကို ကိုယ်တိုင်လိုက်ရှာဖို့ လိုအပ်လာသည်။

ကံဆိုးစွာဖြင့် ယခုက ထိုအချိန် မဟုတ်ပေ။ ဝမ်ဝေ့က သူ့ပုခုံးက ဝန်ထုပ်ဝန်ပိုးကြီးတစ်ခု ပေါ့သွားသလို ခံစားလိုက်ရ၏။ သူက ယခုအခါ ပိုမိုအသက်ရှူချောင်လာလေပြီ။

ထို့ကြောင့် သူက လင်းဖန်နောက် မလိုက်ခင် သူ့အမေအား ထိုသတင်းကို ပြောပြဖို့ ထွက်လာခဲ့၏။ သူ လာနေစဉ်အတွင်း ဝမ်ကျူက စောင့်ဆိုင်းနေသည်ကို မြင်လိုက်ရသည်။ ထိုစဉ် သူက ခံစားချက် ဆိုးဆိုးရွားရွားတစ်ခု ရရှိလာမိ၏။

“ သခင်လေး … လင်းဖန် သေသွားပြီ”

“ တကယ်လား။ ဒါက နောက်စရာကိစ္စ မဟုတ်ဘူးနော်” သူက လက်ဟန်ပြကာ ပြောလိုက်သည်။

“ သခင်လေး ကျင့်ကြံရေးဝင်ဖို့ မသွားခင်တုန်းက သူ့တည်နေရာအကြောင်းကို စုံစမ်းခိုင်းခဲ့တယ်လေ။ အဲဒါကြောင့် ကျွန်မ စုံစမ်းခဲ့တယ်”

ဝမ်ဝေ့က အသက်ပြင်းပြင်းရှူကာ စိတ်ငြိမ်အောင် ထိန်းလိုက်သည်။

“ ဘယ်အချိန်က ဖြစ်ခဲ့တာလဲ”

“ သခင်လေး သီးသန့်ကျင့်ကြံရေးဝင်ပြီး နောက်သုံးနှစ်ကြာတဲ့အချိန်မှာပါ။ သူ့သေဆုံးမှုကို ပြသွားတဲ့ မိုးမြေဖြစ်ရပ်တွေ ရှိတယ်”

ဤတစ်ကြိမ် သူက ၁၅နှစ်တာ သီးသန့်ကျင့်ကြံခဲ့ပြီး ထိုအချိန်လေးအတွင်း ကိစ္စများစွာက ပြောင်းလဲသွားနိုင်သည်ကို နားမလည်ပေ။

ဝမ်ဝေ့က သူမအား သတင်းအချက်အလက်များကို မေးမြန်းကာ အရှေ့ပိုင်းကုန်းမြေဆီ မသွားခင် အရင်းအမြစ်ခန်းမမှ တစ်စုံတစ်ခုကို ရယူဖို့ သွားခဲ့သည်။

သူက လူလုပ်ကမ်းခြေနှင့် ရေကန်ကြီးရှိနေသည့် စံအိမ်ကြီးတစ်ခုသို့ ရောက်ရှိလာလေ၏။ ထိုနေရာကို လူတချို့က စောင့်ကြပ်နေသော်လည်း ဝမ်ဝေ့က စိတ်ဝိညာဉ်တိုက်ခိုက်မှုဖြင့် ထိုလူများအား အိပ်စက်စေလိုက်သည်။

ထို့နောက် သူက ကံကြမ္မာဖတ်ရှုရေး နည်းစနစ်ဖြင့် ထိုနေရာ၏ အဖြစ်အပျက်များအား မျက်မြင်ကိုယ်တွေ့ မြင်ရဖို့ အသုံးပြုလိုက်သည်။ ထင်ထားသည့်အတိုင်း ကျန့်ဝူရွှမ်း၏ အခြေအနေနှင့် မတူဘဲ သူက မှုန်ဝါးဝါးသာ မြင်ရလေသည်။

ဝမ်ဝေ့က တုံ့ဆိုင်းခြင်း မရှိဘဲ ရွှေရောင်သတ္တုလုံးကို စုပ်ယူကာ နည်းစနစ်အား အားတိုးမြှင့်လိုက်သည်။ ယခင်နှစ်ရာချီပိုင်းတွင် ဂိုဏ်းက သူ အတုအယောင်ပင်ကို ဆေးလုံး ဖော်စပ်သည့်နည်းလမ်းမှ ကုသိုလ်များစွာ ရယူနိုင်ခဲ့သည်။

နောက်ဆုံးတွင် သူက ဖြစ်ပျက်သမျှအရာအားလုံးကို ရှင်းရှင်းလင်းလင်း မြင်လိုက်ရ၏။

လင်းဖန်နှင့် ရှုရှစ်တို့က ဖန်ခွက်ကို ကိုင်ဆောင်ရင်း သောက်သုံးနေကြသည်။

“ ကမ်းခြေပွဲတုန်းက သောက်စရာကို လွမ်းမိသား။ အဖေက နှစ်များစွာ ကြိုးစားပြီးတော့ အရင်းအမြစ်အများကြီးသုံးပြီး အဲဒီအရသာရအောင် ပြန်လည်ဖန်တီးခဲ့ပေမဲ့ သူက ဒီလို အရာမျိုးပဲ ဖန်တီးနိုင်ခဲ့တယ်” ရှုရှစ်က ပြောလိုက်သည်။

“ ဟုတ်တယ်။ အဲဒီပွဲက တကယ်ကို ထူးခြားတဲ့ အတွေ့အကြုံဖြစ်ခဲ့တာပဲ”

သူတို့နှစ်ဦးသားက ပျော်ရွှင်စွာ စကားစမြည်ပြောနေရင်း တစ်စုံတစ်ခုက စံအိမ်ရှိ အစီအရင်ကို အသက်ဝင်အောင် လုပ်လာကြောင်း ခံစားမိလိုက်ကြသည်။ ထို့ကြောင့် သူတို့က အလျင်အမြန် သွားရောက်စစ်ဆေးကြည့်လိုက်ကြ၏။ သိပ်မကြာခင် သူတို့က ဒဏ်ရာရနေသည့် ဆံပင်အစိမ်းရောင်နှင့် မိန်းမငယ်တစ်ဦးကို မြင်လိုက်ရသည်။

လေဟာနယ် မတည်ငြိမ်မှုအရ သူတို့အနေဖြင့် သူမသည် ဤနေရာသို့ မတော်တဆ ရောက်ရှိလာကာ အစီအရင်သို့ ထိမှန်သွားကြောင်း ပြောနိုင်လေသည်။

မိန်းမငယ်လေး၏ ဒဏ်ရာကို စစ်ဆေးကြည့်ပြီးသည့်နောက်တွင် ရှုရှစ်နှင့် လင်းဖန်တို့၏ အမူအရာက ပြောင်းလဲသွားသည်။ ဝမ်ဝေ့အတွက်မူလည်း အတူတူသာ ဖြစ်၏။

အကြောင်းမှာ ထိုမိန်းကလေးက စုယာဖြစ်နေ၍ ဖြစ်သည်။

“ ယောက်ျား ကျွန်မတို့ ဘာလုပ်ကြမလဲ”

“ သူမက ဒဏ်ရာရပြီး ဒီရောက်နေတယ်ဆိုတော့ သူမကို သတ်ပြီး ပြိုင်ပွဲကနေ ထုတ်လိုက်ကြရအောင်”

သူက ပြောလိုက်ရင်း လက်မြှောက်ကာ ကံကြမ္မာစည်းမျဉ်းကို လှုံ့ဆော်လိုက်သည်။ လင်းဖန်က စုယာလိုလူမျိုးကို သတ်ဖို့ရာ ကြံစည်ထားခဲ့ပြီးသား ဖြစ်၏။

လင်းဖန်က မလုပ်ဆောင်နိုင်ခင် စုယာက မျက်လုံး ဖြည်းဖြည်းချင်း ဖွင့်လာပြီး ရှုရှစ်အား ကြည့်ကာ “ လှလိုက်တဲ့ မိန်းကလေးပဲ။ ဒါက မသေမျိုးလောကလား”

သူမက ရေရွတ်လိုက်သည် “ မဟုတ်သေးပါဘူး။ ရှင်တို့က ဘယ်သူလဲ”

ရှုရှစ်နှင့် လင်းဖန်တို့က မျက်မှောင်ကြုတ်လိုက်ကြသည်။

“ ငါ့ကို မမှတ်မိဘူးလား”

“ ကျွန်မက မှတ်မိရမှာလား” စုယာက စိတ်ရှုပ်ထွေးစွာ ပြောလိုက်သည် “ ခဏလေး ကျွန်မက ဘယ်သူလဲ။ ကျွန်မနာမည်က ဘယ်သူလဲ”

နှစ်ဦးသားမျက်နှာအထက် မျက်မှောင်ကြုတ်မှုက ပိုမိုနက်နဲလာသည်။ စုယာသည် လက်ရှိအခြေအနေတွင် မှတ်ဉာဏ်ပျောက်ဆုံးသွားသည်ဟု အယောင်ဆောင်ခြင်းက ဆိုးရွားသည့် နည်းဗျူဟာတစ်ခု ဖြစ်ပေသည်။ ရှုရှစ်၏ မျက်ဝန်းအတွင်း အတွေးကောင်းတစ်ခု ပေါ်ထွက်လာသည်။

“ ကြည့်ရတာ အရင်တိုက်ပွဲမှာ ဒဏ်ရာရသွားတဲ့ပုံပဲ” သူမက ညင်ညင်သာသာပြုံးလိုက်သည် “ မင်းရဲ့ ဝိညာဉ်ကို စစ်ဆေးကြည့်ရအောင်”

“ အင်း ကောင်းပြီလေ”

ရှုရှစ်က သူမ၏ ကမ္ဘာဦးစိတ်ဝိညာဉ်ကို သတိထားကာ စစ်ဆေးပေးလိုက်စဉ် လင်းဖန်ကမူ သတိကြီးကြီး ထားထား၏။ သူ့ဇနီးသည် အတွေးကောင်းတချို့ရှိနေကြောင်း ခန့်မှန်းမိလိုက်သည်။ ထို့ကြောင့် သူမ၏ သဘောအတိုင်း လုပ်ဆောင်ဖို့ ဆုံးဖြတ်လိုက်သည်။

ထို့နောက် ရှုရှစ်က စုယာ၏ ကမ္ဘာဦးစိတ်ဝိညာဉ်သည် အမှန်တကယ် ဒဏ်ရာရထားသောကြောင့် မှတ်ဉာဏ် ပျောက်ဆုံးသွားနိုင်ချေရှိကြောင်း အံ့ဖွယ်အသိစိတ်မှ ပြောပြလာသည်။

“ မင်းရော ဘယ်လိုတွေးထားလဲ”

“ဒါက ပြီးပြည့်စုံတဲ့ အခွင့်အရေးပဲ…” ရှုရှစ်က အံ့ဖွယ်အသိစိတ်မှ ထပ်ပြန်ဖြေလိုက်သည်။

“ကျွန်မတို့တွေ သူ့ကို ရှင်က သူ့ယောက်ျားလို့ ယုံအောင်လုပ်ပြီးတော့ သူမရဲ့ စွမ်းအား၊ ခွန်အားနဲ့ဆိုရင် ကောင်းကင်အလိုဆန္ဒတိုက်ပွဲမှာ ရှင့်အတွက် အင်အားတစ်ခု ဖြစ်လာလိမ့်မယ်”

လင်းဖန်က ထိုအရာကို တွေးကြည့်ပြီးနောက် သဘောတူလိုက်သည်။

“ ယွမ်အာ ငါ့ကို မမှတ်မိဘူးလား။ ငါက မင်းယောက်ျားလေ” လင်းဖန်က ချဉ်းကပ်လာရင်း ပြောလိုက်သည်။

စုယာက ထိုအရာကို ကြားပြီး မျက်မှောင်ကြုတ်လိုက်၏။ သူက ထိုအခိုက်အတန့်တွင် တစ်စုံတစ်ခု မှားယွင်းနေသည်ဟု ခံစားမိလိုက်သော်လည်း သူမဘေးနားရှိ မိန်းမလှလေးက ခေါင်းညိတ်လိုက်သည်ကို မြင်သည့်အခါ စိတ်အေးသွားသည်။

“ အဲဒါဆိုတော့ ကျွန်မနာမည်က ယွမ်အာလား”

“ ဟုတ်တယ်။ မင်းနာမည်က ကျီယွမ်။ မင်းဆီမှာ မေးခွန်းတွေ အများကြီးရှိမယ်ဆိုတာ သေချာတယ်။ ဒါပေမဲ့ မင်းဒဏ်ရာတွေကို အရင်စစ်ဆေးကြည့်ရအောင်။ နည်းနည်းတော့ နာလိမ့်မယ်။ ဒါပေမဲ့ မခုခံနဲ့နော်”

စုယာက အနည်းငယ် တုံ့ဆိုင်းသွားသော်လည်း ယခင်တိုက်ပွဲသည် သူမ၏ မှတ်ဉာဏ်များအား ပျောက်ဆုံးသွားစေကြောင်း နားလည်လိုက်၏။

လင်းဖန်က သူမ၏ အသိစိတ်ပင်လယ်အတွင်းဝင်ကာ ဒဏ်ရာများအား ကုသယောင်ဆောင်လိုက်သည်။ ထိုအစား သူက သူမ၏ မှတ်ဉာဏ်များအပေါ် စည်းတံဆိပ်ထားကာ ချီယွီလျိုချင် စာအုပ်ကို အတင်းအကြပ် ထုတ်ယူလိုက်သည်။

စုယာ၏ ခုခံမှုမရှိသည့်အပြင် စာအုပ်က သေမျိုးတစ်ယောက် အသုံးပြုဖို့အတွက် အလွန်အားနည်းနေသည့် အခြေအနေဖြစ်နေ၍ လင်းဖန် ထင်ထားသည်ထက် ပိုမိုလွယ်ကူလှသည်။ ထို့နောက် သူက အာကာပြင်အက်ကြောင်းကိုဖွင့်ကာ ကြုံရာကျပန်း တည်နေရာတစ်ခုသို့ ပို့ဆောင်လိုက်၏။

သူက ယင်စန္ဒာနန်းဆောင်သည် ထိုအရာ၏ တည်နေရာကို နောက်ယောင်ခံမည့် နည်းလမ်းရှိနေသည်ကို သိလေသည်။ ထို့ကြောင့် သူက ရှင်းထုတ်ပစ်လိုက်ခြင်း ဖြစ်၏။ သူက နန်းဆောင်သည် စုယာထက် ထိုစာအုပ် ပျောက်ကွယ်သွားမှုကို ပိုမိုအလေးထားမည်မှန်း သိလေသည်။

ဖြစ်နိုင်သည့် ပြဿနာများအား ဖြေရှင်းပြီးသည့်နောက်တွင် နှစ်ဦးသားက လှပသည့် ဇာတ်ကြောင်းအတွင်း စတင်သရုပ်ဆောင်ကြတော့သည်။ သူက စုယာအား လင်းဖန်နှင့် သူမတို့၏ အတိတ်အကြောင်းနှင့် ချစ်မြတ်နိုးသည့် ဇာတ်ကြောင်းများအား ပြန်လည်ပြောပြခဲ့သည်။

သူတို့က တစ်ယောက်နှင့် တစ်ယောက် မည်မျှချစ်ကြောင်းကိုပင် ပြောပြခဲ့သည်။

သို့သော်လည်း ဝမ်ဝေ့က စုယာနှင့် ပတ်သက်ပြီး တစ်စုံတစ်ခု ထူးဆန်းနေသည်ကို သတိထားမိလိုက်သည်။ သူမ၏ အကြည့်များက ရှုရှစ်ကို ကြည့်သည့်အခါ တောက်ပနေသော်လည်း လင်းဖန်အတွက်မူ အနည်းငယ် သတိထားနေဟန်ပေါ်သည်။

အချိန်ကုန်ဆုံးလာသည်နှင့် သူမက ရှုရှစ်နှင့် ရင်းနှီးလာပြီး စွဲလမ်းမှုဟု ခေါ်ဆိုနိုင်လောက်အောင်အထိ မှီခိုမှု ဖြစ်တည်လာသည်။ ထို့နောက် တစ်ရက်တွင် သူမက ရုတ်ချည်း ပြောင်းလဲသွား၏။

သူမက လင်းဖန်ဆီ သွားကာ ယောက်ျားဟုခေါ်ဆိုပြီး မကြာခဏ အဖော်ပြုပေးကာ သူ့အတွက်ပင် ဟင်းများ ချက်ပေးလေ့ရှိသည်။ သူတို့၏ အကြံအစည်က မှားယွင်းခြင်းမရှိ ပြီးပြည့်စုံစွာ အဆင်ပြေနေဟန်ပေါ်သည်။

ထို့နောက်တွင် ကံကြမ္မာငင်သည့် အဖြစ်အပျက်တစ်ခု ဖြစ်ပွားသွားခဲ့သည်။

***