လေထဲမှ တိုက်ပွဲ

ရှန်းယိမြို့က ဤကုန်းမြေ၏ အဓိကမြို့တစ်မြို့ ဖြစ်သည်။

ရီဖူရှင်းနှင့် အခြားလူများက ရှန်းယိမြို့သို့ ရောက်ရှိသောအခါ လွှမ်းမိုးနိုင်သည့် ရှေးဟောင်းအရှိန်အဝါတစ်ခုကို ခံစားလိုက်ရသည်။ ဤ​မြို့၏ ဗိသုကာအတတ်ပညာက ခမ်းနားထည်ဝါကာ ရှေးကျလှပြီး မဟာလမ်းစဥ်အရှိန်အဝါတို့ကို ဆုပ်ကိုင်ထားသည်။ ၎င်း အဆောက်အအုံများက အလွန် ခိုင်ခံ့ကာ ကောင်းကင်​ဒေသ၊ မူလဘုံတို့နှင့် မတူညီသော တည်ဆောက်ပုံကို မြင်တွေ့နိုင်သည်။

ကုန်းမြေက လေဟာနယ်အတွင်း မုန်တိုင်းများကို ဖြတ်၍ အဆက်မပြတ် သွားလာနေခဲ့သည့်အတွက် ၎င်းအဆောက်အအုံများက အလွန်ခိုင်ခံ့ပြီး ရာသီဥတု၏ တိုက်စားမှုဒဏ်ကို ခံနိုင်ရည် ရှိစေရန် အလွန် ခိုင်ခံ့စွာ တည်ဆောက်ထားခြင်း ဖြစ်နိုင်သည်။ သို့မှသာ မုန်တိုင်းများ၏ ဖျက်ဆီးခံရခြင်းမှ ကာကွယ်နိုင်ပေလိမ့်မည်။

ရီဖူရှင်းနှင့် အခြားလူများက အဓိကမြို့တော်သို့ ရောက်ရှိလာပြီးနောက် သူတို့သည် များပြားလှသော နတ်အာရုံများက သူတို့ကို စူးစမ်းလေ့လာနေကြောင်း ခံစားမိသည်။ သူတို့အားလုံးက အစွမ်းထက်ကြပေသည်။ ယခု ရှန်းယိမြို့တွင် နေရာအသီးသီးမှ အစွမ်းထက်ကျင့်ကြံသူများစွာ စုဝေး​နေခဲ့ပေသည်။ ဒေသခံ ထိပ်သီးကျင့်ကြံသူများအပြင် အခြားအဓိကဘုံများမှ ကျင့်ကြံသူများလည်း ရှိနေပြီး သူတို့က အရာအားလုံးကို အာရုံစိုက်နေကြသည်။

ရီဖူရှင်းနှင့် အခြားလူများ၏ ရောက်ရှိမှုက အာရုံစိုက်မှုအချို့ကို ရယူနိုင်ခဲ့သည်မှာ ရှင်းလင်းပေသည်။

ရှန်းယိမြို့က ကျယ်ပြောလှသော်လည်း ထိုထိပ်သီးပုဂ္ဂိုလ်များ၏ နတ်အာရုံ၏ ရောက်ရှိနိုင်သော အကွာအဝေးမှာ အတော်လေး ကျယ်ပြောလှသည်။ ထိပ်သီးအဆင့် ကျင့်ကြံသူများအနေနှင့် သူတို့၏ နတ်အာရုံများက မြို့တစ်မြို့လုံးကိုပင် လွှမ်းခြုံနိုင်ရန် လုံလောက်ပေသည်။

ရီဖူရှင်း၏ နောက်မှ ရန်ဟောင်ချန်းနှင့် အခြားကျင့်ကြံသူများ၏ နတ်အာရုံများ ဖြန့်ကျက်လာပြီး ရှန်းယိမြို့အတွင်းမှ ကျင့်ကြံသူများကို စူးစမ်းလိုက်သည်။

ရီဖူရှင်းသည်လည်း တူညီစွာ လုပ်ဆောင်ခဲ့၏။ သူသည် ကောင်းကင်အမြင့်၌ ရပ်နေခဲ့ပြီး နတ်အာရုံကို ထုတ်လွှတ်ကာ ကျယ်ပြောသည့် အဆုံးမဲ့နေရာတစ်ခွင်အား လွှမ်းခြုံသွားစေသည်။ သူသည် ကျင့်ကြံသူများစွာ စုဝေးနေသော နေရာတစ်ခုကို သတိထားမိလိုက်သည်။ မူလဘုံ၏ ထိပ်သီးအင်အားစုများမှ ကျင့်ကြံသူများသည်လည်း ထိုနေရာ၌ စုဝေးနေပုံရသည်။

ထို့ပြင် ထိုထူးခြားသော နေရာက သူ၏ သိလိုစိတ်ကို နှိုးဆွ​နေသည်။ ထိုနေရာမှ ထုတ်လွှတ်နေသည့် အရှိန်အဝါက အလွန် ထိတ်လန့်ဖွယ်ပင် ဖြစ်သည်။

"သွားကြစို့။" ရီဖူရှင်းက ပြောလိုက်ပြီး သူ့အဖွဲ့ထဲမှ လူများက ချက်ချင်းပင် ထိုနေရာသို့ သွားလိုက်ကြသည်။ ထိုနေရာရှိ လူတိုင်းက အလေးအနက် ဖြစ်နေပုံရလေသည်။ သိသာစွာပင် ရီဖူရှင်းတစ်ယောက်တည်းသာ ၎င်းကို သတိပြုမိခြင်း မဟုတ်ပေ။ အခြားလူများသည်လည်း ထိုနေရာရှိ ဇဝေဇဝါဖြစ်ဖွယ် အနေအထားကို သတိပြုမိကြပေသည်။

သူတို့က ထိုနေရာ၏ အစွန်အဖျားသို့ ရောက်လာရန် အချိန်သိပ်မကြာလိုက်ပေ။ ထိုနေရာက အလွန် ကျယ်ပြောလှပြီး ထိပ်သီးအင်အားစုများမှ အသီးသီးမှ ကျင့်ကြံသူများက မတူညီသော နေရာများ၌ ဖြန့်ကျက် နေရာယူထားပေသည်။ သူတို့ကြားတွင် အချို့သော အင်အားစုများမှ ကျင့်ကြံသူများက ကြောက်မက်ဖွယ် အရှိန်အဝါတို့ ရှိကြပြီး ထိတ်လန့်တုန်လှုပ်စရာကောင်းလှသော အစွမ်းထက် အင်အားပင် ဖြစ်သည်။

ယခင်က အခြားထိပ်သီးအင်အားစုများနှင့် ယှဥ်လျှင် ရီဖူရှင်း ကိုယ်စားပြုသော ကောင်းကင်အာဏာစက်ကျောင်းတော်၏ အင်အားစုသည်လည်း သေချာပေါက် အားကောင်းလှပေသည်။ သူတို့ထံ၌ ဒုတိယအဆင့် နတ်ဘုရားကပ်ဘေးကို ဖြတ်ကျော်နိုင်ခဲ့သူ လစ်လပ်နေသည်မှအပ အင်အားစုအနည်းငယ်သာ သူတို့ကို ယှဥ်နိုင်စွမ်းရှိသည်။ သို့သော် ဤအမွေအနှစ်မြို့အတွင်း သူတို့ထက် အားကောင်းသော အင်အားစုများစွာကို ရှာဖွေတွေ့ရှိခဲ့ပေသည်။

မှော်နက်လောကမှ လူများလည်း ရှိနေသည်။ ငရဲဘုရင်သည် မှော်နက်လောကမှ ထိပ်သီးအင်အားစုများနှင့်အတူ ထိုနေရာ၌ ရှိနေခဲ့၏။ ထို့ပြင် ယခင်က ရီဖူရှင်း မမြင်ဖူးခဲ့သော နတ္ထိဘုံမှ ကျင့်ကြံသူများလည်း ရှိနေပေသည်။ သိသာစွာပင် သူတို့သည် မူလဘုံ၏ ပြင်းထန်သော အပြောင်းအလဲများကြောင့် ရောက်လာကြခြင်း ဖြစ်ပေသည်။

ထိုအင်အားစုနှစ်ခုက ရောက်ရှိနေသည်မှာ အချိန်တစ်ခု ကြာပြီဖြစ်ကာ နောက်ထပ်တစ်နေရာ၌ ဖြောင့်မတ်သော အငွေ့အသက်များနှင့် ထူးခြားဆန်းကြယ်လှသော အရှိန်အဝါတို့ကို ပိုင်ဆိုင်ထားသည့် အစွမ်းထက်လူတစ်စုက ရှိနေခဲ့သည်။ သူတို့ထဲမှ တစ်ယောက်ချင်းစီတိုင်းတွင် ကောင်းမွန်လှသော ကိုယ်နေဟန်ထားများရှိကြပြီး ပြိုင်ဘက်ကင်းပုံစံများ ရှိကြသည်။ ထို့ပြင် သူတို့ထဲမှ မည်သူမဆို အံသြဖွယ်ကောင်းလောက်သည့် အပြုအမူနှင့်သဏ္ဌာန်များ ရှိကြသည်။

သူတို့က လူသားဘုံများ ကျင့်ကြံသူများပေလားဟု ရီဖူရှင်းက တွေးလိုက်သည်။ နတ်ဆိုးလောကမှ ကျင့်ကြံသူများကလည်း နောက်ထပ် တစ်နေရာတွင် ရှိနေကြပြီး သူတို့၏ အရှိန်အဝါက ငြင်းဆန်၍မရနိုင်သော လွှမ်းမိုးမှုများ ရှိလေသည်။ ရီဖူရှင်းကို ရှုံးနိမ့်ခဲ့သည့် ရှောင်းမုသည်လည်း ထိုနေရာ၌ ရှိနေခဲ့သည်။ အနောက်ဘက်လောကမှ ဗုဒ္ဓကျင့်ကြံသူများလည်းရှိနေပြီး သူတို့ကို အလွယ်တကူ ရှာဖွေတွေ့နိုင်ပေသည်။ ခန့်မှန်းရသလောက် ထိုသူများက ကောင်းကင်ဘုံ သို့မဟုတ် လူသားဘုံမှ ကျင့်ကြံသူများ ဖြစ်နိုင်သည်။

သို့သော် ကောင်းကင်ဘုံက လျှို့ဝှက်ဆန်းကြယ်လှပြီး ထင်ပေါ်အောင် ပြုမူခြင်းရှိလိမ့်မည် မဟုတ်ပေ။ ဤကျင့်ကြံသူတစ်စုတွင် ထိုမျှ ထူးခြားလှသည့် အရှိန်အဝါတို့ ရှိနေပြီး တစ်ခုတည်းသော ဖြစ်နိုင်ချေမှာ သူတို့က လူသားဘုံမှ ဖြစ်ပေလိမ့်မည်။

ထို့ပြင် ထူးခြားဆန်းကြယ်လှသောအရှိန်အဝါတို့နှင့် အင်အားစုတချို့အပါအဝင် ကောင်းကင်ဒေသမှ ထိပ်သီးအင်အားစုများစွာ ရှိနေကြသည်။ မူလဘုံသည် ကောင်းကင်ဒေသနှင့် သက်ဆိုင်သည့် နယ်မြေတစ်ခုဖြစ်ကြောင်း သတ်မှတ်၍ ရနိုင်နေဆဲ ဖြစ်သောကြောင့် ကောင်းကင်ဒေသမှ ကျင့်ကြံသူများစွာ ရှိနေခြင်းမှာ အံ့သြစရာ မဟုတ်ပေ။ နေရာအသီးသီးမှ ကိုယ်စားပြုသည့် ကျင့်ကြံသူများအားလုံးက ဤနေရာ၌ ရှိနေသော်လည်း အခြားဘုံများနှင့် ပတ်သတ်ခြင်းမရှိကြချေ။

ကောင်းကင်ဒေသမှ ထိပ်သီးပုဂ္ဂိုလ်အချို့က ကမ္ဘာတစ်ခုစီ၏ အင်ပါယာနန်းတော်များမှ ကျင့်ကြံသူများထက် အနည်းငယ်မှ လျော့နည်းလိမ့်မည် မဟုတ်ပေ။

ဤနေရာ၌ သာမန်ပါရမီရှင်များက မှေးမှိန်ရပေလိမ့်မည်။

ရီဖူရှင်းက ထိုကျင့်ကြံသူများကို စူးစမ်းလေ့လာနေစဥ် အခြားကျင့်ကြံသူများကလည်း သူ့အား လေ့လာနေ၏။ သူ့အပေါ်တွင် နတ်အာရုံများစွာ ကျရောက်နေခဲ့သည်။ ရှင်းလင်းစွာပင် သူတို့က ရီဖူရှင်း မည်သူဖြစ်ကြောင်း သိရှိပြီး ဖြစ်သည်။ မှော်နက်လောကနှင့် နတ်ဆိုးလောကမှ လူများက မိတ်ဆက်စရာမလိုသလို ကောင်းကင်ဒေသမှ လူများသည်လည်း သူ့ကို သိကြပေသည်။

ရီဖူရှင်းကို နတ်အာရုံများနှင့် စူးစမ်းလေ့လာနေသူများသည် သူ၏ ဂုဏ်သတင်းကိုသာ ကြားဖူးပြီး တွေ့ဖူးခဲ့ခြင်း မရှိသည့် သူများ ဖြစ်ပေသည်။ သူက သတ္တမဆင့်ရန်ဟောင်တစ်ပါးဖြစ်ပြီး မူလဘုံ၏ နံပါတ်တစ်ပါရမီရှင်ဖြစ်ကာ မူလဘုံကို အုပ်ချုပ်သည့် အရည်အချင်းရှိ ပါရမီရှင်တစ်ယောက် ဖြစ်လေသည်။ သူသည် ကောင်းကင်ဒေသမှ ပါရမီရှင်များအားလုံးထက် သာလွန်သူတစ်ယောက်ဖြစ်ကာ မဟာအင်ပါယာများစွာ၏ ဆက်ခံသူလည်း ဖြစ်သေးသည်။ သူနှင့် ယှဥ်ပြိုင်နိုင်သူ မည်သူမှ မရှိပေ။ ထို့ပြင် သူ့ကို ကာကွယ်ရန် ခိုင်မာသော ကျောထောက်နောက်ခံအဖြစ် လေးမျက်နှာကျေးရွာမှ လျှို့ဝှက်ဆန်းကြယ်သော ဆရာသခင်ကလည်း ရှိနေသေးသည်။ ဆရာသခင်က မဟာအင်ပါယာအဆင့်မှ လျှို့ဝှက်ဆန်းကြယ်သော ကျင့်ကြံသူတစ်ယောက်ပင် ဖြစ်နိုင်သေးသည်။

သူ့ပေါ်သို့ ကျရောက်လာသော နတ်အာရုံများစွာသည် အလွန် မလေးမစားနိုင်လှပြီး သူ့အား အတော်လေး စိတ်မကျေမနပ် ဖြစ်စေသည်။ နတ်အာရုံကို အသုံးပြု၍ ခိုးကြောင်ခိုးဝှက် ကြည့်ရှုခြင်းက မယဥ်ကျေးသော အပြုအမူအဖြစ်ပြီး လျင်မြန်သော ထောက်လှမ်းမှုသည်ပင် တစ်ဖက်လူ၏ တည်ရှိမှုကို သိရှိရန် လုံလောက်နေပြီ ဖြစ်သည်။ သို့သော် ထိုသို့ ထောက်လှမ်းလေ့လာခြင်းကို အချိန်ကြာမြင့်စွာနှင့် စုန်ချည်ဆန်ချည် လေ့လာနေပါက ရိုင်းပြလှသည့် အပြုအမူအဖြစ် သတ်မှတ်၍ ရနိုင်ပေသည်။

သို့သော် ထိုအခိုက်အတန့်တွင် လူအများအပြားက ရိုင်းစိုင်းစွာ ပြုမူနေကြ၏။ သူတို့သည် နတ်အာရုံများကို ထုတ်လွှတ်ကာ ရီဖူရှင်းအား ခေါင်းအစခြေအဆုံး အပြန်ပြန်အလှန်လှန် ဆက်လက်အကဲခတ်နေခဲ့ပေသည်။

နတ်အာရုံတချို့မှာ အလွန် ရိုင်းစိုင်းလှစွာ ပြုမူနေပြီး ရီဖူရှင်းအား မျက်မှောင်ကြုတ်သွားစေသည်။ သူက အေးစက်စွာ ရယ်မောလိုက်ရင်း သူ၏ ကိုယ်ပိုင်နတ်အာရုံကို ချက်ချင်း ထုတ်လွှတ်လိုက်၏။ သူ၏ နတ်အာရုံက အခြားသောနတ်အာရုံများနှင့် ထိပ်တိုက်တွေ့ဆုံသွားသည်။ အချို့က ပြန်ဆုတ်ခွာသွားသော်လည်း အချို့က ခုခံကာ သူနှင့် ထိပ်တိုက်ရင်ဆိုင်ရန် ရွေးချယ်ခဲ့သည်။

ရီဖူရှင်းက မည်သည့် အင်ပါယာနန်းတော်ကမှ မဟုတ်သော်လည်း သူသည် မဟာအင်ပါယာများစွာ၏ ဆက်ခံသူဖြစ်ကာ မူလဘုံ၏ အရှင်သခင် ဖြစ်သည်။ သူ့အဆင့်အတန်းအရ မည်သူက သူ့ကို စိန်ခေါ်လာသည်ဖြစ်စေ မည်သည့်အခါမှ နောက်ပြန်ဆုတ်လိမ့်မည် မဟုတ်ပေ။

ပြင်းထန်လှသည့် ရန်လိုမှုတို့နှင့် နတ်အာရုံတစ်ခုက ရီဖူရှင်း၏ နတ်အာရုံနှင့် ထိပ်တိုက်တွေ့ဆုံခဲ့သည်။ သူသည် ထိုနတ်အာရုံကို ခြေရာခံလိုက်သောအခါ ပိုင်ရှင်ကို တွေ့ရှိသွား၏။ ထိုနေရာ၌ မှတ်မှတ်ထင်ထင် ရှိလောက်သော အရှိန်အဝါတို့နှင့် လူတစ်စု ရပ်နေခဲ့ကာ ထိုအထဲမှ ရွှေရောင်ဝတ်စုံ ဝတ်ဆင်ထားပြီး ချမ်းသာကြွယ်ဝသော အပြင်အဆင့်နှင့် တစ်ယောက် ဖြစ်သည်။ သူက လွှမ်းမိုးချုပ်ကိုင်နိုင်မှုနှင့် အံ့သြဖွယ်ကောင်းလောက်သည့် အရှိန်အဝါတို့ကို ပိုင်ဆိုင်ထားသော အဆင့်မြင့်ရန်ဟောင်တစ်ပါး ဖြစ်သည်။ သူက အလွန် လွှမ်းမိုးနိုင်စွမ်းရှိပြီး တောက်ပသည့် ရွှေရောင်နတ်ရောင်ဝါတို့နှင့် ဝန်းရံခံထားရသည်။

"နတ္ထိဘုံက ကျင့်ကြံသူ။" ရီဖူရှင်းသည် တစ်ဖက်လူက မည်သည့်နေရာမှ လာကြောင်း သတိပြုမိလိုက်သည်။

ဘုန်း...

ပြင်းထန်သည့် မုန်တိုင်းတစ်ခုက ကောင်းကင်ကို ​ဖြတ်ကာ ထွက်ပေါ်လာပြီး သူ့ထံသို့ ဦးတည်လာသည်။ နတ္ထိဘုံမှ ကျင့်ကြံသူက အဝေးမှနေ၍ ရီဖူရှင်းကို ကြည့်လိုက်ကာ ထိုအကြည့်များက လေဟာနယ်ကို ထွင်းဖောက်ပြီး ပြင်းထန်လှသည့် စွမ်းအားတို့နှင့် ရီဖူရှင်းထံ တိုက်ရိုက်ဆင်းသက်လာသလို ထင်မှတ်ရပေသည်။ ခမ်းနားထည်ဝါပြီး ခမ်းနားထည်ဝါပြီး လွှမ်းမိုးချုပ်ကိုင်နိုင်သည့် နတ်ဘုရားကဲ့သို့ ရီဖူရှင်းကို အနီးကပ် စစ်ဆေးနေသည်။

လွန်ခဲ့သော နှစ်နှစ်ဆယ်က မူလဘုံတွင် နတ္ထိဘုံသည် ရီဖူရှင်း၏ လက်ထဲ၌ ရှုံးနိမ့်ခြင်း အရသာကို မြည်းစမ်းခဲ့ရသည်။

တစ်ချိန်တည်းတွင် ရီဖူရှင်း၏ ခန္ဓာကိုယ်မှ တူညီစွာ အံ့သြထိတ်လန့်ဖွယ်ကောင်းသည့် စွမ်းအားက အရှိန်အဟုန်နှင့် ထွက်ပေါ်လာပြီး ထိုမဟာလမ်းစဥ်ဖိနှိပ်ခြင်းစွမ်းအားက လူတိုင်းကို ထွင်းဖောက်လာသလို ခံစားမိလိုက်ကြသည်။ မဟာလမ်းစဥ် ခန္ဓာကိုယ်ထက် ရစ်ပတ်နေသော နတ်အလင်းတို့က ပြင်းထန်သည့် အော်မြည်သံကို ကြားရစေပြီး ပေါက်ကွဲသံများက အဆက်မပြတ် ထွက်ပေါ်လာကာ ကြည့်ရှုနေသူများကို ကြောက်လန့်စေသည်။

ထိုစွမ်းအားနှစ်ခုက လေထဲ၌ တွေ့ဆုံသည့်အခါ မမြင်ရသည့် မုန်တိုင်းတစ်ခုက အနီးဝန်းကျင်၌ ဖွဲ့တည်လာပြီး အရပ်မျက်နှာအသီးသီးမှ ကျင့်ကြံသူများကို လေထဲမှ တိုက်ပွဲမှာ ထိတ်လန့်စွာ စောင့်ကြည့်နေစေပေသည်။