မျှော်မှန်းချက်ထက်ကျော်လွန်၍

ရီဖူရှင်းနှင့် အခြားလူများက ကျောင်းတော်သို့ ပြန်ရောက်ပြီးနောက် ချက်ချင်း ပြန်မထွက်ခွာကြသေးပေ။ အမွေအနှစ်များစွာ ထွက်ပေါ်လာသည်ဟုဆိုသော်လည်း ရီဖူရှင်းသည် သူက ၎င်းတို့အားလုံးကို သိမ်းပိုက်မထားနိုင်သည်အား သိရှိပေသည်။

ယခု မူလဘုံတစ်ခွင်၌ အပြောင်းအလဲများစွာက ပြင်းထန်စွာ ဖြစ်ပေါ်နေပြီး အမွေအနှစ် အများအပြားက ထွက်ပေါ်လာနေသည်။ သူက ထိုနေရာ၌ ထွက်ပေါ်လာသမျှ အရာအားလုံးကို သိမ်းပိုက်လိုက်ပါလျှင် လူအများအား ဆူပူလှုပ်ရှားလာစေပြီး တလောကလုံးနှင့် ရန်သူဖြစ်လာရန် သေချာပေသည်။

လက်ရှိအခြေအနေကို ဥပမာယူရမည် ဖြစ်သည်။ သူသည် မဟာအင်ပါယာများစွာ၏ အမွေအနှစ်ကို ရယူပိုင်ဆိုင်ထားသည့်အတွက်ကြောင့် အစွမ်းထက်ကျင့်ကြံသူများစွာ၏ အာရုံစိုက်စရာ ဖြစ်လာခဲ့သည်။ သူ့နောက်တွင် ဆရာသခင်သာ မရှိခဲ့လျှင် ထိုထိပ်သီးအင်အားစုများသည် သူနှင့် ကောင်းကင်အာဏာစက်ကျောင်းတော်ကို တိုက်ခိုက်ခဲ့ပြီး ဖြစ်ပေလိမ့်မည်။ သူတို့သည် သူ ကြယ်ကောင်းကင်ကမ္ဘာ၌​ ငြိမ်းငြိမ်းချမ်းချမ်း ကျင့်ကြံရန် စောင့်ဆိုင်းပေးနေလိမ့်မည် မဟုတ်ပေ။

အင်အားစုတစ်ခုချင်းစီက သူ့ကို ရင်မဆိုင်နိုင်သော်လည်း အင်အားစုများက ပေါင်းစပ်သွားမည်ဆိုလျှင် မည်သို့ လုပ်ရမည်နည်း။ သူတို့က ကြယ်ကောင်းကင်ကမ္ဘာ၌ သူ့ကို စိန်မခေါ်နိုင်ခဲ့လျှင်ပင် သူတို့က ကောင်းကင်အာဏာစက်ကျောင်းတော်ကို စိန်ခေါ်ရန် ​သေချာပေါက် မည်သည့် ပြဿနာမှ ရှိလိမ့်မည် မဟုတ်ပေ။

ရီဖူရှင်းသည် ဤသို့သော အခြေအနေအတွင်း ထွက်ပေါ်လာသမျှ အမွေအနှစ်အားလုံးကို အပိုင်သိမ်းမည့်အစား အချို့သော အခွင့်အရေးများကို လက်လွှတ်ပေးသင့်သည်ကို ကောင်းစွာ သိရှိထားသည်။

သို့သော် ရီဖူရှင်းသည် ကောင်းကင်အာဏာစက်ကျောင်းတော်ရှိ ကျင့်ကြံသူများကို စေလွှတ်ကာ အပြင်လောကတွင် လက်ရှိ ဖြစ်ပျက်နေသည်များကို လေ့လာစေသည်။ သူတို့က ယခု လှုပ်ရှားရန် အစီအစဥ်မရှိလျှင်ပင် မူလဘုံအတွင်းရှိ လက်ရှိလှုပ်ရှားများကို သိရှိထားရန် လိုပေသည်။ ယခု အဆင့်မြင့်ဘုံကိုးဘုံကို အပြည့်အဝ ထိန်းချုပ်ထားနိုင်ပြီး သူက မဟာလမ်းစဥ် ဘုံသုံးထောင်၏ အရေးအခင်းများကို သိရှိဖို့ရာ မျက်စိဖွင့်နားဖွင့်ထားရန် လိုအပ်သည်။ သို့သော် မဟာလမ်းစဥ်ဘုံသုံးထောင်မှ အဖြစ်အပျက်များကို သိရှိရန်အတွက် ဆက်သားများ စေလွှတ်ထားရန် လိုအပ်ပေသည်။

လက်ရှိတွင် သိထားသမျှ အရာအားလုံးက ပြန့်ကျဲနေသည်။ အချို့က အမွေအနှစ်များကို ရှာတွေ့သော်လည်း အများပြည်သူရှေ့ ချမပြခြင်း ဖြစ်နိုင်ပေသည်။ အဆုံးမှာတော့ မည်သူကမှ ဤယှဥ်ပြိုင်ခြင်းတွင် ပြိုင်ဘက်များ ပိုမိုများပြားလာမည်ကို မလိုချင်ကြပေ။

ရီဖူရှင်းဘက်မှ အင်အားသည် မူလဘုံအတွင်းမှ အင်အားစုများအားလုံး စုစည်းထားသည့် စကြဝဠာအဖွဲ့အစည်း အသေးစားကဲ့သို့ ဖြစ်ပေသည်။ မူလဘုံတစ်ခွင်လုံးက ဤကဲ့သို့ မသိနိုင်သော အနေအထားဖြင့် စတင် ဖွံ့ဖြိုးလာသောကြောင့် အားလုံးသော အင်အားစုများက စတင်စုစည်းလာကြသည်။

…

ထိုအချိန်တွင် မူလဘုံအတွင်း တစ်နေရာ၌ ရုတ်တရက် ကောင်းကင်နှင့် မြေကြီးက ကြောက်မက်ဖွယ် ပြင်းထန်သည့် အပြောင်းအလဲများ ဖြစ်ပေါ်လာသည်။ လေဟာနယ်သည် ကြောက်မက်ဖွယ် နက်မှောင်သော လေပွေတစ်ခု ဖွဲ့စည်းလာသဖြင့် စတင် ပြိုကျပျက်စီးလာပုံရသည်။ ထို့နောက် တောက်ပသည့် နတ်အလင်းတို့ ၎င်းမှ ထိုးထွက်လာပြီး နတ်အလင်းနှင့်အတူ လူတစ်စု ထွက်ပေါ်လာကာ လေပွေရှိရာသို့ ခြေလှမ်းလိုက်သည်။

ထိုလူစု၏ အရှိန်အဝါက အလွန် ထူးခြားလှပြီး အကြည့်တစ်ချက်နှင့်ပင် သာမန်မဟုတ်ကြောင်း ပေါ်လွင်နေစေသည်။ သူတို့သည် အနီးဝန်းကျင်ကို စူးစမ်းနေချိန်၌ သူတို့ ခေါင်းဆောင်၏ ရေရွတ်သံကို ကြားလိုက်ရသည်။ "မူလဘုံ။ ဒါက ကောင်းကင်လမ်းစဥ် ပြိုမကျခင် လောကဖြစ်ရမယ်။"

"အင်း။" သူ့ဘေးမှ အဘိုးအိုတစ်ယောက်က ခေါင်းညိတ်လိုက်သည်။

"မူလဘုံက ပျက်စီးကျန်ခဲ့တဲ့ နယ်မြေတစ်ခု ဖြစ်ခဲ့တယ်လို့ ကောလာဟလတွေ ရှိနေတာ ကြာပြီ။ အောက်ခြေမှာ ရှိနေတဲ့ လူတွေက ဒီမှာ ဆက်ပြီး ကျင့်ကြံနေပေမယ့် မူလဘုံအတွင်း အပြောင်းအလဲတွေ ရှိနေဆဲ ဖြစ်လိမ့်မယ်လို့ သူတို့ ဘယ်တုန်းကမှ ထင်ထားမိမှာ မဟုတ်ဘူး။ ဒါက ဘာကြောင့်ဖြစ်တာလဲဆိုတာ သိလား။" ခေါင်းဆောင်က ဆက်မေးလိုက်သည်။

သူတို့ဘေးရှိ ကျင့်ကြံသူများက အတွေးများနေဟန် ရှိပြီး ခေါင်းကို ယမ်းလိုက်သည်။

"တစ်စုံတစ်ယောက်က ဒီလောကကြီး ငြိမ်းချမ်းနေတာ အတော်ကြာပြီလို့ တွေးမိလို့ဖြစ်မယ်။" ထိုလူက အပြုံးနှင့် ပြောခဲ့သည်။ သို့သော် အဝေးသို့ စိုက်ကြည့်နေသည့် လျှို့ဝှက်နက်နဲသော မျက်လုံးများထဲရှိ အပြုံးတို့က တဖြေးဖြေး လွင့်ပျယ်လာပေသည်။ သူသည် နတ်အာရုံကို ဖြန့်ကျက်ကာ ကောင်းကင်နှင့် မြေကြီးကြားမှ လမ်းစဥ်ကို လေ့လာနေသည်။ သူသည် ရေရွတ်လိုက်သည်။ "အရမ်း အားနည်းလွန်းတယ်။"

မူလဘုံအတွင်းမှ အပြောင်းအလဲကြီးများအတွက် မဟုတ်လျှင် သူသည် ဤနေရာသို့ မည်သည့်အခါမှ ခြေချလိမ့်မည် မဟုတ်ချေ။

ထိုလူက ရှေ့သို့ ခြေလှမ်းလိုက်ပြီး အခြားလူများကလည်း တစ်ယောက်ပြီးတစ်ယောက် လိုက်ပါလာသည်။ ကောင်းကင်နှင့် မြေကြီးကြားတွင် လေဟာနယ်ကို ထိုးဖောက်လာသည့် ကြောက်မက်ဖွယ် အရှိန်အဝါတစ်ခု ရှိပြီး မမြင်နိုင်သည့် နတ်အလင်းတို့က သူတို့ရှိနေသည့် နေရာကို ဝန်းရံထားလိုက်ပြီး သူတို့အား နတ်ဘုရားများကဲ့သို့ ဖြစ်ပေါ်လာစေသည်။

တစ်ချိန်တည်းတွင် မူလဘုံ အခြားတစ်ဖက်၌ တူညီသော မြင်ကွင်းများက တပြိုင်နက်တည်း ဖြစ်ပေါ်လာသည်။ ရီဖူရှင်းနှင့် အခြားလူများ ကောင်းကင်အာဏာစက်ကျောင်းတော်၌ ဆွေးနွေးနေသည့်အချိန် ပို၍ များပြားသော အစွမ်းထက်ကျင့်ကြံသူများက ဤလောကအတွင်း ဝင်ရောက်လာနေကြသည်။ ၎င်းတို့ထဲမှ အများစုမှာ ယခင်က မူလဘုံကို  အရေးမပါသကဲ့သို့ ဖယ်ထုတ်ထားခဲ့သည့် ထိပ်သီးပုဂ္ဂိုလ်များ ဖြစ်ကြသည်။

မူလဘုံအတွင်း၌ အပြောင်းအလဲများက ဆက်လက်ဖြစ်ပေါ်နေခဲ့သည်။ မူလဘုံအတွင်း အချို့နေရာများတွင် လေဟာနယ်ထဲ၌ ကျင့်ကြံသူများစွာ ရပ်နေခဲ့သည်။ သူတို့၏ မျက်လုံးများက မည်သည်မှ မရှိသည့် ကျယ်ပြောလှသော အရှေ့ဘက် လေဟာနယ်သို့ ကြည့်နေခဲ့ကာ လေဟာနယ်တစ်ခွင်လုံးက လှုပ်ခါအော်မြည်နေသည်ကို မြင်လိုက်ရသည်။ လေဟာနယ်က စတင်အက်ကွဲလာပြီး ထိုကြောက်မက်ဖွယ် အက်ကြောင်းများမှ ကြီးမားလှသည့် ပုံရိပ်ကြီးများက တဖြေးဖြေး ထွက်ပေါ်လာကာ သူတို့ရှေ့၌ သိသာစွာ မြင်တွေ့လာရပေသည်။

သူတို့သည် ရှေးကျလှသည့် အရှိန်အဝါတစ်ခုနှင့် ရိုက်ခတ်ခံလိုက်ရပြီး ၎င်းသည် ရှေးခေတ်အခါမှ တောင်တန်းများကဲ့သို့ ထင်မှတ်ရသည်။ ထိုအတွင်း၌ ယိုယွင်းပျက်စီးနေသော လေထုရှိနေခဲ့ပြီး ပြင်းထန်သော သေခြင်းတရား၏ စွမ်းအားတို့ ပြည့်နှက်နေသည်။ ထိုနေရာရှိ လူတိုင်း၏ နှလုံးခုန်နှုန်းကို လျင်မြန်လာစေသည့် အသက်ရှုသံဖျော့ဖျော့ ရှိနေသည်။ ဤအရှိန်အဝါက နှစ်ပေါင်းများစွာကြာသည့်တိုင်အောင် ပျောက်ကွယ်မသွားသလို ထင်မှတ်ရသည်။

တစ်ချိန်တည်းတွင် မူလဘုံ၏ အခြားတစ်နေရာ၌ တူညီသော မြင်ကွင်းတို့ ​ထွက်ပေါ်လာသည်။ လေဟာနယ်က ကွဲအက်လာပြီး ဓားစွမ်းရည်နှင့် ထိပ်သီးကျင့်ကြံသူတချို့၏ ဖွင့်လှစ်ခြင်းကို ခံလိုက်ရသည်။ ဤလေဟာနယ်အတွင်း အက်ကြောင်းက အကျဥ်းထောင်တစ်ခုကဲ့သို့ ထင်မှတ်ရပြီး အားလုံးသော ရှေးဟောင်းအမွေအနှစ်တို့ကို ၎င်းတို့ထဲ ကန့်သတ်တားဆီးခံထားရပုံရသည်။

ဤအကျဥ်းထောင်က ချိုးဖျက်ခံလိုက်ရသောအခါ အမွေအနှစ်က ထွက်ပေါ်လာပေသည်။ တဖြေးဖြေးနှင့် အဆောက်အဦးများက လောကအတွင်း ပြန်လည်ထွက်ပေါ်လာပေသည်။ ဤအဆောက်အဦးများတွင် ရှေးဟောင်းအရှိန်အဝါတို့နှင့် ပြည့်နှက်နေသော်လည်း သေဆုံးခြင်းအငွေ့အသက်တို့ လိုက်ပါလာသည်။ အက်ကြောင်းများက ကျယ်ပြန့်လာပြီး ထိုအသစ်ထွက်ပေါ်လာသည့် အမွေအနှစ်တို့က ပိုမို ကြောက်မက်ဖွယ် ကောင်းလာပေသည်။ ၎င်းသည် အဆုံးမဲ့ ကြီးမားလှသော မြို့တစ်မြို့အဖြစ် ပြောင်းလဲသွားခဲ့သည်။ သူတို့သည် ရေခဲချွန်၏ ထိပ်ဖျား၌ ရှိနေသလို ထင်မှတ်ရသည်။

သို့သော် ဤမြို့က ပျက်စီးယိုယွင်းနေပုံရပြီး ကျိုးပဲ့နေသော နံရံများနှင့် ကြွင်းကျန်ရစ်သည့် အလင်းတန်းများက နေရာအနှံ့ ရှိနေခဲ့သည်။ ၎င်းသည် အတိတ်ခေတ်ကာလမှ ကပ်ဘေးတချို့ တွေ့ကြုံခဲ့ရပုံရသည်။ ထိုအမွေအနှစ်အချို့သည် တစ်ချိန်တစ်ခါက ဖျက်ဆီးခြင်း မခံခဲ့ရဘဲ မူလအခြေအနေအတိုင်း ကျန်ရှိနေခဲ့သည်မှာ အလွန် ကံကောင်းလှသည်။

လေဟာနယ်ကို ဖွင့်လှစ်လိုက်သည့် ထိပ်သီးပုဂ္ဂိုလ်က သူ့ဘေး၌ တိတ်ဆိတ်စွာ စောင့်ဆိုင်းနေကြပြီး ကြီးမားကာ ခမ်းနားထည်ဝါသည့် မြို့တစ်မြို့က ဖြေးဖြေးချင်း ထွက်ပေါ်လာပေသည်။

…

မူလဘုံတစ်ခွင်လုံးက အဆက်မပြတ် ပြောင်းလဲနေသည်။ ကောင်းကင်နှင့်မြေကြီးအတွင်း အပြောင်းအလဲများနှင့် ပတ်သတ်သည့် ဗျာဒိတ်အရ ၎င်းတို့သည် မူလဘုံမှ စတင်ပျံ့နှံ့လာလိမ့်မည်ဟု ဆိုခဲ့သည်။ ထိုအကြောင်းအရာသည် ယခုမှစကာ လူတိုင်းအကြောင်း သိလာပေလိမ့်မည်။ မူလဘုံအတွင်းမှ အပြောင်းအလဲများ အားလုံးသည် အစွမ်းထက်သည့် အဓိကအင်အားစုများကို တုန်လှုပ်စေသည်။

မဟာလမ်းစဥ်ဘုံသုံးထောင်မှ ကျင့်ကြံသူများသည်ပင် ထိုဗျာဒိတ်ကို ကြားဖူးကြပြီး သူတို့၏ နှလုံးသားများက အပြင်းအထန် လှုပ်ခတ်နေကြသည်။ အနာဂတ်တွင် မူလဘုံမှ မည်သို့ဖြစ်လာလိမ့်မည်ကို မည်သူမှ မသိကြပေ။

ကောင်းကင်အာဏာစက်ကျောင်းတော်အတွင်းရှိ အိမ်ငယ်လေးတွင် ရီဖူရှင်း ကျင့်ကြံနေပြီး ထိုနေရာသို့ လူတစ်စု ရောက်ရှိလာသည်။

သူတို့သည် အဘိုးမာ၊ အင်ပါယာနန်၊ ရှောင်တိန့်ထျန်းနှင့် သောမျိုးနွယ်စုခေါင်းဆောင်ကဲ့သို့ ကျင့်ကြံသူများ ပါဝင်သည်။ သူတို့အားလုံးက အပြင်ဘက်မှ ရောက်လာကြခြင်း ဖြစ်သည်။

"စီနီယာတို့အားလုံး ဘာကိစ္စများ ရှိလို့လဲ။" ရီဖူရှင်းသည် ထိပ်သီးပုဂ္ဂိုလ်များ၏ မျက်နှာထက်ရှိ လေးနက်သော အမူအရာကို ကြည့်လိုက်ပြီးနောက် မေးလာသည

"မူလဘုံအတွင်း အပြောင်းအလဲတွေက ကျုပ်တို့ မျှော်မှန်းထားတာထက် ကျော်လွန်နေပြီ။ နေရာအမျိုးမျိုးကနေ ရှေးဟောင်းအမွေအနှစ်တွေ ပိုပိုပြီး ထွက်ပေါ်လာနေတယ်။" အင်ပါယာနန်က ရီဖူရှင်းကို ပြောလိုက်သည်။

၎င်းကို ကြားသည့်အခါ ရီဖူရှင်း၏ မျက်လုံးများက ထက်ရှလာသည်။ အင်ပါယာနန်က ထိုသို့ ပြောလာလျှင် အပြင်ဘက်လောကမှ အခြေအနေများသည် သူ၏ စိုးရိမ်ပူပန်မှုထက် ကျော်လွန်သွားခဲ့သောကြောင့် ဖြစ်နိုင်ပေသည်။

"ထပ်ပြောရမယ်ဆိုရင် အပြင်ဘက်လောကက ကျင့်ကြံသူတွေ ရောက်လာကြပြီ။ ကောင်းကင်ဒေသက အာရုံစိုက်နေကြပြီး ရှေးဟောင်းနတ်ဘုရားကလန်လည်း ရောက်လာပြီလို့ ပြောကြတယ်။" အင်ပါယာနန်က ဆက်ပြောလိုက်သည်။ ရီဖူရှင်း၏ မျက်လုံးများက ပို၍ အာရုံစူးစိုက်လာခဲ့ကာ တီးတိုးပြောဆိုလိုက်သည်။ "ရှေးဟောင်းနတ်ဘုရားကလန်လား။"

"ဟုတ်တယ်။ ရှေးဟောင်းနတ်ဘုရားကလန်။ ရှေးဟောင်းနတ်ဘုရားကလန်က မရေတွက်နိုင်တဲ့ နှစ်များစွာအတွင်း နတ်ဘုရားရဲ့ အမွေအနှစ်တွေကို ဆက်ခံနိုင်စွမ်းရှိတဲ့ နတ်ဘုရားမျိုးဆက်တွေ မွေးထုတ်ပေးနိုင်ခဲ့တယ်။ အဲဒါကြောင့် သူတို့ကို ရှေးဟောင်းနတ်ဘုရားကလန်လို့ ခေါ်တာ။ သူတို့က အထွတ်အထိပ်မှာ ရပ်တည်နေတဲ့ အစစ်အမှန် အင်အားစုတစ်ခုပဲ။ အင်ပါယာနန်းတော်ကတောင် သူတို့ကို လေးစားရတယ်။" အင်ပါယာနန်က ပြောလိုက်သည်။ ရီဖူရှင်းသည် အင်ပါယာနန်၏ စကားကို ကြားသောအခါ မလွယ်ကူသလို ခံစားလိုက်ရသည်။

ဤတစ်ကြိမ်၌ ကြည့်ရသည်မှာ လောကတစ်ခုလုံး ပြိုကွဲပျက်စီးသွားတော့မလို ထင်မှတ်ရပေသည်။