အလိမ်အညာ

သမားတော်မော့က ဟန်လိ မူလရပ်နေရာတွင် ခြေချလိုက်သည်။ ရပ်တန့်ခြင်းမရှိဘဲ သူက ဟန်လိဘက်သို့ လှည့်ကာ မျက်နှာချင်းဆိုင်လိုက်သည်။ သူ့မျက်နှာထက်မှ ဂုဏ်ယူနေသော အကြည့်တို့က ပျောက်ကွယ်သွားပြီ ဖြစ်သည်။ ထို့အစား သမားတော်မော့၏ မျက်လုံးထဲတွင် ထိတ်လန့်တုန်လှုပ်မှုများသာ ကျန်ရစ်နေခဲ့၏။

ထိုအချိန်တွင် ဟန်လိသည်လည်း အခြေအနေ သိပ်မကောင်းလှပေ။ သူ့ နဖူးထက်တွင် ချွေးများသီးနေခဲ့ပြီး ပင့်သက်ရှိုက်လိုက်မိပေသည်။ သူ့မျက်နှာက ဖြူဖျော့နေသော်လည်း သူ့ပါးပြင်တို့က ထူးဆန်းသော အနီရောင်ဖြင့် နီမြန်းနေခဲ့သည်။

ထိုလက္ခဏာများအားလုံးက ညွှန်ပြနေသည်မှာ တစ်ချက်သာရှိသည်။ ဟန်လိသည် သမားတော်မော့၏ ထိန်းချုပ်မှုကို ရှောင်ရှားပြီး သူ့အသက်ကို ကယ်တင်ရန် စွမ်းအားအများစုကို အသုံးပြုခဲ့ရသည်ဟု ဆိုလိုပေသည်။ သူသည် နောက်တစ်ကြိမ်၌ တူညီသော လှည့်ကွက်ကို အသုံးမပြုနိုင်တော့ချေ မြင့်မား

အသက်ပြင်းပြင်းရှုလိုက်ပြီး ဟန်လိက အရိပ်မြူခိုးခြေလှမ်းကို အသုံးပြုခြင်းမှ ဖြစ်ပေါ်လာသည့် ကြွက်သားများ နာကျင်မှုကို ဖြေလျှော့ရန် ကြိုးစားလိုက်သည်။ သူ ယခု လုပ်နိုင်သည့်အရာအားလုံးမှာ နောက်တစ်ကြိမ် တိုက်ခိုက်ရာ၌ အနိုင်ရရှိမည့် အခွင့်အရေးတိုးလာအောင် ရရှိလာသည့် အချိန်ကို ကောင်းကောင်းအသုံးချရန်သာ ဖြစ်သည်။

ဟန်လိက သူ့ဘယ်ဘက်လက်ကို တစ်ချက်ငုံ့ကြည့်လိုက်သည့်အခါ အနည်းငယ်တုန်ယင်နေဆဲ ဖြစ်သည်ကို မြင်လိုက်ရသည်။ သူ၏ ထုံကျဥ်နေသော ဘယ်ဘက်လက်က ဓားတိုကို ကိုင်ဆောင်အသုံးပြုနိုင်ရန် နည်းလမ်းမရှိပေ။ ကြည့်ရသည်မှာ သူ၏ ဘယ်ဘက်လက်နှင့် ဓားတိုအား ကိုင်ဆောင် အသုံးပြုနိုင်ရန် ကြိုးကြိုးစားစား လေ့ကျင့်ခဲ့ခြင်းက အချည်းနှီးဖြစ်သွားပုံရပေသည်။ သူက နောက်ပိုင်း တိုက်ခိုက်မှုအတွက် သူ့ညာဘက်လက်ကို အသုံးပြုရန်သာ တတ်နိုင်သည်။

ထိုသို့တွေးလိုက်မိသည့်အခါ သူက ခါးသက်စွာ ပြုံးလိုက်သည်။ သူ၏ အင်အားအများစုက ကုန်ဆုံးသွားခဲ့ပြီဖြစ်ကာ အရိပ်မြူခိုးခြေလှမ်းကို နောက်ထပ် အသုံးပြုရန် မဖြစ်နိုင်တော့ပေ။ အဆိုးဆုံးမှာ သူက တိုက်ခိုက်ရန် လက်တစ်ဖက်တည်းကိုသာ အသုံးပြုနိုင်တော့ခြင်း ဖြစ်သည်။ ဤအခြေအနေထက် ဆိုးဝါးသည်မှာ မရှိနိုင်တော့သဖြင့် သူက ဝှက်ဖဲကို အသုံးပြုရန် ဆုံးဖြတ်လိုက်သည်။

ဟန်လိက အိမ်အပြင်ဘက်မှ နေမင်းကို လှမ်းကြည့်ကာ အနေအထားကို တွက်ချက်လိုက်ပြီး နောက်ထပ် နည်းစနစ် ထုတ်အသုံးပြုရန် အချိန်ကောင်းကို တွက်ချက်လိုက်သည်။

သူက နံရံတွင် စိုက်ဝင်နေသည့် ဓားတိုကို တစ်ချက်ကြည့်လိုက်ပြီး သူက သူ၏ လက်နက်ကို ပြန်လည်မရယူနိုင်သည်အား သိရှိလိုက်သည်။ သမားတော်မော့က သူ့အား ပြန်သွားယူခွင့်ပြုလိမ့်မည် မဟုတ်ပေ။

ဟန်လိသည် အနည်းငယ် တုန့်ဆိုင်းနေပြီးနောက် သူ့အိတ်ထဲမှ နောက်ထပ် လက်နက်တစ်ခုကို ထုတ်ယူလိုက်သည်။ ထိုတစ်ချောင်းက ခြောက်လက်မခန့်ရှည်သည့် ဓားအိမ်ပါသော ဓားအတိုလေးတစ်လက်ဖြစ်ပြီး အလွန် တိုလွန်းသည့်အတွက် ဓားအစား ဓားမြှောင်ဟု ခေါ်ရပေလိမ့်မည်။ ၎င်းကို ဓားအိမ်မှ ဆွဲထုတ်လိုက်သည့်အခါ ပုံမှန်မဟုတ်စွာ ထူထဲသော်လည်း အသွားကို ချွန်မြထက်ရှအောင် သွေးထားခဲ့သည့် သာမန်ဓားမြှောင်တစ်လက်နှင့် တူနေသည်ကို တွေ့လိုက်ရသည်။

ဟန်လိက ဓားအိမ်ကို ဘေးသို့ ပစ်ထုတ်လိုက်ပြီး ညာဘက်လက်နှင့် ဓားမြှောင်အား ပြောင်းကိုင်လိုက်သည်။ သူက ညာဘက်လက်ကို ဆန့်ထုတ်ကာ ခုခံကာကွယ်သည့် အနေအထားနှင့် သမားတော်မော့အား ဓား​မြှောင်ဖြင့် ညွှန်လိုက်သည်။

သမားတော်မော့သည် ဟန်လိ၏ အပြုအမူကို မြင်သောအခါ သူက တိုက်ခိုက်ရန် အလျင်မလိုခဲ့ပေ။ သူက လက်နှစ်ဖက်ကို နောက်သို့ပစ်လိုက်ကာ ကြင်နာတတ်သည့် မျက်နှာထားနှင့် နူးညံ့ညင်သာစွာ ပြောလိုက်သည်။

"ဟန်လိ မင်းက ကျုပ်ရဲ့ တိုက်ခိုက်မှုတွေကို ထပ်ခါထပ်ခါ ရှောင်တိမ်းနိုင်ပြီး ကျုပ်ကို အံ့အားသင့်စေခဲ့ပေမယ့် မင်းရဲ့ ကံက အမြဲတမ်း ကောင်းနေလိမ့်မယ်လို့ ထင်လား။ မင်း အခုလေးတင် သုံးသွားတဲ့ လှုပ်ရှားမှုနည်းစနစ်က အတော်လေး ကောင်းမွန်ပေမယ့် အဲဒီမှာ အကန့်အသတ်တော့ရှိမှာပဲ။ မင်းရဲ့ ရုပ်ပိုင်းဆိုင်ရာခွန်အားကို ချင့်တွက်ကြည့်ရင် မင်းအနေနဲ့ အဲဒါကို နောက်တစ်ခါ ထပ်သုံးဖို့ မဖြစ်နိုင်လောက်တော့ဘူး။ မင်း အစကတည်းက အညံ့ခံထားလိုက်သင့်တာ။ ကျုပ်မှာ မင်းကို ဆိုးဆိုးဝါးဝါး ထိခိုက်စေလိုတဲ့ စိတ်မရှိတာ အခုလေးတင် မမြင်လိုက်ဘူးလား။ ကျုပ်စကားကို နားထောင်စမ်းပါ။ မင်းတွေးသလောက် ဆိုးဝါးလိမ့်မှာ မဟုတ်ဘူး။"

သမားတော်မော့၏ သဘောထားအပြောင်းအလဲရ ဟန်လိတစ်ကိုယ်လုံးကို ကြက်သီးမွေးညင်းများ ထလာစေသည်။ သူသည် သွေးအေးရက်စက်သည့် ခံစားချက်မရှိသော ပုဂ္ဂိုလ်အဖြစ်မှ ကြင်နာတတ်သည့် ဆရာသမားတစ်ယောက် အဖြစ် ပြောင်းလဲသွားခဲ့ပေသည်။ ယခု သူက အဓိပ္ပါယ်​ပြည့်ဝပြီး စိတ်ထဲထိစေနိုင်သည့် စကားလုံးများကို အသုံးပြု၍ ဟန်လိကို အညံ့ခံစေချင်နေသည်။ ဟန်လိက မည်သို့ပြောရမည်ကိုပင် မသိတော့ပေ။ သမားတော်မော့သည် ဟန်လိက အလွန် တုံးအပြီး ဤကဲ့သို့ သိသာလှသည့် အလိမ်အညာတွင် ကျရှုံးသွားလိမ့်မည်ဟု အမှန်တကယ် တွေးနေခဲ့သည်လား။

သို့သော် သူ့စကားလုံးများသည် ဟန်လိကို ယုံကြည်ချက်အချို့ ရလာစေခဲ့သည်။ သမားတော်မော့က စိတ်ဓာတ်ကျမနေခဲ့လျှင် ဟန်လိကို အရူးလုပ်ရန် ဤကဲ့သို့ ကလေးဆန်သည့် အကွက်မျိုး သုံးလိမ့်မည် မဟုတ်ပေ။

ဟန်လိက တခဏမျှ လေးလေးနက်နက် တွေးတောနေခဲ့သည်။ ထို့နောက် သူက သက်ပြင်းချ၍ ခေါင်းကို ယမ်းလိုက်သည်။ စကားတစ်ခွန်းမှမဆိုဘဲ သူက သမားတော်မော့ရှေ့၌ ဓားမြှောင်ကို ဝှေ့ယမ်းကာ သူ၏ ငြင်းဆန်မှုကို ပြသလိုက်သည်။

သမားတော်မော့၏ နဖူးထက်မှ သွေးကြောများက ရုတ်တရက် ဖောင်းကြွလာသည်။ ဟန်လိက သူ့စကားများကို လျစ်လျူရှုကာ သူ့ကို ရန်စရန် လက်နက်အား အသုံးပြုလိုက်သည်ကို ကြည့်ရင်း သမားတော်မော့သည် သူ့ဒေါသများအား ဖိနှိပ်မထားနိုင်တော့ပေ။

"မင်းက မင်းအတွက် ဘာကကောင်းမလဲဆိုတာ တကယ် မသိဘူးပဲ။"

သူက ခြေလှမ်းကျဲဖြင့် ရှေ့သို့ လှမ်းလာပြီး ရက်စက်ကြမ်းကြုတ်စွာ ပြောလိုက်သည်။ "လည်မလိုနဲ့ ဒုံးဝေးလွန်းတယ်။"

သမားတော်မော့သည် လေဟာနယ်ကို ချုံ့ပစ်နိုင်သကဲ့သို့ ထင်မှတ်ရကာ ရုတ်တရက် သူ့ ခန္ဓာကိုယ်က ဟန်လိရှိနေရာ၏ ခြေလှမ်းအနည်းငယ် အကွာသို့ ရောက်ရှိလာသည်။ ထိုနည်းစနစ်ကို ယခင်က တွေ့ဖူးခဲ့သူများက အလွန်အမင်း ကြောက်ရွံ့တုန်လှုပ်မှုကို ခံစားခဲ့ကြရပေသည်။

ဟန်လိသည်လည်း သူ့မျက်နှာထက်တွင် အလွန် ထိတ်လန့်နေသည့် အကြည့်တို့ ဖော်ပြလာသည်။ သူက နောက်သို့ ခြေနှစ်လှမ်းခန့် ပြန်ဆုတ်ခွာလိုက်ပြီး သမားတော်မော့နှင့် သူ့ကြားမှ အကွာအဝေးကို တိုးမြင့်စေလိုက်ကာ သူ့ခန္ဓာကိုယ်ရှေ့၌ ဓားမြှောင်ကို ထားရင်း ဝှေ့ယမ်းလိုက်သည်။ ဟန်လိသည် သမားတော်မော့နှင့် ထိပ်တိုက်ရင်ဆိုင်ရင်း ဒဏ်ရာရသွားသည်ကို မေ့နေသကဲ့သို့ ဓားမြှောင်အသွား၏ အေးစက်သော အလင်းက လေထဲတွင် ကခုန်နေပြီး သမားတော်မော့၏ လမ်းကြောင်းကို ပိတ်ဆို့တားဆီးလိုက်သည်။

သမားတော်က အေးစက်စွာ ရယ်မောလိုက်သည်။ သူက ကြင်နာစွာနှင့် သူ့ပြိုင်ဘက်ကို သတိပေးလိမ့်မည် မဟုတ်ပေ။ သူက လက်ဝါးများကို ဆန့်ထုတ်ကာ ဟန်လိအား အရပ်မျက်နှာနှစ်ခုမှ တိုက်ခိုက်လိုက်ပြီး ဓားမြှောင်၏ ထူးဆန်းသော လှုပ်ရှားမှုကို အပြည့်အဝ လျစ်လျူရှုထားပေသည်။

ငွေရောင်လက်နှစ်ဖက်က ဓားမြှောင်မှ ထွက်ပေါ်နေသည့် ကခုန်နေသော အလင်းတန်းများအနီးသို့ ချဥ်းကပ်လာသည့်အခါ သားကောင်က ပြင်ဆင်ခွင့်မရသေးခင် ထောင်ချောက်ထဲသို့ ဆင်းသက်ရသည်ကို စောင့်ကြည့်နေသကဲ့သို့ အူလှိုက်သည်းလှိုက် ရယ်မောသံတစ်ခု ထွက်ပေါ်လာ၏။ ထိုရယ်မောသံထဲ၌ ပြင်းထန်သော ကျေနပ်မှုတို့နှင့် ပြည့်နေခဲ့သည်။

ထိုရယ်သံက သမားတော်မော့၏ တုန့်ပြန်မှုကို ထုံထိုင်းသွားစေပြီး သူ့နှလုံးသားကို အနည်းငယ် တုန်ယင်သွားစေခဲ့သည်။ သူက တိုက်ခိုက်မှုကို နှေးချလိုက်သည်နှင့် အေးစက်သော အသံတစ်ခုက ပြောလာသည်ကို ကြားလိုက်ရ၏။

"ခင်ဗျား ကျုပ်ရဲ့ ထောင်ချောက်ထဲ ကျသွားပြီ။ ကျုပ် လက်ထဲက ဓားမြှောင်ကို ကြည့်လိုက်။"

ထိုသို့ကြားပြီးနောက် သမားတော်မော့က မသိလိုက်မသိဘာသာနှင့် အကြည့်များကို ရွှေ့လိုက်မိသည့်အခါ ဓားမြှောင်အလင်းများ ကခုန်နေခြင်းက ရပ်တန့်သွားသည်ကို မြင်တွေ့လိုက်ရသည်။ ကခုန်နေသည့် ဓားမြှောင်အစား ဟန်လိက ထူးဆန်းသော ပုံစံအနေအထားတစ်ခုကို ပြုလုပ်ခဲ့သည်။ သူက ခန္ဓာကိုယ်အထက်ပိုင်းကို တစ်ဝက်ကွေးချခဲ့ပြီး ဓားကို လှုပ်ရှားကာ ခါးအောက်သို့ ချလိုက်သည်။ သူ့ခန္ဓာကိုယ်အောက်ပိုင်း တစ်ဝက်က လေးကြိုးကဲ့သို့ အတင်းအကျပ် ဆွဲဆန့်ထားသည်။ သူ့တစ်ကိုယ်လုံး အနေအထားက လေးညှို့မှ ပစ်လွှတ်တော့မည့် မြှားတစ်စင်းသဖွယ် ရှိနေခဲ့၏။

အစိမ်းရောင်အလင်းတန်းတို့ ထုတ်လွှတ်နေခြင်းမှလွဲ၍ ဟန်လိ လက်ထဲရှိ ဓားမြှောင်တွင် အခြား မည်သည့်ထူးဆန်းမှုမှ ရှိမနေခဲ့ပေ။ ဤသည်မှာ သမားတော်မော့ကို ထိတ်လန့်အံ့သြစေခဲ့သည်။ ဟန်လိက သူ့ကို အာရုံပျံ့လွင့်စေရန် ထိုကဲ့သို့ ထူးဆန်းလှသည့် ကိုယ်ဟန်အနေအထားကို လုပ်ဆောင်ခဲ့ခြင်း ဖြစ်နိုင်သလား။

ထိုသို့တွေးလိုက်သည့်အခါ သူ့နှလုံးသားထဲ၌ အားရကျေနပ်မှုတို့ ပွင့်လန်းလာပေသည်။ သမားတော်မော့က ဟန်လိကို သရော်ချင်ခဲ့သော်လည်း ဟန်လိက နှိုင်းယှဥ်မရအောင် ထက်ရှသည့် မြှားတစ်စင်းကဲ့သို့ ရှေ့သို့ ပြေးထွက်လာသည်ကို မြင်လိုက်ရပေသည်။ မြှားတစ်စင်းကဲ့သို့ ရှေ့ကို ပစ်ဝင်လာသည့် ဟန်လိ၏ အပြုအမူက သမားတော်မော့၏ အမူအရာကို ပြောင်းလဲသွားစေပေသည်။

လျင်မြန်စွာနှင့် သမားတော်မော့က သူ့လက်ဝါးများကို ပြန်၍ ပူးပေါင်းလိုက်ကာ လက်ဝါးများနှင့် ပြိုင်ဘက်၏ ဓားသွားကို ဖိနှိပ်ရန် ကြံရွယ်ထားသည်။ ထူးဆန်းစွာပင် ဓားမြှောင်က အနည်းငယ် ယိမ်းယိုင်သွားကာ ဓားမြှောင်ဆယ်ချောင်းအဖြစ် ကွဲထွက်သွားပြီး လေထဲတွင် လှုပ်ရှားနေကာ သမားတော်မော့ထံသို့ မတူညီသော အရပ်မျက်နှာများမှနေ၍ ထိုးစိုက်လာပေသည်။

သမားတော်မော့က ကျယ်လောင်စွာ နှာမှုတ်လိုက်သည်။ သူ့နှလုံးသားထဲတွင် ဟန်လိ၏ တန်ဖိုးက အနည်းငယ် ကျဆင်းသွားခဲ့သည်။ သူ့ကဲ့သို့သော ပညာရှင်တစ်ယောက်၏ ရှေ့တွင် ဟန်လိက အမှန်တကယ် ထိုကဲ့သို့သော သာမန်နည်းစနစ်မျိုးကို အသုံးပြုရဲသည်လား။ ထိုသည်က သေခြင်းတရားကို ရှာဖွေနေခြင်းနှင့် ညီမျှသည်မဟုတ်ပါလား။ သမားတော်မော့သည် အကြည့်တစ်ချက်နှင့်ပင် ဓားမြှောင်အစစ်က မည်သည့်နေရာ၌ ရှိကြောင်း ပြောနိုင်ပေသည်။

ထို့ကြောင့် သူက မျက်လုံးများကို မှေးစင်းလိုက်ပြီး ဓားမြှောင်အစစ်ရှိသည့် နေရာအား ပစ်မှတ်ထားလိုက်သည်။ သူက ဟန်လိအား လက်နက်ဆုံးရှုံးသွားရစေရန် ဓားမြှောင်အစစ်ကို အပိုင်းပိုင်း ဖျက်ဆီးပစ်ချင်သော ရည်ရွယ်ချက်ဖြင့် တိုက်ခိုက်မှုအရှိန်ကို တိုးမြှင့်ခဲ့ပေသည်။