တောတွင်းလုပ်ကြံသူ

အခန်း (၇၇) တောတွင်းလုပ်ကြံသူ

စနိုက်ပါထံမှ ကျည်ဆန်သည် ပစ်မှတ်၏ ဦးခေါင်းကို ဖောက်ဝင်သွားသည်။ တူဖြင့်ရိုက်လိုက်သော ဖရဲသီးကဲ့သို့ပင် ဦးခေါင်းသည် အစိတ်စိတ်အမွှာမွှာ ကွဲထွက်သွားသည်။

ပင့်ကူမှ ထုတ်လွှင့်ပေးသော ဗီဒီယိုဖိုင်မှတစ်ဆင့် ဟန်ရှောင်းသည် ၎င်း၏ အနေအထားကို ချိန်ညှိကာ သူ့ကိုယ်သူ ပြန်လည်တည်ငြိမ်စေခဲ့ပြီးနောက် အခြားကင်းစောင့်ကို ပစ်သတ်လိုက်သည်။ တစ်ယောက်ပြီး တစ်ယောက် အပစ်ခံရပြီး ကင်းစောင့်များ ဖယ်ရှားခံလိုက်ရ၏။ ဟန်ရှောင်း၏ အောင်မြင်သော သတ်ဖြတ်မှုတစ်ခုစီကြောင့် ဂိမ်းမျက်နှာပြင်သည် တောက်ပလာသည်။

_________________________________

ရုတ်တရက် ပေါက်ကွဲအား ၂၀၀% အထိ အားသွင်းထားပြီး၊ အသုံးပြုရန် အသင့်ဖြစ်နေပါပြီ။

သေစေနိုင်သော ပေါက်ကွဲမှုကြောင့် ရန်သူကို အောင်မြင်စွာ ချေမှုန်းနိုင်ခဲ့သည်။ ရန်သူကို ထိခိုက်စေသော အမှတ် ၁၉၀။

ကင်းစောင့်ကို အောင်မြင်စွာ သုတ်သင်နိုင်ခဲ့ပြီ။ တိုက်ခိုက်မှုမှ အတွေ့အကြုံအမှတ် ၅၀၀ ရရှိပါသည်။

_________________________________

ရုတ်တရက် ပေါက်ကွဲအား ၂၀၀% အထိ အားသွင်းထားပြီး၊ အသုံးပြုရန် အသင့်ဖြစ်နေပါပြီ။

သေစေနိုင်သော ပေါက်ကွဲမှုကြောင့် ရန်သူကို အောင်မြင်စွာ ချေမှုန်းနိုင်ခဲ့သည်။ ရန်သူကို ထိခိုက်စေသော အမှတ် ၂၁၀။

ကင်းစောင့်ကို အောင်မြင်စွာ သုတ်သင်နိုင်ခဲ့ပြီ။ တိုက်ခိုက်မှုမှ အတွေ့အကြုံအမှတ် ၅၀၀ ရရှိပါသည်။

¯¯¯¯¯¯¯¯¯¯¯¯¯¯¯¯¯¯¯¯¯¯¯¯¯¯¯¯¯¯¯¯¯¯¯¯¯¯¯¯¯¯¯¯

ဤအဆင့် ၁၀ ကင်းစောင့်များသည် သာမန်တပ်များသာ ဖြစ်သည်။ သူတို့၏ တိုက်ခိုက်နိုင်စွမ်းမှာ တစ်ချိန်က ဟန်ရှောင်း ဖမ်းဆီးခံခဲ့ရသည့် ဓာတ်ခွဲခန်းမှ အစောင့်များနှင့် ဆင်တူသည်။ ဟန်ရှောင်းသည် ထိုအချိန်က ဓာတ်ခွဲခန်း အစောင့်များကို ရှင်းထုတ်ရာတွင် ပြဿနာမရှိခဲ့ပေ။ ထို့အတူ ယခုလည်း ပြဿနာမရှိပေ။

ကင်းစောင့်များသည် တယောက်ပြီးတယောက် အသတ်ခံရပြီး၊ ဟန်ရှောင်းသည် သတ်ဖြတ်မှုမှ အတွေ့အကြုံအမှတ် ၁၈,၀၀၀ ရရှိခဲ့သည်။

[တောတွင်းလုပ်ကြံသူ မစ်ရှင်ပြီးဆုံးပါပြီ၊ သင်သည် အတွေ့အကြုံအမှတ် ၁၈,၀၀၀ ရရှိခဲ့သည်။]

မစ်ရှင်သည် ချောမွေ့စွာ ပြီးဆုံးခဲ့၏။ အစောင့်အကြပ်များစွာကို သတ်ပြီးနောက် စစ်ကူများ ရောက်လာဖို့ သေချာသည်... မကြာမီပင် သူတို့ရောက်လာကြသည်။

ပင့်ကူသည် ၎င်းတို့၏ လက်နက်အပြည့်အစုံ တပ်ဆင်ထားသော အမြန်တုံ့ပြန်ရေး အဖွဲ့သုံးဖွဲ့ကို ဂျစ်ကားများဖြင့် ချဉ်းကပ်လာသည်ကို တွေ့ရှိခဲ့သည်။ ဂျစ်ကားများ ရပ်တန့်သွားပြီးနောက် အဖွဲ့သားများ ခုန်ဆင်းကာ စေ့စေ့စပ်စပ် ရှာဖွေမှုများ စတင်ကြသည်။

ကင်းစောင့်တပ်သားများတွင် နားကြပ်များပါရှိပြီး ပင်မဆက်သွယ်ရေးကွန်ရက်ကို ချိတ်ဆက်နိုင်စေသည်။ ကင်းစောင့်တပ်သားတစ်ဦးသေဆုံးပါက ၎င်းတို့၏ ရေဒီယိုချန်နယ်သည် အသံတိတ်သွားမည်ဖြစ်သည်။ အကယ်၍ ကင်းစောင့်များ၏ ချန်နယ်အများအပြားသည် တိတ်ဆိတ်သွားပါက၊ ၎င်းသည် ကျီးနက်တောင်ကြားစခန်းတွင် သံသယများ တိုးလာမည်ဖြစ်ပြီး၊ အခြေအနေအား စုံစမ်းစစ်ဆေးရန် အမြန်တုံ့ပြန်ရေးအဖွဲ့များကို မြေပြင်သို့ ပို့ဆောင်မည်ဖြစ်သည်။

ဟန်ရှောင်းက အသတ်ခံရသော ကင်းစောင့်တပ်များကို အမြန်တုံ့ပြန်ရေးအဖွဲ့များက ရှာဖွေတွေ့ရှိပြီးသည်နှင့် အကြီးအကျယ် ရှာဖွေမည်ဟု ခန့်မှန်းထားသည်။ သစ်ပင်ပေါ်သို့ ရွှေ့လိုက်သော ပင့်ကူ၏ မျက်လုံးများမှတစ်ဆင့်၊ တပ်ဖွဲ့ဝင်များသည် Jackson စက်သေနတ်များ၊ ပေါက်ကွဲမှုပြင်းထန်သော လက်ပစ်ဗုံးများနှင့် RPG ဒုံးပျံများ တပ်ဆင်ထားကြောင်း သတိပြုမိနိုင်သည်။ ချက်ခြင်းပင်၊ ဟန်ရှောင်းသည် ဤလက်နက်ကြီးကြီးမားမား တပ်ဆင်ထားသည့် တပ်သားများကို စိန်ခေါ်မည့်အစီအစဉ်ကို ရုတ်သိမ်းလိုက်သည်။

ထွက်ပြေးဖို့ အကောင်းဆုံးအချိန်ပဲ။

ဟန်ရှောင်းသည် စနိုက်ပါကို ဖြုတ်ပြီး သူ့ပခုံးပေါ် တင်လိုက်သည်။ ဖုံးကွယ်နိုင်သော ဝတ်စုံကို ၀တ်ဆင်ထားပြီး၊ တူးထားသည့် ကတုတ်ကျင်းဆီသို့ တိတ်တဆိတ် ပြေးသွား၏။ သူသည် မလိုအပ်သော ပစ္စည်းများအားလုံးကို ကိရိယာပုံးထဲသို့ ထည့်ပြီးနောက်၊ စနိုက်ပါရိုင်ဖယ်နှင့် ကိရိယာပုံးနှစ်ခုလုံးကို ကတုတ်ကျင်းထဲသို့ ပစ်ထည့်လိုက်သည်။

ထိုအချိန်တွင်၊ ရှာဖွေရေးအဖွဲ့များသည် ခေါင်းမရှိတော့သော ကင်းစောင့်များကို ရှာတွေ့သွားသည်။ လက်နက်ကိုင်တပ်သားများသည် သူတို့၏ စက်သေနတ်များပေါ်မှ ဓာတ်မီးများကို အသုံးပြု၍ ချက်ချင်းပင် သတိတကြီးဖြင့် ရှာဖွေကြသည်။

ကတုတ်ကျင်းဘေးရှိ သစ်ပင်သည် ဟန်ရှောင်း၏ ပုန်းအောင်းရာနေရာ ဖြစ်သည်။ ထိုနေရာကို ဟန်ရှောင်းက သေချာရွေးချယ်ခဲ့သည်။ ဤနေရာသည် တပ်လှန့်ထားသော နယ်မြေ၏ အစွန်းတွင်ရှိသည်။ ရန်သူ့စခန်းနှင့် ဝေးလေလေ၊ ရန်သူ့တပ်များ ပိုမို ပြန့်ကျဲလေလေဖြစ်သည်။ တပ်ဖွဲ့ဝင်များသည် ဤနေရာကို တစ်ယောက်တည်း ရှာဖွေနိုင်ဖွယ်ရှိသည်။

သစ်ပင်၏ဘေးတွင် ဓာတ်မီးရောင်များ လင်းလက်လာသည်။ ဟန်ရှောင်းသည် သူ့ခန္ဓာကိုယ်ကို တဖြေးဖြေး နိမ့်ချလိုက်ပြီး သေးသွယ်သော သတ္တုကြိုးများကို တင်းတင်းကြပ်ကြပ် ဆုပ်ကိုင်ထားသည်။ သူ၏ ခြေထောက်များရှိ စွမ်းအင်အားလုံးကို စုစည်းလိုက်ပြီး ရှိခိုးကောင်ကဲ့သို့ ရှေ့သို့တိုးထွက်ရန် ပြင်ဆင်နေသည်။

တပ်ဖွဲ့ဝင်၏ ခြေထောက် သစ်ပင်ကို ဖြတ်ကျော်သွားသည့်အခိုက်တွင်၊ ဟန်ရှောင်းသည် သူ၏ခန္ဓာကိုယ်ကို တစ္ဆေတစ်ကောင်လို ရွေ့လျားကာ ကင်းစောင့်၏နောက်သို့ ချက်ချင်း လိုက်သွား၏။ ရန်သူက ဟန်ရှောင်း၏ လှုပ်ရှားမှုကို သတိပြုမိပြီး သူ့ကို ပစ်ခတ်ကာ အကူအညီတောင်းရန် ရည်ရွယ်ခဲ့သော်လည်း ဟန်ရှောင်းက ပို၍ လျှင်မြန်စွာ တုံ့ပြန်နိုင်သွား၏။ တပ်ဖွဲ့ဝင်၏ လည်ပင်းကို သတ္တုကြိုးများဖြင့် ပတ်ချည်လိုက်ပြီး လည်ပင်းညှစ်နိုင်ခဲ့သည်။

ထို့နောက် ဟန်ရှောင်းသည် တပ်ဖွဲ့ဝင်၏ စက်သေနတ်ကို တစ်ဖက်သို့ ကန်ပစ်လိုက်သည်။ ထို့နောက် သူသည် တပ်ဖွဲ့ဝင်အား မြေပြင်ပေါ်သို့ ဆွဲချလိုက်သည်။ တပ်ဖွဲ့ဝင်၏ ခန္ဓာကိုယ်အပေါ်ပိုင်းတစ်ခုလုံးသည် သူ၏ ဒူးအောက်တွင် ဖိနှိပ်ခံထားရ၏။

အသက်ရှုကြပ်ခြင်းကြောင့် တပ်ဖွဲ့ဝင်၏ မျက်နှာသည် ခရမ်းရောင်ပြောင်းသွားစေသည်။ သွေးကြောထဲက သွေးများ ပေါက်ထွက်လာသလိုပင်။ ထိုအချိန်တွင်၊ သတ္တုကြိုးများသည် တပ်ဖွဲ့ဝင်၏ အသားထဲသို့ ထိုးဖောက်ဝင်ရောက်နေပြီဖြစ်သည်။ တပ်ဖွဲ့ဝင်သည် ဒေါသူပုန်ထကာ လက်နှစ်ဖက် ဝှေ့ယမ်းပြီး မည်သည့်နည်းဖြင့်မဆို ဟန်ရှောင်းကို ဖမ်းဆုပ်ရန် ကြိုးစားသော်လည်း မအောင်မြင်ခဲ့ပေ။ တပ်ဖွဲ့ဝင်၏ မျက်လုံးများသည်လည်း အပေါ်သို့ လှန်သွားသည်။

ဟန်ရှောင်သည် တပ်ဖွဲ့ဝင်သေဆုံးကြောင်း ဂိမ်းမျက်နှာပြင်မှ ပြသသည်အထိ အားကို မလျှော့ခဲ့ပေ။

ဖြစ်စဉ်တစ်ခုလုံးတွင် သူသည် ရုန်းကန်နေရသော တပ်ဖွဲ့ဝင်အား အသံမထွက်အောင် လုပ်နိုင်ခဲ့သည်။

ဟန်ရှောင်သည် တပ်ဖွဲ့ဝင်၏ ယူနီဖောင်းသို့ အမြန်လဲလိုက်သည်။ တပ်ဖွဲ့ဝင်သည် သူ့နှင့် အရပ်အမောင်းတူညီသည့် ကုလားဖြူ ဖြစ်၏။ သူ့ဆံပင်တွေကို ညှပ်ဖို့ အိတ်ဆောင်ဓားကို အမြန်သုံးလိုက်သည်။ သူသည် တပ်ဖွဲ့ဝင်နှင့် အသားအရောင် ကွဲပြားသောကြောင့် အသားအရည် မပေါ်စေရန် ကော်လာကို ဖြောင့်တန်းကာ အင်္ကျီလက်များကို တင်းတင်းကြပ်ကြပ် ဆွဲဆန့်လိုက်သေးသည်။ ထို့နောက် မျက်နှာစကင်နာကို အသက်သွင်းရန် သူ၏နဖူးကို နှိပ်လိုက်ရာ နဖူးမှ အလင်းတန်းတစ်ခု ထွက်ပေါ်လာပြီး သေဆုံးသွားသော တပ်သား၏ မျက်နှာကို စကင်န်ဖတ်နေသည်။

စကင်န်ကို ထပ်တူလုပ်ပါ။

ချက်ခြင်းဆိုသလိုပင် ဟန်ရှောင်း၏မျက်နှာသည် တပ်ဖွဲ့ဝင်၏အသွင်သို့ ပြောင်းလဲသွား၏။

ဤအရာက သူ၏ အောင်မြင်သော ထိုးဖောက်စိမ့်ဝင်မှုတွင် အသုံးပြုရမည့် ဝှက်ဖဲ ဖြစ်သည်။

သူသည် သေဆုံးသွားသော တပ်ဖွဲ့ဝင်၏ ရုပ်အလောင်းနှင့် မလိုအပ်သော အသုံးအဆောင်ပစ္စည်းများကို တွင်းထဲသို့ စွန့်ပစ်ပြီး မြှုပ်နှံလိုက်သည်။ ထို့နောက် နေရာကို မှတ်သားခဲ့၏။ တပ်ဖွဲ့ဝင်ယူနီဖောင်းကို ၀တ်ထားသည့် ဟန်ရှောင်းသည် ပြောင်ပြောင်တင်းတင်း ရှေ့သို့ လျှောက်သွားသည်။ ရန်သူ၏ ဆက်သွယ်ရေးချန်နယ်မှ စကားပြောဆိုမှုများကိုလည်း ရှင်းလင်းစွာကြားနိုင်သည်။

“ဒါက H103 အစီရင်ခံပါတယ်။ အနောက်မြောက်အပိုင်းမှာ အားလုံးအဆင်ပြေပါတယ်။”

“ဒါက H141 အစီရင်ခံပါတယ်။ အရှေ့တောင်ဘက်အပိုင်းမှာ အားလုံးအဆင်ပြေပါတယ်။”

ဟန်ရှောင်း သတ်ပစ်ခဲ့သော တပ်သား၏ နံပါတ်မှာ H223 ဖြစ်သည်။ ဟန်ရှောင်းသည် အသံဖျက်၍ အလားတူ ပုံစံဖြင့် အစီရင်ခံလိုက်သည်။

"H223၊ မင်းအသံက ဘာဖြစ်သွားတာလဲ။" သူ့ကပ္ပတိန်ဖြစ်ပုံရတဲ့ လူတစ်ယောက်က စကားပြောတယ်။

"လည်ချောင်းနာနေလို့ပါ။"

နယ်မြေတစ်ဝိုက် ခဏမျှ ရှာဖွေပြီးနောက် ဟန်ရှောင်းကို ပြန်ခေါ်လိုက်သည်။ တပ်ဖွဲ့ဝင်နှစ်ဆယ်ကျော်သည် ဂျစ်ကားပေါ်တွင် စုဝေးကြပြီး ဟန်ရှောင်းကို မည်သူမျှ သံသယမဝင်ခဲ့ကြပေ။

ကပ္ပတိန်က "မင်းတို့တွေ တစ်ခုမှမတွေ့ဘူးလား"

“မတွေ့ပါဘူး ဆရာ” တပ်ဖွဲ့ဝင်များက ပြန်ဖြေတယ်။

ကပ္ပတိန်က မျက်မှောင်ကြုတ်ကာ “ကားပေါ်တက်။ စခန်းပြန်ရအောင်။"

ဟန်ရှောင်း မျက်လုံးမှေးလိုက်သည်။ သူသည် အဖွဲ့ထဲသို့ စိမ့်ဝင်နိုင်ခဲ့ပြီး၊ ဤသည်မှာ ကျီးနက်တောင်ကြား အခြေစိုက်စခန်းသို့ ဝင်ရောက်ရန် အစီအစဉ်အားလုံး၏ တစ်စိတ်တစ်ပိုင်းဖြစ်သည်။

…

ကားသည် လှိုဏ်ဂူတစ်ခုထဲသို့ မောင်းဝင်သွားပြီး သုံးမိနစ်အကြာတွင်၊ ဟန်ရှောင်၏ မျက်လုံးများရှေ့၌ မမျှော်လင့်ထားသော မြင်ကွင်းတစ်ခု ပေါ်လာသည်။

လှိုဏ်ဂူနှင့်ပတ်သက်ပြီး ထူးခြားမှုတစ်ခုရှိခဲ့သည်။ ဤလှိုဏ်ဂူသည် တကယ်တမ်းတွင် ကားပါကင် အသေးစားလေး ဖြစ်နေသည်။

ဂျစ်ကားရပ်တန့်သွားပြီး တပ်ဖွဲ့ဝင်များ ဆင်းလာကြသည်။ ဟန်ရှောင်သည် အဖွဲ့နှင့်တွဲကာ ကျောက်နံရံတစ်ခုရှေ့သို့ ရောက်လာသည်။ ကပ္ပတိန်သည် ကျောက်တုံးတစ်တုံးကို ဆွဲထုတ်လိုက်သည်။ ထိုအရာသည် ကတ်စကင်နာပါရှိသည့် ပြုပြင်မွမ်းမံထားသော သတ္တုဘူးတစ်ခုဖြစ်နေသည် ။

ကပ္ပတိန်သည် ၎င်း၏ သက်သေခံကတ်ပြားကို စကင်န်ဖတ်လိုက်ရာ ‘ဝုန်း’ ဆိုသော အသံနှင့် ကျောက်နံရံသည် ကွဲထွက်သွားသည်။ ထိုအချိန်မှ၊ ဟန်ရှောင်းသည် ကျောက်နံရံမှာ ပုံဖျက်ထားသော သတ္တုတံခါးဖြစ်နေကြောင်း သိလိုက်ရ၏။ တံခါးကို မီးခိုးရောင် သုတ်လိမ်းထားပြီး ကျောက်တုံးနှင့် တူနေသည်။ နံရံကို အနီးကပ် မစစ်ဆေးရင် ခြားနားချက်ကို ဘယ်သူမှ မပြောနိုင်လောက်ပေ။

ဘယ်လောက်ထူးဆန်းလဲ။ ၎င်းသည် ဟက်စ်လာမှ အေးဂျင့်များ၏ ဖော်ပြချက်နှင့် အတိအကျတူပုံရသည်။

ဟန်ရှောင်းစိတ်ရှုပ်သွားသည်။ ဒါတွေအားလုံးကို ယဲ့ဖန်၏ ထောက်လှမ်းရေးအစီရင်ခံစာမှာ အသေးစိတ်ဖော်ပြထားသည်။ ဒါတွေအားလုံးက တိကျတဲ့အချက်အလက်တွေ ဖြစ်နေ၏။ သို့သော်၊ [ကင်းထောက်ခြင်း ၂] သည် မပြီးစီးသေးကြောင်း ဂိမ်းမျက်နှာပြင်က ဘာကြောင့်ပြသနေသနည်း။

ပြဿနာ အတိအကျက ဘာလဲ။ အချိန်နဲ့ ပတ်သက်တာလား? စခန်းက နေ့တစ်နေ့ရဲ့ မတူတဲ့ အချိန်တွေမှာ ကွဲပြားနေတာများလား။

ဟန်ရှောင်းသည် ကျန်သူများနှင့်အတူ လျှောက်သွားကာ ခြံဝင်းထဲသို့ ရောက်သွားကြသည်။ သူ့ရဲ့ သက်သေခံကတ်ပြားကို စကင်န်ဖတ်ပြီးတဲ့ နောက်မှာတော့ သူဟာ စခန်းထဲသို့ ရောက်သွားတော့သည်။

စခန်းသည် မြေအောက်ထဲတွင် နက်နက်ရှိုင်းရှိုင်း သိုဝှက်နေသည်။ ၎င်းကို သတ္တုများဖြင့် ဖွဲ့စည်းတည်ဆောက်ထားရာ နေရာတိုင်းတွင် အေးမြသော မီးခိုးရောင်များဖြင့် ပြည့်နေ၏။ အကွေ့အကောက်များသော စင်္ကြံများနှင့် အခန်းများစွာရှိသည်။ တပ်ဖွဲ့ဝင်များသည် ပစ္စည်းများ၊ ကွန်တိန်နာများ သယ်ယူရာတွင် အလုပ်များနေသည်။

ဟန်ရှောင်းက သူ့ခေါင်းကို မော့လိုက်ရာ မျက်နှာကျက်ထောင့်ရှိ စောင့်ကြည်ရေးကင်မရာကို မြင်လိုက်ရသည်။ သူ့လည်ပင်းကို အလိုလို ပြန်ဆုတ်လိုက်သည်။

ရန်သူ့နယ်မြေအတွင်း၌ တစ်ယောက်တည်း သွားရသည်မှာ ခဲယဉ်းလှပြီး၊ ဟန်ရှောင်းသည် သူ၏ စစ်ဆင်ရေး အောင်မြင်ရန် ဆုတောင်းနေရသည်။

ဒီတော့ အခု ငါ စခန်းမှာ ရှိနေတာ၊ ငါ ဘာဆက်လုပ်ရမလဲ။ ရည်ရွယ်ချက်မရှိ လျှောက်သွားနေမလား ဒါမှမဟုတ် တစ်ယောက်ယောက်ကို စကားစမြည်ပြောမလား... မလုပ်တာ ပိုကောင်းမယ်။ တစ်ယောက်ယောက်နဲ့ စကားပြောလိုက်ရင် ငါဘယ်သူလဲဆိုတာ ပေါ်သွားနိုင်တယ်။ ငါ ဘယ်သတင်းအချက်အလက်ကို တိတိကျကျ ရှာဖွေနေတာလဲ။ [ကင်းထောက်ခြင်း ၂] အတွက်ဆိုတော့၊ ကျီးနက်တောင်ကြားအခြေစိုက်စခန်းနှင့် ပတ်သက်ပြီး အရေးကြီး သတင်းအချက်အလက်တွေကို ဖော်ထုတ်ရမယ်။ ဒီနေရာမှာ ဟာကွက်အချို့ ရှိလိမ့်မယ်။ ရာထူးနိမ့်တဲ့ အရာရှိများသည် ငါးစာတွေလိုပဲဆိုတော့ အများစုက အရေးကြီး အချက်အလက်များကို လက်လှမ်းမမီနိုင်ဘူး။ တခြားသူတွေနဲ့ မတူဘဲ ထူးထူးခြားခြား ပြုမူနေတဲ့သူတစ်ယောက်ကို ငါရှာရမယ်။

ဟန်ရှောင်း၏ စိတ်ထဲတွင် ဤအတွေး ပေါ်လာသည်နှင့် တစ်ပြိုင်နက် သူသည် စခန်းကို လှည့်ပတ်ကာ တစ်လက်မချင်းကို ဂရုတစိုက် ဆန်းစစ်ကြည့်သည်။

…

"ကင်းစောင့် ၁၃ ယောက် အသတ်ခံလိုက်ရတယ်လား"

ကျိကျဲက မယုံကြည်နိုင်စွာ မျက်မှောင်ကြုတ်လိုက်သည်။ သူ့ခန့်မှန်းချက်များအရ၊ ရန်သူအေးဂျင့်များသည် လိုအပ်သော သတင်းများ ရရှိထားသောကြောင့် ကင်းစောင့်များကို သတ်မည်မဟုတ်ပေ။ သူတို့ ခိုးယူထားတဲ့ အချက်အလက်တွေကို သံသယဖြစ်မိတာက လွဲလို့ပေါ့။

ဤကျူးကျော်သူများသည် အမှန်ပင် စေ့စေ့စပ်စပ်နှင့် ၎င်းတို့၏ လုပ်ရပ်များကို ဂရုတစိုက်ရှိကြသည်ကို တွေ့ရှိရသည်။

ကျိကျဲက ခေါင်းခါပြီး ဂုဏ်ယူစွာပြောလိုက်သည်။ "ဒါပေမယ့် သူတို့က အတွေ့အကြုံနုနေတုန်းပဲ"

နှစ်ထပ်ဆာဗာကွန်ရက်သည် အခြေစိုက်စခန်းတာဝန်ခံ လက်ထောက်အရာရှိအဖြစ် ဂျီကျဲ ပြုလုပ်ခဲ့သမျှ အကောင်းဆုံးထောင်ချောက်ဖြစ်သည်။ ၎င်း၏ တစ်ခုတည်းသော ရည်ရွယ်ချက်မှာ ကျူးကျော်သူများကို တိုက်ခိုက်ခြင်းမှ တားဆီးရန်ဖြစ်ပြီး၊ ယခုအခါ နောက်ဆုံးတွင် လုံခြုံရေးကွန်ရက်၏ အကျိုးသက်ရောက်မှုကို ပြသနေသည်။

မှားယွင်းသော အချက်အလက်ကိုသာ ထည့်ထားခဲ့မည် ဆိုလျှင် ကျူးကျော်သူအေးဂျင့်များ၏ သံသယများကိုသာ တိုးပွားစေမည် ဖြစ်သည်။ ထို့ကြောင့် သူ၏ရန်သူများကို လှည့်ဖြားရန်၊ ကျိကျဲသည် သူ့အသက်ကို စွန့်စားလိုစိတ်ရှိပြီး၊ မှန်ကန်သော အချက်အလက်အချို့ကို ငါးစာထဲတွင် ထည့်သွင်းခဲ့သည်။ ပါဝင်သောအချက်အလက်များမှာ အခြေစိုက်စခန်း၏တည်နေရာအတိအကျ၊ ကင်းစောင့်တပ်များချထားရေးနှင့် တတိယအပိုင်းနှင့် ဆဋ္ဌမအပိုင်းရှိ သတိပေးချက် မြင့်မားတဲ့ အပိုင်းများ၏ ကာကွယ်ရေးယန္တရားများဖြစ်သည်။ ရန်သူများကို အောင်မြင်စွာ လှည့်ဖြားနိုင်စေရန်အတွက် အတိုင်းအတာတစ်ခုအထိ အချက်အလက်အမှန်ကို အမှားအယွင်းများနှင့် ပေါင်းစပ်ထားရန် လိုအပ်ပါသည်။ နောက်ဆုံးအပိုင်းနှစ်ခုတွင် အခြားကဏ္ဍများထက် ဆယ်ဆပိုမိုအားကောင်းသည့် ကာကွယ်ရေးယန္တရားများ ပါရှိသည်။ ဤအရာက အခြားဝှက်ဖဲတစ်ခုလည်း ဖြစ်သည်။

“စစ်ဦးစီးချုပ်က ဆုတ်ခွာတဲ့ လမ်းကြောင်းကို အတည်ပြုပြီးပြီ။ ငါးရက်အတွင်း စစ်ကူအင်အားတွေ ရောက်လာလိမ့်မယ်။ အဲဒီနေ့က ဆုတ်ခွာရမည့်နေ့လည်း ဖြစ်လိမ့်မယ်။ အခုလောလောဆယ်တော့ ဟက်စ်လာကို လက်ဆောင်အကြီးကြီး ပေးလိုက်ရအောင်။"

ဂျာမီနယ်အဖွဲ့အစည်း၏ အဓိက တပ်ဖွဲ့များသည် Andrea ၏ တိုက်ကြီးပေါ်တွင် စုစည်းထားကြသည်။ ဂျာမီနယ်အဖွဲ့အစည်းသည် လျှို့ဝှက် အဆောက်အဦးများနှင့် အခြေစိုက်စခန်းများ ထူထောင်ခြင်းဖြင့် ၎င်း၏ သြဇာလွှမ်းမိုးမှုကို အခြားသော တိုက်ကြီးများသို့ လျှို့ဝှက်စွာ ဖြန့်ကြက်ခဲ့ကြသည်။ အဆိုပါ အခြေစိုက်စခန်းများကို ဝှက်ထားဆဲဖြစ်ပြီး၊ ၎င်းတို့ကို ရှာဖွေတွေ့ရှိပါက၊ အဆောက်အအုံတစ်ခုတည်းသည် နိုင်ငံ၆နိုင်ငံမှ စစ်တပ်များ၏ စီးနင်းတိုက်ခိုက်မှုကို ခံနိုင်ရည်ရှိရန် မဖြစ်နိုင်သောကြောင့် ဂျာမီနယ်အဖွဲ့အစည်းသည် ပြန်လည်ဆုတ်ခွာရန် အမိန့်ပေးမည်ဖြစ်သည်။

ကျိကျဲသည် သူ့ထောင်ချောက်ကို အလွန်အမင်းယုံကြည်နေသည်။ သူသည် အစစ်အမှန်အချက်အလက်များနှင့် အခြေစိုက်စခန်းတည်နေရာကို ဖော်ထုတ်ရန် မကြောက်ခဲ့ပေ။ သူ့လက်ထဲတွင် ဝှက်ဖဲတစ်ချပ်ရှိသည်။ ဟက်စ်လာအား မဟာဗျူဟာကျကျ ထိခိုက်န

ာကျင်စေသော ထိုးနှက်ချက် ပြုလုပ်နိုင်ရန်၊ အခြားတပ်သားအားလုံးနှင့် အခြေစိုက်စခန်းကိုပင် စတေးနိုင်၏။

အခန်း (၇၇) ပြီး၏။

လင်းဆက်

+++++