ဖောက်ခွဲမှု

အခန်း (၈၄) ဖောက်ခွဲမှု

ရှေ့တန်းတိုက်ပွဲများ ဆက်လက်ဖြစ်ပွားနေချိန်တွင်၊ စစ်မျက်နှာနှင့် ဝေးကွာသော ထောက်ပံ့ပို့ဆောင်ရေးဇုန်တွင်ရှိနေသည့် ဟန်ရှောင်းသည် အခြေအနေကို ဂရုတစိုက် စောင့်ကြည့်နေသည်။

ဟန်ရှောင်းသည် ဂိမ်းထဲတွင် ဂြိုလ်တစ်ခုလုံး ဖျက်စီးနိုင်သည် အဆင့်မြင့် တိုက်ပွဲ အများအပြားကို တွေ့ခဲ့ဖူးသည်။ ထိုတိုက်ပွဲများနှင့် နှိုင်းယှဉ်ပါက၊ မြေပြင်တွင် တိုက်ခိုက်နေသော အဆင့်နိမ့်တိုက်ပွဲသည် ဟန်ရှောင်အား ပို၍ သွေးဆူစေသည်။ သေနတ်သံများနှင့် ယမ်းနံ့များသည် ဟန်ရှောင်း ယခင်က ကြုံတွေ့ခဲ့သော အသံတိတ် စွမ်းအင်ရောင်ခြည်တန်းများနှင့် ပလာစမာအမြောက်များသာ ပါဝင်သည့် တိုက်ပွဲများနှင့် နှိုင်းယှဉ်ပါက ရက်စက်ကြမ်းကြုတ်မှုနှင့် စစ်ပွဲ၏ အရသာကို ပိုမိုဖော်ပြသနိုင်ပြီး တိုက်ပွဲများဖြစ်သည်။

ဟန်ရှောင်းသည် ထရပ်ကား၏ ကွန်တိန်နာတွင် ထိုင်နေပြီး ကင်းစောင့်နှစ်ဦးသည် ယာဉ်ကို တင်းတင်းကြပ်ကြပ် စောင့်ကြပ်နေဆဲဖြစ်သည်။ သူတို့သည် ဟန်ရှောင်း ထွက်ပြေးဖို့ ကြံရွယ်နေသည်ဟု သံသယ ကြီးကြီးမားမား ဖြစ်နေကြသည်။

လီယောင်၏ အသံကို ဟန်ရှောင်း နားကြပ်မှ ကြားနိုင်သည်။

"အစ်ကိုရှောင်း၊ ငါတို့ ရန်သူရဲ့အမာခံအဖွဲ့နဲ့ အတူဆုတ်သွားမယ်။ သူတို့ရဲ့ စနစ်မှာ ဗိုင်းရပ်စ်ကို ငါထည့်ထားပြီဖြစ်လို့ အခုဆိုရင် သူတို့ရဲ့ ဆက်သွယ်ရေးကို အချိန်မရွေး ပြတ်တောက်သွားအောင် လုပ်နိုင်တယ်။”

"တော်တယ်။"

“အိုး၊ ဦးလေးလမ်းဘတ်က အသစ်တစ်ခု ရှာတွေ့ခဲ့တယ်။ အခြေစိုက်စခန်း၏ အတွင်းပိုင်း ဖွဲ့စည်းပုံက အရမ်းခိုင်မာပြီး ပေါက်ကွဲဒဏ်ခံနိုင်ဖွယ် ရှိတယ်။”

ဟန်ရှောင်းသည် မျက်မှောင်ကြုတ်ကာ အချက်အလက်အပိုင်းအစများကို စုစည်းပြီးနောက် ပြင်ပအခြေစိုက်စခန်းကို ငါးစာအဖြစ် အသွင်ယူထားသည်ကို ရုတ်တရက် သိလိုက်ရသည်။ သို့မဟုတ် ပို၍တိတိကျကျ ပြောရလျှင် သင်္ချိုင်းတစ်ခုဖြစ်သည်။ သိုဝှက်ထားသော ဖောက်ခွဲရေးပစ္စည်းများ အပုံလိုက် ရှိနိုင်ပြီး ကျူးကျော်သူများ ဝင်ရောက်လာပါက ဖောက်ခွဲရေးပစ္စည်းများသည် အားလုံးကို သတ်ဖြတ်ရန် အစပျိုးသွားမည်ဖြစ်သည်။ ထို့အပြင် ပေါက်ကွဲမှုများသည် ပြင်ပအခြေစိုက်စခန်းကို ဖြိုချနိုင်ပြီး အရာအားလုံးကို မြှုပ်နှံရန် လုံလောက်စွာ အားကောင်းပြီး အတွင်းပိုင်းစခန်းကို ပိုမိုတသီးတခြား ဖြစ်စေလိမ့်မည်။

“ဘယ်လို အကြံဉာဏ်ကောင်းလဲ။” ဟန်ရှောင်း သက်ပြင်းချလိုက်သည်။ အခု အခြေအနေကို သတင်းပို့လျှင်တောင် နောက်ကျနေလိမ့်မယ်။ ဟန်ရှောင်းကလည်း ထိုသို့လုပ်ဖို့ ရည်ရွယ်ချက်မရှိပေ။

သူ့ အစီအစဉ်၏ နောက်ဆုံးအဆင့်ကို ရောက်ရှိနေပြီ ဖြစ်သည်။

ဟန်ရှောင်းက ထပြီး သူ့ပစ္စည်းတွေကို ထုပ်ပိုးလိုက်သည်။ သူသည် ကွန်တိန်နာမှ ဆက်စပ်ပစ္စည်းများနှင့် အရေးကြီးသော စက်အစိတ်အပိုင်းများအားလုံးကို သူ့အိတ်ထဲသို့ လွှဲပြောင်းပေးခဲ့သည်။ အိတ်က လုံးဝအပြည့်ပင်။ ဟန်ရှောင်းက ကင်းစောင့်နှစ်ယောက်ကို ပြောလိုက်သည်။ "ဒီပစ္စည်းတွေကို သယ်သွားပေးလို့ ရမလား။ ဒါတွေက တော်တော် လေးတယ်။”

တပ်ဖွဲ့ဝင်နှစ်ဦးသည် ဟန်ရှောင်၏အိတ်ကို သယ်ဆောင်ရန် ကူညီရန် ထရပ်ကားပေါ်သို့ မသိလိုက်ဘဲ တက်မိသွားသည်။

သူတို့ခန္ဓာကိုယ်ကို ကွေးချလိုက်တဲ့အချိန်မှာ ဟန်ရှောင်း လှုပ်ရှားလိုက်သည်။ လည်ပင်းကို ပြင်းပြင်းထန်ထန် ထိုးနှက်ချက်ကြောင့် စစ်သားနှစ်ဦးစလုံး အသံမထွက်ဘဲ မြေပြင်ပေါ်သို့ လဲကျသွားသည်။

ဟန်ရှောင်းသည် ကွန်တိန်နာတံခါးကိုပိတ်လိုက်ပြီး တပ်သား၏ဝတ်စုံကို တိတ်တဆိတ်ပြောင်းကာ သူဝတ်ထားသည့် မျက်နှာဖုံးကို ဖယ်ရှားလိုက်၏။ ထို့နောက် မျက်နှာဖုံးကို အသက်သွင်းပြီး ၎င်း၏အသွင်အပြင်ကို ပြောင်းလဲရန် အသုံးပြုလိုက်သည်။ အိတ်ကို ကိုင်ကာ ယုံကြည်မှုအပြည့်ဖြင့် ထွက်လာခဲ့သည်။ မည်သူမျှ သတိမပြုမိစေဘဲ ထောက်ပံ့ပို့ဆောင်ရေးအဖွဲ့ထဲတွင် ရောဝင်နိုင်ခဲ့သည်။

…

ကားလ်၏လက်ထောက်သည် မကြာမီပင် အမြန်ပြန်လာသည်။

"ဟန်ရှောင်းကလွဲလို့ ဌာန၁၃က လူတိုင်းရောက်နေပါပြီး"

ကားလ် အံ့သြသွားသည်။ "သူ ပျောက်သွားတယ်"

“သူ့ကို စောင့်ရှောက်ရမယ့် ကင်းစောင့် အစောင့်နှစ်ယောက်က သတိလစ်နေတာ တွေ့ရတယ်။ ကျွန်တော် ထောက်ပံ့ပို့ဆောင်ရေးအဖွဲ့ကို မေးကြည့်တော့ ဟန်ရှောင်းကို ဘယ်သူမှ မတွေ့ဘူး”

ကားလ်သည် စကားဆက်ပြောချင်သော်လည်း မိုးခြိမ်းသံကဲ့သို့ အသံကြီးတစ်ခုကြောင့် အလိုအလျောက် တုံ့ပြန်ကာ ခုန်တက်သွားသည်။ ချက်ချင်းပင် သူသည် အသံ၏ အရင်းအမြစ်ကို စတင်ရှာဖွေနေသည်။

တောင်ကြီးသည် ရွေ့လျားနေပြီး ငလျင်လှုပ်နေသကဲ့သို့ ဖြစ်နေသည်။ လူတိုင်း ကြောက်လန့်ကုန်ကြ၏။

ကျီးနက်တောင်ကြား အခြေစိုက်စခန်း ပေါက်ကွဲသွားသည် ။

စခန်းတစ်ခုလုံး ပြိုကျပြီး ပင်မဝင်ပေါက်ကိုလည်း ပြိုကျနေသော ကျောက်တုံးများဖြင့် အလုံပိတ်သွားသည်။ လက်ရွေးစင် စစ်သည် ရာနှင့်ချီ၍ မြှုပ်နှံခံလိုက်ရသည်။

အဖြစ်အပျက်များ၏ အလှည့်အပြောင်းသည် ကားလ်ကို ဒေါသထွက်စေသည်မှာ သိသာထင်ရှားသည်။

အောင်ပွဲကိုမြင်နေရသလို တပ်များသည်သည်း ရန်သူ၏ထောင်ချောက်ထဲသို့ ကျသွားသည်။ မရေမတွက်နိုင်သော အသက်ပေါင်းများစွာ သတ်ဖြတ်ခံခဲ့ရပြီး အခြေစိုက်စခန်းလည်း ပျက်စီးခဲ့သည်။ ယင်းက အောင်ပွဲ၏တန်ဖိုးကို အလွန်နိမ့်ကျစေခဲ့သည်။

ကားလ်သည် တပ်ဖွဲ့များ၏ တပ်မှူးအနေဖြင့် တုံ့ပြန်မှုများစွာကို ရင်ဆိုင်ရမည်ဟု သိထားသည်။

ကားလ်သည် စိတ်ဓါတ်ကျနေသောအကြည့်ဖြင့် ဟန်ရှောင်း၏အကြံဉာဏ်ကို တွေးမိနေ၏။ သူသာ အကြံဉာဏ်ကို လိုက်နာခဲ့ပါက ကြီးမားသော ဆုံးရှုံးမှုများကို တားဆီးနိုင်မည်ဖြစ်သည်။ သို့သော်လည်း သူသာ နောက်တစ်ခေါက် ထပ်ရွေးဖို့ အခွင့်အရေးရခဲ့လျှင်တောင် သူ့အနေဖြင့် တူညီသော ရွေးချယ်မှုတစ်ခုကို လုပ်နေဦးမှာပဲဟုလည်း ခံစားနေရတယ်။ သူ လုံးဝ စိတ်ပျက်သွားပြီး တပ်မှူး၏ ကားနံရံတွင် ထိုစိတ်ပျက်မှုများကို ထုတ်ဖော်လိုက်တော့သည်။

စစ်တပ်သည် ကြီးမားသော ဆုံးရှုံးမှုကို ခံစားခဲ့ရပြီး ကားလ်သည်လည်း သူ၏နှလုံးသားတွင် နာကျင်မှုကို ခံစားနေရသည်။ ထို့နောက် စိတ်ပျက်နေသော တပ်သားများ၏ စိတ်ဓာတ်ကို မြှင့်တင်ရန် အမိန့်များစွာ ပေးခဲ့သည်။

ဌာန၁၃မှ အေးဂျင့်များ ရောက်ရှိလာပြီးနောက် ကားလ်က “မင်းရဲ့ အဖွဲ့သား ပျောက်သွားတယ်။ အတိအကျကို ဘာတွေဖြစ်နေတာလဲ?"

"ဟန်ရှောင်း နောက်တစ်ခေါက် ပျောက်ကွယ်သွားပြန်ပြီလား" အေးဂျင့်များ၏ မျက်နှာပေါ်ရှိ အမူအရာ ပြောင်းလဲသွားသည်ကို ရှင်းရှင်းလင်းလင်း မြင်လိုက်ရသည်။

ဘာလို့ 'နောက်တစ်ခေါက်' ဟူသော စကားလုံးကို ပြောတာလဲ။

ချီပိုင်ကျားသည် သူ့စိတ်ထဲမှာ ဗလာကျင်းသွားသလို ခံစားလိုက်ရသည်။

သေစမ်းကွာ၊ ဟန်ရှောင်းက ဒီလိုမျိုး အမြဲလုပ်တယ်။

ကျန်းဝေနှင့် လီယာလင်းတို့သည် အလွန်တည်ငြိမ်နေကြသည်။ ဒါကို သူတို့ ရင်းနှီးသလိုပင်။

ခွင့်ပြုချက်မယူဘဲ သူ့ဆန္ဒအတိုင်း လုပ်ဆောင်သည်မှာ ဟန်ရှောင်းအတွက် စံနှုန်းတစ်ခုဖြစ်သည်။ ဤသည်ကို ကျန်တဲ့သူတွေက အသားကျလာဖို့သာ လိုသည်။ ပြဿနာအသစ်တစ်ခုကို ဖန်တီးဖို့ သူသွားနေပုံရသည်။

"ဟန်ရှောင်းသာ အရေးကြီးတဲ့ သတင်းကို မရရှိခဲ့ဘူးဆိုရင်၊ မင်း အခြေစိုက်စခန်းကို အောင်မြင်စွာ ဖျက်ဆီးနိုင်ပြီလို့ မင်း မိုက်မိုက်မဲမဲ တွေးခဲ့လိမ့်မယ်၊ တကယ်တမ်းမှာ၊ မင်းဟာ အပြင်ပိုင်းနယ်မြေကို ဖျက်ဆီးဖို့ပဲ လုပ်နိုင်ခဲ့တယ်။ ရန်သူတွေ လွတ်မြောက်သွားပြီဆိုတာ မင်း သတိတောင်မထားမိဘူး။”

ကားလ်သည် အမှန်တကယ်ပင်၊ သူ၏ စစ်ဆင်ရေးသည် ပြီးပြည့်စုံသော အောင်မြင်မှုဟု သူထင်ခဲ့မည်ဖြစ်ပြီး၊ ကျီးနက်တောင်ကြား အခြေစိုက်စခန်းသည် အနာဂတ်တွင် ပြန်လည်နေရာချထားနိုင်ခဲ့ပါက၊ သူသည် ပထမဆုံး တာဝန်ခံရမည့်သူ ဖြစ်ပေလိမ့်မည်။

"မင်းတို့ တခြားဘာအချက်အလက်တွေ ပေးနိုင်လဲ" ကားလ်က စိုးရိမ်တကြီး မေးသည်။

ကားလ်အား မုန်းတီးနေမှုကို ဖိနှိပ်ရန် ကြိုးပမ်းနေသော ကျန်းဝေက “ငါတို့ရဲ့ အဖွဲ့သားနှစ်ယောက် ရန်သူနှင့်အတူ ဆုတ်ခွာနေကြတယ်။ ဆုတ်ခွာတဲ့လမ်းကြောင်းကို အတည်ပြုပြီးသည်နှင့် ငါတို့ကို သတင်းပို့ပေးလိမ့်မယ်။”

ကားလ်၏ မျက်လုံးများ တောက်ပလာပြီး "သတင်းရတာနဲ့ ချက်ချင်းအကြောင်းကြားပါ"

ဟန်ရှောင်းသည် သူ၏ စစ်ဆင်ရေးတွင် ဤမျှလောက် ပြီးမြောက်လိမ့်မည်ဟု သူ မမျှော်လင့်ထားပေ။ သူ၏တပ်များသည် ယခင်တိုက်ပွဲတွင် ကျရှုံးမှုများစွာကို ကြုံတွေ့ခဲ့ရသောကြောင့်၊ ရန်သူ၏ ဆုတ်ခွာနေသော အမာခံအင်အားကို အောင်မြင်စွာ နှိမ်နင်းခြင်းဖြင့် သူ၏အမှားများကို ချေဖျက်ရန် လိုအပ်နေသည်။

…

ကျီးနက်တောင်ကြားအခြေစိုက်စခန်းမှ ဆယ်ကီလိုမီတာအကွာအဝေးတွင် လူတိုင်း၏ အာရုံစူးစိုက်မှုမှ ဝေးကွာသော ဒေသတစ်ခုရှိသည်။ ဖန်ခွမ်း၊ ကျိကျဲနှင့် အမာခံအဖွဲ့ဝင် နှစ်ရာကျော်တို့သည် လျှို့ဝှက်လမ်းကြောင်းမှတစ်ဆင့် ယာဉ်များဖြင့် ထွက်သွားကြသည်။ ယာဉ်များတွင် ထောက်ပံ့ပို့ဆောင်ရေးပစ္စည်းများ အမြောက်အမြား သယ်ဆောင်လာပြီး အခြေစိုက်စခန်းနှင့် ပတ်သက်သည့် အဖိုးတန်အချက်အလက်များ ပါရှိသည်။

"ဟက်စ်လာက သူတို့စစ်ပွဲမှာ အနိုင်ရပြီလို့ ထင်နေမယ် ထင်တယ်" ကျိကျဲ ထိန်းမနိုင်သိမ်းမရ ရယ်မောလိုက်သည် ။

ဖန်ခွမ်းက သူ့ကိုကြည့်ကာ ပြောသည်။ "မင်းသတိ မလွှတ်လိုက်နဲ့"

ကျိကျဲက ခေါင်းညိတ်ပြပြီး အဖွဲ့တွေကို မြန်မြန်သွားဖို့ အမိန့်ပေးလိုက်သည်။

၎င်းတို့သည် Black Harrier ရဟတ်ယာဉ်များနှင့် ကုန်တင်လေယာဉ်ငယ်များစွာ ထားရှိသည့် လျှို့ဝှက်ကုန်လှောင်ရုံသို့ ရောက်ရှိရန် နောက်ထပ်နှစ်နာရီကြာ ခရီးထွက်ရန် လိုအပ်သည်။

လီယောင်နှင့် လမ်းဘတ်တို့သည် ကျန်းဝေ၏အမိန့်ကို နားကြပ်များမှတစ်ဆင့် လက်ခံရရှိခဲ့သည်။ တစ်ယောက်ကိုတစ်ယောက်ကြည့်ကာ တိုက်ခိုက်ရမည့်အချိန် ရောက်ပြီဟု သိလိုက်ကြသည်။

လီယောင်သည် တက်ဘလက်တစ်လုံးကို ထုတ်ယူလိုက်ပြီး ရန်သူ့ဆက်သွယ်ရေးကွန်ရက်တွင် ထည့်ထားသော ဗိုင်းရပ်စ်ကို အသက်သွင်းလိုက်သည်။

ရှီးးးးး

နားကြပ်ပေါက်ထဲက စူးစူးဝါးဝါးအော်သံကြောင့် လူတိုင်း အံ့ဩသွားကြသည်။ သူတို့နားထဲက နားကြပ်များကို ချက်ချင်း ဖယ်လိုက်ကြ၏။

ကျိကဲ မကျေမနပ်ဖြစ်သွားတယ်။ မော်တော်ယာဉ်အား ရပ်တန့်ပြီး ဆက်သွယ်ရေးစက်ကို စစ်ဆေးရန် အမိန့်ပေးမည်ပြုစဉ်တွင် အင်ဂျင်သံများ ဆက်တိုက်ထွက်ပေါ်လာသည်ကို ကြားလိုက်ရသည်။

"ဝပ်နေ" ဖန်ခွမ်း၏ အမူအရာ ချက်ချင်းပြောင်းသွားသည်။ မတုံ့ပြန်နိုင်သေးသော ကျိကျဲကို မြေပြင်ပေါ်သို့ တွန်းချလိုက်သည်။ ဖန်ခွမ်း တွန်းချလိုက်ပြီးနောက်တွင် သေနတ်သံများ ထွက်ပေါ်လာသည်။

ဘက်ပေါင်းစုံမှ ကျည်ဆန်များ ယာဉ်တန်းပေါ်သို ရွာချလာသည်။ လက်ပစ်ဗုံးများ ပေါက်ကွဲမှုကြောင့် မော်တော်ယာဉ်များကို တိမ်းမှောက်ကုန်သည်။ မီးတောက်များနှင့် တောက်ပသောအလင်းရောင်များကို မြင်တွေ့နေရသည်။

လမ်းဘတ်သည် လီယောင်ကို ကားပေါ်မှ ဆွဲချလိုက်သည်။ တိုက်ရိုက်တိုက်ခိုက်ခြင်းကို ရှောင်ရှားရန် ဘေးနားရှိ အပင်များဆီသို့ လှိမ့်ဝင်သွားကြ၏။

သူ့ထောင်ချောက်ကို ကျူးကျော်သူတွေက ရှာတွေ့သွားလိမ့်မည်ဟု ကျိကျဲ မယုံနိုင်ပေ။ ဘယ်သူက အချက်အလက်ကို ပေါက်ကြားစေခဲ့တာလဲ။

ပြေး

စိတ်ပျက်နေဖို့ အချိန်မရှိခဲ့ပေ။ ကျိကျဲကို ဖန်ခွမ်းက တောထဲသို့ လျင်မြန်စွာ ဆွဲခေါ်သွားသည်။

…

တောထဲမှ သူ့တပ်များကို ကွပ်ကဲနေသော ကားလ်သည် စိတ်လှုပ်ရှားစရာမှုကို ခံစားနေရသည်။ သူ၏တပ်များသည် ဆုတ်ခွာနေသော ရန်သူ၏ အမာခံအင်အားကို ဝန်းရံထားပြီး ၎င်းသည် ကိစ္စများကို ပြောင်းပြန်လှန်ရန် သူ့အတွက် ရွှေရောင်အခွင့်အရေးဖြစ်ကြောင်း သူသိသည်။

ခပ်ဝေးဝေးတွင် အသွင်အပြင်ပြောင်းလာသော ဟန်ရှောင်းသည် ဂျစ်ကားကို တစ်ယောက်တည်း မောင်းနှင်နေသည်။ သူသည် သူ့လက်ထဲတွင် အပူအာရုံခံကိရိယာတစ်ခုကို ကိုင်ထားပြီး တိုက်ပွဲဇုန်ကို ရှာဖွေနေသည်။ သူသည် သူ၏ပစ်မှတ်များကို လျင်မြန်စွာ ရှာတွေ့သွားသည်- ဖန်ခွမ်းနှင့် ကျိကျဲ။ ဖန်ခွမ်းကို အမီလိုက်နိုင်ခဲ့သော တပ်ဖွဲ့များသည် သူ၏ ပြင်းထန်သော တိုက်ခိုက်ရေးစွမ်းရည်ကြောင့် မညှာမတာ ဖျက်ဆီးခံလိုက်ရသည်။

ဟန်ရှောင်းသည် ၎င်းတို့နှစ်ဦးလုံးကို မီတာတစ်ရာအကွာမှ အပူအာရုံခံကိရိယာဖြင့် နောက်ယောင်ခံလိုက်နေသည်။

"ဂျစ်ကားတစ်စီး ချဉ်းကပ်လာနေတယ်။" ဖန်ခွမ်းက အနောက်ကို လှမ်းကြည့်သည်။ တောထူထပ်သော တောအုပ်ထဲတွင် သူတို့နောက်လိုက်နေသော ဂျစ်ကားကို ဝိုးတဝါးသာ မြင်ရပြီး ဂျစ်ကား၏အင်ဂျင်သံကို တိုးတိုးလေး ကြားနေရသည်။

ဖန်ခွမ်းသည် ဂျစ်ကားကို ဖျက်ဆီးချင်နေသည်။ သို့သော်လည်း ဂျစ်ကားနှင့် နီးကပ်သွားတိုင်း ဟန်ရှောင်းသည် လမ်းကြောင်းပြောင်းကာ သူတို့ကြားမှ အကွာအဝေးကို ခွါလိုက်သည်။ ဂျစ်ကားက စိတ်ကသိကအောက် ဖြစ်စရာကောင်းလှသည်။

ဖန်ခွမ်းသည် ဟန်ရှောင်က ၎င်းတို့၏တည်နေရာကို ရန်သူထံ ပြန်ပို့သည့် ကင်းထောက်စစ်ဆင်ရေး ပြုလုပ်နေသည်ဟု ထင်နေသည်။ ထို့အပြင် စစ်တပ်တစ်ခုလုံးက ၎င်းတို့နောက်သို့ လိုက်လာမည်ဟု ထင်ထားသောကြောင့် ရွေ့လျားနေခြင်းကို ရပ်တန့်ရန် ကြောက်ရွံ့နေကြသည်။ ကျိကျဲကို လွတ်ရာသို့ ဆွဲခေါ်နေသော ဖန်ခွမ်းသည် သူ၏ စွမ်းအင်များ လျင်မြန်စွာ ကုန်ဆုံးသွားသည်ကို ခံစားနိုင်နေသည်။

“ငါတို့က သိုလှောင်ရုံကို ရောက်ဖို့ပဲလိုတယ်။ ရဟတ်ယာဉ်က ငါတို့ကို လွတ်မြောက်အောင် ကူညီပေးလိမ့်မယ်။” ဖန်ခွမ်းက ဤသည်မှာ လွတ်မြောက်ရန် တစ်ခုတည်းသောနည်းလမ်း ဖြစ်သည်ကို သိသည်။ ဖန်ခွမ်းက သူ့ကိုယ်တိုင် စူပါလူသားတစ်ယောက်ဖြစ်သော်လည်း အလွန်ကြီးမားသော ရန်သူတပ်၏ ဝိုင်းရံခြင်းကိုခံရမည်ကို ကြောက်ရွံ့သောကြောင့် သူ့အရှိန်ကို တိုးလိုက်သည်။ ထို့ကြောင့် ကျိကျဲမှာ အလွန် ပင်ပန်းနွမ်းနယ်နေမှန်း သူ မသိလိုက်ပေ။

မိနစ်နှစ်ဆယ်ခန့် လိုက်ဖမ်းပြီးနောက်၊ နှစ်ဖက်စလုံးသည် ရှေ့တန်းမှ ဝေးကွာသွားကြသည်။

“ဒီအချိန်ပဲ” ဟန်ရှောင်းသည် စိတ်ပိုင်းဖြတ်လိုက်၏။ သူသည် လမ်းကြောင်းပြောင်းကာ ထောက်ပံ့ပို့ဆောင်ရေးဌာနမှ ခိုးယူခဲ့သော မြေပုံ၏အကူအညီဖြင့် သူ၏ပစ်မှတ်များ၏ ရှေ့သို့ သွားလိုက်သည်။ ဂျစ်ကားသည် အလွန်လျှင်မြန်သော အရှိန်အဟုန်ဖြင့် မောင်းနှင်လာပြီး ဟန်ရှောင်းသည် နှစ်ကီလိုမီတာအကွာရှိ ဆယ်မီတာမြင့်သော ချောက်ကမ်းပါးကို မောင်းနှင်သွား၏။ သူ၏ပစ်မှတ်များ ဤနေရာကို ဖြတ်သွားမည်မှာ သေချာသည်။ ဟန်ရှောင်းက သူ၏ လက်နက်အားလုံးကို ထုတ်လိုက်တော့သည်။

သူသည် မွမ်းမံထားသော အပေါ့စား ယန္တရားလက်ထဲသို့ ဘယ်ဘက်လက်မောင်းကို ထည့်လိုက်ပြီး သံလိုက်ချပ်ဝတ်ကို ခါးတွင် ထည့်ထားသည်။ Berserk Eagle ကို သေနတ်အိတ်ထဲတွင် ထည့်သွင်းပြီး၊ ငါးမီတာ အချင်းဝက်ရှိသော စက်ဝိုင်းတွင် ချိန်ကိုက်ဗုံး ၁၀လုံးကို မြှုပ်နှံလိုက်သည်။ ချိန်ကိုက်ဗုံး၏ ကွင်းများတစ်လျှောက်တွင် ကြိုးပါးပါးလေးဖြင့် ချည်ထားသောကြောင့် အနည်းငယ် ဆွဲယူလိုက်ခြင်းဖြင့် ၎င်းတို့အားလုံးကို အသက်ဝင်စေမည် ဖြစ်သည်။

ဟန်ရှောင်းသည် ထောက်ပံ့ပို့ဆောင်ရေး အဖွဲ့မှ ရရှိသော စနိုက်ပါ ရိုင်ဖယ်တစ်လက်ကို ယူပြီး ကျောက်တုံးပေါ်တွင် မှောက်လျက် လှဲနေလိုက်သည်။ သူသည် ချိုင့်ဝှမ်းကို ရှင်းရှင်းလင်းလင်းမြင်ရပြီး သူ့ရိုင်ဖယ်သေနတ်ကို ပစ်မှတ်များ ရောက်ရှိလာမည်ဟု မျှော်လင့်ထားသည့်နေရာသို့ ချိန်ရွယ်ထားသည်။ သူသည် အသက်ပြင်းပြင်းရှူလိုက်ပြီး သေသေချာချာ အာရုံစိုက်နေသည်။

…

ကျိကျဲ ပြင်းထန်စွာ မောဟိုက်လာသည်။ ပြေးရင်းနှင့် သူ့မျက်နှာတစ်ခုလုံး ဖြူဖျော့လာ၏။ သူသည် စူပါလူသား မဟုတ်သောကြောင့် သက်လုံမှာ အကန့်အသတ်ရှိသည်။ ဖန်ခွမ်းကြောင့်သာ မဟုတ်ရင် သူ လဲကျခဲ့တာ ကြာလှပြီဖြစ်သည်။

ဖန်ခွမ်းက “မရပ်လိုက်နဲ့၊ ရန်သူက အချိန်မရွေး ချဉ်းကပ်လာနိုင်တယ်။ တတ်နိုင်သမျှ အမြန်ဆုံး သိုလှောင်ရုံကို ရောက်ဖို့ လိုတယ်။”

သူတို့နှစ်ယောက် တောထဲက အမြန်ထွက်လာသည်။ တောင်တွေက သူတို့ရှေ့မှာ ရှိနေ၏။

ကျိကျဲမှာ သူ့ခြေထောက်တွေ လှုပ်ယမ်းသွားသလို ခံစားလိုက်ရပြီး မြေပြင်ပေါ် လဲကျသွားတော့သည်။ သူ “ကျွန်တော် မပြေးနိုင်တော့ဘူး” အသက်ရှူမဝသလို ပြောလိုက်၏။

ဖန်ခွမ်း မျက်မှောင်ကြုတ်လိုက်သည်။ သူ အနည်းငယ် စိတ်တိုသွားသော်လည်း ကျိကျဲကို ချန်ထား၍ မရမှန်း သူသိသည်။ ကျိကျဲ၏ ညီမသည် ဂျာမီနယ်အဖွဲ့အစည်း ထောက်လှမ်းရေးကွန်ရက်တစ်ခုလုံး၏ တာဝန်ခံဖြစ်သည်။

“ငါ့ကို ကျောပိုးပြီး သယ်သွားပါ၊ အဲဒါက…”

ကျိကျဲ၏ စကားမှာ တစ်ဝက်တစ်ပျက်သာ ရှိသေးစဉ် သေနတ်ဖြင့် ပစ်ခတ်သံ မြည်ဟိန်းသွား၏။

ဖန်ခွမ်းသည် လျင်မြန်စွာ တုံ့ပြန်လိုက်ပြီး နောက်ပြန်ဆုတ်သွားသည်။

သို့သော် သူသည် ပစ်မှတ်မဟုတ်ပေ။

ကျိကျဲ၏ ခေါင်းကို နောက်ပြန် တွန်းထုတ်လိုက်သလိုပင်။ သူ၏ ဘယ်ဘက်ပါးပြင်တွင် သွေးထွက်နေသော အပေါက်တစ်ခု ရှိနေသည်။ အပေါက်က အရမ်းကြီးတာကြောင့် ကျည်ဆန်က ကျိကျဲ၏ ဦးခေါင်းခွံကို ထိမှန်ပြီး ဘယ်ဘက်ပါးကို ကြေမွသွားစေပါတယ်။ သွေးနှင့်အသားတို့သည် နေရာအနှံ့ ပြန့်ကျဲသွား၏။ ကျိကျဲ မြေပြင်ပေါ်သို့ လဲကျသွားသည်။ အသက်ရှိသည့် အရိပ်အယောင်များ မပြတော့ပေ။

[လုပ်ကြံသတ်ဖြတ်ခြင်း ၂ ပြီးသွားပါပြီ။ စွမ်းအင် ၁၀၀% သုံးစွဲခဲ့သည်။ သင်သည် အတွေ့အကြုံအမှတ်

၄,၀၀၀ ရရှိပါသည်။]

ပန်ကွမ်၏ မျက်လုံးများ ကျဉ်းမြောင်းလာသည်။ သူ့ဓားရှည်ကို ဆွဲထုတ်ပြီး သေနတ်ပစ်သည့် နေရာသို့ ပြေးဝင်သွားတော့သည်။

အခန်း (၈၄) ပြီး၏။

လင်းဆက်

+++++