Open Beta သို့ ၃လအလို

အခန်း (၈၉) Open Beta သို့ ၃လအလို

နှစ်ရက်အကြာတွင် ဟက်စ်လာ၏ နံနက်ခင်းလေဟုန်စီးတီးတွင်...

နယ်စပ်အနီးရှိ ကမ်းရိုးတန်းမြို့တစ်မြို့ဖြစ်သော နံနက်ခင်းလေဟုန်စီးတီးတွင် ကြီးမားသော သင်္ဘောများကို လက်ခံနိုင်သော ကြီးမားသည့် ဆိပ်ကမ်းတစ်ခုရှိသည်။ မြို့သည် အထပ်မြင့် အဆောက်အအုံများစွာရှိသည့် မြို့ကြီးတစ်မြို့ ဖြစ်သည်။

ဟက်စ်လာသည် နိုင်ငံခြောက်ခုတွင် အင်အားအကြီးဆုံး ရေကြောင်းတပ်ဖွဲ့ ရှိပြီး ၎င်း၏ ကမ်းရိုးတန်းမြို့ အများအပြားကို ကာကွယ်ရန်အတွက် ရေတပ်ကို ဖွံ့ဖြိုးတိုးတက်အောင် လုပ်ဆောင်ရန် အာရုံစိုက်ထားသည်။ ရေပင်လယ်ဂြိုလ်တွင် တိုက်ကြီးလေးခုရှိသည်။ တစ်ခုနှင့်တစ်ခုကို ကြီးမားသော သမုဒ္ဒရာများဖြင့် ခွဲခြားထား၏။

ပင်လယ်ကို အုပ်စိုးသူသည် အရာခပ်သိမ်းကို ချုပ်ကိုင်သည်ဟု ရှေးဆိုရိုးစကားလည်း ရှိ‌လေသည်။

ရေနံနှင့် သဘာဝဓာတ်ငွေ့များအပါအဝင် ပင်လယ်ကြမ်းပြင်အောက်ရှိ သယံဇာတများစွာလည်း ရှိသည်။ ပင်လယ်မှ ရုပ်ကြွင်းလောင်စာများကို ထုတ်ယူခြင်းသည် ဟက်စ်လာစီးပွားရေး၏ အဓိကမဏ္ဍိုင် ဖြစ်သည်။

ဟန်ရှောင်းသည် ဟက်စ်လာတွင် 'မဟာအကျပ်အတည်းကို ရင်ဆိုင်မည့် အရေးပေါ်စီမံချက်' ဟုခေါ်သော လျှို့ဝှက်စစ်ရေးဗျူဟာ တစ်ခုရှိကြောင်း သတိရမိသည်။ အဆိုပါ အစီအစဉ်သည် နိုင်ငံတွင် နျူကလီးယားကမ္ဘာစစ်ကဲ့သို့ ကြီးမားသော ဘေးဒုက္ခများ ကြုံတွေ့ရသည့် အခြေအနေအတွက် ကြိုတင်ပြင်ဆင်ထားခြင်းဖြစ်ပြီး၊ မီတာတစ်ထောင်ရှည်သော မိခင်‌ရေယာဉ် အများအပြားကို ထုတ်လုပ်ရန် စီစဉ်ထားသည်။ သူတို့သည် ပင်လယ်ပြင်တွင် လွင့်မျောနေသော နိုင်ငံအဖြစ်သို့ ကူးပြောင်းနိုင်ပြီး ၎င်းတို့၏ လူဦးရေကို ထိန်းသိမ်းနိုင်ပေးသည်။

ဤနည်းဗျူဟာသည် အခြားသူများအတွက် နောက်ဆုံးတွင် လမ်းခင်းပေးခဲ့သော်လည်း၊ သူတို့၏ ငြိမ်းချမ်းရေးကာလတွင် အဆိုးဆုံးအတွက် ပြင်ဆင်ခြင်းစိတ်ဓာတ်သည် အတုယူထိုက်ပါသည်။ ထိုစကားအတိုင်းပင် ပူပန်ဆင်းရဲမှု၌ ချမ်းသာသူသည် သက်သာခြင်းသို့ ရောက်၏၊ ဒုက္ခတစ်မျိုးမျိုး မဖန်တီးရင် အသက်မရှင်နိုင်ဘူးလို့ ဆိုလိုခြင်းပင်။

ခဏနေဦး။ မဟုတ်‌သေးပါဘူး… အင်း၊ အဲဒါက အရေးမကြီးပါဘူး။

ယခုအခါ ဟန်ရှောင်းသည် မျက်နှာသွင်ပြင်အသစ်ဖြင့် မြို့တော်ရှိ ဖေဘီယန် ကုမ္ပဏီရုံးခွဲတွင် စောင့်နေသည်။ သူသည် ထိုနေရာ၌ ဗီအိုင်ပီအဖြစ် နေထိုင်ရန် မက်သရူးထံမှ အနက်ရွှေရောင်ကတ်ကို အသုံးပြုခဲ့သည်။ ဤနေရာသည် သူ၏ ယာယီအနားယူသည့် နေရာဖြစ်သည်။

‘Open Beta’ အတွက် သုံးလကျန်သေးကာ သူ့ဘာသာသူ လည်ပတ်ခြင်းက သူ့အတွက် အကြီးမားဆုံး အကျိုးခံစားခွင့်များကို ပေးစွမ်းနိုင်မည်ဖြစ်သည်။ သူသည် စက်ယန္တရားများ ပိုမိုပြုလုပ်ရန် စုဆောင်းထားသော ငွေအမြောက်အမြားဖြင့် စက်ပိုင်းဆိုင်ရာ အစိတ်အပိုင်းများကို ဝယ်ယူရန် ဖေဘီယန်ကုမ္ပဏီ၏ လမ်းကြောင်းများကို အသုံးပြုနိုင်သည်။ ထို့နောက် ၎င်းမှ အတွေ့အကြုံအမှတ် အများအပြားကို ရရှိနိုင်ပြီး သူ၏ထုတ်ကုန်များကို ရောင်းချ၍လည်း ငွေပြန်ရှာနိုင်သည်။

အဘိုးကြီးလူ၏ ‘လျှို့ဝှက်တောင်းဆိုချက်’ သည် ‘Open Beta’ ပြီးမှသာ အစပျိုးမည်ဖြစ်သည်။ သူနှင့် ဆက်ဆံရေးကောင်းတစ်ခု ထူထောင်ထားသောကြောင့် ဤမစ်ရှင်ကို ဆက်လုပ်ရန် အလျင်စလို မဖြစ်ခဲ့ပေ။

ဟန်ရှောင်းသည် ‘Open Beta’ မတိုင်မီ ဤနောက်ဆုံးအချိန်တွင် သူကိုယ်တိုင် ဖွံ့ဖြိုးတိုးတက်ရန်အတွက် အဓိကအချက်များကို ရေးသားလိုက်သည်။

- ဆုကြေးမြင့် လုပ်ငန်းတာဝန်များ အားလုံးကို အစပျိုးပြီး စွမ်းအားတိုးတက်စေဖို့ ရှားပါးတဲ့ စကေးတွေနဲ့ စွမ်းရည်တွေကို ရယူရန်။

- စနစ်၏တောင်းဆိုမှုများအတွင်း စက်ယန္တရားများပြုလုပ်နိုင်ဖို့နဲ့ အတွေ့အကြုံအမှတ် ပိုမိုရရှိစေဖို့အတွက် ပုံမှန် ထောက်ပံ့ရေးလမ်းကြောင်းတွေကို ရယူရန်။

- ဂျာမီနယ်အဖွဲ့အစည်းကို ဖျက်ဆီးခြင်းအတွက် ဆက်လက်လုပ်ဆောင်ရန်။

- ‘Open Beta’ အတွက် ပြင်ဆင်ရာမှာ ငါ့ ကိုယ်ပိုင်မစ်ရှင်ရဲ့ ဆုလာဘ်ကန့်သတ်ချက်ကို တိုးမြှင့်ရန်။

ဒါတွေက အကြမ်းဖျင်းအားဖြင့် အာရုံစိုက်ရမယ့် အချက်တွေပဲ။

ဟန်ရှောင်းသည် သူ၏ ဘောပင်ကို ချလိုက်ပြီး သေသေချာချာ တွေးတောလိုက်သည်။ ကြီးမားသော စနစ်၏တောင်းဆိုမှု အများအပြားကို မှတ်မိသောကြောင့် ပထမအချက်မှာ လွယ်ကူပါသည်။ ထို့အပြင်၊ ထောက်ပံ့ရေးလမ်းကြောင်းများကို အနက်ရွှေရောင် ဗီအိုင်ပီကတ်အကူအညီဖြင့် ဖေဘီယန် ကုမ္ပဏီထံမှ ရိုးရှင်းစွာ ရယူနိုင်သည်။

ဂျာမီနယ်အဖွဲ့အစည်းကို ဖျက်ဆီးခြင်းသည် သူ၏ A-class မစ်ရှင် ဖြစ်သည်။ သူ၏ များပြားလှသော သတင်းအချက်အလက်များကို မည်ကဲ့သို့ အကောင်းဆုံး အသုံးချမလဲဆိုတာအတွက် သူ့တွင် အတွေးအချို့ရှိသည်။ - အဖွဲ့အစည်းအပေါ် ရန်လိုသော စွမ်းအားကြီးအဖွဲ့အားလုံး၏ အကူအညီကို အသုံးချနိုင်သည်။

သူ့ ကိုယ်ပိုင်မစ်ရှင်၏ ဆုလာဘ်ကန့်သတ်ချက်ကို တိုးမြှင့်ရန်အတွက်၊ ဟန်ရှောင်း၏ ရည်ရွယ်ချက်မှာ သူ၏ ကမ္ဘာလုံးဆိုင်ရာ ဂုဏ်သတင်းကို တိုးမြှင့်ရန်ဖြစ်သည်။ ဆုငွေအတွက် ကန့်သတ်ချက် နှစ်မျိုးရှိသည် - နေ့စဉ် ကန့်သတ်ချက်နှင့် တစ်ဦးချင်း ကန့်သတ်ချက် - နှစ်မျိုးလုံးရှိသောကြောင့် သူ၏ ကမ္ဘာလုံးဆိုင်ရာ ဂုဏ်သတင်းကို တိုးတက်စေခြင်းဖြင့် နှစ်ခုစလုံးကို တိုးမြှင့်နိုင်သည်။ ဤသည်မှာ ကုန်ကျစရိတ် အသက်သာဆုံး နည်းလမ်းဖြစ်သည်။

သူ၏ ကမ္ဘာလုံးဆိုင်ရာ ဂုဏ်သတင်းသည် ယခုအခါ သုညဖြစ်နေသော်လည်း ဟန်ရှောင်းသည် အချိန်မီ တိုးတက်လာအောင် လုပ်မည်မှာ သေချာသည်။

ကမ္ဘာလုံးဆိုင်ရာ ဂုဏ်သတင်း ရရှိရန် နည်းလမ်းသုံးမျိုး ရှိသည်။ ပထမနည်းလမ်းမှာ အဆင့်မြင့်ပြီး ရှားပါးသော စနစ်၏တောင်းဆိုမှုများတွင် မြင့်မားသော ပံ့ပိုးကူညီမှု အဆင့်သတ်မှတ်ချက်များ ရရှိခြင်းဖြင့် ဖြစ်သည်။ သာမာန်အားဖြင့်၊ ဂြိုလ်တစ်ခု၏ အဓိက စနစ်၏တောင်းဆိုမှုကသာ ကမ္ဘာလုံးဆိုင်ရာ ဂုဏ်သတင်းကို ပေးစွမ်းနိုင်လိမ့်မည်—သူ၏ A-class စနစ်၏တောင်းဆိုမှု [ဂျာမီနယ်အဖွဲ့အစည်း ကျဆင်းခြင်း] သည် ၎င်းတို့ထဲမှ တစ်ခုဖြစ်သည်။

ဂြိုလ်တိုင်းတွင် အစဦးဂြိုလ်များသာမက၊ အနည်းဆုံးတစ်ခု သို့မဟုတ် တစ်ခုထက်ပိုသော အဓိကဇာတ်ကြောင်းများ ရှိပြီး၊ သက်ဆိုင်ရာ ‘ပင်မစနစ်၏တောင်းဆိုမှု’ နှင့် ချိတ်ဆက်ထားသည်။ ဥပမာအားဖြင့်၊ ရေပင်လယ်ဂြိုလ် ဗားရှင်း ၁.၀ တွင်၊ အဓိကဇာတ်ကြောင်းနှစ်ခုနှင့် လျှို့ဝှက်ဇာတ်လမ်းတစ်ပုဒ်ရှိသည်။ နိုင်ငံခြောက်နိုင်ငံနှင့် ဂျာမီနယ်အဖွဲ့အစည်းကြား ပဋိပက္ခသည် အဓိက ဇာတ်ကြောင်းများထဲမှ တစ်ခုဖြစ်သည်။ အခြားအရာများသည် ‘Open Beta’ တွင်သာ ပေါ်လာလိမ့်မည်။ အခြားတစ်ဖက်တွင်မူ၊ လျှို့ဝှက်ဇာတ်လမ်းကို ကံကောင်းမှသာ ရှာဖွေတွေ့ရှိနိုင်မည် ဖြစ်သည်။

ကမ္ဘာလုံးဆိုင်ရာ ဂုဏ်သတင်း ရရှိရေးနည်းလမ်းသည် အလွန်ခက်ခဲပြီး အချိန်ကုန်သည်။ သူသည် အချိန်တိုအတွင်း မအောင်မြင်နိုင်ပေ။

ဒုတိယနည်းလမ်းမှာ ကြုံရာကျပန်း ဖြစ်သည်။ ၎င်းတွင် လူသိများလာနိုင်သည့် စခန်းတစ်ခုနှင့် လူတစ်ဦး၏ ဂုဏ်သတင်းနှင့် သက်ဆိုင်သည့် အရာများကို လုပ်ဆောင်ခြင်း ပါ၀င်သည်။ ထိုအရာများသည် အခြေအနေအရ အမျိုးမျိုး ကွဲပြားနိုင်သည်။ မည်သို့မည်ပုံ လုပ်ရမည်ကို မည်သူမျှ ရှင်းရှင်းလင်းလင်း မသိကြဘဲ၊ ၎င်းသည် အားကိုးလောက်စရာ နည်းလမ်းမဟုတ်ပေ။

ဟန်ရှောင်းသည် ကမ္ဘာလုံးဆိုင်ရာ ဂုဏ်သတင်း ရရှိရန် အလွယ်ကူဆုံးနည်းလမ်းဖြစ်သော တတိယနည်းလမ်းကို ကျင့်သုံးရန် စိတ်အားထက်သန်နေသည်။ ထိုနည်းလမ်းမှာ အဆင့်သတ်မှတ်ချက် စာရင်းအချို့၏ ထိပ်ဆုံးသို့ တက်လှမ်းခြင်းပင် ဖြစ်သည်။

အချို့သော အဖွဲ့အစည်းများသည် လူသိရှင်ကြား အသိအမှတ်ပြုထားသော အဆင့်များကို ဖန်တီးထားကြသည်။ အမြင့်ဆုံးအဆင့်သို့ တက်ခြင်းဖြင့်၊ သူသည် ကမ္ဘာလုံးဆိုင်ရာ ဂုဏ်သတင်း ကို အလွယ်တကူ ရယူနိုင်သည်။ သို့သော် လူသစ်အချို့က သူ့ကို အဆင့်နှိမ့်ချနိုင်ပါက၊ သူ၏ ကမ္ဘာလုံးဆိုင်ရာ ဂုဏ်သတင်းသည် ကျဆင်းသွားမည်ဖြစ်ပြီး၊ ဤနည်းလမ်းကို စိတ်မချရပေ။ ၎င်းသည် 'အစစ်အမှန်' ကစားသမားအများစု အသုံးပြုသည့်နည်းလမ်း ဖြစ်သည်။ ကမ္ဘာလုံးဆိုင်ရာ ဂုဏ်သတင်းသည် အဖွဲ့အစည်းနှင့် သက်ဆိုင်သော ဂုဏ်သတင်းကိုလည်း အလျှင်အမြန် တိုးတက်စေပြီး၊ ကစားသမားများကို ကွန်ပျူတာဇာတ်ကောင် ပစ္စည်းများအပေါ် လျှော့စျေးများပေးခြင်းနှင့် ရှားပါးသော စနစ်၏တောင်းဆိုမှုများကို အစပျိုးရန် အခွင့်အလမ်းများ ပေးနိုင်သည်။

ဟန်ရှောင်း၏ လက်တစ်ဖက်မှ လက်ချောင်းများက စားပွဲမျက်နှာပြင်ကို ပုတ်လိုက်ကာ တစ်ဖက်က သူ့နှာခေါင်းကို ထိလိုက်သည်။

ငါမလှုပ်ရှားခင်၊ ငါ့မှာရှိနေတဲ့ ဝန်ထုပ်ဝန်ပိုးတွေ (အတွေ့အကြုံအမှတ်) အားလုံးကို ဖယ်ရှားရမယ်။

သူက ဂိမ်းမျက်နှာပြင်ကို ကြည့်ရှုလိုက်သည်၊ စုစုပေါင်း အတွေ့အကြုံအမှတ် ၇၂၀,၀၀၀ ကိုပြသနေသည်။ သူသည် အတွေ့အကြုံအမှတ် အားလုံးကို သုံး၍ သူ့ဇာတ်ကောင်ကို အဆင့်သုံးဆယ်အထိ အဆင့်မြှင့်တင်ပေးလိုက်သည်။ သူ၏ အခြေခံအချက်အလက်များ တိုးပွားလာသည်။

ယန္တရားပညာရှင် (စတင်သင်ယူသူ) သည် အမြင့်ဆုံးအဆင့်သို့ ရောက်ရှိသွားသည်။ နောက်ဆုံးအဆင့်တက်ခြင်းသည် ကစားသမားများအား အကြီးမားဆုံးသော အခြေခံအချက်အလက်များ တိုးမြင့်စေသည်။ ယခုတစ်ကြိမ်တွင် သူ၏စွမ်းအင်မှာ အဆင့်ကိုးနှင့် ဆယ်ကြားရှိ ကိုးဆယ်မှတ်အထိ တိုးမြှင့်ရရှိခဲ့သည်။

ထို့နောက် သူသည် မသတ်မှတ်ရသေးသော အမှတ်ခြောက်ခုစလုံးကို သူ၏ ဉာဏ်ရည်အမှတ်ထဲသို့ ပစ်ထည့်လိုက်ပြီး တစ်ရာပြည့်သွားစေခဲ့သည်။

သူ့စိတ်က ချက်ချင်း ပိုကြည်လင်လာပြီး စက်အားလုံးကို ထိန်းချုပ်ရတာ ပို၍ သက်တောင့်သက်သာ ဖြစ်လာသည်ဟု ခံစားနေရသည်။ ဉာဏ်ရည်အမှတ်သည် စက်လက်နက်များကို အသုံးပြုသည့်အခါ ထုတ်လုပ်မှုအမြန်နှုန်း၊ ထုတ်လုပ်မှုအရည်အသွေးနှင့် ထိခိုက်နိုင်မှုဘောနပ်စ်များအပါအဝင် ယန္တရားပညာရှင်တစ်ဦး၏ မတူညီသော နယ်ပယ်များစွာကို သက်ရောက်စေသည်။ ဥပမာအားဖြင့်၊ ယန္တရားပညာရှင်တစ်ဦးသည် ပုံမှန်အားဖြင့် ထိခိုက်နိုင်မှု ၂၀ ပေးသည့် ပစ္စတိုကိုအသုံးပြုသောအခါ၊ ပစ္စတိုသည် ယန္တရားပညာရှင်၏ ထိခိုက်နိုင်မှုဘောနပ်စ်ကြောင့် ပစ္စတိုသည် ပိုမို၍ ထိခိုက်နိုင်စေသည်။ ထို့ကြောင့် အခြားကစားသမားများသည် ယန္တရားလက်နက်များကို ဆက်လက်အသုံးပြုနိုင်သော်လည်း ထိခိုက်နိုင်မှု ပိုမို နည်းပါးမည်ဖြစ်သည်။

_____________________

[ယန္တရားပညာရှင် (စတင်သင်ယူသူ)] သည် အမြင့်ဆုံးအဆင့်ကို ရောက်နေပါပြီ။ အဆင့်တက်ရန်အတွက် ဒီဇိုင်းပုံစံ၂၀ခု ကို လေ့လာပါ။

အဆင့်မြင့်အတန်းအတွက် ကျပန်းပြုထားသော ဤလိုအပ်ချက်သည် ရိုးရှင်းပါသည်။

ဟန်ရှောင်းသည် ဝမ်းသာအားရဖြစ်ပြီး ယခုအချိန်အထိ သူသင်ယူခဲ့သည့် ဒီဇိုင်းပုံစံများကို ရေတွက်လိုက်သည်။ ရှစ်ခုသာ လိုတော့သည်။

သူသည် ကျပန်းပေါင်းစပ်မှုများမှတဆင့် အသုံးမဝင်သော ဒီဇိုင်းပုံစံများကို မထုတ်လုပ်ချင်ပေ။

ငါ့မှာရှိနေတဲ့ အတွေ့အကြုံအမှတ် ကို အပြည့်အဝအသုံးချသင့်တယ်။ ဘယ်လိုပဲဖြစ်ဖြစ်၊ အတွေ့အကြုံအမှတ်အားလုံးကို ဂိမ်းမျက်နှာပြင်မှာ သိမ်းထားတာပဲလေ၊ ငါ့ရဲ့ Class (အမျိုးအစား)ကို အဆင့်မြှင့်ဖို့ လောစရာမှ မလိုတာ။

…

ဖေဘီယန် ကုမ္ပဏီ၏ နံနက်ခင်းလေဟုန်စီးတီး ဌာနခွဲတွင် တာဝန်ခံ အန်တိုနီယိုသည် ဆေးပြင်းလိပ်သောက်နေသည်။ သူသည် တောင်ကြီးတစ်ခုလို ခန့်ခန့်ထည်ထည်ရှိပြီး ဆိုဖာတစ်ခုလုံး နေရာယူထားသည်။ သူသည် မီးခိုးငွေ့များကို မှုတ်ထုတ်လိုက်ပြီး၊ ဆိုဖာပေါ်တွင် ထိုင်နေသော ဟန်ရှောင်းကို ခြေအစခေါင်းအဆုံးကြည့်ကာ အကဲခတ်နေသည်။

ဟန်ရှောင်းသည် အနက်ရောင် ဂျာကင်အင်္ကျီကို ၀တ်ဆင်ထားပြီး သူ၏ အလင်းမျက်နှာဖုံးသည် သာမန်အလုပ်လက်မဲ့၊ လူလတ်ပိုင်း အမျိုးသားတစ်ဦးကဲ့သို့ နှိမ့်ချသောအသွင်ကို ယူထားသည်။ ဤသည်မှာ သူ၏ ကိုယ်ပိုင်လက္ခဏာအသစ်အတွက် ပြင်ဆင်ထားသည့် မျက်နှာဖြစ်သည်။

ဟန်ရှောင်းသည် ထောက်ပံ့ရေးပစ္စည်းများအတွက် စျေးဝယ်စာရင်းကို ထုတ်လိုက်ပြီး ဖြည်းညှင်းစွာ ပြောသည်။ "ဒီစာရင်းထဲက ပစ္စည်းအားလုံးကို လိုချင်ပါတယ်"

အန်တိုနီယိုသည် စာရင်းကိုယူကာ ကြည့်လိုက်သည်။ “စုစုပေါင်းကုန်ကျစရိတ်က ဒေါ်လာ ၁၀၀,၀၀၀ ပါ။ မင်းရဲ့ အနက်ရွှေရောင်ကတ်ကနေ နှစ်ဆယ်ရာခိုင်နှုန်းလျှော့ပြီးရင်၊ ၈၀,၀၀၀ ကုန်ကျမယ်။"

"ဒါ့အပြင် Dark Net's သွေးပဋိညာဉ်အဖွဲ့ အတွက် ဝင်ခွင့်လက်မှတ်ဝယ်ချင်ပါတယ်"

“ဒေါ်လာ ၂၀,၀၀၀” အန်တိုနီယို၏ မျက်လုံးများ ကျဉ်းမြောင်းသွားသည်။

Dark Net သည် မြေအောက်လောကနှင့် ပတ်သက်သည့် ထောက်လှမ်းရေးအားလုံး၏ အချက်အချာဖြစ်သည်။ ပဋိပက္ခများတွင် မပါဝင်ရန်နှင့် ငြိမ်းချမ်းစွာ ဖွံ့ဖြိုးတိုးတက်ရေးဆိုင်ရာ စည်းမျဉ်းများကို တင်းတင်းကျပ်ကျပ် လိုက်နာသည့် ကြားနေအဖွဲ့ဖြစ်ပြီး အနက်ရောင်ကွန်ယက်အဖွဲ့အစည်းမှ အပြည့်အဝ ထိန်းချုပ်ထားသည်။ အဖွဲ့အစည်းများစွာသည် အနက်ရောင်ကွန်ယက်အဖွဲ့အစည်းနှင့် စီးပွားရေးလုပ်ဖော်ကိုင်ဖက်များ ဖြစ်ကြသည်။ ၎င်းတို့သည် မြေအောက်ကမ္ဘာမှလူများကို မှောင်ခိုလက်နက်များ၊ ထုပ်ပိုးလွှဲပြောင်းမှု၊ ဘေးကင်းရာ‌နေရာများ၊ ငှားရမ်းနိုင်သော လူသတ်သမားများ၊ ကြေးစားစစ်သားများနှင့် ထောက်လှမ်းရေးတို့အပါအဝင် အကန့်အသတ်မရှိသော ဝန်ဆောင်မှုအမျိုးအစားများစွာကို ထောက်ပံ့ပေးခဲ့သည်။

သွေးပဋိညာဉ်အဖွဲ့ သည် အနက်ရောင်ကွန်ယက်အဖွဲ့အစည်း၏ လက်အောက်တွင် လုပ်ကြံသတ်ဖြတ်ရန် ငှားရမ်းနိုင်သော အဖွဲ့အစည်းဖြစ်သည်။ ဝင်ခွင့်လက်မှတ်ကို အသုံးပြု၍ ဟန်ရှောင်းသည် အဖွဲ့အစည်းအောက်တွင် စာချုပ်ချုပ်ဆိုထားသော လုပ်ကြံသတ်ဖြတ်သူ ဖြစ်လာနိုင်ပြီး Dark Net မှ ပေးဆောင်သည့် ဝန်ဆောင်မှုအားလုံးကို ခံစားနိုင်သည်။ ဆိုလိုသည်မှာ ဟန်ရှောင်းသည် Dark Net နဲ့ သူ့ရဲ့ဆက်ဆံရေးကို ဝင်ခွင့်လက်မှတ်ကိုအသုံးပြုရုံနဲ့ ဖွင့်နိုင်သွားသည်။

သွေးပဋိညာဉ်အဖွဲ့သည် ဆိုးဝါးသော အမည်တစ်ခုဖြစ်သော်လည်း ၎င်းတွင် ကမ္ဘာကျော်အခြားအမည်တစ်ခု ရှိသည်။

လုပ်ကြံသတ်ဖြတ်သူများအသင်း...

ဟုတ်ပါသည်၊ ဒါကို လုပ်ကြံရေးသတ်ဖြတ်သူများ လူမှုရေးအသင်းဟုလည်း ခေါ်နိုင်ပြီး၊ ၎င်း၏ အမျိုးအစားကို ချက်ချင်း နိမ့်ကျသွားစေတယ်။

ကစားသမားတစ်ဦးသည် အနက်ရောင်ကွန်ယက်အဖွဲ့အစည်းသို့ ဝင်ရောက်ရန် ရှုပ်ထွေးသော လုပ်ငန်းတာဝန်ပေါင်းများစွာကို ဖြတ်သန်းရသည်။ သို့သော်၊ အချိန်သည် ဟန်ရှောင်းအတွက် အရေးကြီးသောကြောင့် သူဝင်ခွင့်လိုအပ်ချက်ကိုဖြည့်ဆည်းရန် ရက်ပေါင်း ဒါဇင်အနည်းငယ် ကြာမည့်အစား ဝင်ခွင့်လက်မှတ်ဝယ်ရန် အပိုငွေကို အသုံးပြုခဲ့သည်။ ဒေါ်လာ ၂၀,၀၀၀ သည် 'အစစ်အမှန်' ကစားသမားများအတွက်ငွေအမြောက်အများဖြစ်သော်လည်း ဟန်ရှောင်းကတော့ ၎င်းကိုမြေပဲဟုသာ (ပေါပေါပဲပဲ ရနိုင်သည့်သဘော) သတ်မှတ်ခဲ့သည်။

"ပျော်ရွှင်မှုကို ငွေနဲ့ဝယ်လို့မရဘူးလို့ ဘယ်သူပြောလဲ" ဟန်ရှောင်း ရေရွတ်လိုက်သည်။ သူသည် 'အစစ်အမှန်' ကစားသမား ဖြစ်နေခဲ့စဉ်က ဝယ်ယူမှုတိုင်းအတွက် တွန့်တိုပြီး တွက်ချက်ရန် လိုအပ်သည်။ ဒီမတိုင်ခင်က ပိုက်ဆံအများကြီးရှိပြီး သုံးရတဲ့အရသာကို သူဘယ်တုန်းကမှ မခံစားဖူးပေ။

စက်ပိုင်းဆိုင်ရာ ထောက်ပံ့ရေးပစ္စည်းများကို အန်တိုနီယိုစီစဉ်ပေးထားသည့် သူ၏ ကိုယ်ပိုင်ဝပ်ရှော့သို့ မကြာမီ ပို့ဆောင်မည်ဖြစ်သည်။ ဟန်ရှောင်းသည် ဖန်ခွမ်းနှင့် တိုက်ခိုက်စဉ်က ပျက်စီးခဲ့သော သူ၏ ကိရိယာအားလုံးကို ပြင်ဆင်ရန် ကြံစည်ထားသည်။

ကျန်ရှိသော အစိတ်အပိုင်းများကိုမူ စက်ပစ္စည်းအသစ်အတွက် ရည်ရွယ်ထားသည်။

အသင်းတစ်ခုရဲ့ အကူအညီမပါဘဲ တစ်ယောက်တည်း လှုပ်ရှားရတော့မယ်။ ဒါကြောင့် ငါ့ရဲ့ တိုက်ပွဲတဲ့ပုံစံက အန္တရာယ်နည်းအောင် ပိုပြီး အာရုံစိုက်သင့်တယ်။ စနိုက်ပါသုံးတာက ယာယီအားဖြင့် ငါ့ကို ပိုအဆင်ပြေစေတယ်။ ပိုအားကောင်းတဲ့ စနိုက်ပါသေနတ်တွေနဲ့ ကျည်ဆန်အမျိုးအစားသစ်တွေကို တီထွင်ဖို့ လိုအပ်သေးတယ်။ ပြီးတော့၊ ဖောက်ခွဲရေးပစ္စည်းတွေ၊ ထောင်ချောက်တွေနဲ့ ယာဉ်တွေကို တိုက်ခိုက်နိုင်တဲ့ လက်နက်အချို့လည်း လိုအပ်လိမ့်မယ်။ နောက်ဆုံးအနေနဲ့၊ အနီးကပ်တိုက်ပွဲတွေမှာ ပါဝင်နိုင်စေမယ့် စက်ယန္တရားတွေ၊ ထိခိုက်ပျက်စီးမှု အများဆုံးပေးနိုင်တဲ့ သေးငယ်တဲ့ လျှို့ဝှက်လက်နက်မျိုးတွေလည်း လိုအပ်လိမ့်မယ်...

ဟန်ရှောင်းသည် အချိန်အတော်ကြာ စဉ်းစားပြီးနောက် အရည်အချင်းပေါင်းစပ်ခြင်းကို စတင်ရန် ဂိမ်းမျက်နှာပြင်ကို ဆွဲထုတ်လိုက်သည်။ ကျည်ဆန်အသစ်တွေနဲ့ စတင်ဖို့ ဆုံးဖြတ်‌လိုက်တော့သည်။

_____________________

အရည်အချင်းပေါင်းစပ်ခြင်း ပြုလုပ်လိုပါသလား။

(အဆင့် ၃ အခြေခံလက်နက်ပညာ + အဆင့် ၃ အခြေခံကုန်ကြမ်းပေါင်းစပ်ခြင်း + အဆင့် ၂ အခြေခံစွမ်းအင်ပြောင်းလဲခြင်းနိယာမ)

ဤပေါင်းစပ်ခြင်းက အတွေ့အကြုံအမှတ် ၁၅,၀၀၀ ကျသင့်ပါမည်။

_____________________

ပေါင်းစပ်မှု အောင်မြင်ပါသည်။

ဝမ်းသာပါသည်။ သင် [လွန်းဆံပုံစံ ဖောက်ထွင်းအားပြင်း ကျည်ဆံ] ‌ကို ရှာဖွေတွေ့ရှိခဲ့ပါသည်။

_____________________

အရည်အချင်းပေါင်းစပ်ခြင်း ပြုလုပ်လိုပါသလား။

(အဆင့် ၃ အခြေခံလက်နက်ပညာ + အဆင့် ၃ အခြေခံကုန်ကြမ်းပေါင်းစပ်ခြင်း + အဆင့် ၁ အခြေခံဇီဝဗေဒပညာ)

ဤပေါင်းစပ်ခြင်းက အတွေ့အကြုံအမှတ် ၁၅,၀၀၀ ကျသင့်ပါမည်။

_____________________

ပေါင်းစပ်မှု အောင်မြင်ပါသည်။

ဝမ်းသာပါသည်။ သင် [ဟိမ်းကျည်ဆံ] ‌ကို ရှာဖွေတွေ့ရှိခဲ့ပါသည်။

Congratulations, you have discovered [Hayme Bullet]!

_____________________

အရည်အချင်းပေါင်းစပ်ခြင်း ပြုလုပ်လိုပါသလား။

(အဆင့် ၃ အခြေခံလက်နက်ပညာ + အဆင့် ၃ အခြေခံကုန်ကြမ်းပေါင်းစပ်ခြင်း + အဆင့် ၂ အခြေခံ အလင်းပညာ)

ဤပေါင်းစပ်ခြင်းက အတွေ့အကြုံအမှတ် ၁၅,၀၀၀ ကျသင့်ပါမည်။

_____________________

ပေါင်းစပ်မှု အောင်မြင်ပါသည်။

ဝမ်းသာပါသည်။ သင် [အလင်း ကျည်ဆံ] ‌ကို ရှာဖွေတွေ့ရှိခဲ့ပါသည်။

ငါ့မှာ အတွေ့အကြုံအမှတ် ၂၀,၀၀၀ ကျန်သေးတယ်။ ငါ့ရဲ့ စနိုက်ပါစွမ်းရည်ကလည်း အဆင့်မမီသေးဘူး။ ဆက်လုပ်တာပေါ့။

ဟန်ရှောင်းက ခဏမျှ စဉ်းစားပြီးနောက် အဓိကစကေး [စနိုက်ပါပစ်ခတ်ခြင်း] ကို အဆင့် ၅သို့ တင်ရန် ဆုံးဖြတ်လိုက်သည်။ ထိုအရာက သူ၏ တိကျမှုနှင့် ပစ်ခတ်နိုင်သော အကွာအဝေးတို့ကို တိုးလာစေသည်။

သူက ဟက်စ်လာစစ်တပ် ထောက်ပံ့ပို့ဆောင်ရေးအဖွဲ့မှ Red-Falcon အမည်ရှိ စနိုက်ပါရိုင်ဖယ်ကို ခိုးယူခဲ့သည်။ ရိုင်ဖယ်သည် အနက်ရောင်ဖြစ်ပြီး မီးခိုးရောင်အဆင့် လက်နက်တစ်ခုသာ ဖြစ်သည်။ ၎င်းတွင် သာမန် အရည်အသွေးသာ ရှိသည်။ မကြာမီ သူသည် လက်နက်ကို အဆင့်မြှင့်ခြင်း စတင်ခဲ့တော့သည်။

ဟန်ရှောင်းသည် ဤအဆင့်မြှင့်တင်မှုများတွင် စနိုက်ပါရိုင်ဖယ်၏ စွမ်းအားကို တိုးမြှင့်ရန် အာရုံစိုက်ခဲ့သည်။ ထိခိုက်နိုင်မှု ၉၂ - ၁၀၃ သို့ တိုးမြှင့်ခဲ့သည်။ ပစ်ခတ်မှုနှုန်းသည် တစ်စက္ကန့်လျှင် နှစ်တောင့်နှင့်၊ အကွာအဝေးမှာ ၆၀၀ မီတာအထိ ရောက်နိုင်သည်။ သို့သော် [စက်ယန္တရားရင်းနှီးမှု] နှင့် [စနိုက်ပါပစ်ခတ်ခြင်း] ဖြင့် ၎င်း၏အကွာအဝေးသည် 750 မီတာအထိ ရောက်ရှိနိုင်ပြီး သူအသုံးပြုရန်အတွက် လုံလောက်ပါသည်။

ဟန်ရှောင်းသည် အတွေ့အကြုံအမှတ် ထောင်ပေါင်းများစွာ ကျန်နေသေးသော်လည်း အရင် သိမ်းထားရန် ဆုံးဖြတ်လိုက်သည်။ မကြာမီကမှ သူရှာဖွေတွေ့ရှိခဲ့သော ကျည်ဆံသုံးတောင့်ကို စတင်ထုတ်လုပ်တော့သည်။

…

သိပ်မကြာခင် ကျည်ဆန်အသစ်များ အစုလိုက် ထွက်ပေါ်လာသည်။

ဖေဘီယန် ကုမ္ပဏီ၏ သီးသန့်ဝပ်ရှော့သည် သေနတ်နှင့် ခဲယမ်းမီးကျောက်များ ပြုလုပ်ရန်အတွက် အဓိက ပြင်ဆင်ထားခြင်းဖြစ်ပြီး ထုတ်လုပ်မှုတစ်ခုလုံးအတွက် အချိန်အနည်းငယ်ကို သက်သာစေသည်။ ဒါက ဟန်ရှောင်ကို တစ်ခုခုကို သတိရစေသည်။

စက်ပိုင်းဆိုင်ရာ အစိတ်အပိုင်းတွေ ထုတ်လုပ်ရာမှာ ကူညီဖို့အတွက် စက်ရုပ်လက်ထောက်အချို့ကို လုပ်ရင်ကောင်းမလား။

စက်ရုပ်အတွက် လိုအပ်သော စမတ်ချစ်ပ်များနှင့် အခြားလိုအပ်သော အစိတ်အပိုင်းများအတွက် ဒီဇိုင်းပုံစံမှာ သူ့တွင်ရှိနှင့်ပြီးဖြစ်သည်။ သူလုပ်ရမှာက သူ့လက်ထောက်အဖြစ် လုပ်ဆောင်နိုင်တဲ့ ရိုးရှင်းတဲ့ စက်ရုပ်ရိုဗာကို မထုတ်လုပ်ခင် သူ့ရဲ့ [အခြေခံ ပရိုပရမ်ရေးဆွဲ‌ခြင်း] ကို အဆင့်မြှင့်ဖို့ပါပဲ။ သို့သော်လည်း လက်ရှိတွင် သူ့တွင် ပုံသေစခန်းမရှိသဖြင့် စက်ရုပ်များကို ထုတ်လုပ်ရန် သူ့အတွက် မသင့်လျော်သေးပေ။

အန်တိုနီယို၏ ခြေသံကို ကြားလိုက်ရသည်။ ခဏကြာတော့ သူက အလုပ်ရုံထဲ ဝင်လာသည်။ သူက စားပွဲပေါ်တွင် အနုစိတ်ပုံဖော်ထားသော ရွှေဒင်္ဂါးပြားကို တင်လိုက်ပြီး ပြောလိုက်၏။ "ဒါက မင်းရဲ့အသင်းဝင်လက်မှတ်ပဲ"

ဟန်ရှောင်း ဝမ်းသာသွားသည်။

_____________________

သင်သည် အဖွဲ့အသစ်ဖြင့် ဂုဏ်သတင်းကို ဖွင့်လှစ်လိုက်ပါပြီ။

သွေးပဋိညာဉ်အဖွဲ့ : သူစိမ်း (၀/၃၀၀) - [အရံအဆင့် လုပ်ကြံသတ်ဖြတ်သူ]

အခန်း (၈၉) ပြီး၏။

လင်းဆက်

+++++