လျှပ်စစ်သံလိုက်လက်နက်

အခန်း (၁၁၈) လျှပ်စစ်သံလိုက်လက်နက်

_____________________

သင် အဆိပ်မိသွားပါသည်။

တစ်စက္ကန့်လျှင် သွေးအမှတ် ၃မှတ် ဆုံးရှုံးလိမ့်မည်။

သင်သည် အဆိပ်ရှိသော ဓာတ်ငွေ့၏ အကွာအဝေးအတွင်း ရှိနေသရွေ့ အဆိပ်သင့်သော အခြေအနေတွင် ရှိနေမည်ဖြစ်ပြီး၊ ထိခိုက်မှု အတိုင်းအတာမှာ ဆက်လက် တိုးမြင့်လာမည်ဖြစ်သည်။

_____________________

မမြင်နိုင်သော နတ်ဆိုးက တိုက်ခိုက်ပါက အဆိပ်ပြင်းသော ဓာတ်ငွေ့ကြောင့်လည်း ဒဏ်ရာရသွားမည်ဖြစ်သည်။

ဟန်ရှောင်းသည် သူနှင့်အတူ အဆင့်နိမ့်သွေးဖြည့်ဆေးများ ယူဆောင်လာသောကြောင့် မကြောက်မရွံ့ဖြစ်နေသည်။ သူ၏ သွေးအမှတ် ၂,၀၀၀ ကျော်ဖြင့်၊ သူသည် စစ်မြေပြင်အား သူ၏ အားသာချက်အဖြစ် ပြောင်းလဲကာ ပြိုင်ဘက်၏ မမြင်နိုင်သောစွမ်းရည်ကို အနိုင်ယူနိုင်ခဲ့သည်။

အခြေအနေက ရှေ့မတိုးနောက်မဆုတ် ဖြစ်နေသည်။ မမြင်နိုင်သောနတ်ဆိုးသည် သူ့ကို မကိုင်တွယ်နိုင်သည့်အပြင် ဟန်ရှောင်းသည်လည်း မမြင်နိုင်သောနတ်ဆိုးကို မပစ်ချနိုင်ပေ။

ငါရှုံးမှာမဟုတ်ပေမယ့်လည်း၊ ဒီနတ်ဆိုးကိုလည်း အနိုင်ယူနိုင်စွမ်းမရှိဘူး။ ဒီအတိုင်းသာ ဆက်သွားနေမယ်ဆိုရင် သူ နောက်ဆုတ်သွားမှာ သေချာတယ်၊ အဲဒါက နောက်ဆုံးမှာ သရေပဲ ဖြစ်လိမ့်မယ်။

ဟန်ရှောင်းက သူ့အသက်ကို ခြိမ်းခြောက်နိုင်တဲ့ နတ်ဆိုးကို သတ်ပစ်ဖို့ စိတ်ပိုင်းဖြတ်ထား၏။ ဒုတိယအတွေးဖြင့်၊ သူဖန်တီးခဲ့သော သက်တောင့်သက်သာ အခြေအနေကို စွန့်လွှတ်ရန် ဆုံးဖြတ်လိုက်သည်။ သူသည် လျပ်ပြေးဖိနပ်များကို အသက်သွင်းပြီး စစ်မြေပြင်မှ ထွက်ပြေးလိုက်သည်။ မျှော်လင့်ထားသည့်အတိုင်း နတ်ဆိုးသည် သူ့နောက်သို့ လိုက်လာ၏။

သူသည် ချပ်ဝတ်တန်ဆာကို ဖြည်းညှင်းစွာ ဟန်ဆောင်ထိန်းချုပ်ကာ သူ၏ ဟာကွက်များကို နတ်ဆိုးအား ပြသလိုက်သည်။ ထို့နောက်တွင်၊ အံ့သြစရာမဟုတ်ပဲ၊ နတ်ဆိုးက သူ့နောက်ကျောကို ပြင်းပြင်းထန်ထန် ကုတ်ခြစ်ပစ်လိုက်၏။ နတ်ဆိုး၏ လက်သည်းများကြောင့် နာကျင်ကိုက်ခဲနေသော်လည်း ဟန်ရှောင်းသည် မျက်နှာတည့်တည့်ကို ထိန်းသိမ်းထားသည်။ ဒါတွေအားလုံးဟာ သူ့ခန္ဓာကိုယ်ပေါ် နတ်ဆိုးရဲ့ တိုက်ခိုက်မှုရဲ့ သက်ရောက်မှုကို စမ်းသပ်ဖို့ပါပဲ။

_____________________

သင်သည် ကိုယ်ပျောက်နတ်ဆိုး (အဆင့် ၄၄) ၏ တိုက်ခိုက်ခြင်း ခံရသည်။

သွေးအမှတ် ၃၇မှတ် ဆုံးရှုံးသွားပါသည်။

_____________________

တစ်ချက်လောက် တိုက်ခိုက်ရုံနဲ့ သွေးအမှတ် ၄၀နီးပါး ဆုံးရှုံးသွားတယ်။ ဒါ့အပြင် တိုက်ခိုက်မှုနှုန်းက အရမ်းမြန်တယ်။ ကံကောင်းတာက၊ ငါက သံလိုက်ချပ်ဝတ်ကို ၀တ်ထားလို့ မဟုတ်ရင် ငါ့ သွေးက ဆယ်စက္ကန့်အတွင်း ကုန်သွားလိမ့်မယ်။

မမြင်နိုင်သောနတ်ဆိုးသည် ပဉ္စမမြောက်မစ်ရှင်အတွက် သန်မာသောပြိုင်ဘက်ဖြစ်ကြောင်း ဟန်ရှောင်းသိသောအခါ ဒီထက်ပို၍ အလေးအနက်မထားနိုင်တော့ပေ။ သူ့ရှေ့မှာ နတ်ဆိုးနဲ့တွေ့ပြီး သေဆုံးသွားတဲ့ တခြားစိန်ခေါ်သူတွေလည်း ရှိကောင်းရှိနိုင်၏။

လျပ်ပြေးဖိနပ်၏ မတူညီသော အမြန်နှုန်းများကို အသုံးပြု၍ စမ်းသပ်မှုများပြီးနောက်၊ နောက်ဆုံးတွင် သူသည် နတ်ဆိုး၏အရှိန်ကို ခန့်မှန်းနိုင်သွားသည်။

တကယ်လို့ ငါက လျပ်ပြေးဖိနပ်ကို အလယ်အလတ်အမြန်နှုန်းနဲ့ ထိန်းထားမယ်ဆိုပါက၊ အဲဒါက နတ်ဆိုးကို အမီလိုက်ဖို့ မှန်ကန်သောအမြန်နှုန်း ဖြစ်လိမ့်မယ်၊ ဒါပေမယ့် အရမ်းတော့ လွယ်မှာမဟုတ်ဘူး။ ကြိုးစားကြည့်သင့်ပါတယ်လေ။

အစီအစဉ်အသစ်ကို စိတ်ထဲတွင်တွေးကာ ဟန်ရှောင်းသည် ချက်ချင်းလှည့်ပြီး လေဆိပ်ဆီသို့ စကိတ်စီးလိုက်သည်။ ကိုယ်ပျောက်နတ်ဆိုးသည် အနောက်တွင် ကပ်လျက် ရှိနေသည်။

ကံကောင်းထောက်မစွာ၊ မိုးလင်းခါစဖြစ်သဖြင့် လမ်းများသည် လူရှင်းနေ၏။ အကယ်၍များ လူရှုပ်သည့် အချိန်မျိုးဆိုလျှင် ဟန်ရှောင်း၏လမ်းသည် အတားအဆီးများဖြင့် ပြည့်နှက်နေပေလိမ့်မည်။

ဟန်ရှောင်းက သူ့ဖုန်းကို ထုတ်ပြီး ဒုတိယမျိုးဆက် ရိုဗာကို ယူလာပေးဖို့ အန်တိုနီယိုကို ဖုန်းဆက်လိုက်၏။ ဖုန်းကိုချပြီးနောက်၊ သူသည် နတ်ဆိုးကို 'ထောင်ချောက်ဆင်ရန်' ကို အာရုံစိုက်လိုက်သည်။

ထောင်ချောက်ဆင်ခြင်းသည် လွယ်ကူသောနည်းစနစ်မဟုတ်ပေ။ သော့ချက်မှာ ရန်သူသည် သူ့တွင် ဝှက်ဖဲရှိမှန်း ဘယ်သောအခါမှ မရိပ်မိစေအောင် သေချာစေရန်ဖြစ်သည်။ သို့မဟုတ်ပါက ရန်သူကို လှည့်စားရန် ခက်ခဲလိမ့်မည် ဖြစ်သည်။ MOBA ဂိမ်းကစားခြင်းကဲ့သို့ပင် တစ်စုံတစ်ယောက်သည် ရုတ်တရက် ရန်လိုလွန်းပါက တစ်နေရာရာတွင် စစ်ကူရှိနေသည်ကို ရန်သူက သိလိမ့်မည်။

ပြေးခြင်းလိုက်ခြင်းသည် မိနစ်အနည်းငယ်ကြာ၏။ ရုတ်တရက်၊ ဟန်ရှောင်းသည် သေရေးရှင်ရေးကဲ့သို့ မဖြစ်တော့ကြောင်း ခံစားလိုက်ရသည်။ ကိုယ်ပျောက်နတ်ဆိုးကို လှည့်စားရန်အတွက် မအောင်မြင်ဘဲ သူက ထွက်ပြေးသွားကြောင်း သိလိုက်သောအခါတွင်၊ သူက ရပ်တန့်ပြီး ပတ်ဝန်းကျင်ကို စူးစမ်းလေ့လာလိုက်သည်။

ကိုယ်ပျောက်နတ်ဆိုးသည် တုန့်ပြန်မှု အလွန်မြန်ဆန်၏။ အစပိုင်းတွင် ဟန်ရှောင်းက အဆိပ်ဓာတ်ငွေ့ကို ထုတ်လွှတ်လိုက်သောအခါ နတ်ဆိုးသည် ဆုတ်ခွာရန် စီစဉ်နေပြီဖြစ်သည်။ သို့သော်လည်း ဟန်ရှောင်းသည် သူ၏ သာယာသော ပတ်ဝန်းကျင်ကို စွန့်လွှတ်လိုက်ပြီး ဓာတ်ငွေ့ကြောင့် ထိခိုက်မှုကို ခံနိုင်ရည်မရှိသလို ပြုမူခဲ့သည်။ ထို့ကြောင့် နတ်ဆိုးသည် ငါးစာကိုဟပ်မိပြီး အမြန်လိုက်ဖမ်းတော့သည်။

ဟာကွက်မရှိသော်လည်း၊ မမြင်နိုင်သော နတ်ဆိုးသည် ချက်ခြင်းဆိုသလို တစ်ခုခုလွဲချော်နေသည်ကို သတိပြုမိသည်။ ဒါက သူ့ကို ခြိမ်းခြောက်မှုလို့ ခံစားရတဲ့အတွက် ဆုတ်ခွာဖို့ ဆုံးဖြတ်ပြီး ပစ်မှတ်ကို ပြတ်ပြတ်သားသား စွန့်လွှတ်လိုက်တယ်။

သူက သတိရှိလွန်းတယ်၊ ဟန်ရှောင်းက စိတ်ပျက်လက်ပျက် တွေးလိုက်မိသော်လည်း မကြာမီတွင် ထိုအတွေးကြောင့် သူ့ကိုယ်သူ လှောင်ပြောင်မိသည်။ အကယ်၍ မမြင်နိုင်သောနတ်ဆိုးသည် ကိုင်တွယ်ရန် အလွန်လွယ်ကူပါက၊ သူသည် သတ်ရန်အခက်ခဲဆုံးသူ တစ်ယောက်အဖြစ် အဆင့်သတ်မှတ်ခံရမည်မဟုတ်ပေ။

ပြင်းထန်သော တိုက်ပွဲကြောင့် ပြဿနာအချို့ ပေါ်ပေါက်ခဲ့သည်။ အဆင့် ၄၀ ထက်မြင့်သော ရန်သူကို ရင်ဆိုင်ရသော်၊ ရန်သူသည် ပိုမိုလျင်မြန်သော သို့မဟုတ် Tank အမျိုးအစားဖြစ်ပါစေ၊ သေနတ်သည် စွမ်းအားမရှိပုံပေါ်သည်။ အဓိကပြဿနာမှာ ဟန်ရှောင်းသည် သေနတ်သမားဖြစ်ရန် အရည်အချင်းမရှိခြင်းပင်ဖြစ်သည်။ သူ့ပစ်ချက်တွေကို အမြဲတမ်း လွဲနေခဲ့သည်။

ဟန်ရှောင်း တွေးနေတဲ့ ပြဿနာက ဂိမ်းရဲ့ ဗားရှင်း ၁.၀ မှာလည်း အကျပ်ရိုက်စရာပင်။ ကစားသမားတစ်ဦးသည် အဆင့် ၅၀ အထက်ရန်သူကို ရင်ဆိုင်ရသောအခါတွင်၊ သာမန်သေနတ်များ၏ သေစေနိုင်စွမ်းမှာ အကန့်အသတ်ရှိသည်။ အစွမ်းထက်သော်လည်း၊ ကစားသမားသည် ထောင်ချောက်များကို ကြိုတင်မသတ်မှတ်ထားပါက သေနတ်အများစုသည် စူပါနတ်ဆိုးများနှင့် ယှဉ်လျှင် အတော်လေး အားနည်းနေသေးသည်။

လျှပ်စစ်သံလိုက်သေနတ်သည် မျိုးဆက်သစ်လက်နက်ဖြစ်သည်။ လက်နက်အတွက် ပစ်ခတ်စွမ်းအားနှင့် ပစ်ခတ်မှုအမြန်နှုန်းကို တိုးတက်မှုများစွာ ပြုလုပ်ထားသည်။ ဤတိုးတက်မှုများသည် ဟန်ရှောင်း၏ လိုအပ်ချက်များနှင့် ကိုက်ညီနေသည်။ ကျည်ဆန်များ၏ အမြန်နှုန်း တိုးတက်လာသည်နှင့်အမျှ ရန်သူများသည် ၎င်းတို့ကို ရှောင်တိမ်းရန် ပိုမိုခက်ခဲလာမည်ဖြစ်သည်။

မှန်ကန်သော၊ ပြီးပြည့်စုံပြီး တည်ငြိမ်သော လျှပ်စစ်သံလိုက်လက်နက်များကို တည်ဆောက်ရန်အတွက် သံလိုက်သီအိုရီနှင့် ပတ်သက်၍ ပြည့်စုံသော အသိပညာ လိုအပ်သည်။ ရေပင်လယ်ဂြိုလ်၏ သံလိုက်သီအိုရီနှင့် ပတ်သက်သော အဆင့်မြင့်အသိပညာကို တင်းကြပ်စွာ ထိန်းချုပ်ထားသည်။

ဟန်ရှောင်း မျက်မှောင်ကြုတ်လိုက်သည်။ ငါက ငါ့ရဲ့ ကိုယ်ပိုင် လျှပ်စစ်သံလိုက်သေနတ်ကို ဖန်တီးချင်ရင်၊ ငါ့ရဲ့ ကိုယ်ပိုင် ဒီဇိုင်းပုံစံတွေ တည်ဆောက်ဖို့ လိုတယ်။ သယ်ဆောင်ရလွယ်ကူတဲ့ လျှပ်စစ်သံလိုက်သေနတ် နောက်ကွယ်က သီအိုရီဆိုရင် အခြေခံလျှပ်စစ်သံလိုက်သီအိုရီကို အဆင့် ၅ အထိ မြှင့်လိုက်ရင် နားလည်ရခက်မှာ ဒါမှမဟုတ် ထိန်းချုပ်ဖို့ခက်ခဲမှာ မဟုတ်‌ဘူး။

ဒါပေမယ့် မှတ်သားစရာ အသေးစိတ်တွေ အများကြီးရှိမှာမို့ တကယ့်လက်နက်ဖြစ်အောင် လုပ်ချင်တယ်ဆိုရင်တော့ ခက်လိမ့်မယ်။ စမ်းသပ်ချိန်ကို လျှော့ချဖို့ဆိုရင်၊ ဦးတည်ချက်တစ်ခု ထားရှိရမယ်။ ရှိပြီးသားလက်နက်တွေရဲ့ ဒီဇိုင်းပုံစံတွေ ရှိထားပြီး ထပ်ဆင့်မြှင့်တင်မှုတွေ လုပ်လျှင် အကောင်းဆုံးဖြစ်လိမ့်မယ်။

အချိန်အတော်ကြာပြီးနောက် အန်တိုနီယိုသည် သူ၏ဗင်ကားဖြင့် ရောက်လာသည်။ သူက ဘယ်ညာ ကြည့်ပြီး မေးသည်။ “ရန်သူ ဘယ်မှာလဲ”

"ထွက်ပြေးသွားပြီ။"

ဟန်ရှောင်းက ဗင်ကားပေါ်တက်ပြီး "လေယာဉ်ဆီ ပြန်ရအောင်။ စက်ပစ္စည်းတွေကို အရင်ပြင်ပြီးမှ အစီအစဥ်အသစ်ကို စဉ်းစားရမယ်။”

"မင်းငါ့ကို မင်းရဲ့ယာဉ်မောင်းလို့ တကယ် ထင်နေတာလား"

အန်တိုနီယိုက ဟန်ရှောင်းကို လေဆိပ်ကို မောင်းပို့တာကလွဲလို့ ရွေးချယ်စရာမရှိတော့ပေ။

...

ဟန်ရှောင်းနှင့် ကိုယ်ပျောက်နတ်ဆိုး အကြား တိုက်ပွဲသည် ကြီးစွာသော ရုန်းရင်းဆန်ခတ် ဖြစ်စေခဲ့သည်။ ဌာန၁၃သည် တိုက်ပွဲ၏ သဲလွန်စများကို ရှာဖွေတွေ့ရှိခဲ့သည်။

“ကိုယ်ပျောက်နတ်ဆိုးရဲ့ အသတ်ခံရမှာကို မကြောက်တဲ့ စနိုက်ပါသမားဟာ နတ်ဆိုးကို ထွက်ပြေးဖို့တောင် စွမ်းဆောင်နိုင်ခဲ့တယ်”

ဤမစ္စတာဘလက်ကို သူ၏ ထူးခြားသောအစွမ်းသတ္တိဖြင့် မြစ်ဝှမ်းတောင်ကြားအိမ်ယာတွင် သူမကို မည်ကဲ့သို့ ခြိမ်းခြောက်နိုင်ခဲ့သည်ကို တိစုစုတွေးရင်း အံ့သြသွားသည်။

Bennett ၏ မျက်လုံးများသည် အံ့သြမှုဖြင့် တောက်ပနေသည်။ "သူအခုဘယ်မှာလဲ?"

“သူက ဖေဘီယန် ကုမ္ပဏီနဲ့ ပတ်သက်တယ်။ သူက လောလောဆယ် ကုမ္ပဏီရဲ့ လေယာဉ်ပေါ်မှာ ရှိနေတယ်။”

“သူ အခု သူ့ပစ္စည်းတွေ ပြင်ဆင်ပြီး ပြင်နေသင့်တယ်” Wang Yuan က ပြန်ဖြေသည်။ “သူ့ကို သတိမပေးနဲ့ဦး။ မိုရန်၊ မစ္စတာဘလက်ကို မနက်ဖြန်မနက် မြစ်ဝှမ်းတောင်ကြားအိမ်ယာကိုလာဖို့ တစ်ယောက်ယောက် မက်ဆေ့ချ်ပို့ခိုင်းလို့ အဆင်မပြေနိုင်ဘူးလား"

“ကောင်းပြီ။” မိုရန်က ခေါင်းညိတ်သည်။

အရင်က ဖိတ်ခေါ်ခံရသော ရွှေမြေခွေးက ဘေးမှာရပ်နေသည်။ ထိုအချိန်တွင် သူမ၏မျက်နှာသည် စာရွက်တစ်ရွက်ကဲ့သို့ ဖြူဖျော့သွားခဲ့သည်။ မစ္စတာဘလက်သည် နတ်ဆိုး၏ စတုတ္ထပစ်မှတ်ဖြစ်ပြီး၊ သူမသည် ပဉ္စမမြောက် ဖြစ်သည်။ ကံကောင်းထောက်မစွာပဲ မစ္စတာဘလက်က ကိုယ်ပျောက်နတ်ဆိုးကို ဆုတ်ခွာစေပြီး သူမကို လွတ်မြောက်စေခဲ့သည်။

ရွှေမြေခွေးသည် ကိုယ်ပျောက်နတ်ဆိုး၏တိုက်ခိုက်မှုမှ သူမလွတ်မြောက်နိုင်ပါ့မလားဟု သံသယဝင်မိသည်။

သူ ငါ့အသက်ကို ကယ်ခဲ့တာပဲ။

ရွှေမြေခွေးက နှုတ်ခမ်းကို ကိုက်လိုက်သည်။ မစ္စတာဘလက်သည် လျှို့ဝှက်ဆန်းကြယ်ပြီး အရာရာ၌ ကောင်းမွန်သည်။ တစ်ခုတည်းသောပြဿနာမှာ သူ့အကြိုက်သည် အနည်းငယ် ထူးဆန်းလွန်းနေခြင်းဖြစ်သည်။

…

လေယာဉ်အတွင်းတွင်၊ ဟန်ရှောင်းသည် သံလိုက်ချပ်ဝတ်တန်ဆာကို ပြင်ဆင်ရန် အလုပ်များနေသည်။ တစ်ချိန်တည်းတွင် သူသည် သံလိုက်သေနတ်ကို တည်ဆောက်ရန် စဉ်းစားနေ၏။ အသင့်တော်ဆုံးသေနတ်အမျိုးအစားသည် ၎င်း၏လှုပ်ရှားမှုစွမ်းရည်ကို ဖြည့်စွမ်းနိုင်ပြီး သေနတ်စွမ်းအားကို တစ်ချိန်တည်းတွင် တိုးမြှင့်နိုင်သော စနိုက်ပါအမျိုးအစားဖြစ်သည်။

စွမ်းရည်ခုနစ်မှတ်ဖြင့် ဟန်ရှောင်းသည် [အခြေခံလျပ်စစ်သံလိုက်သီအိုရီ]၊ [အခြေခံလက်နက်သီအိုရီ] နှင့် [အခြေခံစွမ်းအင်သီအိုရီ] ကို အဆင့် ၅ အထိ အဆင့်မြှင့်ရန် ငါးမှတ်အသုံးပြုခဲ့သည်။

ဟန်ရှောင်းသည် [အခြေခံလျပ်စစ်သံလိုက်သီအိုရီ] ကို ပင်မကျွမ်းကျင်မှုအဖြစ် ရွေးချယ်ခဲ့ပြီး အမျိုးမျိုးသော ကျွမ်းကျင်မှုပေါင်းစပ်မှုများနှင့်အတူ ထွက်ပေါ်လာခဲ့သည်။ ထို့နောက်တွင် သူသည် သံလိုက်ဓာတ်နှင့်ပတ်သက်သည့် ဒီဇိုင်းပုံစံများကို ဖန်တီးခဲ့ပြီး၊ သူ၏စိတ်ကူးများကို အိတ်သွန်ဖာမှောက် ချရေးခဲ့သည်။ ကျွမ်းကျင်မှုတစ်ခုစီတိုင်းကို အနည်းဆုံး နှစ်ကြိမ် ပေါင်းစပ်ထားမည်ဖြစ်သည်။

သူ့လက်ထဲတွင် ပုံကြမ်းများစွာဖြင့် သူ၏ ဦးနှောက်ရည်များသည် နောက်ဆုံးတွင် ကုန်ဆုံးသွားခဲ့သည်။ သူ့နားထင်တွေကို နှိပ်နယ်ပြီး သက်ပြင်းချလိုက်တယ်။ "လုံလောက်ပြီထင်တယ်၊ တည်ဆောက်ဖို့ အချိန်ပဲ။

ဖေဘီယန် ကုမ္ပဏီသည် ဇင်ယော်မြို့ တွင် ပစ္စည်းများဝယ်ယူရန်ၐ အဆက်အသွယ်မရှိပေ။ သူနှင့်အတူ ယူဆောင်လာသော လျှပ်စစ်သံလိုက်ပစ္စည်းများမှာ အကန့်အသတ်ရှိသည်။ သို့သော်လည်း သူ၏ မအောင်မြင်သောထုတ်ကုန်များမှ အစိတ်အပိုင်းများကို ဖယ်ရှားပြီး ပြန်လည်အသုံးပြုပါက လုံလောက်မည်ဖြစ်သည်။ သို့သော်လည်း ထုတ်ကုန်များ မအောင်မြင်သောအခါ အချို့သော အစိတ်အပိုင်းများသည် ဟောင်းနွမ်းသွားနိုင်သည်။ ထို့ကြောင့် ပြန်လည်အသုံးပြုနိုင်သည့်နှုန်းမှာ ခန့်မှန်းခြေ 80% ဖြစ်သည်။

ဟန်ရှောင်းသည် သေနတ်၏ အခြေခံတည်ဆောက်မှုကို ဆယ်ကြိမ်ထက်မနည်း မအောင်မြင်ဘဲ၊ တည်ငြိမ်သောလျှပ်စစ်သံလိုက်သေနတ်ကို တည်ဆောက်ရန် ခက်ခဲမည်ဟု ဟန်ရှောင်းက ခန့်မှန်းခဲ့သည်။

ငါအောင်မြင်ချင်ရင် ငါ့ရဲ့မျှော်လင့်ချက်တွေကို လျှော့ချပြီး သတ်မှတ်ချက်တွေကို ချိန်ညှိနိုင်တဲ့ ရှေ့ပြေးပုံစံကို ဖန်တီးရမယ်။

ဟန်ရှောင်းသည် တုံ့ဆိုင်းနေပြီး နောက်ဆုံးတွင် သူသည် စမ်းသပ်ထုတ်ကုန်ကို ဦးစွာဖန်တီးကာ၊ ပြီးမှ ရှေ့ပြေးပုံစံကိုဖန်တီးရန် ဆုံးဖြတ်လိုက်သည်။ ရည်မှန်းချက်ကြီးကြီး‌တော့ ထားရန် မဖြစ်နိုင်ပေ။

အခန်း (၁၁၈) ပြီး၏။

လင်းဆက်

+++++