တိုက်ပွဲနောက်ကွယ်
Vol. 52 Ch. 721
ဝမ်ဝေ့က အိမ်သို့ပြန်ရောက်လာသည်နှင့် ဘိုးဘေးများ စောင့်ဆိုင်းနေသည့် လျှို့ဝှက်နယ်မြေဆီ ကူးသန်းသွားလာလိုက်သည်။
“အခြေအနေ ဘယ်လိုလဲ။ ကျွန်တော်တို့ဆီမှာ သတင်းအချက်အလက် ထပ်ရှိသေးလား”
“ငါတို့သိရသလောက် ကုန်သွယ်ရေးဗဟိုချက်မှာ ရှိတဲ့ စီးပွားရေးဆိုင်ခန်းတွေကို တစ်ယောက်ယောက်က တိုက်ခိုက်ခဲ့တယ်ဆိုတာပဲ သိထားတယ်။ တပည့်အယောက်တစ်ရာကျော် သေဆုံးခဲ့ရတယ်” မူလအရှင်က သူ့ဒေါသကို ချိုးနှိမ်ဖို့ ကြိုးစားရင်း ပြောလိုက်၏။ သူတို့ကသာ အမြဲလိုလို သူများကို အနိုင်ကျင့်ခဲ့ခြင်းဖြစ်ကာ သူတို့က ဤသို့မမျှတမှုကို ဘယ်တုန်းကများ ခံစားခဲ့ဖူးသနည်း။
ဂိုဏ်း၏ တပည့်များစွာက အကြောင်းအရင်းအမျိုးမျိုးကြောင့် နှစ်စဉ် သေဆုံးလေ့ရှိသည်။ သို့သော် သူတို့က မြင့်မားသည့် ကျင့်ကြံဆင့်ကို အသုံးပြု၍ အနိုင်ကျင့်ခံရခြင်း မဟုတ်သရွေ့ သို့မဟုတ် တပည့်များက သူတို့ကိုယ်သူတို့ သေတွင်းမတူးသရွေ့ ဂိုဏ်းက ဝင်ရောက်စွက်ဖက်မည် မဟုတ်ပေ။ သို့သော်လည်း သူတို့၏ တပည့်များကို အနိုင်ကျင့်ဖို့ မည်သည့်အင်အားစုကိုမှ ခွင့်ပြုမည် မဟုတ်ပေ။
သို့သော်လည်း ယခုကား ရန်စမှုတစ်ခုသာ ဖြစ်၏။
“အဲဒီတပည့်တွေရဲ့ သေဆုံးမှုအတွက် လျော်ကြေးကိုရော ဖြေရှင်းပြီးသွားပြီလား” ဝမ်ဝေ့က သူ့ဒေါသကို ထိန်းချုပ်ပြီး မေးလိုက်သည်။ ဤသည်က ယခုအချိန်က ဒေါသထွက်နေရမည့်အချိန်မဟုတ်ကြောင်း သိလေသည်။
“အင်း” ဂိုဏ်း၏ တာဝန်ကို ထမ်းဆောင်ရင်း သေဆုံးသွားသည့် တပည့်များအတွက် ပြဌာန်းချက်များ ရှိလေသည်။
“ဘယ်သူလုပ်တယ်ဆိုတာကို သက်သေရထားလား”
“စိတ်ဝိညာဉ်ဇစ်မြစ်ဂိုဏ်းကလွဲပြီး ဘယ်သူဖြစ်နိုင်ဦးမှာလဲ” ဓားအရှင်က နှာခေါင်းရှုံ့ကာ ပြောလိုက်၏။
“ကျွန်တော်တို့တွေ သက်သေတချို့တော့ လိုဦးမယ်။ လူတချို့က သူတို့ကို အပြစ်လွှဲချဖို့ လုပ်နေတာလည်း ဖြစ်နေနိုင်တယ်။” ဝမ်ဝေ့က ထိုသို့ခံစားနေရသော်လည်း ပြောလိုက်သည်။ အခြေအနေက နောက်ကွယ်မှ လှုပ်ရှားထားသကဲ့သို့ တူညီနေလေ၏။
“အထွေထွေသောင်းပြောင်းကတော့ ဂမ္ဘီရ တွက်ချက်ကြည့်ပေမဲ့ ဘာမှမတွေ့ရဘူး” မူလအရှင်က ပြောလိုက်သည်။
ဝမ်ဝေ့က သူ့ဆိုလိုရင်းကို ချက်ချင်း နားလည်လိုက်၏။ အကယ်၍ တခြားအင်အားစုတစ်ခုခုက စိတ်ဝိညာဉ်ဇစ်မြစ်ဂိုဏ်းကို လွှဲချဖို့ ကြိုးစားသည်ဆိုပါက သဲလွန်စ တစ်ခုခုတော့ တွေ့လိမ့်မည်။
သို့သော် သူတို့က ဘာမှမတွေ့ခဲ့ရပေ။ စိတ်ဝိညာဉ်ဇစ်မြစ်ဂိုဏ်းကသာ အထွေထွေသောင်းပြောင်း၏ ယင်ယန်တွက်ချက်မှုမှ ပြီးပြည့်စုံစွာ ပုန်းအောင်းနိုင်မည့် နည်းလမ်းရှိထားခြင်း ဖြစ်၏။ တစ်ခါတရံတွင် သန့်ရှင်းလွန်းခြင်းက သံသယဖြစ်ဖွယ် ကောင်းလှသည်။
“ကုန်သွယ်ရေးဗဟိုချက်ရဲ့ ခေါင်းဆောင်ကရော ဘာပြောသေးလဲ”
ကုန်သွယ်ရေးဗဟိုချက်တွင် အရင်းအမြစ်များကို ထိန်းချုပ်ပြီး အာဏာကိုင်ထားသည့် ခေါင်းဆောင်တစ်ဦး ရှိလေသည်။ ထိပ်တန်းဧကရာဇ်မျိုးနွယ်အများစုက ကုန်သွယ်ရေးဗဟိုချက်ကို ထိန်းချုပ်ကြပြီး မျိုးဆက်တိုင်း အားအကောင်းဆုံး ဧကရာဇ်ရှိသည့်အဖွဲ့က ထိန်းချုပ်လေ့ရှိသည်။
အကယ်၍ ထိုအဖွဲ့ထဲ ဧကရာဇ်တစ်ပါး မမွေးထုတ်နိုင်ခဲ့လျှင် သူတို့က ဆုံးဖြတ်ဖို့ရာအတွက် တစ်ယောက်နှင့်တစ်ယောက် ယှဉ်ပြိုင်ကြရလိမ့်မည်။ လူများစွာက ထိုရာထူးအတွက် လိုလားနေကြ၏။ တာအိုအခွင့်အလမ်းဂိုဏ်းသည်လည်း အပါအဝင် ဖြစ်ပေသည်။ ကံဆိုးစွာဖြင့် သူတို့က ယခုမှ ဝင်ရောက်ခါစဖြစ်သည့်အတွက် စည်းမျဉ်းများအရ သူတို့သည် ခေါင်းဆောင်ရာထူးကို ရယူနိုင်ဖို့အတွက် မျိုးဆက်ဆယ်ခုလောက် စောင့်ဆိုင်းရဦးမည်။
ဝမ်ဝေ့က ထိုမျိုးဆက်ဆယ်ခု စောင့်ဆိုင်းမည် မဟုတ်ပေ။ သူက ကိစ္စတစ်ခုလုံးကို အတင်းအကြပ် ယူဖို့ရာအထိ ပြင်ဆင်ထားပြီး ကမ္ဘာ့အသိုက်အဝန်းရာချီထက်ပင် ကျော်လွန်အောင် တိုးချဲ့ဖို့ စီမံထားသည်။
“သူက ငါတို့ကို တောင်းပန်ပြီးတော့ ဒီကိစ္စကို လျော်ကြေးငွေဆယ်ဆနဲ့ အထောက်အပံ့ကောင်းတွေ ပိုပေးပြီးတော့ ငါတို့ရဲ့ စောင့်ဆိုင်းချိန်ကိုလည်း မျိုးဆက်ငါးခုအဖြစ် လျှော့ချဖို့ ကတိပေးထားတယ်။” မူလအရှင်က ပြောလိုက်သည်။
“စိတ်ဝိညာဉ်ဇစ်မြစ်ဂိုဏ်းနဲ့ ပတ်သက်ပြီး ဘာပြောသေးလဲ” ဝမ်ဝေ့က မေးလိုက်၏။
“သူ ပြောတာကတော့ သက်သေမရှိတော့ ဘာမှမလုပ်နိုင်ဘူးတဲ့” ဓားအရှင်က ပြောလိုက်သည်။ တရားဝင်အဖြစ်အပျက် သို့မဟုတ် ရှင်းပြချက်အရ ဧည့်သည်သည် ဂိုဏ်း၏ ထုတ်ကုန်နှင့်ပတ်သက်ပြီး မကျေနပ်သည့်အတွက် သောင်းကျန်းခဲ့ခြင်းသာ ဖြစ်၏။
ထိုဧည့်သည်က ကုန်သွယ်ရေးဗဟိုချက်၏ စောင့်ကြည့်ရေးစနစ် တစ်ခုလုံးကို နှောင့်နှေးစေနိုင်သည့် ထူးထူးဆန်းဆန်း အဆောင်တစ်ခုလည်း ရှိထားလေသည်။ ပို၍ထူးဆန်းသည်က ထိုဧည့်သည်၏ ဇစ်မြစ်ကို ရှာမတွေ့ပေ။
“သူက စီးပွားရေးသမားပဲ” ဝမ်ဝေ့က ပြောလိုက်၏။
“စိတ်ဝိညာဉ်ဇစ်မြစ်ဂိုဏ်းကို ဒီလိုမျိုး ရိုးရှင်းတဲ့ ကိစ္စနဲ့ ရန်စတာက ထိုက်တန်မှာ မဟုတ်ဘူး”
“သူတို့ဆီမှာ ထာဝရဦးသျှောင်ရှိထားပေမဲ့ ငါတို့ဆီမှာ ဓားအရှင် ရှိတာပဲ။ ပြီးတော့ ဖျက်ဆီးခြင်းအရှင်သာ အောင်မြင်သွားမယ်ဆိုရင် ငါတို့ဆီမှာ အခွင့်အရေး ရလာနိုင်တယ်” ငရဲအရှင်က ဝင်ပြောလိုက်သည်။
“ကိစ္စတွေက အဲ့လောက် မရိုးရှင်းဘူး” ကြီးကြပ်ရေးမှူးက ဝင်ပြောလိုက်သည်။
“အခြေခံအုတ်မြစ်ကို ပြန်လည်တည်ဆောက်ရတာက မလွယ်ကူဘူး။ အချိန်အစီအရင်နဲ့ဆိုရင်တောင် အချိန်ကြာလိမ့်မယ်”
ဧကရာဇ်ချီယွမ်၏ မူလတာအိုက အချိန်တာအိုပါဝင်နေသောကြောင့် မသေမျိုးများ အသုံးပြုဖို့ရာအတွက် အချိန်မြှင့်တင်ရေး အစီအရင်တချို့နှင့် လျှို့ဝှက်နယ်မြေတချို့ကို ထားရှိခဲ့သည်။ သို့သော်လည်း သူက အစီအရင်တာအိုကို မလေ့ကျင့်ထားသည့်အတွက် ထိုအစီအရင်နှင့် လျှို့ဝှက်နယ်မြေများတွင် ကန့်သတ်ချက်တချို့ရှိလေသည်။ အထွေထွေသောင်းပြောင်းက နောက်ပိုင်းတွင် အဆင့်မြှင့်တင်ခဲ့သော်လည်း ကန့်သတ်ခံထားရဆဲ ဖြစ်၏။
“ပြီးတော့ သူတို့ဆီမှာ ဒုတိယမြောက် ထာဝရဦးသျှောင်ရှိနေမလားဆိုတာကို မသိရသေးဘူး”
“ဂိုဏ်းချုပ် မင်းရဲ့ ဆုံးဖြတ်ချက်က ဘယ်လိုလဲ”
“ကျွန်တော်တို့ စစ်ပွဲလုပ်လို့ မဖြစ်ဘူးဆိုပေမဲ့ ဒီလိုမျိုး မျိုသိပ်နေလို့လည်း မဖြစ်သေးဘူး” ဝမ်ဝေ့က ရက်စက်သည့် အကြည့်မျိုးဖြင့် ပြောလိုက်သည်။
“သူတို့ရဲ့ ဆိုင်တွေကို တိုက်ခိုက်ချင်တာလား”
“သူတို့က စောင့်ကြည့်နေမှာဆိုတော့ အသုံးမဝင်လောက်ဘူး” မူလအရှင်က ခေါင်းခါကာ ပြောလိုက်၏။
“ကျွန်တော်ဆီမှာ အစီအစဉ် ရှိတယ်။ ဒါနဲ့ ကျွန်တော်ကို ရှာတွေ့မသွားအောင်လုပ်ဖို့ ဘယ်လိုနည်းလမ်းဖြစ်ဖြစ် သုံးဖို့ လိုအပ်တယ်”
“ငါတို့ကို အပ်ထားလိုက်” မူလအရှင်က ပြောလိုက်သည်။ မူလအရှင်က ဧကရာဇ်ချီယွမ် ထားရှိခဲ့သည့် စွမ်းဆောင်ရည်များကို စုစည်းကာ ဝမ်ဝေ့၏ ဇစ်မြစ်ကို ဖုံးကွယ်ထားခဲ့သည်။ အထွေထွေသောင်းပြောင်းအရှင်က ယင်ယန်၊ ကိုယ်ပျောက်စွမ်းနှင့် အမှောင်ထုကို အသုံးပြုကာ ဝမ်ဝေ့အား နောက်ထပ်ကာကွယ်ရေးတစ်လွှာဖြင့် ကောင်းချီးပေးခဲ့သည်။
လိပ်အရှင်က နောက်ယောင်ခံခြင်း၊ တွက်ချက်မှုနှင့် ဂမ္ဘီရများကို တားဆီးနိုင်သည့် ဒိုင်းကာတစ်ခုကို ပေးအပ်ခဲ့သည်။ ငရဲအရှင်ကမူ သူ့ဝိညာဉ်နှင့် အငွေ့အသက်ကို ဖုံးကွယ်ပေးခဲ့၏။ အရိပ်(၁)နှင့် အရိပ်(၂)တို့က အရိပ်ကို အသုံးပြုကာ သူ့ပုန်းအောင်းရေး စွမ်းဆောင်ရည်များကို မြှင့်တင်ပေးခဲ့သည်။ သက်တံအရှင်ကမူ သူ့ကို အာရုံခံမိခဲ့လျှင် ထွက်ပြေးနိုင်ဖို့အတွက် မြန်ဆန်မှုကောင်းချီးကို ပေးခဲ့၏။ နောက်ဆုံးတွင် ဓားအရှင်က ထိုကောင်းချီးအားလုံးနှင့် ကျင့်စဉ်အားလုံးကို နောက်တစ်ဆင့်သို့ မြှင့်တင်ပေးနိုင်ဖို့ စွမ်းအားကို အသုံးပြုခဲ့သည်။
ဝမ်ဝေ့က ထိုလူများသည် အနည်းငယ် လွန်လွန်းနေကြောင်း ခံစားမိသော်လည်း ဤသို့သော အခြေအနေမျိုးတွင် သတိထားခြင်းက မမှားယွင်းပေ။ ပြင်ဆင်မှုအားလုံးပြီးဆုံးသည်နှင့် သူက စတင်လိုက်၏။
သူက စိတ်ဝိညာဉ်ပန်းပွင့် စွမ်းရည်ဖြစ်သည့် ဝိညာဉ်ကွန်ယက်ကို အသုံးပြုလိုက်သည်။ သူက အချိန်များစွာ မဖြုန်းတော့ဘဲ တိုက်ပွဲစိတ်ဝိညာဉ်ကမ္ဘာဆီ ကျရောက်လာသည်။
သူက သူတို့၏ ဘဝတွင် လက်စားချေမှုမှ အပ ဘာမှမရှိတော့သည့် စိတ်ပျက်လက်ပျက် လူများကို ရှာဖွေလိုက်သည်။ သူတို့က ထိုအရာကို ပြီးမြောက်သွားသည်နှင့် သေမျိုးအနှောင်အဖွဲ့များမှ ထွက်ခွာသွားလိမ့်မည်။
ထို့နောက် ဝမ်ဝေ့က မိစ္ဆာတစ်ကောင်လိုမျိုး ရောက်ရှိလာကာ သူတို့ထံ ဆွဲဆောင်သည့် စကားတချို့ကို တီးတိုးပြောဆိုခဲ့သည်။ သူတို့၏ အမုန်းတရားများကို လက်စားချေဖို့အတွက် အင်အားကို ပေးမည်ဖြစ်ကာ သူ့အတွက် တစ်ခု ပြန်လည်လုပ်ဆောင်ပေးဖို့သာ တောင်းဆိုခဲ့သည်။
နောက်ဆုံးတွင် သူက စင်မြင့်ကို ခင်းကျင်းခဲ့ပြီးသား ဖြစ်၏။
တိုက်ပွဲစိတ်ဝိညာဉ်ကမ္ဘာ၊ စိတ်ဝိညာဉ်ဇစ်မြစ်ဂိုဏ်း
ဟယ်ရှစ်ယင်က သူ့အဖေဖြစ်သည့် မျိုးနွယ်ခေါင်းဆောင်ကျားနှင့် စည်းကမ်းထိန်းကို ကြည့်လိုက်သည်။ သူ့ဒဏ်ရာများ ပျောက်ကင်းသွားသည်မှာ ကြာမြင့်လှပြီဖြစ်ပြီး အထွတ်အထိပ်အခြေအနေသို့ ပြန်လည်ရောက်ရှိနေပြီ ဖြစ်သည်။
“ဗဟိုချက်ခေါင်းဆောင်ရဲ့ တုံ့ပြန်မှုက ဘယ်လိုလဲ” သူက မေးလိုက်၏။
“သူက ငါတို့ကို သတိပေးပြီးတော့ တန်ကြေးပေးဆပ်ခိုင်းဦးမှာပဲ” မျိုးနွယ်ခေါင်းဆောင်ဟယ်က ပြောလိုက်သည်။
“သက်သေ မရှိဘူးဆိုရင်တောင်လား”
“အင်း”
“ကျွန်တော်တို့တွေ အဖွဲ့အစည်းဆီ ငြင်းကြဦးမှာလား” ဟယ်ရှစ်ယင်က မေးလိုက်သည်။ ဗဟိုချက်ခေါင်းဆောင်က ကုန်သွယ်ရေးဗဟိုချက်တွင် အကြွင်းမဲ့အာဏာ မရှိထားပေ။ ပြောရလျှင် အဖွဲ့အစည်းက သူ့အာဏာကို မျှခြေညီအောင် လုပ်ဆောင်ထား၏။ စိတ်ဝိညာဉ်ဇစ်မြစ်ဂိုဏ်းက ထိုအဖွဲ့အစည်းတွင် နေရာတစ်ခုရှိထားပြီး အာဏာတချို့ ဆုပ်ကိုင်ထားနိုင်သည်။
“တခြားအဖွဲ့ဝင်တွေကလည်း ငါတို့နဲ့ ပတ်သက်ပြီး မကျေနပ်တဲ့ပုံပဲ။ အဲဒါကြောင့် သူတို့က သူ့ကို ထောက်ခံပေးနေကြတယ်”
ဟယ်ရှစ်ယင်က လူများစွာသည် ဤမျိုးဆက်၏ ခေါင်းဆောင်ကို စီးပွားရေးဝိဇ္ဇာတစ်ယောက်အဖြစ် ညွှန်းဆိုကြပြီး ကုန်သွယ်ရေးဗဟိုချက်၏ အကျိုးအမြတ်ကို ယခင်မျိုးဆက်မြောက်များစွာ မြင်တွေ့ဖူးသည်ထက် ကျော်လွန်အောင် တိုးချဲ့နိုင်ခဲ့ကြောင်း အမှတ်ရလိုက်သည်။
ထို့ကြောင့် အဖွဲ့အစည်းရှိလူများစွာက သူ့ကို ထောက်ခံပေးကြပြီး ဒုတိယမြောက်အချိန်အထိပါ သူ့ကို ထောက်ခံပေးကြမည့် ကောလဟာလများပင် ရှိခဲ့ဖူးသည်။
“ကျွန်တော်တို့ ပေးတာလည်း ကိစ္စမရှိပါဘူး” ဟယ်ရှစ်ယင်က သက်တောင့်သက်သာဖြင့် ပြောလိုက်သည် “အဓိက ရည်ရွယ်ချက်က တာအိုအခွင့်အလမ်းဂိုဏ်းအပေါ် ထိချက်ဖြစ်စေပြီးတော့ အဆုံးမဲ့လေဟာနယ်အတွင်း သူတို့ရဲ့ဖွံ့ဖြိုးတိုးတက်မှုကို နှောင့်နှေးအောင် လုပ်ဆောင်နိုင်ဖို့ပဲ”
သူတို့၏ တန်ကြေးက မည်မျှပင် ဖြစ်စေကာမူ တစ်ဖက်ရန်သူကို အားနည်းအောင် လုပ်နိုင်ခဲ့သည့်အတွက် ထိုက်တန်ပေသည်။
ဝမ်ဝေ့ … မင်း စောင့်နေလိုက်….
ဟယ်ရှစ်ယင်က ထိုကြောက်မက်ဖွယ် လက်သီးချက်ကို ပြန်လည်တွေးလိုက်မိသည်။ သူက တာအိုသက်သေပြပြီးသည့်နောက်တွင် လက်စားချေနိုင်လိမ့်မည်ဟု ယုံကြည်ချက် ရှိ၏။ သူက မျက်လုံးကို မှိတ်ကာ အသိစိတ်ပင်လယ်အတွင်း ဝင်ရောက်ပြီး အလင်းငါးလုံး မြောလွင့်နေသည်ကို ကြည့်လိုက်ရသည်။ လေးခုက တောက်ပနေပြီးနောက်ဆုံးတစ်ခုက မှေးမှိန်နေဆဲ ဖြစ်၏။
အဲဒီလက်သီးချက်အတွက် လက်စားချေနိုင်မယ်လို့ ယုံကြည်ချက် ရှိတယ်…
“ခေါင်းဆောင်” အပြင်ဘက်မှ အလျင်စလို အသံတစ်ခု ထွက်ပေါ်လာကာ ဟယ်ရှစ်ယင်၏ အတွေးစကို ဖြတ်တောက်လိုက်၏။
“ဝင်ခဲ့” ခေါင်းဆောင်ကျားက ပြောလိုက်စဉ် သာမန်အကြီးအကဲတစ်ဦးက ဝင်ရောက်လာသည်။
“ဘာကိစ္စလဲ”
“အရေးပေါ်အဆောင်တစ်ခု ရောက်ရှိလာလို့ပါ”
လေးယောက်သားက နိမိတ်ဆိုးတစ်ခုကို ခံစားမိလိုက်ကြသည်။
“ဘာကိစ္စလဲ” ခေါင်းဆောင်ဟယ်က မေးလိုက်သည်။
“တစ်ယောက်ယောက်က ကျွန်တော်တို့ရဲ့ ဆေးလုံးဆိုင်တစ်ခုမှာ ဖောက်ခွဲပစ်တော့ ကျွန်တော်တို့တပည့်တွေ သေဆုံးသွားပြီး အရင်းအမြစ်မြောက်များစွာ ပျက်စီးသွားတယ်လို့ သတင်းရလိုက်ပါတယ်”
“ဘာ”
“အဲဒီသတင်းကအမှန်ပဲလား” စည်းကမ်းထိန်းက မေးလိုက်၏။
အကြီးအကဲက ပါးစပ်ဟကာ ပြောတော့မည့်ဆဲဆဲတွင် ရုတ်ချည်းဆိုသလို ရပ်တန့်လိုက်၏။ သူက နောက်ထပ် အဆောင်တစ်ခုကို ထုတ်လိုက်ပြီးနောက် အမူအရာက ပိုမိုပျက်ယွင်းသွားသည်။
ထို့နောက် နောက်ထပ် အဆောင်များစွာလည်း စတင်လင်းလက်လာ၏။
“ဘာတွေလဲ” ဟယ်ရှစ်ယင်က တည်ငြိမ်ဖို့ ကြိုးစားရင်း မေးလိုက်သည်။
“ကျွမ်းကျင်အတတ်ပညာဆိုင်ရာ ဆိုင်တော်တော်များများက တူညီတဲ့ တိုက်ခိုက်မှုမျိုးကို ကြုံတွေ့ခဲ့ရတယ်။ ဧည့်သည်တစ်ယောက်က သူတို့ကိုယ်သူတို့ ရုတ်ချည်းဆိုသလို ဖောက်ခွဲပစ်လိုက်ကြတယ်။” အကြီးအကဲက ပြောလိုက်သည်။
“အပျက်အစီးတွေရော ဘယ်လိုအခြေအနေရှိလဲ”
“ဆိုင်နှစ်ထောင်ကျော်က တိုက်ခိုက်ခံရပြီးတော့ ထောင့်ရှစ်ရာကျော် အောင်မြင်သွားတယ်”
ဟယ်ရှစ်ယင်နှင့် ခေါင်းဆောင်တို့၏ အမူအရာက ပျက်ယွင်းသွားကာ ထိုအရာသည် တာအိုအခွင့်အလမ်းဂိုဏ်း၏ လက်စားချေမှုဖြစ်ကြောင်း နားလည်လိုက်ကြသည်။ သူတို့၏ ဆိုင်အနည်းငယ်မျှသာ တိုက်ခိုက်ခံရသော်လည်း အရင်းအမြစ်မြောက်များစွာနှင့် အသက်များစွာ ထိခိုက်ခဲ့ရသည်။
သူတို့က အခြေအနေကို မသုံးသပ်နိုင်ခင် နောက်ထပ်အကြီးအကဲတစ်ဦးက အခန်းအတွင်း ဝင်ရောက်လာသည်။
“ဂိုဏ်းချုပ် ဂိုဏ်းချုပ် သတင်းဆိုးပါလာတယ်။ ကျုပ်တို့ရဲ့ သတ္တုကြောတစ်ခုက တိုက်ခိုက်ခံရတယ်။ မိုင်းတွင်းတူးသမား တစ်ယောက်က ပုန်ကန်ပြီးတော့ သူမဘာသာ သူမ ဖောက်ခွဲပစ်ခဲ့တယ်”
“မဖြစ်နိုင်တာ” ခေါင်းဆောင်ကျားက ပြောလိုက်သည် “သူတို့က ငါတို့ကမ္ဘာကို သတိမပြုမိစေဘဲ ဘယ်လိုလုပ်ဝင်ရောက်နိုင်တာလဲ”
ဤသို့သော အခြေခံကျကျတိုက်ခိုက်မှုများက ကောင်းကောင်းလေ့ကျင့်ထားသည့် အသေခံစစ်သားများစွာ လိုအပ်ပေသည်။ ဂိုဏ်း၏ သတ္တုကြောရှိလူက သူလျှို ဖြစ်နေနိုင်၏။ သို့သော် သူတို့အနေဖြင့် အဆုံးမဲ့လေဟာနယ်မှ သီးသန့်ပိုင်းခြားထားနေသည့် တာအိုအခွင့်အလမ်းဂိုဏ်းက မည်သို့လုပ်ဆောင်ခဲ့မှန်း မသိရသေးပေ။ ထို့အပြင် သတင်းများက ဆက်လက်ရောက်ရှိလာဆဲ ဖြစ်၏။
***