လော့ချန်၏ အခြေအနေ

ဝမ်ဝေ့က ဖြစ်ပျက်နေသည့် အရာအားလုံးကို တည်တည်ငြိမ်ငြိမ်သာ ကြည့်နေလေ၏။ သူက တည်နေရာသုံးထောင့်ကို တိုက်ခိုက်ဖို့ ကြံစည်ထားခဲ့ပြီး ဆိုင်ပေါင်းနှစ်ထောင်နှင့် ကျန်ရှိနေသည့် အရာများက မိုင်းတွင်း သို့မဟုတ် ထူးကဲသည့် အရင်းအမြစ်နေရာများ ဖြစ်သည်။ ဝမ်ဝေ့က ထိုနေရာများထက် ပိုမိုမရွေးချယ်ခဲ့သည့်အကြောင်းအရင်းမှာ စိတ်ဝိညာဉ်ဇစ်မြစ်ဂိုဏ်းက တစ်စုံတစ်ခုကို ရှာဖွေတွေ့ရှိသွားပြီး ဝင်ရောက်စွက်ဖက်နိုင်ချေ ရှိသည့်အတွက် ဖြစ်၏။

အစီအစဉ်စတင်ခဲ့ပြီးသည့်နောက်တွင် သူ့သတိထားမှုက မှန်ကန်နေကြောင်း သက်သေပြလာခဲ့သည်။ ဆိုင်ပေါင်း ၁၈၀၀ခန့်နှင့် ကျန်ရှိနေသည့် သီးသန့်အရင်းအမြစ် နေရာသုံးရာသာ အောင်မြင်ခဲ့သည်။ ကျန်သည့်အရာများအတွက်မူ စိတ်ဝိညာဉ်ဇစ်မြစ်ဂိုဏ်းက တစ်စုံတစ်ခုကို ခံစားမိ၍ တိုက်ခိုက်သူများအား အောင်မြင်ခြင်းမှ တားဆီးခဲ့သည်။

ဝမ်ဝေ့၏ ညွှန်ကြားချက် သို့မဟုတ် ကြိုတင်စီစဉ်ထားသည့်အတိုင်း တိုက်ခိုက်သူများထဲ မည်သူကမှ အသက်မရှင်ပေ။ ထို့ကြောင့် ဂိုဏ်းက မည်သည့်သတင်းအချက်အလက်မှ ရှာမတွေ့ခဲ့ပေ။

ဒါက အစပဲရှိသေးတယ်။ နောက်အဆင့်က မင်းတို့လူတွေ လူးလွန့်နေဖို့သာ ပြင်ထားလိုက်…

ဝမ်ဝေ့က နှာခေါင်းရှုံ့ကာ တွေးလိုက်မိ၏။ သူက စိတ်ဝိညာဉ်ဇစ်မြစ်ဂိုဏ်း၏ နောက်အဆင့်ကို ခန့်မှန်းမိပြီးသားဖြစ်သည်။

သူတို့က သံသယဝင်လာမည်ဖြစ်ကာ သူတို့၏ကိုယ်ပိုင်တပည့်များကိုပင် သံသယရှိသည်နှင့် စတင်သတ်ဖြတ်လာမည် ဖြစ်ကာ တပည့်များက အပြင်းအထန် စစ်ဆေးမေးမြန်းခံရခြင်း သို့မဟုတ် အသတ်ခံရခြင်းများ ဖြစ်လာနိုင်သည်။

ကံဆိုးစွာဖြင့် သူတို့က ဘာမှရှာတွေ့မည် မဟုတ်ပေ။ သဘောတရားအရ သာမန်လူများသည် လက်လျှော့လိုက်မည်သာ ဖြစ်၏။ သို့သော်လည်း ဉာဏ်ကောင်းသည့်သူများက တစ်ခါတစ်ရံတွင် ပြဿနာတစ်ခု ရှိတတ်ကြသည်။ သူတို့က အတွေးလွန်နေခြင်း ဖြစ်၏။ ထိုအခါ ကိစ္စများက ပိုမိုစိတ်ဝင်စားဖို့ ကောင်းလာလိမ့်မည်။

စိတ်ဝိညာဉ်ဇစ်မြစ်ဂိုဏ်း၏ ဂိုဏ်းအနေအထားက တာအိုအခွင့်အလမ်းဂိုဏ်းနှင့် တူညီပြီး မျိူးနွယ်များနှင့် ဂိုဏ်းအမှုထမ်းဘက်ဟူ၍ ရှိသည်။ တစ်ခုတည်းသော ကွဲပြားချက်က သူတို့ဂိုဏ်းသည် မျိုးနွယ်များနှင့် ဂိုဏ်းအမှုထမ်းအင်အားစုကြား မျှခြေပိုညီလေ၏။ မည်သို့ပင်ဆိုစေကာမူ သူတို့အင်အားစုသုံးခုကြား ယှဉ်ပြိုင်မှုများနှင့် သဘောမတူညီမှုများ ရှိသည်က ပုံမှန်သာဖြစ်သည်။

ထို့ကြောင့် သူတို့က တာအိုအခွင့်အလမ်းဂိုဏ်း၏ လျှို့ဝှက်အင်အားစုများကို ရှာမ‌တွေ့ပြီးသည့်နောက် တစ်ယောက်နှင့်တစ်ယောက် သံသယဝင်လာကာ စွပ်စွဲကြလိမ့်မည်။ ဝမ်ဝေ့က ဤသို့သော အသေးအဖွဲပြဿနာလေးဖြင့် အားကောင်းကာ ကြာရှည်လှသည့် အမွေအနှစ်ရှိသည့် ဂိုဏ်းကို ဖျက်ဆီးပစ်ဖို့ မဖြစ်နိုင်ကြောင်း သိထားလေသည်။

ကိစ္စများက ထိန်းချုပ်မှုကင်းလွတ်သွားသည့်အခါ ဘိုးဘေးများက ဝင်ရောက်စွက်ဖက်လာလိမ့်မည်မှန်း သိထားသည်။ သူ၏ အဓိကရည်ရွယ်ချက်က စိတ်ဝိညာဉ်ဇစ်မြစ်ဂိုဏ်း၏ မောက်မာမှုကို လျှော့ချပြီး သူတို့အား အကျိုးအကြောင်းမသင့်သည့် အပြုအမူများ မလုပ်ဆောင်နိုင်စေရန် အလုပ်ရှုပ်ထားစေဖို့ရာသာ ဖြစ်၏။

“တာအိုအရှင်နဲ့ နယ်ရှင်တွေက ကြောက်စရာကောင်းတယ်ဆိုတာကို သိတယ်။ ဒါပေမဲ့ ပထမဦးဆုံးအကြိမ် ကိုယ်တိုင်မြင်ဖူးတာပဲ” ဖြစ်ရပ်တစ်ခုလုံးကို ဝိညာဉ်ကွန်ယက်မှတဆင့် ကြည့်နေသည့် ဓားအရှင်က ပြောလိုက်၏။

“အမှန်ပဲ” မူလအရှင်က တိုက်ရိုက်တိုက်ပွဲအစား ထိုနည်းလမ်းကို အသုံးပြုလိုက်သည့် အကျိုးအမြတ်အကြောင်း တွေးနေလေသည်။ ယခုမှစ၍ စိတ်ဝိညာဉ်ဇစ်မြစ်ဂိုဏ်းသည် အမြဲလိုလို သတိထားနေမည်ဖြစ်ကာ သူတို့၏ ရန်သူက သူတို့ကို ဘယ်အချိန် တိုက်ခိုက်လာမလဲ၊ ရန်သူက အမှောင်ထဲတွင်ရှိစဉ် သူတို့က အလင်းထဲတွင် ရှိနေသည့်အတွက် သူတို့၏ နောက်ကျောကိုသာ အမြဲတမ်း စောင့်ကြပ်နေရလိမ့်မည်။

ဤလက်စားချေသည့် အစီအစဉ်က ကြီးကြပ်ရေးမှူးမှလွဲ၍ ဘိုးဘေးအားလုံးကို အံ့အားသင့်စေခဲ့သည်။ ကြီးကြပ်ရေးမှူးကမူ ဝမ်ဝူချန်းဆီမှ နတ်ဆိုးအထွတ်အထိပ်ကမ္ဘာအကြောင်း သိထားလေ၏။ ဂိုဏ်းချုပ်က လပိုင်းလေးဖြင့် လူမှုအဖွဲ့အစည်းတစ်ခုလုံးကို ဖျက်ဆီးပစ်ခဲ့ပြီး လူသားများကို ကမ္ဘာ၏ ဇာတ်လိုက်အဆင့်အတန်းအား နတ်ဆိုးမျိုးနွယ်ဆီမှ လုယူမည့် အခွင့်အရေးကို ပေးအပ်ခဲ့သည်။ ထို့ကြောင့် သူက မအံ့ဩမိပေ။

“ကျွန်တော်တို့တွေ လုပ်ဖို့လိုတာက သူတို့တွေ ဘယ်လိုတုံ့ပြန်မလဲဆိုတာကို စောင့်ကြည့်ဖို့ပဲ” ဝမ်ဝေ့က ပြောလိုက်၏။ ဝမ်ဝေ့က ကြာကြာစောင့်ဆိုင်းနေစရာ မလိုဘဲ နောက်တစ်ရက်တွင် တစ်စုံတစ်ခုကို သတိထားမိလိုက်သည်။

“ဘာဖြစ်လို့လဲ” မူလအရှင်က ဝမ်ဝေ့၏ မျက်နှာအထက် မျက်မှောင်ကြုတ်မှုကို မြင်သည့်အခါ မေးလိုက်၏။

“သူတို့ကမ္ဘာအသိုက်အဝန်းကို ဝင်လို့ မရတော့ဘူး” သူက ပြောလိုက်သည်။

“ဘာကိုပြောချင်တာလဲ”

“ကြည့်ရတာ သူတို့က လူသားတည်တံ့ရေး အစီအရင်နဲ့ တူညီတဲ့ အရာတစ်ခုခုကို သုံးလိုက်တဲ့ပုံပဲ။ တိုက်ပွဲဝင်စိတ်ဝိညာဉ်ကမ္ဘာကို သီးသန့်ပိုင်းခြားထားလိုက်ပြီ”

“ငါတို့ရဲ့ကမ္ဘာက ဒီလိုမျိုး ကမ္ဘာအနှံ့ အစီအရင်တစ်ခု ရှိထားတယ်ဆိုတော့ သူတို့အတွက် ရှိနေတာလည်း ပုံမှန်ပါပဲ” ကြီးကြပ်ရေးမှူးက ပြောလိုက်သည်။

“အခု ငါတို့က သူတို့ရဲ့ လျှို့ဝှက် ဝှက်ဖဲတစ်ခုကို သိထားပြီဆိုတော့ လုံလောက်တာထက် ပိုပါတယ်”

“အမှန်ပဲ” ဝမ်ဝေ့က ခေါင်းညိတ်လိုက်၏။ သူက တိုက်ပွဲဝင်စိတ်ဝိညာဉ်ကမ္ဘာသည် အသင်္ချေအင်ပါယာကမ္ဘာလိုမျိုး ဖြစ်လာကာ ကမ္ဘာတစ်ခုလုံးအတွက် အစီအရင်တစ်ခု သို့မဟုတ် မျိုးနွယ်စုအသီးသီး၏ အစီအရင်အသီးသီး ရှိနေမည်လားဟု တွေးလာမိသည်။

ဒီအဖြေကို အချိန်တိုအတွင်း ရှာနိုင်ဦးမှာမဟုတ်ဘူး။ တွေးနေလို့ အပိုပဲ…

ဝမ်ဝေ့က တွေးလိုက်မိပြီးသည့်နောက်တွင် လျှို့ဝှက်နယ်မြေမှ ထွက်ခွာလာလိုက်၏။ သူက ဘိုးဘေးများကို အရိုအသေပေးပြီးသည့်နောက်တွင် ယန်းလီလင်းအား သွားရောက်တွေ့ဆုံကာ သတ်ဖြတ်ရေးနှလုံးသားကို ပေးခဲ့သည်။

ချက်ချင်းဆိုသလို သီးသန့်ကျင့်ကြံရေး ဝင်ရောက်လိုသော်လည်း သူ့အဖေနှင့် ကျိလန်ဖန်းတို့၏ တိုက်ပွဲက နီးကပ်လာပြီ ဖြစ်ကြောင်း ဂမ္ဘီရက ပြောပြနေသည့်အတွက် ဆက်လက်စောင့်ဆိုင်းဖို့သာ ဆုံးဖြတ်လိုက်သည်။

…………………………………………………..

မူလဆေးလုံးတာအိုဂိုဏ်း

လော့ချန်က သူ့ခေါင်းအထက် လျှို့ဝှက်ဆန်းကြယ် အစီအရင်တစ်ခု ကာရံထားပြီး သီးသန့်ကျင့်ကြံနေသည်။ သူက ချွေးများ ထွက်လာလေသည်။ အံ့ဖွယ်ပင်လယ်အဆင့်အပြီးတွင် ကျင့်ကြံသူများက ချွေးမထွက်တော့သည့်အတွက် ထူးဆန်းလှသည်။

လော့ချန်၏ မျက်နှာက ဖြူဖျော့လာကာ သူ့အရှိန်အဝါက ထွက်ပေါ်လာပြီး သူ့ကျင့်ကြံဆင့်က ဧကရာဇ်တစ်ပိုင်းအဆင့်ဖြစ်ကြောင်း ဖော်ပြနေလေ၏။ ဤမျိုးဆက်ရှိ ကျင့်ကြံဆင့်အမြင့်ဆုံးသူက မူလဆေးလုံးတာအိုဂိုဏ်း၏ ဂိုဏ်းချုပ်ဖြစ်နေလိမ့်မည်မှန်း မည်သူကမှ မသိကြပေ။

သူက ရုတ်ချည်းဆိုသလို သွေးဆာသည့် မျက်လုံးကို ပွင့်လာကာ အသက်ပြင်းပြင်း ရှူထုတ်လိုက်ရသည်။

“သရုပ်ဖော်မှု ကျရှုံးသွားပြန်ပြီ” သူက နှမြောတသဖြစ်စွာဖြင့် ရေရွတ်လိုက်သည်။ သူက တာအိုသက်သေပြ ဆေးလုံးဖော်စပ်နည်းနှင့် မီးတောက်ဧကရာဇ်၏ အမွေအနှစ်ကို လက်ခံရရှိကတည်းက ပင်ကိုပါရမီကို အသုံးပြုကာ ဤမျိုးဆက်၏ အကောင်းဆုံး ဆေးလုံးဆရာတစ်ယောက် ဖြစ်လာခဲ့သည်။

သူက မူလဆေးလုံးတာအိုဂိုဏ်းကို ထိန်းချုပ်ထားသည့်အတွက် နောင်အနာဂတ်အတွက် ပြင်ဆင်မှုနှင့် ကျင့်ကြံရေးအတွက် အရင်းအမြစ်များနှင့် ပတ်သက်ပြီး စိုးရိမ်စရာ မရှိပေ။ ထို့နောက် သူက ကောင်းကင်ဘုံ သွေဖယ်နေသည့် ဤဆေးလုံးကို သန့်စင်ဖို့ရာသာ အာရုံစိုက်ထား၏။

မီးတောက်ဧကရာဇ်က လော့ချန်အတွက် လေ့ကျင့်မှုနှင့် အတွေ့အကြုံ မရှိဘဲ ဆေးလုံးသန့်စင်ခြင်းက စွန့်စားရကြောင်း သိထားလေသည်။ ထို့ကြောင့် သူက ထိုသူအား ပုံရိပ်ယောင်ကမ္ဘာအတွင်း သရုပ်ဖော်မှုတချို့ လုပ်ဆောင်နိုင်ရန် အစီအရင်တချို့ ထားရှိခဲ့သည်။ သူသာ ပုံရိပ်ယောင်အတွင်း အောင်မြင်နိုင်သရွေ့ တကယ့်လက်တွေ့ဘဝတွင်လည်း အောင်မြင်လာလိမ့်မည်။

ကံဆိုးစွာဖြင့် ထိုဆေးလုံးကို ဖော်စပ်ဖို့ရာ စိန်ခေါ်မှုတစ်ခု ဖြစ်နေလေသည်။ အတိအကျပြောရလျှင် ထိုဆေးဖော်စပ်နည်း၏ အစိတ်အပိုင်းများက အတည်မပြုရသေးသည့် သီအိုရီများကဲ့သို့ဖြစ်ကာ အောင်မြင်နိုင်ချေကို သိသိသာသာ လျော့ကျသွားစေသည်။

“ဒါက ပြဿနာထဲက တစ်ခုပဲ ရှိသေးတယ်” လော့ချန်က ရေရွတ်လိုက်သည်။ သူက ခေါင်းအသာယမ်းလိုက်ပြီးသည့်နောက်တွင် ကျင့်ကြံရေးမှ ထွက်လာလိုက်၏။ သူက စိတ်အပန်းဖြေရန် အဖန်ရည် သောက်သုံးဖို့ ဆုံးဖြတ်လိုက်သည်။

သူက အဖန်ရည် သောက်သုံးရသည်ကို သဘောမကျပေ။ သို့သော် ထိုသူက သူ့ခန္ဓာကိုယ်ကို သိမ်းပိုက်ပြီးကတည်းက ထိုဝါသနာတစ်ခု ဖြစ်တည်လာခဲ့၏။ မိနစ်ပိုင်းကြာအနားယူပြီးသည့်နောက်တွင် လော့ချန်က တစ်စုံတစ်ယောက် ဝင်ရောက်လာသည်ကို ခံစားမိလိုက်ပြီး သူ့တောင့်တင်းနေသည့် မျက်နှာအထက် ရှားရှားပါးပါးအပြုံးမျိုး ပေါ်ထွက်လာသည်။

“ဆရာတူအစ်မ” သူက အပြုံးလေးဖြင့် ပြောလိုက်၏။

“ကျွန်မတို့တွေက လက်ထပ်ပြီးပြီ။ ဘာလို့အဲလိုမျိုး ခေါ်နေသေးတာလဲ” လန်လင်းက မေးလိုက်သည်။

“ကျွန်တော် သဘောကျလို့ပါ” လော့ချန်က အတိတ်အကြောင်းကို တွေးကာ ပြောလိုက်သည်။ အမှန်တော့ လော့ချန်က သူ့လက်ရှိဘဝသည် အစစ်အမှန်ဟု မခံစားရပေ။ သူက နာမည်ကျော်ဆေးလုံးဆရာ တစ်ယောက်ဖြစ်ဖို့ အိပ်မက်ကို အောင်မြင်ခဲ့ပြီး သူ အိပ်မက်သာ မက်ခွင့်ရသည့် ဆရာတူအစ်မကလည်း သူ့ဇနီး ဖြစ်နေလေပြီ။

လော့ချန်က ထိုသူကိုလား ဒါမှမဟုတ် အရူးအမူးစွဲလမ်းပန်းလား သို့မဟုတ် ကံကြမ္မာကို ကျေးဇူးတင်ရမည်လား မသိတော့ပေ။

ယေဘုယျအားဖြင့် သူသည် ဝမ်ဝေ့အပေါ် ရှုပ်ထွေးသည့် ခံစားချက်မျိုး ရှိ၏။ အထူးသဖြင့် ဆေးလုံးဆရာအဖြစ် မြင့်တက်လာသည့် ကိစ္စနှင့် သူ့အစ်မ(၅) ကိစ္စတွင် ဖြစ်သည်။

ထိုသူက ကာမအားတိုးဆေးကို လွန်ဆန်နိုင်ခဲ့ပြီး အစ်မ(၅)၏ ရိုးသားဖြူစင်မှုကို မညစ်နွမ်းစေခဲ့ပေ။ အကယ်၍ သူသာ ထိုသို့မဟုတ်ခဲ့ပါက သူတို့၏ ဆက်ဆံရေးသည် ပိုမိုရှုပ်ထွေးနေလိမ့်မည်။ လန်လင်းက ရှေးရိုးစွဲတစ်ယောက်ဖြစ်သည့်အတွက် ထိုဖြစ်ရပ်အပြီးတွင် တာဝန်ယူဖို့ရာ သူ့ကမ်းလှမ်းမှုကို လက်ခံခဲ့သည်။

သို့သော်လည်း သူ့အနေဖြင့် ထိုအရာသည် သူတို့တာအိုလက်တွဲဖော်ဖြစ်လာသည့် အကြောင်းအရင်းဖြစ်နေခဲ့လျှင် မည်သို့ခံစားရမှန်းပင် မသိတော့ပေ။ အရူးအမူးစွဲလမ်းပန်းအတွက်မူ သူက ဝမ်ဝေ့ ထွက်ခွာပြီးသည့်နောက်တွင် သူမကို ချက်ချင်းပြောပြခဲ့ပြီး လွှမ်းမိုးခံရမှု မလိုချင်ပေ။ သို့သော်လည်း အစ်မ(၅)က စိတ်ထဲမထားဘဲ ကံကြမ္မာဟုသာ ပြောဆိုခဲ့၏။

ထို့နောက် သူတို့၏ ဆရာက ပန်းအပေါ် စည်းတံဆိပ်တချို့ထားရှိကာ သက်ရောက်မှုကို လျှော့ချပေးခဲ့သည်။ ထို့နောက် နှစ်ဦးသားက ပိုမိုသိကျွမ်းလာကာ နောက်ပိုင်းတွင် ချစ်ကျွမ်းဝင်သွားခဲ့ပြီး တာအိုလက်တွဲဖော် ဖြစ်လာခဲ့ကြသည်။

နောက်ဆုံးတွင် လော့ချန်က ဆေးဖော်စပ်သူတစ်ယောက်အဖြစ် မြင့်တက်လာမှုနှင့် ပတ်သက်ပြီး ရှုပ်ထွေးလာသလို ခံစားလိုက်ရသည်။ သူ့အောင်မြင်မှုနှင့် ဂုဏ်ကျက်သရေတို့ အရင်းအမြစ်က ပင်ကိုစွမ်းရည်ဖြစ်သည့် တိကျမှုအပေါ် မူတည်နေသည်။ သို့သော်လည်း သူက ဝမ်ဝေ့ လုပ်ဆောင်နိုင်သလောက် မတိကျကြောင်း သိထားသည်။

သူက ထိုသူသာ သူ့ခန္ဓာကိုယ်ကို မရယူခဲ့ပါက အစကတည်းက မဖြစ်လာနိုင်ကြောင်း သိထားသည်။ ပင်ကိုစွမ်းရည်က လူတစ်ဦးချင်းစီအတွက် ထူးကဲလာသည်။ ထိုစဉ်အချိန်အတွင်း ဝမ်ဝေ့က လော့ချန် ဖြစ်သော်လည်း လော့ချန်က ဝမ်ဝေ့ မဟုတ်ခဲ့ပေ။ သူက ဝမ်ဝေ့၏ တည်ရှိမှုကြောင့်သာ ထိုသို့ အလားအလာကောင်းသည့် ပါရမီစွမ်းဆောင်ရည်ကို ရယူနိုင်ခဲ့ခြင်း ဖြစ်၏။

ထို့နောက် မီးတောက်ဧကရာဇ်နှင့် ပတ်သက်ပြီး အရှုပ်အထွေးတချို့ ရှိနေပြန်သည်။ သူက ထိုသူ၏ အမွေဆက်ခံသူ ဖြစ်သော်လည်း ဝမ်ဝေ့ မရှိဘဲ မည်သို့ဖြစ်လာနိုင်မည်နည်း။

မီးတောက်ဧကရာဇ်က ဝမ်ဝေ့အစား သူ့ကို ရွေးချယ်ခဲ့သည့် အကြောင်းအရင်းကိုလည်း မသိရပေ။

သို့သော်လည်း လော့ချန်က ဉာဏ်ကောင်းသည့်အတွက် ဝမ်ဝေ့နှင့် ယှဉ်လိုက်လျှင် သူက ပိုမိုထိန်းချုပ်ဖို့ လွယ်ကူသည့် နယ်ရုပ်တစ်ခု ဖြစ်နိုင်၍ မီးတောက်ဧကရာဇ်က သူ့ကို ရွေးချယ်ခဲ့နိုင်ချေရှိကြောင်း သိလေသည်။

ဤနှစ်များစွာ ကြာသည့်တိုင် သူက အရွယ်ရောက်လာပြီး ယခင်လို မည်သို့ဆေးလုံးဖော်စပ်ရမှန်းသာ သိတော့သည့် တုံးအအလူငယ်တစ်ယောက် မဟုတ်တော့ပေ။ သူက အာဏာကိစ္စများနှင့် လုပ်ကြံသတ်ဖြတ်မှုအမျိုးမျိုးကို တွေ့ကြုံခံစားခဲ့ရပြီး ဤလက်ရှိအရွယ်အထိ ရင့်ကျက်လာခဲ့ရသည်။

ထို့ကြောင့် သူက လူငယ်ဘဝ လျစ်လျူရှုထားခဲ့သည့် ကိစ္စများစွာကို နားလည်ပြီး သုံးသပ်လာနိုင်၏။

“ဘာတွေကို နက်နက်နဲနဲ စဉ်းစားနေတာလဲ” လန်လင်းက မေးလိုက်သည်။

***