တိမ်တိုက်နဂါးဓား

သူက ကောင်းကင်ဘုံတစ်ဝက်အဆင့်ကျွမ်းကျင်သူ၏ အမြင်တွင် အရေးမပါသော်လည်း သူ့ဓားချက်ကြောင့် နန်းတော်သခင်ထွက်ပြေးနိုင်ရန် မျှော်လင့်မိသည်။

သူက အမှန်တကယ်အရေးမပါချေ။ သူ့ဓားချက်ကို ရင်ဆိုင်လိုက်ရသောအခါတွင် ဓားပျံဖြင့် တာအိုတန်ခိုးရှင်က မျက်နှာထားပြောင်းလဲမသွားဘဲ ဓားပျံကို ပစ်လွှတ်လိုက်သည်။

ဓားပျံသည် ဖျတ်ခနဲပြေးထွက်လာပြီး ယွီရီကျီ၏ ဦးခေါင်းကို ခုတ်ချသည်။

ဝမ်လော့ရှန်က သူ့ကိုကယ်ချင်သော်လည်း သူသည်လည်း မည်သို့မှ မတတ်နိုင်ပါ။

ပိုင်ထျန်းယွဲ့၏ ဓားပျံက သူမဖမ်းနိုင်လောက်အောင် လျင်မြန်သည်။

ဓားအလင်းကျဆင်းလာသောအခါတွင် ဝမ်လော့ရှန်က နောင်တများနှင့်အတူ တစ်ဖက်သို့ ခေါင်းလှည့်လိုက်သည်။

“ခလွမ် ....”

တုန်ခါမှုတစ်ခု ဖြစ်သွားသည်။

ထို့နောက် အော်ဟစ်သံများပေါ်လာသည်။

ဘေးနှစ်ဖက်မှာ ရှိနေသော ကောင်းကင်ဘုံတစ်ဝက်အဆင့်ကျွမ်းကျင်သူနှစ်ယောက်က ပိုင်ထျန်းယွဲ့ထံသို့ ပြေးဝင်လာသည်။

ဝမ်လော့ရှန်က လှည့်ကြည့်လိုက်သောအခါတွင် ပိုင်ထျန်းယွဲ့အားဖိနှိပ်ထားသော လူနှစ်ယောက်ကို မြင်လိုက်ရသည်။

လူတစ်‌ယောက်မှာ ဓားနှစ်လက်ရှိပြီး ဓားအလင်းများပြန့်ကျဲနေသည်။ ပိုင်ထျန်းယွဲ့က ခုခံနိုင်ခြင်း မရှိရာ အားကောင်းသောချီစွမ်းအားကို အသုံးပြု၍ အလင်းအတားအဆီးတစ်ခုလုပ်ထားသည်။

ဓားအလင်း၏အောက်တွင် အလင်းအတားအဆီးမှာ ချက်ချင်းပြိုကွဲသွားသည်။

တခြားတစ်ဘက်တွင် အစိမ်းရောင်ဝတ်စုံနှင့်လူအိုကြီးတစ်ယောက်ရှိနေသည်။ သူက လက်ထဲတွင် မီးများဖြင့် စုစည်းထားသောဓားတစ်လက်ကို ကိုင်ထားပြီး ပိုင်ထျန်းယွဲ့၏ဓားပျံကို ပြန်မခေါ်နိုင်အောင် ခိုင်မာစွာတားဆီးထားသည်။

“ကောင်လေးဟန်၊ မင်းလုပ်နိုင်လား”

‌ခေါင်းဆောင်တောက်ရင်က အော်ဟစ်လိုက်ရင်း သူ့လက်ထဲတွင် ရှိသောမီးဓားမှာ အက်ကွဲလာသည်။

“မင်း မလုပ်နိုင်ရင် ငါလုပ်လိုက်မယ်”

သူ့လက်ထဲတွင် ရှိသောဓားက ပြန်လည်ကောင်းမွန်သွားပြီး ဓားပျံကို အပြည့်အဝတားဆီးထားသည်။

တခြားတစ်ဘက်တွင် အလင်းအတားအဆီးကို ဓားနှစ်လက်နှင့် ဖျက်ဆီးလိုက်သောဟန်မူယဲ့က ကျယ်လောင်စွာရယ်သည်။ သူ့ဓားနှစ်လက်သည် သွယ်ယှက်သွားပြီး မီးနဂါးအဖြစ်ပြောင်းလဲကာ ကောင်းကင်ဘုံတစ်ဝက်အဆင့်ကျွမ်းကျင်သူကို လွှမ်းခြုံလိုက်သည်။

‘ကောင်းကင်ဘုံတစ်ဝက်အဆင့်ကျွမ်းကျင်သူဆိုရင်ရော ဘာဖြစ်လဲ။ လူနှစ်ယောက်ကို တစ်ချိန်တည်း တိုက်ခိုက်နိုင်လား’

မီးနဂါး ပေါက်ကွဲသွားသည်။ ပိုင်ထျန်းယွဲ့၏ တစ်ကိုယ်လုံးမှာ မည်းတူးနေသည်။ သူ့ဆံပင်နှင့် မုတ်ဆိတ်မွေးမှာ လောင်ကျွမ်းသွားပြီး အဝတ်အစားအပိုင်းအစတချို့သာ အကောင်းအတိုင်းကျန်ရစ်သည်။

သနားစရာကောင်းလှသောသူ့ပုံစံကြောင့် ခေါင်းဆောင်တောက်ရင်က ကျယ်လောင်စွာရယ်သည်။ သူ့လက်ထဲတွင် ရှိသောဓားက ကြမ်းတမ်းစွာကျဆင်းလာသည်။

“ခလွမ် ....”

အစိမ်းရောင်ဓားပျံသည် ဓားချက်ကြောင့်လွင့်စင်သွားပြီး ဓားသွားပေါ်တွင် အက်ကွဲကြောင်းများ ဖြစ်ပေါ်လာသည်။

ဟန်မူယဲ့၏တိုက်ခိုက်ခြင်းကို ခံနေရသော ဓားပိုင်ရှင်ဖြစ်သည့် ကောင်းကင်ဘုံတစ်ဝက်အဆင့်ကျွမ်းကျင်သူမှာ သွေးတစ်လုပ်အန်ထုတ်လိုက်ပြီး ထွက်ပြေးရန် ပြင်လိုက်သည်။

သူ၏ မူလဝိညာဉ်လက်နက်က ထိခိုက်သွား၏။ သူထွက်မပြေးလျှင် အသတ်ခံရလိမ့်မည်။

ကောင်းကင်ဘုံတစ်ဝက်အဆင့်ကျွမ်းကျင်သူတစ်ယောက်က ချက်ချင်းဒဏ်ရာရသွားသည်။

ထိုအရာအားလုံးက အသက်တစ်ခါရှူချိန်အတွင်းတွင် ဖြစ်ပျက်သွားသည်။

ဝမ်လော့ရှန်က အသိဝင်လာသောအခါတွင် ဟန်မူယဲ့နှင့် ခေါင်းဆောင်တောက်ရင်တို့သည် ကောင်းကင်ဘုံတစ်ဝက်အဆင့် ကျွမ်းကျင်သူနှစ်ယောက်ကို တိုက်ခိုက်နေသည်။

ခုန်းလင်တာအိုဂိုဏ်းရဲ့ရန်သူဖြစ်တဲ့ ကောင်းကင်ဘုံတစ်ဝက်အဆင့်ကျွမ်းကျင်သူ…။

သူက ဤအခွင့်အရေးကို မဆုပ်ကိုင်နိုင်လျှင် မူလမီးတောက်နန်းတော်၏ ခေါင်းဆောင်မဟုတ်တော့ပေ။

“ဘုန်း ....”

ဝမ်လော့ရှန်က တုံ့ဆိုင်းခြင်းမရှိဘဲ တိမ်တိုက်နဂါးဓားဖြင့် ဝတ်စုံနက်တာအိုတန်ခိုးရှင် ယွင်ဟယ်ကို ခုတ်ချလိုက်သည်။

တာအိုတန်ခိုးရှင်ယွင်ဟယ်၏ အမူအရာက မည်းမှောင်နေသည်။ သူ့လက်ထဲတွင် ရှိနေသော အစိမ်းရောင်ငှက်မွေးယပ်တောင်က ဝိညာဉ်စွမ်းအင်အလင်းများကိုထုတ်ပေးပြီး တိမ်တိုက်နဂါးဓားဖြင့် ရင်ဆိုင်လိုက်သည်။

ခေါင်းဆောင်တောက်ရင်က ကျယ်လောင်စွာရယ်မောလျက် လက်ထဲတွင် ရှိသောမီးဓားဖြင့် ခုန်းလင်တာအိုဂိုဏ်း၏ ကောင်းကင်ဘုံတစ်ဝက်အဆင့်ကျွမ်းကျင်သူ ရှန်းကျီချင်း၏ ပတ်လည်တွင်ရှိသော တိမ်တိုက်များကို ဖြိုခွဲလိုက်သည်။

ရှန်းကျီချင်းက လက်မြှောက်လိုက်သည်။ သူ့နောက်တွင် ရှိနေသော ချီစွမ်းအင်များက လှံအသွင်ပြောင်းသွားပြီး ခေါင်းဆောင်တောက်ရင်၏ ဓားဖြင့် ဝင်တိုက်သည်။

ဟန်မူယဲ့က နေရာမှာတင်ရပ်နေပြီး တိုက်ပွဲနှစ်ခုကို ကြည့်နေသည်။

သူက ခေါင်းဆောင်တောက်ရင်၏ ခွန်အားကို နားလည်သည်။ ခေါင်းဆောင်တောက်ရင်က အစွမ်းကုန်ထုတ်သုံးလျှင် သူ့ရှေ့တွင် ရှိသော ကောင်းကင်ဘုံတစ်ဝက်အဆင့် ကျွမ်းကျင်သူကို ဒဏ်ရာရသွားစေပေလိမ့်မည်။

ဝမ်လော့ရှန်၏ ကျင့်ကြံဆင့်မှာ နိမ့်ကျသည်။

ရွှေအမြုတေ အဌမအဆင့်နှင့် ရွှေအမြုတေ အထွတ်အထိပ်အဆင့်က အင်မတန်ကွာခြားသည်။

ကံကောင်းစွာဖြင့် သူ့မှာ ကွာခြားချက်ကိုဖြည့်ဆည်းပေးနိုင်သော ဓမ္မရတနာဓားရှိနေသည်။

ဓမ္မရတနာ…။

ထိုဓားသည် ဓမ္မရတနာအဆင့်ဓား ဖြစ်သည်။

ဓား၏စွမ်းအားအများစုကို ဝမ်လော့ရှန်က ထုတ်ဖော်ခြင်းမဟုတ်ဘဲ ဓားကိုယ်တိုင်က အသုံးပြုနေခြင်း ဖြစ်သည်။ ‌

ဝမ်လော့ရှန်က ဓားနည်းစနစ်ကို အသုံးပြု၍ ဓားနှင့်အတူ တိုက်ခိုက်ရန်သာလိုအပ်သည်။

သူက ဟုန်ချောင်ယန်နှင့် ဓားဘုရင်ယွမ်ထျန်းတို့၏ တိုက်ပွဲကို မြင်ဖူးသည်။ သူ့ရှေ့တွင် ရှိနေသော မူလမီးတောက်နန်းတော်၏ ခေါင်းဆောင်သည် အမှန်တကယ်အားနည်းသည်။

ထို့အပြင် ဝမ်လော့ရှန်သုံးနေသော ကောင်းကင်နဂါးဓားနည်းစနစ်က မပြည့်စုံကြောင်း ဟန်မူယဲ့ပြောနိုင်သည်။

“ဘုန်း ....”

ခေါင်းဆောင်တောက်ရင်က ရှန်းကျီချင်းကို နောက်ဆုတ်သွားအောင် တွန်းအားပေးလိုက်ပြီး တစ်ဖက်တိုက်ပွဲကို ကြည့်သည်။

ဝမ်လော့ရှန်က ဓားနှင့်အတူ တိုက်ခိုက်ရန် အစွမ်းကုန်ထုတ်သုံးထားသောကြောင့် ပုံရိပ်ယောင်နဂါးတစ်ကောင်အဖြစ် ပြောင်းလဲနေသည်။

နဂါးပုံရိပ်သည် တာအိုဆရာယွင်ဟယ်၏ ကျောက်စိမ်းယပ်တောင်နှင့် ဝင်တိုက်သွားပြီး ပျောက်ကွယ်သွားသည်။

ဝမ်လော့ရှန်၏လက်ထဲတွင် ရှိနေသောဓားမှာ အဆက်မပြတ်တုန်ခါနေပြီး သူက မြဲမြံအောင် ကိုင်မထားနိုင်တော့ပေ။ ဓားက ပျံထွက်သွားသည်။

ဟန်မူယဲ့က မျက်လုံးမှေးကျဉ်းလိုက်ပြီး လေထုထဲသို့ ပျံသန်းသွားသည်။

သူက လက်မြှောက်လိုက်ပြီး ဓားနည်းစနစ်ကို အသုံးပြု၍ တိမ်တိုက်နဂါးဓားကို ထောက်ပံ့ပေးလိုက်သည်။

“ဟမ် ....”

တိမ်တိုက်နဂါးဓားပေါ်တွင် မျက်စိကျိန်းလောက်သော ချီအလင်းများတောက်ပလာသည်။

အလင်းက တောက်ပလွန်းသောကြောင့် လူတိုင်းက လှည့်ကြည့်မိသည်။

ဝမ်လော့ရှန်က မျက်လုံးပြူးနေပြီး ထိုသို့တစ်ခါမှ မတောက်ပဘူးသော တိမ်တိုက်နဂါးဓားကို ကြည့်လိုက်သည်။

“ကောင်းကင်နဂါးရဲ့ပုံစံသုံးမျိုး၊ ကောင်းကင်နဂါး ပြန်လည်ဝင်စားခြင်း၊ အဆုံးမဲ့ကောင်းကင်နဲ့မြေပြင် ....”

ဟန်မူယဲ့က‌ အော်ဟစ်လိုက်ပြီး ဓားဆန္ဒများကို တိမ်တိုက်နဂါးဓားထဲသို့ ထည့်သွင်းလိုက်သည်။

တိမ်တိုက်နဂါးဓားသည် ကျယ်လောင်စွာအော်မြည်လိုက်ပြီး ပေတစ်သောင်းရှည်လျားသော နဂါးတစ်ကောင်အဖြစ် ပြောင်းလဲသွားသည်။

“ဟမ် ....”

ကမ္ဘာတစ်ခုလုံး တုန်ခါသွားသည်။

ထိုအရာသည် တိမ်တိုက်နဂါးဓား၏ စွမ်းအားဖြစ်ပြီး မူလမီးတောက်ကမ္ဘာ၏ ကန့်သတ်ချက်ကို ကျော်လွန်နေသောကြောင့် ဖယ်ထုတ်ခံရပေတော့မည်။

ဟန်မူယဲ့က ဓားနည်းစနစ်ကို အသုံးပြုလိုက်သည်။ ကောင်းကင်နှင့် မြေကြီး၏စွမ်းအားများ လှုပ်ရှားမလာခင်တွင် သူက တာအိုတန်ခိုးရှင်ယွင်ဟယ်၏ခေါင်းကို ခုတ်ချလိုက်သည်။ ‌

ပေတစ်သောင်းရှည်လျားသောနဂါးသည် သူ့အမြီးရှည်ကို လှုပ်ရှားလိုက်၏။

“ဘမ်း”

တာအိုတန်ခိုးရှင်ယွင်ဟယ်မှာ အတောင်ကျိုးနေသောကြိုးကြားငှက်တစ်ကောင်ကဲ့သို့ လွင့်ထွက်သွားသည်။

“ကောင်းကင်နဂါး ....”

ဟိန်းဟောက်နေသောနဂါးကို ကြည့်လျက် ဝမ်လော့ရှန်က မျက်ရည်များဝဲလျက် ရေရွတ်သည်။

“ခေါင်းဆောင်၊ ပြန်လာပြီလား” ‌

“ဘုန်း ....”

ကမ္ဘာငယ်၏မိုးကြိုးနှင့် နဂါး၏စွမ်းအားသည် နောက်ဆုံးကျန်နေသော ခုန်းလင်တာအိုဂိုဏ်း၏ ကောင်းကင်ဘုံတစ်ဝက်အဆင့်ကျွမ်းကျင်သူထံသို့ တိုးဝင်လာသည်။

ခေါင်းဆောင်တောက်ရင်၏ ဖိနှိပ်မှုကို ခံထားရသောရှန်းကျီချင်းမှာ အလွန်ထိတ်လန့်သွားသည်။ သူက စုစည်းထားသော လှံများကိုပင် မရုတ်သိမ်းနိုင်တော့ဘဲ ချက်ချင်းထွက်ပြေးလိုက်သည်။

သူ ထွက်မပြေးနိုင်လျှင် သေသွားပေလိမ့်မည်။

“ဘုန်း ....”

မိုးကြိုးကျဆင်းလာသောအခါ နဂါးသည် ပျောက်ကွယ်သွား၏။

ဟန်မူယဲ့က လက်ကိုမြှောက်ပြီး မူရင်းပုံစံအတိုင်းဖြစ်သွားသော တိမ်တိုက်နဂါးဓား၏ လက်ကိုင်ကို ညင်သာစွာဆုပ်ကိုင်လိုက်သည်။

တိမ်တိုက်နဂါးဓားကို လက်ထဲတွင်ကိုင်ထားသောကြောင့် ဟန်မူယဲ့၏ စိတ်နယ်ပယ်ထဲတွင် ဧရာမနဂါးတစ်ကောင် ပေါ်လာသည်။

နဂါး၏ကြေးခွံများသည် ပျက်စီးနေပြီး လက်သည်းနှင့် သွားများမှာ ထက်မြက်နေ၏။ နဂါးက သူ့စိတ်နယ်ပယ်ထဲကို ချိုးဖျက်ဝင်ရောက်လိုသည့်အလား ဟိန်းဟောက်လိုက်သည်။

သို့သော်လည်း သူ ဟိန်းဟောက်ခြင်းမပြုရသေးမီ သူ့ရှေ့တွင် ဓားရှည်တစ်လက် တိတ်ဆိတ်စွာပေါ်လာသည်။

အစိမ်းရောင်ဓားငယ်သည် အေးစက်နေပြီး အရာအားလုံးကို အေးခဲသွားစေနိုင်သော သတ်ဖြတ်လိုစိတ်များဖြင့် ပြည့်နေသည်။

ဝိညာဉ်လိပ်ပြာချီများဖြင့်စုစည်းထားသောဓား…။

ဝိညာဉ်လိပ်ပြာဓားသည် သန်မာသောလေပြင်းကိုသယ်ဆောင်လျက် ကျဆင်းလာသည်။ ဝိညာဉ်လိပ်ပြာဓားက နဂါး၏ဦးခေါင်းကို ချက်ချင်းထိုးခွဲပစ်လိုက်သည်။

နဂါး၏ ကျိုးပဲ့သွားသောခန္ဓာကိုယ်သည် ပြန်ကောင်းမလာခင် လူသားလောကမန္တန်၏ ရွှေရောင်စာလုံးများပေါ်လာသည်။ ထိုရွှေရောင်စာလုံးများက အလင်းတစ်ချက် ထုတ်ပေးပြီး လှောင်အိမ်အဖြစ်ပြောင်းလဲသွားကာ နဂါးဦးခေါင်းကို ချုပ်နှောင်လိုက်သည်။

ရွှေရောင်ဝိညာဉ်စွမ်းအားက လှံများအဖြစ်ပြောင်းပြီး ကြေးခွံများကွဲကြေသွားအောင် နဂါးကို ထိုးစိုက်လိုက်သည်။

နဂါးဆီမှ ဝိညာဉ်စွမ်းအင်တချို့ ဆွဲထုတ်ခံရသည်။

“ဆရာ… ကျေးဇူးပြုပြီး ချမ်းသာပေးပါ”

နဂါးက ပါးစပ်ဖွင့်ပြီး တောင်းပန်လိုက်သည်။

သူက ကြောက်ရွံ့မှုကို ခံစားနေရသည်။

တစ်ဘက်လူ၏ စိတ်နယ်ပယ်ထဲသို့ ကျရောက်သွားသောအခါတွင် ထိတ်လန့်ဖွယ်ကောင်းလှသောအခြေအနေတစ်ခုနှင့် ကြုံတွေ့ရလိမ့်မည်ဟု သူ ထင်မထားမိပေ။

ဝိညာဉ်လိပ်ပြာဓားသည် သူ့ဝိညာဉ်ခန္ဓာကို ဖြတ်ပစ်နိုင်လောက်အောင် ထက်မြက်သည်။

အသိစိတ်ကိုဆုံးရှုံးသွားပြီး အညံ့ခံအောင်ဖိအားပေးနိုင်သော ရွှေရောင်စာလုံးများလည်း ရှိနေသည်။

နဂါးသည် ထိုနည်းလမ်းမျိုးကို လွန်ခဲ့သောနှစ်ထောင်ကျော်က ကောင်းကင်ဘုံအဆင့်ထက်ကျော်လွန်သော ကျွမ်းကျင်သူများနှင့် ရင်ဆိုင်သောအချိန်၌သာ မြင်ဖူးသည်။

ထိုကျွမ်းကျင်သူမျိုးနှင့် ရင်ဆိုင်ရလျှင် အသနားခံနိုင်မှ အသက်ရှင်ပေမည်။

ဟန်မူယဲ့က စိတ်နယ်ပယ်ထဲတွင် တုန်လှုပ်နေသောနဂါးကို လျစ်လျူရှုထားပြီး ဓားချီများကို တိမ်တိုက်နဂါးဓားထဲသို့ ထည့်သွင်းလိုက်သည်။

ဓားက ညင်သာစွာတုန်ခါသွားပြီး ခုခံမှုများကို လက်လျော့လိုက်ပုံပေါ်သည်။

ဟန်မူယဲ့၏စိတ်ထဲတွင် ပုံရိပ်များပေါ်လာသည်။

အဆင့်မြင့်တိမ်ဝိညာဉ်သံမဏိဓားသွန်းလုပ်ခြင်း၊ ဝိညာဉ်သုံးလွှာလေ့ကျင့်ခြင်းနည်းစနစ်…။

ဓားတစ်လက်ဖြစ်ပေါ်လာသောအခါတွင် တောင်ပိုင်းကုန်းမြေမှ မိစ္ဆာကြီးများ၏ သွေးနှင့် ဝိညာဉ်ကို အသုံးပြု၍ မာကျောအောင်ပြုလုပ်ရသည်။ ထို့နောက် ကောင်းကင်ဘုံအဆင့်ကျင့်ကြံသူ၏ ပျိုးထောင်ပေးမှုဖြင့်ဆိုလျှင် နှစ်သုံးရာအကြာတွင် ဓမ္မရတနာ ဖြစ်လာပေလိမ့်မည်။

ဓမ္မရတနာမှာ ဝိညာဉ်ရှိပြီး တိမ်တိုက်နဂါးတစ်ကောင်အဖြစ် ပြောင်းလဲနိုင်သည်။

ထိုဓားကို တိမ်တိုက်နဂါးဓားဟု ခေါ်သည်။

တိမ်နှင့် လေများပေါ်လာပြီး နဂါးပုံရိပ်များ စုစည်းလာပေလိမ့်မည်။

ဤတိမ်တိုက်နဂါးဓားသည် နေမင်းရောင်ဝါနန်းတော်၏ အဓိကဓမ္မရတနာတစ်ခု ဖြစ်ပြီး ကောင်းကင်ဘုံအဆင့်ကျင့်ကြံသူတချို့၏လက်ထဲတွင် လက်ဆင့်ကမ်းကိုင်တွယ်ခြင်းခံရသည်။

ဓား၏နောက်ဆုံးပိုင်ရှင်သည် ကောင်းကင်ဘုံအဆင့်ကျင့်ကြံသူဖြစ်သော နေမင်းရောင်ဝါနန်းတော်၏ မဟာအကြီးအကဲ ယုဟူဖြစ်သည်။

သူသည် မူလမီးတောက်နန်းတော်၏ တည်ထောင်သူလည်းဖြစ်သည်။

နေမင်းရောင်ဝါနန်းတော် ပျက်စီးသွားသောအချိန်မှာ ယုဟူသည် နောက်တွင် ကျန်ရစ်၏။ သူက အလားအလာရှိသောတပည့်များကို မူလမီးတောက်ကမ္ဘာထဲသို့ ပို့ပြီးသွားသောအခါတွင် ဓမ္မရတနာဓားကို ချန်ထားရစ်သည်။

တိမ်တိုက်နဂါးဓားက ယုဟူ၏ညွှန်ကြားချက်ကို မှတ်သားထားပြီး မူလမီးတောက်ကမ္ဘာထဲတွင် အင်အားစုတစ်ခုတည်‌ထောင်ရန်အတွက် တပည့်များကို ကူညီပေး၏။

ဤနှစ်များအတွင်းမှာ တိမ်တိုက်နဂါးဓားက ယုဟူ၏ နောက်ဆုံးမှာကြားချက်ကိုလည်း မှတ်မိနေ၏။

တစ်နေ့မှာ နေမင်းရောင်ဝါနန်းတော်၏ ဓားနည်းစနစ်ကိုလေ့ကျင့်ထားသော လူတစ်ယောက်ရောက်လာပြီး ဓားကို အသက်သွင်းပေးလိမ့်မည်။

နန်းတော်၏ အကာကွယ်ဓားနည်းစနစ်၊ ကောင်းကင်နဂါး…။

ဓားထဲတွင် ရှိသော ဓားချီနှင့် ဓားဆန္ဒများ လှုပ်ရှားလာပြီး ဟန်မူယဲ့၏ ဝိညာဉ်သွေးကြောများထဲသို့ စီးဝင်လာသည်။

ထိုအရာက တိမ်တိုက်နဂါးဓား နှစ်ပေါင်းများစွာကြာအောင်စုပ်ယူထားသော ဓားချီနှင့် ဓားဆန္ဒများ ဖြစ်ကြသည်။

ဓားကို လမ်းညွှန်ပြီး သန့်စင်နိုင်သူမရှိသောကြောင့် ဓားချီနှင့် ဓားဆန္ဒများသည် အသုံးမဝင်သောအရာအဖြစ် ကျန်ရှိနေ၏။

ထိုအချိန်တွင် ဓားချီနှင့် ဓားဆန္ဒများစီးဆင်းသွားပြီး ဓားကိုယ်ထည်က လွတ်လပ်‌သောအော်မြည်သံကို ပေးလိုက်တော့သည်။