အလယ်ပိုင်းကုန်းမြေသို့ ပထမဆုံးခရီး (က)

ဓားစံအိမ်၏ တတိယထပ်တွင် ဟန်မူယဲ့က ဝင်္ကပါပြားကို အသက်သွင်းလိုက်သည်။ ထို့နောက် သူက လက်ဖြန့်လိုက်သောအခါတွင် ကျောက်စိမ်းရောင်ပုတီးစေ့များ ပေါ်လာသည်။

ထိုပုတီးစေ့များက အရှေ့ပင်လယ်၏ ဝိညာဉ်ပုလဲလုံးများဖြစ်ပြီး ကျင်းမိသားစု၏ ကုန်သွယ်ရေးအဖွဲ့အစည်းမှ ပို့ပေးခဲ့ခြင်းဖြစ်သည်။

ဝိညာဉ်ကျောက်တုံး သုံးသန်းတန်ဖိုးကို ကနဦးပေးချေမှုအဖြစ် ပေးသွားခဲ့သည်။

ဟန်မူယဲ့က သန့်စင်နတ်ဘုရားဆေးလုံးကို သန့်စင်ပေးခဲ့ပြီး ကျင်းမိသားစု၏ဆိုင်ရှင်နှင့်အတူ ပြန်ထည့်ပေးလိုက်သည်။

ထိုဆေးလုံးကြောင့် ကျင်းမိသားစု၏ဆိုင်ရှင်က အံ့အားသင့်သွားခဲ့သည်။

ဝိညာဉ်ပုလဲလုံးများကြောင့် ဟန်မူယဲ့သည် ကျင့်ကြံရန်အတွက် အဆင့်မြင့်အရည်အသွေး ဝိညာဉ်ကျောက်တုံးများကို မလိုအပ်တော့ပေ။

ဝိညာဉ်ပုလဲလုံးကို သန့်စင်လိုက်လျှင် နွေးထွေးသောသဘာဝစွမ်းအင်များက ဝိညာဉ်သွေးကြောကို အားဖြည့်ပေးပြီး သဘာဝစွမ်းအင်နှင့်ခန္ဓာကိုယ်က ပိုမိုလိုက်ဖက်ညီလာလိမ့်မည်။

ဟန်မူယဲ့၏ပတ်ပတ်လည်တွင် သဘာဝစွမ်းအင်အလင်းများ ရှိနေသည်။ သူ့ဒန်ထျန်ထဲရှိ ဘုံကိုးလွှာတွင် ချီစွမ်းအင်များဖြင့် ပြည့်နေသည်။

သူက အခြေခံအုတ်မြစ်အဌမအဆင့်၏ အထွတ်အထိပ်တွင် ရှိနေသည်။

သူ့နောက်တွင် မီးခိုးရောင်သန်းနေသော ဦးချိုရှည်နွားသိုးတစ်ကောင် ပေါ်လာသည်။

ထိုနွားသိုးပုံရိပ်ပေါ်လာသောအခါတွင် ပတ်ဝန်းကျင်လေထုက ဖိသိပ်ခံလိုက်ရပြီး တုန်ခါနေသည်။

ထိုအရာသည် အားကောင်းသော သွေးစွမ်းအား၏ လက္ခဏာရပ်ဖြစ်သည်။

ဦးချိုရှည်နွားသိုး၏စွမ်းအားသည် ဟန်မူယဲ့၏ ယခင်ရုပ်ခန္ဓာကျင့်ကြံခြင်းနည်းစနစ်များထက် သာလွန်နေသည်။

ယခုအချိန်တွင် ဟန်မူယဲ့၏ ရုပ်ခန္ဓာကျင့်ကြံခြင်းက အခြေခံအုတ်မြစ်နဝမအဆင့်ကိုကျော်လွန်၍ ကမ္ဘာမြေတစ်ဝက်အဆင့်သို့ ရောက်နေပြီဖြစ်သည်။

“မင်းရဲ့ ရုပ်ခန္ဓာကျင့်ကြံခြင်းနည်းစနစ်က တကယ်အားကောင်းတာပဲ။ ဒါက ဘိုးဘေးအဆင့်ကို ပြန်သွားမယ့်ပုံစံ ပြနေပြီ”

တာအိုဆရာတယန်က မျက်လုံးများမှေးကျဉ်းလိုက်ပြီး ဦးချိုရှည်နွားသိုးကို ကြည့်နေသည်။

“မင်းက ရုပ်ခန္ဓာကျင့်ကြံခြင်းကို ဘယ်အထိရောက်အောင် ပြန်သွားမှာလဲ”

ဟန်မူယဲ့က ပြုံးလိုက်ပြီး လက်မြှောက်သည်။ သူ့လက်ထဲတွင် အနက်ရောင်သားမွေးတစ်ခုပေါ်လာသည်။

“ဒါက တကယ်ပဲ ရှေးခေတ်နတ်ဘုရားသားရဲ ခွေဆိုရင် မိုးကြိုးနတ်ဘုရားသားရဲဖြစ်တဲ့အထိ ပြန်သွားမယ်”

ဟန်မူယဲ့က ထိုသို့ပြောလိုက်သောအခါတွင် သားမွေးထဲရှိ မိုးကြိုးစွမ်းအင်များက သူ့ခန္ဓာကိုယ်ထဲသို့ စီးဝင်လာသည်။

သူ့ခန္ဓာကိုယ်ထဲသို့ မိုးကြိုးစွမ်းအင်များ ရောက်လာသောအခါတွင် ဟန်မူယဲ့က တစ်ကိုယ်လုံးတုန်ခါသွားသည်။

သူ့ကျောရိုးမှာ ကျောက်စိမ်းရောင်ပေါ်လာသည်။

ဓားအရိုး…

သားမွေးပေါ်တွင် မိုးကြိုးပုံရိပ်တစ်ခု ပေါ်လာသည်။

မိုးကြိုးများသည် သုံးရက်ကြာသည်အထိ ပျောက်ကွယ်မသွားခဲ့ပေ။

ထိုအချိန်တွင် ဟန်မူယဲ့၏ကျောရိုးတစ်ခုလုံးက ဓားအရိုးများအဖြစ် ပြောင်းလဲသွားသည်။ အပိုစွမ်းအင်များ ပေါ်ထွက်လာပြီး တခြားအရိုးများဆီသို့ ပျံ့နှံ့သွားသည်။

ကျင့်ကြံနေသောဟန်မူယဲ့ကို တာအိုဆရာတယန်က စောင့်ကြည့်နေသည်။

သို့သော်လည်း ဟန်မူယဲ့က ဓားအရိုးများကို သူခန့်မှန်းထားသည့်အတိုင်း ပခုံးရိုးနှင့် လက်မောင်းရိုးအတွက် မသန့်စင်ခဲ့ပေ။ သူက မိုးကြိုးစွမ်းအားကို ကိုယ်တွင်းအင်္ဂါများဆီသို့ လမ်းညွှန်ပေးပြီး ကိုယ်တွင်းအင်္ဂါနှင့် နံရိုးများအား သန့်စင်နေသောကြောင့် သူက အနည်းငယ် အံ့အားသင့်သွားရသည်။

“မင်းက ဓားကျင့်ကြံသူလေ။ လက်မောင်းကို အရင်ဆုံး သန့်စင်သင့်တယ်မဟုတ်လား”

ဓားအရိုး၏စွမ်းအားသည် ရုပ်ခန္ဓာကျင့်ကြံခြင်းနှင့် သဘာဝစွမ်းအားကျင့်ကြံခြင်းမှ ဖြစ်ပေါ်လာသည်။ ထိုအရာသည် ဓားတာအိုနှင့် သဘာဝစွမ်းအား၏ ပေါင်းစပ်မှုဖြစ်သည်။

ဓားအရိုးများက ကျင့်ကြံသူကို မဟာတာအိုနှင့် ပိုမိုလိုက်ဖက်ညီအောင် ကူညီပေးနိုင်သည့်အပြင် တိုက်ခိုက်နိုင်စွမ်းလည်း တိုးလာစေနိုင်သည်။

သူ့လက်များကို ဓားအရိုးအဖြစ်သန့်စင်လိုက်လျှင် တိုက်ခိုက်နိုင်စွမ်းနှင့်အမြန်နှုန်းက အဆများစွာ တိုးလာလိမ့်မည်။

“ခွန်အားတိုးလာတာက အရေးမကြီးပါဘူး”

ဟန်မူယဲ့က မျက်လုံးဖွင့်လိုက်သည်။ ဓားချီနှင့် သဘာဝစွမ်းအင်အလင်းများက သူ့ခန္ဓာကိုယ်ပေါ်တွင် စုစည်းလာသည်။

မီးခိုးရောင်နွားသိုးပုံရိပ်က ဖြည်းဖြည်းချင်းပျောက်ကွယ်သွားသည်။

“ဓားအရိုးတွေသန့်စင်ဖို့အတွက် တစ်ဆင့်ချင်းစီလုပ်ရမယ်”

“လက်မောင်းတွေကို အရင်သန့်စင်တာက မှန်ကန်တဲ့နည်းလမ်းမဟုတ်ဘူး”

ဟန်မူယဲ့က ထရပ်လိုက်သည်။ သူ့အငွေ့အသက်များက ပုံမှန်အတိုင်း ပြန်ဖြစ်သွားသည်။ သူက မိုးကြိုးစွမ်းအားများဖြင့်ပြည့်နေသော သားမွေးကိုသိမ်းလိုက်ပြီး ပြောသည်။

“ကျွန်တော့်ရဲ့တွက်ချက်မှုတွေအရ လက်မောင်းအရိုးကို နောက်ဆုံးအချိန်မှာ သန့်စင်သင့်တယ်”

ယခုအချိန်တွင် ဟန်မူယဲ့၏ရုပ်ခန္ဓာကျင့်ကြံခြင်းသည်ကမ္ဘာမြေတစ်ဝက်အဆင့်သို့ ရောက်နေပြီဖြစ်သည်။

သဘာဝစွမ်းအင်ကျင့်ကြံခြင်းသည် အခြေခံအုတ်မြစ် အဌမအဆင့်၌ ရှိနေသည်။

သူက ယခင်ကျင့်ကြံဆင့်ကို ကျော်လွန်သွားခဲ့ပြီဖြစ်သည်။

ဟန်မူယဲ့က မူလနေမင်းနှင့် နေမင်းငယ်နည်းစနစ်များကို စတင်ကျင့်ကြံခဲ့သည်။ သူက ရွှေနေမင်းနည်းစနစ်ကို ပြန်လည်ကျင့်ကြံတော့မည်ဖြစ်သည်။

ယခုအချိန်တွင် သူ့ကျင့်ကြံခြင်းအခြေခံအုတ်မြစ်သည် အလွန်နက်နဲ၏။

သူ့ဒန်ထျန်အတွင်းရှိ ဘုံကိုးလွှာက ရွှေရောင်သန်းနေပြီဖြစ်သည်။

ဓားဆေးလုံးလေးလုံးက ဘုံကုံးလွှာထက်တွင် တိတ်ဆိတ်စွာလွင့်မျောနေသည်။ ဓားဆန္ဒငါးခုက ဘုံကိုးလွှာပတ်လည်တွင် လွင့်မျောနေသည်။

ချီပင်လယ်ထဲတွင် ချည်မျှင်ဓားအလင်း၃၂ခုက သွယ်ယှက်နေသည်။

သိပ်သည်းနေသောဓားချည်မျှင်သည် ယခင်ဓားဆန္ဒများထက် ပိုမိုသန်မာသည်။

သူ့စိတ်နယ်ပယ်ထဲတွင် လူသားလောကမန္တန်နှင့် ဝိညာဉ်လိပ်ပြာဓားခုနစ်ခုက တစ်ခုနှင့်တစ်ခု နှောင့်ယှက်ခြင်းမရှိပေ။

သူက ဝိညာဉ်လိပ်ပြာဓားနှင့် ဓားဆန္ဒများကို ပိုမိုစုစည်းချင်လျှင် ကျင့်ကြံဆင့်တိုးမြှင့်မှဖြစ်မည်။

နောက်တစ်ဆင့်အတွက် ကမ္ဘာမြေအဆင့်ကို တက်ရမည်။

သူက ကမ္ဘာမြေအဆင့်သို့တက်သွားလျှင် တိုက်ခိုက်နိုင်စွမ်းသည် အလွန်အမင်းတိုးလာလိမ့်မည်။

သို့သော်လည်း သူက အလျင်မလိုပေ။

အချိန်ယူမည်ဖြစ်သည်။

ကျင့်ကြံခြင်းက တစ်လှမ်းချင်းစီသွားရသည်။

သူက အောက်ထပ်သို့ဆင်းလာသောအခါတွင် လျှိုဟုန်နှင့်ကျန်းမင်က တက်ကြွစွာပြန်လာကြသည်။

သူတို့က ဟန်မူယဲ့ကို မြင်လိုက်ရသောအခါတွင် မသက်မသာဖြစ်သွားပြီး ဦးညွှတ်သည်။

ဟန်မူယဲ့က ပြုံးပြီး စာအုပ်ဆောင်သို့ ဦးတည်လိုက်သည်။

သူက စာအုပ်ဆောင်သို့ရောက်သောအခါတွင် စွေ့ဟယ်လျန်က ပျော်ရွှင်စွာဖြင့် သူ့ကို ကြိုဆိုခဲ့သည်။

“စီနီယာအစ်ကိုဟန်၊ စာအုပ်ဆောင်ကိုမလာတာ နည်းနည်းကြာနေပြီ”

ဟန်မူယဲ့က တစ်လကျော်ကြာသည်အထိ တံခါးပိတ်ကျင့်ကြံနေခဲ့သည်။ သူက ဓားစံအိမ်တွင် တစ်ချိန်လုံး ရှိနေခဲ့သည်။

စွေ့ဟယ်လျန်က ဟန်မူယဲ့ဖတ်ခဲ့သောစာအုပ်ကို စိတ်အားထက်သန်စွာပေးလိုက်သည်။ ဟန်မူယဲ့က စာအုပ်ကို ငုံ့ကြည့်နေကြောင်း မြင်လိုက်ရသောအခါတွင် သူက တုံ့ဆိုင်းနေပြီး အခန်းထဲမှ ထွက်သွားသည်။

ဟန်မူယဲ့က ရှေ့တွင်ရှိသောစာအုပ်ကို လှန်လိုက်သည်။

အကြီးအကဲများ၏ ခရီးသွားမှတ်တမ်းတွင် ကျင့်ကြံခြင်းဆိုင်ရာ နားလည်သဘောပေါက်မှုနှင့် သဘာဝပတ်ဝန်းကျင်ကို မှတ်သားထားသည်။

သူက စာအုပ်ကို ဖြည်းဖြည်းချင်းဖတ်ကြည့်နေသည်။ သူ့စိတ်နယ်ပယ်ထဲတွင်ရှိသော လူသားလောကမန္တန်က ရွှေအလင်းများတောက်ပလာပြီး သမာဓိစွမ်းအားများ လှုပ်ရှားနေသည်။

ယခုအချိန်တွင် သူ့ကွန်ဖြူးရှပ်ကျင့်ကြံခြင်းက မဟာဆရာအဆင့်နှင့် တစ်လှမ်းပဲကွာတော့သည်။

သို့သော်လည်း ထိုတစ်လှမ်းက သူ့ကို တားဆီးထားသည်။

သူတစ်ယောက်တည်း ထိုသို့ဖြစ်နေခြင်းမဟုတ်ပေ။ အလယ်ပိုင်းကုန်းမြေတွင် မရေမတွက်နိုင်လောက်သော ကျောင်းတော်သားများရှိသော်လည်း လူနည်းစုကပဲ မဟာဆရာအဆင့်သို့ ရောက်လာနိုင်သည်။

မဟာဆရာတစ်ယောက်၏ ကွန်ဖြူးရှပ်တာအိုပေါ်တွင် နားလည်သဘောပေါက်မှုသည် အဆင့်သစ်တစ်ခုမှာ ရှိနေသည်။

သူက အချိန်အများစုကို စာဖတ်ခဲ့ပြီး အခန်းတွင်းမှ ထွက်လာသည်။

“စီနီယာအစ်ကိုဟန်”

စွေ့ဟယ်လျန်က ရှေ့တက်လာပြီး ဟန်မူယဲ့ကို ဦးညွှတ်သည်။ ထို့နောက် သူက ပြောသည်။

“စွေ့ဟယ်လျန်က ကွန်ဖြူးရှပ်တာအို ကျင့်ကြံခြင်းနည်းလမ်းကို သင်ကြားပေးဖို့အတွက် စီနီယာအစ်ကိုဟန်ကို တောင်းဆိုချင်ပါတယ်”

ကွန်ဖြူးရှပ်ကျင့်ကြံခြင်းတွင် တိကျသောအဆင့်များရှိသည်။

ခန္ဓာကိုယ်နှင့်စိတ်ကို ကျင့်ကြံခြင်းအပြင် စာပေကျွမ်းကျင်မှုနှင့် စတင်သည်။

ဟန်မူယဲ့က စွေ့ဟယ်လျန်ကိုကြည့်လိုက်ပြီး ပြောသည်။

“အလယ်ပိုင်းကုန်းမြေရဲ့ ကွန်ဖြူးရှပ်တာအိုကျင့်ကြံခြင်းမှာ စာပေပညာရပ်အတွက် ကျင့်ကြံခြင်းနည်းလမ်းတစ်ခုရှိတယ်။ ဂိုဏ်းမှာ အဲဒီကျင့်ကြံခြင်းစာအုပ်တွေ ရှိတယ်မဟုတ်လား”

အံ့ဖွယ်ကိုးပါးဓားဂိုဏ်းကို လွန်ခဲ့သောနှစ်ပေါင်းတစ်သောင်းတွင် တည်ထောင်ခဲ့ပြီး ကျင့်ကြံခြင်းနည်းစနစ်များကို နည်းလမ်းအမျိုးမျိုးအသုံးပြု၍ စုဆောင်းခဲ့သည်။

အလယ်ပိုင်းကုန်းမြေတွင် ကျင့်ကြံခြင်းနည်းစနစ် အများအပြားမရှိသော်လည်း ကျင့်ကြံခြင်းစာအုပ်များ ပျံနှံ့နေခဲ့သည်။

“စီနီယာအစ်ကို၊ ကျွန်တော်က အလယ်ပိုင်းကုန်းမြေရဲ့ ကွန်ဖြူးရှပ်တာအိုကို ကျင့်ကြံခဲ့ပြီး ဗဟုသုတပြည့်စုံတယ်လို့ ယူဆနိုင်ပါတယ်။ ဒါပေမဲ့ သမာဓိစွမ်းအားနဲ့ပတ်သတ်ပြီး ဘာမှမတတ်နိုင်ဘူးဖြစ်နေတယ်”

စွေ့ဟယ်လျန်က ခေါင်းခါပြီး သက်ပြင်းချသည်။

သူ့မှာ နည်းလမ်းမရှိသောကြောင့် ဟန်မူယဲ့ကို တောင်းဆိုနေရခြင်းဖြစ်သည်။

တခြားနည်းလမ်း မရှိတော့ပေ။

ဟန်မူယဲ့က ခေါင်းညိတ်သည်။

ကွန်ဖြူးရှပ်တာအိုကို ကျင့်ကြံရာတွင် အခက်အခဲများရှိသည်။

သဘာဝစွမ်းအင်ကျင့်ကြံခြင်းက စွမ်းအင်စုစည်းခြင်းဖြစ်သည်။ လူတစ်ယောက်၏ကျင့်ကြံခြင်းပါရမီက အလွန်ဆိုးဝါးမနေလျှင် ကျင့်ကြံရန်အတွက် အခွင့်အရေးတစ်ခု အမြဲရှိနေသည်။

သဘာဝစွမ်းအင် စုစည်းခြင်းအပြင် ဉာဏ်အလင်းရခြင်းလည်း ရှိသည်။

ဉာဏ်အလင်းမရလျှင် နားလည်ရန်ခက်ခဲလိမ့်မည်။

ဉာဏ်အလင်းက ကွန်ဖြူးရှပ်တာအို၏ သတ်မှတ်ချက်တစ်ခုဖြစ်သည်။

ထို့ကြောင့် ကွန်ဖြူးရှပ်တာအို ကျင့်ကြံသူများက လောကတွင် အလွန်များပြားသော်လည်း အခြေခံအဆင့်ကျောင်းတော်သားဖြစ်လာနိုင်သောလူက အလွန်နည်းနေသည်။

စာအုပ်တစ်သောင်းကိုဖတ်ခဲ့ပြီး ဆံပင်များဖြူဖွေးနေသော ကျောင်းတော်သားအိုကြီးများကို နေရာတိုင်းတွင် တွေ့နိုင်သည်။

သူတို့သည် ကွန်ဖြူးရှပ်တာအို၏ အနှစ်သာရကို နားမလည်ဘဲ သမာဓိစွမ်းအားကို မကျင့်ကြံနိုင်သောကြောင့် ဖြစ်သည်။

“မင်းသင်ယူထားတာကို အသုံးချပါ”

ဟန်မူယဲ့က စွေ့ဟယ်လျန်ကို ကြည့်ပြီး ပြောသည်။

“ဂိုဏ်းတူညီလေးစွေ့၊ မင်းက ဒီစာအုပ်ဆောင်မှာပဲ ရှိနေရင် တစ်သက်လုံး သမာဓိစွမ်းအားကို ကျင့်ကြံနိုင်မှာမဟုတ်ဘူး”

“သင်ယူထားတာကို အသုံးချရမှာလား”

စွေ့ဟယ်လျန်က မျက်လုံးများတောက်ပသွားပြီး ဟန်မူယဲ့ကို ဦးညွှတ်သည်။

“စီနီယာအစ်ကိုဟန်၊ ကျေးဇူးပြုပြီး လမ်းညွှန်ပေးပါ”

“ဂိုဏ်းတူညီလေးစွေ့၊ ကျင်းယန်မြို့ကိုသွားပြီး ငါ့မွေးစားသမီးကို ကွန်ဖြူးရှပ်တာအိုအကြောင်း သုံးနှစ်သင်ပေးပါ”

“တစ်ချိန်တည်းမှာပဲ မရီးလုကိုကူညီပြီး ကျင်းယန်မြို့ကို ဖိနှိပ်ပေးပါ”

‘လူသားလောကကို စောင့်ကြပ်ရမှာလား’

စွေ့ဟယ်လျန်က မျက်မှောင်ကြုတ်သည်။

လူသားများကို ကျင့်ကြံရန် မျှော်လင့်ချက်မရှိသော ကမ္ဘာမြေအဆင့်သို့မရောက်နိုင်သည့် တပည့်များက စောင့်ရှောက်ပေးရသည်။

သူက ကမ္ဘာမြေအဆင့် ကျွမ်းကျင်သူတစ်ဦးဖြစ်သည်။

သို့သော်လည်း မျက်တောင်တစ်ခတ်စာအချိန်အတွင်း၌ သူက ချက်ချင်းလက်သီးဆုပ်လိုက်ပြီး ပြုံးသည်။

“ကောင်းပါပြီ။ ဟွမ်လောင်လျှိုရဲ့သမီးကို သင်ကြားပေးပါ့မယ်”

စီနီယာအစ်ကိုဟန်၏ ပြောစကားနှင့် အပြုအမူတိုင်းသည် အခွင့်အရေးတစ်ခုဖြစ်သည်။

ထိုအရာသည် အံ့ဖွယ်ကိုးပါးတောင်၏ နာမည်ကြီးဆိုရိုးစကားဖြစ်၏။

ဥပမာအနေဖြင့် ထန်တောင်ကုန်းဓားဂိုဏ်း၏တပည့်များကို တိုက်ခိုက်ခဲ့သောအချိန်တွင် စီနီယာအစ်ကိုဟန်၏လမ်းညွှန်မှုကို ခံယူထားသောတပည့်များက တိုက်ခိုက်နိုင်စွမ်း အလွန်တိုးတက်လာသည်။

သူတို့က အကြောင်းပြချက်ကို မသိပေ။

စီနီယာအစ်ကိုဟန်၏ လမ်းညွှန်မှုကို နားထောင်လိုက်ခြင်းဖြစ်သည်။

စွေ့ဟယ်လျန်က ကျင်းယန်မြို့ကိုသွားရန် ဆန္ဒရှိသည့်အတွက် ဟန်မူယဲ့က ကျေနပ်သွားသည်။

သူက ဟွမ်ကျစ်ဟူအတွက် နည်းပြတစ်ယောက်ရှာပေးရန် ဒုက္ခခံစရာမလိုတော့ပေ။

စွေ့ဟယ်လျန်သည် ကမ္ဘာမြေအဆင့်ကျွမ်းကျင်သူတစ်ယောက်ဖြစ်သည်။ သူက ကွန်ဖြူးရှပ်တာအိုကို နှစ်ပေါင်းများစွာကြာအောင် လေ့လာခဲ့ပြီး ဟွမ်ကျစ်ဟူအတွက် သင့်တော်သော နည်းပြတစ်ယောက်ဖြစ်သည်။

“ဂိုဏ်းတူညီလေးစွေ့၊ စိတ်မပူပါနဲ့။ မင်းက သုံးနှစ်ကြာလို့ ဉာဏ်အလင်းမရသေးရင် ငါကိုယ်တိုင် မင်းကို ဉာဏ်အလင်းရလာအောင် ကူညီပေးပါ့မယ်”

ဟန်မူယဲ့က စကားပြောလိုက်ပြီး သူ့ခန္ဓာကိုယ်ပေါ်တွင် ရွှေအလင်းတစ်ခု ဖြတ်ပြေးသွားသည်။

ဉာဏ်အလင်း…

ကွန်ဖြူးရှပ်တာအိုအမွေအနှစ်တွင် ကျင့်ကြံခြင်းဂိုဏ်းကြီးများ၏ တပည့်များက သမာဓိစွမ်းအားကိုအသုံးပြု၍ စိတ်နယ်ပယ်ရှိသမာဓိစွမ်းအားကို လှုံ့ဆော်ကြသည်။