အလယ်ပိုင်းကုန်းမြေသို့ ပထမဆုံးခရီး (ဂ)

ဟန်မူယဲ့က ဝိညာဉ်ပုလဲလုံးများကို သုံးခဲ့သောကြောင့် မူကျင်းက ပျော်ရွှင်သွားသည်။ ဝိညာဉ်ပုလဲလုံးများကို အသုံးပြုလျှင် အရောင်းအဝယ်အတွက် ၅%လျော့ဈေးပေးနိုင်သည်ဟု မူကျင်းက ပြောခဲ့သည်။

ခိုင်မာမှုရှိသောတန်ဖိုးသည် ပြောင်းလဲခြင်းမရှိပေ။

သူတို့အားလုံးက ကောင်းကင်နှင့်မြေကြီး၏အတားအဆီးဆီသို့ သွားခဲ့သည်။ မူကျင်း၏လက်ထဲတွင်ရှိသော တံဆိပ်က အလင်းစက်ဝန်းတစ်ခုကိုထုတ်ပေးပြီး သူတို့အားလုံးကို လွှမ်းခြုံခဲ့သည်။

ထိုအလင်းစက်ဝန်း၏အကာအကွယ်မရှိလျှင် ကောင်းကင်နှင့်မြေကြီး၏အတားအဆီးသည် လူတစ်ယောက်၏ကျင့်ကြံခြင်းကို ဖျက်ဆီးပစ်နိုင်သည်။

ကောင်းကင်နှင့်မြေကြီး၏အတားအဆီးသည် အလွန်အားကောင်းသောကြောင့် ကမ္ဘာမြေ ဝိညာဉ်နိုးထခြင်းအဆင့်သို့ မရောက်သေးလျှင် တောင့်မခံနိုင်ပေ။

သဘာဝစွမ်းအင်အလင်းက ကောင်းကင်တစ်ခုလုံးကို လွှမ်းမိုးထားသည်။ ထိုအလင်းသည် လှပပြီး အရောင်စုံ၏။

ငှက်တစ်ကောင်သည် ဖမ်းစားခံလိုက်ရပုံပေါ်ပြီး ကောင်းကင်နှင့်မြေကြီး၏အတားအဆီးနှင့် တိုက်မိသွားသည်။

“ဘမ်း ....”

အရိုးများကျိုးသွားသည်။ အကြောများပြတ်သွားသည်။

ဤအရာသည် ကောင်းကင်နှင့်မြေကြီး၏အတားအဆီးဖြစ်သည်။

လောကတွင် ပိုမိုလှပသောအရာတစ်ခုသည် အန္တရာယ်ပိုများသည်။

“ဒီတံဆိပ်က တစ်ကြိမ်ကို လူအယောက်နှစ်ဆယ် ခေါ်သွားနိုင်တယ်။ တစ်လကို တစ်ကြိမ်သုံးနိုင်တယ်”

မူကျင်းက တံဆိပ်ကိုကိုင်ထားပြီး လူတိုင်းကို အတားအဆီးထဲသို့ ခေါ်သွားနေသောအချိန်တွင် နောက်သို့လှည့်ပြီး ပြောသည်။

“ငါ့အတွက် အမြတ်၁၀%တောင်းတာက သိပ်မများဘူးမဟုတ်လား”

‘ကောင်းကင်နဲ့မြေကြီးရဲ့အတားအဆီးကို ဖြတ်သန်းဖို့အတွက် အမြတ်၁၀%ပေးရမှာလား’

‘အဲဒါက ဝိညာဉ်ကျောက်တုံးတွေကို လုယူနေတာပဲ’

ဟန်မူယဲ့က မျက်ခုံးပင့်သည်။

မိတ်ဆွေဆက်ဆံရေးနှင့် စီးပွားရေးသည် မတူညီပေ။

သူမသည် မိစ္ဆာကြီးတစ်ယောက်ဖြစ်သည်။

သူမသည် ကောင်းကင်နှင့်မြေကြီး၏အတားအဆီးရှေ့တွင် ရပ်နေသည်။

“အဟမ်း၊ အကြီးအကဲမူ အဲဒါက အရမ်းများလွန်းတယ်”

“ကျွန်တော်တို့က စီးပွားရေးစလုပ်တုန်းပဲရှိသေးတာ။ အမြတ်က အများဆုံး ဝိညာဉ်ကျောက်တုံးရှစ်သိန်းလောက်ပဲ ရလိမ့်မယ်”

ဟန်မူယဲ့မငြင်းခင်မှာ ဘေးတွင်ရှိသောခုန်းချောင်တိက လျင်မြန်စွာပြောသည်။

“၁၀%က အရမ်းများလွန်းတယ်။ နှစ်စဉ်ကြေးလုပ်ကြရအောင်။ တစ်နှစ်ကို ဝိညာဉ်ကျောက်တုံးတစ်သန်းဆိုရင် ဘယ်လိုလဲ”

“ကျွန်တော်တို့က တစ်နှစ်ကို ၁၂ကြိမ်ဖြတ်သန်းမှာ မဟုတ်ပါဘူး။ တစ်နှစ်မှာ တစ်ကြိမ်လောက်ပဲသွားဖြစ်လိမ့်မယ်။ နှစ်အချို့ကြာမှ တစ်ကြိမ်သွားတာလည်း ဖြစ်နိုင်တယ်”

“ကျွန်တော်တို့က နှစ်စဉ်ကြေးပေးနေရင် အကြီးအကဲကပဲ အကျိုးအမြတ်ရမှာပါ”

ခုန်းချောင်တိက စိတ်ရင်းနှင့်ပြောနေပုံရသည်။

ထို့နောက် သူက စာအုပ်တစ်အုပ်ထုတ်ပြီး ဤခရီးတွင် မည်မျှအမြတ်ရမည်ဖြစ်ကြောင်း တွက်ချက်ကြည့်နေသည်။

သူက ရောင်းချရန်ခက်ခဲသော ဝိညာဉ်ဆေးပင်များနှင့် လမ်းတစ်လျှောက် ကုန်ကျစရိတ် စသည်ဖြင့် အသေးစိတ်တွက်ချက်ထားသည်။

“ကောင်းပြီ။ ကောင်းပြီ။ ဒီတစ်ကြိမ်မှာတော့ နင်တို့ကို ငါခေါ်သွားလိုက်ပါ့မယ်”

မူကျင်းက မျက်မှောင်ကြုတ်ပြီး လက်ကိုဝှေ့ယမ်းလိုက်သည်။

မိစ္ဆာများသည် ကိန်းဂဏန်းများတွက်ချက်ခြင်းကို နှစ်သက်ပုံမပေါ်ပေ။

မူကျင်းက ဟန်မူယဲ့ကိုကြည့်ပြီး ထန်ထန်ကို ညွှန်ပြသည်။

“ထန်ထန်၊ သူတို့ကိုစောင့်ကြည့်ထားပြီး ဝိညာဉ်ကျောက်တုံးဘယ်လောက်ရလဲ မှတ်သားထားလိုက်”

“နင်ပြန်လာရင် ငါတို့တွက်ကြည့်မယ်”

ထန်ထန်က လေးနက်သောမျက်နှာထားနှင့်အတူ ခေါင်းညိတ်သည်။

“စိတ်မပူပါနဲ့အဘွား။ ကျွန်မက ဝိညာဉ်ကျောက်တုံးတစ်တုံးတောင် မလွတ်စေရပါဘူး”

မူကျင်းက လက်မြှောက်လိုက်သောအခါတွင် သူမ၏လက်ထဲတွင်ရှိသော တံဆိပ်က အစိမ်းရောင်အလင်းကို ထုတ်လွှတ်သည်။ ကောင်းကင်နှင့်မြေကြီး၏အတားအဆီးပေါ်တွင် ဂိတ်တံခါးတစ်ခုပေါ်လာသည်။

တစ်ဖက်တွင် အလယ်ပိုင်းကုန်းမြေရှိနေသည်။

ကောင်းကင်အံ့ဖွယ်ကမ္ဘာတွင် သဘာဝစွမ်းအားများ အကြွယ်ဝဆုံးနေရာဖြစ်သည်။

ဤကမ္ဘာ၏ ကျင့်ကြံခြင်းတော်ဝင်နယ်မြေဖြစ်သည်။

အလယ်ပိုင်းကုန်းမြေတွင် ရတနာများနှင့်ပြည့်နေသည်ဟု ပြောကြသည်။

အလယ်ပိုင်းကုန်းမြေတွင် ကျင့်ကြံသူကြီးများ နေရာအနှံ့တွင်ရှိနေသည်ဟု ပြောကြသည်။

အလယ်ပိုင်းကုန်းမြေတွင် ကမ္ဘာမြေအဆင့်ကျွမ်းကျင်သူများသည် ခွေးတစ်ကောင်ထက်နိမ့်ကျပြီး နေရာတိုင်းတွင် ကောင်းကင်ဘုံအဆင့်ကျွမ်းကျင်သူများ ရှိနေသည်ဟု ပြောသည်။

အလယ်ပိုင်းကုန်းမြေတွင် ....

ဟန်မူယဲ့က အသက်ပြင်းပြင်းရှူသွင်းပြီး အထဲသို့ ခြေလှမ်းကျဲကြီးများနှင့်အတူ ဝင်သွားသည်။

သူက အထဲသို့ရောက်သွားသောအခါတွင် သူ့ခန္ဓာကိုယ်ပေါ်၌ တောက်ပနေသော အလင်းစက်ကွင်းတစ်ခု ပေါ်လာသည်။ သူ့ခန္ဓာကိုယ်ကို ကာကွယ်ပေးထားသော တံဆိပ်၏အလင်းစက်ကွင်းသည် ပြိုကွဲသွားပြီး ကောင်းကင်နှင့်မြေကြီး၏အတားအဆီးစွမ်းအားများက သူ့ကိုယ်ပေါ်သို့ ပိကျလာသည်။

“သတိထား”

လင်းရှန်က အော်ဟစ်လိုက်ပြီး ပြေးထွက်သွားသည်။

ခုန်းချောင်တိ၏မျက်နှာထားက ပြောင်းလဲသွားပြီး သူ့ကိုယ်ပေါ်တွင် ရွှေအလင်းတစ်ခုပေါ်ထွက်လာသည်။

မူကျင်းက မျက်မှောင်ကြုတ်နေပြီး တံဆိပ်၏စွမ်းအားများကို အသက်သွင်းနေသည်။

ထန်ထန်က ပါးစပ်အုပ်ထားပြီး စိုက်ကြည့်နေမိသည်။

ဟန်မူယဲ့၏ကျင့်ကြံခြင်းသည် ကောင်းကင်နှင့်မြေကြီး၏အတားအဆီးစွမ်းအားကို မည်သို့ခုခံနိုင်မည်နည်း။

ကောင်းကင်နှင့်မြေကြီး၏စွမ်းအားများ ကျဆင်းလာသောအခါတွင် သူ့ခေါင်းပေါ်၌ ရွှေရောင်ချီစွမ်းအားအလင်းတစ်ခု ပေါ်လာသည်။

ကောင်းကင်နှင့်မြေကြီး၏စွမ်းအား…

ကောင်းကင်နှင့်မြေကြီး၏စွမ်းအားကိုအသုံးပြု၍ ကောင်းကင်နှင့်မြေကြီး၏စွမ်းအားကို တိုက်ခိုက်သည်။

အနောက်ဘက်နယ်စပ်ကုန်းမြေသည် အလယ်ပိုင်းကုန်းမြေ၏ မဟာတာအိုအတားအဆီးနှင့် ရင်ဆိုင်နိုင်ရန်အတွက် ကောင်ကင်ဘုံ၏ကောင်းချီပေးခြင်းကို ရထားသည်။

“အနောက်ဘက်နယ်စပ်ကုန်းမြေရဲ့ ကောင်ကင်တာအိုက ကျူးကျော်လာတာလား”

ထိုအချိန်၌ အလယ်ပိုင်းကုန်းမြေ၏နန်းမြို့တော်တွင်ရှိသော အမတ်ချုပ်ကြီးဝမ်က ရုတ်တရက်ထရပ်လိုက်ပြီး မျက်လုံးများမှေးကျဉ်းထားသည်။

“အနောက်ဘက်နယ်စပ်ကုန်းမြေက ပုန်ကန်နေပြီလား”

ကောင်းကင်အပြင်တွင် ရွှေရောင်သံချပ်ကာနှင့် လှံရှည်တစ်လက်ကို ဆွဲကိုင်ထားသော အမတ်ချုံးဝူက တစ်ဖက်သို့လှည့်သည်။ သူ့နောက်တွင် အဆုံးမရှိသော အနီရောင်သံချပ်ကာနှင့်စစ်သားများသည် တိုက်ခိုက်လိုစိတ်များဖြင့်ပြည့်သည်။

ကောင်းကင်နှင့်မြေကြီး၏ မဟာတာအိုစွမ်းအား…

ဟန်မူယဲ့သည် ကောင်းကင်နှင့်မြေကြီး၏စွမ်းအားကို ဤသို့ ရှင်းလင်းစွာဖြင့် တစ်ကြိမ်မှမခံစားဘူးပေ။

ထိုအရာသည် ထူးခြားသောခံစားချက်တစ်ခုဖြစ်သည်။

လောကသည် မီးပြင်းဖိုတစ်ခုဖြစ်ပြီး အရာအားလုံးသည် သူ့နှလုံးသားထဲတွင် ရှိနေသည်။

အဆုံးမရှိသော ရောင်စုံပုံရိပ်များက သူ့စိတ်ထဲတွင်ပေါ်လာသည်။

ကမ္ဘာတစ်ခု ဖြစ်တည်လာသောအခါတွင် ချော်ရည်များစုပေါင်းပြီး ကြယ်များအဖြစ်ပြောင်းလဲသွားသည်။

ထိုအရာသည် ကြယ်များ၏မြင်ကွင်းဖြစ်သည်။

ကြယ်များတွင် ကိုယ်ပိုင်တာအိုရှိပြီး သဘာဝစွမ်းအင်များကို စုစည်းနေသည်။

ထိုအရာသည် ကောင်းကင်နှင့်မြေကြီး၏ တာအိုဖြစ်ပေါ်ခြင်းဖြစ်သည်။

ထို့နောက် အဆုံးမရှိသောတုန်ခါသံများနှင့်အတူ ပုံရိပ်များဆင်းသက်လာပြီး ကမ္ဘာများကို စုစည်းလိုက်သည်။ သူတို့က အားကောင်းသောခွန်အားကိုအသုံးပြု၍ တခြားကမ္ဘာ၏ လက်အောက်ခံကမ္ဘာများအဖြစ် ပြောင်းလိုက်သည်။

ကောင်းကင်အံ့ဖွယ်ကမ္ဘာ…

အချိန်များကြာမြင့်လာသည်နှင့်အမျှ ကမ္ဘာများကို တစ်ခုပြီးတစ်ခု သိမ်းယူပြီး ကမ္ဘာတစ်ခုအဖြစ် စုစည်းလိုက်သည်။

ထိုကမ္ဘာသည် လက်ရှိ ကောင်းကင်အံ့ဖွယ်ကမ္ဘာဖြစ်သည်။

ကမ္ဘာသည် အကန့်အသတ်မဲ့ပြီး ထူးခြားဆန်းကြယ်သည်။ ကောင်းကင်အံ့ဖွယ်မ္ဘာကို ခွန်အားကြီးလူတစ်ယောက်က တည်ဆောက်ခဲ့သည်။

လူသားလောက၏စွမ်းအားသည် ကောင်းကင်နှင့်မြေကြီးကို အနိုင်ယူနိုင်သည်။

ပေါက်ကွဲမှုတစ်ခုဖြစ်လာပြီး ထောင်ချီနေသောပုံရိပ်များ ပေါ်လာသည်။

မရေမတွက်နိုင်သော ရှေးခေတ်၏ခွန်အားကြီးပုဂ္ဂိုလ်များက တိုက်ခိုက်နေကြသည်။ ကမ္ဘာက ပြိုကျသွားခဲ့သည်။

အဆုံးတွင် အစိမ်းရောင်ဝတ်စုံနှင့် ပုံရိပ်တစ်ခုလွှမ်းခြုံထားသည့် အလယ်ပိုင်းကုန်းမြေနှင့် ကုန်းမြေလေးခုသာ ကျန်တော့သည်။

ထို့နောက် ကောင်းကင်နှင့်မြေကြီးကြားတွင် အတားအဆီးတစ်ခုဆင်းသက်လာပြီး အလယ်ပိုင်းကုန်းမြေကို တခြားကုန်းမြေလေးခုနှင့် ခွဲခြားလိုက်သည်။

ကုန်းမြေလေးခုကြားတွင် ဆက်သွယ်မှု မတူညီပေ။ ထို့ကြောင့် အတားအဆီး၏ခွန်အားကလည်း မတူပေ။

အရှေ့ပင်လယ်၏အတားအဆီးသည် အားနည်းပြီး ချီစုစည်းခြင်းအဆင့်ကျင့်ကြံသူများက လွတ်လပ်စွာဖြတ်သန်းနိုင်သည်။ တောင်ပိုင်းနယ်မြေတွင် အခြေခံအုတ်မြစ်အဆင့်ကျင့်ကြံသူများဖြစ်ပြီး မြောက်ပိုင်းနယ်မြေတွင် ကမ္ဘာမြေအဆင့်ကျွမ်းကျင်သူများ ဖြတ်သန်းနိုင်သည်။ အနောက်ဘက်နယ်စပ်ကုန်းမြေသည် အနည်းငယ်ကွာခြားသည်။

ကောင်းကင်ထက်တွင် ဓားအလင်းများနှင့်ပြည့်နေသည်။ ဟန်မူယဲ့က ကောင်းကင်နှင့်မြေကြီး၏အတားအဆီးရှေ့တွင် ဓားဘုရင်ယွမ်ထျန်းကို မြင်ခဲ့ရသည်။

ဓားအလင်းက အတားအဆီးကို ဖျက်ဆီးခဲ့သည်။

ထို့နောက် အစိမ်းရောင်ဝတ်စုံနှင့် ကျောင်းတော်သားတစ်ယောက်က လက်ကိုမြှောက်၍ နောက်ထပ်အတားအဆီးတစ်ခုကို ဖန်တီးခဲ့သည်။

“အလယ်ပိုင်းကုန်းမြေက ဘာဖြစ်လို့ တခြားကုန်းမြေလေးခုရဲ့အဆီအနှစ်တွေကို စုပ်ယူနေတာလဲ။ ဘာဖြစ်လို့ သဘာဝစွမ်းအင်ကို ညီတူမျှတူ စီးဆင်းခွင့်မပေးတာလဲ”

“အနောက်ဘက်နယ်စပ်ကုန်းမြေရဲ့တာအိုက ဘာဖြစ်လို့ ဖိနှိပ်ခံရမှာလဲ”

ဓားဘုရင်ယွမ်ထျန်းရှေ့တွင် ကောင်းကင်နှင့်မြေကြီး၏အတားအဆီးက ပျက်စီးသွားခဲ့သည်။ ထို့နောက် အစိမ်းရောင်ဝတ်စုံနှင့်ကျောင်းတော်သားက လက်ကိုဝှေ့ယမ်း၍ အလင်းတန်းအတားအဆီးတစ်ခုကို ထုတ်ဖော်သည်။

အတားအဆီးသည် ပိုမိုအားကောင်းလာသည်။

အစပိုင်းတွင် ချီစုစည်းခြင်းအဆင့်ကျင့်ကြံသူများ သွားလာနိုင်သည်။ နောက်ပိုင်းတွင် အခြေခံအုတ်မြစ်အဆင့်ကျင့်ကြံသူများ တားဆီးခံရသည်။ ကမ္ဘာမြေအဆင့်ကျွမ်းကျင်သူများ ရှေ့ဆက်မသွားနိုင်ပေ။

“ငါတို့အားလုံးက ကောင်းကင်အံ့ဖွယ်ကမ္ဘာရဲ့ကျင့်ကြံသူတွေပဲ။ ငါတို့က ဘာဖြစ်လို့ အတူတူမကျင့်ကြံနိုင်ရမှာလဲ”

ဓားဘုရင်ယွမ်ထျန်း၏အသံသည် မိုးခြိမ်းသံနှင့်တူသည်။

“ဒါက ဆရာ့ရဲ့ရည်ရွယ်ချက်ပဲ”

အမတ်ချုပ်ကြီးဝမ်၏အသံသည် တည်ငြိမ်ပြီး ပုံရိပ်ယောင်ဆန်သည်။

“ဘုန်း ....”

ကောင်းကင်နှင့်မြေကြီး၏အတားအဆီးကို ဓားတစ်ချက်နှင့် ဖျက်ဆီးပြီးသောအခါတွင် ဓားဘုရင်ယွမ်ထျန်းက ဒေါသတကြီးအော်ဟစ်သည်။

“ဆရာ့ကိုအသုံးပြုပြီး ငါ့ကိုဖိနှိပ်တာကလွဲရင် မင်းမှာ ဘာစွမ်းရည်ရှိလဲ”

“ကွန်ဖြူးရှပ်တာအိုက ဦးညွှတ်နေတဲ့ ပိုးကောင်အုပ်စုပဲလား”

အမတ်ချုပ်ကြီးဝမ်က ပြန်မဖြေပေ။ သို့သော် ပိုမိုခမ်းနားသည့် ကောင်းကင်နှင့်မြေကြီး၏အတားအဆီး ပေါ်ထွက်လာသည်။

ဤတစ်ကြိမ်တွင် ဓားဘုရင်ယွမ်ထျန်းက မတိုက်ခိုက်ခဲ့ပေ။

“ကောင်းပြီ ဒီနေ့ကစပြီး အနောက်ဘက်နယ်စပ်ကုန်းမြေမှာ ကွန်ဖြူးရှပ်တာအိုအမွေအနှစ် ရှိစရာမလိုတော့ဘူး”

“အနာဂတ်မှာ အနောက်ဘက်နယ်စပ်ကုန်းမြေက အလယ်ပိုင်းကုန်းမြေကနေ ခွဲခြားခံရမယ်”

သူစကားပြောပြီးသွားသောအခါတွင် ကမ္ဘာတစ်ခုလုံး တုန်ခါသွားသည်။

ခမ်းနားသော ကောင်းကင်နှင့်မြေကြီး၏အတားအဆီးနှင့် ကန့်သတ်ခံလိုက်ရသော သဘာဝစွမ်းအားများကိုကြည့်လိုက်ပြီး ဟန်မူယဲ့က နားလည်သွားသည်။

လွန်ခဲ့သောနှစ်ပေါင်းတစ်သောင်းတွင် အနောက်ဘက်နယ်စပ်ကုန်းမြေ၏ ကျင့်ကြံခြင်းသည် ကျဆင်းလာခဲ့သည်။

ဤဖြစ်ရပ်သည် ကျဆင်းခြင်း၏အစဖြစ်လိမ့်မည်။

ကုန်းမြေလေးခု၏အဆီအနှစ်ကို အလယ်ပိုင်းကုန်းမြေက စုပ်ယူထားသောကြောင့် အလယ်ပိုင်းကုန်းမြေသည် ပိုမိုသန်မာလာပြီး တခြားကုန်းမြေလေးခုသည် အားနည်းသွားလိမ့်မည်။

ဟူး…

သူ့ခေါင်းထက်တွင် ခမ်းနားသောကောင်းကင်နံရံသည် ကျဆင်းလာသည်။

အနောက်ဘက်နယ်စပ်ကုန်းမြေ၏ ကောင်းကင်တာအိုနှင့်သက်ဆိုင်သော မြေစွမ်းအားများက ဟန်မူယဲ့ဆီသို့ ရောက်လာသည်။

အင်အားစုနှစ်ခု တိုက်မိသွားသောကြောင့် အချိန်များပြောင်းလဲသွားသည်။

ထိုစွမ်းအားသည် လူသားများတောင့်ခံနိုင်သော စွမ်းအားမျိုးမဟုတ်ပေ။

ဟန်မူယဲ့က မျက်လုံးများမှေးကျဉ်းလိုက်ပြီး ခန္ဓာကိုယ်ပေါ်တွင် ဓားအလင်းများပေါ်လာသည်။

“အနောက်ဘက်နယ်စပ်ကုန်းမြေရဲ့ ကျင့်ကြံသူတစ်ယောက်အနေနဲ့ ငါက ခုခံနိုင်စွမ်းကင်းမဲ့နေရင်တောင် အကောင်းဆုံးကြိုးစားသင့်တယ်”

ဟန်မူယဲ့က တီးတိုးပြောလိုက်ပြီး လက်ထဲတွင် ဓားအလင်းတစ်ခုပေါ်လာသည်။

“မင်းက ရူးနေတာပဲ။ အဲဒါက အလယ်ပိုင်းကုန်းမြေရဲ့ ကောင်းကင်တာအိုစွမ်းအားပဲ”

တာအိုဆရာတယန်က ထိတ်လန့်စွာပြောသည်။

“ကောင်းကင်တာအိုက ရန်စတယ်လို့ခံစားရရင် မိုးကြိုးကပ်ဘေးနဲ့ မင်းကိုရှင်းထုတ်လိမ့်မယ်”

“အရင်တုန်းက ဓားဘုရင်ယွမ်ထျန်းကို အလယ်ပိုင်းကုန်းမြေရဲ့ကောင်းကင်တာအိုက မုန်းနေတဲ့အတွက် သူက ဘယ်တော့မှ ....”

တာအိုဆရာတယန် မပြောနိုင်ခင်မှာ ဟန်မူယဲ့၏ကိုယ်ပေါ်ရှိဓားအလင်းသည် မျဉ်းတစ်ကြောင်းအသွင်စုစည်းသွားသည်။

“အနောက်ဘက်နယ်စပ်ကုန်းမြေရဲ့ ဓားကျင့်ကြံသူတွေက အနောက်ဘက်နယ်စပ်ကုန်းမြေရဲ့ ကောင်းကင်တာအိုကို ကူညီသင့်တာပေါ့”

ဟန်မူယဲ့က အော်ဟစ်လိုက်ပြီး လက်ထဲတွင်ရှိသောဓားအလင်းသည် ဓားဆန္ဒနှင့်အတူ ပြေးထွက်သွားသည်။

အစိမ်းရောင်ဓားအလင်းက ကောင်းကင်နံရံ၏စွမ်းအင်အလင်းနှင့် တိုက်မိပြီး ပျောက်ကွယ်သွားသည်။

ဟန်မူယဲ့၏ခွန်အားသည် ကောင်းကင်အတားအဆီး၏ရှေ့တွင် အသုံးမဝင်ပေ။

သို့သော်လည်း ထိုဓားချက်ကြောင့် ကောင်းကင်အတားအဆီးတစ်ခုလုံးက တုန်ခါသွားသည်။

ကောင်းကင်အတားအဆီးက အားနည်းသူတစ်ယောက်၏ရန်စမှုကြောင့် ဒေါသထွက်သွားပုံပေါ်သည်။

ချက်ချင်းဆိုသလိုပဲ အနောက်ဘက်နယ်စပ်ကုန်းမြေတွင် အဆုံးမရှိသောညည်းညူသံများပေါ်ထွက်လာသည်။

တိမ်များစုစည်းလာပြီး ကောင်းကင်ထက်တွင် မမြင်နိုင်သောလက်နှစ်ဖက်က လက်သီးများအဖြစ် ပြောင်းလဲသွားပုံပေါ်သည်။

ထိုအရာသည် ကောင်းကင်နှင့်မြေကြီး၏စွမ်းအား ကိုယ်ထင်ပြခြင်းဖြစ်သည်။