ပထဆုံးလှုပ်ရှားမှု

လီကျွင်းက ယင်ကန်းနှင့် တိုက်ခိုက်ဖို့ အချိန်များစွာ ယူခဲ့ပြီး ထိုသူအား သူ့ တုယီနယ်ပယ်စွမ်းအား၏ လွှမ်းမိုးမှုကို ဖယ်ရှားဖို့ အချိန် ပေးခဲ့သည်မှာ ရည်ရွယ်ချက် ရှိလေသည်။ သူက ထိုသူ၏ စိတ်စွမ်းအား သဏ္ဌာန်ပြမှုကို လေ့လာပြီး တူညီသည့်အဆင့်ကို ရောက်လို၍ဖြစ်သည်။

ငါအများကြီး သင်ယူခဲ့ပြီးပေမဲ့ မလုံလောက်သေးဘူး…

သူက သုံးသပ်လိုက်၏။ စိတ်စွမ်းအား သဏ္ဌာန်ပြခြင်းက နာမည်အတိုင်း မရိုးရှင်းလှပေ။ လီကျွင်းက တခြားကမ္ဘာ့အသိုက်အဝန်းများ၏ ကျင့်ကြံရေးနည်းစနစ်တချို့သည် ကမ္ဘာနှင့် စည်းမျဉ်း သို့မဟုတ် တာအိုအပေါ်ပင် သက်ရောက်မှုရှိနိုင်သည့် စိတ်စွမ်းအားကို လေ့ကျင့်ပေးနိုင်ကြောင်း ဖတ်ရှုခဲ့ဖူးသည်။

သို့သော် ထိုအရာက ခန္ဓာကိုယ်လေ့ကျင့်သူများ၏ စိတ်ဆန္ဒသဏ္ဌာန်ပြခြင်းနှင့် မတူညီပေ။ ထိုနည်းလမ်းများက အကောင်းဆုံးအနေဖြင့် အဆင့်တစ်ခုကို ရောက်ရှိဖို့ လေ့ကျင့်သည့် နည်းလမ်းတစ်ခုမျှသာ ဖြစ်သည်။ သဏ္ဌာန်ပြခြင်းဆိုသည့် စကားလုံးက သူတို့၏ စိတ်စွမ်းအားသည် မြင့်မားသည့်ပုံစံအဖြစ် အသွင်ပြောင်းခြင်းကို ဆိုလို၏။ ထိုအသွင်ပြောင်းမှုက ခန္ဓာကိုယ်လေ့ကျင့်သူများအား သူတို့၏ စိတ်ဆန္ဒစွမ်းအားကို တာအိုဆန္ဒကဲ့သို့ တူညီစွာ အသုံးပြုနိုင်ခွင့် ပြုထားသည်။ ထိုအရာက မဟာတာအိုအရင်းအမြစ်ထဲ ဧကရာဇ်၏ တာအိုအမှတ်အသားကို ဖယ်ရှားဖို့လည်း အသုံးပြုနိုင်လေသည်။

လီကျွင်းအနေနှင့် သူ့မရီးဆီမှ သင်ယူထားသည့် သတင်းအချက်အလက်အရ ခန္ဓာကိုယ်လေ့ကျင့်သူများ၏ စိတ်ဆန္ဒသည် တာအိုဆန္ဒထက် ပိုမိုမှော်ဆန်ကြောင်း သိထားသော်လည်း ထိုအရာမှာ ချီသန့်စင်သူနှင့် ဝိညာဉ်လမ်းစဉ်တို့ကြား အကောင်းဆုံးလမ်းစဉ်အဖြစ် သတ်မှတ်ခံရသည့် အကြောင်းအရင်း မဟုတ်သေးပေ။

ကိစ္စတော့မရှိသေးဘူး။ ငါက နောင်အတွက် အခြေခံအုတ်မြစ်အနေနဲ့ အသုံးပြုနိုင်တယ်…

လီကျွင်းက ယင်ကန်း၏ စိတ်စွမ်းအားသဏ္ဌာန်ပြမှု အောင်မြင်ခြင်းသည် သူ့ပါရမီနှင့် စိတ်စွမ်းအားကြောင့် မဟုတ်မှန်း သိလေသည်။ သူက ထိုကဏ္ဍအသီးသီးတွင် ထိုသူထက် နောက်ကောက်ကျန်မည် မဟုတ်ပေ။

သူ့အောင်မြင်မှု၏ အဓိကအကြောင်းအရင်းက သေခြင်းရှင်ခြင်းကြား တိုက်ပွဲနှင့် ခန္ဓာကိုယ်လေ့ကျင့်ရေးအပေါ် စစ်မှန်သည့် လုံ့လဝီရိယကြောင့် ဖြစ်ပေသည်။ ကံဆိုးစွာဖြင့် သူက စစ်မှန်သည့် ခန္ဓာကိုယ်လေ့ကျင့်သူ မဟုတ်သလို တူညီသည့် သေခြင်းရှင်ခြင်း အတွေ့အကြုံမျိုးလည်း မရှိခဲ့ပေ။

“အခု တိုက်ပွဲကို အဆုံးသတ်ရမဲ့အချိန်ပဲ” သူက ကြေညာလိုက်သည်။

“စိတ်ကြီးဝင်နေတာပဲ” ယင်ကန်းက နှာခေါင်းရှုံ့ကာ ပြောလိုက်သည်။ သို့သော်လည်း ထိုသူနှစ်ဦးက တစ်စုံတစ်ခုကို ခံစားမိဟန်ဖြင့် လှည့်ကြည့်လိုက်ကြသည်။ လီကျွင်း၏ မျက်နှာထားက အဖြစ်အပျက်ကို မြင်သည့်အခါ ရုတ်ချည်း ပြောင်းလဲသွားသည်။

ပုံရိပ်တစ်ခုက ရုတ်ချည်းဆိုသလို ပေါ်ထွက်လာပြီး သူတို့အဖွဲ့၏ အစီအရင်ကို ချိုးဖောက်ဝင်ရောက်လာသည်။ ထို့နောက် ထိုပုံရိပ်က ယန်းလီလင်းဆီ ဦးတည်ကာ ရောက်ရှိလာ၏။

ထိုပုံရိပ်က လက်ကို ဝှေ့ပြီး ယန်းလီလင်း ရပ်နေသည့်နေရာထံ တောက်ပသည့် အလင်းတန်းကို ပစ်လွှတ်လာသည်။ ထိုအလင်းတန်းလမ်းကြောင်းရှိ အရာအားလုံးက ချက်ချင်းဆိုသလို အမှုန့် ဖြစ်သွားလေသည်။ ပတ်ဝန်းကျင်ရှိ ကာလံဒေသံပင် အပါအဝင် ဖြစ်၏။

အမှောင်ထုထဲ တောက်ပနေသည့် ရွှေရောင်အလင်းတန်းက ဖြည်းဖြည်းချင်း ပျောက်ကွယ်သွားပြီး ယန်းလီလင်းက နဂိုနေရာတွင် တည်ငြိမ်စွာ ရပ်နေလျက်ရှိကာ သူမ၏ ခေါင်းအထက်တွင် ဆေးပြင်းမီးဖိုတစ်ခု မြောလွင့်နေသည်။ သူမက အနည်းငယ် အသက်ရှူနှုန်း ပြင်းထန်နေသည်မှလွဲ၍ အကောင်းအတိုင်း ကျန်ရှိနေလေ၏။

ထို့နောက် သူမက လုပ်ကြံသတ်ဖြတ်သူကို ကြည့်လိုက်သည်။ အကယ်၍ သူမ၏ ခုခံကာကွယ်ရေး ဆေးပြင်းမီးဖိုကြောင့်သာ မဟုတ်လျှင် ထိုတိုက်ကွက်က ထိပ်သီးပွင့်ချပ် ၃လွှာအဆင့်သို့ ရောက်ရှိနေသည့်အတွက် သူမ သေဆုံးသွားနိုင်သည်။

ခွန်အားဆေးပြင်းမီးဖို

နောက်ထပ် ဆေးပြင်းမီးဖိုတစ်ခုက သူမအနား ပေါ်ထွက်လာပြီး နတ်ဆိုးမျိုးနွယ်၊ ပင်ကိုနတ်ဆိုးနှင့် ကမ္ဘာဦးနတ်ဘုရားများ၏ ပုံရိပ်များဖြင့် ပြည့်နှက်နေသည်။ ထို့နောက် ယန်းလီလင်း၏ ခန္ဓာကိုယ်မှ ရုတ်ချည်းဆိုသလို ပြင်းထန်သည့် အငွေ့အသက်တစ်ခု ထွက်ပေါ်လာကာ ထိုလုပ်ကြံသတ်ဖြတ်သူဆီ ဝင်ရောက်သွားသည်။

ထိုအခိုက်အတန့်လေးအတွင်း သူမက သူ့ရှေ့ ရောက်လာကာ ထိုးချလိုက်သည်။

ဝုန်း

လုပ်ကြံသတ်ဖြတ်သူက သူ့ရှေ့တွင် လက်ကို ကာလျက် တားဆီးလိုက်သည်။ နှမြောစရာကောင်းလှသည်က ထိုတိုက်ကွက်သည် သူ့အရေပြား၊ ကြွက်သား၊ အရိုးနှင့် အရွတ်တို့ကို ပျက်သုဉ်းသွားစေပြီး လက်မောင်းအတွက် အပေါက်နှစ်ပေါက်သာ ကျန်ရှိစေသည်။

ယန်းလီလင်းက ဆေးဝါးပညာရှင် တစ်ယောက်ဖြစ်သည့်အတွက် အစစ်အမှန် ခွန်အားတာအိုနယ်ပယ်အဆင့်သို့ ရောက်ဖို့ သူမခန္ဓာကိုယ်ကို လေ့ကျင့်ဖို့ရာ အချိန်အနည်းငယ်သာ ရှိလေသည်။ သူမ၏ ဆေးပြင်းမီးဖိုကို ယခုပညာရပ်တွင် သူမက ဆေးဝါးပညာရှင်များသည် သူတို့၏ အရေပြား၊ ကြွက်သား၊ အတွင်းအင်္ဂါ၊ အရိုးနှင့် သွေးကို သန့်စင်နိုင်ဖို့ မီးတောက်ကို အသုံးပြုနိုင်သည့် နည်းလမ်းကို ဖန်တီးပြီး မြင့်မားသည့် ခန္ဓာကိုယ်လေ့ကျင့်ရေးအဆင့် အနေအထားသို့ ရယူခဲ့သည်။

သို့သော်လည်း သူမက မကျေနပ်သေးသည့်အတွက် ခန္ဓာကိုယ်သန့်စင်ရေးဆေးလုံးများ၊ နတ်ဆိုးမျိုးနွယ်သွေးနှင့် သွေးမျိုးဆက်သန့်စင်ရေး ဆေးလုံးများမှတဆင့် ခွန်အားဆေးပြင်းမီးဖိုကို ဖန်တီးကာ ဖွဲ့စည်းထားခဲ့သည်။

သူမက ထိုဆေးပြင်းမီးဖိုကို ဆင့်ခေါ်သရွေ့ သူမ၏ ခန္ဓာကိုယ်က ကောင်းချီးပေးခံရမည်ဖြစ်ကာ မယုံကြည်နိုင်လောက်သည့် အနေအထားသို့ ရောက်ရှိသွားလိမ့်မည်။

ဘန်း… ဘန်း

ယန်းလီလင်းက လက်သီးချက်ဖြင့် နှစ်ခါထိုးခွင်းလိုက်ပြီး လုပ်ကြံသတ်ဖြတ်သူ၏ ခြေထောက်ကို ဖျက်ဆီးပစ်လိုက်သည်။ သူက အပေါ်ပိုင်းခန္ဓာကိုယ်ကိုသာ ချန်ထားခဲ့လေ၏။

သူမက ဝိညာဉ်ဆေးပြင်းမီးဖိုကို ဖော်ထုတ်လိုက်သည်။

ထိုဆေးပြင်းမီးဖို၏ ရည်ရွယ်ချက်က သူမ၏ ဝိညာဉ်ကို အားမြှင့်ပေးဖို့ ဖြစ်သည်။ သူမက ထိုအရာကို ဆေးဖော်စပ်ရာတွင် အသုံးပြုပြီး အံ့ဖွယ်သင်္ကေတ ရေးထိုးရာတွင် ဆုံးရှုံးသွားခဲ့သည့် ဝိညာဉ်စွမ်းအားများကို ပြန်လည်အားဖြည့်ဖို့ အသုံးပြုသည်။ ဤဆေးပြင်းမီးဖိုက သူမသည် အင်မော်တယ်ဆေးလုံးများကို ဖန်တီးရာတွင် အောင်မြင်သည့် အဓိက အကြောင်းအရင်းတစ်ချက် ဖြစ်ပေသည်။

ဤဆေးပြင်းမီးဖိုဖြင့် ယန်းလီလင်းက လုပ်ကြံသတ်ဖြတ်သူ၏ ဝိညာဉ်မှ သတင်းအချက်အလက်ကို ရှာဖွေလိုသည်။ စကားနှင့် ဖော်ပြလို့မရလောက်အောင် ဒေါသထွက်နေသော်လည်း သူမက လက်ရှိအခိုက်အတန့်တွင် မည်သည်ကို လုပ်ရမည်ဖြစ်ကြောင်း အကျိုးသင့်အကြောင်းသင့် စဉ်းစားနိုင်သေး၏။

ကံဆိုးစွာဖြင့် သူမက ကျရှုံးသွားခဲ့သည်။ စည်းတံဆိပ်တစ်ခုက ရုတ်ချည်းဆိုသလို အသက်ဝင်လာကာ ထိုလုပ်ကြံသတ်ဖြတ်သူ၏ ဝိညာဉ်နှင့် ဦးနှောက်ကို ဖျက်ဆီးပစ်လိုက်သည်။

ယန်းလီလင်းက မျက်မှောင်ကြုတ်ကာ အတွေးနက်နေမိ၏။

“ခင်ဗျားလား” လီကျွင်းက မေးလိုက်ပြီး သူ့မျက်ဝန်းများက အနီရောင် ဖြစ်နေလေသည်။ သူ့အနီရောင် ဆံပင်များကိုပါ ထည့်ပေါင်းလိုက်လျှင် သူက မရဏနတ်ဘုရားတစ်ပါးကဲ့သို့ ဖြစ်နေလေ၏။

“မဟုတ်ဘူး” ယင်ကန်းက တည်တည်ငြိမ်ငြိမ် ပြန်ဖြေလေသည်။

“တကယ်လို့ ဟုတ်တော့လည်း ဘာဖြစ်လဲ။ ဒီတိုက်ပွဲမှာ ဘာမှကန့်သတ်မထားဘူးဆိုတာ သိသင့်တယ်”

“ကောင်းပြီ” လီကျွင်းက ပြောလိုက်စဉ် ယင်ကန်းက တုန်တုန်ယင်ယင် ဖြစ်သွားလေ၏။

သက်ရှိအားလုံး၏ သေခြင်းတရား

လီကျွင်းရှေ့မှောက်တွင် သေးငယ်ကာ ရိုးရှင်းသည့် အနီရောင်လှံတစ်ချောင်း ပေါ်ထွက်လာသည်။ သို့သော်လည်း ထိုအရာကို မြင်တွေ့ပြီးသည့်နောက်တွင် ယင်ကန်းက တုန်ယင်လာမိ၏။ ကြောက်မက်ဖွယ် စွမ်းအားတစ်ခု သူ့ကို ပိတ်လှောင်သွားကာ မလွတ်မြောက်နိုင်တော့ကြောင်း ပြောပြနေလေ၏။

ဤရိုးရှင်းလှသည့် လှံမှ သူသည် သက်ရှိကဏ္ဍအတွင်း ကျရောက်နေသည့် သက်ရှိအားလုံးကို သတ်ပစ်နိုင်သည့် နည်းလမ်းအားလုံးကို မြင်လိုက်ရပြီး လက်နက်ကြောင့် သေဆုံးခြင်း၊ အဆိပ်ကြောင့် သေဆုံးခြင်း၊ ရောဂါကြောင့် သေဆုံးခြင်း၊ စိတ်ပြိုလဲမှုကြောင့် သေဆုံးခြင်း၊ အထီးကျန်မှုနှင့် ဝမ်းနည်းမှုကြောင့် သေဆုံးခြင်း၊ စစ်ပွဲကြောင့် သေဆုံးခြင်း အစရှိသဖြင့် ပါဝင်သည်။

ငါ ဒီလှံကို မတားဆီးနိုင်ဘူး။ ငါ သေသွားလိမ့်မယ်…

ယင်ကန်းက တွေးလိုက်မိသည်။

သူ့စိတ်ထဲ အကြောက်တရားတစ်ခု လွှမ်းခြုံသွားကာ နှုတ်ခမ်းကို ကိုက်ထားမိပြီး နာကျင်မှုဖြင့် ခန္ဓာကိုယ်နှင့် စိတ်ကို ထိန်းချုပ်ဖို့ ကြိုးစားလိုက်သည်။ သူက တုံ့ဆိုင်းခြင်းမရှိဘဲ နောက်ဆုံးဝှက်ဖဲဖြစ်သည့် ကြယ်တာရာ သားရဲဖုတ်ကောင်ကို အသုံးပြုလိုက်သည်။

ယင်ကန်းက ထိုအရာနှင့် ပေါင်းစပ်ကာ သူ့စွမ်းအားကို တိုးမြှင့်လိုသည်။ ကံဆိုးစွာဖြင့် တစ်ဖက်လူသည် သူနှင့် ထိုဖုတ်ကောင်ကြားမှ ဆက်နွယ်မှုကို ဖြတ်တောက်ထားကြောင်း သိလိုက်ရသည်။

ကျစ်…

ယင်ကန်းက ကျိန်ဆဲလိုက်မိပြီး သူ သုံးစွဲနိုင်သမျှ ခုခံကာကွယ်ရေးစွမ်းအား အားလုံးကို ထုတ်သုံးလိုက်သည်။ ထိုအရာက သတ္တုလက်အိတ်များနှင့် တူညီသည့် ဧကရာဇ်အသုံးအဆောင်များ ပါဝင်လေ၏။ သူတို့သည် အသုံးအဆောင်ပစ္စည်းကို အားဖြည့်ပေးဖို့ ဝိညာဉ်နှင့် စည်းမျဉ်းကို အသုံးပြုမည့်အစား သွေးနှင့် ယန်စွမ်းအားကို အသုံးပြုကြသည်။

ထို့ကြောင့် ခန္ဓာတာအိုချိုင့်ဝှမ်းသည် ဧကရာဇ်အသုံးအဆောင်များစွာ ရှိလေ၏။

ထိုအသုံးအဆောင်ကြောင့် လှံသည် အနည်းငယ် နှေးကွေးသွား၏။

“ယင်ကန်း … ခင်ဗျားက အတော်လေး ပါရမီထူးတယ်” လီကျွင်းက ပြောလိုက်သည်။

“ကံဆိုးတာက ခင်ဗျားရဲ့ ကံကောင်းမှုနဲ့ ကြမ္မာက အတော်လေးကို နိမ့်ကျနေတာပဲ။ ခင်ဗျားက မှားယွင်းတဲ့ မျိုးဆက်မှာ မွေးဖွားလာပြီးတော့ ကျုပ်တို့ဘိုးဘေးဆီ ရှုံးနိမ့်သွားရတယ်။ အခုမှားယွင်းတဲ့ ခေတ်ကာလမှာ နိုးထလာပြီးတော့ သူ့မျိုးဆက်ကို ထပ်ပြီး ရှုံးနိမ့်ရပြန်ပြီ”

လီကျွင်းက လက်ဝှေ့လိုက်ပြီးသည့်နောက်တွင် လိပ်ခွံနှင့်တူသည့် ဧကရာဇ်အသုံးအဆောင် ပစ္စည်းတစ်ခုကို ထုတ်ဖော်လိုက်ပြီး ယင်ကန်း၏ အသုံးအဆောင်ကို ဖိနှိပ်ထားလိုက်သည်။

ထို့နောက် လှံက ရှေ့သို့ ထိုးခွင်းလာကာ သေခြင်းတရားနှင့် နီးကပ်လာစေ၏။

ယင်ကန်းက အခြေအနေကို သုံးသပ်ရင်း တည်တည်ငြိမ်ငြိမ် ကျန်ရှိနေဆဲ ဖြစ်၏။ သူက လက်ရှိအနေအထားဖြင့် နောက်ထပ် ဧကရာဇ်အသုံးအဆောင်ကို ထုတ်မသုံးနိုင်ကြောင်း သိလေသည်။ အထူးသဖြင့် ရန်သူကလည်း အတူတူ လုပ်ဆောင်နိုင်သည့်အခါတွင် ဖြစ်ပေသည်။

သူက သူလက်ရှိ အသုံးပြုနေသည့် လက်အိတ်အသုံးအဆောင်ပစ္စည်းမှ စွမ်းအားများများ ထုတ်ယူဖို့သာ အကောင်းဆုံး ဖြစ်မည်မှန်း သိလေသည်။ ထို့ကြောင့် သူက ဆက်လက် စဉ်းစားလိုက်သည်။

ငါ့ရဲ့ တစ်ခုတည်းသော အခွင့်အရေးက စိတ်စွမ်းအားကို သုံးပြီးတော့ ငါ့ရဲ့ ခုခံရေးကို မြှင့်တင်ဖို့ပဲ…

ယင်ကန်းက အာရုံစူးစိုက်သည့် အနေအထားသို့ ဝင်ရောက်သွားကာ သူ နိုးထခဲ့သည့် စွမ်းအားအသစ်ကို လှုပ်ရှားဖို့ ကြိုးစားနေသည်။ ကံဆိုးစွာဖြင့် သူ့ကံကောင်းမှု သို့မဟုတ် အခြေခံအုတ်မြစ်က အဆုံးသတ်သွားပြီ ဖြစ်၏။ ဤမျှအချိန်တိုအတွင်း သူက သူ့စိတ်စွမ်းအားကို အသုံးပြု၍ ကောင်းမွန်သည့် ခုခံရေးနည်းစနစ်ကို အောင်အောင်မြင်မြင် နားမလည်နိုင်ပေ။

ထို့ကြောင့် လှံက ဖျက်ဆီးခြင်း၊ သေခြင်းတရားနှင့် သုတ်သင်ခြင်း လမ်းကြောင်းဆီ ရောက်ရှိလာသည်။

သူနှင့် တစ်မီတာမျှ ဝေးကွာတော့မည့်ဆဲဆဲတွင် ယင်ကန်းက သူ့ခန္ဓာကိုယ်အောက်ပိုင်းသည် အမှုန်အမွှားများအဖြစ် စတင်ပျောက်ကွယ်လာကြောင်း တွေ့လိုက်ရသည်။ ထို့ကြောင့် သူက လှံက ဖြည်းဖြည်းချင်း နီးကပ်လာသည်နှင့် သူ့အသက်ဓာတ် ဖြည်းဖြည်းချင်း လွင့်ပြယ်သွားသည်ကိုသာ ကြည့်နေရလေ၏။

သူ့အတွက် ကံကောင်းသည်က ကံကြမ္မာက သူ့ဘက်တွင် ရှိနေလေသည်။ လှံက သူနှင့် စင်တီမီတာ ၅၀ အကွာသို့ ရောက်လာပြီးသည့်နောက်တွင် ထိုအရာ၏ စွမ်းအားက ထိန်းချုပ်မှု ပျောက်ဆုံးသွားသလိုမျိုး အပြင်းအထန် တုန်ယင်သွား၏။

ယင်ကန်းက တွေးမိသွားပြီး ကျန်ရှိနေသည့် ခေါင်းကို လှုပ်ရှားကာ အာကာပြင်မုခ်ပေါက်ကို ဖွင့်ပြီး အရှေ့ဘက်ပိုင်းမှ ထွက်လာလိုက်သည်။ ထိုစဉ် လီကျွင်းက သူ ပျောက်ကွယ်သွားသည်ကို တည်တည်ငြိမ်ငြိမ် ကြည့်နေပြီးနောက် သူ့ဇနီးဆီ ရောက်ရှိသွား၏။

“ဘယ်လိုနေသေးလဲ” သူက သူမကို ထွေးပွေ့ထားရင်း မေးလိုက်သည်။

“ကျွန်မ အဆင်ပြေပါတယ်”

“ဘာတွေဖြစ်သွားလဲဆိုတာ သိလား။ ဘယ်သူ လုပ်တာလဲ”

“ထုံရို့ပင်းပဲ” ယန်းလီလင်းက ကြေညာလိုက်သည်။

“သူမလား။ ဘယ်လိုလုပ် အဲ့လိုပြောရတာလဲ”

“လုပ်ကြံသတ်ဖြတ်သူက အစီအရင် ချိုးဖောက်ရေးအဆောင်ကို သုံးလာတာ။ အဲဒါက အင်မော်တယ် အဆင့်ပဲ။ ပြီးတော့ အင်မော်တယ်အဆင့် အလင်းပစ်ခတ်ရေး အဆောင်ကို သုံးလာတာဆိုတော့ သူမပဲ အဲ့လိုစွမ်းဆောင်ရည် ရှိတာလေ”

“မင်း ပြောတာ မှန်နေနိုင်ပါတယ်။ ဒါပေမဲ့ အဲဒီသစ္စာဖောက်တွေနဲ့ မိုရှင်းယွင်တို့က သူမကို နာမည်ဖျက်ဖို့အတွက် လုပ်တဲ့ ဖြစ်နိုင်ချေကိုလည်း တွက်ထားရမယ်”

ယန်းလီလင်းက ထိုကောက်ချက်ချမှုကို သဘောတူလေသည်။ သို့သော်လည်း သူမ၏ အလိုလိုသိစိတ်က ထုံရို့ပင်း၏ လက်ချက်သာ ဖြစ်ကြောင်း ပြောနေလေ၏။

“ဒါနဲ့ ဘာလုပ်ချင်လဲ” သူမက ထျဲ့ကန်း အနိုင်ယူထားသည့် ကြယ်တာရာ သားရဲဖုတ်ကောင်ကို ကြည့်ပြီး ပြောလိုက်သည်။

“အဲဒါကို ရုပ်သေးရုပ်အဖွဲ့ကို တိုးမြှင့်ဖို့ ပစ္စည်းအနေနဲ့ သုံးချင်လား”

လီကျွင်းက ခေါင်းခါလိုက်ပြီး

“အဆင့်မြင့်စွမ်းအားတွေက အဆင့်နိမ့်တပ်ဖွဲ့ထက် ပိုပြီး အရေးကြီးတယ်။ အဲဒီအရာက နဂိုကတည်းက အင်မော်တယ်စွမ်းအားအဆင့် ရှိနေပြီ။ အနည်းငယ်လောက် အပြောင်းအလဲ လုပ်လိုက်မယ်ဆိုရင် ချိုက်စုန့်က ဒါကို အားကောင်းတဲ့ ရုပ်သေးရုပ်အဖြစ် ပြောင်းလဲနိုင်လိမ့်မယ်”

“အဲဒါလည်း ကောင်းတာပဲ”

……………………………………………….

အလယ်ပိုင်းနေရာ၊ သီးသန့်ပိုင်းခြားထားသည့် အစီအရင်တစ်ခုအတွင်း

ယင်ကန်း၏ ဦးခေါင်းက ပေါ်ထွက်လာပြီး စိတ်သက်သာရာရစွာ အသက်ပြင်းပြင်းရှူလိုက်သည်။

“အဲဒီလီကျွင်းက စွမ်းအားကြီးရုံတင်မကဘူး။ သူ့ရဲ့ တိုက်ပွဲအသိဉာဏ်ကလည်း အတော်လေးကို စူးရှတယ်” သူက ရေရွတ်လိုက်ပြီးသည့်နောက်တွင် စတင် ကုစားလိုက်သည်။ သူက နောက်ဆုံးသောအနေဖြင့် ယင်ချီများစွာကို ထိန်းသိမ်းထားခဲ့သည်။

ယခုအခါ သူက သူ့ကိုယ်သူ ကုစားဖို့ အသုံးပြုရမည် ဖြစ်၏။ ထို့ကြောင့် ယင်ကန်းက ယင်ချီ၊ ဆေးလုံးများစွာနှင့် သူ့သိုလှောင်လက်စွပ်ထဲမှ အရင်းအမြစ်များစွာကို အသုံးပြုပြီး ဖြည်းဖြည်းချင်း သူ့အထွတ်အထိပ်အခြေအနေသို့ ပြန်လည်ရောက်ရှိသွားသည်။

“ဒီရှုံးနိမ့်မှုက ဘာမှ မဟုတ်သေးဘူး။ ငါ့ဆီမှာ အခွင့်အရေး ရှိသေးတယ်” သူက ရေရွတ်လိုက်သည်။ ထို့နောက် သူက တစ်နေရာကို လှမ်းကြည့်ပြီး အကြည့်များက တောက်ပလာ၏။