ဆက်ခံသူအသစ်

အဖွဲ့ပေါင်းစုံက အမှောင်ထဲမှာ လှုပ်ရှားနေကြသည်။ ရှောင်ကျင်းသည် နောက်နှစ်ရက်အတွင်း အခြားအဖွဲ့များ၏ လှုပ်ရှားမှုများ၏ အချက်အလက်ကို ဟန်ရှောင်းအား ပေးခဲ့ပြီး၊ သဘောတူထားသည့် လျော်ကြေးငွေနှင့် ဆုကြေးငွေ စုစုပေါင်း ရေပင်လယ်ဒေါ်လာ ၈,၀၀၀,၀၀၀ ကို ဟန်ရှောင်း၏ Dark Net အကောင့်သို့ လွှဲပေးခဲ့သည်။

ဟန်ရှောင်းမှာ ငွေကြေးအမြောက်အမြားရှိသည်။ စုစုပေါင်း ဒေါ်လာ ၄၀,၀၀၀,၀၀၀ ကျော်ရှိပြီး သူ့အရင်ကထက် ဆယ်ဆပိုများ၏။ ဤမျှများပြားသော ပမာဏဖြင့် သူသည် စက်ယန္တရားများကို လွတ်လွတ်လပ်လပ် ပုံအောသုံးစွဲနိုင်ပြီး စျေးကြီးလွန်းသည်ဟု တစ်ချိန်ကထင်ခဲ့သော စက်ရုပ်စစ်တပ်ပုံစံကဲ့သို့ သူ၏ စိတ်ကူးအချို့ကို အကောင်အထည်ဖော်နိုင်ခဲ့သည်။

မျက်စိတစ်မှိတ်အတွင်း နှစ်ရက်ကုန်သွားသည်။ ဌာနတွင်းအစည်းအဝေးကို အလူမီရာအစည်းအဝေးခန်းမတွင် စီစဉ်ထားသည့်အတိုင်း ကျင်းပခဲ့သည်။ အဖွဲ့အားလုံးတွင် အဆင့်မြင့်အရာရှိကြီးများ စုရုံးကြပြီး စောင့်ကြပ်မှု စွမ်းအားလည်း မြင့်မားသည်။

ဟန်ရှောင်းသည် ခေါင်းစွပ်ကို ၀တ်ထားပြီး ရှောင်ဂိုဏ်း၏ သာမန်အဆင့်မြင့် အရာရှိတစ်ဦးအဖြစ် အသွင်ဆောင်ခဲ့သည်။ ဘယ်သူ့ အာရုံစိုက်မှုမှ မခံလိုက်ရဘဲ အစည်းအဝေးခန်းမထဲကို ဝင်ထိုင်လိုက်၏။

အစည်းအဝေးခန်းမ၏ အလယ်တွင် စက်ဝိုင်းပုံသဏ္ဍာန် စားပွဲတစ်ခုရှိသည်။ အဖွဲ့ခွဲအသီးသီးမှ ခေါင်းဆောင်များသည် စားပွဲဝိုင်းတွင် ထိုင်ကြပြီး အခြားအဆင့်မြင့်အရာရှိများက ပြင်ပထိုင်ခုံများတွင် ထိုင်နေကြသည်။ အဖွဲ့ခွဲတစ်ခုနှင့် သက်ဆိုင်သူများသည် ၎င်းတို့ ခေါင်းဆောင်များ၏ နောက်တွင် ထိုင်နေကြသည်။ အဖွဲ့ခွဲများသည် မတူညီသော ရှုထောင့်များတွင် သေးငယ်သော နယ်မြေများ ဖြစ်ပေါ်လာသည်။

အပြင်မှာ နှင်းတွေကျနေပေမယ့် အပူပေးစက်ကြောင့် အစည်းအဝေးခန်းမက နွေးထွေးနေ၏။ လူတွေက ကုတ်အင်္ကျီကို ချွတ်ပြီး အချင်းချင်း စကားစမြည် ပြောနေကြ၏။ မကြာခင်မှာ အတော်လေး ဆူညံလာသည်။။

ဒန်း၊ ဒန်း!

တော့ဒ်က စားပွဲပေါ်မှ ခေါင်းလောင်းကို တီးလိုက်ပြီးနောက် အစည်းအဝေးခန်းမသည် လျှင်မြန်စွာ တိတ်ဆိတ်သွားသည်။

“အခု အစည်းအဝေး စတင်ပါတော့မယ်။” တော့ဒ်က လေးနက်သော အမူအရာဖြင့် ပြောကြားလိုက်သည်။ "ခေါင်းဆောင်နေရာကို ဆက်ခံမယ့် ကိုယ်စားလှယ်လောင်း လေးယောက်ရှိပါတယ်၊ ကျွန်တော်ကိုယ်တိုင်၊ ဒုတိယခေါင်းဆောင်ရှောင်၊ တတိယခေါင်းဆောင်စဲချီနဲ့ မစ္စတာအိန်ဂျယ်တန်တို့ပါ။ အဆင်သင့်ဖြစ်လျှင် စတင်မဲပေးပါ။"

“မဲစမပေးခင် စကားအနည်းငယ်ပြောချင်ပါတယ်” အိန်ဂျယ်တန်က မတ်တပ်ထရပ်ပြီး သူ့ရဲ့မိန့်ခွန်းကို စတင်ပြောဆိုသည်။ မဲပေးခြင်းမတိုင်မီ မိန့်ခွန်းပြောသည်မှာ ပုံမှန်လုပ်ထုံးလုပ်နည်းတစ်ခု ဖြစ်သည်။ လွှတ်တော်၏ အဆင့်မြင့်အရာရှိများသည် မည်သူကိုမဲပေးမည်ကို အခြေခံစဉ်းစားပြီးသားဖြစ်သော်လည်း၊ ဤအဆင့်ကို ချန်လှပ်ထား၍မရပေ။

သိပ်မကြာခင်မှာပဲ ကိုယ်စားလှယ်လောင်းလေးဦးရဲ့ မိန့်ခွန်းများ ပြီးဆုံးသွား၏။ တော့ဒ်က စားပွဲဝိုင်းကိုကြည့်ကာ “မဲပေးမှု စတင်ပါတော့မယ်”

အဆင့်မြင့် အရာရှိကြီးများက သူတို့၏ ရွေးချယ်မှုကို ပြောကြသည်။

တော့ဒ်မှာ စိတ်လှုပ်ရှားနေ၏။ သူသည် လွန်ခဲ့သည့် ရက်အနည်းငယ်အတွင်း အခြားအဆင့်မြင့်အရာရှိများနှင့် ဆက်သွယ်ခဲ့ပြီး အကျိုးခံစားခွင့်များစွာကို ကတိပေးခဲ့သည်။ ဆွေးနွေးကြတဲ့အခါ အားလုံးက သူ့ကို မဲပေးဖို့ သဘောတူခဲ့ကြသည့်အတွက် တခြား ကိုယ်စားလှယ်လောင်းတွေကို မဲအရေအတွက်နဲ့ အလွယ်တကူ အနိုင်ယူနိုင်၏။

သို့သော်လည်း သိပ်မကြာခင် သူ အံ့အားသင့်သွားသည်။ သူ့ကိုမဲပေးမယ်လို့ ကတိပေးထားသော အဆင့်မြင့်အရာရှိတွေအားလုံးက တော့ဒ်ကို မကြည့်ဘဲ စဲချီကို မဲပေးခဲ့ကြသည်။

ဒါက ဘယ်လိုဖြစ်တာလဲ။ တော့ဒ် ထိတ်လန့်ပြီး ဒေါသထွက်သွားတယ်။

စဲချီသည် သူ့မျက်နှာတွင် တောက်ပသော အပြုံးတစ်ခုရှိသည်။ သူ့ကိုမဲပေးတဲ့ အဆင့်မြင့် အရာရှိတိုင်းကို ပြုံးပြသည်။ သူ့မဲရေတွက်မှုကို ကျော်လွှားရန် မဖြစ်နိုင်တော့သည်ကိုကြည့်ပြီး စိတ်သက်သာရာ ရသွား၏။

ဒဲရိုလုပ်ကြံခံရသည်နှင့် တပြိုင်နက် စဲချီသည် ဆက်ခံမည့် ရွေးကောက်ပွဲသည် အခွင့်အရေးတစ်ခုဖြစ်ကြောင်း သဘောပေါက်ခဲ့သည်။ သူသည် သီးစီးရပ်စ်နှင့် တိတ်တဆိတ်ဆက်သွယ်ခဲ့ပြီး၊ သူ့ကို ရာထူးတိုးရန်အတွက် ကူညီရန်သဘောတူခဲ့သည်။ အပြန်အလှန်အနေဖြင့်၊ သူအောင်မြင်စွာ ခေါင်းဆောင်ဖြစ်လာပါက သူတို့အတွက် အကျိုးကျေးဇူးများစွာကို ကတိပြုခဲ့သည်။

အလူမီရာသည် သီးစီးရပ်စ်၏ လုပ်ဖော်ကိုင်ဖက်ဖြစ်သော်လည်း သီးစီးရပ်စ်သည် အလွန်ရန်လို၏။ သူတို့သည် အလူမီရာကို အတွင်းပိုင်းမှ တိတ်တဆိတ် ချုပ်ကိုင်ထားလိုပြီး သူ၏ရာထူးကို မကျေနပ်သော တတိယခေါင်းဆောင် စဲချီနှင့် အဆက်အသွယ်ရခဲ့သည်။ သီးစီးရပ်စ်သည် ၎င်းတို့၏ ဆက်ဆံရေးကွန်ရက်ကို အသုံးပြုခဲ့ပြီး စဲချီကို အခွင့်ကောင်းပေးရန်အတွက် အဆင့်မြင့်အရာရှိများစွာကို သတိရှိရှိ သိမ်းသွင်းခဲ့သည်။

မြောက်ပိုင်းအဖွဲ့မှ အိန်ဂျယ်တန်အတွက် သူသည် အခြေခံအားဖြင့် ရှိုးပွဲကြည့်ရန် ထိုနေရာတွင် ရှိနေသည်။ လူနည်းစုမှလွဲလို့ မြောက်ပိုင်းကလူတွေတောင် သူ့ကို မဲမပေးကြပေ။ သူမျက်နှာမှာ ကိုးရိုးကားရားဖြင့် ထိုင်ခုံမှာ ထိုင်နေသည်။

အိန်ဂျယ်တန်သည် မြောက်ပိုင်းအဖွဲ့မှ ကိုယ်စားလှယ်တစ်ဦးအဖြစ် ရွေးကောက်တင်မြှောက်ခံရသည်။ ခေါင်းဆောင်ရာထူးအတွက် တိုက်ပွဲဝင်ခြင်းကို အရှုံးမပေးချင်သော်လည်း အခွင့်အရေးမရှိသည်ကို သိ၏။ ထို့ကြောင့် သူသည် ထိုကိစ္စနှင့် ပတ်သက်၍ ခံစားချက်များ ရောထွေးနေသည်။

စဲချီ၏ မဲရေတွက်မှုသည် ရှေ့သို့ရောက်နေပြီဖြစ်ပြီး မကြာမီမှာ အမှတ်တစ်ဝက်ကို ကျော်လွန်သွားခဲ့သည်။ ရွေးကောက်ပွဲမှာ အတည်ဖြစ်သွားသည်။

"ဟားဟား၊ မင်းတို့ရဲ့ အားပေးမှုနဲ့ ချစ်ခြင်းအတွက် အားလုံးကို ကျေးဇူးတင်ပါတယ်။ စိတ်မပျက်စေရပါဘူး။” စဲချီသည် သူ့မျက်နှာပေါ်တွင် ပျော်ရွှင်မှုအပြည့်ဖြင့် မတ်တပ်ရပ်လိုက်သည်။ သူ့ကျေနပ်မှုကို လုံးဝမဖုံးကွယ်နိုင်ပေ။

ဒီတစ်ခါတော့ ရှောင်ကျင်းက ပြောလာသည်။ “စောင့်ပါဦး။”

လူတိုင်းသည် ၎င်းတို့၏ မျက်နှာပေါ်တွင် အကြည့်အမျိုးမျိုးဖြင့် ချက်ခြင်းကြည့်လိုက်ကြသည်။ ရှောင်ကျင်းသည် သြဇာကြီးသော ကိုယ်စားလှယ်လောင်းတစ်ဦး ဖြစ်သော်လည်း ယခုအချိန်အထိ ဘာမှမလုပ်ရသေးပေ။ သူဘာတွေစီစဉ်နေလဲဆိုတာကို အရမ်းသိချင်နေကြသည်။

"ဒုတိယခေါင်းဆောင် ရှောင်၊ မင်းမှာ ပြဿနာရှိလို့လား" စဲချီမှာ စိတ်လှုပ်ရှားသွားပြီး 'ဒုတိယခေါင်းဆောင်' ဟူသော စကားလုံးကို အလေးပေးပြောလိုက်သည်။

ရုတ်တရက် အဆင့်မြင့်အရာရှိကြီးများအတွက် မေ့မရနိုင်သော အသံတစ်ခု ရှောင်အဖွဲ့နယ်မြေမှ ထွက်ပေါ်လာသည်။

"ငါ့မှာ ပြဿနာရှိတယ်။"

လူတိုင်း၏ မျက်လုံးများ ပြူးကျယ်သွားပြီး သူတို့၏ အမူအရာများမှာ ထိတ်လန့်စရာအဖြစ်သို့ ပြောင်းလဲသွားသည်။ ဤအသံသည် Black Phantom ၏ အသံဖြစ်သည်ကို မှတ်မိကြသည်။

ရှောင်အဖွဲ့၏ အဖွဲ့ဝင်များသည် လုစုခွဲပေးလိုက်ကာ ဖုံးကွယ်ထားသည့် ဟန်ရှောင်းကို ပြသလိုက်သည်။ ဟန်ရှောင်းသည် အနက်ရောင်လေကာအင်္ကျီနှင့် အနက်ရောင်လက်အိတ်ကို ဝတ်ဆင်ထားသည်။ လက်နှစ်ဖက်ကို ပိုက်ထားပြီး အမူအရာ မပြောင်းလဲဘဲ ပြောလိုက်သည်။ “ရှောင်ကျင်းက ခေါင်းဆောင်ဖြစ်ဖို့ ပိုသင့်တော်တယ်”

စဲချီသည် အခိုက်အတန့်ကြာအောင် ကြက်သေ သေသွားပြီး အာရုံပြန်စိုက်နိုင်သွားသည်။ "ရှောင်ကျင်း၊ အပြင်လူတစ်ယောက်က ငါတို့မိသားစုကိစ္စတွေကို ဝင်စွက်ဖက်ခွင့်ပေးလိုက်တာ ဘယ်လောက်တောင် သတ္တိရှိနေတာလဲ။ မင်း စည်းကမ်းကို တမင်သက်သက် ဖောက်ဖျက်နေတာလား"

“Black Phantom က အပြင်လူမဟုတ်ဘူး။ သူက ငါတို့ ရှောင်အဖွဲ့ရဲ့ အကြီးအကဲ။ ငါ့သားသမီးတွေရဲ့ မွေးစားအဖေပဲ။”

ရှောင်ကျင်း၏ စကားဆုံးသည်နှင့် ရှောင်အဖွဲ့ခွဲမှ လူငယ်များအားလုံးသည် ဟန်ရှောင်းဆီသို့ ဦးညွှတ်ကာ လေ့ကျင့်ထားသကဲ့သို့ တပြိုင်နက်တည်း အော်လိုက်ကြသည်။ "မွေးစားအဖေ။"

အခြားသူများ အံ့အားသင့်သွားကြသည်။

ဘယ်လောက်အရှက်မရှိတာလဲ… တော့ဒ်၏ မျက်နှာက ‌တွန့်လိမ်နေသည်။

Black Phantom ၏ ယခင်လုပ်ဆောင်မှုများအရ၊ သူ၏ တည်ရှိမှုသည် အရာအားလုံးထက်သာလွန်ပြီး အလူမီရာ၏ အတွင်းပိုင်း ပြောင်းလဲမှုများကို လုံးဝဂရုမစိုက်ခဲ့ပေ။ ယခုမူ ရုတ်တရက် ဝင်ရောက်စွက်ဖက်နေသည်။

သူတို့စဉ်းစားကြည့်ပြီးနောက်မှာ သဘောပေါက်သွားကြ၏။ Black Phantom ကို သံသယဝင်ကြသောအခါ ရှောင်ကျင်းက သူ့အတွက် ပြောပေးတဲ့ တစ်ဦးတည်းသောလူဖြစ်ပြီး၊ လူသတ်သမားအစစ်အမှန်ကို နောက်ဆုံးမှာ ရှာဖွေတွေ့ရှိခဲ့သူမှာလည်း ရှောင်ကျင်းပဲဖြစ်သည်။ ထိုအရာက Black Phantom ရဲ့ နာမည်ကို ဖြေရှင်းပေးခဲ့၏။ သို့သော် ထိုအချိန်တွင် အခြားအဖွဲ့များ အားလုံးက အဆင့်မြင့်အရာရှိများထံမှ မဲများရယူရန် အာရုံစိုက်နေကြသည်။

ထို့ကြောင့် ရှောင်ကျင်းသည် Black Phantom နှင့် ထိုကိစ္စကြောင့် အဆက်အသွယ်ရခဲ့ပြီး၊ Black Phantom သည် ရှောင်ကျင်းကို ကူညီရန် ဆန္ဒရှိနေသည်။

ထို့အပြင် ရှောင်ကျင်းသည် ရှောင်အဖွဲ့နှင့် သံတမန်ဆက်ဆံရေးရှိစေရန် Black Phantom ကို ဆွဲဆောင်ရန် ကြီးမားသောစျေးနှုန်းဖြင့် သေချာပေါက်ပေးချေခဲ့သည်။

အခြားအဖွဲ့များသည် မပျော်ရွှင်ကြသော်လည်း၊ ရှောင်ကျင်းသည် ထိုသို့လုပ်ဆောင်ခြင်းဖြင့် Black Phantom သည် အလူမီရာ၏ မဟာမိတ်ဖြစ်လာသည်ဟု ဆိုလိုပြီး ရှောင်ကျင်းသည် အလူမီရာ၏ အလုံးစုံစွမ်းအားကို တိုးမြင့်စေခဲ့သည်ကိုတော့ မငြင်းနိုင်ပေ။

ဟန်ရှောင်းက ပေါ့ပေါ့ပါးပါးထိုင်ပြီး အန္တရာယ်ရှိတဲ့အကြည့်တွေနဲ့ နေရာတစ်ခုလုံးကို လိုက်ကြည့်လိုက်တယ်။

အဆင့်မြင့် အရာရှိကြီးများ အားလုံး ပြန်လှည့်သွားကြပြီး သူ့ကို မကြည့်ဝံ့ကြပေ။

စကားလုံးများမလိုအပ်ပေ။ ဟန်ရှောင်း၏ ရည်ရွယ်ချက်များသည် နေရာတွင် ထိုင်နေရုံဖြင့် ရှင်းလင်း၏။

အသံတိတ်ခြိမ်းခြောက်မှု။

လေထုက ကိုးရိုးကားရား ဖြစ်လာသည်။ မဲပေးပြီးသော အဆင့်မြင့်အရာရှိကြီးများသည် စိုးရိမ်တကြီးနှင့် အကြည့်ချင်း တိတ်တဆိတ် ဖလှယ်နေကြသည်။

နောက်ဆုံးတော့ အရာရှိကြီးတစ်ယောက်က ဒါကို မခံနိုင်တော့ပေ။ သူက ချွေးတွေကို သုတ်ပြီး ချီတုံချတုံနဲ့ ပြောသည်။ "ရှောင်ကျင်းက ခေါင်းဆောင်တစ်ယောက်အနေနဲ့ ပိုသင့်တော်တယ်လို့ ကျွန်တော် သေသေချာချာ စဉ်းစားပြီးပါပြီ။ ငါ့မဲကို ပြောင်းလို့ရမလား"

စည်းမျဥ်းအတိုင်းဆိုလျှင် မဲပြောင်းခွင့် မပြုပေ။ သို့သော် အစည်းအဝေးမှူး တော့ဒ် သည် သူ့စိတ်ထဲတွင် ကျိန်ဆဲနေသည်။ Black Phantom က သူတို့ရှေ့မှာ ရှိနေတာဆိုတော့ သူက မရဘူး မပြောဝံ့ပေ။ ထို့ကြောင့် စိတ်ပျက်လက်ပျက်ဖြင့် ခေါင်းညိတ်လိုက်သည်။

ပထမတစ်ယောက်ပြီးရင် ဒုတိယနဲ့ တတိယနောက်က လိုက်လာပြီး မကြာခင် ကျန်တဲ့သူတွေ ထွက်လာ၏။ ဟန်ရှောင်းသည် အခန်းတစ်ခန်းလုံးကို ဝေ့ဝဲကြည့်ရှုနေ၏။ သူ့မြင်ကွင်းထံ ဝင်လာသူ မည်သူမဆို ချက်ခြင်းပင် မဲကို ပြောင်းလဲလိုက်ကြသည်။ သူ့မျက်လုံးထဲက မှော်အစွမ်း ရှိနေသလိုပင်။

စဲချီကတော့ ရှုံးနိမ့်တာကို ဝန်မခံသေးပေ။ သူနောက်ဆုံးရုန်းကန်ချင်သော်လည်း ဟန်ရှောင်းသည် အလွန်စူးရှသော မျက်လုံးများဖြင့် သူ့နှလုံးသားကို ဖောက်ဝင်သွားမတတ်ကြည့်နေသည်။ သူ့စိတ်ထဲတွင် ထိတ်လန့်စိတ်များ ပြည့်နှက်နေပြီး ကြောက်‌ကြောက်ရွံ့ရွံ့ဖြင့် ပါးစပ်ကိုပိတ်ကာ လွန်ခဲ့သည့်အခိုက်အတန့်က သူပိုင်ဆိုင်ထားသောအရာမှာ လက်ချောင်းများကြားမှ လွတ်ထွက်သွားသည်ကို ကြည့်နေရသည်။

ရလဒ်မှာ သေချာ၏။ ရှောင်ကျင်းသည် မဲအရေအတွက် အမြောက်အမြားဖြင့် အနိုင်ရသွားသည်။

ရှောင်အဖွဲ့မှလူများသည် တောက်ပစွာ ပြုံးနေကြပြီး အခြားသူများကလည်း ရှောင်ကျင်းကို တစ်ယောက်ပြီးတစ်ယောက် ချီးကျူးဂုဏ်ပြုကြသည်။

ရှောင်အဖွဲ့၏ နည်းလမ်းများသည် အခြားအဖွဲ့များမှ လွန်စွာ စိတ်မသက်မသာဖြစ်စေသော်လည်း ရလဒ်သည် လက်မခံ၍ မရပေ။ ရှောင်ကျင်းသည် မိသားစု၏ အကြီးတန်းအဖွဲ့ဝင်တစ်ဦးဖြစ်ပြီး ပံ့ပိုးမှုများ အများအပြားပြုလုပ်ထားသည်။

ရှောင်ကျင်းက နောက်ဆုံးမှာ အနိုင်ရမယ်ဆိုတာ ဘယ်သူသိမလဲ။ တော့ဒ်၏ နှလုံးသားမှာ သွေးထွက်နေသည်။ မူလအဖွဲ့သည် ဤနှစ်များတစ်လျှောက်လုံး အလူမီရာကို ထိန်းချုပ်ထားခဲ့ပြီး ယခု ရုတ်တရက် ၎င်းတို့သည် အာဏာဆုံးရှုံးသွား၏။

ထိုနေ့မှစ၍ ပင်မဂိုဏ်းသည် တဖြည်းဖြည်း လက်အောက်ခံသာ ဖြစ်လာတော့မည်ဟု တော့ဒ်သိနေ၏။

ကိစ္စများ ပြေလည်သွားသည်ကိုမြင်တော့ ဟန်ရှောင်းထွက်သွားသည်။ လူအုပ်ကြီးသည် အလိုအလျောက် ကွဲထွက်သွားပြီး ရှောင်ကျင်းကို ဂုဏ်ပြုသည့် အဆင့်မြင့်အရာရှိကြီးများက သူထွက်သွားချိန်တွင် ရပ်တန့်ပြီး ဟန်ရှောင်းကို ကြည့်နေ၏။

ရှောင်ကျင်းသည် နောက်ဆုံးအနိုင်ရသူဖြစ်သော်လည်း အခြားသူများ၏အမြင်တွင် ဤအစည်းအဝေး၏ အဓိကလူမှာ Black Phantom ဖြစ်သည်။ သူလုပ်သမျှက ထွက်ပေါ်လာရုံမျှသာဖြစ်ပြီး ရှောင်ကျင်းရဲ့ အနေအထားကို ဆုံးဖြတ်လိုက်ပေးလိုက်သည်။ ဤသည်မှာ လွှမ်းမိုးသော ခွန်အား၏ စွမ်းအားဖြစ်သည်။ လူတွေက ရှောင်ကျင်းကို အရမ်းမနာလိုဖြစ်နေကြ၏။ Black Phantom သည် ရှောင်အဖွဲ့ခွဲတွင် ရှိနေသရွေ့ ရှောင်ကျင်း၏ အနေအထားသည် ထာဝရတည်ငြိမ်နေမည် ဖြစ်သည်။