ထွတ်ခေါင် ဆရာသခင်အဖွဲ့

ဝူး……ဝူး……ဝူး……

မီးလျှံသံ တောင်တန်းရဲ့ ကောင်းကင်ထက်က လေထုဟာ မြေပြင်ပေါ်ကနေ ထိုးတက်လာတဲ့ အပူလှိုင်းလုံးကြီးကြောင့် တွန့်လိမ်လာခဲ့ပါတယ် ။

ဟူး……ဟူး……ဟူး……

အဲသည် လေထု တွန့်လိမ်ရခြင်းရဲ့ အကြောင်းအရင်းကတော့ မြေပြင်ပေါ်ကနေပြီး လူငယ်သုံးယောက်ဟာ ကောင်းကင်ပေါ်ကို တစ်ရှိန်ထိုး ပျံတက်လာလို့ပါပဲ ။  သူတို့က  မိစ္ဆာသားရဲတွေရဲ့ ပစ်မှတ်ထား တိုက်ခိုက်ခံရမှာကို နည်းနည်းမှ စိုးရိမ်ကြောင့်ကြမှု ရှိတဲ့ပုံ မပေါ်ပါဘူး ။

"  ညီလေးဝူလည်း ပါလာခဲ့ပြီဆိုတော့  မီးလျှံသားမွှေး ဝံပုလွေကို ငါတို့ သေချာပေါက် အနိုင်ယူနိုင်မှာပဲ "

အဲသည်စကားကို  ပြောလိုက်သူကတော့ အဲသည်လူငယ် သုံးယောက်ထဲက  ခပ်ပိန်ပိန် ၊ နှုတ်ခမ်းချွန်ချွန် နဲ့ လူငယ်ပါပဲ ။ သူက ညီလေးဝူ ဆိုသူ ပါလာတာနဲ့ ပက်သက်ပြီး  အတော်လေး ကျေနပ်နေပုံ ရပါတယ် ။ သူ့ရဲ့ မျက်နှာပေါ်က အပြုံးဟာ အခုထက်ထိကို မပျောက်သေးပါဘူး ။

ဝါကြန့်ကြန့် အသားအရေကို ပိုင်ဆိုင်ထားတဲ့ ရောဂါသည်ပုံစံ လူငယ်ကလည်း ပံျသန်းနေရင်းနဲ့ ညီလေးဝူဆိုတဲ့ လူငယ်ကို စကား ပြောလိုက်ပါတယ် ။

" ညီလေးဝူက ဆရာသခင် မျှော်စင်ရဲ့ တတိယထပ်ကိုတောင် ကျော်ဖြတ်ခဲ့ပြီးပြီလေ ။ အဲသည်တော့ ညီလေးဝူက ထွတ်ခေါင် အဆင့် ဆရာသခင်တွေ ထဲမှာတောင်မှ အရမ်း အစွမ်းထက်တယ်လို့  ပြောလို့ ရနေပြီပေါ့ ။ ဟုတ်တယ်မလား "

သည်လူငယ် သုံးယောက်စလုံးကတော့ သက်တံနီဂိုဏ်းရဲ့ ထွတ်ခေါင် ဆရာသခင်အဆင့် တပည့်တွေပါပဲ ။ နှုတ်ခမ်းချွန်ချွန် လူငယ်နဲ့ ရောဂါသည် လူငယ်တို့ ရည်ညွှန်းပြောဆိုနေတဲ့ ညီလေးဝူ ဆိုတာကတော့  သက်တံနီဂိုဏ်းရဲ့ ကြယ်၇ပွင့် သံကျောက်တုံး ခန္ဓာကိုယ် အပြင်အား အရိုးတည်ဆောက်ပုံ ပိုင်ရှင်   ဝူရှန်းလန်ကို ဆိုလိုတာ ဖြစ်ပါတယ်  ။  သူတို့နှစ်ယောက်က မီးလျှံသားမွှေး ဝံပုလွေကို ရင်ဆိုင်ဖို့အတွက် ဝူရှန်းလန်းကို သွားရောက် အကူအညီတောင်းပြီး သည်မီးလျှံသံ တောင်တန်းကို  ခေါ်လာခဲ့တာပါ ။

ဝူရှန်းလန်က ခန္ဓာကိုယ် သန့်စင်ခြင်း လမ်းစဉ်ကို လျှောက်လမ်းတဲ့သူ ဖြစ်တဲ့အတွက် ကျင့်ကြံခြင်း အဆင့်တူတွေ ကြားထဲမှာ ခေါင်းတစ်လုံး သာနေသူ ဆိုရင်လည်း မမှားပါဘူး ။ ဒါကြောင့်လည်း  ရောဂါသည် လူငယ်က ဝူရှန်းလန်ဟာ ထွတ်ခေါင် အဆင့် ဆရာသခင်တွေ ထဲမှာတောင်မှ အရမ်း အစွမ်းထက်နေပြီလို့ ပြောခဲ့တာပါ ။

ဝူရှန်းလန်က ပြုံးလိုက်ပြီး ကျန်လူငယ် နှစ်ယောက်ကို ပြန်ပြောလိုက်ပါတယ် ။

" ကျွန်တော်လည်း မီးလျှံသားမွှေး ဝံပုလွေက ရင်ဆိုင်ရတာ မလွယ်ဘူးဆိုတဲ့ အကြောင်းကို ကြားဖူးပါတယ် ။ ကျွန်တော်က အခုမှ ဆရာသခင် မျှော်စင်ရဲ့ တတိယထပ်ကို ကျော်ဖြတ်လာနိုင်တာ ။ အဲသည်တော့  မီးလျှံသားမွှေး ဝံပုလွေကို သေချာပေါက် အနိုင်ယူနိုင်လိမ့်မယ်လို့  အာမ မခံဘူးနော် "

ဝူရှန်းလန်က မီးလျှံသားမွှေး ဝံပုလွေကို အနိုင်တိုက်ဖို့အတွက် ယုံကြည်ချက် မရှိတဲ့ပုံပါပဲ ။

" ညီလေးဝူ …… စိတ်မပူစမ်းပါနဲ့ ။ ညီလေးဝူက မီးလျှံသားမွှေး ဝံပုလွေကို ထိပ်တိုက်ရင်ဆိုင်ပြီး ထိန်းရုံ ထိန်းထားလိုက် ။ ကျန်တာကို အစ်ကိုတို့ ကြည့်လုပ်လိုက်မယ် "

ခပ်ပိန်ပိန် လူငယ်နဲ့ ရောဂါသည် လူငယ်တို့က ဝူရှန်းလန်ကို အာမခံလိုက်ပါတယ် ။

" ဟုတ်ပြီလေ ။ အဲဒါဆိုလည်း အဆင်ပြေပါတယ် "

ဂိုဏ်းတူအစ်ကို နှစ်ယောက်က အာမခံနေတဲ့အတွက် ဝူရှန်းလန်ကလည်း ဘာမှ ဆက်ပြီး မပြောတော့ပါဘူး ။

' မီးလျှံသားမွှေး ဝံပုလွေ …… မင်း သေဖို့သာ ပြင်ထားပေတော့ '

ခပ်ပိန်ပိန် လူငယ်နဲ့ ရောဂါသည် လူငယ်တို့က စိတ်ထဲကနေ ကြိမ်းဝါးလိုက်ကြပါတယ် ။

သာမန်အားဖြင့်ကတော့ ထွတ်ခေါင် ဆရာသခင် သုံးယောက်ကသာ အတွဲညီညီနဲ့ အပေးအယူမျှမျှ တိုက်ခိုက်နိုင်မယ် ဆိုရင် ထွတ်ခေါင် ဆရာသခင် အဆင့် အစွမ်းမျိုး ပိုင်ဆိုင်ထားတဲ့ မိစ္ဆာသားရဲ တစ်ကောင်ကို ကောင်းကောင်းကြီး ယှဉ်နိုင်နေပါပြီ ။

အခု သူတို့သုံးယောက်မှာက ခန္ဓာကိုယ် သန့်စင်ခြင်း လမ်းစဉ်ကို လျှောက်လမ်းတဲ့ ထွတ်ခေါင် ဆရာသခင်တစ်ယောက် ပါလာပါသေးတယ် ။ အဲသည်အတွက် သူတို့အနေနဲ့ မီးလျှံသားမွှေး ဝံပုလွေကို မသတ်ဖြတ်နိုင်စရာ  အကြောင်း မရှိပါဘူး ။

သည်လိုနဲ့ပဲ လူငယ်သုံးယောက်ဟာ မီးလျှံသံ တောင်တန်းရဲ့ အလယ်ဗဟိုကို ရောက်ရှိလာခဲ့ကြပါပြီ ။ သည်နေရာမှာတော့ လိုဏ်ဂူ အခေါင်းပေါက်တွေ အများကြီး ပါဝင်ပြီး အမြင့်ပေ နှစ်သောင်း ရှိတဲ့ တောင်တစ်လုံး ရှိနေပါတယ် ။ ရုတ်တရက် ကြည့်လိုက်မယ် ဆိုရင်တော့ သည်တောင်ကြီးက ပျားအုံ တစ်ခုလိုပါပဲ ။

သည်ပျားအုံ ပုံသဏ္ဌာန် တောင်ကြီးရဲ့ တောင်ထိပ်မှာရှိတဲ့ လိုဏ်ဂူတစ်ခုထဲကနေတော့ မီးခိုးတွေ အူထွက်နေပြီး အဲသည် မီးခိုးတွေကို ပေ၂၀၀၀ နီးပါး အရွယ်အစားရှိတဲ့ မိစ္ဆာသားရဲ တစ်ကောင်က စုပ်ယူနေပါတယ် ။ အဲသည် မိစ္ဆာသားရဲရဲ့ ခန္ဓာကိုယ်ပေါ်မှာ ရှိနေတာကတော့ အလျှံတညီးညီး တောက်လောက်နေတဲ့ အနီရောင် သားမွှေးတွေပါပဲ ။

" ငါတို့ ကံကောင်းပြီဟေ့ ။အဲဒါက မီးလျှံသားမွှေး ဝံပုလွေပဲ ။ ကြည့်ရတာ သည်ကောင်က လိုဏ်ဂူထဲမှာ ရှိတဲ့ မီးလျှံ အဆီအနှစ်တွေကို စုပ်ယူနေပုံ ရတယ် "

ခပ်ပိန်ပိန် လူငယ်က ဝမ်းသာအားရ ပြောလိုက်ပါတယ် ။

မီးလျှံသားမွှေး ဝံပုလွေက ပုံမှန်အားဖြင့် အပြင်ကို ထွက်လာလေ့ မရှိပါဘူး ။ သူက သူ့ရဲ့ အချိန် အများစုကို   သည်ပျားအုံ ပုံသဏ္ဌာန်တောင်ကြီးရဲ့ လိုဏ်ဂူတွေထဲမှာ နေပြီး ကုန်ဆုံးလေ့ ရှိတာပါ ။

အူး……ဝူး……

သူတို့သုံးယောက်က မီးလျှံသားမွှေး ဝံပုလွေကို မြင်တွေ့လိုက်သလို   မီးလျှံသားမွှေး ဝံပုလွေကလည်း သူတို့သုံးယောက်ကို မြင်တွေ့သွားခဲ့ပါပြီ ။ ဒါပေမဲ့လည်း မီးလျှံသားမွှေး ဝံပုလွေက ထွက်ပြေး မသွားခဲ့ပါဘူး ။

မီးလျှံသားမွှေး ဝံပုလွေက ရန်သူရဲ့ အကြောင်းကို ကောင်းကောင်းကြီး အာရုံခံစားနိုင်တဲ့အတွက် အခု ရောက်လာတဲ့ လူသား သုံးယောက်ဟာ သူ့လို အစွမ်းမထက်ဘူး ဆိုတာကို သိသွားတဲ့ ပုံပါပဲ ။

အူ……ဝူး………

မီးလျှံသားမွှေး ဝံပုလွေက ခြေချောင်းတွေကို ဆန့်ထုတ်လိုက်ပြီး ကောင်းကင်ကို မော့ကြည့်ကာ အားရပါးရ အူလိုက်ပါတယ် ။ သူ့ရဲ့ မီးလျှံသားမွှေးတွေကလည်း နဂိုကထက် အရောင်တောက်လာခဲ့ပါပြီ ။

" သတ် "

ဟူး……ဟူး……ဟူး……

လူငယ်သုံးယောက်က မီးလျှံသားမွှေး ဝံပုလွေဆီကို တစ်ဟုန်ထိုး ပျံသန်းဝင်ရောက် သွားကြ ပါတော့တယ် ။သူတို့က  သည်အထိ ရောက်လာပြီးမှတော့ ဘာမှမပါဘဲ လက်ချည်းသက်သက် ပြန်မသွားလိုပါဘူး ။

မီးလျှံသားမွှေး ဝံပုလွေကလည်း သူ့ရဲ့ နောက်ကျောပေါ်က အနီရောင် တောင်ပံတွေကို ဆန့်ထုတ်ပြီး လူငယ်သုံးယောက်ဆီကို ပျံသန်းသွားခဲ့ပါပြီ ။ သူ့ရဲ့ အနီရောင် မျက်လုံးတွေထဲမှာတော့ သတ်ဖြတ်ခြင်း အငွေ့အသက်တွေ အပြည့်ပါပဲ ။

" ကိုးနဂါး လက်သည်း "

ဝူရှန်းလန်ကတော့ ပထမဆုံး အနေနဲ့ သွေးဝံပုလွေ ကောင်းကင်ခြေလှမ်းကို အသက်သွင်းလိုက်ပြီး သွေးရောင် ဝံပုလွေ ဝိညာဉ် တစ်ခုကို ဆင့်ခေါ်လိုက်ပါတယ် ။ သူ့ရဲ့ လုပ်ဆောင်မှုက အဲသည်မှာတင် ရပ်တန့်မနေပါဘူး ။ကောင်းကင်ယံမှာ  သွေးဝံပုလွေ ဝိညာဉ် ဖြစ်တည်လာပြီးမှ သူက ကိုးနဂါး လက်သည်းကို သုံးပြီး မီးလျှံသားမွှေး ဝံပုလွေကို ကုတ်ချလိုက်ပါတယိ ။

ဂါး…… ဂရား……

သွေးဝံပုလွေ  ဝိညာဉ်ဟာ ခေါင်းကိုးလုံး နဂါးဝိညာဉ်နဲ့အတူ ပေါင်းစပ်သွားပြီး မီးလျှံသားမွှေး ဝံပုလွေဆီကို တိုးဝင်သွားခဲ့ပါပြီ ။

ဘန်း……

မီးလျှံသားမွှေး ဝံပုလွေဟာ ဝူရှန်းလန်ရဲ့ ကိုးနဂါး လက်သည်းကြောင့် ပံျသန်းနေရာကနေ  တစ်ချက် တန့်ခနဲ ဖြစ်သွားခဲ့ပါတယ် ။

" ရေခဲစွယ် ဆေဘာ "

ခပ်ပိန်ပိန် လူငယ်ကလည်း တုံ့ဆိုင်းနေခြင်း မရှိပါဘူး ။ သူက သူ့ရဲ့ လခြမ်းကွေး ဆေဘာကို ဆွဲထုတ်လိုက်ပြီး မီးလျှံသားမွှေး ဝံပုလွေကို ခုတ်ပိုင်းပစ်လိုက်ပါတယ် ။

ရွှီး……ရွှီး……ရွှီး……ရွှီး……

ရေခဲအစွယ်တွေဟာ သူ့ရဲ့ လခြမ်းကွေး ဆေဘာကနေ ဖြစ်တည်လာပြီး  မီးလျှံသားမွှေး ဝံပုလွေဆီကို တိုးဝင်သွားခဲ့ပါပြီ ။ အဲသည်အစွယ်တွေက သားရဲကြီး တစ်ကောင်ရဲ့ အစွယ်တွေလိုပါပဲ ။

" ဆီးနှင်းဝိညာဉ် ဓား "

ရောဂါသည် လူငယ်ကလည်း သူ့ရဲ့ ဓားရှည်ကို ဆွဲထုတ်ပြီး တိုက်ခိုက်ထားခဲ့ပါပြီ ။

ဝေါ……ဝေါ……ဝေါ……

သူ့ရဲ့ ဓားချက်ကတော့ ဆီးနှင်းမိုးတွေကို ဖြစ်တည်စေခဲ့ပါတယ် ။ အဲသည်ဆီးနှင်းမိုးတွေဟာ မီးလျှံသားမွှေး ဝံပုလွေရဲ့ အထက်မှာ ဖြစ်တည်လာခဲ့တာ ဖြစ်ပြီး  မီးလျှံသားမွှေး ဝံပုလွေရဲ့ ခန္ဓာကိုယ် ထိလိုက်တာနဲ့ တစ်ပြိုင်နက် ဆီးနှင်းတွေက ဓားချီတွေ အဖြစ်ကို ပြောင်းသွားကာ မီးလျှံသားမွှေး ဝံပုလွေရဲ့ ခန္ဓာကိုယ်ကို လှီးဖြတ်ကုန်ပါတယ် ။

အာ……ဝူး……

ဝုန်း……ဝုန်း……ဝုန်း……

မီးလျှံသားမွှေး ဝံပုလွေက သူ့ရဲ့ တောင်ပံကို တစ်ချက် ခတ်လိုက်တဲ့ နောက်မှာတော့ ဆီးနှင်းမိုးတွေဟာ ပျက်ပြယ်သွားခဲ့ရပါပြီ ။ အကြောင်းအရင်းကတော့ မီးလျှံသားမွှေး ဝံပုလွေရဲ့ တောင်ပံခတ်ချက်ကနေ မီးလျှံတွေ ဖြစ်တည်လာပြီး အဲသည် မီးလျှံတွေက ဆီးနှင်းမိုးတွေကို ပေါက်ကွဲသွားစေလို့ပါပဲ ။

ဖန်း……

မီးလျှံသားမွှေး ဝံပုလွေရဲ့ တိုက်ခိုက်မှုက မပြီးသွားသေးပါဘူး ။ သူက တောင်ပံကို နောက်ထပ်တစ်ချက် ထပ်ပြီး ခတ်လိုက်ပြန်ပါတယ် ။

ရွှီး……ရွှီး……ရွှီး……ရွီှီး……

သည်တစ်ခါ မီးလျှံသားမွှေး ဝံပုလွေရဲ့ တောင်ပံခတ်မှုကနေ ဖြစ်တည်လာတာကတော့ ပုံရိပ်ယောင် မီးလျှံသားမွှေးတွေပါပဲ ။ အဲသည် မီးလျှံသားမွှေးတွေက အရှိန်အဟုန် ပြင်းစွာနဲ့ လူငယ် သုံးယောက်ဆီကို တိုးဝင်သွားပါတော့တယ် ။

ဘန်း……ဘန်း……ဘန်း……ဘန်း.……

ခန္ဓာကိုယ် အပြင်အား ပညာရှင် ဖြစ်တဲ့ ဝူရှန်းလန်က သည်မီးလျှံသားမွှေးတွေရဲ့ တိုက်ခိုက်ကို မမှုပေမယ့်လည်း ကျန်တဲ့ လူငယ်နှစ်ယောက်ကတော့ တောင့်မခံနိုင်ကြပါဘူး ။ သူတို့ရဲ့ ချီတွေနဲ့ သွေးလည်ပတ်မှုတွေက မီးလျှံသားမွှေးတွေရဲ့ တိုက်ခိုက်မှုကြောင့် ကစဉ့်ကလျား ဖြစ်သွားခဲ့ပါပြီ ။

" သေစမ်း …… သည်မီးလျှံသားမွှေး ဝံပုလွေက ငါတို့ကြားထားတာထက် ပိုအစွမ်း ထက်နေတာပဲ "

ခပ်ပိန်ပိန် လူငယ်က ခပ်တိုးတိုး ညည်းတွားလိုက်ပါတယ် ။ သူ့ရဲ့ မျပ်နှာကတော့ သိပ်ပြီး မကောင်းလှပါဘူး ။

" ကျွန်တော် သည်ကောင့်ကို ထိပ်တိုက် ရင်ဆိုင်လိုက်မယ် ။ အစ်ကိုတို့ နှစ်ယောက်ကတော့ ချက်ကောင်းတွေ့မှ ဝင်တိုက်ကြတော့ "

စကားဆုံးတဲ့ နောက်မှာတော့ ဝူရှန်းလန်က မီးလျှံသားမွှေး ဝံပုလွေကို ထိပ်တိုက်ရင်ဆိုင်ဖို့ ထွက်သွားခဲ့ပါပြီ ။ သူက မီးလျှံသားမွှေး ဝံပုလွေရဲ့ မီးလျှံသားမွှေးတွေကို သူ့ရဲ့  ချီဝိညာဉ်နဲ့ ကာကွယ်နိုင်တဲ့အတွက် တစ်ယောက်ချင်း တိုက်ရမှာကို လုံးဝ မကြောက်ပါဘူး ။

" အိုး…… ဟိုဘက်မှာ တိုက်ပွဲတစ်ခု ဖြစ်နေပါလား "

လီဖူချန်းက ဝူရှန်းလန်တို့ တိုက်ပွဲကို အာရုံခံမိ သွားခဲ့ပါတယ် ။ သူကတော့ တိုက်ပွဲဖြစ်ရာ နေရာနဲ့ မိုင်ပေါင်းတစ်ထောင် အကွာအဝေးမှာ ရှိနေတာပါ ။ ဒါပေမဲ့ သူက ဝှူရှန်းလန်တို့ကို ဘယ်သူတွေမှန်း သေသေချာချာ မသိပါဘူး ။

လီဖူချန်း အတွက်ကတော့  ဒါက လူငယ်သုံးယောက် နဲ့ မိစ္ဆာသားရဲ တစ်ကောင်ရဲ့ တိုက်ပွဲပါပဲ ။ သူ့ရဲ့ အသိစိတ်အာရုံက အရမ်းကို ထက်မြက်လွန်းနေတဲ့အတွက် လီဖူချန်းဟာ တိုက်ပွဲကို အသေးစိတ် ကြည့်မြင်နိုင်ပါတယ် ။

" အိုး…… သူတို့ သုံးယောက်စလုံး ဆရာသခင်မျှော်စင် တတိယထပ်က ပုံရိပ်ယောင် ဓားသမားထက် အစွမ်းထက်ကြတာပဲ ။ ကြည့်ရတာတော့  သူတို့အားလုံးက ထွတ်ခေါင် ဆရာသခင်တွေ ဖြစ်ရမယ် "

လီဖူချန်းက တိုက်ပွဲကို အကဲခတ်နေရင်းနဲ့ သည်လူငယ် သုံးယောက်ဟာ သက်တံနီ ဂိုဏ်းက ထွတ်ခေါင် ဆရာသခင်တွေ ဆိုတာကို ရိပ်မိလိုက်ပါတယ် ။

" ဒါဆို…… သည်သားရဲကလည်း ……"

ထွတ်ခေါင် ဆရာသခင် သုံးယောက်တောင် ပေါင်းပြီး တိုက်ခိုက်နေရတဲ့ သားရဲကတော့  သေချာပေါက် ထွတ်ခေါင် ဆရာသခင် အဆင့်မှာ ရှိတဲ့ မိစ္ဆာသားရဲပါပဲ ။ ဒါကိုတော့ ရှည်ရှည်ဝေးဝေး တွေးနေစရာ မလိုပါဘူး ။

" အင်း…… ဂိုဏ်းတူအစ်ကို ဝူရှန်းလန်က အဲသည် မိစ္ဆာသားရဲကို ထိပ်တိုက် ရင်ဆိုင် ပေးထားလို့ ကျန်တဲ့ ဂိုဏ်းတူအစ်ကို နှစ်ယောက်က ခံသာနေတာပဲ ။ မဟုတ်လို့ကတော့ သူတို့နှစ်ယောက် ဒုက္ခများနေလောက်ပြီ "

တိုက်ပွဲကို သေသေချာချာ အကဲခတ်ပြီးသွားတဲ့ နောက်မှာတော့ လီဖူချန်းက ဝူရှန်းလန်ကို မှတ်မိသွားပါတော့တယ် ။

သက်တံနီဂိုဏ်းရဲ့ တပည့်တွေထဲမှာဆိုရင် သွေးဝံပုလွေ ကောင်းကင်ခြေလှမ်း ကျင့်စဉ်ကို လေ့ကျင့်တဲ့သူက အနည်းငယ်လောက်သာ ရှိတာပါ ။ အဲသည် လူအနည်းငယ်ထဲမှာမှ ဝူရှန်းလန်က ပိုပြီး ကျော်ကြား ထင်ရှားပါတယ် ။

လီဖူချန်းက ဝူရှန်းလန်တို့ကို သွားပြီးတော့ မကူညီခဲ့ပါဘူး ။ ဘာဖြစ်လို့လဲဆိုတော့ သူ့အဆင့်နဲ့ သွားပြီး ကူညီလည်း ဘာမှ အရာရောက်မှာ မဟုတ်လို့ပါပဲ ။ သူက အခုမှ လက်ရွေးစင် ဆရာသခင် အဆင့်မှာသာ ရှိသေးတာ မဟုတ်ပါလား ။

အဲသည်အတွက် သူက အေးအေးဆေးဆေးပဲ တိုက်ပွဲကို လေ့လာသုံးသပ် နေပါတယ် ။

သည်တိုက်ပွဲက လီဖူချန်းကို ထွတ်ခေါင်အဆင့် ဆရာသခင်တွေရဲ့ အစွမ်းကို ပိုပြီး နားလည် သဘောပေါက်စေပါတယ် ။ တကယ်လို့သာ နောင်တစ်ချိန်မှာ သူ့အနေနဲ့   ထွတ်ခေါင်အဆင့် ဆရာသခင်တွေနဲ့ ကြုံခဲ့မယ် ဆိုရင်တော့ လီဖူချန်းဟာ သူတို့ရဲ့ အစွမ်းကို မှားပြီး အကဲဖြတ်စရာ အကြောင်း မရှိတော့ပါဘူး ။

" ဂိုဏ်းတူအစ်ကိုဝူရဲ့ ခန္ဓာကိုယ် အပြင်အား ကျင့်ကြံခြင်းက အတော်လေး ကြောက်စရာ ကောင်းနေပြီပဲ ။ သူ့ရဲ့ တိုက်ခိုက်နိုင်စွမ်းက    တတိယထပ်မှာရှိတဲ့ ပုံရိပ်ယောင် ဓားသမားထက် အများကြီး သာနေပြီ ။ ခံနိုင်ရည် အပိုင်းမှာဆိုရင်လည်း သူက မဟာ ဆရာသခင်တွေထက် သာနေသေးတယ် ။ တကယ့် သူသေ၊ကိုယ်သေ တိုက်ပွဲတွေမှာ ဆိုရင် မဟာ ဆရာသခင် တစ်ပါးတောင်မှ  ဂိုဏ်းတူအစ်ကိုဝူကို အချိန်တိုအတွင်းမှာ သတ်နိုင်မှာ မဟုတ်ဘူး "

လီဖူချန်းကိုယ်တိုင်က ခန္ဓာကိုယ် သန့်စင်ခြင်း လမ်းစင်ကို လျှောက်လမ်းသူ ဖြစ်တဲ့အတွက် ခန္ဓာကိုယ် အပြင်အား ပညာရှင်တွေဟာ ဘယ်လောက် ကြောက်စရာ ကောင်းသလဲ ဆိုတာကို သူ့အနေနဲ့ ကောင်းကောင်းကြီး သိထားပါတယ် ။ ခန္ဓာကိုယ် အပြင်အား ပညာရှင်တွေကို သတ်ရတာက မိစ္ဆာတွေ ၊ မိစ္ဆာသားရဲတွေကို သတ်ရသလိုပါပဲ ။တကယ်လို့ သတ်ချင်တဲ့လူက  ခန္ဓာကိုယ် အပြင်အား ပညာရှင်တွေထက် အစွမ်းထက်နေရင်တောင်မှ သူတို့ကို သတ်ဖြတ်နိုင်ဖို့အတွက်  ခဲယဉ်းလွန်းလှပါတယ် ။

" ပိန်ညောင်ညောင် ဂိုဏ်းတူအစ်ကိုရဲ့ ဆေဘာဓားသိုင်းကလည်း အရမ်း အစွမ်းထက်တာပဲ ။ တိုက်ခိုက်နိုင်စွမ်းမှာ ဆိုရင် သူက ဂိုဏ်းတူအစ်ကို ဝူရှန်းလန်ထက်တောင် ၃၀ရာခိုင်နှုန်းလောက် ပိုအားကောင်းနေသေးတယ် ။ ရောဂါသည်လို ဂိုဏ်းတူအစ်ကိုကတော့ ငါနဲ့ တူတယ် ။ သူ့ရဲ့ ရေခဲတာအို ဓားသိုင်းက အရမ်း မာယာများတယ် "

လီဖူချန်းကတော့ တိုက်ပွဲကို ပျော်ပျော်ကြီး လေ့လာ အကဲခတ်နေပါတယ် ။

ဝုန်း……ဝုန်း……ဝုန်း……

ဘန်း…… ဘန်း……

တိုက်ပွဲကတော့ တဖြည်းဖြည်း အရှိန်တက်လာခဲ့ပါပြီ ။ တိုက်ပွဲ အချိန် ကြာလာတာနဲ့အမျှ ဝူရှန်းလန်တို့ သုံးယောက်က မီးလျှံသားမွှေး ဝံပုလွေကို ဖိနှိပ်လာနိုင် ခဲ့ပါတယ် ။သူတို့အနေနဲ့ အခုလို ဖိနှိပ်နိုင်ရတဲ့ အကြောင်းအရင်းကတော့ ဝူရှန်းလန်က  မီးလျှံသားမွှေး ဝံပုလွေကို ထိပ်တိုက် ရင်ဆိုင်ပေးထားလို့ပါပဲ ။ သည်အချက်ကိုတော့ လုံးဝ ယုံမှားသံသယ ဝင်စရာ မရှိပါဘူး။

" အင်း…… သည်အတိုင်း ဆိုရင်တော့  ဂိုဏ်းတူအစ်ကို ဝူရှန်းလန်တို့ဘက်က နိုင်ဖို့ အခွင့်အရေး များနေပြီ ။မီးလျှံသားမွှေး ဝံပုလွေက ဝှက်ဖဲတွေ ထုတ်မသုံးရင်တော့ သေချာပေါက် ရှုံးတော့မှာပဲ "

လီဖူချန်းက တိုက်ပွဲကို ကြည့်နေရင်းနဲ့ တွေးနေမိပါတယ် ။

အူ……ဝူး………

လီဖူချန်း တွေးနေစဉ်မှာပဲ မီးလျှံသားမွှေး ဝံပုလွေက ကောင်းကင်ကို မော့ကြည့်ပြီး ဆွဲဆွဲငင်ငင် တစ်ချက် အူလိုက်ပါတယ် ။အူသံအဆုံးမှာတော့ မီးလျှံသားမွှေး ဝံပုလွေရဲ့ ကျောပေါ်က အတောင်ပံတွေဟာ သူ့နေရာသူ ပြန်ရောက်သွားခဲ့ပါပြီ ။တစ်ချိန်တည်းမှာပဲ မီးလျှံသားမွှေး ဝံပုလွေရဲ့ ဦးခေါင်းထက်မှာ ဧရာမ မီးလျှံတောင်ပံတစ်စုံ ပေါ်လာခဲ့ပါတယ် ။

ရွှီး……ရွှီး……ရွှီး……ရွှီး……

မျက်စိတစ်မှိတ် အတွင်းမှာပဲ အဲသည် မီးလျှံတောင်ပံ တစ်စုံက မရေမတွက်နိုင်တဲ့ မီးလျှံတောင်ပံ အသေးစားလေးတွေအဖြစ် ပြောင်းသွားပြီး ဝူရှန်းလန်တို့ သုံးယောက်ကို တရကြမ်း တိုက်ခိုက်ပါတော့တယ် ။

ဘန်း.……ဘန်း……ဘန်း……ဘန်း………

ဖြစ်ပေါ်လာတဲ့ ပေါက်ကွဲမှုတွေကတော့ လုံးဝကို မရပ်မနားပါပဲ ။ ဝူရှန်းလန်ကတော့ သည်မီးလျှံတောင်ပံတွေရဲ့ တိုက်ခိုက်မှုကြောင့် ဘာမှ မဖြစ်ခဲ့ပါဘူး ။ ဒါပေမဲ့လည်း ကျန်တဲ့ လူငယ် နှစ်ယောက်ကတော့ သွေးသံ သရဲရဲ ၊ ဒဏ်ရာ ဗရပွ ဖြစ်နေခဲ့ပါပြီ ။

" မိုင်တစ်ထောင် အေးခဲစေ "

ရောဂါသည် လူငယ်ကတော့ သူ့ရဲ့ ဒဏ်ရာတွေကို ဂရုမစိုက်တဲ့ ပုံပါပဲ ။ သူက သူ့ရဲ့ ဆီးနှင်းရေခဲ နတ်ဘုရားစွမ်းရည်ကို အသက်သွင်းလိုက်ပြီး မီးလျှံသားမွှေး ဝံပုလွေကို ပြန်တိုက်လိုက်ပါတယ် ။

ဟူး……ဟူး……ဟူး………

ပတ်ဝန်းကျင် တစ်ခုလုံးကိုတော့ ရေခဲတွေက ကြီးစိုးသွားခဲ့ပါပြီ ။

ရောဂါသည် လူငယ်ရဲ့ နတ်ဘုရားစွမ်းရည်ကိုတော့ မီးလျှံသားမွှေး ဝံပုလွေတောင် မခံနိုင်ခဲ့ပါဘူး ။ မီးလျှံသားမွှေး ဝံပုလွေရဲ့ ခန္ဓာကိုယ်ပေါ်က မီးတောက် ၊ မီးလျှံတွေဟာ ဆီးနှင်းရေခဲ ချီတွေကြောင့် ငြိမ်းသတ်သွားပြီး မီးလျှံသားမွှေး ဝံပုလွေ ကိုယ်တိုင်ဟာလည်း ရေခဲရုပ်တစ်ခု အသွင် ပြောင်းသွားခဲ့ပါတယ် ။

" လေသင်တုန်း ဓားသွား "

ခပ်ပိန်ပိန် လူငယ်ရဲ့ လှုပ်ရှားမှုတွေကလည်း လုံးဝ နှေးကွေးနေခြင်း  မရှိပါဘူး ။ သူက လေရူး နတ်ဘုရားစွမ်းရည်ကို ထုတ်သုံးပြီး လေရူး စွမ်းအားတွေနဲ့ မီးလျှံသားမွှေး ဝံပုလွေကို တိုက်ခိုက်လိုက်ပါတယ် ။

ရွှမ်း……

လေထုထဲကနေ ဖြစ်တည်လာတဲ့ လခြမ်းကွေးသဏ္ဌာန် အစိမ်းရောင် လေသင်တုန်း ဓားသွားက မီးလျှံသားမွှေး ဝံပုလွေကို ခုတ်ပိုင်းပစ်လိုက်ပါပြီ ။ အဲသည် ခုတ်ပိုင်းချက်က လေဟာနယ် ဟင်းလင်းပြင်ကိုတောင် ပိုင်းဖြတ်သွားသလားလို့တောင် ထင်မှတ်ရပါတယ် ။

သည်လူငယ် နှစ်ယောက်က လက်တွဲပြီး တိုက်ခိုက်လာတာ အတော်လေး ကြာနေပုံပါပဲ ။ သူတို့ရဲ့ တိုက်ခိုက်မှုတွေက အပိုအလိုမရှိ၊ ကွက်တိကျလွန်း နေပါတယ် ။

( အမှားပြင်ဆင်ချက်  - အပိုင်း ၄၈၈ နဂါးရေကန်  မှာတုန်းက ဝူရှန်းလန်ကို  ဂိုဏ်းတူအစ်မ ၊ လုဝမ်ကို ဂိုဏ်းတူအစ်ကို ဆိုပြီး မှားရေးထားမိပါတယ် ။ ကျေးဇူးပြုပြီး  ဝူရှန်းလန်ကို ဂိုဏ်းတူအစ်ကို ၊ လုဝမ်ကို ဂိုဏ်းတူအစ်မလို့  ပြင်ဆင် ဖတ်ရှုပေးကြပါရှင်။)

***