ဆေးဝါးပညာရှင် ရီရယ့်ချင်း

ရဟတ်ယာဉ်သည် လူနှစ်ယောက်ကို ခိုလှုံရေးစခန်း ၃သို့ သယ်ဆောင်သွားသည်။

လမ်းခရီးတွင် ရီရယ့်ချင်းသည် သူမကံကြမ္မာကို လက်ခံလိုက်သလိုမျိုး အလွန်တိတ်ဆိတ်နေသည်။ မရဏခေါင်းလောင်းကျွန်းတွင် ထောင်သွင်းအကျဉ်းချခြင်းသည် သူမအား လွတ်လပ်မှု မရှိသည့်ခံစားချက်ကို ရင်းနှီးစေခဲ့သည်။ ၎င်းသည် သူမအတွက် အကျဉ်းခန်းတစ်ခုမှ တစ်ခုသို့ ကူးသွားခြင်းဖြစ်ပြီး အနည်းဆုံး သူမအပေါ် ဆက်ဆံရေးသည် မရဏခေါင်းလောင်းကျွန်းတွင်ရှိစဉ်ကထက် Black Phantom ဟုခေါ်သော ဤလူက ပိုကောင်းမည်ဖြစ်သည်။

Black Phantom ၊ ဒီလိုလူကို တစ်ခါမှ မကြားဖူးဘူး၊ ရီရယ့်ချင်းက တွေးမိနေသည်။ သူမသည် နှစ်ပေါင်းများစွာ အကျဉ်းချခံခဲ့ရပြီး ပြင်ပကမ္ဘာတွင် ဖြစ်ပျက်နေသည့် အပြောင်းအလဲများနှင့် ပတ်သက်၍ သတင်းအချက်အလက်မှာ အလွန်နည်းပါးခဲ့သည်။ သူမသည် မကြာသေးမီနှစ်များအတွင်း ဖြစ်ပျက်ခဲ့သော အဖြစ်အပျက်များကို သူမ၏ လက်ပ်တော့ပ်ပေါ်မှ ကြည့်ကာ Black Phantom ဟူသော အမည်သည် လွန်ခဲ့သော တစ်နှစ်ခွဲခန့်က ပထမဆုံး ပေါ်ထွက်ခဲ့သည်ကို သဘောပေါက်သွားသည်။

မယုံနိုင်စရာပဲ။

တစ်နှစ်ခွဲအတွင်းမှာပဲ ဒီနာမည်က စူပါစတားတစ်ယောက်လို ကျော်ကြားလာခဲ့သည်။ သူ၏ စွမ်းအားသည် မရဏခေါင်းလောင်းကျွန်းရှိ အလွန်အန္တရာယ်များသော ရာဇ၀တ်ကောင်များထက် ပိုကြောက်စရာကောင်းပြီး ၎င်းတို့အားလုံးမှာ ကျော်ကြားသော ရာဇ၀တ်ကောင်များဖြစ်သည်။

ရီရယ့်ချင်းကို အကြီးအကျယ် ထိတ်လန့်စေသည့် အချက်အလက်တစ်ခု ရှိခဲ့သည်။ သူမထောင်မကျမီ အလွန်အားကောင်းခဲ့သော ဂျာမီနယ်အဖွဲ့အစည်းသည် ပျက်စီးခြင်းလမ်းကြောင်းပေါ်သို့ တွန်းပို့ခံခဲ့ရသည်။

အကြောင်းပြချက်က သာမာန်သစ္စာဖောက်တစ်ယောက်ကြောင့်သာ ဖြစ်သည်။

ထိုသတင်းကို သူမမြင်လိုက်တဲ့အခါ ရီရယ့်ချင်းဟာ သူ့မျက်လုံးတွေကို မယုံနိုင်ဘဲ၊ အလွန်ကြာကြာ တိတ်ဆိတ်နေပြီးနောက်မှာ ဒီအချက်အလက်တွေကို တွေးတောနေ၏။

သူမ၏ စိတ်ခံစားမှုများ ရောထွေးသွားကာ အဆုံးတွင် သက်ပြင်းတစ်ချက် ချလိုက်သည်။

ကမ္ဘာကြီးက အမြဲပြောင်းလဲနေသည်။ နှစ်အနည်းငယ်ကြာ ထောင်ကျပြီးနောက် ပြင်ပကမ္ဘာသည် လုံးဝခြားနားသွားခဲ့သည်။

ပြီးတော့ သတင်းတွေမှာ ဖော်ပြထားသည့် 'ဂြိုလ်သား' ဆိုတာ ဘာကြီးလဲ။

ခိုလှုံရေးစခန်း ၃ကို မြင်လိုက်ရတော့ ရီရယ့်ချင်းသည် လက်တော့ပ်ကို ချလိုက်ပြီး ပြတင်းပေါက်မှ လှမ်းကြည့်လိုက်သည်။ အံ့အားသင့်မှုက သူမမျက်နှာပေါ်တွင် ပေါ်လာသည်။ “ဒါဆို ဒီဆောက်လုပ်ရေး ဧရိယာက ငါတို့ သွားရမယ့်နေရာပေါ့။ Black Phantom ခိုလှုံရေးစခန်း ၃… ခိုလှုံရေးစခန်းဆိုတာ ဘာလဲ”

ဟန်ရှောင်းက ခပ်ဖျော့ဖျော့ပြုံးကာ ပြောလိုက်သည်။ "မင်းသိစရာတွေ အများကြီးကျန်သေးတယ်"

"ငါသိတယ်။" ရီရယ့်ချင်းခေါင်းညိတ်ပြသည်။ သူမက ရှုပ်ပွနေသော ဆံပင်များကို လှန်လိုက်ပြီး တိုးတိုးလေးပြောသည်။ “ဒီမှာ လုံခြုံတယ် မဟုတ်လား”

ဟန်ရှောင်းက ပြန်မပြောပေ။ ထို့နောက် ခိုလှုံရေးစခန်း ၃ကို သူ့မျက်လုံးများဖြင့် ညွှန်ပြပြီး သူမသည် သူမဖာသာ ရှာဖွေသင့်သည်ဟု ဆိုလိုသည်။ ရီရယ့်ချင်းသည် အင်တာနက်ပေါ်တွင် 'ခိုလှုံရေးစခန်း' ဟူသော သော့ချက်စကားလုံးဖြင့် အချက်အလက်များ ရှာဖွေခဲ့ပြီး အချိန်အတော်ကြာပြီးနောက်တွင် အကြမ်းဖျင်း သိရှိသွားသည်။ “အော်၊ ဒါက Dark Net ရဲ့ အစီအစဉ်ကိုး။ ဒီလို လျှို့ဝှက်ပြီး ကြီးမားသောအဖွဲ့အစည်း ပေါ်လာပြီး နိုင်ငံ၆နိုင်ငံထံက ရန်ပုံငွေရရှိဖို့တောင် ငါမမျှော်လင့်ထားဘူး။ ရည်ရွယ်ချက်က အရမ်းဖြူစင်တယ် မဟုတ်လား။ တကယ်ပဲ ဒီထက်ပိုလုံခြုံတဲ့ နေရာမရှိဘူး”

လေယာဉ်ပေါ်ကနေ ငုံ့ကြည့်လိုက်ရာ ‘ဂရေးမက်တယ် အပျက်အစီးနယ်မြေ’ သည် လုံးဝပြောင်းလဲသွားသလိုပင်။ အပျက်အစီးများမှ ဧရိယာအသစ်တစ်ခုကို အမှတ်အသားပြုထားပြီး၊ ကစားသမားများနှင့် အင်ဂျင်နီယာအဖွဲ့များသည် ပုရွက်ဆိတ်များကဲ့သို့ ဖြတ်ကျော်သွားကြသည်။ စက်အမျိုးအစားအမျိုးမျိုးက ကျယ်လောင်စွာ အသံမြည်နေသည်။ စွန့်ပစ်ထားသော အဆောက်အအုံများ၊ တံတားများနှင့် လမ်းများကို အဆောက်အအုံအသစ်များ ဆောက်လုပ်ရန်အတွက် အားလုံးကို ဖြိုချပစ်ခဲ့သည်။ လေထုက လုံးဝကို လန်းဆန်းနေ၏။ မြင့်မားသော ကွန်ကရစ်နံရံသည် တစ်ဝက်တစ်ပျက် ပြီးစီးပြီးဖြစ်၍ မရေမတွက်နိုင်သော ကစားသမားများသည် ဆောက်လုပ်ရေးအတွက် တက်လိုက်ဆင်းလိုက် လုပ်နေကြသည်။

ရဟတ်ယာဉ်သည် ရပ်နားရာနေရာသို့ ဆင်းသက်သွားခဲ့သည်။

ဟွမ်ယုသည် ကြာမြင့်စွာကတည်းက သတိထားမိ၏။ ဟန်ရှောင်းထံသို့ ရောက်လာပြီး ဟန်ရှောင်းမရှိသည့် အချိန်က အဖြစ်အပျက်များကို အမြန်ပြောပြသည်။ အများစုမှာ ခက်ခဲသောကိစ္စများဖြစ်သော်လည်း ဟွမ်ယုသည် ၎င်းတို့အားလုံးကို အလွန်သပ်ရပ်စွာ ဂရုစိုက်ခဲ့သည်။ သူသည် လက်ထောက်နှင့် အတွင်းရေးမှုးအဖြစ် အမှန်တကယ် သင့်လျော်သည်။

ရီရယ့်ချင်းသည် ဘယ်ညာကြည့်ပြီးနောက် ဟန်ရှောင်းဆီတွင် အကြည့်ရပ်သွားသည်။ "မင်းက ဒီခိုလှုံရေးစခန်းရဲ့ ခေါင်းဆောင်လို့ မထင်ခဲ့မိဘူး။ မင်းငါ့ကို လိုအပ်နေတာ မဆန်းပါဘူး။”

ဟန်ရှောင်းက သဘောမတူသလို ငြင်းလည်းမငြင်းပေ။ ဟွမ်ယုကို အားပေးစကားအနည်းငယ်ပြောပြီး ရီရယ့်ချင်းကို အအေးခန် ကုန်လှောင်ရုံသို့ ခေါ်ဆောင်သွားသည်။

နီဂါလိုအရိပ်သားရဲ ပစ္စည်းအမြောက်အမြားကို ကြည့်ရှုပြီးနောက်၊ ဟန်ရှောင်းသည် တာဝန်ကိုပြောပြကာ ရီရယ့်ချင်းကို စိုက်ကြည့်ပြီး သူမ၏အဖြေကို စောင့်မျှော်နေသည်။

ရီရယ့်ချင်းသည် နှစ်မိနစ်လောက် စဉ်းစားပြီးနောက် ခေါင်းညိတ်လိုက်သည်။

“နီဂါလိုအရိပ်သားရဲရဲ့ ဦးနှောက်၊ ကျောက်ကပ်၊ သည်းခြေအိတ်၊ နှလုံး နဲ့ အမြီးအရိုးတွေက စတီးရွိုက်နဲ့ ဟော်မုန်းဆေးများဖန်တီးဖို့ သင့်တော်တဲ့ ဆေးပစ္စည်းတွေ ဖြစ်တယ်။ ၎င်းတို့၏ဥတွေမှာ အရိုးကြီးထွားမှုနှင့် ဇီဝဖြစ်ပျက်မှုကို ကူညီပေးသည့် ဓာတ်တစ်မျိုးရှိပြီး အလွန်ထိရောက်တဲ့ အနာကျက်ဆေးတွေကို ဖန်တီးဖို့ ထုတ်ယူနိုင်တယ်။”

"မင်းမှာ မွန်းစတားဥတွေ အများကြီးရှိတယ်ဆိုတော့၊ နီဂါလိုအရိပ်သားရဲ အုပ်စုတစ်စုကို မွေးမြူဖို့ ငါကြိုးစားကြည့်လို့ရနိုင်တယ်။ သူတို့ကို စွမ်းအင်မြင့်မားသော စွန့်ပစ်ပစ္စည်းတွေကို ကျွေးမွေးတာက ဓါတ်ရောင်ခြည်သလင်းကျောက်များ ဖန်တီးနိုင်တယ်လို့လည်း မင်းပြောပြခဲ့တယ်။ ဒါက ပြန်လည်ပြည့်ဖြိုးမြဲ အရင်းအမြစ်တစ်ခုပဲ…”

သူမ၏ ထူးချွန်မှုများနှင့် ပတ်သက်လာလျှင် သူမသည် အလွန် ပရော်ဖက်ရှင်နယ် ဖြစ်လာပြီး သူမ၏ စကားပြောဆိုရာတွင် စိတ်အားထက်သန်မှု များစွာရှိသည်။ သူမသည် မာနနှင့် ကိုယ့်ကိုယ်ကိုယ် ယုံကြည်မှုရှိနေသည်။

"ဘာကြီး၊ ဘယ်လို၊ ဘာတွေလဲ။" ဟန်ရှောင်းသည် ရှင်းရှင်းလင်းလင်း မကြားရတော့ဘဲ အလွန်စိတ်ရှုပ်လာသည်။

ရီရယ့်ချင်းက မျက်လုံးများ လည်ပြလိုက်သည်။ သူမ၏အမူအရာမှာ ဟန်ရှောင်းကို အတတ်ပညာဆိုင်ရာ ကိစ္စများကို ကျွမ်းကျင်ပညာရှင်များထံ ထားခဲ့ရန်နှင့် ဟန်ရှောင်းသည် ဤနယ်ပယ်၌ ဗဟုသုတမရှိသောကြောင့် ဝင်ရောက်မစွက်ဖက်သင့်ကြောင်း ပြောနေ၏။

အရင် ရီရယ့်ချင်းပေးခဲ့သော အေးစက်စက် ခံစားချက်နဲ့ ယှဉ်ရင် သူမရဲ့အမူအရာက အခုမှအသက်ဝင်နေသည်။ သူမရောက်နေသည့် အခြေအနေက မဆိုးဘူးဆိုတာကို သတိထားမိပြီး စိတ်သက်သာရာရသွားပုံ ရသည်။ သူမက လူတိုင်းကို အေးစက်စက်နှင့် ငြင်းပယ်နေသည့် အသွင်ဆောင်တာကို ရပ်လိုက်သလိုပင်။

“မင်းပြောခဲ့တဲ့ အကြောင်းအရာက အရမ်းတန်ဖိုးရှိတယ်။ ဒါကို မင်းနဲ့ လွှဲထားလိုက်မယ်။" ဟန်ရှောင်းသည် လက်နှစ်ဖက်ကို နောက်ပစ်ကာ ခေါင်းညိတ်ပြပြီး ရီရယ့်ချင်း ပြောနေသည့်အကြောင်းကို သူလုံးဝနားလည်ပုံရသည်။ ရီရယ့်ချင်းက အော်ရယ်ချင်စိတ်ကို ကမန်းကတန်း ဖိနှိပ်ရင်း ပြုံးပြလိုက်သည်။

"ဟွမ်ယု၊ ဒီကိုလာဦး!" ဟန်ရှောင်းက အော်လိုက်သည်။ ဘေးနားမှာစောင့်နေတဲ့ ဟွမ်ယုက ချက်ချင်းပြေးလာ၏။ ဟန်ရှောင်းက ရီရယ့်ချင်းကို လက်ညှိုးထိုးပြပြီး "ဒါက ငါငှားထားတဲ့ ဆေးဝါးပညာရှင်ပဲ။ သူ့အတွက် အခန်းစီစဉ်ပေးပါ။"

ဟွမ်ယုခေါင်းညိတ်လိုက်သည်။ သူသည် ရီရယ့်ချင်းကို ခမ်းနားသော နေအိမ်သို့ ခေါ်ဆောင်လာပြီးနောက် ဟန်ရှောင်း၏ အမိန့်ကို လိုက်နာကာ ခိုလှုံရေးစခန်းဆိုင်ရာ အချက်အလက်အချို့ကို သူမအား ပေးခဲ့သည်။

အခန်းသည် သစ်လွင်ပြီး အတော်လေးကျယ်ဝန်းသည်၊ သို့မဟုတ် အနည်းဆုံး သူမနေခဲ့ရသော အချုပ်ခန်းထက် ပိုကြီးသည်။

ရီရယ့်ချင်းသည် အိပ်ရာပေါ်တွင် လှဲလျောင်းရင်း သက်တောင့်သက်သာရှိသော နှစ်သိမ့်ညည်းညူသံများ ထွက်လာသည်။

သံကုတင်ပေါ်တွင် နှစ်ပေါင်းများစွာ အိပ်စက်ပြီးနောက်၊ နောက်ဆုံးတွင် သူမသည် ပျော့ပျောင်းသော မွေ့ယာပေါ်တွင် အိပ်စက်နိုင်လေပြီ။ ဂွမ်းပုံပေါ်တွင် အိပ်နေရသကဲ့သို့ သူမ၏ တစ်ကိုယ်လုံး နစ်မြုပ်သွားသည်။

ဟွမ်ယုသည် တံခါးဝတွင် အနေရခက်စွာ ရပ်နေသည်။ ရီရယ့်ချင်းက ထိုသို့လုပ်နေချိန်တွင် သူ့ကို လုံး၀ လျစ်လျူရှုထားပြီး သူနေသင့်သလား၊ ထွက်သွားမလားဆိုတာ သူမသိတော့ပေ။ သူက တံခါးကိုခေါက်ပြီး ချောင်းဆိုးလိုက်၏။ “ကောင်းကောင်းအနားယူပါ။ ကျွန်တော် အခု သွားတော့မယ်။"

ဟွမ်ယုထွက်သွားပြီးနောက် ရီရယ့်ချင်းက စာရွက်စာတမ်းတွေကို ထုတ်ယူလိုက်ပြီး မျက်လုံးများ တောက်ပလာသည်။

“မသေနိုင်တဲ့ ဂြိုလ်သားတွေ ထောင်ပေါင်းများစွာက ခိုလှုံရေးစခန်းတွင် စုဝေးနေကြတယ်။ စမ်းသပ်ခံ အရေအတွက် အတွက် စိတ်ပူစရာ မလိုဘူး။ ရောဂါကူးစက်မှုလည်း ရှိလာမှာ မဟုတ်သလို နောက်ထပ် ကပ်ဆိုးလည်း ရှိလာမှာ မဟုတ်ပါဘူး။ ဘယ်လောက် ပြီးပြည့်စုံလဲ။ ခိုလှုံရေးစခန်းက လွတ်လပ်ပြီး လုံလည်းလုံခြုံတယ်။ ဒီမှာ ခဏလောက်နေတာ သိပ်မဆိုးဘူး ထင်တာပဲ။ နောက်ဆုံးတော့ ပြင်ပကမ္ဘာက အပြောင်းအလဲတွေကို နားလည်ဖို့ အချိန်လိုတယ်။”

…

ဟန်ရှောင်းသည် ရုံးခန်းရှိ ကုလားထိုင်ပေါ်တွင် မှီ၍ စားပွဲပေါ်ရှိ လပ်တော့ကို စိုက်ကြည့်နေသည်။ ၎င်းသည် ရီရယ့်ချင်း၏ အခန်းကို အချိန်နှင့်တစ်ပြေးညီ စောင့်ကြည့်နေသည့် ဗီဒီယိုဖြစ်သည်။

ရီရယ့်ချင်းသည် သမိုင်းကြောင်းရှိပြီး ယုံကြည်နိုင်စရာမရှိပေ၊ ထို့ကြော်င့် ဟန်ရှောင်းတွင် အရန်အစီအစဉ်များရှိသည်။ အခန်းနံရံများတွင် လျှို့ဝှက်ကင်မရာအနည်းငယ်ကို ထည့်ထားပြီး ရီရယ့်ချင်းကို တစ်ချိန်လုံး စောင့်ကြည့်နေသည်။

ဟန်ရှောင်းက မျက်လုံးမှေးပြီး တွေးလိုက်မိသည်၊ သူမ၏ လုပ်ရပ်များသည် ယခင်ကနှင့် အလွန်ခြားနားသည်။ လေယာဉ်ပေါ်တက်ချိန်မှာ အေးအေးဆေးဆေး နေခဲ့ပေမယ့် အခုမှပဲ မိန်းမတစ်ယောက်ဖြစ်နေကြောင်း ပြသနေတယ်။ ငါ့သံသယတွေ ရှင်းသွားအောင် သူဘေးကင်းတဲ့ခံစားချက်ကို ထင်ယောင်ထင်မှားဖြစ်အောင် ဖန်တီးလိုက်တာဖြစ်နိုင်တယ်။

အကြောင်းပြချက်တစ်ခုအတွက် သံသယဖြစ်မိသည်။ သူ့မှတ်ဉာဏ်များထဲတွင် ရီရယ့်ချင်းသည် ဘယ်အဖွဲ့အစည်းကိုမှ ဦးမညွှတ်သည့် လွတ်လပ်မှုကို မြတ်နိုးသည့်လူတစ်ယောက်ဖြစ်သည်။ သူမသည် ကိစ္စများကို သူ့ကိုယ်ပိုင်ထူးခြားသောနည်းလမ်းကို ပြုလုပ်ခဲ့ပြီး မှန်းဆ၍မရပေ။ ဗားရှင်း ၂.၀ တွင် ရီရယ့်ချင်းသည် မည်မျှအရေးကြီးသည်ကို သိရှိသောကြောင့် ဟန်ရှောင်းသည် သတိကြီးစွာထားနေရသည်။

ရီရယ့်ချင်းပူးပေါင်းပါဝင်လာသည့်အတွက် အခြားသော အကျိုးကျေးဇူးများလည်း ရှိသည်။ ကစားသမားများသည် သူမ၏ လမ်းညွှန်မှုအတွက် မစ်ရှင်များကို လုပ်ဆောင်ကာ လဲလှယ်နိုင်သကဲ့သို့ သူတို့၏ အတန်းအစားကိုလည်း ဆေးဝါးကျွမ်းကျင်မှုသို့ အဆင့်တက်နိုင်ကြသည်။ သူမပါဝင်လာခြင်းသည် ဟန်ရှောင်း၏ 'ကစားသမားများ၏ အဓိကမြို့တော်' ကိုပြုလုပ်မည့် အစီအစဉ်အတွက် နောက်ထပ်ခြေလှမ်းတစ်ခုဖြစ်သည်။

ကစားသမားများအတွက် အဓိကမြို့တစ်မြို့ကို ဖန်တီးရန်၊ လုပ်ဆောင်ချက်မျိုးစုံပါရှိသော NPC များသည် မရှိမဖြစ်လိုအပ်သည်။

“လူကြီးမင်း၊ ကျွန်တော် သူမအတွက် စီစဉ်ပြီးပါပြီ…”

ထိုအချိန်တွင် ဟွမ်ယုသည် အခြေအနေကို သတင်းပို့ရန် ဝင်လာသည်။ ရှေ့သို့ ခြေလှမ်းအနည်းငယ်လှမ်းပြီး လက်တော့ပ်စခရင်ပေါ်ရှိ ပုံကို မြင်လိုက်ရသည်။ သူက စကားရပ်လိုက်ပြီး သူ့မျက်လုံးထဲမှာ အကြည့်တွေက ထူးဆန်းလာသည်။

ငါ ထူးထူးခြားခြား တစ်ခုခုကို တွေ့လိုက်ရပုံပဲ။

...ဒါကို ချောင်းကြည့်သူလို့ ခေါ်တာလား။

ဒါက သူဌေးရဲ့ လူမသိတဲ့ ဝါသနာများလား။

ငါအသတ်ခံရမှာလား ‽

ဟွမ်ယုသည် နောက်သို့ အမြန်ခြေတစ်လှမ်းဆုတ်ကာ ကြမ်းပြင်ကိုငုံ့ကြည့်ကာ ဘာမှမမြင်ရသလို ဟန်ဆောင်နေသည်။

ဟွမ်ယုက သူ့ကို နားလည်မှုလွဲသွားတာကို ဟန်ရှောင်းရှင်းရှင်းလင်းလင်း သိ၏။ သူက ခေါင်းခါရင်း ရှင်းပြရန် စိတ်မ၀င်စားပေ။

နားလည်မှု လွဲရင်လည်း လွဲပါစေ၊ ကြီးမြတ်သော ယန္တရားပညာရှင်ကြီးဟန်သည် အခြားသူများ မည်သို့တွေးသည်ကို ဂရုမစိုက်ပေ။

“ဘယ်သူ့ကိုမှ မပြောနဲ့” ဟန်ရှောင်းက ပြောသည်။

ဟန်ရှောင်းက သူ၏ ထူးဆန်းသော ဝါသနာကို မည်သူ့ကိုမျှ မသိစေချင်ကြောင်း ဟွမ်ယုတွေးမိလိုက်ပြီး လျင်မြန်စွာ ခေါင်းညိတ်လိုက်သည်။

…

ရီရယ့်ချင်းက အမြဲတမ်း အလွန်အရည်အသွေးရှိ၏။ သူမသည် ချက်ချင်းနီးပါး အလုပ်စတင်ခဲ့သည်။

သူက ကြယ်နဂါးနိုင်ငံနှင့် လျှို့ဝှက်စွာ သဘောတူညီမှုရရှိခဲ့သည်ကို ကစားသမားများက မသိခဲ့ကြဘဲ ကစားသမားများနှင့် NPC များကြား သတင်းအချက်အလက်စီးဆင်းမှု၏ ထိရောက်မှုမှာ အလွန်နည်းပါးသည်။ သို့သော်လည်း ဟန်ရှောင်းသည် ရီရယ့်ချင်းကို မျက်နှာဖုံးဝတ်ဆင်စေကာ သူမ၏အထောက်အထားကို ဖုံးကွယ်ထားရန် လိုအပ်သည်။ သူတို့ရဲ့ ကိုယ်ပိုင်လက္ခဏာကို ပြသဖို့ အကောင်းဆုံးအချိန်မဟုတ်သေးဘဲ ဟန်ရှောင်းက အတတ်နိုင်ဆုံး တည်တည်ငြိမ်ငြိမ်နေချင်၏။

သတင်းအချက်အလက် ကွာခြားမှုကြောင့် ကစားသမားများသည် သတင်းအပိုင်းအစများအပေါ်တွင် အာရုံခံနိုင်စွမ်း အားနည်းကြသည်။ မစ်ရှင်များ သို့မဟုတ် ဇာတ်လမ်းဇာတ်ကြောင်း မိတ်ဆက်ခြင်းမရှိဘဲ၊ ၎င်းတို့သည် အဖွဲ့အစည်းများက မည်သည့် သတင်းအချက်အလက်မျိုး လိုအပ်နေသည်ကို မသိရှိကြဘဲ၊ အဖွဲ့အစည်းများ၏ လည်ပတ်ပုံကိုလည်း သိရှိနိုင်မည် မဟုတ်ပေ။ ကစားသမားအများစုသည် မစ်ရှင်များလုပ်ဆောင်ခြင်း၊ ငွေရှာခြင်းနှင့် ပစ္စည်းရယူခြင်းတို့တွင် အလုပ်များနေ၏။ ထို့အပြင် ၎င်းတို့၏ ကစားသမားစိတ်ဓာတ်ဖြင့် NPCs များနှင့် အလွန်အကျွံ စကားပြောမည်မဟုတ်ပေ၊ အဓိပ္ပါယ်မှာ အခြား NPCs များအကြောင်း ပြောဆိုခြင်းမှာလည်း ပို၍နည်းပါးသွားသည်ဟု ဆိုလိုသည်။

ဘေးကင်းရေးအကြောင်းပြချက်ကြောင့် ရီရယ့်ချင်းသည် မျက်နှာဖုံးနှင့်ပတ်သက်ပြီး ပြဿနာတစ်စုံတစ်ရာမရှိပေ။

ရီရယ့်ချင်းသည် ဆေးအမျိုးအစားများစွာ ပမာဏ အများအပြားကို ဖန်တီးခဲ့သည်။ ဟန်ရှောင်းသည် အကောင်းဆုံးအရည်အသွေးရှိသည့် အနာကျက်ဆေးများနှင့် စတီးရွိုက်များကို ယူကာ ကျန်ရှိသည့် အရည်အသွေးနိမ့် ဆေးများကို ကစားသမားများထံ ရောင်းချခွင့်ပြုလိုက်သည်။ ဤသည်က ခိုလှုံရေးစခန်း၏ 'လုပ်ဆောင်ချက်များ' ကို ကစားသမားများအား ပြသခြင်းလည်းဖြစ်သည်။

စျေးကွက်တွင် ဆေးဝါး ၀ယ်လိုအားမှာ အမြဲတမ်း မြင့်မားနေသည်။ တိုက်ပွဲများတွင် အနိုင်ရရန်အတွက် ကစားသမားများ၏ မူးယစ်ဆေးအလွန်အကျွံသုံးစွဲခြင်းမှ ကန့်သတ်လိုသဖြင့်၊ ဆေးဝါးများမှာ များသောအားဖြင့် စျေးကြီးကြသည်။

သို့သော်လည်း ကစားသမားများသည် ဤဆေးများအတွက် အလွန်မြင့်မားသော ဝယ်လိုအားရှိနေဆဲဖြစ်သည်။ ရီရယ့်ချင်း၏ ထွက်ပေါ်လာမှုသည် ကစားသမားများစွာကို ကျေနပ်စေခဲ့သည်။

သတင်းသည် အလွန်လျင်မြန်စွာ ပျံ့နှံ့သွားသည်။ ခိုလှုံရေးစခန်းတွင် ဆေးဝါးများ ရောင်းချသည့် NPC အသစ်တစ်ယောက် ရှိနေကြောင်း ကစားသမားများအားလုံး သိကြပြီးဖြစ်သည့်အတွက် ကစားသမားအများအပြားသည် ရီရယ့်ချင်းထံသို့ လာရောက်ဝယ်ယူကြသည်။

ရီရယ့်ချင်းသည် ဂြိုလ်သားများအကြောင်းကို အလွန်သိချင်နေသည်။ ကစားသမားများသည် အကောင်းဆုံး စမ်းသပ်ခံများဖြစ်ကြောင်း သူမ နားလည်ခဲ့ပြီး ၎င်းတို့အားလုံးနှင့် စကားပြောရန် အလွန်လွယ်ကူ၏။ သူတို့ကို အကူအညီတောင်းနေသရွေ့တော့ သူတို့က အမြဲတမ်းလိုလို သဘောတူ၏။ ကျရှုံးမှု၏ အကျိုးဆက်များကို သူမစိုးရိမ်နေစရာမလိုဘဲ၊ ၎င်းတို့သည် အမှန်တကယ်ပင် ပြီးပြည့်စုံသော စမ်းသပ်ခံများဖြစ်သည်။ ရီရယ့်ချင်းသည် ရေထဲရောက်နေသော ငါးနှင့်တူနေသည်။ သူမ ဒီမှာနေရတာ ပိုပျော်လာသည်။

ခိုလှုံရေးစခန်း ၃က နေရာကောင်းပဲ။

ဟန်ရှောင်းသည် လူးဝစ်ဇီဝသုတေသနဌာနမှ လုယက်ခဲ့သော ဆေးဝါးများ ရှိနေဆဲဖြစ်သော်လည်း မကြာမီအတွင်း ရောင်းချရန် အစီအစဉ်မရှိပေ။ ၎င်းတို့အားလုံးသည် အလွန်အရည်အသွေးမြင့်မားကြပြီး ကစားသမားများ၏အဆင့်သည် ပိုမိုမြင့်မားလာသောအခါတွင် ၎င်းတို့သည် ပိုမိုကောင်းမွန်သောအကျိုးသက်ရောက်မှုများ ရရှိမည်ဖြစ်သည်။ ထိုအချိန်တွင်မှ သူတို့ကို ဈေးကောင်းကောင်းနဲ့ ရောင်းနိုင်သည်။

လူးဝစ်ဇီဝသုတေသနဌာနအကြောင်းကိုတွေးရင်း ဟန်ရှောင်းသည် ပြဿနာသေးသေးလေးတခုကို သတိရလိုက်သည်။ ယခုအချိန်တွင် ၎င်းတို့အား လုယက်သွားသောသူမှာ Black Phantom ဖြစ်သည်ကို သိရှိထားသင့်သည်၊ သို့သော် သူတို့သည် ထိုကိစ္စနှင့်ပတ်သက်ပြီး ဘာမှမလုပ်ကြသေးပေ။

“ကြည့်ရတာ ငါ့နာမည်ကြောင့် ကြောက်နေပုံရတယ်။ သူတို့က ကလဲ့စားမချေရဲတော့ ဒေါသကို မြိုသိပ်ဖို့ ဆုံးဖြတ်လိုက်ပုံပဲ”ဟန်ရှောင်းက သရော်လိုက်သည်။

ကိုယ့်နေရာကိုယ်သိသော အဖွဲ့အစည်းများသည် အကောင်းဆုံးဖြစ်သည်။ ပြဿနာအသေးအမွှားများစွာကို ရှောင်ရှားနိုင်မည်ဖြစ်ပြီး၊ သူသည်လည်း ၎င်းတို့ကို ဖျက်ဆီးရန် မလိုအပ်ပေ။