ထိုးဖောက်စိမ့်ဝင်ခြင်း - ၃

ဟန်ရှောင်းသည် ညရောက်သည်အထိ လှည့်လည် မေးမြန်းနေပြီး ဌာနချုပ်အနီးရှိ အရင်းအမြစ်ဂိုဒေါင်တစ်ခုမှ ခဲယမ်းအများအပြားကို ထောက်ပံ့ရေးယာဉ်တစ်စီးမှ သယ်ယူလာသည်ကို သိရှိလိုက်ရသည်။ ထိုယာဉ်တန်းသည် မိနစ်နှစ်ဆယ်အတွင်း ပြန်လာမည်ဖြစ်သည်။

ဟန်ရှောင်းသည် ကားသမားတစ်ဦးကို ရှာလိုက်ပြီး မျက်နှာပြောင်းကာ သူ့ကို မျှားခေါ်လိုက်သည်။ သူတို့ချည်းသာရှိနေစဉ် ကားမောင်းသူ၏ လည်ပင်းကို အက်ကွဲစေပြီး မျက်နှာနှင့်အဝတ်အစားများကို ပြောင်းလဲလိုက်၏။ အလောင်းကို ဖယ်ရှားရသည်မှာ အဆင်မပြေသည့်အတွက် ဟန်ရှောင်းသည် အလွန်တီထွင်ဆန်းသစ်ပြီး သွေးထွက်သံယိုမဟုတ်သည့် နည်းလမ်းကို ရှာဖွေတွေ့ရှိသွား၏။ ထိုနည်းလမ်းမှာ ကစားသမားတစ်ဦးကို ရှာဖွေပြီး အလောင်းကို ဖယ်ရှားဖို့ တာဝန်ပေးလိုက်၏။ မစ်ရှင်တွင် သူမည်သူမည်ဝါဖြစ်သည်ကို အမည်မသိဟု သတ်မှတ်ထားသော်လည်း ကစားသမားများသည်လည်း လုံးဝဂရုမစိုက်ဘဲ မစ်ရှင်ကို ချက်ချင်းလက်ခံခဲ့သည်။

အဆင်ပြေသားပဲ၊ ဟန်ရှောင်းတွေးမိသည်။ သူ့တွင် စိတ်ကူးသစ်တစ်ခု ရှိနေသည် - ကစားသမားများသည် သူ၏ ထိုးဖောက်ဝင်ရောက်မှုအတွက် အကူအညီဖြစ်နိုင်၏။

ဂျာမီနယ်အဖွဲ့အစည်းမှ ကစားသမားများ၏ သစ္စာစောင့်သိမှုကို ပြုပြင်ထားသော်လည်း၊ ၎င်းတို့သည် မစ်ရှင်များကို လက်ခံရန် လွတ်လပ်စွာ ရှိနေဆဲဖြစ်ပြီး ဂျာမီနယ်အဖွဲ့အစည်းက ထိုအကြောင်းကို မသိကြပေ။

ဟန်ရှောင်းသည် သူ့ကိုယ်သူ ယာဉ်မောင်းတစ်ယောက်လို အသွင်ဆောင်ပြီး မကြာခင်မှာပင် အမိန့်လက်ခံရရှိခဲ့သည်။ ကားထဲမှာရှိသည့် GPS က လမ်းကြောင်းကို ပြသပေးထားသည့်အတွက် ဟန်ရှောင်းသည် ယာဉ်တန်းကို ရိုးရိုးရှင်းရှင်းသာ မောင်းနှင်ပြီး နောက်နေ့တစ်ဝက်အကြာတွင် အရင်းအမြစ်ဂိုဒေါင်ကို ရောက်ရှိလာသည်။ ထို့နောက် သတင်းအချက်အလက်များ ပိုမိုရရှိရန် တူညီသောနည်းလမ်းကို အသုံးပြုခဲ့သည်။

နှစ်ရက်အကြာတွင်၊ ဟန်ရှောင်းသည် သူ၏ကိုယ်ပိုင်လက္ခဏာ/ သူ၏ပုံစံကို အကြိမ်ကြိမ်ပြောင်းလဲပြီးနောက် ဌာနချုပ်အနီးရှိ အခြေစိုက်စခန်းတစ်ခုသို့ ရောက်ရှိသွားတော့သည်။

အနက်ရောင်ခြေကုပ်စခန်းအုပ်စုကို အဝေးကမြင်နိုင်ပြီး အလယ်အလတ်အရွယ်အစားရှိသည့် မြို့တစ်ခုလို နေရာအများကြီးယူထားသည်။ ဤသည်မှာ ဂျာမီနယ်အဖွဲ့အစည်း၏ ဌာနချုပ်ဖြစ်သည်၊ သို့သော် တကယ့် အဓိကနယ်မြေသည် မြေအောက်၌ဝှက်ထားကြောင်း ဟန်ရှောင်းသိနေသည်။

ဟန်ရှောင်းသည် ထိုနေရာရှိ စစ်သားများထံ လှည့်ပတ်မေးမြန်းပြီးနောက် မြေအောက်ဌာနချုပ်သို့ ဝင်ရောက်ရန် မဖြစ်နိုင်ကြောင်း တွေ့ရှိသွားသည်။ ထို့ကြောင့် သူသည် အထူး သွင်ပြင်လက္ခဏာရှိသော ပစ်မှတ်ကို ရှာဖွေရတော့သည်။

…

ဖန်းယန်နိုးလာပြီး ဆေးဘက်ဆိုင်ရာတဲတစ်ခုရှိ ဆေးရုံကုတင်ပေါ်တွင် လဲလျောင်းနေမှန်း သိလိုက်ရသည်။ သူ့ပတ်ဝန်းကျင်တွင် ဒဏ်ရာရ စစ်သည်များ ရှိနေ၏။ သူနိုးလာသည်ကိုမြင်တော့ ဆရာဝန်က သူ့ဆီလှမ်းလာပြီး “မင်းဒဏ်ရာတွေကို ငါကုသပြီးပြီ။ မင်းသတိလစ်နေတာ တစ်ရက်ရှိပြီ"

"မီကာမြို့ ဘယ်လိုနေလဲ"

“စစ်ကူတပ်က အချိန်မီရောက်သွားပြီး ရန်သူတွေကို အနိုင်ယူခဲ့ပေမယ့် တချို့က လွတ်မြောက်သွားတယ်။ အခု ဆုံးရှုံးမှုတွေကို တွက်ချက်နေပါတယ်။”

“ကြည့်ရအောင်…” ဖန်းယန်က အားနည်းစွာ ချောင်းဆိုးလိုက်သည်။ ဆရာဝန်က ရေသန့်ဘူးကို အလျင်အမြန် ပေးလိုက်၏။ ဖန်းယန်က လှမ်းယူလိုက်ပြီး တစ်ကျိုက်မျှမော့လိုက်ကာ လေကို အငမ်းမရ ရှူနေသည် ။

စူပါလူသားတစ်ယောက်အနေဖြင့် သူသည် ကောင်းမွန်စွာ ဆက်ဆံခံရသည်။ မကြာမီ တစ်စုံတစ်ယောက်သည် တိုက်ပွဲပျက်စီးဆုံးရှုံးမှုစာရင်းကို ယူဆောင်လာ၏။ ဖန်းယန်သည် စိတ်မရှည်စွာဖြင့် အမြန်လှန်ကြည့်လိုက်သည်။ သူ့အသင်းဖော်အားလုံး သေဆုံးသွားပြီဟု အတည်ပြုလိုက်သည်ကို မြင်လိုက်ရသဖြင့် ဝမ်းနည်းပူဆွေးမှုများနှင့် ပြည့်နှက်သွားတော့သည်။ သူသည် ရန်သူ၏ သေခြင်းအရေတွက်ကို လှန်ကြည့်လိုက်ရာ ရုတ်တရက် သူ့မျက်လုံးများ ကျဉ်းမြောင်းသွားသည်။

“ရန်သူတစ်ဉီး ပျောက်နေတယ်၊” ဖန်းယန်သည် ပျောက်ဆုံးနေသူမှာ ကာရီးယက်စ် ဖြစ်ကြောင်း သိလိုက်သည်။ အထက်လူကြီးသည် မကြာမီ ရန်သူများ၏ သတင်းကို ဗီဒီယိုပုံစံဖြင့် ပေးပို့ခဲ့သည်။ ဒေတာဘေ့စ်နှင့် တိုက်ပွဲအတွင်း မှတ်တမ်းတင်ထားသည့် ဗီဒီယို၏ ကိုက်ညီသော ဖန်သားပြင်ဓာတ်ပုံများမှ ရန်သူများကို ဖော်ထုတ်တွေ့ရှိခဲ့ပြီး ဂျာမီနယ်အဖွဲ့အစည်းရှိ လူအများစုမှာ ဒေတာဘေ့စ်တွင် ရှိနေသည်။

“အဲဒါ သူပဲ။ ပျောက်ဆုံးနေသူကို ကာရီးယက်စ် လို့ခေါ်တယ်။ သူသေတာကို ငါ့မျက်စိနဲ့ မြင်ခဲ့တယ်။"

အထက်လူကြီးက မျက်မှောင်ကြုတ်ကာ “ဒါပေမယ့် ငါတို့ရဲ့ သက်သေတွေအရ ကာရီးယက်စ် က လွတ်မြောက်သွားပြီး အသက်ရှင်နေသေးတယ်၊ သူ့အလောင်းကိုလည်း ရှာမတွေ့ဘူး”

ဖန်းယန်သည် သူ့ကျောရိုးကို အေးစက်သွားသလို ခံစားလိုက်ရသည်။ သူသည် 'ဒုက္ခသည်' ကို ချက်ချင်းပြန်သတိရလိုက်သည်။

...

ဂျာမီနယ်အဖွဲ့အစည်း၏ မြေအောက်ဌာနချုပ်တွင် ခေါင်းဆောင်သည် နည်းဗျူဟာမြေပုံကို တိတ်ဆိတ်စွာ ကြည့်နေသည်။

မြေပုံကို အနီရောင်နှင့် အပြာရောင် ဧရိယာများဖြင့် မှတ်သားထားသည်။ အနီရောင်သည် ခြောက်နိုင်ငံ၏ တပ်ဖွဲ့ဖြစ်ပြီး အပြာသည် ၎င်းတို့၏ တပ်ဖွဲ့ဖြစ်သည်။ အပြာရောင်သည် အနီရောင်ဖြင့် ဝန်းရံခံထားရပြီး အချိန်ကြာလာသည်နှင့်အမျှ သေးငယ်လာသည်။ ဤသည်မှာ ဂျာမီနယ်အဖွဲ့အစည်းအတွက် အခြေအနေဖြစ်သည်။ လုံး၀ အရေးနိမ့်နေ၏။ သို့သော်လည်း ခေါင်းဆောင်သည် ထိုဒေသများ၏ အရှုံးအမြတ်များကို ဂရုမစိုက်ပေ။ တန်ပြန်တိုက်ခိုက်မှုအတွက် သိုသိုသိပ်သိပ် ပြင်ဆင်နေသောကြောင့် သူတို့၏ တပ်ဖွဲ့အားလုံးကို စစ်မြေပြင်သို့ မထည့်ထားပေ။ သို့ရာတွင်၊ သူသည် 'ကြိုတင်မြင်' နိုင်သော ဇီးရိုး ကို ဦးစွာဖယ်ရှားရမည်ဖြစ်သောကြောင့် ၎င်းကို အကောင်အထည်ဖော်နိုင်ခြင်း မရှိသေးပေ၊ သို့မဟုတ်ပါက ထုတ်ဖော်ခံလိုက်ရသော အစီအစဉ်သည် အဓိပ္ပါယ်မဲ့သွားမည်ဖြစ်သည်။

ကံကြမ္မာရဲ့ကလေးက ဇီးရိုး သည် သူတို့ကို လာရှာလိမ့်မည်ဟု အခိုင်အမာပြောထားသော်လည်း၊ ခေါင်းဆောင်သည် အသေးစိတ် အချက်အလက်တချို့ကို ဂရုစိုက်ရပေမည်။ သူသည် စစ်မြေပြင်တပ်ဖြန့်မှုတွင် ယိုပေါက်အချို့ကို တမင်တကာ ချန်ထားခဲ့သည်။ ဇီးရိုးက ဌာနချုပ်ကို စိမ့်ဝင်ချင်လျှင် ထိုလမ်းကြောင်းများအတိုင်း လျှောက်နိုင်သော်လည်း လျှို့ဝှက်ကင်းထောက်များ၏ သတင်းက သူ့ကို ထပ်ခါထပ်ခါ စိတ်ပျက်စေခဲ့၏။ ထိုယိုပေါက်များကို ဖြတ်ကျော်ဝင်ရောက်လာသူ တစ်ယောက်မျှ မရှိခဲ့ပေ။

ဟန်ရှောင်းသုံးသည့် ထိုးဖောက်စိမ့်ဝင်သည့်နည်းလမ်းကို ခေါင်းဆောင်က သတိမထားမိချေ။

ခေါင်းဆောင်က ကြာကြာစောင့်ရလေ၊ စိတ်မရှည်လေလေ ဖြစ်လာသည်။ ဇီးရိုး ပိုင်ဆိုင်သော 'ကြိုတင်မြင်နိုင်မှု' စွမ်းရည်သည် အဖွဲ့အစည်း၏ ခေါင်းပေါ်တွင် ချိတ်ဆွဲထားသည့် ဓားတစ်ချောင်းကဲ့သို့ဖြစ်ပြီး ၎င်းတို့၏ လုပ်ဆောင်ချက်များကို အလွန်ကန့်သတ်ထားသည်။

“ဒီမှာ မဖြစ်သေးပါဘူး…” ခေါင်းဆောင်က ကင်းထောက်များကို ခါတိုင်းလို မေးလိုက်သော်လည်း ရလဒ်များကြောင့် စိတ်ပျက်သွားရပြန်သည်။ ကံကြမ္မာရဲ့ကလေး၏ ပြောဆိုချက်သည် ဤတစ်ကြိမ်တွင် မှားယွင်းနေသလားဟု သူစတင်၍ သံသယဝင်လာသည်။

ဇီးရိုး ဌာနချုပ်ကို ဘာကြောင့်လာရတယ်ဆိုတာ သူတကယ် နားမလည်နိုင်သောကြောင့်၊ ဟန်ရှောင်း၏ ပန်းတိုင်က ဘာလဲဆိုတာ မသိနိုင်ပေ။

ဟန်ရှောင်း၏ ပစ်မှတ်သည် အော်ရိုရာဖြစ်သည်ဟု သူဘယ်သောအခါမှ မထင်ခဲ့မိပေ။ ထိုအရာက လုံးဝ မမျှော်လင့်ထားသည့် အရာဖြစ်သည်။

…

စက်ရုံများမှ လေထုညစ်ညမ်းမှုများနှင့် ထူထပ်သောတိမ်များသည် ကောင်းကင်ကို မီးခိုးရောင် ခြယ်သပြီး ဆယ်မိုင်အတွင်း တိမ်တိုက်များသည် အချိန်မရွေး ကြွေကျသွားတော့မည့်ပုံရသည်။

မြေပြင်ဌာနချုပ်တွင် အခြေစိုက်စခန်းအများအပြား ပါဝင်ပြီး၊ အတွင်းတွင် သွားလာနေသောယာဉ်များနှင့် သက်သေခံပစ္စည်းများကို စစ်ဆေးရန်အတွက် လမ်းဆုံတိုင်းကို စောင့်ကြပ်ထားသည်။ အလယ်ဗဟိုရှိ အဓိကစခန်းမှာ ကောင်းကင်သို့ ထိုးဖောက်ဝင်ရောက်နေသည့် မြင့်မားသော သတ္တုမျှော်စင်တစ်ခုပါရှိသည့် ကြီးမားလှသော သတ္တုခံတပ်တစ်ခုဖြစ်သည်။

ဝင်ပေါက်မှာ သတ္တုစပ်တံခါးကြီး ဖြစ်သည်။ ဘေးနှစ်ဖက်ရှိ တံခါးများသည် လူဝင်ပေါက်ဖြစ်ပြီး ကားဝင်ပေါက်သည် အလယ်တွင်ရှိပြီး တင့်ကားသုံးစီး တစ်ပြိုင်နက်ဝင်ရန် လုံလောက်သည်ထက် ပိုကျယ်သည်။ ရဟတ်ယာဉ်ကွင်းများသည် အပြင်ဘက်နံရံများပေါ်တွင် တည်ဆောက်ထားသည်။ ရဟတ်ယာဉ်များသည် အခါအားလျော်စွာ ဆင်းသက်လိုက် ပြန်တက်လိုက် လုပ်နေကြသည်။

ဝင်ပေါက်မှာ အလွန်အသက်ဝင်နေ၏။ ယာဉ်တန်းများ ဝင်လိုက်ထွက်လိုက် လုပ်နေကြသည်။ လမ်းဘေးတွင် အစောင့်အကြပ်များ တန်းစီရပ်ကာ နယ်မြေလုံခြုံရေးကို ထိန်းသိမ်းရန် စစ်ဆေးနေကြသည်။

အစောင့်များထဲတွင် ဟန်ရှောင်းသည် ရုပ်ဖျက်ထားသည်။ သူ့မျက်လုံးကို လှည့်ကြည့်ရင်း ပတ်ဝန်းကျင်ကို လေ့လာလိုက်သည်။

မျက်နှာဖုံး၏ အကျိုးသက်ရောက်မှုက အလွန်ထူးခြား၏။ ဤစိမ့်ဝင်မှုနည်းလမ်းသည် အလွန်ပင် လျှို့ဝှက်လွန်းလှသည်။ သူ့အထောက်အထားကို အကြိမ်ပေါင်းများစွာ ပြောင်းလဲပြီးနောက် နောက်ဆုံးတွင် သူ့ကို ရုံးချုပ်သို့ ခေါ်ဆောင်သွားနိုင်သည့် အထောက်အထားတစ်ခု ရရှိခဲ့သည်။ အစောင့်တစ်ယောက်ဖြစ်လာရန်အတွက် ဟန်ရှောင်းသည် ရက်အနည်းငယ်ကြာ စိတ်ရှည်လက်ရှည် စောင့်ဆိုင်းခဲ့ရပြီး ဒီအထောက်အထားရဲ့ မူလပိုင်ရှင်က ဘာဖြစ်သွားတယ်ဆိုတာကို ပြောစရာမလိုတော့ပေ။ ဟန်ရှောင်းသည် ဤအချိန်တွင် သနားကြင်နာတတ်သူ မဟုတ်ပေ။

တာဝန်ချိန် ပြီးဆုံးသွားသောအခါ၊ ဟန်ရှောင်းသည် အခြားသူများနှင့်အတူ မြေပြင်ဌာနချုပ်သို့ လိုက်သွားသည်။ ဌာနချုပ်မှာ ကြီးမားကျယ်ဝန်းလှ၏။ ပထမအဆင့်တွင် ဆယ်မီတာကျော်မြင့်သည်။ တံခါးဝသို့ ဝင်ပြီးနောက်တွင် ကြီးမားသော နေရာကွက်လပ်တစ်ခု ပေါ်လာသည်။ သယ်ယူပို့ဆောင်ရေးတွင် ပစ္စည်းများကို တင်ဆောင်နေပြီး၊ တပ်မှူးများက အနားယူနေကြသည်။ နေရာသည် အသက်ဝင်နေပြီး ဆူညံနေကာ၊ လည်ပတ်နေသော အင်ဂျင်များမှ မီးခိုးငွေ့များသည် လေထုအရည်အသွေးကို အလွန်ဆိုးရွားစေသည်။

ကားဂိုဒေါင်၏ တံခါးသည် အနောက်ဘက်တွင်ရှိပြီး၊ အတွင်း၌ မြေပြင်သယ်ယူပို့ဆောင်ရေးယာဉ် အများအပြားရပ်နားထားကာ၊ အခြားလမ်းကြောင်းရှိတံခါးများသည် လူများအတွက်ဖြစ်သည်။

ဟန်ရှောင်းသည် ဂျာမီနယ်အဖွဲ့အစည်းဌာနချုပ်၏ အခြေခံဖွဲ့စည်းပုံကို သိ၏။ မြေအောက်ဌာနချုပ်သည် မြေပြင်ဌာနချုပ်နှင့် ချိတ်ဆက်ထားသည်။ ဓာတ်လှေကားတွင် လူတစ်ဦး၏ အထောက်အထားကို ခွင့်ပြုခြင်းဖြင့် မြေအောက်ရုံးချုပ်သို့ ဝင်ရောက်နိုင်သည်။ ဂျာမီနယ်အဖွဲ့အစည်းမှ ကစားသမားအချို့ပင် အပါအဝင် လူအများအပြားသည် မြေပြင်ဌာနချုပ်သို့ ဝင်ရောက်ရန် အခွင့်အာဏာရှိသည်။ ဟန်ရှောင်းသည် သင့်လျော်သောပစ်မှတ်ကို ရွေးချယ်ခဲ့ပြီး သိုသိုသိပ်သိပ်ဖြင့် ထောင့်တစ်နေရာမှ ပစ်မှတ်၏ ပုံစံသို့ ပြောင်းလဲလိုက်သည်။ ထို့နောက် သူသည် ၎င်း၏ သက်သေခံကတ်ပြားအသစ်ဖြင့် ဓာတ်လှေကားထဲသို့ ဝင်ကာ စကင်နာပေါ်တွင် စကင်န်ဖတ်သည်။ မီးစိမ်းပြပြီး ဓာတ်လှေကားက မြေအောက်အလွှာတွင် ရပ်တန့်သွား၏။ တံခါးများပွင့်ပြီးနောက် ဟန်ရှောင်း၏ မြင်ကွင်းထဲသို့ မြေအောက်ဌာနချုပ်ဆီသို့ ဦးတည်သွားသည့် သတ္တုဥမင်လိုဏ်ခေါင်းတစ်ခု ပေါ်လာသည်။

သူက တံခါးကိုဖွင့်ပြီး ဝင်သွားသည်။ မြေအောက်ဌာနချုပ်သည် လေးနက်ပြီး တိတ်ဆိတ်နေသည်။ မြေပြင်ပေါ်ကဲ့သို့ သက်ဝင်မှုမရှိပေ။ လေထုထဲတွင် လေးနက်မှုကို ရှင်းရှင်းလင်းလင်း ခံစားနိုင်သည်။ လှည့်ပတ်သွားလာနေသော အဖွဲ့ဝင်များအားလုံးတွင် ခံစားချက်ကင်းမဲ့သော အမူအရာများရှိပြီး အရှိန်အဟုန်ဖြင့် လျင်မြန်စွာ လျှောက်သွားကြသည်။ လူတိုင်း အလုပ်ရှုပ်နေပုံရ၏။ ဟန်ရှောင်း၏ မျက်လုံးများ လက်လာသည်။ သူ့ခန္ဓာကိုယ်ထဲရှိ စွမ်းအင်တွေကို ဖုံးအုပ်ပြီး သာမန်လူတစ်ယောက်လို ပြုမူလိုက်၏။ ထို့နောက် သူ၏ကော်လာကို ဆန့်လိုက်ပြီး သူ၏ နောက်ထပ်ခြေလှမ်းအတွက် အစီအစဉ်ဆွဲရင်း လမ်းလျှောက်လာသည်။

သူသည် မြေအောက်ဌာနချုပ်တွင် ရှိနေပြီဖြစ်သောကြောင့် အောင်မြင်မှုဆီသို့ လမ်းတစ်ဝက်ရောက်နေပြီ ဖြစ်သည်။

ထိုးဖောက်စိမ့်ဝင်တယ်ဆိုတာ ဒီလိုမျိုး ဖြစ်သင့်တယ်။

အကြာကြီး အချိန်ဆွဲရတာက သူ့အတွက် မကောင်းလှပေ။ သူ့အထောက်အထားကို ဖော်ထုတ်ခံရလျှင် အလွန်ဆိုးရွားတဲ့ အနေအထားသို့ ရောက်သွားလိမ့်မည်။ သူသည် ပစ္စည်းအိတ်ကို ထိလိုက်ပြီး အနည်းငယ် ပိုလုံခြုံသွားသလို ခံစားလိုက်ရသည်။

ဌာနချုပ်ရှိ မည်သူကိုမျှ မကယ်တင်မီတွင်၊ ဗဟိုကွန်ပြူတာမှတဆင့် လုံခြုံရေးအစီအမံများကို ပိတ်ထားရမည်ဖြစ်ပြီး၊ သူ့တွင်ရှိသော အခြားပန်းတိုင်တစ်ခုအတွက် ဗဟိုကွန်ပြူတာကိုလည်း ဝင်ရောက်အသုံးပြုရမည်ဖြစ်သည်။ ထို့ကြောင့် ဗဟိုကွန်ပြူတာ အသုံးပြုရန် အခွင့်အာဏာရှိသော ဓားစာခံတစ်ဦး လိုအပ်နေသည်။ ကံကောင်းထောက်မစွာဖြင့် ဟန်ရှောင်းသည် ဟိုးရှေးရှေးကတည်းက တစ်ယောက်ယောက်ကို သတိရနေခဲ့သည်။

ဆိုင်ဘာလော့စ်