ဓားဧကရာဇ်တွေကြားက တိုက်ပွဲ
Vol. 52 Ch. 700
ပေပေါင်းတစ်သိန်းကျော် မြင့်တဲ့ တောင်ထွတ်တစ်ခု ……
သည်တောင်ထွတ်ရဲ့ အပေါ်မှာက ခရမ်းရောင် ဝါးရုံတော တစ်ခု ရှိနေပြီး အဲသည် ဝါးရုံတော ထဲမှာတော့ ခရမ်းရောင် ဝတ်စုံကို ဝတ်ဆင်ထားတဲ့ သက်လတ်ပိုင်း အရွယ် လူကြီးတစ်ယောက် ရှိနေပါတယ် ။
" သြော်……ဓားဧကရာဇ်တဲ့လား "
လူကြီးက အဝေးတစ်နေရာက မိုးကုပ်စက်ဝိုင်းကို ငေးမျှော် ကြည့်ရင်းနဲ့ တီးတိုး ရေရွတ်လိုက်ပါတယ် ။
သည်လူကြီးကတော့ ခရမ်းရောင်ဝါးဂိုဏ်းရဲ့ ဂိုဏ်းချုပ်ဖြစ်သူ ခရမ်းရောင်ဝါး မဟာ ဧကရာဇ်ကလွဲလို့ တခြားသူ မရှိပါဘူး ။
လီဖူချန်းလိုပါပဲ ။ ခရမ်းရောင်ဝါး မဟာ ဧကရာဇ်ဟာလည်း ဓားတာအိုကို လျှောက်လှမ်းတဲ့ ကျင့်ကြံသူ တစ်ဦး ဖြစ်ပါတယ် ။
ပြီးတော့ သူ့ရဲ့ ခရမ်းရောင်ဝါး ဓားသိုင်းဟာ သည်ကောင်းကင်မဏ္ဍိုင် ကုန်းမြေတိုက်မှာ အလျှို့ဝှက် အဆန်းကြယ်ဆုံးလို့လည်း လူတိုင်းက တညီတညွတ်တည်း လက်ခံထားကြတာ ဖြစ်ပါတယ် ။
သည်နေရာမှာ တစ်ခု သိထားရမှာကတော့ ခရမ်းရောင်ဝါး မဟာ ဧကရာဇ်ဟာ အလောင်းပျံ ဧကရာဇ်နဲ့ တိုက်ခိုက်ခဲ့တုန်းက သူ့ရဲ့ ရှေးဟောင်း ရတနာဓားကို အသုံး မပြုခဲ့ဘူး ဆိုတာပါပဲ ။ သူက သည်အတိုင်း ဝါးဓားလေး တစ်လက်ကိုသာ အသုံးပြုခဲ့တာ ဖြစ်ပါတယ် ။
တကယ်လို့သာ သူ့အနေနဲ့ သူ့ရဲ့ လက်စွဲတော် ရှေးဟောင်း ရတနာဓားကို အသုံးပြုခဲ့လို့ကတော့ အလောင်းပျံ ဧကရာဇ်ဟာ သိုင်းကွက် အနည်းငယ် အတွင်းမှာပဲ ဒဏ်ရာ ရနေလောက်ပါပြီ ။
အားလုံး သိထားကြသလို တစ်နေ့လုံးလုံး တိုက်ခိုက်ကြမယ် ဆိုရင်တော့ အလောင်းပျံ ဧကရာဇ်ဟာ မသေရင်တောင်မှ ဒုက္ခိတ ဖြစ်နေမှာ အသေအချာပါပဲ ။
"သစ်သားစိမ်း ဓားတာအိုက အသက်ဓာတ် နဲ့ စိတ်နှလုံးကို အသားပေး ကျင့်ကြံရတာ ။ သည်ဟာက ထက်မြလွန်းပေမယ့် သီးသန့်ဆန်တယ် ။ ပြီးတော့ အစွမ်းကလည်း တကယ့် သေရေးရှင်ရေး အခိုက်အတန့်မှာမှ ပွင့်ထွက်လာတာ ။ ဒါပေမဲ့ သံဓား မဟာ ဧကရာဇ်ကတော့ ငါနဲ့ မတူဘူး ။ သည်တော့ သူက ဓားဧကရာဇ်ဘွဲ့ ခံထားတဲ့သူကို ဘယ်လိုမှ သည်အတိုင်း ကြည့်နေမှာ မဟုတ်ဘူး ။ အင်း…… စိတ်ဝင်စားစရာတွေတော့ စလာတော့မယ် ထင်ပါရဲ့ "
ခရမ်းရောင်ဝါး မဟာ ဧကရာဇ်က ခေါင်းတခါခါနဲ့ ခပ်တိုးတိုး ရေရွတ်လိုက်ပြန်ပါတယ် ။
ကောင်းကင်မဏ္ဍိုင် ကုန်းမြေတိုက်မှာက မဟာ ဧကရာဇ်တွေ တော်တော်များများ ရှိပေမယ့် နာမည်ကျော် အထင်ရှားဆုံး ထိပ်တန်း မဟာ ဧကရာဇ်ကတော့ သုံးပါးသာ ရှိပါတယ် ။
အဲသည် မဟာ ဧကရာဇ်တွေကတော့ ကောင်းကင်မဏ္ဍိုင် မဟာ ဧကရာဇ် ၊ အရိုးခေါင်းခွံ မဟာဧကရာဇ် နဲ့ သံဓား မဟာ ဧကရာဇ်တို့ပါပဲ ။
အဲသည်အထဲမှာမှ သံဓား မဟာဧကရာဇ်ရဲ့ တိုက်ခိုက်နိုင်စွမ်းဟာ ကောင်းကင်မဏ္ဍိုင် မဟာ ဧကရာဇ်နဲ့ ထပ်တူနီးပါးလောက် ကျပါတယ် ။ သူက တခြားအပိုင်းတွေမှာသာ ကောင်းကင်မဏ္ဍိုင် မဟာ ဧကရာဇ်အောက် ရောက်နေတာပါ ။
…
ဟူး………ဟူး……ဟူး……
သည်နေရာမှာက တိမ်တွေကြားထဲအထိ တိုးဝင်နေတဲ့ တောင်တစ်လုံး ရှိနေပြီး တောင်ထိပ်ပေါ်မှာကတော့ အရုပ် ပုပြတ်ပြတ် လူကြီးတစ်ယောက် ရှိနေပါတယ် ။
အဲသည်လူကြီးကတော့ ကောင်းကင်မဏ္ဍိုင် ကုန်းမြေတိုက်ရဲ့ နာမည်ကျော် သံဓား မဟာဧကရာဇ်ပါပဲ ။
" ကောင်းကင်မီးတောက် တုံယန်တောင်မှ သူ့ကို ဓားဧကရာဇ်အဖြစ် လက်ခံထားရတယ် ဆိုတော့ သူက ဘယ်လောက်အထိ အစွမ်း ထက်လို့ပါလိမ့် "
သံဓား မဟာဧကရာဇ်က လီဖူချန်းကို လုံးဝ အထင်မသေးဝံ့ပါဘူး ။ သူက လီဖူချန်းဟာ သူ့ထက်တောင်မှ အစွမ်းထက်လောက်တယ်လို့တောင် တွေးထားပါသေးတယ် ။
ဒါပေမဲ့လည်း ဓားဧကရာဇ် တစ်ပါး ဖြစ်ဖို့ ဆိုတာက တန်ခိုးအစွမ်း ထက်နေရုံနဲ့ မလုံလောက်သေးပါဘူး ။ ပြိုင်ဘက်ကင်းတဲ့ ဓားတာအိုကိုလည်း လိုအပ်ပါသေးတယ် ။
………
" စိတ်ဝင်စားစရာပဲ ။ကောင်းကင်မီးတောက် တုံယန်က အသက်ကြီးနေတာတော့မှန်တယ် ။ ဒါပေမဲ့ သူငယ်ပြန်ရလောက်တဲ့ အထိတော့ အသက် မကြီးသေးပါဘူး ။ အင်း…… ငါအားတဲ့ အချိန်ကျရင် ဓားဧကရာဇ်ဆီ တစ်ခါလောက် သွားကြည့်ဦးမှ "
……
" ဓားဧကရာဇ် ဟုတ်လား……ဟားဟား……သူက သူ့သွားထက် ပိုမာတဲ့ အရိုးကို ကိုက်မိမှာ မကြောက်ဘူးလား "
……
သည်အတောအတွင်းမှာတော့ အနယ်နယ် ၊အရပ်ရပ်က မဟာ ဧကရာဇ်တွေနဲ့ အထွတ်အထိပ် အဆင့် ဧကရာဇ် တချို့ဟာ ဓားဧကရာဇ်ဘွဲ့ ခံယူထားတဲ့ လီဖူချန်းအပေါ် အာရုံ စိုက်လာကြပါတယ် ။
….…
" အား……ဟင်းလင်းပြင် တာအို နှလုံးသားကို မွေးဖွားဖု့ိဆိုတာက ထင်သလောက် မလွယ်ပါလား ။ ကြည့်ရတာ ငါက အခုထိ ငါ့ကိုယ်ငါ အထင်ကြီးမိနေတုန်းပါပဲလား "
ရက်အနည်းငယ် အကြာမှာတော့ လီဖူချန်းဟာ ဟင်းလင်းပြင်တာအို နှလုံးသား မွေးဖွားဖို့ ကိစ္စကို ယာယီ ခဏ မေ့ထားလိုက်ပါတယ် ။
အမှန်အတိုင်း ပြောရမယ်ဆိုရင် သူ့ရဲ့ ဟင်းလင်းပြင် ဥပဒေသအပေါ် နားလည်သိမြင်မှုက မနိမ့်ကျလှပါဘူး ။ ဒါပေမဲ့လည်း ပြသနာက သူနားလည်သိမြင်ထားတဲ့ ဟင်းလင်းပြင် ဥပဒေသတိုင်းဟာ ဘုံခုနစ်ဆင့် ကောင်းကင်ဓားကနေ ရလာတာတွေချည်း ဖြစ်နေတာပါပဲ ။ အဲသည်အတွက် လီဖူချန်းရဲ့ ဟင်းလင်းပြင် ဥပဒေသဟာ ကိုယ်တိုင်ကိုယ်ကျ သုံးသပ်ဆင်ခြင်တဲ့ အပိုင်းမှာ အတော်လေး အားနည်းနေတယ်လို့ ဆိုရပါမယ် ။
လီဖူချန်းကတော့ တကယ်လို့ သူ့အနေနဲ့ ဟင်းလင်းပြင် တာအိုနှလုံးသားကို မွေးဖွားချင်တယ်ဆိုရင် သူ့ရဲ့ ကိုယ်ပိုင် သုံးသပ်ဆင်ခြင်နိုင်မှု ပါကိုပါမှ ရမယ်လို့ ခံစားမိနေပါတယ် ။ဘုံခုနစ်ဆင့် ဓားထဲက ရလာတဲ့ ဟင်းလင်းပြင်တာအို ဓားသိုင်းတွေကိုတော့ မှီငြမ်းတာထက် ပိုပြီး အားကိုးလို့ မသင့်တော်ပါဘူး ။
" အင်း…… ကောင်လေးက ဆိုးတော့ မဆိုးပါဘူး "
ဘုံခုနစ်ဆင့်ဓားရဲ့ အတွင်းပိုင်း တစ်နေရာမှာတော့ ဓားဝိညာဉ်ဟာ လီဖူချန်းကို ကြည့်ပြီး ခေါင်းတညိတ်ညိတ် လုပ်နေပါတယ် ။
တကယ်တမ်း သူသိသလောက် ဆိုရင်တော့ ဟင်းလင်းပြင်တာအို ဓားသိုင်းတွေကို အမှီပြုပြီး ဟင်းလင်းပြင် တာအို နှလုံးသား မွေးဖွားဖို့ ဆိုတာက လုံးဝ မဖြစ်နိုင်တဲ့ ကိစ္စပါပဲ ။ ဒါပေမဲ့လည်း သူက လီဖူချန်းကို သည်ကိစ္စနဲ့ ပတ်သက်ပြီး ဘာမှ ပြောပြမှာ မဟုတ်ပါဘူး ။
ဘာဖြစ်လို့လဲ ဆိုတော့ သူက လီဖူချန်းကို ကိုယ်တိုင် သိမြင်စေချင်လို့ပါပဲ ။ သည်လိုမှပဲ လီဖူချန်းဟာ နောင်တစ်ချိန်မှာ လမ်းစဉ် အများကြီးကို မလိုက်ဖို့အတွက် သင်ခန်းစာ ရသွားမှာပါ ။
ဟင်းလင်းပြင် ဓားနှလုံးသားအပေါ် လက်လျော့လိုက်ပြီးတဲ့ နောက်မှာတော့ လီဖူချန်းဟာ သူ့ရဲ့ ဓားကွက်တွေအပေါ် အာရုံ ပြောင်းလိုက်ပါတော့တယ် ။
သည်တစ်ခါ သူ့ရဲ့ ကြိုးစားအားထုတ်မှုကတော့ အကျိုး မယုတ်ခဲ့ပါဘူး ။ သူက တစ်လအကြာမှာပဲ ကောင်းကင်စက်ကွင်း ဓားအကာအကွယ်ကို ကောင်းကင် အဆင့်မြင့် အဆင့် ရောက်အောင် အဆင့် မြှင့်တင်နိုင်ခဲ့ပါတယ် ။
137
ခုခံခြင်းကို အသားပေးတဲ့ ဓားကွက်တစ်ကွက် ဖြစ်တဲ့ ကောင်းကင်စက်ကွင်း ဓားအကာအကွယ်ဟာ လီဖူချန်း အတွက်တော့ တခြားသော ဓားကွက်တွေထက် ပိုအကျိုးသက်ရောက်မှု ရှိတယ်လို့ ဆိုရပါမယ် ။
ဘာဖြစ်လို့လဲဆိုတော့ လီဖူချန်းမှာက တိုက်စစ်ဆင်ဖို့အတွက် ကြယ်ပျံဓားသိုင်း နဲ့ ဗလာနယ် ကောင်းကင်ဘုံ ဓားသိုင်းတို့ ရှိနေပြီးသား မဟုတ်ပါလား ။
" ဓားဧကရာဇ် …… ကျုပ်တို့ ကောင်းကင်မီးတောက် အစည်းအရုံးမှာတော့ ကြယ်၇ပွင့် လိပ်ပြာအသိစိတ်အာရုံ လျှို့ဝှက် နည်းစနစ်က ၃ခုပဲ ရှိတယ် ။ ဓားဧကရာဇ်အတွက် အဆင်ပြေရဲ့လား "
တစ်နေ့မှာတော့ ကောင်းကင်မီးတောက် တုံယန်ဟာ လီဖူချန်းဆီကို ဆိုင်းမဆင့် ၊ဗုံမဆင့် ရောက်လာချခဲ့ပါတယ် ။
ဒါပေမဲ့ သူက လက်ချည်း ဗလာသက်သက်နဲ့ ရောက်လာတာတော့ မဟုတ်ပါဘူး ။ သူက သူနဲ့အတူ ကြယ်၇ပွင့် လိပ်ပြာ အသိစိတ်အာရုံ လျှို့ဝှက် နည်းစနစ် သုံးခုကိုလည်း ယူဆောင် လာခဲ့ပါသေးတယ် ။
လိပ်ပြာ အသိစိတ်အာရုံ လျှို့ဝှက် နည်းစနစ် ဆိုတာက ဘယ်ဂိုဏ်းအဖွဲ့အစည်းမှာပဲဖြစ်ဖြစ် ရှားပါးလွန်းတဲ့ ပညာရပ်တွေပါပဲ ။
အဲသည်အတွက် ကြယ်၇ပွင့် လိပ်ပြာ အသိစိတ်အာရုံ လျှို့ဝှက် နည်းစနစ်တွေ ဆိုတာက ယေဘုယျအားဖြင့် အမြင့်ဆုံး အဆင့်လို့ပဲ ဆိုရပါမယ် ။
ကောင်းကင်မဏ္ဍိုင် ကုန်းမြေတိုက်မှာ ဆိုရင်တော့ တစ္ဆေ မဟာ ဧကရာဇ် တစ်ဦးတည်းကသာ ခြွင်းချက် အနေနဲ့ ကြယ်၈ပွင့် လိပ်ပြာ အသိစိတ်အာရုံ လျှို့ဝှက် နည်းစနစ်ကို ပိုင်ဆိုင်ထားတာပါ ။
လီဖူချန်းက သူ့ရဲ့ လိပ်ပြာ အသိစိတ်အာရုံ ပါရမီကို သည်အတိုင်း ပစ်ထားဖို့ စိတ်ကူး မရှိပါဘူး ။
အဲသည်အတွက် သူက ကြယ်၇ပွင့် လိပ်ပြာ အသိစိတ်အာရုံ လျှို့ဝှက် နည်းစနစ်တွေကို အခြေခံပြီး သူ့ရဲ့ကိုယ်ပိုင် ကြယ်၈ပွင့် လိပ်ပြာ အသိစိတ်အာရုံ လျှို့ဝှက် နည်းစနစ်ကို တီထွင်ဖို့ စဉ်းစားထားပါတယ် ။
လီဖူချန်း ယုံကြည်ထားတာကတော့ တကယ်လို့ သူ့အနေနဲ့ ကြယ်၈ပွင့် လိပ်ပြာ အသိစိတ်အာရုံ လျှို့ဝှက် နည်းစနစ်ကို တီထွင်နိုင်ခဲ့မယ် ဆိုရင် မဟာ ဧကရာဇ်တွေ မပြောနဲ့ ။ အကြို-သူတော်စင်တွေတောင်မှ သူ့ကို မော်ကြည့်ဝံ့တော့မှာ မဟုတ်ပါဘူး ။
ဒါပေမဲ့လည်း ကြယ်၇ပွင့် လိပ်ပြာ အသိစိတ်အာရုံ လျှို့ဝှက် နည်းစနစ် သုံးခုကို အခြေခံပြီး ကြယ်၈ပွင့် လိပ်ပြာ အသိစိတ်အာရုံ လျှို့ဝှက် နည်းစနစ် တီထွင်ဖို့ ဆိုတာက ယုတ္တိမဲ့ရာ ကျလွန်းပါတယ် ။ အဲသည်အတွက် လီဖူချန်း ကိုယ်တိုင်လည်း သူ့အနေနဲ့ ကြယ်၈ပွင့် လိပ်ပြာ အသိစိတ်အာရုံ လျှို့ဝှက် နည်းစနစ်ကို တီထွင်နိုင်ပါ့မလား ဆိုတာ မသေချာပါဘူး ။
"ကောင်းကင်မီးတောက် အစည်းအရုံး သခင်ကို ကျေးဇူး အများကြီး တင်ပါတယ် ။ ကျွန်တော်က အစည်းအရုံးသခင်ကို ကျးဇူးကြွေး တစ်ခု တင်သွားပြီပေါ့ "
လီဖူချန်းက ကျေးဇူးကြွေးဆိုတဲ့ စကားလုံးကို အပြန်အလှန် အနေနဲ့ အသုံးပြုလိုက်ပါတယ် ။
" မဟုတ်တာ ။ သည်လောက် ကိစ္စလေးက ကျုပ်အတွက် ဘာမှ အပန်း မကြီးပါဘူး "
ကောင်းကင်တုံယန်ကလည်း ချက်ကနဲဆို မီးက တောက်ပြီးသားပါပဲ ။
သူက လီဖူချန်းရဲ့ ကျေးဇူးကြွေးဟာ တခြားအရာတွေထက် ပိုပြီး တန်ဖိုးကြီးတယ် ဆိုတာကို သိပါတယ် ။
လီဖူချန်းက ဥပဒေသ ပြောင်းလဲခြင်း နယ်ပယ် အနိမ့်ပိုင်းမှာသာ ရှိနေသေးတာတောင်မှ သည်လောက်အထိ အစွမ်း ထက်နေပါပြီ ။
နောင်အနာဂတ်ကျရင် လီဖူချန်းဟာ ဘယ်လောက်အထိတောင် အစွမ်းထက်မယ် မသိပါဘူး ။
" ကောင်းကင်မီးတောက် တုံယန် …… ဒါက ခင်ဗျား အသိအမှတ် ပြုထားတယ် ဆိုတဲ့ ဓားဧကရာဇ်လား "
အဲသည်အချိန်မှာပဲ လေဟာနယ် ဟင်းလင်းပြင်ထဲကနေပြီး သြဇာအာဏာသံ အပြည့်နဲ့ အသံ တစ်ခုဟာ ထွက်ပေါ် လာခဲ့ပါတယ် ။
" သံဓား မဟာဧကရာဇ် …… ခင်ဗျားလား "
ကောင်းကင်မီးတောက် တုံယန်က လေဟာနယ် ဟင်းလင်းပြင်ထဲကို ကြည့်လိုက်ရင်းနဲ့ ရေရွတ်လိုက်ပါတယ် ။
သူ့ရဲ့ မျက်နှာကလည်း သိပ်တော့ မကောင်းလှပါဘူး ။
သံဓား မဟာ ဧကရာဇ် ဆိုတာက မဟာ ဧကရာဇ် တစ်ပါး ဖြစ်တဲ့အပြင် ကောင်းကင်မဏ္ဍိုင်ကုန်းမြေတိုက်ရဲ့ တိုက်ခိုက်ရေး အတွေ့အကြုံ အကြွယ်ဝဆုံး ဧကရာဇ် တစ်ပါးလည်း ဖြစ်ပါတယ် ။
သူ့ရဲ့ တန်ခိုးအစွမ်းက အရိုးခေါင်းခွံ မဟာ ဧကရာဇ်ကို မမီဘူး ဆိုပေမယ့်လည်း သူရဲ့ တန်ခိုးအစွမ်းဟာ အရိုးခေါင်းခွံ မဟာ ဧကရာဇ်လို အရိုးဖြူ သူတော်စင် သရဖူ အပေါ်ကို မှီခိုနေတာ မဟုတ်ပါဘူး ။
သူက သူ့ရဲ့ ဓားပညာ သက်သက်နဲ့ သူရောက်သင့်တဲ့ နေရာမှာ ရပ်တည်နေတာပါ။
အဲသည်အတွက် ကောင်းကင်မီးတောက် တုံယန်က သံဓား မဟာ ဧကရာဇ်ကို အရိုးခေါင်းခွံ မဟာ ဧကရာဇ်ထက် ပိုပြီးကြောက်ရွံ့မိပါတယ် ။
" ဟား……ဟား……ဟား…… ခင်ဗျားက ကျုပ်ကို မှတ်မိသားပဲ "
ရယ်သံ အဆုံးမှာတော့ လူရိပ်တစ်ရိပ်ဟာ လေဟာနယ် ဟင်းလင်းပြင်ထဲက နေပြီး တိုးထွက်လာခဲ့ပါပြီ ။
အဲသည်လူကတော့ သံဓား မဟာ ဧကရာဇ်ကလွဲပြီး တခြားသူ မရှိပါဘူး ။
သံဓား မဟာ ဧကရာဇ်ဆိုတဲ့ နာမည်နဲ့ လိုက်အောင်ပါပဲ ။ သူက သံသရဖူ တစ်ခု ဝတ်ဆင်ထားပြီး ခါးမှာလည်း သံဓားတစ်လက်ကို ချိတ်ဆွဲ ထားပါသေးတယ် ။
" မင်းက ဓားဧကရာဇ် ဆိုတာလား "
သံဓား မဟာ ဧကရာဇ်က လီဖူချန်းကိုကြည့်ုပီး အသံ ခပ်ပြတ်ပြတ်နဲ့ မေးလာခဲ့ပါတယ် ။
" အင်း "
လီဖူချန်းကလည်း မငြင်းပါဘူး ။
" ဓားဧကရာဇ် ဆိုတာက ဓားတွေရဲ့ ဧကရာဇ်ကို ခေါ်တာကွ ။ မင်းက သည်ဘွဲ့နာမည်ကို ခံယူဖို့ အရည်အချင်း ပြည့်လို့လား "
သံဓား မဟာ ဧကရာဇ်က လီဖူချန်းကို သေသေချာချာ ၊ စေ့စေ့စပ်စပ် ကြည့်လိုက်ပြီး ထပ်မေးလာခဲ့ပြန်ပါတယ် ။
ဓားတာအို မဟာ ဧကရာဇ် ဆိုတာက ဓားတာအိုကို ကျင့်ကြံတဲ့ မဟာ ဧကရာဇ် တစ်ပါး ဖြစ်ပြီး အဲဒါက သူတို့ရဲ့ ဓားတာအို အစွမ်းကို ရည်ညွှန်းနေတာလည်း ဖြစ်ပါတယ် ။
ဒါပေမဲ့ ဓားဧကရာဇ်ကတော့ အဲသည်လို မဟုတ်ပါဘူး ။
ဓားဧကရာဇ် ဆိုတာက ဓားသမားတွေ ထဲမှာမှ ဧကရာဇ် ဖြစ်နေသူကို ဆိုလိုပြီး ဓားသမားတွေရဲ့ ရိုသေ လေးစားမှုကိုလည်း ရရှိထားရဦးမှာပါ ။
အရည်အချင်းလား …… သိပ်ပြည့်တာပေါ့ ။ မယုံရင် ခင်ဗျား လာစမ်းကြည့်လေ "
လီဖူချန်းက မခိုးမခန့် ပြုံးလိုက်ပြီး စိမ်ခေါ်လိုက်ပါတယ် ။
' အင်း …… သည်ကောင်လေးက ခေတော့ မခေဘူး '
သံဓား မဟာ ဧကရာဇ်က လီဖူချန်းကိုကြည့်ပြီး တွေးလိုက်မိပါတယ် ။
လီဖူချန်းရဲ့ လေသံက ကိုယ့်ကိုယ်ကိုယ် ယုံကြည်မှု အပြည့်ရှိတဲ့ သူတစ်ယောက်ရဲ့ လေသံပါပဲ ။
ဒါကြောင့်လည်း ကောင်းကင်မီးတောက် တုံယန်က သူ့ကို ဓားဧကရာဇ်လို့ သမုတ်တာပဲ ဖြစ်ရပါမယ် ။
" ဓားဧကရာဇ်ဆိုတာ တန်ခိုးအစွမ်း ထက်ရုံတင် မကဘူး ။ ဓားတာအိုအပေါ် နားလည်ကျွမ်းဝင်မှုမှာလည်း ထိပ်ဆုံး ဖြစ်နေရမယ် ။တကယ်လို့ မင်းကငါ့ကို ဓားတာအို နားလည်မှု အပိုင်းမှာ အနိုင်ယူနိုင်ရင်တော့ ဓားတာအို ဧကရာဇ်ဘွဲ့က မင်းအပိုင်ပဲ "
သံဓား မဟာ ဧကရာဇ်ကလည်း လီဖူချန်းရဲ့ စိမ်ခေါ်မှုကို လုံးဝ မငြင်းပါဘူး ။
" ခင်ဗျားက ဓားတာအို နားလည်ကျွမ်းဝင်မှုဆိုတဲ့ အပိုင်းကို ဘယ်လို ယှဉ်ချင်တာလဲ "
လီဖူချန်းက ခပ်ပြုံးပြုံးနဲ့ ပြန်မေးလိုက်ပါတယ် ။
" ရှင်းရှင်းလေးပဲ …… မင်းနဲ့ငါ နှစ်ယောက်စလုံး ဓားသိုင်း သီးသန့်ပဲ သုံးကြမယ် ။ ငါတို့နှစ်ယောက်ထဲက ဘယ်သူပဲဖြစ်ဖြစ် ဓားကွက် တစ်ကွက် ရှုံးတာနဲ့ ရှုံးပြီ "
" ဟုတ်ပြီလေ "
လီဖူချန်းက သံဓားမဟာ ဧကရာဇ်ရဲ့ ဆိုလိုရင်းကို သဘော မပေါက်ဘဲ မနေပါဘူး ။
သံဓားမဟာ ဧကရာဇ်ရဲ့ ဆိုလိုရင်းက သူတို့နှစ်ယောက်ထဲက ဘယ်သူပဲဖြစ်ဖြစ် ဓားကွက်တစ်ကွက် တုံ့ဆိုင်းသွားတာနဲ့ အဲသည်လူက ရှုံးပြီလို့ ဆိုလိုတာပါ ။ သည်အရှုံးက ဘာဒဏ်ရာမှ မရခဲ့ရင်တောင်မှ သက်ဆိုင်ပါတယ် ။
" ဒါဆိုရင် ကောင်းကင်ပေါ် တက်ကြရအောင် ။ သည်နေရာက ငါတို့အတွက် အရမ်း ကျဉ်းလွန်းမယ် "
" အင်း "
အဲသည်နောက်မှာတော့ လီဖူချန်းတို့ နှစ်ယောက်ဟာ ကောင်းကင်ပေါ်ကို ပျံတက် သွားခဲ့ကြပါပြီ ။
တစ်ဆက်တည်း ဆိုသလိုပဲ ကောင်းကင်မီးတောက် တုံယန် ၊ ရန်ချင်းဟူ ၊ ယန်ထျန်း နဲ့ ယန်လုံတို့ဟာလည်း ကောင်းကင်ပေါ်ကို လိုက်တက် သွားကြပါတယ် ။
သည်လို အကြွင်းမဲ့ ဓားသမား နှစ်ယောက်ရဲ့ တိုက်ပွဲ ဆိုတာက ကြုံရခဲလှတာ မဟုတ်ပါလား ။
" စလိုက်ကြစို့ "
ရွှမ်း……
ထင်……ထင်……ထင်……
အဲသည်နောက်မှာတော့ ဓားတာအို တိုက်ပွဲဟာ စတင်ပါတော့တယ် ။
အစပိုင်းမှာတော့ သူတို့ နှစ်ယောက်ထဲက ဘယ်သူကမှ သူတို့ရဲ့ အားထားရတဲ့ ဓားသိုင်းတွေကို ထုတ်မသုံးသေးပါဘူး ။
သူတို့က သည်အတိုင်း ဓားတွေကို ဝှေ့ယမ်းနေရင်းနဲ့သာ တစ်ယောက်နဲ့တစ်ယောက် အကဲ စမ်းနေခဲ့ကြပါတယ် ။
ဒါပေမဲ့လည်း သူတို့ရဲ့ ဓားချက်တွေထဲကနေ ထွက်ပေါ်လာတဲ့ အရှိန်အဟုန်တွေကတော့ ကောင်းကင် အဆင့်မြင့် ဓားသိုင်းတွေနဲ့တောင် ယှဉ်လို့ ရနေပါပြီ ။
" ဒုက္ခိတ ဓားသိုင်း "
တစ်ယောက်နဲ့တစ်ယောက် လုံလောက်တဲ့ အထိ အကဲစမ်းပြီးတဲ့ နောက်မှာတော့ သံဓား မဟာ ဧကရာဇ်က သူ့ရဲ့ ဓားသိုင်းကို စတင် အသုံးပြုလာပါတော့တယ် ။
သူ့ရဲ့ ပစ်မှတ်ကတော့ လီဖူချန်းရဲ့ အဓိက သွေးကြောတွေ နဲ့ သေကွင်း၊သေကွက်တွေပါပဲ ။
" သွားစမ်း "
ဓားဧကရာဇ်ဘွဲ့ ခံယူထားတဲ့ လီဖူချန်းရဲ့ တုံ့ပြန်မှုကလည်း လုံးဝ တုံ့ဆိုင်းမနေပါဘူး ။
သူက ဓားစက်ဝိုင်း တစ်ကွင်းကို ရေးဆွဲလိုက်ပြီး သူ့ကိုယ်သူ ကာကွယ် ထားလိုက်ပါတယ် ။
" ကပ်ရောဂါ ဓားသိုင်း "
သံဓား မဟာ ဧကရာဇ်ရဲ့ တိုက်ကွက်တွေကလည်း ဇယ်ဆက်နေသလိုပါပဲ ။
သူ့ရဲ့ ဓားကွက်တွေက ရေစီးကြောင်း တစ်ခုလို အလျဉ်မပြတ်ဘဲ လီဖူချန်းဆီကို တိုးဝင် လာပြန်ပါတယ် ။
ဒါပေမဲ့လည်း လီဖူချန်းရဲ့ ကောင်းကင်စက်ကွင်း ဓားအကာအကွယ်ကို ချိုးဖောက်ဖို့ ဆိုတာက အဲသည်လောက် မလွယ်ပါဘူး ။
" ဗလာနယ် အရှိတရား "
သံဓား မဟာ ဧကရာဇ်ရဲ့ တိုက်စစ်ဆင်မှု ပြီးတာနဲ့ တစ်ပြိုင်နက် လီဖူချန်းရဲ့ တိုက်ကွက်က စတင် လာပါတော့တယ် ။
အဲဒါကတော့ ဗလာနယ် အရှိတရားပါပဲ ။
" စက်ဝန်း ဓားသိုင်း "
သံဓား မဟာ ဧကရာဇ်ကလည်း မခေပါဘူး ။ သူက အခြေအနေ မဟန်တာကို သတိပြုမိလိုက်တာနဲ့ တစ်ပြိုင်နက် နောက်ထပ် ဓားသိုင်း တစ်မျိုးကို ထုတ်သုံးလိုက်ပြန်ပါတယ် ။
သူ့ရဲ့ ဓားစက်ဝန်းကတော့ လီဖူချန်းရဲ့ ဓားစက်ဝန်းနဲ့ သိပ်မကွာခြားလှပါဘူး ။
ပြီးတော့ သူတို့ရဲ့ ဓားတွေကလည်း အဆင့်ညီတဲ့ ဓားတွေ ဖြစ်နေတဲ့အတွက် တိုက်ပွဲဟာ အတော်လေး ကြည့်လို့ ကောင်းနေခဲ့ပါတယ် ။
" ဗလာနယ်ဓား "
ဗလာနယ် အရှိတရား အပြီးမှာတော့ ဗလာနယ်ဓားက ကပ်လျက် လိုက်ပါ လာခဲ့ ပြန်ပါပြီ ။
သည်ဓားချက်ကတော့ သံဓား မဟာ ဧကရာဇ်ကိုတောင် ရှုံးနိမ့်စေတော့မလိုပါပဲ ။
" ဓားခန္ဓာကိုယ် "
သံဓား မဟာ ဧကရာဇ်ကလည်း အကြောင်းမဲ့ နာမည်ကျော်နေတာ မဟုတ်ပါဘူး ။
သူက သူ့ရဲ့ ခန္ဓာကိုယ် တစ်ခုလုံးကို ဓားအလင်းတန်း တစ်ခု အသွင် ပြောင်းလိုက်ပြီး လီဖူချန်းရဲ့ ဗလာနယ်ဓားကို တန်ပြန်လိုက်ပါတယ် ။
ဓားခန္ဓာကိုယ် ဆိုတာက ဓားနဲ့လူ ပေါင်းစည်းခြင်းကို အခြေခံပြီး တီထွင်ထားတဲ့ ဓားသိုင်းပါပဲ ။
" ကြယ်ကြွေ "
လီဖူချန်းကလည်း ဓားအလင်းတန်း တစ်ခုအသွင် ပြောင်းပြီး သံဓား မဟာ ဧကရာဇ်ကို ပြန်လည် တိုက်ခိုက်လိုက်ပါတယ် ။
ထင်……ထင်……ထင်……
ထန်………ထန်……
လူတွေအားလုံးကတော့ ကောင်းကင်ယံပေါ်မှာ ဓားအလင်းတန်းနှစ်ခု အားပြိုင်နေတာကလွဲပြီး တခြား ဘာကိုမှ မမြင်ရတော့ပါဘူး ။
ဓားအလင်းတန်း နှစ်ခု ထိပ်တိုက် ရင်ဆိုင် တွေ့မိတိုင်းမှာ ဆိုရင်လည်း မီးပွင့်တွေက တဖွားဖွား ပွင့်ထွက် လာကုန်ပါတယ် ။
အဆုံးအစမဲ့တဲ့ ဓားဆန္ဒတွေကလည်း မုန်တိုင်းတွေလိုပဲ ကောင်းကင်ယံ ထက်မှာ လှိုင်းအထပ်ထပ် ထန်နေပြီး ပတ်ဝန်းကျင် တစ်ခုလုံးကို ပျံ့နှံ့နေခဲ့ပါပြီ ။
" သံဓား မဟာ ဧကရာဇ်က အရင်ကထက် ပိုပြီး အစွမ်း ထက်လာပါလား "
ကောင်းကင်မီးတောက် တုံယန်ကတော့ တိုက်ပွဲကို အကဲ ခတ်နေရင်းနဲ့ တီးတိုး ရေရွတ်လိုက်ပါတယ် ။
" သံဓား မဟာ ဧကရာဇ်…… ဒါက ခင်ဗျား တတ်နိုင်တာ အကုန်ပဲလား ။ ဒါဆိုရင်တော့ ခင်ဗျား ကျုပ်ကို ဘယ်လိုမှ အနိုင်ယူနိုင်မှာ မဟုတ်ဘူးနော "
လီဖူချန်းကတော့ အခုချိန်အထိ အေးအေးဆေးဆေး ရှိနေဆဲပါပဲ ။
သံဓား မဟာ ဧကရာဇ်ရဲ့ ဓားကွက်တွေက သူ့အတွက်တော့ ဘာမှ မဟုတ်ပါဘူး ။ သူ့ရဲ့ ဓားနှလုံးသားက တိုက်ပွဲကို ထိန်းချုပ်နိုင်ဖို့အတွက် ကောင်းကောင်းကြီး လုံလောက်ပါတယ် ။
" လီဖူချန်း…… ငါ့ရဲ့ သည်ဓားကွက်ကို ခံကြည့်စမ်း "
" အာဏာရှင် ဓားသိုင်း "
သံဓား မဟာ ဧကရာဇ်က ဓားနဲ့လူ ပေါင်းစည်းခြင်း အခြေအနေကနေ ဆုတ်ခွာလိုက်ပြီး ဓားသိုင်း တစ်မျိုးကို ပြောင်းလိုက်ပြန်ပါတယ် ။
ရွှမ်း……
သည်ဓားသိုင်းကတော့ တကယ်ကို ကြောက်စရာပါပဲ ။
ဓားကွက် ထွက်ပေါ်လာတာနဲ့ တစ်ပြိုင်နက် ဓားကန့်လန့်ကာကြီး တစ်ခုက လီဖူချန်းကို အရာရာနဲ့ စည်းခြားထားလိုက်ပြီး ပိတ်လှောင် ထားပစ်လိုက်ပါတယ် ။
အဲသည်ထဲမှာတော့ ယင်နဲ့ယန်တောင်မှ ခြွင်းချက် မရှိပါဘူး ။
တိုက်ပွဲကို ကြည့်နေတဲ့ လူတွေကလည်း ကျောက်ရုပ်ကြီးတွေလိုပါပဲ ။ ကြည့်ရတာတော့ သူတို့က မျက်တောင် ခတ်ဖို့ကိုတောင် မေ့နေပုံ ရပါတယ် ။
" သူက ဓားကမ္ဘာနဲ့တောင် ဆက်သွယ်နေနိုင်ပြီလား "
ဘာကြောင့်မှန်းတော့ မသိပါဘူး။
ကောင်းကင်မီးတောက် တုံယန်ရဲ့ ဒူးတွေက မသိမသာလေး တဆတ်ဆတ် တုန်ယင်လာခဲ့ပါတယ် ။
တကယ်လို့ သံဓား မဟာ ဧကရာဇ်နဲ့ တိုက်ခိုက်နေတာက လီဖူချန်း မဟုတ်ဘဲ သူဖြစ်နေမယ် ဆိုရင် သည်တစ်ကွက်နဲ့တင် သူဟာ ကိစ္စ ပြတ်သွားလောက်ပါပြီ ။
ဓားကမ္ဘာ ……
ဒါက နောက်စရာ အရာ တစ်ခု မဟုတ်ပါဘူး ။
ဓားကမ္ဘာဆိုတာက ဒဏ္ဍာရီ ဆန်လွန်းလှပြီး ဓားတာအို အပေါ်မှာ သက်ဝင် ယုံကြည်လွန်းတဲ့ သူတွေမှ ထုတ်သုံးနိုင်တဲ့ အရာမျိုး ဖြစ်ပါတယ် ။
သည်အဆင့်ကို ရောက်နေတဲ့ သူတွေက ဓားချက်တစ်ချက် ထုတ်လိုက်တာနဲ့ တစ်ပြိုင်နက် ပတ်ဝန်းကျင် တစ်ခုလုံးကို ဓားတွေဖုံးလွှမ်းနေတဲ့ ကမ္ဘာကြီး တစ်ခု ဖြစ်သွားအောင် စွမ်းဆောင်နိုင်ပါတယ် ။
သံဓား မဟာ ဧကရာဇ်ကတော့ အဲသည် အဆင့်ကို မရောက်သေးပါဘူး ။ ဒါပေမဲ့လည်း ဓားကမ္ဘာနဲ့ အဆက်အသွယ် ရထားပြီ ဆိုတဲ့ အချက်တစ်ခုတည်းကတင် ကောင်းကင်မဏ္ဍိုင် ကုန်းမြေတိုက် တစ်ခုလုံးကို ပွက်ပွက် ညံသွားစေဖို့အတွက် လုံလောက်ပါတယ် ။
" အာဏာရှင် ဓားသိုင်း ဟုတ်လား…… ဆိုးတော့ မဆိုးဘူး ။ ဒါပေမဲ့ "
သူ့ရဲ့ ဓားကမ္ဘာဆီကို သွားတဲ့ လမ်းကြောင်းက သံဓား မဟာဧကရာဇ်ထက် နိမ့်ကျတယ် ဆိုတာကိုတော့ လီဖူချန်း အနေနဲ့ ဝန်မခံချင်လည်း ဝန်ခံရမှာပါပဲ ။
ဘယ်လိုပဲဖြစ်ဖြစ် သံဓား မဟာဧကရာဇ် ဆိုတာက နှစ်ပေါင်း ရာထောင်ချီ ကျင့်ကြံခဲ့ပြီးပြီ မဟုတ်ပါလား ။
ဒါပေမဲ့လည်း ဓားကမ္ဘာဆိုတာက ဓားတာအိုရဲ့ အဆုံးသတ် မဟုတ်သေးပါဘူး ။
လီဖူချန်းရဲ့ မျက်လုံးထဲမှာတော့ သံဓား မဟာ ဧကရာဇ်ရဲ့ ဓားကွက်က ဟာကွက် ရှိနေဆဲပါပဲ ။
ချွမ်……ချွမ်……ချွမ်……
ရုတ်တရက် ဆိုသလို လေဟာနယ် ဟင်းလင်းပြင်ဟာ မှန်တစ်ချက် ကွဲအက်သွားသလို ကွဲအက် သွားခဲ့ပါပြီ ။
ဝှစ်……ဝှစ်……ဝှစ်……
တစ်ဆက်တည်းမှာပဲ အဲသည် ကွဲအက်သွားတဲ့ အပိုင်းအစတွေဟာ သံဓား မဟာ ဧကရာဇ်ဆီကို တစ်ရှိန်ထိုး ပြေးဝင် သွားပြန်ပါတယ် ။
ရှင်းရှင်း ပြောရမယ် ဆိုရင် သံဓား မဟာ ဧကရာဇ်က အာဏာရှင် ဓားသိုင်းကို ထုတ်သုံးပြီးကတည်းက သူ့ရဲ့ ဓားစွမ်းအားတွေ အကုန်လုံးကို ထုတ်သုံး ပြီးသွားခဲ့ပါပြီ ။သူက ခုခံမှုကို အပြည့်အဝ မလုပ်ဆောင်တော့ပါဘူး ။
ရွှပ်……
အဲသည်အတွက် လေဟာနယ် ဟင်းလင်းပြင် အစိတ်အပိုင်း တစ်ခုက သံဓား မဟာ ဧကရာဇ်ရဲ့ ပခုံးကို မိမိရရကြီး ထိုးစိုက် သွားပါတော့တယ် ။
"ခင်ဗျား…… ရှုံးပြီ "
အဲသည်နောက်မှာတော့ လီဖူချန်းက သူ့ရဲ့ ဓားကို ပြန်သိမ်းလိုက်ပြီး တည်ငြိမ်စွာနဲ့ ပြောလိုက်ပါတယ် ။
သံဓား မဟာ ဧကရာဇ်ရဲ့ အာဏာရှင် ဓားသိုင်းက အစွမ်းထက်ရင် ထက်ပါမယ် ။ဒါပေမဲ့ ဟာကွက် မရှိတာတော့ မဟုတ်ပါဘူး ။ သည်ဓားသိုင်းမှာက များပြားလှတဲ့ အသေးစား အားနည်းချက်တွေ ရှိတာကို လီဖူချန်းက မြင်နေရပါတယ် ။
သည်အားနည်းချက်တွေက တခြားလူတွေအတွက် ဆိုရင် ဟာကွက်တွေ ဖြစ်ချင်မှ ဖြစ်နိုင်ပေမယ့် လီဖူချန်းအတွက်ကတော့ အားနည်းချက်တွေပါပဲ ။
" အေး …… မင်းနိုင်တယ် ။ ငါက မင်းရဲ့ ပြိုင်ဘက် မဟုတ်ဘူး "
သံဓား မဟာ ဧကရာဇ်က သက်ပြင်းရှည်ကြီး တစ်ချက်ချပြီး အရှုံးကို ဝန်ခံလိုက်ပါတယ် ။
လီဖူချန်းက သူ့ရဲ့ ဓားကွက်ကို ဖျက်နိုင်တယ် ဆိုကတည်းက အဖြေက အရှင်းကြီးပါပဲ ။
သူနဲ့ လီဖူချန်း ကြားမှာက ကွာဟချက်ဟာ တောင်ကြီးတစ်လုံးလောက် ရှိနေပါပြီ ။
တကယ်လို့ လီဖူချန်းက ဓားတာအိုမှာ သူ့ထက် မသိမသာလေးသာ သာနေမယ်ဆိုရင် သည်ဓားသိုင်းကို ချေဖျက်နိုင်စရာ အကြောင်းကို မရှိပါဘူး ။
" သံဓား မဟာ ဧကရာဇ် …… ခင်ဗျား သည်အထိ ရောက်လာပြီးမှတော့ လက်ဖက်ရည်ကြမ်းလေး ဘာလေး သောက်သွားပါဦးလား ။ ပြီးရင် ကျုပ်တို့ ဓားတာအိုအကြောင်း အေးအေးဆေးဆေး ဆွေးနွေးကြတာပေါ့ "
ကောင်းကင်မီးတောက် တုံယန်က ပြုံးပြီး လောကွတ် ချော်လိုက်ပါတယ် ။
ကောင်းကင်မီးတောက် တုံယန်က သံဓား မဟာ ဧကရာဇ်လို မာနကြီးတဲ့ လူတစ်ယောက်က သူ့ရဲ့ လောကွတ်ချော်မှုကို လက်ခံလိမ့်မယ်လို့ မယုံကြည်ပါဘူး ။
ဒါပေမဲ့လည်း သူ့ရဲ့ အထင်နဲ့ ဆန့်ကျင်စွာပဲ သံဓား မဟာ ဧကရာဇ်ဟာ သူ့ရဲ့ လောကွတ်ချော်မှုကို လက်ခံခဲ့ပါတယ် ။
" အင်း…… ကျုပ်လည်း ဓားတာအို ဆွေးနွေးဖို့ အဖော် ရှာနေတာ ကြာပြီ "
သံဓား မဟာ ဧကရာဇ်လို လူတစ်ယောက် အဖို့ကတော့ ဓားတာအို အပိုင်းမှာ သူ့ထက် သာလွန်သူကို ရှာတွေ့ဖို့ ဆိုတာဟာ တကယ်ကို ခဲယဉ်းလွန်းလှပါတယ် ။
အဲသည်အတွက် သူ့အနေနဲ့ သည်လို အခွင့်အရေးမျိုးကို ငြင်းစရာ အကြောင်း မရှိပါဘူး ။
***