လင်းဖန်ရဲ့ တိုက်ချက်

Vol. 18 Ch. 258

ဟော်ထျန်းနဲ့ သူ့အနားက ဘော်ဒီဂတ်များ လင်းဖန်ကို ကြည့်လိုက်ကြသည်။

ရှားဝမ်ချွေ့ရှေ့မှာ ဟော်ထျန်းကို မြင်လိုက်ရသောအခါ သူ အရာအားလုံးကို နားလည်သွားခဲ့သည်။

ယခင်တုန်းက လင်းဖန်ကို ဟော်ထျန်း လှောင်ပြောင်ခဲ့စဥ်တုန်းက လင်းဖန်စိတ်ထဲ မထည့်ခဲ့ပေ။

တခြားသူတွေ သူ့ကို ဆူဆဲလည်း ဂရုမစိုက်ပါ။ ကြယ်ပွင့်တစ်ယောက်ဖြစ်သဖြင့် သူ့ကို မကြိုက်တဲ့လူတွေလည်း အများကြီး ရှိနိုင်ပါသည်။

သို့သော်လည်း အခုတော့ မတူတော့ပေ။

ဟော်ထျန်းက ရှားဝမ်ချွေ့ရှေ့မှာ ရှိနေသည်။

ဟော်ထျန်း ရှားဝမ်ချွေ့ကို ဘာတွေပြောခဲ့သလဲတော့ မသိပေ။

ရှားဝမ်ချွေ့၏ မျက်နှာထားကို ကြည့်လိုက်ရုံနဲ့ လင်းဖန် နားလည်သွားခဲ့ပါသည်။

သူ့ကို ဘယ်သူ ဆဲဆဲ လင်းဖန် ဂရုမစိုက်ပါ။

သူ့ကို လာရှုပ်ရင်တော့ လင်းဖန် အတည်ပေါက် ရင်ဆိုင်ပါမည်။

လင်းဖန်ဘေးက လူတွေကို အနိုင်ကျင့်ပါက လင်းဖန်၏ သည်းခံနိုင်စွမ်းကို လာထိတာနဲ့ ညီမျှသည်။

ရှားဝမ်ချွေ့က လင်းဖန်၏ ကောင်မလေး ဖြစ်သည်။

လင်းဖန်တောင် အနိုင်မကျင့်ရက်သည့် သူ့ကောင်မလေးကို ဟော်ထျန်းက အနိုင်ကျင့်ရဲတယ်ပေါ့။

သူ သန့်စင်ခန်းထဲ သွားနေသည့် မိနစ်ပိုင်းအတွင်း ဟော်ထျန်းနဲ့ သူ့ဘော်ဒီဂတ်များက ရှားဝမ်ချွေ့ကို ဝိုင်းထားကြသည်။

ဒီနေ့ ဒါက စီးပွားရေးစင်တာကြီးမှာ ဖြစ်သည်။ ဝါရင့်စီးပွားရေးသမားများလည်း နေရာတိုင်းတွင် ရှိနေသည်။

ထို့အပြင် ရှားဝမ်ချွေ့ကလည်း ကြယ်ပွင့်တစ်ယောက် ဖြစ်ကာ အလွန်ရေပန်းစားသူ ဖြစ်သည်။ ဟော်ထျန်းက ရှားဝမ်ချွေ့ကို ဘာမှ မလုပ်ရဲပါ။

သို့သော် စီးပွားရေးစင်တာမှာသာ မဟုတ်လျှင် ဘာတွေဖြစ်သွားနိုင်မလဲ။

လင်းဖန် မစဥ်းစားရဲပါ။

သူရှားဝမ်ချွေ့နဲ့ အတူရှိနေခဲ့တာ ကြာပါပြီ။ သို့သော် သူမကို လင်းဖန် အနိုင်မကျင့်ဖူးပါ။

ဒီလို လှပပြီး ချစ်စရာ ကြောင်မလေးကို လင်းဖန်တောင် အနိုင်မကျင့်ရက်ပေ။

ရှားဝမ်ချွေ့ ဒေါသမထွက်ခဲ့တာ အချိန်အတော်ကြာပါပြီ။ သို့သော် ဒီနေ့တော့ ရှားဝမ်ချွေ့ ဒေါသထွက်နေမှန်း လင်းဖန် တကယ်ခံစားမိသည်။

လင်းဖန်တစ်ယောက် ဟော်ထျန်းကို အေးစက်စွာ ကြည့်လိုက်သည်။

ထိုအချိန်တွင် ရှားဝမ်ချွေ့လည်း လင်းဖန်ကို မြင်သွား၏။

သူမ မျက်နှာပေါ်က ဒေါသများ ချက်ချင်း ပျောက်ကွယ်သွားပြီး လင်းဖန်ကို ချစ်စရာကြောင်မလေးလို လက်ဟန်ပြလိုက်သည်။ သူမ အဆင်ပြေသည်ဟု ပြောလိုက်ခြင်း ဖြစ်သည်။

ရှားဝမ်ချွေ့ လင်းဖန်ကို ဘယ်လိုဆက်ဆံနေသလဲဆိုတာကိုမြင်ပြီး ဟော်ထျန်း၏ မျက်လုံးထဲက အေးစက်မှုများ ပိုနက်ရှိုင်းသွားသည်။

မိန်းမတစ်ယောက်က ဒီလိုမျိုး ပိုပြီး ပြုမူလေလေ သူမကို ပိုပြီး လိုချင်လေလေဖြစ်သည်။

ဟော်မိသားစုက ရှားမိသားစုကို တကယ်မထိရဲဘူးလို့ ထင်နေလား။

ဟော်ထျန်းက ရှားဝမ်ချွေ့နှင့် လက်ဆွဲနှုတ်ဆက်ဖို့ ပြင်နေဆဲ ဖြစ်သည်။

လင်းဖန်က ထိုအနားကို လျှောက်လာသည်။

ဟော်ထျန်း၏ ဘော်ဒီဂတ်တွေတောင် လင်းဖန်ကို တားဖို့ အကြောင်းအရင်း ရှာမရပါ။

ဟော်ထျန်းက လင်းဖန်ကို မောက်မာစွာ ကြည့်နေဆဲ ဖြစ်၏။

သူ့ဘေးနားမှာ ဘော်ဒီဂတ်တွေ အများကြီး ရှိကာ သူ့အဆင့်အတန်းနဲ့ဆို လင်းဖန်လို သရုပ်ဆောင်တစ်ယောက်ကို ကြောက်စရာလား။

လင်းဖန်ရှေ့မှာ ရှားဝမ်ချွေ့ကို ကြောင်နေရင်တောင် လင်းဖန် ဘာလုပ်နိုင်မှာလဲ။

"ဟေ့ ငါချွေ့ချွေ့ကို ဒီနေ့ည ညစာ အတူတူ စားဖို့ ခေါ်နေတာ။ ညစာစားပြီး ရုပ်ရှင်အတူတူ သွားကြည့်ကြမလို့လေ" ဟော်ထျန်းက ပြုံးကာ လင်းဖန်ကို ကြည့်လိုက်သည်။

သူမကို ခေါ်သည့်ပုံစံကတောင် ရှားဝမ်ချွေ့မှ ချွေ့ချွေ့ဟူ၍ ပြောင်းလဲသွားသည်။

ဟော်ထျန်းက ဒုတိယမျိုးဆက် သူဌေးသားတစ်ယောက် ဖြစ်သည်။ ရှားဝမ်ချွေ့ငြင်းတာကို ခံလိုက်ရပြီးနောက် ပိုပြီး မပျော်မရွှင်ဖြစ်သွားခဲ့ပါသည်။

ထို့ကြောင့် သူ့ဒေါသက လင်းဖန်ဆီကို ရောက်ရှိသွားသည်။

ထိုစကားလုံးများကို လင်းဖန်ရှေ့တွင် ပြောလိုက်သည်။

လင်းဖန် သူ့ကို ဘာလုပ်နိုင်မှာမို့လို့လဲ။

ဟော်ထျန်း ထိုစကားပြောတာကို ကြားပြီး ရှားဝမ်ချွေ့၏ မျက်နှာထားက အနည်းငယ် ပြောင်းလဲသွားသည်။

သူမ ဘာမှ မပြောနိုင်ခင် ဟော်ထျန်းက ထိုစကားမျိုးတွေ လင်းဖန်ကို ပြောလိုက်သည်။

အီးကျူနိမ့်သူ တစ်ယောက်သာဆို သူနဲ့ ဟော်ထျန်းတို့ အထူးဆက်ဆံရေးတစ်ခု ရှိနေသည်ဟု ထင်သွားနိုင်သည်။

ဟော်ထျန်းက ယုတ်မာလွန်းလှ၏။

ရှားဝမ်ချွေ့က တစ်ခုခု ဝင်ပြောဖို့ ကြံလိုက်စဥ် လင်းဖန်က သူမခေါင်းကို သိမ်မွေ့စွာ ပုတ်ပေးလိုက်သည်။ သူမ ဘာမှ ပြောဖို့ မလိုဘူးဆိုသော သဘော ဖြစ်၏။

အချစ်ရေးကို ထိန်းသိမ်းရာတွင် လင်းဖန်၏ အီးကျူက အလွန်မြင့်ပါသည်။

ဒီလိုအချိန်မျိုးမှာ သူ့ကောင်မလေးကို သူ သံသယဖြစ်ပါ့မလား။ မဖြစ်နိုင်ပါ။

ရှားဝမ်ချွေ့က သူ့ကြောင့်ပဲ အကြင်နာပေးသည့် ဇာတ်ဝင်ခန်းတွေကိုတောင် မရိုက်ခဲ့ပါ။

ဟော်ထျန်းနဲ့ ရုပ်ရှင်အတူတူကြည့်ပြီး ညစာ စားဖို့ဆိုလျှင် ပိုတောင် ဆိုးဦးမည်။

လင်းဖန် သူမခေါင်းကို ထိလိုက်သည့်အခါ ရှားဝမ်ချွေ့ ရင်ထဲ တစ်မျိုးကြီး ဖြစ်သွားပြီး မျက်လုံးများ အနည်းငယ် နီရဲသွားသည်။

သူမ၏ အချစ်ဆုံးသူရှေ့ရောက်လျှင် သူမ၏ ကာကွယ်မှုအားလုံးကို အမြဲတမ်း ဖယ်ရှားနိုင်ပါပြီ။

သူမ ခြိမ်းခြောက်မှုများကို အကြိမ်ပေါင်းများစွာ ခံခဲ့ရဖူးသည်။ သူမ မကြောက်သော်လည်း သူမက မိန်းကလေးတစ်ယောက် ဖြစ်ကာ သူမ၏ အားနည်းသည့် စိတ်ကတော့ ရှိနေဆဲ ဖြစ်ပါသည်။

လင်းဖန်က သူမကို ရာနှုန်းပြည့် ယုံကြည်ထားပြီး ရှားဝမ်ချွေ့ ရင်ထဲထိသွားခဲ့ပါသည်။

လင်းဖန်သာ အနားမှာ ရှိပါက သူမ ဘာကိုမှ မကြောက်တော့သလို ခံစားမိသည်။

ထိုအချိန်တွင် လင်းဖန်က ဟော်ထျန်း၏ လက်ကို ကိုင်လိုက်ပါသည်။

ဒါက စီးပွားရေးစင်တာကြီးဖြစ်သဖြင့် ဒီမှာ ရန်ဖြစ်ဖို့ မသင့်တော်ပေ။

သို့သော် လင်းဖန် သည်းမခံနိုင်တော့ပါ။

ရှားဝမ်ချွေ့ ငိုချင်နေမှန်း သူခံစားမိသည်။

ရှားဝမ်ချွေ့ကို ငိုအောင် သူတောင် တစ်ခါမှ မလုပ်ခဲ့ဖူးပါ။

ဒီဟော်ထျန်းဆိုတဲ့ကောင် ရှားဝမ်ချွေ့ကို ဘာတွေပြောလိုက်တာလဲ။

သူ ဘာပဲ ပြောလိုက်ပါစေ အရေးမကြီးတော့ပါ။

လင်းဖန်က ဟော်ထျန်း၏ လက်ကို တင်းတင်းကြပ်ကြပ် ဆုပ်ကိုင်လိုက်သည်။

ဟော်ထျန်း၏ မျက်နှာထား ချက်ချင်းပြောင်းလဲသွား၏။

လင်းဖန်က အားသန်လွန်းသည်။

သူ့လက်ကို ဆွဲထုတ်လို့မရတော့ပါ။

ဂျွတ်

ဟော်ထျန်း၏ လက်ကောက်ဝတ်ရိုး၊ လက်ဖျံရိုးနဲ့ လက်ချောင်းအရိုးများအားလုံး ကျိုးသွားသည်။

လင်းဖန်က သူ့ခန္ဓာကိုယ်ကို မကြာခဏ လေ့ကျင့်ပေးသဖြင့် အလွန်သန်မာနေပါသည်။ ဟော်ထျန်းကတော့ ငယ်စဥ်ကတည်းက အလိုလိုက်ခံထားရသည့် ဒုတိယမျိုးဆက် သူဌေးသားတစ်ယောက်ဖြစ်သဖြင့် လင်းဖန်ကို မယှဥ်နိုင်ပေ။ လင်းဖန်ရှေ့တွင် ရုန်းကန်လျက် သူ့လက်က အရိုးတွေလည်း ကျိုးကုန်ပါသည်။

"အားး..." ဟော်ထျန်း၏ မျက်နှာဖြူရော်သွားပြီး မြေပေါ်သို့ ထိုင်ချလိုက်သည်။ သူ့လက်ချောင်းများက ပုံစံပျက် ယိုယွင်းနေပါသည်။

အချိန်တိုအတွင်း လင်းဖန်က သူ့ညာလက်ကို ဖျက်ဆီးပစ်လိုက်သည်။

"ဆောရီးပါကွာ၊ မင်းလက် ဒီလောက်ပျော့မယ် ထင်မထားလို့ပါ" လင်းဖန်က အပြုံးခပ် ဖျော့ဖျော့ဖြင့် ပြောလိုက်သည်။

သူ့မှာ သနားညှာတာမှု မရှိတော့ပါ။

ဒီနေ့ သူ ဒီကိစ္စတွေကို အလွတ်ပေးတော့မှာ မဟုတ်ပေ။

တစ်ယောက်ယောက်က သူ့စိတ်ကို လာဆွနေသည်။ လင်းဖန် ဒီလိုလူမျိုးကို ဘယ်တုန်းကမှ မကြောက်ရွံ့ခဲ့ပေ။

သူတို့ ဟော်ကော်ပိုရေးရှင်းနဲ့ စစ်ပွဲတစ်ခု တကယ် စတင်ရလည်း ဘာဖြစ်လဲ။

လင်းဖန်၏ လှောင်ပြောင်မှုကို ကြားပြီးနောက် ဟော်ထျန်း၏ နှုတ်ခမ်းက ယုတ်ညံ့သော အပြုံးတစ်ခုအဖြစ် ပြောင်းလဲသွားသည်။

ဒါက စီးပွားရေးစင်တာတစ်ခုဖြစ်သော်လည်း ဟော်ထျန်းဘေးက ဘော်ဒီဂတ်အားလုံး အတူတူ လင်းဖန်ကို တိုက်ခိုက်ကြသည်။

အထူးသဖြင့် ရှားဝမ်ချွေ့ကို ကာထားသည့် အစိမ်းရောင်ဝတ်စုံနဲ့ ဘော်ဒီဂတ်က အရင် တိုက်ခိုက်၏။ လင်းဖန်က အစိမ်းရောင် အဝတ်အစားဖြင့် ဘော်ဒီဂတ်၏ ထိုးချက်ကို အလွယ်တကူ ရှောင်လိုက်ပြီး ဝိုင်ပုလင်း တစ်လုံးကို ကိုင်ကာ အစိမ်းရောင် အဝတ်အစားဖြင့် ဘော်ဒီဂတ်၏ ခေါင်းကို ရိုက်ခွဲလိုက်ပါသည်။

ဆွဲချက်၊ တွန်းချက်၊ ကန်ချက်များဖြင့် လင်းဖန် နောက်ထပ် ဘော်ဒီဂတ်တစ်ယောက်ကို အမှောက်သိပ်နိုင်ခဲ့သည်။

လင်းဖန်က သိုင်းပညာ ပရော်ဖက်ရှင်နယ်မဟုတ်သော်လည်း အချိန်တိုအတွင်း ဘော်ဒီဂတ်နှစ်ယောက်ကို အနိုင်ယူနိုင်ခဲ့ပါသည်။

ကျန်ဘော်ဒီဂတ်တွေ လင်းဖန်ကို ဝိုင်းရံပြီး ထိုးကြိတ်ဖို့ ပြင်လိုက်စဥ်...

စီးပွားရေးစင်တာ၏ လုံခြုံရေးအစောင့်များက ချက်ချင်း ဘော်ဒီဂတ်အားလုံးကို ဖမ်းဆီးလိုက်ပါသည်။

စီးပွားရေးစင်တာ၏ လုံခြုံရေးအစောင့်များက ဘော်ဒီဂတ်များကိုသာ ဖမ်းဆီးရဲပြီး လင်းဖန်ကို မထိရဲကြပါ။

လင်းဖန်က ဘယ်လိုလူမျိုးလဲ။ ဘယ်သူမှ သူ့ကို မထိရဲကြပါ။

ဒီဘော်ဒီဂတ်များက အရင်တိုက်ခိုက်ကြသူများ ဖြစ်သည်။

ယွမ်ချမ့်နဲ့ ယွမ်ရှစ်တို့လည်း အမြန်ပြန်ပြေးလာကြပြီး လင်းဖန်ကို စိုးရိမ်တကြီး ကြည့်လိုက်ကြပါသည်။

ပထမတော့ ဟော်ထျန်းက ရှားဝမ်ချွေ့အရှေ့မှာ ရပ်ကာ သူမကို အနိုင်ကျင့်ချင်ခဲ့သည်။

အခုတော့ လင်းဖန်က ဟော်ထျန်း၏ လက်ကို ချိုးပစ်ခဲ့ပါသည်။

လက်ချောင်းများက နှလုံးသားနှင့် ဆက်နွယ်နေသဖြင့် လက်ရိုးများကျိုးသွားသောအခါ နာကျင်မှုက မခံမရပ်နိုင်စရာဖြစ်သည်။

"လင်းဖန် မင်းမေ--"

"မင်းသတ္တိရှိရင် စောင့်နေလိုက်စမ်းပါ။ ဟော်မိသားစုက မင်းကို သေချာပေါက် အလွတ်မပေးဘူး။"

ဟော်ထျန်းက အံကြိတ်ပြီး လင်းဖန်ကို ကြည့်လိုက်သည်။ သူ့လက်ချောင်းများက ပုံစံယိုယွင်းနေပြီး နာကျင်နေသေးသည့်ပုံစံပင်။

လုံခြုံရေးအစောင့်များက ဟော်ထျန်းကို ဆေးကုသဖို့ ခေါ်သွားတော့ လင်းဖန် ထိုင်လိုက်ပြီး အေးအေးဆေးဆေး ရေသောက်လိုက်ပါသည်။

ဟော်ထျန်း၏ စကားများကို ကြည့်ခြင်းအားဖြင့် ဟော်ထျန်းက ဟော်မိသားစုကို အသုံးချပြီး ရှားဝမ်ချွေ့ကို အစကတည်းက ခြိမ်းခြောက်ထားမှန်း လင်းဖန် နားလည်သွားသည်။

ဒီလိုဆို ဟော်မိသားစု ဒီနေ့ သူ့ကို အလွတ်ပေးတာ မပေးတာ အရေးမကြီးတော့ပါ။ သူကတော့ ဟော်မိသားစုကို အလွတ်ပေးဖို့ အစီအစဥ် မရှိပေ။

တစ်ယောက်ယောက်က သူ့ကြောင်မလေးကို အနိုင်ကျင့်ခဲ့သဖြင့် ဒီနေ့ကိစ္စ ဒီလိုနဲ့ မပြီးသွားနိုင်ပါ။