ဖောက်ထွက်ခြင်း - ၁

ဒေဗင်သည် တိုက်ပွဲအစတွင် ရန်သူကို အယောင်ပြပြီး ဂရုတစိုက် စူးစမ်းခဲ့သည်။ သို့သော်လည်း အချိန်အတော်ကြာ တိုက်ပွဲဝင်နေသဖြင့် 'Black Phantom' သည် သူယုံကြည်ရန် တွန်းအားပေးခံရသလောက် အလွန်သန်မာခြင်းမရှိကြောင်း သူတွေ့ရှိခဲ့သည်။

ဒဏ္ဍာရီလာ Black Phantom က ဘာမှဟုတ်ပါဘူး။ ငါက ဘာမှမဟုတ်တာကို စိုးရိမ်နေတာပဲ။

ဒေဗင်သည် ယုံကြည်မှုများ တိုးလာကာ ထိန်းမထားတော့ဘဲ စတင်တိုက်ခိုက်တော့သည်။

တောင့်တင်းသန်မာသော ဘီလူးနှင့် သံချပ်ကာ ယန္တရားဝတ်စုံတို့ကြား တိုက်ပွဲတွင် လက်သီးသံများ အဆက်မပြတ်ကြားနေရသည်။ ဒေဗင်၏နောက်မှလိုက်သောအခြား ဂျာမီနယ်အမှုဆောင်များသည် ဒေဗင်သည် တိုက်ပွဲတွင်အမှန်တကယ် အသာစီးရနေပြီဖြစ်သည်ကို သဘောပေါက်လာပြီး အားလုံးအံ့သြသွားကြသည်။

"ဗိုလ်ကြီးက ဘယ်တုန်းက ဒီလောက် သန်မာလာတာလဲ။"

"မဟုတ်ဘူး၊ ကြည့်! အားနည်းလာတာက Black Phantom ပဲ!”

“သူ့လောက် သန်မာတဲ့သူတစ်ယောက်တောင် ဒီလောက်ကြာကြာ လွတ်မြောက်ပြီးနောက် သူ့ရဲ့ အထွတ်အထိပ်အခြေအနေမှာ မတိုက်နိုင်ပါဘူး။ သူက အခုအချိန်မှာ အားအနည်းဆုံးပဲ”

ထို့နောက် အမှုဆောင်အဖွဲ့သည်လည်း ထောက်ခံအားပေးလာကြပြီး မကြောက်ကြတော့ပေ။ Black Phantom ကို အုပ်စုဖွဲ့ပြီးတိုက်ခိုက်ရန် တယောက်ပြီး တယောက် တက်လာကြသည်။

ခေါင်းဆောင်က ဟန်ရှောင်းကို အာရုံဘယ်လောက်စိုက်လဲဆိုတာကို အခြေခံပြီး သူ့ကို ဖမ်းမိလိုက်ခြင်းက ကြီးကျယ်တဲ့ အောင်မြင်မှုတစ်ခုလို့ မှတ်ယူရမည်ဖြစ်သည်။

သူအားနည်းနေတုန်း ရအောင်ဖမ်း။

ဤစူပါလူသား အုပ်စုများကြား တိုက်ပွဲသည် ပတ်ဝန်းကျင်ကို ထိခိုက်စေခဲ့ပြီး နေရာတိုင်းတွင် ကြီးမားသော မြောင်းများကို ဖန်တီးခဲ့သည်။ တပ်ဖွဲ့များသည် ကြည့်ရုံမျှသာမဟုတ်ဘဲ Black Phantom ၏ ဟာကွက်ကို မြင်လိုက်သည့်အချိန်တိုင်း ပစ်ခတ်လိုက်ကြသည်။

ဟီလာသည် သူ့ဘဝအတွက် တိုက်ပွဲဝင်နေပြီး စက္ကန့်တိုင်းတွင် နောက်ဆုတ်နေရ၏။ သူမသည် နေရာပေါင်းစုံမှ တိုက်ခိုက်မှုများကို လက်ခံပြီးနောက် အံကိုတင်းတင်းသာ ကြိတ်ထားနိုင်သည်။ သူမသာ ပုံမှန်တိုက်ခိုက်နေသည့်ပုံစံကို အသုံးပြုနေပါက၊ သူမ၏ ရန်သူများကို သူမအား ဤကဲ့သို့ ဝိုင်းဖွဲ့ခွင့်ပေးမည်မဟုတ်ပေ။ Viper ၏ ခံစစ်စွမ်းရည်ကြောင့်မဟုတ်ပါက၊ သူမသည် အပြင်းအထန် ဒဏ်ရာရနေလိမ့်မည်။

ဂျာမီနယ်ခေါင်းဆောင်၏ မျက်လုံးများ တောက်ပလာသည်။ “သူ့အခြေအနေက ပိုဆိုးလာတယ်။ အခုတော့ သူ့ကို သေချာပေါက်ရပြီ!"

မူလက ခေါင်းဆောင်သည် အကြီးတန်းအမှုဆောင်ငါးဦးကိုသာ အသုံးပြု၍ ဟန်ရှောင်းအား ရပ်တန့်ရန် ဆန္ဒရှိခဲ့သည်။ သို့သော်လည်း ဟန်ရှောင်း၏ ခွန်အားသည် စက္ကန့်နှင့်အမျှ ယုတ်လျော့သွားနေသည်။ ထွက်ပြေးစဉ်က ရရှိထားသော ဖိအားကြောင့် ဖြစ်ရမည်။

“ဒီအမှုဆောင်က ဘယ်သူလဲ။ သူ့မှာ အလားအလာရှိတယ်” ခေါင်းဆောင်က ပြောသည်။

လက်ထောက်က အချက်အလက်ကို အမြန်ရှာဖွေပြီး “သူ့နာမည်က ဒေဗင်၊ အိုး… အခုထိ ထူးထူးခြားခြား အောင်မြင်မှု မရှိသေးဘူး။"

ခေါင်းဆောင်က နှာမှုတ်လိုက်ပြီး “ငါတို့ စစ်ဖြစ်နေတယ်၊ သန်မာတဲ့ စစ်သားတိုင်းဟာ အရေးကြီးတဲ့ ပိုင်ဆိုင်မှုတစ်ခုပဲ။ သူ့ကို လွတ်သွားတာက ငါတို့ဘက်က အမှားကြီးမှားသွားလိမ့်မယ်။”

…

_____________________

ဇာတ်ကောင်ဆင့်ခေါ်ကတ်ကို အသုံးပြုထားသည်။

လက်ရှိအသုံးပြုမှု - ၂/၂

ကတ်သည် မကြာခင် ပျောက်ကွယ်သွားလိမ့်မည်။

_____________________

ဟီလာသည် ဂျာမီနယ်တပ်ဖွဲ့များ၏ အာရုံစိုက်မှုကို ခံရချိန်တွင်၊ ဟန်ရှောင်းသည် တပ်ဖွဲ့များအလယ်သို့ ခိုးဝင်ကာ ဂျာမီနယ်ယာဉ်တိုင်း၏အောက်တွင် ဖောက်ခွဲရေးပစ္စည်းများကို တပ်ဆင်ရင်း အလုပ်များနေသည်။

ဒီယွန်၏ဇာတ်ကောင်ကဒ်မှရရှိသောစွမ်းရည်သည်အလွန်ထိရောက်သည်၊ သူလုပ်ဆောင်နေသည်ကို စစ်သားတစ်ဦးမှသတိမထားမိပါ။ သူသည် သူတို့ရှေ့က လေထဲတွင် ပျောက်ကွယ်သွားသကဲ့သို့ ဖြစ်နေသည်။ သို့သော်လည်း ဟန်ရှောင်းသည် တိုက်ခိုက်ခြင်းက ဖုံးကွယ်မှုအကျိုးသက်ရောက်မှုကို ချက်ချင်း ပယ်ဖျက်လိုက်နိုင်သောကြောင့် ဟန်ရှောင်းသည် အတတ်နိုင်ဆုံး သတိထားနေဆဲဖြစ်သည်။

ဤသည်မှာ သူခိုးများအတွက် သင့်လျော်သော ‘အက်စ်ပါ’စွမ်းရည်တစ်ခုဖြစ်သည်။ ဒီယွန်သည် လျှို့ဝှက်အချက်အလက်များကို အလွယ်တကူ ခိုးယူနိုင်ခဲ့သည်မှာ အံ့သြစရာမဟုတ်ပေ။ ဒီစွမ်းရည်နှင့် အတော်ကောင်းတဲ့ နေရာတွေကိုတောင် သူသွားခဲ့တာ ဖြစ်နိုင်တယ်။ မိုက်တယ်ကွာ…

ဟန်ရှောင်းအနည်းငယ် မနာလိုဖြစ်မိသည်။ သူသည် ငယ်စဉ်ကပင် ကိုယ်ဖျောက်ခြင်းစကေးကို မက်မောခဲ့ဖူးသည်။ သူ့ဘဝ၏ ရည်မှန်းချက် သုံးဆယ့်သုံးထဲမှ တစ်ခုတောင် ဖြစ်ခဲ့၏။ အတွေ့အကြုံကောင်းများ ရရှိပြီးသည့်နောက်မှသာ ၎င်းသည် စာရင်းမှ ခြစ်ထုတ်ခံခဲ့ရခြင်း ဖြစ်သည်။

ကိုယ်ပျောက်ဝတ်ရုံ၏အောက်တွင်၊ သူ့ပတ်ဝန်းကျင်အပေါ်ထားတဲ့ ဟန်ရှောင်းရဲ့ အာရုံတွေက လုံးဝကို ကွဲပြားသွားသည်။ ထူထပ်သော တိမ်တိုက်သည် သူ့ပတ်ဝန်းကျင်ရှိ အရာအားလုံးကို ဖုံးလွှမ်းသွားသလိုပင်၊ ၎င်းသည် အလွန်ထူးခြားသည်ဟု ခံစားရသည်။ ကိုယ်ပျောက်နေသည့် ခံစားချက်က သူကြည့်ဖူးတဲ့ ဇာတ်ကားဟောင်းတစ်ကားကို သတိရသွား၏။ Lord of the Rings ဆိုလား...

ဤပတ်ဝန်းကျင်ရှိ တပ်များသည် ကားအစီးရေ အကန့်အသတ်ရှိသဖြင့် ဟန်ရှောင်းသည် ပေါက်ကွဲစေတတ်သော ပစ္စည်းများအားလုံးကို အမြန်အပြီးသတ် တပ်ဆင်လိုက်သည်။ နောက်ပိုင်းတွင် ထွက်ပြေးရန်အတွက် အသုံးပြုရန် ကားအနည်းငယ်သာ ကျန်ရှိတော့သည်။

ငါ့ရဲ့ ကိုယ်ပျောက်တာက နှစ်မိနစ်ကျန်သေးသည်။ ပေါက်ကွဲတာကို စောင့်ပြီး ကားခိုးပြီး ထွက်ပြေးဖို့ပဲလိုတယ်။

အခုချိန်ထိ အားလုံးက စီစဉ်ထားတဲ့အတိုင်း သွားနေတယ်။

ဟန်ရှောင်းသည် တိုက်ပွဲ၏အစွန်းသို့ ပြန်သွားပြီး ဟီလာသည် သနားစရာကောင်းလောက်အောင် အဘက်ဘက်က အရိုက်ခံနေရသည်ကို မြင်လိုက်ရသည်။ သူမနှင့် မရင်းနှီးသောဝတ်စုံသည် ထိုအမှုဆောင်အားလုံးကို ကိုင်တွယ်ဖြေရှင်းရာတွင် များစွာအထောက်အကူမပြုနိုင်ပေ။

ဟန်ရှောင်းသည် ချပ်ဝတ်တန်ဆာအတွင်းမှ နားကြပ်နှင့်ချိတ်ဆက်ထားသော ဆက်သွယ်ရေးစက်ကိုထုတ်ကာ "ငါမင်းရဲ့နေရာရဲ့မြောက်ဘက် မီတာရှစ်ဆယ်လောက်မှာ ရှိနေတယ်။ ခဏနေရင် ကြီးမားတဲ့ ပေါက်ကွဲမှုကြီးတစ်ခု ဖြစ်ပေါ်လာလိမ့်မယ်။ ပြီးတာနဲ့ ချက်ချင်းပဲ ငါ့ဆီ ပြေးလာပြီး ဝတ်စုံကို ချွတ်လိုက်။ ငါတို့ထွက်ပြေးဖို့ ဒီမှာ သံချပ်ကာကားတစ်စီးရှိတယ်။”

ဟီလာက သူ့ကို မမြင်နိုင်သော်လည်း သူ့ညွှန်ကြားချက်ကိုကြားရသည်။

ဟန်ရှောင်းသည် စတင်ရေတွက်သည်။ ဆယ်…ငါး…သုံး… သူသည် ခလုတ်ကို နှိပ်လိုက်၏။

ဘုန်း!

မြေပြင်က စက္ကန့်ပိုင်းလောက် တုန်လှုပ်နေသလိုပင်။

မီးတောင်ပေါက်ကွဲမှုကဲ့သို့ပင် သံချပ်ကာယာဉ်များအားလုံး တစ်စီးပြီးတစ်စီး ပေါက်ကွဲသွားပြီး မီးတောက်များ ကောင်းကင်သို့ မြင့်တက်လာသည်။

အပူလှိုင်းတစ်ခု လိပ်တက်လာပြီး ဖုန်မုန်တိုင်းတစ်ခု သယ်ဆောင်လာသည်။ မရေမတွက်နိုင်သော သာမန်စစ်သည်များ ချက်ခြင်း လဲကျသွားကြသည်။

ဂျာမီနယ်တပ်များသည် တောင့်တင်း တုန်လှုပ်သွားကြသည်။

ရုတ်တရက် ဘာလို့ ပေါက်ကွဲသွားတာလဲ..

ပရမ်းပတာဖြစ်နေသည့် အခိုက်အတန့်ကိုသုံးပြီး ဟီလာသည် ဖုန်မှုန့်များကြားမှ ဟန်ရှောင်း၏ နေရာသို့ ပြေးသွားသည်။ သူမသည် ဝတ်စုံထဲမှ အမြန်ထွက်သွားပြီး ဟန်ရှောင်းနှင့် လဲလှယ်လိုက်သည်။ ဟန်ရှောင်းက ပြေးလွှားရင်း ဝတ်စုံကို ၀တ်လိုက်သည်။ လုပ်ငန်းစဉ်တစ်ခုလုံးသည် သုံးစက္ကန့်မျှသာ ကြာ၏။ ဟန်ရှောင်းသည် ကိုယ်ပျောက်စွမ်းရည်ဖြင့် သူ၏မစ်ရှင်ကို ပြီးမြောက်ခဲ့ပြီးဖြစ်ပြီး ဟီလာကို ဝတ်စုံ ဆက်ဝတ်ဆင်ခိုင်းထားခြင်းသည် ဖြုန်းတီးမှုတစ်ခုသာဖြစ်သည်။ ဟန်ရှောင်းသည် နောက်ဆုံးအကြိမ် ဝတ်စုံကို ပြုပြင်မွမ်းမံပြီးသောအခါတွင် ၎င်းကို ဝတ်ဆင်ရန်နှင့် ချွတ်ရန်အတွက် အကူအညီပေးသည့် ကိရိယာကို တပ်ဆင်ခဲ့ပြီး ပိုမိုအဆင်ပြေစေသည်။

ဟီလာသည် ကား၏ ယာဉ်မောင်းထိုင်ခုံသို့ ဝင်လာပြီး စက်နှိုးလိုက်သည်။ သို့သော်၊ ဤအချိန်တွင် ဖုန်မှုန့်များနှင့် မီးခိုးများ ရှင်းသွားကာ ဂျာမီနယ်တပ်ဖွဲ့များသည် Black Phantom ကို ထပ်မံမြင်တွေ့လိုက်ရသည်။ သို့သော် ဤတစ်ကြိမ်သည် တကယ့်လူဖြစ်သည်ကို မည်သူမျှမသိခဲ့ကြပေ။

"ထွက်ပြေးဖို့တောင် မစဉ်းစားနဲ့!" ဒေဗင်က ဒေါသတကြီး ဟိန်းဟောက်ပြီး လက်သီးကို ဝေ့ယမ်းလိုက်သည်။ သူ၏ကြီးမားသော ကိုယ်ခန္ဓာကြီးဖြင့် ပြေးလာပြီး မြေပြင်က လှုပ်ယမ်းသွားသည်။ သူ၏ ပင်ကိုယ်စွမ်းရည်က သူ့ကို သံမဏိကဲ့သို့ ခိုင်ခံ့လေးလံစေကာ သူ၏ အရိုးစုတည်ဆောက်မှုကို အားကောင်းစေ၏။ ရန်သူကို လက်သီးနဲ့ထိုးရင်း သူ့ရဲ့ ပင်ကိုယ်စွမ်းရည်ကို တက်ကြွတဲ့စွမ်းရည်နဲ့ ပေါင်းစပ်ထားပါတယ်။ ယခင်တိုက်ခိုက်မှုများအပေါ်အခြေခံ၍ 'Black Phantom' သည် သူ၏ ခုခံအားကို လုံးဝချိုးဖျက်၍ မရကြောင်း သိရှိထားပြီး ယခုတစ်ကြိမ်တွင် သူ၏ခန္ဓာကိုယ်ကို ကာကွယ်ရန်ပင် စိတ်မဝင်စားပေ။

မင်းက ဟီလာကို အနိုင်ကျင့်နိုင်မယ်လို့ ထင်တာ ကောင်းပါတယ်၊ ဒါပေမယ့် အခု မင်းက ငါ့ကို ဒီလိုပဲ လုပ်ချင်တာလား ‽

ဟန်ရှောင်း၏ မျက်လုံးများက အာရုံစူးစိုက်လာကာ [ယန္တရားစွမ်းအားလှိုင်း] နှင့် [ဝန်ပို] နှစ်ခုလုံးကို အသက်သွင်းလိုက်သည်။ သူ၏နောက်ကျောရှိ Mini Bonfire Reaction Furnace သည် အနီရောင်တောက်လောင်သွားပြီး ဝတ်စုံ၏ပါဝါသည် အဆမတန် တိုးလာကာ တာဘိုင်ကဲ့သို့ အသံများ စတင်ထွက်ပေါ်လာသည်။ စက်အစိတ်အပိုင်းတစ်ခုသည် ယန္တရားပညာရှင်၏ လက်ထဲတွင်သာ အမှန်တကယ် အားကောင်းလာမည်ဖြစ်သည်။

ဒေဗင်သည် 'Black Phantom' နှင့် သူ၏ယခင်တိုက်ပွဲမှ ယုံကြည်မှုအပြည့်ဖြင့် သူ၏လက်သီးကို တွန်းထုတ်လိုက်ချိန်တွင် သူ၏လက်ရှိရန်သူသည် မယုံနိုင်လောက်အောင်များပြားသော လူသတ်ဖိအားကို ထုတ်လွှတ်ပေးနေကြောင်း ရုတ်တရက် သိလိုက်ရသည်။ ချက်ချင်းပင် သူ့ခေါင်းနောက်ဘက်သို့ အေးစက်သော လေပြင်းတစ်ချက်ကို ခံစားလိုက်ရသည်။ ဤ Black Phantom သည် လွန်ခဲ့သည့် တစ်မိနစ်ခန့်က သူတိုက်ခိုက်ခဲ့သောသူနှင့် သိသိသာသာ ကွာခြားနေ၏။

အန္တရာယ်!

အလွန်ကြီးမားသော အန္တရာယ်။

ဒေဗင်သည် ထိတ်လန့်သွားပြီး သူ့တစ်ကိုယ်လုံး ကြက်သီးထလာသည်။ နောက်တစ်စက္ကန့်တွင် သူမြင်လိုက်ရသည်မှာ လျင်မြန်လွန်းလှသော လက်မောင်းတစ်ခုက ရုတ်တရက် အလင်းတန်းတစ်ခုလို ထွက်ပေါ်လာပြီးနောက် သူ့ခေါင်းကို ထိုးချလိုက်သည်။ နောက်ဆက်တွဲတွင် သူ့ခေါင်းပေါ်၌ စွမ်းအားတစ်ခု ပေါက်ကွဲသွားပြီး သူ့တစ်ကိုယ်လုံးကို အမှိုက်အိတ်လို မြေပြင်ပေါ် ရိုက်ချလိုက်သည်။

ဘုန်း

သံမဏိကဲ့သို့ ခိုင်ခံ့သော ဦးခေါင်းခွံသည် ဖန်သားဖြင့် ပြုလုပ်ထားသကဲ့သို့ အပိုင်းပိုင်းကွဲအက်သွားသည်။

ဟန်ရှောင်း၏ ဘယ်လက်သည် ဒေဗင်၏ခေါင်းကို တင်းတင်းကြပ်ကြပ်ဆုပ်ကိုင်ကာ မြေပြင်ပေါ်တွင် ဖိချထားသည်။ ကြွက်သားထုကြီးသည် သူမည်မျှကြိုးစားနေပါစေ လွတ်မြောက်အောင် မစွမ်းဆောင်နိုင်ပေ။ စားဖိုမှူးက စင်းနီတုံးပေါ်တွင် ငါးတစ်ကောင်ကို ကိုင်ထားသလိုမျိုး ဟန်ရှောင်းရဲ့ ညာလက်က ဝတ်စုံရဲ့ ကြွက်သားစနစ်နဲ့ ဖောင်းပွလာပြီး ဒေဗင်ရဲ့ နောက်ကျောကို လက်သီးတစ်ချက်နဲ့ ထိုးလိုက်၏။ သူတို့၂ယောက်ကို ဗဟိုပြု၍ မီးခိုးနဲ့ ဖုန်မှုန့်တွေ လွင့်ပျံ့သွား၏။

ခရက်!

ဒေဗင်၏ အရိုးစုပုံစံ ကွဲထွက်သွားပြီး သွေးများ နေရာအနှံ့ ပြန့်ကျဲသွားကာ သူ့တစ်ကိုယ်လုံး မြေပြင်ပေါ်သို့ နစ်မြုပ်သွားသည်။ ဂျာမီနယ်အမှုဆောင်အရာရှိသည် အချိန်အတော်ကြာ သတိလစ်သွားခဲ့သည်။ တိုက်ပွဲအင်တာဖေ့စ်တွင် ဒေဗင်သည် ပြင်းထန်သော ထိခိုက်မှုမှုများရရှိခဲ့ပြီး လက်ရှိတွင် မေ့မျောနေသော အခြေအနေတွင် ရှိနေကြောင်း ပြသနေသည်။

"ကောင်လေး၊ မင်းက ပြိုင်ဘက်မှားပြီး ရွေးမိတာပဲ"

ဟန်ရှောင်းသည် သူ့လက်ကို အကြိမ်အနည်းငယ် ယမ်းလိုက်ပြီးနေရာတိုင်းတွင် ပြန့်ကျဲနေသော အရိုးအပိုင်းအစများနှင့် ဦးခေါင်းခွံများကို စူးစမ်းနေသည်။

ဒီအရည်အချင်းက တော်တော်စိတ်ဝင်စားဖို့ကောင်းတယ်။ သူ့အရိုးတွေကို သန်မာအောင် လုပ်နိုင်တာလား။

ဒေဗင်သည် အဆင့် ၄၀မျှသာရှိပြီး သူ၏ခွန်အားသည် သူ့ရှေ့တွင် ဘာမှမဟုတ်ပေ။ ဟန်ရှောင်းသူ့ကို မှောက်ချဖို့ သုံးစက္ကန့်တောင် မကြာလိုက်ချေ။ မကြာသေးမီက ပြေးဝင်လာရန် ပြင်ဆင်ခဲ့သော အခြားသူများသည် စိတ်ရှုပ်ထွေးစွာဖြင့် ခြေလှမ်းများကို နှေးကွေးသွား၏။

လွန်ခဲ့သည့် မိနစ်ဝက်ကပင် ဒေဗင်သည် သူနှင့် ယှဉ်ပြိုင်နိုင်ဆဲဖြစ်သော်လည်း ယခု တစ်ချက်တည်းနှင့် မှောက်သွားသည်။

ဘာလို့ ဒီလောက် ကြီးမားသော အပြောင်းအလဲ ဖြစ်သွားရတာလဲ။ ဒါက လုံးဝကွဲပြားတဲ့ လူတစ်ယောက်လိုပဲ။

ယခင်က 'Black Phantom' သည် လူသစ်တန်းလေး တစ်ယောက်လို တိုက်ခိုက်ခဲ့ပြီး လက်ရှိသူကမူ သူရှိနေခြင်းကပင် သူ့ပတ်ဝန်းကျင်တွင် လူများကို သေးသိမ်သွားစေ၏။

ဂျာမီနယ်အမှုဆောင်အဖွဲ့သည် Black Phantom ၏ အားနည်းသောအခြေအနေအား အခွင့်ကောင်းယူရန် အစောပိုင်းတွင် အလျင်အမြန် ပြေးဝင်တိုက်ခိုက်ချင်ကြသော်လည်း ယခုအခါတွင် နောက်ထပ်ခြေတစ်လှမ်းကို မည်သူမျှမတက်ဝံ့ကြပေ။

ခေါင်းဆောင်သည် ဤအရာအားလုံးကို ဖန်သားပြင်ပေါ်တွင် မြင်လိုက်ရပြီး သူ့လည်ချောင်းထဲတွင် မီးလုံးကြိး မြိုထားသလို ခံစားရလေသည်။ တစ်စုံတစ်ယောက်က သူ၏ စိတ်လှုပ်ရှားမှုများကို ရေအေးအေးဖြင့် ငြိမ်းသတ်လိုက်သလိုပင်။