အခန်း (၄၀၁)

ထိုအချိန်၌ ဟွမ်ကျစ်ဟူ၏လက်ထဲတွင်ရှိသော မြေခွေးဖြူလေးက ခပ်အုပ်အုပ်အသံပေးသည်။

ရှန့်လင်းရွှမ်းက တစ်ကိုယ်လုံးတုန်ခါသွားပြီး အသာအယာခေါင်းခါသည်။

မြေခွေးဖြူလေးက မိစ္ဆာများကိုသတ်ဖြတ်ရန်အတွက် ရှန့်လင်းရွှမ်းကို တိုက်တွန်းနေသည်။ သို့သော် ရှန့်လင်းရွှမ်းက မလုပ်ချင်ပေ။

ထိုသို့ဖြစ်နေသောကြောင့် မြေခွေးဖြူလေးက ခေါင်းမော့ပြီး စူးရှစွာအော်မြည်သည်။

“အူး ....”

ထိုအသံသည် အနည်းငယ်နားအူနိုင်သည်။

သို့သော် ထိုအသံထွက်ပေါ်လာသောအခါတွင် ရှန့်လင်းရွှမ်းကို ဝိုင်းရံတိုက်ခိုက်နေသော မိစ္ဆာများက တစ်ကိုယ်လုံးတုန်ခါပြီး နေရာတွင်ရပ်တန့်သွားကြသည်။ သူတို့က မတ်တပ်မရပ်နိုင်ဘဲ မြေပြင်ပေါ်သို့ လဲကျသွားသည်။

ဝိညာဉ်ခြောက်လှန့်ခြင်း၊ သွေးမျိုးဆက်ဖိအား

မြေခွေးဖြူလေး၏သွေးမျိုးဆက်သည် မြေခွေးများကြားတွင် အမြင့်မြတ်ဆုံးသွေးမျိုးဆက်တစ်ခု ဖြစ်နေသည်။

ရန်သူများအားလုံး လဲကျသွားသောအခါတွင် ရှန့်လင်းရွှမ်းက နှစ်ကြိမ်ဟိန်းဟောက်လိုက်သည်။ သူက တခြားမိစ္ဆာများကို လာရောက်တိုက်ခိုက်ခွင့်မပြုကြောင်း ပြောနေပုံရသည်။

ထို့နောက် သူက နောက်လှည့်ပြီး ဟန်မူယဲ့တို့ဆီသို့ ပြန်လျှောက်လာသည်။

ထိုအချိန်တွင် ချုံပုတ်ကြားမှ ပုံရိပ်တစ်ခုပေါ်ထွက်လာသည်။

ရှန့်လင်းရွှမ်းက ရုတ်တရက်နောက်လှည့်ပြီး လေးကိုကိုင်သည်။ သူက လေးကြိုးကို ဆွဲလိုက်သောအခါတွင် အစိမ်းရောင်မြားရှည်တစ်ချောင်း ပေါ်လာသည်။ မြားရှည်သည် မိစ္ဆာအင်းကွက်များနှင့်ပြည့်နေပြီး မိစ္ဆာအလင်းများကို သယ်ဆောင်ထားသည်။

“ဝှစ် ....”

မြားပစ်လိုက်သောအခါတွင် ခုန်ထွက်လာသောပုံရိပ်က ချက်ချင်းပျက်စီးသွားသည်။

သွေနှင့်ချီစွမ်းအားများ ပေါ်ထွက်လာပြီး ရွှေရောင်သွေးစက်တစ်စက်အဖြစ် စုစည်း၍ ရှန့်လင်းရွှမ်းဆီသို့ ပျံသန်းလာသည်။

ရှန့်လင်းရွှမ်းက နားမလည်နိုင်ဖြစ်နေသည်။

မြေပြင်ပေါ်တွင်လဲကျနေသောမိစ္ဆာများက ဝမ်းလျားမှောက်ပြီး ရှန့်လင်းရွှမ်းကို အရိုအသေပေးလိုက်ကြသည်။

“ဒီလေးက မဆိုးဘူးပဲ” ဟန်မူယဲ့က ညင်သာစွာပြောသည်။

အဆုံးမရှိသော အနီးကပ်တိုက်ခိုက်နိုင်စွမ်းကို ပိုင်ဆိုင်ထားသည့် ဆင်မျိုးနွယ်ဝင်တစ်ဦးက နတ်ဘုရားမြားပစ်နည်းစနစ်ကို လေ့ကျင့်ထားသည်။

“ကြောင်မြီးတိုတွေရဲ့နေရာကို တစ်ချက်လောက်သွားကြည့်ကြရအောင်” ဟန်မူယဲ့က ဟွမ်ကျစ်ဟူကိုခေါ်ပြီး ရှေ့မှ ဦးဆောင်သွားသည်။

ရှန့်လင်းရွှမ်းက ရှေ့တွင်ရှိသောသွေးစက်ကို လျင်မြန်စွာဖမ်းယူပြီး နောက်မှလိုက်လာသည်။

သူက ချုံပုတ်များဆီသို့ ရောက်လာသောအခါတွင် ဆယ်ပေရှည်သော အနက်ရောင်ကြောင်ကတိုးတစ်ကောင်ကို မြင်လိုက်ရသည်။ ကြောင်ကတိုးက မြားတစ်ချောင်း၏ထိုးဖောက်မှုကို ခံထားရပြီး မြေပြင်ပေါ်တွင် လဲကျနေသည်။

ကြောင်မြီးတိုများက ရှန့်လင်းရွှမ်း၏နောက်မှ သတိထား၍လိုက်လာသည်။ သူတို့က ရှန့်လင်းရွှမ်း၏လက်ထဲတွင်ရှိသော သွေးစက်ကို အလိုဆန္ဒများဖြင့် ကြည့်နေကြသည်။

သူတို့က မြားချက်ကြောင့်သေသွားသော ကြောင်ကတိုးကိုဆွဲ၍ ဟန်မူယဲ့တို့နောက်မှ လိုက်လာသည်။

ထိုမိစ္ဆာများက သူတို့ကိုယ်သူတို့ မိတ်ဆက်နေသောကြောင့် အသံအမျိုးမျိုးကို ကြားနိုင်သည်။

ဤနေရာသည် ကြောင်မြီးတိုများ၏ စခန်းငယ်တစ်ခုဖြစ်သည်။ သူတို့ကို ကြောင်ကတိုးကလန်က အုပ်ချုပ်ပြီး ကြောင်မြီးတိုကလန်၏ ကျွမ်းကျင်သူများကို ဖိနှိပ်ထားသည်။

ရှန့်လင်းရွှမ်းသတ်လိုက်သောကြောင်သည် ကြောင်ကတိုးမိစ္ဆာသားရဲဖြစ်သည်။

ထိုကြောင်က ကြောင်မြီးတိုကလန်၏ သွေးမျိုးဆက်စွမ်းအားနှင့် ပေါင်းစပ်ခဲ့သည်။ သို့သော် သူက သွေးမျိုးဆက်စွမ်းအားကို မသန့်စင်နိုင်သောကြောင့် ခွန်အားထုတ်သုံးရန်အတွက် သားရဲပုံစံအဖြစ် ပြောင်းလဲခဲ့သည်။

ရှန့်လင်းရွှမ်းကိုင်ထားသော ရွှေရောင်သွေးစက်သည် ကြောင်မြီးတိုကလန်၏ သွေးမျိုးဆက်စွမ်းအားဖြစ်သည်။

ထိုသွေးစက်ကို ကလန်၏ယဇ်ပလ္လင်ထက်တွင် ထားရှိပြီး ကြောင်မြီးတိုပေါက်စများအတွက် စွမ်းအားချီးမြှင့်ပေးရန် သုံးခဲ့သည်။

မျိုးနွယ်ဝင်များ၏သွေးကို ယဇ်ပူဇော်ခြင်းဖြင့် သွေးစက်၏ခွန်အားကို တိုးမြှင့်ပေးနိုင်သည်။

ထိုအရာသည် လျှို့ဝှက်နယ်မြေအတွင်း၌ရှိသော မျိုးနွယ်များ၏ လုပ်ဆောင်ချက်ဖြစ်သည်။

သွေးစက်သည် ကလန်၏စွမ်းအားကို အသက်သွင်းပေးပြီး ကလန်ဝင်များက သွေးမျိုးဆက်ကိုအသုံးပြု၍ သွေးစက်ကို အားဖြည့်ပေးသည်။

ကြောင်မြီးတိုများ၏နေရာသည် သိပ်မဝေးပေ။ အရွယ်အစားအမျိုးမျိုးရှိသော ကောက်ရိုးအိမ်များကို မြင်လိုက်ရသည်။ ကလန်ဝင် တစ်သောင်းခန့်ရှိနိုင်သည်။

သူတို့ကို အဖော်ပြုပေးနေသော ကြောင်မြီးတိုများက ကျယ်လောင်စွာဟိန်းဟောက်သည်။ ကောက်ရိုးအိမ်များမှ မရေမတွက်နိုင်လောက်သော မျိုးနွယ်ဝင်များထွက်လာပြီး သူတို့ကို ဂရုစိုက်၍ ဝိုင်းရံထားသည်။

သူတို့၏ပြောစကားအရ သွေးမျိုးဆက်စွမ်းအားပါသောသွေးစက်ကို ယဇ်ပလ္လင်ထက်သို့ ပို့ပေးလျှင် သူတို့ကလန်က ရှန့်လင်းရွှမ်းကို သခင်အဖြစ် သတ်မှတ်လိမ့်မည်။

ရှန့်လင်းရွှမ်းက ဟန်မူယဲ့ကို လှည့်ကြည့်သည်။

“ဒီသွေးမျိုးဆက်က ငါတို့အတွက် အသုံးမဝင်ဘူး။ တခြားလူတွေနဲ့လဲလှယ်ဖို့ သိမ်းထားလို့ရတယ်။ ဒါမှမဟုတ်ရင်လည်း ဒီမိစ္ဆာမျိုးနွယ်ကို ထိန်းချုပ်လို့ရတယ်”

ဟန်မူယဲ့က ပြောလိုက်သည်။

သူ့စကားကို ကြားလိုက်ရသောအခါတွင် ရှန့်လင်းရွှမ်းက စိတ်ရှုပ်နေသောပုံစံဖြင့် ခေါင်းကုတ်သည်။ “ငါလဲလှယ်ချင်တဲ့အရာ မရှိဘူး”

ထို့နောက် သူက ခေါင်းခါလိုက်ပြန်သည်။ “သူတို့ကိုလည်း မထိန်းချုပ်ချင်ဘူး”

ဆင်မျိုးနွယ်သည် ထိုသို့ပင်ဖြစ်လိမ့်မည်။

သူတို့က ကိုယ်ပိုင်ဘဝကိုပဲ ကောင်းမွန်စွာနေချင်သည်။

ကံမကောင်းစွာဖြင့် ကျင့်ကြံခြင်းလောကတွင် မိစ္ဆာများသည် တိုက်ခိုက်ခြင်းမရှိဘဲ ကောင်းမွန်စွာနေနိုင်လိမ့်မည်မဟုတ်ပေ။

ရှန့်လင်းရွှမ်းက ခေါင်းမော့လိုက်ပြီး သွေးစက်ကို ဟန်မူယဲ့ဆီသို့ပေးသည်။

“အစ်ကိုဟန်ပဲ ဆုံးဖြတ်လိုက်ပါ”

“အဲ့ဒါဆိုရင်လည်း အရင်ဆုံး ကြောင်မြီးတိုကလန်ကို သိမ်းပိုက်လိုက်တာပေါ့” ဟန်မူယဲ့က သွေးစက်ကိုကိုင်ထားပြီး ပတ်ဝန်းကျင်ကိုကြည့်သည်။ သူ့မျက်လုံးထဲတွင် အလင်းများတောက်ပနေသည်။

ဤလျှို့ဝှက်နယ်မြေတွင် စည်းကမ်းများရှိသည်။ ကစားပွဲတစ်ခု၏ စည်းကမ်းများဖြစ်သည်။

ဟန်မူယဲ့က သိပ်မဝေးသောနေရာတွင်ရှိသည့် စင်မြင့်ပေါ်သို့လျှောက်သွားပြီး သွေးစက်ကို တင်လိုက်သည်။

“ဝီ”

ရွှေရောင်အလင်းတစ်ခု ပေါ်ထွက်လာသည်။

ဆယ်ပေရှည်သော ကြောင်မြီးတိုးပုံရိပ် ပေါ်လာသည်။

ထိုပုံရိပ်ပေါ်လာသောအခါတွင် ကြောင်မြီးတိုများအားလုံးက ဒူးထောက်ချလိုက်ပြီး ခေါင်းမမော့ရဲတော့ပေ။

ကြောင်မြီးတိုပုံရိပ်က ဖြည်းဖြည်းချင်းသိပ်သည်းလာသည်။ ထိုကြောင်၏ရွှေရောင်မျက်လုံးများက ရှန့်လင်းရွှမ်း၊ ဟန်မူယဲ့နှင့် ဟွမ်ကျစ်ဟူကိုကြည့်လိုက်ပြီး မြေခွေးဖြူလေးကို စိုက်ကြည့်သည်။

“မြင့်မြတ်တဲ့ကောင်းကင်လမ်းလျှောက်သူတွေ၊ ဘာများဆောင်ရွက်ပေးရမလဲ”

‘ကောင်းကင်လမ်းလျှောက်သူတဲ့လား’

ဟန်မူယဲ့က ပြုံးသည်။

ထိုအရာသည် လျှို့ဝှက်နယ်မြေ၏ စည်းကမ်းဖြစ်သည်။

ကြောင်မြီးတိုကလန်၏အလယ်တွင်ရှိသော အကြီးဆုံးတဲအိမ်တွင် အနီရောင်သစ်သီးရိုင်းများရှိနေသည်။ ဟွမ်ကျစ်ဟူက သစ်သီးပုံ၏ရှေ့တွင် ထိုင်နေသည်။

သူမ ရွေးချယ်နိုင်ရန်အတွက် စားပွဲရှည်ပေါ်တွင် သစ်သီးအမျိုးမျိုးနှင့် အသားများလည်း ရှိနေသည်။

မြေခွေးဖြူလေးသည် စားပွဲရှည်ပေါ်တွင်လှဲနေပြီး သစ်သီးတစ်လုံးကိုကိုင်၍ သေချာဝါးစားနေသည်။

တင်ပျဉ်ခွေထိုင်နေသော ရှန့်လင်းရွှမ်းက တဲအိမ်၏ခေါင်းမိုးကို အပေါက်ဖြစ်လုနီးပါး ဖြစ်သွားစေခဲ့သည်။

ဟန်မူယဲ့၏ရှေ့တွင် မီးခိုးရောင်နှင့် အနက်ရောင်သန်းနေသော ကြောင်မြီးတိုကြီးတစ်ကောင်က ရှန့်လင်းရွှမ်းနှင့် မြေခွေးဖြူလေးကို သေချာကြည့်ပြီး ဟန်မူယဲ့ကို ကြည့်လိုက်သည်။

“မိစ္ဆာတစ်သောင်းနယ်မြေက မိစ္ဆာတွေအားလုံးအတွက် နောက်ဆုံးနားခိုရာပဲ။ ငါတို့က ဒီနေရာမှာ ကြိုးစားရုန်းကန်ပြီး ငါတို့ဘိုးဘေးတွေရဲ့ဂုဏ်ကျက်သရေကို မှတ်မိနိုင်အောင် ကြိုးစားနေတယ်”

ကြောင်မြီးတိုက ရေရွတ်သည်။ တက်ကြွနေသောမျက်လုံးထဲတွင် ဝမ်းနည်းမှုနှင့်နောင်တများ ရှိနေသည်။

“ငါက တောအုပ်ထဲမှာ ကြောင်မြီးတိုတစ်ကောင်ဖြစ်ခဲ့တယ်။ ငါ့ကျင့်ကြံခြင်းက ကောင်းကင်ဘုံ ဝိညာဉ်ကိုယ်ခွဲအဆင့်ကို ရောက်ခဲ့တယ်”

“အမ်၊ အဲ့ဒါက မင်းတို့ ကောင်းကင်လမ်းလျှောက်သူတွေခေါ်တဲ့ ကျင့်ကြံဆင့်ပဲ”

ရှေးခေတ်တွင် မိစ္ဆာများနေထိုင်သောကြယ်ပေါ်တွင် တိုက်ပွဲတစ်ခုဖြစ်ပွားခဲ့သည်။ ကျွမ်းကျင်သူများ၏တိုက်ခိုက်မှုကြောင့် ကြယ်သည် ပျက်စီးသွားခဲ့သည်။

မိစ္ဆာတစ်သောင်းလျှို့ဝှက်နယ်မြေ အားကောင်းသောမိစ္ဆာကြီးများက ဖန်တီးခဲ့သည်။ သူတို့က သွေးမျိုးဆက်ကို လက်ဆင့်ကမ်းနိုင်ရန်အတွက် သွေးမျိုးဆက်စွမ်းအားများကို ချန်ထားခဲ့သည်။

တစ်နေ့တွင် သူတို့၏သွေးမျိုးဆက်ထဲမှ ကျွမ်းကျင်သူတစ်ဦးပေါ်ထွက်လာပြီး မိစ္ဆာတစ်သောင်းတံဆိပ်ဖြင့် မိစ္ဆာများအားလုံးကို စုစည်းနိုင်ရန် မျှော်လင့်ခဲ့သည်။

မိစ္ဆာတစ်သောင်းတံဆိပ်သည် ရှေးခေတ်မှဆင်းသက်လာသည်။

ထိုလောကကို ပျက်စီးခြင်းစကြဝဠာဟု ခေါ်သည်။

ဟန်မူယဲ့က ထိုနာမည်ကို ပထမဆုံးကြားဖူးခဲ့သည်။

သို့သော် သူက ခွေသားရဲ၏အရေပြားမှ ကျယ်ပြန့်သောကမ္ဘာတစ်ခုကို အာရုံခံမိသည်။

ထိုကမ္ဘာသည် ပျက်စီးခြင်းစကြဝဠာဖြစ်လိမ့်မည်။

ရှန်စန်းဟုခေါ်သော ကြောင်မြီးတိုကြီးသည် ပျက်စီးခြင်းစကြဝဠာမှစ၍ ကောင်းကင်လမ်းလျှောက်သူများ၊ နောက်ဆုံးသွေးမျိုးဆက်တိုက်ပွဲမှ ကြောင်ကတိုးကလန်၏ ကြမ်းတမ်းမှုများအထိ ပြောခဲ့သည်။

ကြောင်မြီးတို၏သွေးမျိုးဆက်စွမ်းအားသည် ဖြည်းဖြည်းချင်းလျော့နည်းလာကြောင်း ဟန်မူယဲ့က ခံစားမိသည်။ သွေးမျိုးဆက်က မသန့်စင်လျှင် သူ့မှတ်ဉာဏ်များ ဝေဝါးလာလိမ့်မည်။

“ဆက်တိုက်သန့်စင်ပြီး ပေါင်းစပ်နေမှ သွေးမျိုးဆက်က သန်မာလာလိမ့်မယ်။ အဲ့ဒီလိုမဟုတ်ရင် သွေးမျိုးဆက်က ဖြည်းဖြည်းချင်းအားနည်းလာပြီး နောက်ဆုံးမှာ ကလန်တစ်ခုလုံး သေဆုံးသွားရလိမ့်မယ်”

“လျှို့ဝှက်နယ်မြေကိုဝင်လာတဲ့ ကောင်းကင်လမ်းလျှောက်သူတွေမှာ ရွေးချယ်စရာနှစ်ခုရှိတယ်။ ပထမတစ်ခုကတော့ သွေးမျိုးဆက်ကို ယူသွားဖို့ပဲ။ အဲ့ဒါက ဘယ်လိုလုပ်လဲ ငါမသိဘူး”

“ဒုတိယတစ်ခုကတော့ သွေးမျိုးဆက်စွမ်းအားသန့်စင်လာအောင် ကူညီပေးပြီး မိစ္ဆာတစ်သောင်းပြိုင်ပွဲမှာ ဝင်ရောက်ယှဉ်ပြိုင်ဖို့ပဲ”

စန်းရှန်က ဟန်မူယဲ့ကိုကြည့်သည်။

ကောင်းကင်လမ်းလျှောက်သူများသည် လျှို့ဝှက်နယ်မြေသို့ဝင်ရောက်လာသော ကျင့်ကြံသူများဖြစ်သည်။

ရှန်စန်း၏ပြောစကားအရ မိစ္ဆာတစ်သောင်းလျှို့ဝှက်နယ်မြေသည် မိစ္ဆာသွေးမျိုးဆက်ရှိသောကမ္ဘာတစ်ရာခန့်နှင့် ချိတ်ဆက်နေသည်။ မိစ္ဆာသွေးမျိုးဆက်ရှိလျှင် လျှို့ဝှက်နယ်မြေကို ဖွင့်နိုင်သည်။

ဤလျှို့ဝှက်နယ်မြေတွင်ရှိသောမိစ္ဆာများသည် ပျက်စီးခြင်းစကြဝဠာမှ ဆင်းသက်လာခြင်းဖြစ်လိမ့်မည်။

“မင်းက သွေးမျိုးဆက်စွမ်းအားကို ယူသွားချင်တယ်ဆိုရင် ပေးလိုက်လို့ရတယ်။ ပြီးရင် မြန်မြန်ထွက်သွားပါတော့”

“ကြောင်ကတိုးကလန်ရဲ့ ကျွမ်းကျင်သူတွေက မကြာခင်မှာ ရောက်လာလိမ့်မယ်။ သွေးမျိုးဆက်စွမ်းအားမရှိတော့တဲ့ ကြောင်မြီးတိုတွေက သူတို့ရဲ့အစာ ဖြစ်သွားလိမ့်မယ်”

ရှန်စန်းက အထီးကျန်နေသောမျက်လုံးများဖြင့် ကျောက်ထိုင်ခုံပေါ်တွင် လဲလျောင်းနေသည်။

သွေးမျိုးဆက်မရှိသော မျိုးနွယ်စုသည် အခြေခံအားဖြင့် ပျက်စီးသွားပြီဖြစ်သည်။

အမှန်အတိုင်းပြောရလျှင် အရက်စက်ဆုံးနည်းလမ်းသည် မျိုးနွယ်ဝင်များအားလုံးကိုသတ်ဖြတ်၍ သူတို့၏သွေးကိုအသုံးပြုပြီး သွေးမျိုးဆက်စွမ်းအားကို သန့်စင်ခြင်းဖြစ်သည်။

“မိစ္ဆာတစ်သောင်းလျှို့ဝှက်နယ်မြေကို နှစ်တစ်ထောင်မှာတစ်ကြိမ် ဝင်ရောက်လာခဲ့တဲ့ ကောင်းကင်လမ်းလျှောက်သူတွေက မိစ္ဆာတစ်သောင်းပြိုင်ပွဲကို စတင်ကြတယ်မဟုတ်လား” ဟန်မူယဲ့က ရှန်စန်းကိုကြည့်သည်။

ရှန်စန်းက ခေါင်းညိတ်သည်။ “ဟုတ်တယ်။ သူတို့ရဲ့ရည်မှန်းချက်က မိစ္ဆာတစ်သောင်းတိုကင်ပဲ”

“မိစ္ဆာတွေအားလုံးကိုအုပ်ချုပ်ပြီး မိစ္ဆာတစ်သောင်းရဲ့ အစစ်အမှန်ဘုရင်တစ်ပါး ဖြစ်လာချင်တဲ့လူတွေချည်းပဲလေ”

ရှန်စန်းက မျက်လုံးများမှေးကျဉ်းလိုက်ပြီး လဲလျောင်းနေသည်။ “မိစ္ဆာတစ်သောင်းရဲ့ ဘုရင်ဟောင်းကို သွမ်ကျိုးရှောင်လို့ခေါ်တယ်”

သွမ်ကျိုးရှောင်၊ မိစ္ဆာတစ်သောင်းလျှို့ဝှက်နယ်မြေ၏ ဘုရင်ဟောင်း

သွမ်ကျိုးရှောင်၏နာမည်ကို ကြားလိုက်ရသောအခါတွင် ရှန့်လင်းရွှမ်း၏မျက်လုံးများက တောက်ပသွားသည်။

မြေခွေးဖြူလေးက ခေါင်းမော့ကြည့်ပြီး ခေါင်းငုံ့၍ သစ်သီးတစ်လုံးစားလိုက်သည်။

ဟန်မူယဲ့က ပြုံးသည်။