အခန်း (၄၀၂)

“ကောင်းပြီ။ မိစ္ဆာတစ်သောင်းပြိုင်ပွဲမှာ ဝင်ပါကြမယ်”

ဟန်မူယဲ့၏စကားကို ကြားလိုက်ရသောအခါတွင် ရှန်စန်း၏မျက်လုံးထဲတွင် အံ့အားသင့်မှုများနှင့် ပြည့်နှက်သွားသည်။

ရှန်စန်းက တစ်ကိုယ်ကောင်းဆန်ကြောင်း ဟန်မူယဲ့သိထားသည်။

သူက မိစ္ဆာတစ်သောင်းပြိုင်ပွဲတွင် ဝင်ရောက်ယှဉ်ပြိုင်ချင်လျှင် လက်ထဲတွင်ရှိသောစွမ်းအားကို တိုးတက်လာရန် ပြုလုပ်ရမည်။

ရှန်စန်းက ဟန်မူယဲ့တို့ကိုအသုံးချပြီး ကြောင်မြီးတိုကလန်ကို ခွန်အားတိုးလာစေချင်သည်။ သူ့သွေးမျိုးဆက်ကိုလည်း သန့်စင်စေချင်သည်။

ဟန်မူယဲ့တို့က မိစ္ဆာတစ်သောင်းပြိုင်ပွဲတွင် ရှုံးနိမ့်သွားလျှင်ပင် ရှန်စန်းနှင့် ကြောင်မြီးတိုကလန်တို့က အကျိုးအမြတ်များကို ခံစားရမည်ဖြစ်သည်။

ရှန်စန်းရရှိထားသော အသန်မာဆုံးသွေးမျိုးဆက်စွမ်းအားသည် ဝိညာဉ်ကိုယ်ခွဲအဆင့်ဖြစ်သည်။ ပျက်စီးခြင်းစကြဝဠာတွင် ထိုကလန်မျိုးသည် အဆင့်အနိမ့်ဆုံးဖြစ်သည်။

ကောင်းကင်လမ်းလျှောက်သူများသည် အားကောင်းသောကလန်များကိုသာ ပျိုးထောင်ပေးရန်ရွေးချယ်ကြသည်။ သူတို့က ကြောင်မြီးတိုကလန်ကဲ့သို့ အားနည်းသောကလန်များကို ဂရုမစိုက်ကြပေ။

ဟန်မူယဲ့အတွက် မိစ္ဆာတစ်သောင်းပြိုင်ပွဲတွင် ဝင်ရောက်ယှဉ်ပြိုင်ခြင်းသည် အရေးမကြီးပေ။

သူက လျှို့ဝှက်နယ်မြေအတွင်း၌ရှိသော အင်အားစုများ၏အခြေအနေကို လျင်မြန်စွာနားလည်ချင်သည်။

ကလန်ကြီးများသည် မိစ္ဆာတစ်သောင်းလျှို့ဝှက်နယ်မြေ၏အကြောင်းကို ပိုမိုနားလည်လိမ့်မည်။ သွေးမျိုးဆက်စွမ်းအား၏လမ်းညွှန်မှုကိုရသော မိစ္ဆာများသည် အားသာချက်ရှိလိမ့်မည်။

ဥပမာအနေဖြင့် အရှေ့ပင်လယ်၏ ရေနဂါးကလန်နှင့် တောင်ပိုင်းကုန်းမြေ၏ အားကောင်းသောမိစ္ဆာကလန်များ ဖြစ်ကြသည်။

ဝိညာဉ်သံချပ်ကာမိစ္ဆာများ ရောက်သွားမည့်နေရာကို ဟန်မူယဲ့က အနည်းငယ်သိချင်မိသည်။

ယခုအချိန်တွင် သူတို့က အနည်းငယ်ဝေးကွာနေသေးသည်။ မိစ္ဆာတစ်သောင်းပြိုင်ပွဲ စတင်သောအခါတွင် သူက သူတို့ကို မြင်နိုင်လိမ့်မည်။

ယခုအချိန်တွင် ဟန်မူယဲ့က ကြောင်မြီးတိုကလန်၏ဖိနှိပ်မှုကို ခုခံပြီး ခွန်အားစုဆောင်း၍ သွေးမျိုးဆက်စွမ်းအားကို သန့်စင်ရမည်။

ထို့အပြင် မြေခွေးဖြူလေးနှင့် ရှန့်လင်းရွှမ်းတို့အတွက် သွေးမျိုးဆက်စွမ်းအားကို ကူညီရှာဖွေပေးရမည်။

သူက လူသားများနှင့်လည်း ဆက်သွယ်ရန်လိုအပ်သည်။ အနည်းဆုံး အနောက်ဘက်နယ်စပ်ကုန်းမြေမှ ကျင့်ကြံသူများ၏လုံခြုံရေးကို အာရုံစိုက်ထားရမည်။

“သခင်က မိစ္ဆာတစ်သောင်းပြိုင်ပွဲမှာ ဝင်ပါဖို့ဆန္ဒရှိတယ်ဆိုရင် ကြောင်မြီးတိုကလန်ရဲ့ မျိုးနွယ်စုအကာအကွယ်လက်နက်ကို ပေးလိုက်ပါ့မယ်”

ရှန်စန်၏ရှေ့တွင် ချီစွမ်းအင်အလင်းတစ်ခု ပေါ်ထွက်လာပြီး တစ်ပေရှည်သောဓားတိုလေးတစ်ချောင်း ဟန်မူယဲ့၏ရှေ့သို့ ရောက်လာသည်။

ရှန်စန်းက ဉာဏ်ကောင်းပြီး ဟန်မူယဲ့က ခေါင်းဆောင်ဖြစ်ကြောင်း ပြောနိုင်သည်။

ထိုဓားတိုလေးသည် ကြောင်မြီးတိုများကိုင်ထားသောဓားနှင့် တူသော်လည်း သတ်ဖြတ်လိုစိတ်အချို့ရှိနေသည်။

ဟန်မူယဲ့က ဓားတိုလေးကို ဆုပ်ကိုင်လိုက်သည်။ သူ့လက်ထဲမှ ဓားချီများထွက်သွားသည်။

“ဝီ!”

ဓားချီများက အထဲသို့တိုးဝင်သွားသောကြောင့် ဓားတိုလေးက တုန်ခါသွားသည်။

ဟန်မူယဲ့၏စိတ်ထဲသို့ အချက်အလက်အမျိုးမျိုး တိုးဝင်လာသည်။

ထိုဓားတိုလေးကို ကြောင်မြီးတိုကျွမ်းကျင်သူတစ်ဦး၏ နံရိုးဖြင့်ပြုလုပ်ထားသည်။ ဓားတိုထဲတွင် ကျွမ်းကျင်သူ၏ စွမ်းအားအကြွင်းအကျန်တချို့ရှိနေပြီး ကိုင်ဆောင်ထားသောလူ၏တိုက်ခိုက်နိုင်စွမ်းကို အနည်းငယ်တိုးလာစေသည်။

ထိုဓားတိုသည် အထွတ်အထိပ်အဆင့်အရည်အသွေး ဝိညာဉ်တစ်ဝက်အဆင့်လက်နက်ဖြစ်သည်။

ကြောင်မြီးတိုကလန်တွင် လူတစ်သောင်းခန့်သာရှိပြီး အခြေခံအုတ်မြစ်အဆင့်တွင် လူအနည်းငယ်သာရှိသည်။

သို့သော် မိစ္ဆာများ၏ခွန်အားကို ကျင့်ကြံဆင့်အပေါ်တွင် အပြည့်အဝမဆုံးဖြတ်နိုင်ပေ။ သူတို့၏ သွေးမျိုးဆက်စွမ်းအားအပေါ်တွင် ပိုမိုမူတည်သည်။

မွေးကင်းစရေနဂါး၏ သွေးမျိုးဆက်စွမ်းအားသည် ကလန်အများအပြားကို ဖျက်ဆီးပစ်နိုင်သည်။

ဟန်မူယဲ့က ဓားတိုထဲမှ မျှော်လင့်မထားသောအံ့အားသင့်ဖွယ်အချို့ကို ရရှိခဲ့သည်။

ကြောင်မြီးတိုများသည် ကောင်းမွန်စွာပုန်းအောင်းနိုင်ပြီး အလွန်လျင်မြန်သည်။

သူတို့က အငွေ့အသက်များကို ထိန်းချုပ်ထားနိုင်ပြီး တိုက်ခိုက်မှုမပြုလုပ်လျှင် သတိထားမိရန် ခက်ခဲသည်။

ထိုအရာသည် သတင်းအချက်အလက်များကို လွှဲပြောင်းပေးရန်အတွက် အသင့်တော်ဆုံး သွေးမျိုးဆက်စွမ်းအားဖြစ်သည်။

သူတို့က ဓားပညာရပ်ကိုလည်း လေ့ကျင့်နိုင်သည်။

သူတို့၏ခန္ဓာကိုယ်တည်ဆောက်ပုံက အရပ်ပုပြီး ပေါ့ပါးသည်။ သူတို့က တိတ်ဆိတ်စွာတိုက်ခိုက်နိုင်သည်။ ထိုသွေးမျိုးဆက်နည်းစနစ်မျိုးသည် အနီးကပ်လုပ်ကြံသတ်ဖြတ်ခြင်းအတွက် အလွန်ကောင်းမွန်သည်။

“ငါ့ကို မင်းရဲ့သွေးမျိုးဆက်စွမ်းအားပေးလိုက်”

ဟန်မူယဲ့က ဓားတိုကိုချလိုက်ပြီး ပြောသည်။

ရှန်စန်းက ပါးစပ်ဖွင့်လိုက်သောအခါတွင် ရွှေရောင်ပုလဲတစ်လုံးပေါ်လာသည်။

ဟန်မူယဲ့က လက်မြှောက်ပြီး သွေးပုလဲကို ဆုပ်ကိုင်သည်။ သူ့မျက်လုံးများက ရွှေရောင်တောက်လာသည်။

သူက သွေးမျိုးဆက်စွမ်းအားကို အာရုံခံပြီး အထဲတွင်ရှိသော မှတ်ဉာဏ်များကို စုစည်းနိုင်သည်။

သူ့ဝိညာဉ်က လုံလောက်စွာမသန်မာလျှင် ထိုသို့လုပ်နိုင်မည်မဟုတ်ပေ။

သို့သော် သူ့ဝိညာဉ်စွမ်းအားသည် သွေးပုလဲ၏စွမ်းအားထက် သာလွန်နေသောကြောင့် သွေးမျိုးဆက်အမွေအနှစ်စွမ်းအားကို ပြောင်းလဲရန် မခက်ပေ။

အသက်ရှူကြိမ်တစ်ရာခန့်အကြာတွင် သွေးပုလဲက မှိန်ဖျော့သောဓားဆန္ဒစွမ်းအားကို ထုတ်လွှတ်နေသည်။

“ယဇ်ပလ္လင်ကိုဖွင့်ပြီး အမွေအနှစ်ကို ဝေမျှပေးလိုက်”

ဟန်မူယဲ့က သွေးပုလဲကိုပြန်ပေးလိုက်ပြီး တီးတိုးပြောသည်။

ရှန်စန်းက ပါးစပ်ဖွင့်ပြီး သွေးပုလဲကို မြိုချသည်။ သူ့တစ်ကိုယ်လုံး တုန်ခါသွားပြီး မျက်လုံးထဲမှ ရွှေရောင်ဓားအလင်းများ ပေါ်ထွက်လာသည်။

သူက ဟန်မူယဲ့ကို ထိတ်လန့်စွာကြည့်သည်။

ဟန်မူယဲ့က သွေးမျိုးဆက်အမွေအနှစ်ထဲတွင်ရှိသော မှတ်ဉာဏ်များကို ပြောင်းလဲခဲ့သည်။

ထိုသို့ပြုလုပ်ရန် လိုအပ်သောစွမ်းအားသည် ကလန်တစ်ခုလုံးထက် ကျော်လွန်နေသည်။

ထို့အပြင် အမွေအနှစ်အသစ်ထဲတွင် များပြားသောဓားနည်းစနစ်များ ရှိနေသည်။

အနီးကပ်တိုက်ခိုက်ခြင်းဓားနည်းစနစ်၊ ဖုံးကွယ်ထားသော ဓားပျံနည်းစနစ်၊ ချီစွမ်းအင်ဖြင့် ထိန်းချုပ်ရသော ဓားနည်းစနစ်။

ထိုဓားနည်းစနစ်များသည် ကြောင်မြီးတိုကလန်၏ သွေးမျိုးဆက်စွမ်းအားနှင့် အလွန်လိုက်ဖက်ညီသည်။

ထိုနည်းလမ်းများဖြင့် ကြောင်မြီးတိုကလန်၏ တိုက်ခိုက်နိုင်စွမ်းသည် အဆပေါင်းများစွာ တိုးတက်လာလိမ့်မည်။

“ရှန်စန်းက ဒီဆုလာဘ်အတွက် ကျေးဇူးတင်ပါတယ်သခင်”

ကြောင်ကြီးက ခေါင်းငုံ့လိုက်ပြီး ဟန်မူယဲ့ကို ဦးညွှတ်သည်။ ထို့နောက် ဖျတ်ခနဲပျောက်ကွယ်သွားပြီး ယဇ်ပလ္လင်ထက်တွင် ပေါ်လာသည်။

ဟန်မူယဲ့က ရှန်စန်း၏ သွေးမျိုးဆက်နှင့် အမွေအနှစ်မှတ်ဉာဏ်များကို ပြောင်းလဲပေးခဲ့သည်။

ဟန်မူယဲ့က အမွေအနှစ်မှတ်ဉာဏ်များနှင့် ပေါင်းစပ်ပြီး သူတို့၏သွေးမျိုးဆက်ကို ထိန်းချုပ်ထားသည်။

အနာဂတ်တွင် ဟန်မူယဲ့က ကြောင်မြီးတိုကလန်၏သခင် ဖြစ်လာလိမ့်မည်။

“ဂါး ....”

အော်သံတစ်သံထွက်လာပြီး ကြောင်မြီးတိုများက ယဇ်ပလ္လင်ဆီသို့ လျှောက်သွားကြသည်။ သူတို့က တင်ပျဉ်ခွေထိုင်လိုက်သည်။

သူတို့၏ခေါင်းပေါ်တွင် သွေးရောင်အလင်းပေါ်ထွက်လာသည်။

သူတို့က အမွေအနှစ်အသစ်ကို ဆက်ခံနေသည်။

မရေမတွက်နိုင်လောက်သော သဘာဝစွမ်းအင်အလင်းများ ပေါ်ထွက်လာပြီး ပေတစ်ရာရှည်လျားသော သွေးရောင်ကြောင်မြီးတိုကြီးတစ်ကောင်အဖြစ် ပြောင်းလဲသွားသည်။

ကြောင်မြီးတိုပုံရိပ်၏မျက်လုံးထဲတွင် ဓားအလင်းများရှိနေသည်။

ထိုကြောင်မြီးတိုတွင် ကျားရိုင်းတစ်ကောင်၏အရိပ်အယောင် ရှိနေသည်။

ရှေးခေတ်အချိန်ကို ပြန်ကြည့်လိုက်လျှင် ကြောင်မြီးတိုနှင့် ကျားများကြားတွင် ဆက်သွယ်မှုအချို့ ရှိနေနိုင်သည်။

ဟန်မူယဲ့က တဲအိမ်ထဲတွင်ရပ်နေပြီး ကြောင်မြီးတိုပုံရိပ်ကိုကြည့်၍ မျက်လုံးများမှေးကျဉ်းလိုက်သည်။

သူက ထိုကြောင်မြီးတိုပုံရိပ်ထဲတွင် လျှို့ဝှက်ချက်များကို မြင်နေရသည်။

ကျားသွေးမျိုးဆက်အရိပ်အယောင်နှင့် မသန့်စင်သော တခြားစွမ်းအားများလည်း ရှိနေသည်။

မိစ္ဆာတစ်သောင်းလျှို့ဝှက်နယ်မြေ၏ မိစ္ဆာများသည် သွေးမျိုးဆက်တိုးတက်လာစေရန်အတွက် သွေးမျိုးဆက်အမျိုးမျိုးကို ဝါးမြိုခဲ့သည်။ သွေးမျိုးဆက်စွမ်းအားများက အလိုလျောက် ပေါင်းစပ်သွားကြသည်။

သန့်စင်ခြင်းနှင့် ပေါင်းစပ်ခြင်းတို့သည် ကျင့်ကြံခြင်းလမ်းစဉ်တစ်ခုဖြစ်သည်။

ကျင့်ကြံခြင်းတွင် ရွေချယ်စရာအမျိုးမျိုးရှိသည်။

“ဘုန်း!”

အဝေးတစ်နေရာတွင် တုန်ခါသံပေါ်ထွက်လာသည်။

မိစ္ဆာစွမ်းအင်ပုံရိပ်များ ပေါ်လာသည်။

ကြောင်ကတိုးကလန်၏ ကျွမ်းကျင်သူများဖြစ်သည်။

ရှန့်လင်းရွှမ်းက ခေါင်းအနည်းငယ်ငုံ့၍ မတ်တပ်ရပ်သည်။ ထိုမှသာ သူက တဲအိမ်၏ခေါင်မိုးကို ကာကွယ်နိုင်မည်ဖြစ်သည်။

“အစ်ကိုဟန်၊ ကျွန်တော်သွားကြည့်လိုက်ရမလား”

ထိုနေရာမှထွက်ပေါ်လာသောစွမ်းအားများသည် ကြောင်မြီးတိုကလန်ထက် ပိုမိုသိပ်သည်းသည်။

ဟန်မူယဲ့က ခေါင်းခါလိုက်ပြီး ခပ်ဟဟရယ်သည်။ “သူတို့က ဓားကျင့်ကြံသူတွေဖြစ်လာဖို့ အရည်အချင်းရှိလားသိချင်တယ်”

သူက ယဇ်ပလ္လင်ကို ကြည့်နေသည်။

ကြောင်မြီးတိုမျိုးနွယ်ဝင်များက ဓားတိုများကိုကိုင်ထားပြီး တစ်ယောက်ပြီးတစ်ယောက် ထလာသည်။ သူတို့က အနက်ရောင်ပုံရိပ်အဖြစ်ပြောင်းပြီး တိတ်ဆိတ်စွာပျောက်ကွယ်သွားသည်။

ဟန်မူယဲ့က ကြောင်မြီးတိုကလန်၏ သွေးမျိုးဆက်စွမ်းအားကို ထိန်းချုပ်မထားခဲ့လျှင် ကြောင်မြီးတိုများ၏တည်နေရာကို သိနိုင်မည်မဟုတ်ပေ။

ရှန့်လင်းရွှမ်းက အံ့အားသင့်သွားပုံပေါ်သည်။

တဲအိမ်ထဲတွင် လဲလျောင်းနေသောမြေခွေးဖြူလေးက ဟန်မူယဲ့ကို မော့ကြည့်သည်။

အဝေးတစ်နေရာတွင် အနက်ရောင်ကြောင်ကတိုးများက ကြောင်မြီးတိုကလန်၏စခန်းသို့ ပြေးဝင်လာသည်။

သူတို့အားလုံးက အခြေခံအုတ်မြစ်အဆင့်တွင်ဖြစ်သည်။

သူတို့၏ခွန်အားနှင့် ကြောင်မြီးတိုကလန်တစ်ခုလုံးကို ဖျက်ဆီးပစ်နိုင်သည်။

ကြောင်မြီးတိုကလန်က လက်အောက်ခံကလန်တစ်ခု ဖြစ်နေသည့်အတွက် အံ့အားသင့်ရန်မလိုတော့ပေ။

“သတ် ....”

ရှေ့ဆုံးမှပြေးဝင်လာသော ကြောင်ကတိုးကျွမ်းကျင်သူက အော်ဟစ်လိုက်သည်။ သူက လက်ထဲတွင်ရှိသောပုဆိန်ကို ဝှေ့ယမ်းလိုက်သောကြောင့် လေပြင်းများတိုက်ခတ်လာပြီး ကြောင်မြီးတိုကလန်၏စခန်းကို ရိုက်ခတ်လိုက်သည်။

သို့သော် သူအော်ဟစ်လိုက်သောအချိန်တွင် မျက်နှာထားပြောင်းလဲသွားခဲ့သည်။

မီးခိုးရောင်ပုံရိပ်တစ်ခုက သူ့ရှေ့ ငါးပေအကွာတွင်ပေါ်လာသည်။ ထိုပုံရိပ်က လက်ထဲတွင် အနက်ရောင်ဓားတိုတစ်ချောင်းကိုင်ထားပြီး သူ့ရင်ဘတ်ကို ထိုးချလိုက်သည်။

“ရွှပ် ....”

ဓားတိုက အနက်ရောင်ချပ်ဝတ်နှင့် ထိတွေ့သွားသောကြောင့် မီးပွားများထွက်လာသည်။

ကြောင်ကတိုးကလန်၏ကျွမ်းကျင်သူသည် ကြောက်ရွံ့မှုကြောင့် မျက်နှာတစ်ခုလုံးဖြူဖျော့သွားပြီး ဒေါသများကြောင့် မျက်နှာတစ်ခုလုံး နီရဲလာသည်။

သူက အားနည်းသောကြောင်မြီးတိုတစ်ကောင်၏ ဓားချက်ကို ရင်ဆိုင်ခဲ့ရသည်။

“ငရဲကိုသွားလိုက် ....”

သူက လက်ထဲတွင်ရှိသောပုဆိန်ကို မြှောက်လိုက်သည်။

ထိုအချိန်တွင် ဓားတိုသုံးချောင်းက သူ့လက်မောင်းအောက်မှ လည်ပင်းအထိ တိုးဝင်လာသည်။

သွေးများပန်းထွက်သွားသည်။

အခြေခံအုတ်မြစ်ပဥ္စမအဆင့်သို့ရောက်နေသော ကြောင်ကတိုးကလန်၏ကျွမ်းကျင်သူသည် သတ်ဖြတ်ခံလိုက်ရသည်။

ကြောင်ကတိုးကျွမ်းကျင်သူ၏သွေးစီးကြောင်းများ ပျောက်ဆုံးသွားသည်။ ပတ်ဝန်းကျင်တွင်ရှိသော ကြောင်မြီးတိုများက သွေးများကို စုပ်ယူလိုက်သည်။

လျှို့ဝှက်နယ်မြေတွင် သန်မာသောရန်သူများကိုသတ်ဖြတ်ပြီး သွေးမျိုးဆက်စွမ်းအားကို စုပ်ယူနိုင်သည်။

ထိုအရာသည် ကျင့်ကြံခြင်းနှင့်တိုက်ခိုက်နိုင်စွမ်းကို တိုးမြှင့်ရန်အတွက် အမြန်ဆုံးနည်းဖြစ်သည်။

တစ်ဖက်လူကို သတ်ဖြတ်လျှင် ခွန်အားရနိုင်သည်။

ထိုအချက်ကြောင့် အားနည်းသောကလန်များသည် လုံခြုံနေခဲ့သည်။

အားကောင်းသောကလန်များ၏ ကျွမ်းကျင်သူများသည် အားနည်းသောကလန်များကို သတ်ဖြတ်ရန် အထင်သေးသည်။

သိသာသောအကျိုးအမြတ်များလည်း ရလာမည်မဟုတ်ပေ။

“မဆိုးဘူး” ဟန်မူယဲ့က သတ်ဖြတ်မှုကိုကြည့်ပြီး ပြောလိုက်သည်။

ရှန့်လင်းရွှမ်းက မယုံကြည်နိုင်ဘဲ နေရာတွင် ကြောင်အစွာရပ်နေသည်။

ထိုကြောင်မြီးတိုများ၏တိုက်ခိုက်နိုင်စွမ်းက ထိုသို့ကောင်းမွန်နေလျှင် သူက အတော်လေးအားထုတ်ခဲ့ရလိမ့်မည်။

ကြောင်ကတိုးကလန်၏ကျွမ်းကျင်သူကို သတ်ဖြတ်လိုက်ခြင်းသည် အစပင်ရှိသေးသည်။

ကြောင်မြီးတိုမျိုးနွယ်ဝင်များက စခန်းထဲမှ တစ်ယောက်ပြီးတစ်ယောက်ထွက်လာသည်။ သူတို့က အနက်ရောင်ပုံရိပ်အဖြစ်ပြောင်း၍ စစ်ပွဲအတွင်းသို့ ပြေးဝင်သွားသည်။