အခန်း (၄၁၉)

ဟန်မူယဲ့က လက်ကိုဝှေ့ယမ်းလိုက်ပြီး ဓားကိုယူသည်။ သူက ဓားကိုကြည့်လိုက်ပြီး ညင်သာစွာခေါင်းခါသည်။

အံ့ဖွယ်နေမင်းရွှေသံမဏိကို အဓိကသတ္တုအနေဖြင့် အသုံးပြုထားသည်။ ကြိုးကြာရိုးတွင်းခြင်ဆီ၊ ကျောက်ပန်းသံမဏိနှင့် တခြားဝိညာဉ်သတ္တုများကိုလည်း ထည့်သွင်းထားသည်။ ထောင်ချီမီးဆေးခြင်းနည်းစနစ်ဖြင့် သန့်စင်ထားသည်။

သန့်စင်ခြင်းနည်းစနစ်သည် မဆိုးပေ။ အသုံးပြုထားသော ဝိညာဉ်ကုန်ကြမ်းများကလည်း မဆိုးပေ။ သို့သော် သန့်စင်ခြင်းဖြစ်စဉ်အတွင်း၌ အားစိုက်မထားသောကြောင့် ထွက်ပေါ်လာသောဓားသည် ဝိညာဉ်တစ်ဝက်အဆင့်တွင် ရှိနေသည်။

သန့်စင်ခြင်းနည်းစနစ်နှင့် အသုံးပြုထားသောဝိညာဉ်သတ္တုများအရ အဆင့်မြင့်ဝိညာဉ်လက်နက် ထွက်လာသင့်သည်။

ဟန်မူယဲ့က ဓားချီကို ထည့်သွင်းလိုက်သောအခါတွင် နားလည်သွားခဲ့သည်။

ကျောက်တုံးရေအိုင်ကြံ့များသည် အရပ်ရှည်ပြီး သန်မာသည်။ သူတို့က ချိုတစ်ချောင်းကြံ့၏သွေးမျိုးဆက်ကို ပိုင်ဆိုင်ထားသည်။

သူတို့က လက်နက်များသန့်စင်ရာတွင် ကျွမ်းကျင်ပြီး သွေးမျိုးဆက်ထဲတွင် လက်နက်သန့်စင်ခြင်းအမွေအနှစ် ရှိနေသည်။

သို့သော် သူတို့သည် အမြဲဒေါသထွက်နေပြီး စိတ်ငြိမ်ရန် ခက်ခဲသည်။

ထို့ကြောင့် လက်နက်အများအပြားသန့်စင်နိုင်သော်လည်း အရည်အသွေးမြင့်လက်နက်များ သိပ်မရှိပေ။

ဟန်မူယဲ့က ဓားမှတစ်ဆင့် တခြားပုံရိပ်ကို မြင်လိုက်ရသည်။

ကျောက်တုံးရေအိုင်ကြံ့ကလန်သည် မိုင်းတွင်းများတူးဖော်ပြီး ဆင်ကလန်က သတ္တုရိုင်းများကို သယ်ပို့ရသည်။

သံမဏိချိန်းကြိုးများဖြင့် ချည်နှောင်ထားခံရပြီး ကျောပေါ်တွင် ခြင်းတောင်းကြီးများသယ်ထားသော ဆင်ကလန်သားများသည် စုတ်ပြတ်နေသောကျောက်တုံးအိမ်များထဲတွင် နေကြသည်။ သူတို့က မြိုချနိုင်ရန်ခက်ခဲသော အစားအစာများကို စားသုံးပြီး အပင်ပန်းဆုံးအလုပ်များကို လုပ်ရသည်။

ဆင်မိစ္ဆာများက မိုင်းတူးနေသောအချိန်တွင် မကြာခဏဆိုသလိုပင် မိုင်တွင်းများ ပြိုကျလေ့ရှိသည်။

သူတို့က မိုင်းတွင်းများကို ပြန်ဖော်လိုက်သောအချိန်တွင် ဆင်ကလန်သားအများစုသည် ကျောက်တုံးများပိခြင်း သို့မဟုတ် အသက်ရှူကြပ်ခြင်းတို့ကြောင့် သေဆုံးသွားခဲ့သည်။

ဟန်မူယဲ့က ဓားကိုသိမ်းလိုက်ပြီး မတ်တပ်ရပ်သည်။

ဓားသည် အလွန်ရှည်ပြီး လေးလံသောကြောင့် အသက်ကိုးခုကြောင်မိစ္ဆာကလန်နှင့် အစိမ်းရောင်မြေခွေးကလန်တို့အတွက် မသင့်တော်ပေ။

သို့သော် ပန်းပဲပညာရပ်တွင်ကျွမ်းကျင်သော ကျောက်တုံးရေအိုင်ကြံ့ကလန်ကို ထိန်းချုပ်နိုင်သည်။

ဟန်မူယဲ့က တဲအိမ်၏အပြင်ဘက်တွင်လဲလျောင်းနေသော ချိုတစ်ချောင်းကြံ့ကိုကြည့်လိုက်ပြီး ပြုံးသည်။

ချိုတစ်ချောင်းကြံ့၏ သွေးမျိုးဆက်အမွေအနှစ်သည် အလွန်ညင်သာမှုရှိသည်။ ထို့ကြောင့် ကျောက်တုံးရေအိုင်ကြံ့ကလန်၏ သွေးမျိုးဆက်နှင့်ပေါင်းစပ်ရန် သင့်တော်သည်။

တဲအိမ်၏အပြင်ဘက်တွင် ဟွမ်ကျစ်ဟူက လက်နှစ်ဖက်ကို နောက်ပစ်ထားပြီး ကဗျာတစ်ပုဒ်ရွတ်နေသည်။

သူမ၏ရှေ့တွင် ကလန်းသားတစ်ရာခန့်သည် တင်ပျဉ်ခွေထိုင်ပြီး တိတ်ဆိတ်စွာနားထောင်နေသည်။

ဟွမ်ကျစ်ဟူ၏သင်ကြားမှုသည် သူတို့၏ ဗဟုသုတနှင့် အတွေးအမြင်ကို တိုးတက်လာစေနိုင်သည်။

သွေးမျိုးဆက်ထဲတွင်ရှိသော မှတ်ဉာဏ်များသည် အတိတ်မှဖြစ်သည်။

ဆက်တိုက်သင်ယူနေမှသာ သူတို့က လက်ရှိအခြေအနေကို နားလည်နိုင်မည်။

ဟွမ်ကျစ်ဟူ၏နောက်တွင် အစိမ်းရောင်ဝတ်စုံနှင့် သက်လတ်ပိုင်းအရွယ်အမျိုးသမီးတစ်ယောက်က ဟန်မူယဲ့ကို လှမ်းကြည့်သည်။ ထို့နောက် သူမက ခေါင်းညိတ်ပြီး ဟွမ်ကျစ်ဟူကို တီးတိုးပြောသည်။

ဟွမ်ကျစ်ဟူက ပျော်ရွှင်သွားသည်။ သူမက အော်ဟစ်လိုက်ပြီး လက်နှစ်ဖက်ကိုဝှေ့ယမ်းလျက် ပြေးလာသည်။

“မွေးစားအဖေ၊ သမီးတို့ အပြင်ထွက်ပြီး ကစားတော့မှာလား”

ဟန်မူယဲ့က ပြုံးလိုက်ပြီး ခေါင်းညိတ်သည်။

အစိမ်းရောင်ဝတ်စုံနှင့်အမျိုးသမီးက နောက်မှလိုက်လာသည်။

ရှင်လင်းယွီ၊ အသက်ကိုးခုကြောင်ကလန်၏ ကောင်းကင်ဘုံအဆင့်ကျွမ်းကျင်သူ ....

သူမက ကောင်းကင်မြေခွေးသွေးမျိုးဆက်ကြောင့် ပုံရိပ်ယောင်များတွင် ကျွမ်းကျင်သည်။ ထို့အပြင် အနီးကပ်တိုက်ခိုက်မှုတွင်လည်း အလွန်သန်မာသည်။

ဟန်မူယဲ့က ဟွမ်ကျစ်ဟူကို အချိန်ပြည့်စောင့်ရှောက်ရန်အတွက် သူမကို တာဝန်ပေးထားသည်။

ယွင်တိက အရေးကြီးသောအချိန်သို့ရောက်မှ ပေါ်လာလိမ့်မည်။

“သွားကြစို့။ အစိမ်းရောင်မြေခွေးတွေရဲ့ ချန်တောင်ကုန်းကလန်ကို သွားကြမယ်”

ဟန်မူယဲ့က ဟွမ်ကျစ်ဟူကိုဦးဆောင်ပြီး ချိုတစ်ချောင်းကြံ့၏ ကျယ်ပြန့်သောကျောပြင်ပေါ်သို့ တက်လိုက်သည်။

ချိုတစ်ချောင်းကြံ့က ပျော်ရွှင်စွာလျှောက်သွားသည်။ ကလန်မှထွက်လာသောအခါတွင် အရှိန်မြှင့်လိုက်သည်။

ရှန်လင်းယွီက လေပြေလေညင်းတစ်ခုအသွင်ပြောင်း၍ နောက်မှ တိတ်ဆိတ်စွာလိုက်လာသည်။

ကလန်အတွင်းရှိတခြားလူများတွင် ကိုယ်ပိုင်အလုပ်များ ရှိသေးသည်။

စီးပွားရေးကိစ္စနှင့် အင်အားစုများအား စုံစမ်းသောကိစ္စတွင် လူလိုနေသည်။

ချိုတစ်ချောင်းကြံ့က လျင်မြန်စွာပြေးလွှားနေသည်။

ချန်တောင်ကုန်းသို့ရောက်လာရန်အတွက် တစ်ရက်သာကြာခဲ့သည်။

ဟန်မူယဲ့က ကောင်းကင်ကြိုးကြာတောင်ပံကို အသုံးပြုခဲ့လျှင် အဆပေါင်းများစွာ ပိုမိုလျင်မြန်လာလိမ့်မည်။

“အစ်ကိုဟန်ရဲ့ အသက်ကိုးခုကြောင်ကလန်က လျှို့ဝှက်နယ်မြေမှာ ထူးခြားဆန်းကြယ်တဲ့ကလန် ဖြစ်နေပြီ”

သူတို့က ချန်တောင်ကုန်းသို့ ရောက်လာသောအခါတွင် ပိုင်ဝူဟန်၏အသံကို ကြားလိုက်ရသည်။

ခရမ်းဖျော့ရောင်ဝတ်စုံကို ဝတ်ထားသော ပိုင်ဝူဟန်က ချိုတစ်ချောင်းကြံ့၏ရှေ့တွင် ပေါ်လာသည်။

“အစ်မရှောင်ပိုင်” ဟွမ်ကျစ်ဟူက ပျော်ရွှင်စွာနှုတ်ဆက်သည်။

“သမီးဗိုက်ဆာနေပြီ”

ပိုင်ဝူဟန်က တခစ်ခစ်ရယ်လိုက်ပြီး ဟွမ်ကျစ်ဟူကိုချီသည်။ ထို့နောက် သူမက သဘာဝစွမ်းအင်အလင်းများဖြင့် တောက်ပနေသောသစ်သီးအချို့ကို ထုတ်ယူသည်။

“သိတာပေါ့။ သိတာပေါ့။ သမီးအတွက် အရာသာရှိတာတွေ ချန်ထားတယ်”

ပိုင်ဝူဟန်က သစ်သီးများကို ဟွမ်ကျစ်ဟူ၏အိတ်ထဲသို့ ထည့်ပေးလိုက်ပြီး ပြုံးသည်။

ပိုင်ဝူဟန်က ဟွမ်ကျစ်ဟူကိုချီထားပြီး ဦးချိုရှည်ကြံ့နှင့် ဟန်မူယဲ့ကို ကြည့်သည်။

“အစ်ကိုဟန်က ရှန့်လင်းရွှမ်းအကြောင်းကို သိထားလို့ ကျွန်မတို့ချန်တောင်ကုန်းမြေခွေးကလန်ကို ရောက်လာတာလား”

ရှန့်လင်းရွှမ်း ....

ထိုကလေးသည် ကျောက်တုံးရေအိုင်ကြံ့ကလန်၏အနီးတွင် ရှိနေသည်။

သူက ကြံ့ကလန်၏ သယ်ယူပို့ဆောင်ခြင်းအဖွဲ့များကို တိုက်ခိုက်ပြီး ကျွန်ပြုခံထားရသော ဆင်ကလန်သားများကို လွတ်ပေးနိုင်ရန် ကြိုးစားနေသည်။

အသက်ကိုးခုကြောင်ကလန်၏ သတင်းအချက်အလက်များအရ ကျောက်တုံးရေအိုင်ကြံ့ကလန်သည် တိုက်ခိုက်မှုများကြောင့် အလွန်ဒေါသထွက်နေပြီး သူ့ကိုသတ်ဖြတ်ရန် ဆုံးဖြတ်ထားသည်။

ဟန်မူယဲ့က လက်မြှောက်ပြီး ကျောက်တုံးရေအိုင်ကြံ့ကလန်၏ သန့်စင်ထားသောဓားကို ပစ်ပေးသည်။

ပိုင်ဝူဟန်က ဓားကိုဖမ်းလိုက်ပြီး တစ်ချက်ကြည့်သည်။ သူမက ခေါင်းညိတ်လိုက်ပြီး ပြောသည်။

“ဓားက နည်းနည်း အကြမ်းထည်ဆန်တယ်။ ပိုပြီးသန့်စင်နိုင်ရင် ဓားကောင်းတစ်လက်ဖြစ်လာမှာပဲ”

သူမက ဟန်မူယဲ့ကို မော့ကြည့်သည်။

“အစ်ကိုဟန်က ကျောက်တုံးရေအိုင်ကြံ့ကလန်ကို သိမ်းပိုက်ချင်တာလား”

“ကျွန်မသိသလောက်ဆိုရင် ကျောက်တုံးရေအိုင်ကြံ့ကလန်က ဒေါသကြီးတယ်။ သူတို့ကိုထိန်းချုပ်ဖို့ လွယ်မှာမဟုတ်ဘူး”

မိစ္ဆာသွေးမျိုးဆက်စွမ်းအားသည် အကျင့်စရိုက်ပေါ်တွင် သက်ရောက်မှုရှိသည်။

ထိုအကျင့်စရိုက်ကို အရိုးများထဲတွင် နက်ရှိုင်းစွာထွင်းထုထားသည်။ လွယ်ကူစွာ မပြောင်းလဲနိုင်ပေ။

ထိုအကျင့်စရိုက်ကို ပြောင်းလဲခြင်းသည် အမွေအနှစ်မှတ်ဉာဏ်များကို ပြောင်းလဲခြင်းထက် ပိုမိုခက်ခဲသည်။

‘အစ်ကိုဟန်က လက်နက်သန့်စင်နိုင်တဲ့ ကျောက်တုံးရေအိုင်ကြံ့ကလန်ကို လိုချင်တာလား’

ပိုင်ဝူဟန်၏မေးခွန်းကို ကြားရသောအခါတွင် ဟန်မူယဲ့က ခေါင်းခါလိုက်ပြီး မဖြေခဲ့ပေ။

“သွားကြစို့။ ဆင်ကလန်သားတွေက စစ်ယွီတောင်ကနေ ကျောက်တုံးရေအိုင်ကြံ့ကလန်ကို သတ္တုရိုင်းတွေပို့ဆောင်နေတယ်။ ရှန့်လင်းရွှမ်းက တိုက်ခိုက်ဖို့ လမ်းတစ်ဝက်မှာ ရောက်နေပြီ”

ဟန်မူယဲ့က တည်ငြိမ်သောမျက်နှာထားဖြင့် အဝေးသို့ကြည့်သည်။

“ငါတို့ နောက်ကျသွားရင် ကျောက်တုံးရေအိုင်ကြံ့ကလန်ရဲ့ ကျွမ်းကျင်သူတွေက ရှန့်လင်းရွှမ်းကို သတ်ဖြတ်နိုင်လိမ့်မယ်”

ဟန်မူယဲ့သိထားသော အချက်အလက်များအရ ကျောက်တုံးရေအိုင်ကြံ့ကလန်သည် ကျွမ်းကျင်သူအများအပြား စေလွှတ်ခဲ့သည်။

ရှန့်လင်းရွှမ်းက သန်မာနေလျှင်ပင် ကြံ့ကလန်၏ကျွမ်းကျင်သူများကို တားဆီးနိုင်မည်မဟုတ်ပေ။

“ကောင်းပြီ”

ပိုင်ဝူဟန်က ခေါင်းညိတ်လိုက်ပြီး လက်ကိုဝှေ့ယမ်းသည်။

ကလန်ထဲတွင် ဓားအလင်းတစ်ရာကျော် ပေါ်ထွက်လာသည်။

အစိမ်းရောင်မြေခွေးများအားလုံးသည် ဓားကျင့်ကြံသူဖြစ်လာခဲ့သည်။

ဓားအလင်းများသည် မြန်ဆန်ပြီး သွက်လက်မှုရှိသည်။ သူတို့က အလွန်အားကောင်းပုံပေါ်သည်။

သူတို့အားလုံးသည် အနိမ့်ဆုံး ကမ္ဘာမြေအဆင့်တွင်ရှိသည်။

သူတို့ထဲမှနှစ်ယောက်သည် ကောင်းကင်ဘုံအဆင့်ဖြစ်သည်။

ဟန်မူယဲ့က ချိုတစ်ချောင်းကြံ့ကို တစ်ဖက်သို့လှည့်ခိုင်းပြီး ထွက်သွားသည်။

ပိုင်ဝူဟန်က ဟွမ်ကျစ်ဟူကိုချီထားပြီး ချိုတစ်ချောင်းကြံ့၏ကျောပေါ်သို့ တက်သည်။

သူမက သိပ်မဝေးသောနေရာတွင်ရှိသည့် ရှန်လင်းယွီကို လှည့်ကြည့်သည်။

အသက်ကိုးခိုကြောင်ကလန်သည် သူမစိတ်ကူးထားသည်ထက် သန်မာပုံပေါ်သည်။

ကံကောင်းစွာဖြင့် လျှို့ဝှက်နယ်မြေတွင်ရှိသောကျင့်ကြံသူများသည် ကောင်းကင်အံ့ဖွယ်ကမ္ဘာသို့ မဝင်ရောက်နိုင်ပေ။ ထိုသို့မဟုတ်လျှင် သူတို့က တောင်ပိုင်းကုန်းမြေကို လွယ်ကူစွာလွှမ်းမိုးနိုင်လိမ့်မည်။

အချိန်ကုန်ဆုံးမှု ကွာခြားသောကြောင့် လျှို့ဝှက်နယ်မြေတွင်ရှိသော ကျွမ်းကျင်သူများသည် တောင်ပိုင်းကုန်းမြေထက် ပိုမိုများပြားနေသည်။

ထို့အပြင် လျှို့ဝှက်နယ်မြေသည် ပျက်စီးခြင်းစကြဝဠာ၏ အစိတ်အပိုင်းတစ်ခုဖြစ်ပြီး ရင်းမြစ်စွမ်းအား ကြွယ်ဝသည်။ ထိုသို့မဟုတ်လျှင် ကျွမ်းကျင်သူအများအပြားကို ပျိုးထောင်ပေးရန် မဖြစ်နိုင်ပေ။

တောအုပ်နှစ်ခုနှင့် မိုင်တစ်သောင်းရှည်လျားသော တောင်တန်းတစ်ခုကို ဖြတ်ကျော်ပြီးသောအခါတွင် သုံးရက်အကြာ၌ သူတို့သည် တောင်ကုန်းများနှင့်ပြည့်နှက်နေသောနေရာသို့ ရောက်လာခဲ့သည်။

စွေ့ခယ်ကမ်းပါး ....

သူတို့က စွေ့ခယ်ကမ်းပါးသို့ ရောက်လာသောအခါတွင် ပေါက်ကွဲသံနှင့် ဒေါသတကြီးဟိန်းဟောက်သံများကို ကြားလိုက်ရသည်။

မိုင်တစ်ရာအကွာတွင် ကောင်းကင်သို့ထိုးတက်နေသော မိစ္ဆာစွမ်းအင်အလင်းရောင်ကို မြင်နိုင်သည်။

အစိမ်းရောင်မြေခွေးကလန်၏ ကျွမ်းကျင်သူများက ပေါက်ကွဲမှုဖြစ်နေသောနေရာသို့ တိတ်ဆိတ်စွာရွေ့လျားသွားသည်။

အစိမ်းရောင်မြေခွေးကလန်၏သွေးမျိုးဆက်သည် တိမ်တိုက်ကျားသစ်ကလန်၏ လေဓာတ်စွမ်းအားဖြင့် ပေါင်းစပ်သွားသည်။ သူတို့၏ ပုန်းကွယ်နိုင်စွမ်းသည် အသက်ကိုးခုကြောင်များကဲ့သို့ မကောင်းမွန်သော်လည်း ထိပ်တန်းအဆင့်တွင် ရှိနေဆဲဖြစ်သည်။

ယခုအချိန်တွင် အစိမ်းရောင်မြေခွေးကလန်၏ ကျွမ်းကျင်သူများက တိတ်ဆိတ်စွာလှုပ်ရှားနေသည်။ သာမန် ရွှေအမြုတေအဆင့်ကျွမ်းကျင်သူများက သူတို့ကို အာရုံခံနိုင်မည်မဟုတ်ပေ။

ဟန်မူယဲ့တို့က တောင်ကုန်းနှစ်ခုကို ဖြတ်ကျော်ပြီးသောအခါ နောက်ကျောတွင် ခြင်းတောင်းများသယ်ထားသည့် အရပ်ဆယ်ပေကျော်မြင့်သော ဆင်ကလန်သားများကို တောင်ကြားထဲတွင် တွေ့လိုက်ရသည်။

သူတို့ကို ဆယ်ပေအရပ်မြင့်ပြီး အလွန်သန်မာပုံပေါ်သော ကြံ့မိစ္ဆာများက ဝိုင်းရံထားသည်။

ကြံ့မိစ္ဆာများသည် သံချပ်ကာဝတ်ထားပြီး လက်ထဲတွင် အနက်ရောင်ဆေဘာဓားများကိုကိုင်၍ ဆက်တိုက်ရှေ့တိုးလာသည်။

ရှန့်လင်းရွှမ်းက ဆင်မိစ္ဆာများ၏ရှေ့တွင် လေးကိုင်ထားပြီး ရပ်နေသည်။ သူ့မျက်နှာက မည်းမှောင်နေပြီး လေးတင်၍ မြားပစ်သည်။

သူပစ်လွှတ်လိုက်သောမြားတိုင်းသည် ချိုတစ်ချောင်းကြံ့များ၏ခန္ဓာကိုယ်ကို ထိုးဖောက်နိုင်စွမ်းရှိသည်။

မြားများ ပေါက်ကွဲသွားသောအခါတွင် ကြံ့မိစ္ဆာများက မြားကို တားဆီးနိုင်လျှင်ပင် သွေးအန်ပြီး နောက်ဆုတ်ရလိမ့်မည်။

သူတို့က ရှန့်လင်းရွှမ်း၏မြားချက်ကို ကြောက်နေသောကြောင့် ဝိုင်းရံတိုက်ခိုက်မှု နှေးကွေးနေသည်။

ဟန်မူယဲ့တို့ ရောက်လာသောအချိန်တွင် ကြံ့မိစ္ဆာတစ်ယောက်က နောက်သို့ လှည့်ကြည့်သည်။

ကောင်းကင်နှင့်မြေကြီး၏စွမ်းအား တုန်ခါသွားပြီး ပြင်းထန်သောနတ်အာရုံတစ်ခု ကျဆင်းလာသည်။

ပိုင်ဝူဟန်က မျက်မှောင်ကြုတ်လိုက်ပြီး မျက်လုံးများတောက်ပလာသည်။ သူမက ကျဆင်းလာသောနတ်အာရုံကို ဖျက်ဆီးပစ်လိုက်သည်။

“ကျောက်တုံးရေအိုင်ကြံ့ကလန်ရဲ့ ကောင်းကင်ဘုံအဆင့်ကျွမ်းကျင်သူက ဒေါသထွက်လွယ်တာပဲ”

ပိုင်ဝူဟန်က ဂရုမစိုက်သောမျက်နှာထားဖြင့် အေးစက်စွာပြောသည်။

ချိုတစ်ချောင်းကြံ့မိစ္ဆာများကြားတွင်ရှိသော ကောင်းကင်ဘုံအဆင့်ကြံ့မိစ္ဆာသည် သတိပေးချက်အနေဖြင့် ဟိန်းဟောက်သည်။ သို့သော် ထပ်မံတိုက်ခိုက်ခြင်း မပြုခဲ့ပေ။

ဟန်မူယဲ့က ကြံ့မိစ္ဆာကျွမ်းကျင်သူများကို တစ်ချက်ကြည့်လိုက်ပြီး အဝေးတွင်ရှိသော တောင်စောင်းဆီသို့ အကြည့်ရောက်သွားသည်။

ထိုနေရာတွင် ဒါဇင်ချီသော အနက်ရောင်ဝတ်စုံနှင့်လူသားများ အေးစက်သောမျက်နှာထားဖြင့် ရှိနေသည်။

“ငါတို့နဲ့ အကြံတူနေတဲ့လူတွေ အများကြီးရှိနေတာပဲ”

ဟန်မူယဲ့က ခပ်ဟဟရယ်ပြီး ပြောသည်။

ချင်းရီမင်၏ တပ်သားများဖြစ်သည်။

သူတို့ကြားတွင် ကောင်းကင်ဘုံတစ်ဝက်အဆင့်ကျွမ်းကျင်သူများလည်း ရှိနေသည်။

အံ့ဖွယ်နေမင်းကိုယ်ရံတော်ခေါင်းဆောင် ချင်းရီမင်သည် ကောင်းကင်ဘုံတစ်ဝက်အဆင့်တွင် ရှိနေသော်လည်း တိုက်ခိုက်နိုင်စွမ်းသည် ကျင့်ကြံဆင့်ထက် ကျော်လွန်နေသည်။

သာမန်ကောင်းကင်ဘုံအဆင့်ကျွမ်းကျင်သူသည် သူ၏ပြိုင်ဘက် မဖြစ်နိုင်ပေ။

သူက လျှို့ဝှက်နယ်မြေတွင် ကောင်းကင်ဘုံတစ်ဝက်အဆင့်ကျွမ်းကျင်သူများကို ဖိနှိပ်နိုင်သည့်အတွက် အံ့အားသင့်ရန်မလိုပေ။

ကျောက်တုံးရေအိုင်ကြံ့ကလန်သည် လက်နက်များသန့်စင်ရာတွင် ကျွမ်းကျင်သည်။ လျင်မြန်စွာတိုးတက်လာချင်သော ချင်းရီမင်သည် သူတို့ကို သိမ်းပိုက်ချင်သည်။

“ဆင်ဖြူလေးက တောင့်ခံနိုင်မှာမဟုတ်ဘူး။ ကျွန်မတို့ တိုက်ခိုက်ရမလား”

ပိုင်ဝူဟန်က ငုံ့ကြည့်လိုက်ပြီး တီးတိုးမေးသည်။

ယခုအချိန်တွင် ကျောက်တုံးရေအိုင်ကြံ့ကလန်က ဆင်မိစ္ဆာများကိုဝိုင်းရံထားပြီး တချို့ကို သတ်ဖြတ်ခဲ့သည်။ သံချပ်ကာဝတ်ထားသော ကြံ့မိစ္ဆာကျွမ်းကျင်သူများက ဆေဘာဓားကိုမြောက်၍ ရှန့်လင်းရွှမ်းကို ခုတ်ချသည်။