အရှေ့ယူနီကွန်တိုက်ကြီးရဲ့ ပြောင်းလဲမှု

ဓားကွက်ထွက်ပေါ်လာတဲ့အချိန်မှာ လီဖူချန်းက နိုးထလာတယ်။

"ဒါက ထိပ်တန်းအဆင့်အထွတ်အထိပ်အခြေအနေလား"

စောစောတုန်းက သူက အချိန်နဲ့အာကာသရဲ့အကန့်အသတ်ကို ချိုးဖြတ်သွားသလို လီဖူချန်းက ခံစားရတယ်။ သူက ဓားကွက်ကို ထုတ်ဖော်တဲ့အချိန်မှာ အတားအဆီးတစ်ခုမှ မရှိတော့ပါဘူး။

အရင်ကဆိုရင် ကောင်းကင်ဆက်ဓားရဲ့အကူအညီနဲ့သာ လီဖူချန်းက သူ‌တော်စင်အရှင်တစ်ယောက်ရဲ့ခွန်အား ရှိလာတာ။ အခုဆိုရင် ကောင်းကင်ဆက်ဓားကို မသုံးရင်တောင် သူက သူ‌တော်စင်အရှင်တစ်ယောက်ရဲ့ခွန်အားရှိလာတယ်။

တကယ်တော့ လီဖူချန်းက ထိပ်တန်းအဆင့်အထွတ်အထိပ်သိုင်းပညာနဲ့ဒုတိယအဆင့်အထွတ်အထိပ်ကျင့်ကြံခြင်းနည်းလမ်းနှစ်ခုလုံး ရှိတယ်၊ သူက ကျင့်ကြံခြင်းသာ ကင်းမဲ့နေတာပဲ။

ဒါပေမယ့် လက်တွေ့မှာတော့ သူတော်စင်အရှင်ရဲ့အဆင့်ကို ရောက်ရှိတဲ့အခါ ကျင့်ကြံခြင်းက အရေးပါတဲ့အချက်အလက်မဟုတ်တော့ပါဘူး။ ခုခံမှု၊ တုံ့ပြန်ခြင်းအရှိန်၊ တိုက်ပွဲပါရမီအားလုံးက အစိတ်အပိုင်းတစ်ခုအနေနဲ့ ပါဝင်ပြီး ကျင့်ကြံခြင်းခြားနားချက်ကို ကျုံ့သွားစေတယ်။

"မဖြစ်နိုင်ဘူး......." ကောင်းကင်ဘုံမြွေသားရဲအာဏာရှင်က ဟိန်းဟောက်လိုက်တယ်။ သူ့ရဲ့ချီတည်ရှိမှုက ဧရာမအနက်ရောင်မြွေတစ်ကောင်အဖြစ်သို့ ပြောင်းသွားပြီး လီဖူချန်းထံ တစ်ဟုန်ထိုးပြေးဝင်လာတယ်။

"ချိုးဖြတ်စမ်း"

လီဖူချန်းက ကောင်းကင်ဆက်ဓားကို ကိုင်ဆွဲကာ ခုတ်ပိုင်းလိုက်တယ်။ ဓားအလင်းတစ်ခုက အချိန်နဲ့အာကာသကို ဖြတ်သွားကာ ဧရာမအနက်ရောင်မြွေကို ခုတ်ပိုင်းလိုက်တယ်။

အရင်ကတော့ လီဖူချန်းရဲ့ဓားတာအိုခွန်အားက အလယ်ဆင့်သူတော်စင်အဆင့်မှာသာ ရှိတယ်၊ ဒါပေမယ့် ထိပ်တန်းအဆင့်အထွတ်အထိပ်ဓားကွက်ကို နားလည်ပြီးနောက် သူ့ရဲ့တိုက်ခိုက်ရေးစွမ်းအားက သိသိသာသာတိုးလာတယ်။ အခု သူ့မှာ အထွတ်အထိပ်အဆင့်သူတော်စင်အရှင်တစ်ယောက်ရဲ့ခွန်အားရှိတယ်၊ ဒါ့အပြင် သူက သာမန်အထွတ်အထိပ်အဆင့်သူတော်စင်အရှင်တွေထက် ပိုသန်မာတယ်။

"မဖြစ်နိုင်ဘူး......" ကောင်းကင်ဘုံမြွေသားရဲအာဏာရှင်ရဲ့မျက်လုံးတွေက သွေးနီရောင်သန်းသွားတယ်။ ခန္ဓာကိုယ်ကို လှုပ်ခါလိုက်ရာ သူက ပိုကြီးမားတဲ့အနက်ရောင်မြွေတစ်ကောင်အဖြစ်သို့ ပြောင်းသွားပြီး သူက လီဖူချန်းထံ လှမ်းလာတယ်။

ဂလောင် ဒေါင် ဂျိုင်း........

မီးပွားတွေကြားမှာ သွေးအကြေးခွံတွေက လွင့်ထွက်သွားနေတယ်။

ဒါပေမယ့် ကောင်းကင်ဘုံမြွေသားရဲအာဏာရှင်က လုံလုံလောက်လောက်ကြီးတယ်၊ ဒီလိုဒဏ်ရာတွေက နာကျင်နိုင်ပေမယ့် သေစေလောက်တဲ့အထိတော့ မဟုတ်ပါဘူး။

"မင်းက ငါ့ကို ဒဏ်ရာရစေနိုင်မယ်လို့ တကယ် ထင်နေတာလား" ကောင်းကင်ဘုံမြွေသားရဲအာဏာရှင်က လီဖူချန်းကို ဖိနှိပ်နေတယ်။

"ဘာလို့မဖြစ်နိုင်ရမှာလဲ" လီဖူချန်းမှထုတ်လွှတ်နေတဲ့ဓားအလင်းက ပိုသန့်စင်လာတယ်၊ ပိုထက်ရှလာတယ်။

ဇွက်.......

ကြီးမားတဲ့ဒဏ်ရာတစ်ခုက ကောင်းကင်ဘုံမြွေသားရဲအာဏာရှင်ရဲ့ခန္ဓာကိုယ်ပေါ်မှာ လှီးဖြတ်သွားတယ်။ သွေးတွေက စမ်းချောင်းတစ်ခုအလား စီးကျလာတယ်။

သူက ကောင်းကင်ကမ္ဘာငါသာရှိအတ္တဓားကို နားလည်မျှသာ ဖြစ်ပြီး အခုထိမပြီးပြည့်စုံသေးပါဘူး။ ဒါပေမယ့် လီဖူချန်းရဲ့ထိုးထွင်းသိမြင်မှုအရ ဒီဓားကွက်ကို အပြည့်အဝကျွမ်းကျင်ဖို့က အချိန်အများကြီးမလိုအပ်ပါဘူး။

"ဓားကွက်ရဲ့စွမ်းအားက ပိုသန်မာလာနေတယ်" ကောင်းကင်ဘုံမြွေသားရဲအာဏာရှင်က သူ့ရဲ့အစွယ်ကို ထောင်ကာ လီဖူချန်းကို သတ်ဖြတ်ဖို့ အစွမ်းကုန်ကြိုးစားနေတယ်။

အခုဆိုရင် လီဖူချန်းက သူ့အသက်စွမ်းအားရဲ့၅ရာခိုင်နှုန်းသာ ကျန်တော့တယ်။ ကောင်းကင်ဘုံမြွေသားရဲအာဏာရှင်က သူ့ကို သတ်နိုင်ဖို့ ကြီးမားတဲ့အခွင့်အရေးတစ်ခုတော့ ကျန်ရှိပါသေးတယ်။

ဖတ်........

ဧရာမအမြီးအစိတ်အပိုင်းတစ်ခုက ဒဏ်ရာရသွားတော့တယ်၊ ကောင်းကင်ဘုံမြွေသားရဲအာဏာရှင်က ပင့်သက်ရှိုက်ကာ နာကျင်မှုကို အံတုနေရတယ်။

လီဖူချန်းက မိစ္ဆာဆန်လွန်းပါတယ်။ အချိန်တိုအတွင်း ဓားကွက်ရဲ့စွမ်းအားက ဆယ်ဆတိုးလာတယ်။ ခွန်အားဆယ်ဆတိုးလာမှုနဲ့အတူ လီဖူချန်းက ကောင်းကင်ဘုံမြွေသားရဲအာဏာရှင်ရဲ့အမြီးကို ဒဏ်ရာရစေခဲ့တယ်။

ဓားအရှင်ရဲ့ကောင်းကင်မျဉ်းဓားပညာက အလွန်ပြောင်မြောက်တဲ့ထိပ်တန်းအဆင့်အထွတ်အထိပ်ဓားပညာတစ်ခုဆိုတာကို ကောင်းကင်ဘုံမြွေသားရဲအာဏာရှင်က မသိနိုင်ခဲ့ပါဘူး။

သာမန်သူတော်စင်အရှင်က အဲဒါကို ကျွမ်းကျင်ခဲ့ရင် သာမန်ထိပ်တန်းအဆင့်အထွတ်အထိပ်ဓားပညာပဲ ဖြစ်လိမ့်မယ်။

အခြားစကားဖြင့်ပြောရရင် ကောင်းကင်ဆက်ဓားကို မမှီခိုဘဲနဲ့ ‌လီဖူချန်းက သူတော်စင်အရှင်တစ်ယောက်ရဲ့ခွန်အားကို ရောက်ရှိရုံမျှသာပဲ။ အခုဆိုရင် လီဖူချန်းက သူတော်စင်အရှင်တစ်ယောက်ရဲ့ခွန်အားကို တရားဝင်ရောက်ရှိလာတယ်။

"ပြေး‌တော့........"

လီဖူချန်းရဲ့ဓားကွက်ကို ရင်ဆိုင်ပြီးနောက် ယုံကြည်ချက်အားလုံးက ပျောက်ကွယ်သွားတော့တယ်။ သူက အခု မလွတ်မြောက်နိုင်ရင် သူက သေချာပေါက်အသတ်ခံရမယ်ဆိုတာကို ကောင်းကင်ဘုံမြွေသားရဲအာဏာရှင်က သိခဲ့တယ်။ တကယ်တော့ ခုတ်ချက်တစ်ခုက သူ့ရဲ့အမြီးကို အပြင်းအထန်ဒဏ်ရာရစေနိုင်တယ်။ သူက ထပ်လက်ခံမိရင် သူက ကြာရှည်စွာတောင့်ခံနိုင်မှာ မဟုတ်တော့ဘူး။

ကောင်းကင်ဘုံမြွေသားရဲအာဏာရှင်က ထွက်ပြေးသွားသလို ‌ကျောက်တုံးနက်သားရဲအာဏာရှင်ကလည်း တူညီတဲ့အရာကိုပဲ ပြုလုပ်ခဲ့တယ်။

ထွက်ပြေးနေရင်း သူတို့က လီဖူချန်းကို ပြဿနာရှာဖို့ ဘာကြောင့်ဒီလောက်အလျင်စလိုဖြစ်ခဲ့တာကို ကျောက်တုံးနက်သားရဲအာဏာရှင်က မစဉ်းစားဘဲမနေနိုင်ခဲ့ပါဘူး။

သူတို့က မလာခဲ့ရင် လီဖူချန်းက ချိုးဖြတ်ဖို့အချိန်အကြာကြီးလိုအပ်လိမ့်မယ်။ ‌ကျောက်တုံးနက်သားရဲအာဏာရှင်က ပိုတွေးလေလေ သူ့ခံစားချက်က ပိုဆိုးဝါးလာလေလေပါပဲ။

လီဖူချန်းက မလိုက်သွားဘူး၊ သူ့မှာ အသက်စွမ်းအားက လုံလောက်စွာ ရှိမနေဘူးလေ။

"ဂုဏ်ပြုပါတယ် ဓားသူတော်စင်အရှင်လီ......." သံတိမ်သူတော်စင်အရှင်ရဲ့လေသံက အနည်းငယ်ပြောင်းလဲသွားတော့တယ်။

အရင်ကတော့ သံတိမ်သူတော်စင်က လီဖူချန်းကို ဂျူနီယာတစ်ယောက်အနေနဲ့ ရှုမြင်ခဲ့တယ်။ ဒါပေမယ့် အခု သူက လီဖူချန်းကို အဆင့်တူအနေနဲ့ သတ်မှတ်ခဲ့ပါပြီ။

သံတိမ်သူတော်စင်အရှင်က စကြာဝဠာကို နှစ်ပေါင်းမရေမတွက်များစွာ လှည့်လည်ခဲ့တယ်၊ ပါရမီရှင်များစွာကို မြင်ခဲ့ဖူးတယ်၊ ဒါပေမယ့် လီဖူချန်းရဲ့တိုးတက်မှုမြန်နှုန်းမျိုးရှိတဲ့တစ်စုံတစ်ယောက်ကို ဘယ်‌တော့မှ မမြင်ခဲ့ဖူးပါဘူး။

လီဖူချန်းရဲ့တိုးတက်မှုနှုန်းအရ အချိန်တိုအတွင်းမှာ သူက ကောင်းကင်အရှင်တစ်ယောက်ဖြစ်လာနိုင်ပါတယ်။

အားအနည်းဆုံးကောင်းကင်အရှင်ကတောင် ကြယ်ပိုင်နက်ထဲမှာ အုပ်စိုးသူအာဏာရှင်တစ်ယောက် ဖြစ်လာပါလိမ့်မယ်။  အခြားကောင်းကင်အရှင်တွေက သူ့ကို သတ်ဖြတ်ဖို့ယုံကြည်ချက်မရှိရင် သူတို့က သူ့ကို ရန်စလိမ့်မှာမဟုတ်ပါဘူး။

"ဒါက မတော်တဆချိုးဖြတ်နိုင်ခဲ့တာပဲ။ ငါ ကံကောင်းသွားတာပါ။ စီနီယာရဲ့ဒဏ်ရာရော အဆင်ပြေရဲ့လား"

သံတိမ်သူတော်စင်အရှင်ရဲ့ဒဏ်ရာတွေက လီဖူချန်းနဲ့ မတူပါဘူး။ သူက ဒဏ်ရာပြင်းပြင်းထန်ထန်ရခဲ့ပြီး သူ့အရင်းအမြစ်မှာ ထိခိုက်ခဲ့တယ်။ လီဖူချန်းက အသက်စွမ်းအားကြီးမားတဲ့ပမာဏကိုသာ ဆုံးရှုံးခဲ့ရပြီး အလွယ်တကူ ပြန်ပြည့်လာနိုင်တယ်။

"ငါက သုံးနှစ်မှငါးနှစ်အတွင်း ပြန်သက်သာလာမှာပါ။ ဒီအချိန်အတောအတွင်း ငါက ဓားသူတော်စင်အရှင်လီကိုပဲ ဒုက္ခပေးရတော့မယ်"

"ပြဿနာမရှိပါဘူး" လီဖူချန်းက ခေါင်းညိတ်လိုက်တယ်။

***

ကောင်းကင်ဘုံမြွေသားရဲအာဏာရှင်နဲ့ကျောက်တုံးနက်သားရဲအာဏာရှင်တို့ကို အနိုင်ယူပြီးနောက် လီဖူချန်းက ရိုးရိုးရှင်းရှင်းငြိမ်းချမ်းစွာ နေထိုင်‌‌နေခဲ့တယ်။

အခုဆိုရင် အခြားသူတွေက သူ့ကို ပြဿနာရှာမှာနဲ့ပတ်သက်ပြီး သူက စိုးရိမ်စရာမလိုတော့ပါဘူး၊ သူက သူတို့ကို ပြဿနာရှာမှာကိုသာ အခြားသူတွေက စိုးရိမ်ရမှာပါ။

ကြမ်းတမ်းတဲ့ခံစစ်ရှိနေတာနဲ့တင် အဆင်ပြေတယ်၊ ဒါပေမယ့် သူ့ရဲ့ခံစစ်ကလည်း အားကောင်းလွန်းတယ်။ ကောင်းကင်အရှင်တွေကလွဲပြီး တစ်ယောက်မှ လီဖူချန်းအတွက် ပြိုင်ဘက်မဖြစ်နိုင်တော့ပါဘူး။

…

နှစ်တွေက ကုန်ဆုံးနေတယ်........

အဌမကွက်ကလွဲပြီး လီဖူချန်းက ကောင်းကင်မျဉ်းဓားပညာရဲ့ကျန်ရှိနေတဲ့ခုနှစ်ကွက်ကို ထိပ်တန်းအဆင့်အထွတ်အထိပ်အခြေအနေအထိ တွန်းပို့နိုင်ခဲ့တယ်။

သူက ကောင်းကင်ဘုံမြွေသားရဲအာဏာရှင်နဲ့ နောက်တစ်ကြိမ်တွေရင် သူ့အနေနဲ့ ကောင်းကင်ဘုံမြွေသားရဲအာဏာရှင်ကို သတ်ဖို့ နည်းလမ်း၁၀၀လောက် ရှိနေပါပြီ။

…

ဝုန်း ဒုန်း.......

အရှေ့ယူနီကွန်တိုက်ကြီးရဲ့နယ်နိမိတ်ကို ဖျက်ဆီးနေတဲ့ မိုးကြိုးတွေ ရှိတယ်၊ မုန်တိုင်းတစ်ခုက စုစည်းနေတယ်။

သိပ်သည်းတဲ့ကောင်းကင်မြေကြီးစွမ်းအင်က အရှေ့ယူနီကွန်တိုက်ကြီးအတွင်းမှ ရှင်သန်ထကြွလာနေတယ်။

"နောက်ဆုံးတော့ အဆင့်မြင့်တိုက်ကြီးတစ်ခုအဖြစ်သို့ မြှင့်တင်တော့မှာလား" လီဖူချန်းက ဟင်းလင်းပြင်အတွန့်အလိမ်မှ ထွက်လာတယ်။

အချိန်တိုင်းမှာ သူ့ရဲ့လိပ်ပြာအသိစိတ်အာရုံကိုယ်ပွားကို သုံးပြီး လီဖူချန်းက အရှေ့ယူနီကွန်တိုက်ကြီးရဲ့ပြောင်းလဲမှုတွေကို စောင့်ကြည့်နေခဲ့တယ်။ ဒါကြောင့် ဒီနေရာကို ချက်ချင်း အပြေးလာနိုင်ခဲ့တယ်။

အရှေ့ယူနီကွန်တိုက်ကြီးရဲ့နယ်နိမိတ်တွေရှိဟင်းလင်းပြင်ရဲ့အနက်ပိုင်းမှာရှိတဲ့လိပ်ပြာအသိစိတ်အာရုံအကန့်အသတ်အချို့ကိုလည်း သတိပေးခဲ့တာကို လီဖူချန်းက မသိခဲ့ပါဘူး။ အဲဒါက ဟိုးအဝေးမှလူတစ်စုရဲ့အာရုံကို ဆွဲဆောင်ခဲ့တယ်။

…

စိတ်ဝိညာဉ်တစ်သောင်းမြို့.....

အဆင့်မြင့်စားသောက်ဆိုင်တစ်ခုအထဲမှာ.....

"ကျောက်စိမ်းကြယ်သူတော်စင်အရှင်၊ ဘာဖြစ်တာလဲ"

ထိပ်ဆုံးအထပ်ရဲ့ပြတင်းပေါက်အနားရှိထိုင်ခုံတွေပေါ်မှာ သူတော်စင်အရှင်နှစ်ယောက် ရှိတယ်။ သူတို့ထဲကတစ်ယောက်က မေးငေါ့ကာ အာမေဍိတ်သံပြုမိသွားတယ်။ အခြားတစ်ယောက်က အလိုအလျောက်မေးလိုက်တယ်။

ကျောက်စိမ်းကြယ်သူတော်စင်အရှင်က ခန့်ညားတဲ့လူလတ်ပိုင်းတစ်ယောက်ပါပဲ။ သူက ထရပ်ကာ ပြောလိုက်တယ်"ငါ အရေးတကြီးလုပ်ရမယ့်ကိစ္စတွေ ရှိတယ်။ ငါ အရင်ထွက်သွားမယ်"

ပြောနေရင်း ကျောက်စိမ်းကြယ်သူတော်စင်အရှင်က စားသောက်ဆိုင်မှ ချက်ချင်း ထွက်ခွာသွား‌တယ်။

အလားတူစွာပင် စိတ်ဝိညာဉ်တစ်သောင်းမြို့ထဲမှာ နတ်ဆိုးသားရဲဂိုဏ်းကြီးတစ်ခုမှ သားရဲအာဏာရှင်နှစ်ယောက်က ကြိုတင်သတိမပေးဘဲ ရုတ်တရက် ထွက်သွားတယ်။

စိတ်ဝိညာဉ်တစ်သောင်းမြို့ရဲ့အနီးကပ်ဆုံးမှာရှိတဲ့အံ့ဖွယ်သစ်ရွက်မြို့.........

ဒီနေရာမှာလည်း နက်ပြာပလိန်းမှာလိုမျိုး ဓားသမားအစည်းအရုံးအဖွဲ့တစ်ခု ရှိတယ်။

"ငါ နက်ပြာပလိန်းကို မပြန်တာ အတော်ကြာပြီးပဲ။ ဓားသမားအစည်းအရုံးရဲ့အခြေအနေကို ငါ သိချင်တယ် "

မုတ်ဆိတ်မွှေးသုံးလက်မနဲ့နက်ပြာဓားသူတော်စင်အရှင်က မေးငေါ့လိုက်လေတယ်၊ သူ့မျက်လုံးတွေက အိမ်လွမ်းဝေဒနာတွေ ဖြစ်တည်နေတယ်။

အနက်ရောင်စကြာဝဠာရဲ့အနက်ပိုင်းမှာ အနီရောင်သားရဲဦးခေါင်းနဲ့အတူသင်္ဘောတစ်စင်းက အရှိန်တစ်ဟုန်ထိုးတင်ကာ ခရီးနှင်လာနေတယ်။ သင်္ဘောဦးပိုင်းမှာ ကြွက်သားအပြည့်နဲ့လူတစ်ယောက်က ရပ်နေတယ်၊ သူက ကျူးနန်ရှန်နဲ့ အနည်းငယ်ဆင်တူတယ်။ ဒါပေမယ့် သူ့ရဲ့ချီတည်ရှိမှုက အဆတစ်ထောင်ပိုသန်မာတယ်။

တစ်ချိန်တည်းမှာပဲ သူတော်စင်အရှင်နဲ့သားရဲအာဏာရှင်တစ်ဒါဇင်ကျော်က နက်ပြာပလိန်းဆီ အပြေးလာနေကြတော့တယ်။

***