အရင်းအမြစ်ချီနေရာလွတ်
Vol. 66 Ch. 914
“ငါ့ကို ဘာလုပ်မှာလဲ” လူအိုကြီးထျန်းကျိက မေးလိုက်သည်။
“ဘာကိုပြောချင်တာလဲ”
“ငါက ကောင်းကင်တာအိုထာဝရ မဖြစ်နိုင်သလို ဖြစ်လည်းမဖြစ်ချင်ဘူး။ ငါ့အတွက် ဘယ်လိုကံကြမ္မာက စောင့်မျှော်နေမှာလဲ”
“ခင်ဗျားက ဘာလို့ အလျင်လိုနေတယ်လို့ ခံစားမိနေပါလိမ့်။ ခင်ဗျားက နှုတ်ထွက်ချင်တယ်ဆိုရင်တောင် နောက်မျိုးဆက် အနည်းငယ်ထိတော့ မလုပ်နိုင်သေးဘူး”
“မင်းက ပထမဦးဆုံး ကောင်းကင်ဧကရာဇ်ဆိုတော့ အရာအားလုံးကို ကြိုတင်စီစဉ်ထားမှာပဲ။ မင်းရဲ့ ဆက်ခံသူတွေကို အမွေအနှစ် ဖျက်ဆီးတာ မဖြစ်စေချင်ဘူးမလား” လူအိုကြီးထျန်းကျိက ပြန်ဖြေလိုက်၏။
ဝမ်ဝေ့က လူအိုကြီးကို ခြုံငုံကြည့်ကာ “လူတော်တော်များများက ခင်ဗျားရာထူးကို ရဖို့အတွက် အသေအကြေဖြစ်နေကြတာကို ခင်ဗျားက ဘာလို့ အလျင်လိုနေရတာလဲ”
ကောင်းကင်တာအို၏ ထည့်စရာတစ်ခုဖြစ်ခြင်းက မသေမျိုးပုံစံတစ်မျိုးသာ ဖြစ်သည့်အတွက် ဝမ်ဝေ့က လူများစွာသည် လူအိုကြီးထျန်းကျိ၏ နေရာကို ရရှိဖို့ သူတို့၏ စိတ်ခံစားချက်များကို ပျောက်ဆုံးပြီး ထိန်းချုပ်ခံထားရလျှင်ပင် မည်မျှ လိုချင်နေကြောင်း သိထားသည်။
“မင်းရဲ့ တောင်းဆိုချက်ကို သဘောတူလိုက်တာက ငါ့ရဲ့ ကောင်းကင်တာအိုကို ရှေ့ဆက်ရမဲ့ တစ်ခုတည်းသော နည်းလမ်းဖြစ်နေလို့ပဲ။ ဒါပေမဲ့ ငါက ဒီနေရာမှာ ထာဝရနေဖို့ ဆန္ဒမရှိဘူး” ထိုလူအိုကြီးက အမှန်တရားကို ဖုံးကွယ်ထားခြင်း မရှိဘဲ ပြန်ဖြေလိုက်သည်။
“အဲဒါဆိုတော့ မသေမျိုး နောက်ထပ် နည်းလမ်းတစ်ခုကို ဖန်တီးချင်တာလား” ဝမ်ဝေ့က မေးလိုက်သည်။
“ဟုတ်တယ်။ ငါ့အစီအစဉ်အရတော့ လူတွေက ငါ့ရဲ့ရာထူးကို အမွေဆက်ခံပြီး ခုံရုံးကို ခစားလိမ့်မယ်။ အပြန်အလှန်အနေနဲ့ဆိုရင် ဆုလာဘ်အနေနဲ့ သူတို့ရဲ့ တာဝန်ပြီးဆုံးသွားတဲ့အခါမှာ မသေမျိုး ပုံစံတစ်ခုကို ရရှိလိမ့်မယ်”
ဝမ်ဝေ့က ခေါင်းညိတ်ပြီးသည့်နောက်တွင် မိစ္ဆာနတ်ဘုရားကိုးပါးကမ္ဘာအကြောင်းကို အမှတ်ရသွားလေ၏။ သူ့အနေနှင့် လူအိုကြီးထျန်းကျိက သူ့ရာထူးတွင် ထာဝရ ကျန်ရှိနေလိမ့်မည်ဟု ထင်မှတ်မထားပေ။ သို့သော်လည်း သူ့အလုပ်က နတ်ဘုရားရာထူးများနှင့် တူညီနေမည့်အချက်ကို လျစ်လျူရှုခဲ့မိသည်။
“အဲဒါက အစီအစဉ်က မဆိုးဘူးပဲ။” သူက တုံ့ပြန်လိုက်သည်။
“ကောင်းကင်ဧကရာဇ်က ခင်ဗျားနှုတ်ထွက်ချင်တဲ့အခါ ခင်ဗျားရဲ့ ရာထူးကို အမွေဆက်ခံမဲ့သူတစ်ယောက်ကို ရွေးချယ်ပေးလိမ့်မယ်”
လူအိုကြီး ထွက်မသွားခင် ဝမ်ဝေ့က ဘယ်မျိုးဆက်ဖြစ်မည်မှန်း မသိသေးပေ။ ထို့ကြောင့် ထိုအလုပ်ကို အနာဂတ်မျိုးဆက်ဆီသာ ချန်ထားခဲ့လိုက်မည်။
“ကောင်းပြီလေ။ ဒါပေမဲ့ ငါ့ရဲ့ အမွေဆက်ခံသူကို ရွေးချယ်တဲ့အခါမှာ ဂရုစိုက်ဖို့ လိုတယ်”
“ဒါပေါ့။ ပြဿနာ မရှိရအောင်တော့ လိုလားချက်တချို့တော့ ပြောပြပေါ့”
လူတချို့ကသာ ကောင်းကင်တာအို၏ စွမ်းအားကို ပြဿနာမရှိဘဲ တောင့်ခံနိုင်လိမ့်မည်။ လူအများက စွမ်းအား၊ ခိုင်မာသည့် တာအိုနှလုံးသားနှင့် နက်နဲသည့် စိတ်အခြေအနေတို့ကို လိုအပ်လေသည်။ ထိုရာထူးက အကြံဆိုး ရှိသည့်သူများအတွက်မသင့်တော်ပေ။
ကောင်းကင်တာအိုက ဓားဧကရီကြောင့် အသိစိတ်မဝင်နိုင်ပေ။
ထို့ကြောင့် သူတို့၏ စွမ်းအားကို တစ်ကိုယ်ကောင်းဆန်သည့် အကြောင်းအရင်းများအတွက် အသုံးပြုမည့်သူများက ကောင်းကင်တာအိုနှင့် ပေါင်းစည်းပြီးသည့်နောက်မှ သူတို့၏ စိတ်နှင့် ဝိညာဉ်က ပျက်သုဉ်းသွားလိမ့်မည်။
နှစ်ဦးသားက မိနစ်ပိုင်းကြာ စကားပြောပြီးသည့်နောက်တွင် နောက်ထပ် ကောင်းကင်တာအိုထမ်းဆောင်သူကို ရွေးချယ်ဖို့ ထူးကဲသည့် စစ်ဆေးမှုတချို့ကို ထပ်ချထားခဲ့သည်။
“ငါ့ရဲ့ အမွေဆက်ခံသူကို ထျန်းကျိဆိုတဲ့ အမည်ကို အမွေဆက်ခံခိုင်းရင် ဘယ်လိုလဲ”
ဝမ်ဝေ့က ထိုစကားကိုကြားကာ မျက်မှောင်ကြုတ်ပြီး “အဲဒီနာမည်နောက်ကွယ်မှာ တခြားအဓိပ္ပါယ်များ ရှိလို့လား”
“ရှိနိုင်လောက်ပါတယ်”
“ဘာလို့ မသေချာရတာလဲ”
“ငါ့ရဲ့ အမွေအနှစ်က ထူးကဲတယ်။ မျိုးဆက်တစ်ခုချင်းစီမှာ မျိုးဆက်တိုင်းရဲ့ အမွေဆက်ခံသူက ထျန်းကျိဆိုတဲ့နာမည်ကိုပဲ အမွေဆက်ခံရလိမ့်မယ်။ အတိတ်တုန်းက ငါတို့ရဲ့ ဆက်ခံသူအများစုက လျှို့ဝှက်ကောင်းကင်မျှော်နန်းက ဆင်းသက်လာကြတာ”
“သူတို့က ဂမ္ဘီရကဏ္ဍကို ဘာလို့အဲ့လောက်စိတ်ဝင်စားနေတယ်ဆိုတာ ရှင်းပြပြီးသားဖြစ်သွားပြီ”
ဝမ်ဝေ့က လျှို့ဝှက်ကောင်းကင်မျှော်နန်းနှင့် ဆက်ဆံရေးတစ်ခုရှိကာ သူတို့၏ ပါကွားလိပ်ခွံကို ငှားယူပြီး သူ့ဂမ္ဘီရကို မြှင့်တင်ကာ ကောင်းကင်ရုပ်ခန္ဓာကို ဖန်တီးခဲ့သည်။ သို့သော်လည်း သူတို့က သူ့အချက်အလက်များကို တိထျန်းဆီ ပေးပြီး သူ့ကို သေလုနီးပါးဖြစ်စေသွားပြီးသည့်နောက်တွင် သူက သူတို့နှင့် ဆက်ဆံရေး မရှိတော့ပေ။
ဝမ်ဝေ့က သူတို့တွင် ရွေးချယ်စရာ မရှိကြောင်း သိထား၏။ တိထျန်းက တောင်းဆိုသူ ဖြစ်နေလေရာ သူတို့၏ နိမ့်ကျသည့် အင်အားဖြင့် တိမျိုးနွယ်၏ အနာဂတ်ခေါင်းဆောင်ဆီမှ တောင်းဆိုချက်ကို မည်သို့ ငြင်းဆန်နိုင်မည်နည်း။
သို့သော်လည်း ဝမ်ဝေ့က သူတို့သည် သူ့ကို ကြိုတင်ဆက်သွယ်ကာ ပြဿနာကို ဖြေရှင်းနိုင်ခဲ့ကြောင်း သိထား၏။ တာအိုအခွင့်အလမ်းဂိုဏ်းဖြင့် တိမျိုးနွယ်က သူတို့ကို ဘာများလုပ်ရဲမည်နည်း။
သို့သော် လျှို့ဝှက်ကောင်းကင်မျှော်နန်းက ကြားနေဖို့သာ ရွေးချယ်ခဲ့ပြီး အာဏာများကြား အက်ကြောင်းတွင် ရှင်သန်ခဲ့သည်။ ထို့ကြောင့် သူတို့က သတင်းအချက်အလက်ကို ပေးခဲ့၏။
ဝမ်ဝေ့က ပါကွားလိပ်ခွံကို ငှားယူထား၍ ကျန်ရှိနေသော ကံကြမ္မာကြွေးကို ပြန်ပေးဖို့ မစဉ်းစားပေ။ ထိုပစ္စည်းက သူ့အတွက် အသုံးမဝင်တော့သည့်နောက် သူတို့ဆီ ပြန်ပေးလိုက်ပြီးသည့်နောက်တွင် မျှော်နန်းနှင့် အဆက်အသွယ် မရှိတော့ပေ။
“ထျန်းကျိ နာမည်အကြောင်းကိုများ သိထားသေးလား”
“မိုးမြေရဲ့ လျှို့ဝှက်ချက်နဲ့ ဂမ္ဘီရတွေ ပါဝင်နေတဲ့ အမွေအနှစ်ဆိုတာပဲ သိတယ်။ တခြားအတွက်တော့ ဘာမှများများစားစား မသိဘူး”
“သူတို့တည်ရှိနေတာ ဘယ်လောက်ကြာပြီလဲ။ မဟာဧကရာဇ်ရော ရှိထားလား”
လူအိုကြီးထျန်းကျိက ထိုမေးခွန်းကို ကြားကာ မျက်မှောင်ကြုတ်လိုက်၏။ သူက ထိုမေးခွန်းများကို မည်သို့ပြန်လည်ဖြေကြားရမည်ကို အခက်တွေ့နေဟန်ပေါ်သည်။
“ဧကရာဇ်တော့ မရှိဘူး။ ငါတို့ရဲ့ အမွေအနှစ်က အလယ်ပိုင်းဧကရာဇ်ခေတ်ကာလလောက်မှာ ပေါ်ထွက်လာခဲ့တာ”
ဝမ်ဝေ့က သူသည် အမှန်အတိုင်းပြောနေကြောင်း သိထားလေသည်။ ထိုစကားဝိုင်းအကြောင်း စိတ်ဝင်စားစရာ အကောင်းဆုံးအချက်က သူသည် ထျန်းကျိ ဟူသောနာမည်နှင့် ပတ်သက်ပြီး သတင်းအချက်အလက်ကို မတွက်ချက်နိုင်ပေ။ ထိုနာမည်နှင့် ပတ်သက်ပြီး အတားအဆီးကို ခံစားမိသည့်အတွက် ဂိုဏ်းအဖွဲ့သားများပင် သူတို့မျိုးနွယ်အကြောင်း မသိထားသလို ထုတ်ဖော်ဖို့ရာလည်း မလွယ်ကူကြောင်း ညွှန်ပြနေ၏။
ငါ ထျန်းကျိဆိုတဲ့ နာမည်ကို ကြားလည်းမကြားဖူးသလို ဂိုဏ်းလည်း မရှိဖူးဘူး…
ထို့အပြင် အိပ်စက်သူများတွင်လည်း ထိုသတင်းအချက်အလက် မရှိခဲ့ပေ။
ဝမ်ဝေ့က စိတ်ထဲမှ တွေးတောလိုက်သည်။ ဤကမ္ဘာက ရေခဲတောင် ထိပ်ဖျားလောက်မျှသာ ထုတ်ပြထားသည့် လျှို့ဝှက်ဆန်းကြယ်မှုများစွာ ရှိနေသည်။
ပထမဦးဆုံး စောင့်ကြည့်သူဂိုဏ်း … အခု ထျန်းကျိနာမည်နဲ့ လျှို့ဝှက်ဂမ္ဘီရ မျိုးဆက်တစ်ခု…
“ကောင်းပြီ” သူက ထိုလျှို့ဝှက်ချက်များကို ထုတ်ဖော်ဖို့ရာအတွက် အချိန်ယူရမည်ဖြစ်ကြောင်း သိလိုက်၏။ ထို့ကြောင့် သူက အလျင်လိုနေခြင်း မရှိပေ။ သိပ်မကြာခင် သူက လူအိုကြီးထျန်းကျိနှင့် စကားဝိုင်းကို အဆုံးသတ်လိုက်၏။ ထိုသူက သူ့အသိစိတ်ကို ကြာကြာထိန်းမထားနိုင်ပေ။
ကောင်းကင်တာအိုက အချိန်အများစုတွင် ထိန်းသိမ်းထားလေသည်။
သို့သော်လည်း ဤစကားဝိုင်းအတွင်း ဝမ်ဝေ့က အကျိုးအမြတ် အမြောက်အများ ရရှိလိုက်၏။ သူက အစွမ်းထိန်းချုပ်ရေးပညာရပ်တွင် ကောင်းကင်တာအိုအဆင့် ထိန်းချုပ်ရေးကို ဖန်တီးဖို့ နည်းလမ်းတစ်ခု မြင်ခဲ့သည်။
ယခု သူက အရင်းအမြစ်နည်းစနစ်၏ တည်ရှိမှုနှင့် အရေးပါမှုကို သိထားပြီး ကောင်းကင်ဘုံအဆင့်သို့ ဝင်ရောက်ပြီးသည့်နောက်တွင်ပင် ထိုအရာ၏ အလားအလာက အဆုံးသတ်သွားမည် မဟုတ်သည့်အတွက် သူက ထိုကျင့်စဉ်ကို အလေးထားသည်။ အကယ်၍ အောင်အောင်မြင်မြင် ဖန်တီးနိုင်ပါက စံပြအဆင့်တွင်ပင် အသုံးဝင်လာလိမ့်မည်။
အခန်းမှ ထွက်လာပြီးသည့်နောက်တွင် ဝမ်ဝေ့က အရင်းအမြစ်ချီနေရာလွတ်ဆီ တိုက်ရိုက် ဝင်ရောက်လိုက်သည်။ ထိုနေရာက အပြာရောင်ကမ္ဘာတစ်ခု ဖြစ်နေသော်လည်း တောင်များစွာ မမြင်ရတော့ပေ။
ထိုအစား သူက ပင်လယ် သို့မဟုတ် ရေကန်တစ်ခုအထက် မြောလွင့်နေသည်ကို မြင်လိုက်ရ၏။
ငါ့သက်တမ်းက အမြန်အဆန် မကုန်ဆုံးနေဘူးပဲ…
ဝမ်ဝေ့က မှတ်ချက်ပေးလိုက်ပြီး ယခင်တစ်ခေါက် လာခဲ့သည်နှင့် သိသာလှသော ကွာဟချက်ကို သတိထားမိလိုက်သည်။ ယခုသူက မသေမျိုးအဆီအနှစ် ရှိနေပြီဖြစ်သည့်အတွက် ပတ်ဝန်းကျင်က သူ့ကို ချက်ချင်း မသတ်နိုင်တော့သလို သူ့သက်တမ်းကိုလည်း အလျင်အမြန် စားသုံးခြင်း မရှိပေ။
ဝမ်ဝေ့က ရေကန်ကို လေ့လာကြည့်ပြီး ထိုအရာက စွမ်းအားအမြောက်အများ ပါဝင်နေသည်ကို ချက်ချင်း သတိထားမိလိုက်သည်။ သူက လက်ဝှေ့ကာ ရေတစ်စက်ကို ထိန်းချုပ်လိုက်၏။ သူက တုံ့ဆိုင်းခြင်းမရှိဘဲ ဝါးမျိုလိုက်သည်။
“ဒါက ရေ မဟုတ်ပဲနဲ့ စွမ်းအားတွေ စုစည်းလွန်းလို့ အရည်အဖြစ် ပြောင်းလဲသွားတာပဲ”
သို့သော်လည်း ဝမ်ဝေ့၏ စကားမဆုံးခင် ရေကန်က အပြင်းအထန် တုံ့ပြန်လာခဲ့သည်။
ဝုန်း
ကြောက်မက်ဖွယ် စွမ်းအားပေါက်ကွဲမှုက ဝမ်ဝေ့နှင့် ပတ်ဝန်းကျင်တစ်ခုလုံးကို လွှမ်းခြုံသွားလေ၏။ ဝမ်ဝေ့က အရာအားလုံး၏ ဗဟိုတွင် တည်တည်ငြိမ်ငြိမ် အမူအရာဖြင့် အကောင်းအတိုင်း ရှိနေလေ၏။
“ပြင်းထန်လိုက်တာ” သူက မှတ်ချက်ပေးလိုက်သည်။
သူက ရေတစ်စက်မျှကိုသာ ယူရသေးပြီး ရေကန်က ကြမ်းတမ်းစွာ တုံ့ပြန်လာခဲ့သည်။ ထို့အပြင် ထိုပေါက်ကွဲမှုက ဒုတိယတန်းစား ဧကရာဇ်နှင့်ပင် ယှဉ်နိုင်လေ၏။
“နေရာတိုင်းကသာ ဒီလိုကြမ်းတမ်းနေရင် လူတော်တော်များများက အရင်းအမြစ်ချီကို သူတို့နေထိုင်ရာအဖြစ် မလုပ်နိုင်ဘူးဆိုတာ ရှင်းပြပြီးသားဖြစ်သွားပြီ”
ဤသို့သော ချီပမာဏအမြောက်အများက ဧကရာဇ်များအတွက်ပင် အသုံးဝင်လှသည်။ ဝမ်ဝေ့က ဤသို့သော နေရာမျိုးသည် စံပြများအတွက်ပင် အသုံးဝင်လိမ့်မည်ဟု ယုံကြည်ထား၏။ ကံဆိုးစွာဖြင့် ဤနေရာ၏ ဖွဲ့စည်းပုံက သက်ရှိများနေထိုင်ဖို့ရာအတွက် အင်မတန်ခက်ခဲလှသည်။
လူတွေက သဘာဝကို အုပ်စိုးမှာပဲ။ အဲဒါဆိုတော့ ဒိုင်မေးရှင်းအမြင့်က ကျင့်ကြံသူတွေအတွက် ပတ်ဝန်းကျင်ကို ပြောင်းလဲပစ်မဲ့ နည်းစနစ်တစ်ခုကို ဖန်တီးခဲ့လောက်မယ်လို့ထင်တယ်…
ဝမ်ဝေ့က အဝေးတစ်နေရာကို လှမ်းကြည့်ရင်း သူ့မျက်ဝန်းအထက် ကံကြမ္မာစွမ်းအား ဖြတ်ပြေးသွားသည်။
ထင်ထားတဲ့အတိုင်း ဂမ္ဘီရကတောင် ပုံမှန်အတိုင်း ချောမွေ့မနေဘူး…
ချီလမ်းစဉ်က သူ့ကိုယ်ပိုင်အရေးသာချက် ရှိထားလေသည်။ အဓိကအစိတ်အပိုင်းသုံးခုအနက် အဆိုးဆုံး ဖြစ်နေသော်လည်း အသုံးမဝင်ဘူးဟု ဆိုလိုခြင်း မဟုတ်ပေ။ ချီက ကြီးမားပြီး သန့်စင်ကာ ပမာဏတစ်ခု ရှိနေသရွေ့ စံပြများနှင့်ပင် ရင်ဆိုင်ဖို့ အသုံးပြုနိုင်သည်။
ပြီးတော့ ဒီပတ်ဝန်းကျင်က သူတို့အတွက် အတော်လေးကို ပြီးပြည့်စုံတယ်…
အရင်းအမြစ်ချီ နေရာလွတ်၌ ထာဝရအရှင်၊ ထာဝရဦးသျှောင်နှင့် ထာဝရဘုရင်များသည် ဆန့်ကျင်ကျင့်ကြံသူ ဖြစ်လာဖို့အတွက် ပိုမိုလွယ်ကူလှသည်။
ပတ်ဝန်းကျင်က အရေးသာချက် အမြောက်အများ ပေးအပ်ထား၏။
ဝမ်ဝေ့က ဂမ္ဘီရကို အဆုံးသတ်ပြီး ထိုကိစ္စများကို စဉ်းစားလိုက်သည်။ ထို့နောက် သူက လမ်းကြောင်းတစ်ခုကို ဖွင့်ကာ သူ ရှာတွေ့ထားသည့် နေရာတစ်ခုသို့ ကူးသန်းသွားလိုက်သည်။
သို့သော်လည်း သူ့အပြုအမူမှ အာကာပြင် အတက်အကျလှိုင်းက နေရာတိုင်းတွင် စွမ်းအင် ကပ်ဘေးကို ဖန်တီးလာသည်။
အကယ်၍ သူ့အင်အားကြောင့်သာ မဟုတ်လျှင် အသားစိုင်အဖြစ် ပြောင်းလဲသွားနိုင်၏။
ငါ သေမျိုးဘဝတုန်းက ဒီကိုလာခဲ့တယ်ဆိုတာကို မယုံနိုင်သေးဘူး…
ဝမ်ဝေ့က တွေးလိုက်မိသည်။ သူ ပထမဦးဆုံး ချီပန်းပွင့်ကို ဖွဲ့စည်းစဉ်အခါက မတော်တဆ ဤနေရာသို့ ရောက်ရှိသွားခဲ့သည်။ အကယ်၍ ဘိုးဘေးဝမ်ဝူချန်က သူ့ကို ဆွဲမထုတ်ခဲ့ပါက မည်သည့်ကံကြမ္မာစောင့်ကြိုနေမည်ကို ခန့်မှန်းမိလေသည်။
“ငါ ဒါပြီးသွားရင် အဲဒီလူအိုကြီးနဲ့ သေရည်တစ်ခွက်လောက် သွားသောက်ရမယ်”
ဝမ်ဝေ့က သူ ရောက်လာသည့်နေရာကို ကြည့်လိုက်၏။ သူက သူ့ရှေ့ရှိ အပြာရောင်ဂြိုလ်တစ်ခုကို မြင်လိုက်ရသည်။ ထိုဂြိုလ်ပေါ်တွင် သက်ရှိ မရှိသလို တောင်တန်းကဲ့သို့ အနေအထားမျိုးလည်း မရှိပေ။ ထိုအရာကို ရှင်းပြဖို့ အကောင်းဆုံးနည်းလမ်းက စက်လုံးပုံစံဂြိုလ်တစ်ခုသာ ဖြစ်သည်။
“အင်မော်တယ်ချီ” ဝမ်ဝေ့က ရေရွတ်လိုက်သည်။
“ဒါက ပွင့်ချပ်၉လွှာ သန့်စင်မှု ရှိတဲ့ချီနဲ့ မသေမျိုးနန်းဆောင် သုံးခုကို သန့်စင်နိုင်လိမ့်မယ်”
အကယ်၍ သူသာ သန့်စင်နှုန်းကို လျှော့ချလိုက်ပါက နန်းဆောင်အမြောက်အများ ဖန်တီးနိုင်မည်ဖြစ်သော်လည်း ထိုက်တန်သည်ဟု မထင်မိပေ။ လက်ရှိ ဂိုဏ်းက အရေအတွက်ထက် အရည်အသွေးကို လိုအပ်နေသည်။