အခန်း (၄၂၇)

ရွှေအမြုတေအဆင့်အောက်တွင်ရှိသော ငါးမိစ္ဆာများအားလုံး သေဆုံးသွားသည်။

ရေပေါ်တွင် အနက်ရောင်အလောင်းများ မျောပါနေသည်။

ပင်လယ်တွင်ရှိသော မရေမတွက်နိုင်လောက်သည့်ငါးမိစ္ဆာများကို ကြည့်လိုက်ပြီး ဟယ်ထျန်းကျန်းက အော်ဟစ်သည်။

“သူတို့က ကုန်းပေါ်ကို တက်လာချင်တာပဲ”

‘ကုန်းပေါ်ကို တက်လာချင်တာလား’

ဟယ်ထျန်းကျန်း၏စကားကြောင့် ဟန်မူယဲ့၊ ယန်းယန်နှင့် အဝေးတွင်ရှိသော မိစ္ဆာများအားလုံး မျက်နှာထားလေးနက်သွားသည်။

ကမ်းစပ်တွင် များပြားသောငါးမိစ္ဆာများ စုဝေးနေသည့်အတွက် ကုန်းပေါ်သို့တက်လာရန် ပြင်ဆင်နေခြင်းဖြစ်နိုင်သည်။

“ဘုန်း”

ရေလှိုင်းများကြားမှ ပုံရိပ်များပြေးထွက်လာသည်။

သူတို့သည် လူသားအသွင်ပြောင်းထားသော ဝိညာဉ်သံချပ်ကာငါးမိစ္ဆာများ ဖြစ်ကြပြီး ကောင်းကင်ပေါ်သို့ ပျံတက်လာသည်။

သူတို့၏ သွေးနှင့်ချီစွမ်းအားများသည် ပြင်းထန်ပြီး မိစ္ဆာချီများသည် ကောင်းကင်အထိ ပျံ့နှံ့လာသည်။

သူတို့က အနည်းဆုံး ဝိညာဉ်သူငယ်ပဥ္စမအဆင့်တွင် ရှိနေသည်။

ဝိညာဉ်သံချပ်ကာငါးမိစ္ဆာများ၏ခွန်အားသည် စိတ်ကူးမယဉ်နိုင်လောက်ပေ။

နောက်တွင်ရှိနေသောမိစ္ဆာများက ဟန်မူယဲ့ကို ကြည့်သည်။

ကံကောင်းစွာဖြင့် ယခုအချိန်တွင် ဟန်မူယဲ့က ငါးမိစ္ဆာများကို ရင်ဆိုင်နေရသည်။

“ကောင်လေး၊ ငါက နှစ်ယောက်သုံးယောက်ကိုပဲ တားနိုင်လိမ့်မယ်”

ဟယ်ထျန်းကျန်းက ညင်သာစွာပြောသည်။

“သခင်၊ ကျွန်တော်က ဆယ်ယောက်နဲ့တိုက်ခိုက်နိုင်တယ်” ယန်းယန်က တီးတိုးပြောသည်။

သူတို့နှစ်ယောက်က ငါးမိစ္ဆာဆယ်ယောက်ကျော်ကို တားဆီးနိုင်လျှင်ပင် ဟန်မူယဲ့အတွက် ၁၈ယောက် ၁၉ယောက်ခန့် ကျန်နေသေးသည်။

ဟန်မူယဲ့က ခေါင်းခါလိုက်ပြီး မော့ကြည့်သည်။

ထိုလူသည် လျှို့ဝှက်နယ်မြေနှင့်ပတ်သတ်၍ ပိုမိုစိုးရိမ်လိမ့်မည်။

“အကြီးအကဲခွေ၊ မိစ္ဆာတွေကိုသတ်ဖို့ ပူပေါင်းနိုင်မလား”

ဟန်မူယဲ့က ကျယ်လောင်စွာပြောသည်။

ငါးမိစ္ဆာများကိုသတ်ဖြတ်ရန်အတွက် ခွေသားရဲကို ဆင့်ခေါ်သည်။

ဟန်မူယဲ့က အဖြေကိုမစောင့်ဘဲ လက်မြှောက်ပြီး ညွှန်ပြသည်။

သူ့ကို ဓားဆေးလုံးများက ဝိုင်းရံလိုက်သည်။ ဓားဆေးလုံးများသည် နေနှင့်လသဖွယ် တောက်ပလာသည်။

ဓားချီသည် မိုင်တစ်ရာအထိ ပျံ့နှံ့သွားသည်။

မိုးကြိုးပစ်ချက်ကြောင့် ပြုတ်ကျသွားသောဓားသုံးထောင်သည် ရေထဲမှ ပြန်ထွက်လာပြီး ကောင်းကင်တွင်ပြည့်နေသော ကြယ်များဖြစ်သွားသည်။

ကြယ်အလင်းသည် မှိန်ဖျော့နေသော်လည်း ကိုယ်ပိုင်အလင်းရောင်ကမ္ဘာကို ဖန်တီးနိုင်သည်။

သူက လောကကို ဓားဖြင့်ချုပ်နှောင်ပြီး ကိုယ်ပိုင်ကမ္ဘာတစ်ခု ဖြစ်လာစေသည်။

“ကောင်းကင်စက်ဝန်းဓားဝင်္ကပါ”

ဟယ်ထျန်းကျန်းက အော်ဟစ်မိသည်။

ဓားဘုရင်ယွမ်ထျန်း၏ အသန်မာဆုံးဓားဝင်္ကပါသည် ပြိုင်ဘက်ကင်းသည်။

‘ဟန်မူယဲ့က ဓားဝင်္ကပါကို သုံးနိုင်တာလား’

သူက မသုံးနိုင်ပေ။

ဟန်မူယဲ့၏ ချီကျင့်ကြံခြင်းသည် ကမ္ဘာမြေအဆင့်တွင်သာ ရှိသည်။ သူ့ဒန်ထျန်ထဲတွင် ကြယ်ဝိညာဉ်ပုလဲလုံးရှိနေသော်လည်း ဓားဝင်္ကပါ၏စွမ်းအင်ကုန်ဆုံးမှုကို မထောက်ပံ့ပေးနိုင်ပေ။

ချီပင်လယ်တွင်ရှိသော ဓားဆန္ဒသည်လည်း ကောင်းကင်စက်ဝန်းဓားဝင်္ကပါကို မထောက်ပံ့နိုင်ပေ။

သူ့ဝိညာဉ်ကသာ လုံလောက်စွာသန်မာသည်။

သို့သော် ဝိညာဉ်တစ်ခုတည်းနှင့် မည်သည့်အရာမှ မလုပ်နိုင်ပေ။

ဓားဝင်္ကပါသည် ခမ်းနားပုံပေါ်သော်လည်း ကောင်းကင်အဆင့်သို့ ဝင်ရောက်ခါစ မိစ္ဆာများကိုသာ ဖိနှိပ်နိုင်သည်။

ပျံသန်းလာသော ငါးမိစ္ဆာများအားလုံးသည် ဓားဝင်္ကပါကို ချိုးဖောက်နိုင်သည်။

သို့သော် ဟန်မူယဲ့က ဓားဝင်္ကပါပျက်စီးသွားစေရန် ခွင့်ပြုမည်မဟုတ်ပေ။

သူက အသက်ပြင်းပြင်းရှူသွင်းလိုက်ပြီး မျက်လုံးများတောက်ပလာသည်။

သူ့စိတ်နယ်ပယ်တွင် မီးတောက်လာခဲ့သည်။

သွေးမျိုးဆက်စွမ်းအား ....

သူက ဘေးတွင်ရှိသော အမြီးလေးချောင်းခရမ်းရောင်ကျားသစ်၏ သွေးမျိုးဆက်စွမ်းအားကို ငှားယူလိုက်သည်။

အသက်ကိုးခုကြောင်ကလန်၏ ရှန်စန်းသည် စွမ်းအင်အလွန်ကြွယ်ဝသော ခရမ်းရောင်ကျားသစ်ကလန်၏ သွေးမျိုးဆက်နှင့် ပေါင်းစပ်ခဲ့သည်။

ထိုစွမ်းအားမျိုးကို အသုံးချပေးရမည်။

ဘေးတွင်ရှိနေသောယန်းယန်က တစ်ကိုယ်လုံးတုန်ခါသွားသည်။ သူ့ခန္ဓာကိုယ်ထဲတွင်ရှိသော သွေးမျိုးဆက်စွမ်းအားသည် မထိန်းချုပ်နိုင်တော့ဘဲ ရှေ့တွင်ရှိသော ဓားဝင်္ကပါနှင့် ပေါင်းစပ်သွားသည်။

ခရမ်းရောင်ကျားသစ်သည် ပျောက်ကွယ်သွားပြီး ခရမ်းရောင်ချီစွမ်းအင်အလင်းများအဖြစ် ပြောင်းလဲ၍ ဓားဆေးလုံးများနှင့် ပေါင်းစပ်သွားသည်။

ဓားဝင်္ကပါတစ်ခုလုံးသည် ခရမ်းရောင်သန်းလာသည်။

ကောင်းကင်စက်ဝန်းကြယ်များ ....

ခရမ်းရောင်ကြယ်များသည် ကောင်းကင်တစ်ခုလုံးကို အလင်းပေးနေသည်။

ကြယ်စွမ်းအားများ စီးဝင်လာပြီး အဆုံးမရှိသော ဓားအလင်းများသွယ်ယှက်သွားသည်။ မိုင်တစ်ထောင်အတွင်း၌ အလင်းပိုးအိမ်တစ်ခု ဖြစ်လာသည်။

ဝိညာဉ်သံချပ်ကာငါးမိစ္ဆာများသည် အလင်းပိုးအိမ်ထဲတွင် ပိတ်မိသွားသည်။ ဓားအလင်းများသည် သူတို့၏ခန္ဓာကိုယ်ကို ကြိတ်ချေခဲ့သည်။

အရင်ဆုံးပျောက်ကွယ်သွားသော ငါးမိစ္ဆာများသည် ကောင်းကင်အဆင့်မိစ္ဆာများ မဟုတ်ခဲ့ပေ။

ရေမျက်နှာပြင်တွင် မျောပါနေသော ကမ္ဘာမြေအဆင့် ငါးမိစ္ဆာများဖြစ်သည်။

သူတို့၏ခန္ဓာကိုယ်နှင့် အရိုးများသည် ဗလာအဖြစ် ပျောက်ကွယ်သွားပြီး သွေးနီရောင်စွမ်းအင်အဖြစ်ပြောင်း၍ ကြယ်အလင်းနှင့် ပေါင်းစပ်သွားသည်။

“ကျစ်ကျစ်၊ တကယ့်ကို ကောင်းကင်စက်ဝန်းဓားဝင်္ကပါပဲ။ ဝင်္ကပါကို အသက်သွင်းလိုက်တဲ့အချိန်မှာ မိစ္ဆာတွေကို တကယ်သတ်ဖြတ်နိုင်တယ်။ ကလန်တွေအားလုံးက ဓားဝင်္ကပါကို ရှောင်တိမ်းရလိမ့်မယ်”

ဟယ်ထျန်းကျန်းက အပြုံးတစ်ခုနှင့်အတူ ခေါင်းခါသည်။

“မင်းက ငါးမိစ္ဆာတွေကြောင့် ကောင်းကင်စက်ဝန်းဓားဝင်္ကပါကို အသက်သွင်းလိုက်တာလား”

ရန်သူများ၏စွမ်းအားဖြင့် ကိုယ့်ကိုယ်ကိုယ်အားဖြည့်ရာတွင် ဓားဆေးလုံးများသည် အကောင်းဆုံးဖြစ်သည်။

သန်မာသောရန်သူများ များပြားစွာရှိနေလျှင် စွမ်းအင်ကို ပိုမိုဝါးမြိုနိုင်မည်။

ယခုအချိန်တွင် ဓားဝင်္ကပါသည် ကမ္ဘာမြေအဆင့်ငါးမိစ္ဆာများ၏စွမ်းအားကို ဝါးမြိုခဲ့သည်။ ဓားဝင်္ကပါသည် ထိုစွမ်းအားဖြင့် ကိုယ်တိုင်လှုပ်ရှားနိုင်သည်။

ထို့ဖြစ်ရပ်ကြောင့် ယန်းယန်က သက်ပြင်းချသည်။

ဓားဝင်္ကပါအတွက် လိုအပ်သောစွမ်းအားသည် အလွန်ကြောက်မက်ဖွယ်ကောင်းသည်။

သူက ခြောက်သွေ့သွားတော့မည်ဟု ခံစားခဲ့ရသည်။

အမြီးလေးချောင်း ခရမ်းရောင်ကျားသစ်ကပင် အားနည်းပြီး ပုံရိပ်ယောင်ဆန်နေသည်။

ကံကောင်းစွာဖြင့် ဓားဝင်္ကပါကို အသက်သွင်းနိုင်ခဲ့သည်။

ဟန်မူယဲ့က စိတ်သက်သာရာရစွာ သက်ပြင်းချသည်။

သူက မျက်လုံးများမှေးကျဉ်းလိုက်ပြီး ဖိနှိပ်ခံထားရသောမိစ္ဆာများကို ငုံ့ကြည့်သည်။

သူ့ဝိညာဉ်စွမ်းအားသည် ဓားဝင်္ကပါနှင့် ပေါင်းစပ်နေသောကြောင့် ပိုမိုအာရုံခံနိုင်သည်။

ဓားဝင်္ကပါသည် ကောင်းကင်စက်ဝန်းဖြစ်သည်။ ဓားဝင်္ကပါက မဟာတာအိုကို ပျိုးထောင်ပေးနိုင်သည်။ မဟာတာအို၏စွမ်းအားဖြင့် လောကကို ဖိနှိပ်နိုင်သည်။

ဟန်မူယဲ့က ရုတ်တရက် တုန်ခါသွားသည်။

“အကြီးအကဲ၊ ရေအောက်ကို စုံစမ်းပေးရမှာလား”

သူက ညင်သာစွာပြောသည်။

သူ့နတ်အာရုံက ဓားဝင်္ကပါနှင့် ပေါင်းစပ်သွားသောအချိန်တွင် ကောင်းကင်ထက်မှ နတ်အာရုံတစ်ခု ဆင်းသက်လာသည်။

ခွေဦးချို ....

ခွေဦးချိုသည် ပင်လယ်ရေအောက်တွင်ဖြစ်ပျက်နေသောအကြောင်းအရာကို စုံစမ်းစေချင်သည်။

ခွေဦးချိုသည် အကြောင်းပြချက်မရှိဘဲ ထိုသို့ပြောမည်မဟုတ်ပေ။

ဟန်မူယဲ့က တုံ့ဆိုင်းခြင်းမရှိဘဲ ခေါင်းညိတ်သည်။ သူ့နတ်အာရုံသည် ဓားအလင်းနှင့်ပေါင်းစပ်သွားပြီး ပင်လယ်ထဲသို့ တိတ်ဆိတ်စွာတိုးဝင်သည်။

ပေသုံးရာ ....

ပင်လယ်ရေသည် နက်မှောင်နေပြီး လူတစ်ယောက်၏ဝိညာဉ်ကို အေးခဲသွားစေနိုင်သည်။

ကံကောင်းစွာဖြင့် ဟန်မူယဲ့၏ဝိညာဉ်စွမ်းအားသည် ကိုယ်ပိုင်စွမ်းအားကို အသုံးပြုနေခြင်းမဟုတ်ပေ။ သူက ကောင်းကင်ထက်တွင်ရှိသော ခွေဦးချို၏ဝိညာဉ်စွမ်းအားကို အသုံးပြုနေသည်။ ခွေဦးချိုက ဖိအားများအားလုံးကို ခုခံလိမ့်မည်။

သူက ဓားအလင်းဖြင့် ဆက်လက်ထိုးဆင်းသွားရန် အာရုံစိုက်ထားရမည်။

ပေသုံးသောင်း ....

ပင်လယ်ကြမ်းပြင်တွင်ရှိသော တောင်တန်းများကို မြင်နိုင်သည်။

တောင်တန်းပေါ်တွင် ကျားငါးမန်းများ၏အလောင်းများ ပုံနေသည်။

အလောင်းများကိုသယ်ယူနေသော ငါးမိစ္ဆာများလည်းရှိသည်။

ကျားငါးမန်းအများအပြားသည် သတ်ဖြတ်ခံခဲ့ရပြီး အလောင်းများကို ရွေ့ပြောင်းနေဆဲဖြစ်သည်။

ဝိညာဉ်သံချပ်ကာငါးမိစ္ဆာများသည် ကျားငါးမန်းကလန်ကို တိုက်ခိုက်ခဲ့သောကြောင့် ကမ်းစပ်တွင် စုစည်းနေခြင်းဖြစ်သည်။

ဓားအလင်းသည် ပင်လယ်ကြမ်းပြင်တွင် လှည့်ပတ်သွားပြီး ကမ်းစပ်သို့ ပြန်လာသည်။

ဟန်မူယဲ့က ဝိညာဉ်စွမ်းအားကိုအသုံးချ၍ ဓားအလင်းကို မိုင်တစ်ရာအထိ လွှမ်းခြုံစေသည်။

သူ့မျက်နှာထားက ပြောင်းလဲသွားခဲ့သည်။

ပင်လယ်ထဲတွင် သိပ်သည်းနေသော ဝိညာဉ်သံချပ်ကာငါးမိစ္ဆာများ အုပ်လိုက်ရှိနေသည်။

အဆုံးမရှိပေ။

ငါးမိစ္ဆာအများစုသည် ကမ္ဘာမြေအဆင့်အောက်တွင်ဖြစ်ပြီး အသိဉာဏ်သိပ်မရှိပေ။ သို့သော် အဆုံးမရှိသော ငါးမိစ္ဆာအုပ်စုသည် လူတစ်ယောက်၏နှလုံးသားကို အေးစက်သွားစေနိုင်သည်။

ငါးအုပ်ထဲတွင် သွားလာနေသော ဟန်မူယဲ့၏ဓားအလင်းသည် အားနည်းလာခဲ့သည်။

သူက အသက်ပြင်းပြင်းရှူသွင်းလိုက်ပြီး စိတ်နယ်ပယ်ထဲတွင်ရှိသော ဝိညာဉ်လိပ်ပြာဓားသည် ရွှေအလင်းတစ်ခုအဖြစ်ပြောင်းလဲ၍ ကောင်းကင်စက်ဝန်းဓားဝင်္ကပါထဲသို့ ဝင်ရောက်သွားသည်။

ဓားဝင်္ကပါထဲတွင် ရွှေရောင်လက်သွားသည်။

ထိုဓားအလင်း၏အကူအညီဖြင့် ဟန်မူယဲ့၏ဝိညာဉ်သည် မိုင်တစ်ထောင်အထိ ဖြန့်ထွက်လာသည်။

“ဝီ”

တုန်ခါသံနှင့်အတူ ဟန်မူယဲ့၏မျက်နှာက ဖြူဖျော့သွားသည်။

သူ့ရှေ့တွင်ရှိသောဓားဝင်္ကပါသည် ပြိုကျလုနီးပါး ဖြစ်သွားသည်။

ကောင်းကင်ထက်တွင် နားအူလောက်သောဟိန်းသံနှင့်အတူ အနက်ရောင်ဦးချိုတစ်ခု ပေါ်လာသည်။

ဟန်မူယဲ့က ဟယ်ထျန်းကျန်းကို လှည့်ကြည့်သည်။

“သွမ်ကျိုးရှောင်က နတ်ဘုရားသားရဲ ပါ့ရှားလား”

ဟယ်ထျန်းကျန်းက ခေါင်းညိတ်လိုက်ပြီး စပ်စုလိုစိတ်များနှင့် မေးသည်။

“မင်းမှာ သူ့ရဲ့အမွေအနှစ် ရှိနေတာပဲ။ မင်းက သူ့သွေးမျိုးဆက်ကို မသိဘူးလား”

ဟန်မူယဲ့က မဖြေဘဲ ဆက်ပြောသည်။

“သူက မိစ္ဆာတစ်သောင်းလျှို့ဝှက်နယ်မြေကနေ ထွက်သွားပြီလို့ ခင်ဗျားပြောခဲ့တယ်နော်”

သွမ်ကျိုးရှောင်က ခေါင်းညိတ်လိုက်ပြန်သည်။

“သူထွက်မသွားခင် ငါ့ကို ဒီမှာပဲ ငြိမ်းငြိမ်းချမ်းချမ်းနေစေချင်တဲ့အကြောင်း ဆက်တိုက်နားပူနေတာ။ သူက အင်မော်တယ်ရင်းမြစ်ကမ္ဘာမှာ ကိစ္စတွေဖြေရှင်းပြီးရင် ပြန်လာမယ်လို့ ပြောတယ်”

ဟယ်ထျန်းကျန်း၏မျက်နှာထားက ဖြည်းဖြည်းချင်းလေးနက်သွားပြီး ဟန်မူယဲ့ကို ကြည့်သည်။

“ပင်လယ်အောက်ခြေမှာ မင်းဘာမြင်ခဲ့တာလဲ”

ဟန်မူယဲ့က တစ်ခုခုမြင်ခဲ့သောကြောင့် မေးခွန်းများမေးနေခြင်း ဖြစ်လိမ့်မည်။

ဟန်မူယဲ့က အသက်ပြင်းပြင်းရှူသွင်းလိုက်ပြီး တီးတိုးပြောသည်။

“လျှို့ဝှက်နယ်မြေတစ်ခုလုံးကိုထမ်းထားတဲ့ နတ်ဘုရားသားရဲပါ့ရှားရဲ့အလောင်းကို မြင်ခဲ့တယ်”

လျှို့ဝှက်နယ်မြေတစ်ခုလုံးကို ထမ်းထားသည်။

နတ်ဘုရားသားရဲ ပါ့ရှား၏အလောင်း ....

“သူက ထွက်သွားခဲ့တာ။ သူထွက်သွားတာကို ငါကိုယ်တိုင်မြင်လိုက်တယ်”

“သူက ငါ့တောင်ပံတစ်စုံကို ယူသွားပြီး အင်မော်တယ်ရင်းမြစ်ကမ္ဘာကနေ ပြန်လာရင် လင်းယုန်ငှက်တောင်ပံတစ်စုံပေးမယ်လို့ ပြောခဲ့တယ်”

“သူက သေချာပေါက်ပြန်လာမှာမလို့ ငါကို စောင့်နေလို့ ပြောခဲ့တာ ....”

ဟန်မူယဲ့က လက်မြှောက်လိုက်သောအခါ လက်ဝါးထဲတွင် အနက်ရောင်သံပြားလေးတစ်ခု ရှိနေသည်။

“မိစ္ဆာတစ်သောင်းတံဆိပ် ....”

ဟယ်ထျန်းကျန်းက သံပြားလေးကိုကြည့်လိုက်ပြီး တီးတိုးရေရွတ်သည်။

“မိစ္ဆာတစ်သောင်းတံဆိပ်က နတ်ဘုရားသားရဲပါ့ရှားရဲ့နဖူးမှာ ရှိနေတယ်။ အခု စစ်ဆေးကြည့်လိုက်တဲ့အခါမှာ အကြီးအကဲခွေက ကျွန်တော့်အတွက် ယူပေးခဲ့တယ်”

နတ်ဘုရားသားရဲပါ့ရှားသည် အရွယ်အစားမသိနိုင်သော ဧရာမလိပ်ကြီးဖြစ်သည်။ လိပ်၏မျက်လုံးများသည် ပြူးကျယ်နေပြီး ရေယက်လေးခုကိုမြှောက်၍ လျှို့ဝှက်နယ်မြေတစ်ခုလုံးကို ကျောပေါ်တွင် ထမ်းထားသည်။

ဧရာမလိပ်ကြီးကို သွေးချီအတားအဆီးတစ်ခုက ဝိုင်းရံထားသည်။ ထိုအတားအဆီးသည် မရေမတွက်နိုင်သော ဝိညာဉ်သံချပ်ကာငါးမိစ္ဆာများ၏ ဝါးမြိုခြင်းကို ခုခံနေသည်။

ဟန်မူယဲ့က ပင်လယ်ကြမ်းပြင်တွင် ထိုမြင်ကွင်းကို မြင်ခဲ့ရသည်။

သူက ကောင်းကင်ကို တိတ်ဆိတ်စွာမော့ကြည့်သည်။

“အူ ....”

ကြေကွဲဖွယ်ကောင်းသော ဦးချိုမှုတ်သံ ထွက်ပေါ်လာသည်။

လျှို့ဝှက်နယ်မြေတစ်ခုလုံးသည် ဝမ်းနည်းမှုနှင့် ပြည့်နှက်သွားပုံရသည်။

မရေမတွက်နိုင်သောမိစ္ဆာများသည် မြေပြင်ပေါ်တွင် ဒူးထောက်လိုက်သည်။

“ရှေးခေတ်မိစ္ဆာကြီးတွေက နိုးထမလာဘဲ နတ်ဘုရားသားရဲပါ့ရှားလိုမျိုး ဖြစ်နေမယ်လို့ ထင်လား”

ဟန်မူယဲ့က ညင်သာစွာပြောသည်။

ဟယ်ထျန်းကျန်းက နားမလည်နိုင်သောကြောင့် ခေါင်းခါသည်။

“ငါမသိဘူး”

သူမသိပေ။

ဟန်မူယဲ့က လက်ထဲတွင်ရှိသောသံပြားကို ငုံကြည့်ပြီး လက်သီးဆုပ်သည်။

သံပြားထဲသို့ ဓားချီများတိုးဝင်သွားသည်။

“ဘုန်း”

သောင်းချီသောမိစ္ဆာများ မြူးထူးနေသောမြင်ကွင်းသည် သူ့စိတ်ထဲတွင် ပေါ်လာသည်။

မရေမတွက်နိုင်သောမိစ္ဆာများသည် ကျယ်ပြန့်သောထိုလောကတွင် လွတ်လပ်စွာနေထိုင်ကြသည်။

ကောင်းကင်ထက်တွင် နဂါးနှင့်ဖီးနစ်ငှက်များ ပျံသန်းနေပြီး မြေပြင်တွင် တောင်တစ်လုံးနှင့်တူသော သားရဲတိုင်းသည် နတ်ဘုရားသားရဲဖြစ်သည်။

ပျက်စီးခြင်းစကြဝဠာဖြစ်သည်။