အခန်း (၄၂၉)

ရွှေရောင်သွေးမျိုးဆက်အလင်းသည် ကောင်းကင်ကို လွှမ်းခြုံသွားသည်။ လျှို့ဝှက်နယ်မြေတွင်ရှိသော မိစ္ဆာများအားလုံးသည် နှလုံးသားအောက်ခြေမှခေါ်သံကို ခံစားမိသည်။

ပျက်သုဉ်းခြင်းပင်လယ် ....

သိပ်မဝေးသောနေရာတွင်ရှိနေသည့် မိစ္ဆာကျွမ်းကျင်သူများ၏ခန္ဓာကိုယ်ပေါ်မှ မိစ္ဆာစွမ်းအင်အလင်းများ ပေါ်ထွက်လာသည်။

“အရှင်၊ ကျွန်တော်တို့ ဘာလုပ်ပေးရပါမလဲ”

လေးနက်သောအငွေ့အသက်များနှင့် အရပ်ရှည်သောမိစ္ဆာတစ်ယောက်က ဟန်မူယဲ့ကို ဦးညွှတ်သည်။

မိစ္ဆာတစ်သောင်းတံဆိပ်ပိုင်ရှင်သည် လျှို့ဝှက်နယ်မြေ၏ အုပ်စိုးသူဖြစ်သည်။

“ဒီနေရာကို ကာကွယ်မယ်”

ဟန်မူယဲ့က ကြေးခွံနက်ငါးမိစ္ဆာများဖြင့် ပြုလုပ်ထားသော နံရံတံတိုင်းကို ညွှန်ပြပြီး တီးတိုးပြောသည်။

မဟာမိစ္ဆာကြီးသည် တုံ့ဆိုင်းမှုမရှိဘဲ နံရံတံတိုင်းပေါ်သို့ ပျံတက်သွားသည်။ သူ့ခန္ဓာကိုယ်သည် အနက်ရောင်သားမွေးနှင့် ဝက်ဝံတစ်ကောင်အဖြစ် ပြောင်းလဲသွားသည်။

ရှေးခေတ်ဝက်ဝံကလန်၏ သွေးမျိုးဆက်သည် လျှို့ဝှက်နယ်မြေတွင် အင်အားစုကြီးတစ်ခုဖြစ်သည်။

မိစ္ဆာများသည် အနက်ရောင်နံရံပေါ်တွင် ခြေချလိုက်သည်။

အလောင်းများနှင့်ပြုလုပ်ထားသော နံရံတံတိုင်းပေါ်တွင် မိစ္ဆာစွမ်းအင်အလင်းများ တောက်ပလာသည်။

“ဘုန်း”

ရေမျက်နှာပြင် ပေါက်ကွဲသွားပြီး မရေမတွက်နိုင်သောငါးမိစ္ဆာများသည် နံရံကို ဝင်တိုက်သည်။

ပျက်သုဉ်းခြင်းပင်လယ်သည် အသက်ဝင်လာပုံရသည်။ ရေမျက်နှာပြင်မြင့်တက်လာပြီး အဆုံးမရှိသောငါးမိစ္ဆာများ ကမ်းခြေသို့ကူးခပ်လာသည်။

“အရှေ့အရပ်က အံ့ဖွယ်နေမင်း ....”

ကျယ်လောင်သောအော်ဟစ်သံကို ကြားနိုင်သည်။

များပြားသောအသံများ ပဲ့တင်ထပ်လာသည်။ “ငါတို့နဲ့ဆို ပြိုင်ဘက်ကင်းတယ် ....”

ချင်းရီမင်၏ခန္ဓာကိုယ်ထဲမှ ချီစွမ်းအင်အလင်းများ ပေါ်ထွက်လာသည်။

ကောင်းကင်ထက်မှ မိုးကြိုးများကျဆင်းလာသော်လည်း သွေးအလင်းလွှာတစ်ခုက တားဆီးထားခဲ့သည်။

အဆင့်တက်ခြင်း ....

သူက ကောင်းကင်ဘုံတစ်ဝက်အဆင့်ကျွမ်းကျင်သူအဖြစ်မှ ဝိညာဉ်သူငယ် တတိယအဆင့်၊ ပဥ္စမအဆင့်၊ သတ္တမအဆင့်အထိ ရောက်သွားသည်။

ချင်းရီမင်၏ ချီစွမ်းအင်နှင့် သွေးမျိုးဆက်စွမ်းအားပေါင်းစပ်မှုသည် ဝိညာဉ်သူငယ် သတ္တမအဆင့်တွင် ရပ်တန့်သွားသည်။

သူ့ဆီမှ ဝိညာဉ်သူငယ်သတ္တမအဆင့်ကျွမ်းကျင်သူတစ်ယောက်၏ စွမ်းအားများပေါ်ထွက်လာပြီး ပတ်ဝန်းကျင်ပေတစ်ရာပတ်လည်ကို တုန်ခါသွားစေသည်။

ခွန်အားကိုဖိနှိပ်ထားပြီး အာကာသထဲတွင်အဆင့်တက်ရမည့် ချင်းရီမင်သည် ယခုအချိန်တွင် အဆင့်တက်ရန် ရွေးချယ်ခဲ့သည်။

သူက ကမ္ဘာထဲတွင် ကောင်းကင်အဆင့်သို့ တက်ရောက်ခဲ့သောကြောင့် ကောင်းကင်တာအိုနှင့် ငြိတွယ်နေလိမ့်မည်။ အာကာသထဲတွင်အဆင့်တက်သော ကျွမ်းကျင်သူများနှင့်ယှဉ်လိုက်လျှင် သူက အနည်းငယ် လိုအပ်နေသည်။

သို့သော် ရှေ့တွင် ရန်သူများရှိနေသောကြောင့် ချင်းရီမင်က အဆင့်တက်ရန် ရွေးချယ်ခဲ့သည်။

“ခေါင်းဆောင်ချင်း”

ဟန်မူယဲ့က ချီစွမ်းအင်အလင်းများဖြင့်တောက်ပနေသော ချင်းရီမင်ကိုငုံ့ကြည့်လိုက်ပြီး တီးတိုးပြောသည်။

“လျှို့ဝှက်နယ်မြေရဲ့ပြဿနာက မင်းနဲ့မဆိုင်ပါဘူး”

ချင်းရီမင်သည် အံ့ဖွယ်နေမင်းကိုယ်ရံတော်တပ်ဖွဲ့၏ ခေါင်းဆောင်ဖြစ်သည်။ သူက အလယ်ပိုင်းကုန်းမြေ၏ အရာရှိတစ်ဦးဖြစ်ပြီး လျှို့ဝှက်နယ်မြေနှင့် သက်ဆိုင်ခြင်းမရှိပေ။

“ဟန်မူယဲ့၊ အံ့ဖွယ်နေမင်းက ဘာလဲသိလား”

ချင်းရီမင်၏မျက်နှာထားက တည်ငြိမ်နေပြီး အော်ပြောသည်။

ဟန်မူယဲ့မဖြေနိုင်ခင် စစ်တပ်ဝင်္ကပါထဲမှ အသံထွက်လာသည်။

“အာရုံစိုက်မယ်”

“အနက်ရောင်သံချပ်ကာကိုဝတ်ပြီး အလင်းတန်းကို ကာကွယ်ထားမယ်”

သူ့အသံသည် ထည်ဝါပြီး ဆက်တိုက်ပေါ်ထွက်လာသည်။

ချင်းရီမင်က ဟန်မူယဲ့ကိုကြည့်သည်။

“အံ့ဖွယ်နေမင်းကိုယ်ရံတော်တွေက ကောင်းကင်အံ့ဖွယ်ကမ္ဘာကိုပဲ ကာကွယ်ပေးတာမဟုတ်ဘူး။ ငါတို့က ကောင်းကင်တာအိုနဲ့ လောကကို ကာကွယ်ပေးတယ်”

ထိုအရာသည် အံ့ဖွယ်နေမင်းကိုယ်ရံတော်များ၏ တာဝန်ဖြစ်သည်။

အံ့ဖွယ်နေမင်းကိုယ်ရံတော်များသည် ကောင်းကင်အံ့ဖွယ်ကမ္ဘာတင်မကဘဲ တခြားကမ္ဘာများကိုပါ ကာကွယ်လိမ့်မည်။

ထိုအရာသည် အံ့ဖွယ်နေမင်းကိုယ်ရံတော်များ ဖြစ်သည်။

ချင်းရီမင်က အတော်လေး သဘောထားကြီးသည်။

ဟန်မူယဲ့က လျင်မြန်စွာခေါင်းညိတ်သည်။

“ခေါင်းဆောင်ချင်း၊ မသေပါနဲ့”

သူက တီးတိုးပြောသည်။

ချင်းရီမင်က တောက်ပနေသောမျက်လုံးများနှင့် ကျယ်လောင်စွာရယ်သည်။

“ဟန်မူယဲ့၊ မသေနဲ့”

“ကောင်းကင်အံ့ဖွယ်ကမ္ဘာကို မင်းပြန်လာဖို့ စောင့်နေမယ်”

သူ့လက်ထဲတွင်ရှိသော အံ့ဖွယ်နေမင်းဓားသည် ကျယ်လောင်စွာအသံပေးလိုက်ပြီး သူ့နောက်တွင်ရှိသော တိုက်ပွဲဝင်္ကပါ၏စွမ်းအားကို ဆွဲယူသည်။ ထို့နောက် ပေတစ်သောင်းမြင့်မားသော ရွှေရောင်ချပ်ဝတ်စစ်သူကြီးတစ်ယောက်အဖြစ် ပြောင်းလဲသွားသည်။

ရွှေရောင်ချပ်ဝတ်စစ်သူကြီးသည် ဓားရှည်ကိုကိုင်ထားပြီး နံရံတံတိုင်းကိုကျော်၍ ပျက်သုဉ်းခြင်းပင်လယ်ထဲသို့ ဆင်းသည်။

ထိုစစ်သူကြီးသည် ပေတစ်သောင်းမြင့်မားသောကြောင့် ပင်လယ်ရေသည် ခြေသလုံးအထိသာ ရောက်နိုင်သည်။

ရွှေရောင်ချပ်ဝတ်စစ်သူကြီးက ပင်လယ်ထဲတွင်ရပ်နေပြီး ဓားဖြင့်ခုတ်ချသည်။

“ဘုန်း”

ချင်းရီမင်က အံ့ဖွယ်နေမင်းကိုယ်ရံတော်များ၏ ဝင်္ကပါစွမ်းအားကိုအသုံးပြု၍ ပင်လယ်ပြင်၏ပေသုံးထောင်ကို ခုတ်ချခဲ့သည်။

ထိုအရာသည် ချင်းရီမင်၏ တိုက်ခိုက်နိုင်စွမ်းဖြစ်သည်။

သူ့စွမ်းအားသည် ဟန်မူယဲ့၏ ကောင်းကင်စက်ဝန်းဓားဝင်္ကပါနှင့် မယှဉ်နိုင်လျှင်ပင် ကွာခြားမှုသိပ်မရှိပေ။

သူက သားသတ်သမားလုဟုသိကြသော လုယန်နှင့် ယှဉ်ပြိုင်ချင်သည့်အတွက် အံ့အားသင့်ရန်မလိုတော့ပေ။

ဟန်မူယဲ့က ရွှေရောင်ချပ်ဝတ်စစ်သူကြီးကို ကြည့်လိုက်ပြီး နားလည်သွားသည်။

ကိုယ်ပိုင်ကျင့်ကြံခြင်းအတွက် တိုက်ခိုက်ခြင်းသည် ဦးစားပေးရည်မှန်းချက်မဟုတ်ပေ။

ကိုယ်ပိုင်တာအိုကို ကာကွယ်ခြင်းသည် အံ့ဖွယ်နေမင်းကိုယ်ရံတော်များ၏ လုပ်သင့်သောအရာဖြစ်သည်။

ယခုအချိန်တွင် ချင်းရီမင်က ကျင့်ကြံခြင်းအတွက်တိုက်ခိုက်မှုကို လက်လျော့၍ အဆင့်တက်ခဲ့သည်။ သူက အံ့ဖွယ်နေမင်းကိုယ်ရံတော်တစ်ယောက်၏ ဂုဏ်သိက္ခာကို ကာကွယ်ခဲ့သည်။

သူက မရေမတွက်နိုင်လောက်သောလူများကို သတ်ဖြတ်ခဲ့ပြီး လက်တွင် သွေးစွန်းနေလျှင်ပင် သူ့နှလုံးသားထဲတွင် အလင်းရောင်ရှိနေသည်။

ကျင့်ကြံခြင်းသည် ကောင်းကင်ကိုဆန့်ကျင့်ရသော ခါးသီးသည့်ခရီးတစ်ခုဖြစ်သည်။

ကျင့်ကြံခြင်းကို ထပ်မံနားလည်သွားသောကြောင့် ဟန်မူယဲ့၏စိတ်နယ်ပယ်က ပွင့်လာပုံပေါ်သည်။ သူ့ရှေ့တွင် အလင်းရောင်ရှိနေသည်။

တာအိုရှိသောနေရာတွင် နှလုံးသားရှိလိမ့်မည်။ ကျရှုံးမှုများရှိနေလျှင်ပင် တုန်လှုပ်သွားမည်မဟုတ်ပေ။

ထိုအရာသည် မဟာတာအိုဖြစ်သလို ဓားတာအိုလည်း ဖြစ်သည်။

ဟန်မူယဲ့က စိတ်သက်သာရာရသွားပြီး ကျယ်လောင်စွာရယ်သည်။ သူက အစွမ်းကုန်ထုတ်သုံး၍ ဓားဝင်္ကပါဖြင့် တိုက်ခိုက်လိုက်သည်။

မရေမတွက်နိုင်သောလျှပ်စီးကြောင်းများသည် ဓားဝင်္ကပါဖြင့်ပေါင်းစပ်သွားပြီး မိုးကြိုးပင်လယ်တစ်ခု ဖြစ်လာသည်။ ထို့နောက် ပင်လယ်ရေမျက်နှာပြင်ကို ဖျက်ဆီးလိုက်သည်။

ပျက်သုဉ်းခြင်းပင်လယ်သည် လျှပ်စီးများကြောင့် လောင်ကျွမ်းသွားပုံပေါ်သည်။

အသန်မာဆုံးငါးမိစ္ဆာပင်လျှင် လျှပ်စီးကြောင်းများကို မခုခံနိုင်ခဲ့ပေ။

ထိုအရာသည် ကောင်းကင်တာအို၏စွမ်းအားဖြစ်သည်။ ထိုစွမ်းအားကို ခုခံချင်လျှင် ရှေးခေတ်နတ်ဘုရားသားရဲခွေကို ဖိနှိပ်ရမည်။

ထိုအရာသည် မဖြစ်နိုင်ပေ။

ငါးမိစ္ဆာများ၏ခွန်အားသည် တစ်ဦးချင်းအပေါ်တွင် မမှီခိုဘဲ အရေအတွက်အပေါ်တွင် မှီခိုသည်။

ပင်လယ်တွင်ပြည့်နှက်နေသော လျှပ်စီးကြောင်းများနှင့် ရင်ဆိုင်ရသောအခါတွင် ငါးမိစ္ဆာများသည် သေဆုံးသွားရန်သာ တတ်နိုင်ခဲ့သည်။

ဟန်မူယဲ့က အနက်ရောင်နံရံတံတိုင်းပေါ်တွင် တင်ပျဉ်ခွေထိုင်နေသည်။ ဓားဝင်္ကပါသည် ဆက်တိုက်လှုပ်ရှားနေသည်။

ကောင်းကင်စက်ဝန်းဓားဝင်္ကပါသည် စွမ်းအားကုန်ဆုံးမှုများသည်။ ဝိညာဉ်စွမ်းအားနှင့် ဓားဆန္ဒများ လျော့နည်းလာခဲ့သည်။

သူက နှစ်နာရီတစ်ကြိမ် အနားယူရန်လိုအပ်သည်။

ယခုအချိန်တွင် ကလန်အသီးသီး၏မိစ္ဆာများက ပျက်သုဉ်းခြင်းပင်လယ်သို့ဝင်ရောက်ပြီး ငါးမိစ္ဆာအလောင်းများကို စုဆောင်းနေသည်။

အသက်ရှိနေသေးသော ငါးမိစ္ဆာများကို သတ်ဖြတ်ပြီး သေဆုံးသွားသော ငါးမိစ္ဆာများကို ကမ်းခြေတွင် စုပုံထားသည်။

မိစ္ဆာများက ငါးမိစ္ဆာအလောင်းများ ဝေစုခွဲရန် ဆွေးနွေးနေကြသည်။

အသွေးအသား၊ အရိုးနှင့် ကြေးခွံ ....

အဆင့်နိမ့်မိစ္ဆာအများစုအတွက် အနည်းဆုံး ကမ္ဘာမြေအဆင့်တွင်ရှိနေသော ငါးမိစ္ဆာအလောင်းများသည် ရတနာဖြစ်သည်။

ဓားဝင်္ကပါရပ်တန့်သွားသောအချိန်တွင် ငါးမိစ္ဆာများက အခွင့်ကောင်းယူ၍ အစွမ်းကုန်တိုက်ခိုက်လာတတ်သည်။

ထိုအချိန်တွင် ချင်းရီမင်နှင့် အနက်ရောင်ချပ်ဝတ်စစ်သားများ၊ ကလန်အသီးသီးမှ မိစ္ဆာများသည် ငါးမိစ္ဆာများ၏တိုက်ခိုက်မှုကို အစွမ်းကုန်ခုခံထားသည်။

ထိုအချိန်တွင် တိုက်ပွဲသည် အပြင်းထန်ဆုံးဖြစ်သည်။

ဟန်မူယဲ့၏ဓားဝင်္ကပါ ပြန်လည်အသက်ဝင်လာလျှင် ငါးမိစ္ဆာများက လျှပ်စီးကြောင်းများထဲသို့ ပြန်ရောက်သွားပြီး မိစ္ဆာများက အားနည်းစွာ ပြန်ဆုတ်လာကြသည်။

ကမ်းခြေတွင် မိစ္ဆာများ ပိုမိုစုဝေးလာသည်။ ကမ္ဘာအသီးသီးမှ ကောင်းကင်လမ်းလျှောက်သူများလည်း ရောက်လာကြသည်။

လျှို့ဝှက်နယ်မြေတွင် တိုက်ပွဲကြီးတစ်ခုဖြစ်နေလိမ့်မည်ဟု မျှော်လင့်မထားကြပေ။

လူတိုင်းလိုချင်နေသော မိစ္ဆာတစ်သောင်းတံဆိပ်သည် လူတစ်ယောက်၏အပိုင် ဖြစ်သွားသည်။

တစ်လအကြာတွင် အစိမ်းရောင်မြေခွေးကလန်နှင့် အသက်ကိုးခုကြောင်ကလန် ရောက်လာသည်။

ယခုအချိန်တွင် မရေမတွက်နိုင်လောက်သောမိစ္ဆာများသည် ကမ်းခြေတွင် စုဝေးနေကြသည်။

ပန်းပဲပညာရပ်တွင် ကျွမ်းကျင်သောလူများက ငါးမိစ္ဆာများ၏ အရိုးနှင့်အကြောကို လက်နက်အဖြစ် သန့်စင်လိမ့်မည်။

အစိမ်းရောင်ဖျံကလန် ရောက်လာသောအခါတွင် အမျိုးမျိုးသောဆေးလုံးများကို သန့်စင်ခဲ့သည်။

မိစ္ဆာများနှင့်အတူ အသက်ကိုးခုကြောင်ကလန်တွင် စာသင်ပေးနေသော ဟွမ်ကျစ်ဟူလည်း ရောက်လာခဲ့သည်။ သူမက ယွင်တိ၏ဦးဆောင်မှုနောက်တွင် ဆေးလုံးနှင့် လက်နက်သန့်စင်ကို သွားကြည့်ခဲ့သည်။

သူမက မကြာခဏဆိုသလို နံရံတံတိုင်းပေါ်သို့တက်ပြီး လက်သီးဆုပ်၍ ပင်လယ်ပြင်တွင်ဖြစ်နေသော ပြင်းထန်သည့်တိုက်ပွဲကို စိုးရိမ်စွာကြည့်နေသည်။

“ဒီတစ်ကြိမ်မှာ ကြောင်ဖြူလေး ပြန်မလာနိုင်ခဲ့ဘူး ....”

“နံပတ်သုံးကျားနက်က ပင်လယ်ထဲကို ဆွဲချခံလိုက်ရတယ် ....”

ဟွမ်ကျစ်ဟူ၏မျက်လုံးထဲတွင် မုန်းတီးမှုများရှိနေပြီး ခါးတွင်ရှိသောဓားရိုးကို တင်းကျပ်စွာကိုင်ထားသည်။

ဟန်မူယဲ့က ဆယ်လကြာသည်အထိ နံရံတံတိုင်းပေါ်မှ မခွာခဲ့ပေ။

ထိုဆယ်လအတွင်း၌ ကလန်အသီးသီး၏ မရေမတွက်နိုင်လောက်သောမိစ္ဆာများ သေဆုံးသွားခဲ့သည်။

သို့သော် တိုက်ပွဲအတွင်း၌ တိုးတက်လာသော မရေမတွက်နိုင်လောက်သည့်မျိုးဆက်သစ်များလည်း ရှိနေသည်။

ဟန်မူယဲ့က ကောင်းကင်တာအိုစွမ်းအားနှင့် ပေါင်းစပ်ထားသောကြောင့် မိုးကြိုးကပ်ဘေးကို ထိန်းချုပ်နိုင်သည်။

အဆင့်တက်မည့်မိစ္ဆာများသည် ကောင်းကင်ကပ်ဘေးကို အခက်အခဲမရှိဘဲ ကျော်ဖြတ်နိုင်ခဲ့သည်။

ကလန်တိုင်းတွင် မိုးကြိုးကပ်ဘေးကိုကျော်ဖြတ်ပြီး ကောင်းကင်အဆင့်သို့ရောက်လာသောမိစ္ဆာများ ရှိနေသည်။

ကမ္ဘာအသီးသီးမှ ကောင်းကင်လမ်းလျှောက်သူများသည် အဆပေါင်းများစွာ တိုးတက်လာကြသည်။

ကောင်းကင်အံ့ဖွယ်ကမ္ဘာမှလူများထဲတွင် ချင်းရီမင်သည် ဝိညာဉ်သူငယ်နဝမအဆင့်သို့ ရောက်သွားသည်။

အရှေ့ပင်လယ်နဂါးကလန်၏ လက်ရွေးစင်များသည်လည်း ကောင်းကင်ဘုံအဆင့်သို့ ရောက်သွားသည်။

တိုက်ပွဲတွင် အနောက်ဘက်နယ်စပ်ကုန်းမြေနှင့် အရှေ့ပင်လယ်မှ ဓားကျင့်ကြံသူများသည် အလွန်တောက်ပခဲ့သည်။

အစိမ်းရောင်မြေခွေးနှင့် အသက်ကိုးခုကြောင်များသည် ဓားဝင်္ကပါကိုဖန်တီး၍ တိုက်ခိုက်နေသည်။ သူတို့အားလုံးသည် ကျင့်ကြံဆင့်ထက်ကျော်လွန်သော တိုက်ခိုက်နိုင်စွမ်းကို ထုတ်ဖော်နိုင်သည်။

....

“ဘုန်း”

ပျက်သုဉ်းခြင်းပင်လယ်တွင် မိုးကြိုးများ ရပ်တန့်သွားပြန်သည်။

ကလန်အသီးသီး၏ ကျွမ်းကျင်သူများသည် ပင်လယ်ထဲသို့ ကြည့်လိုက်သည်။

ဟန်မူယဲ့က ပျက်သုဉ်းခြင်းပင်လယ်၏ အနက်ရှိုင်းဆုံးအပိုင်းကို မြင်နိုင်ပုံရသည်။

ကောင်းကင်ထွင်းဖောက်ဝင်္ကပါ ၁၃ခုတွင် လေဟာနယ်စွမ်းအားများရှိနေသည်။

ဧရာမငါးမိစ္ဆာများသည် ဝင်္ကပါကိုဖြတ်သန်း၍ ပျက်သုဉ်းခြင်းပင်လယ်သို့ ရောက်လာသည်။

ထိုဝင်္ကပါ၏အခြေခံအုတ်မြစ်သည် မရေမတွက်နိုင်သော ငါးမိစ္ဆာနှင့် ကျားငါးမန်းများ၏ အလောင်းဖြစ်သည်။

ငါးမိစ္ဆာများသည် ကျားငါးမန်းကလန်ကို သတ်ဖြတ်ပြီး အလောင်းများကိုအသုံးပြု၍ ဝင်္ကပါတည်ဆောက်ခဲ့သည်။

“ငါတို့က အဲ့ဒီဝင်္ကပါတွေကို မဖျက်ဆီးနိုင်ရင် ငါးမိစ္ဆာတွေကို တားနိုင်မှာမဟုတ်ဘူး”

ဟန်မူယဲ့က တီးတိုးပြောလိုက်ပြီး မျက်လုံးထဲတွင်ရှိသောအလင်းရောင်များ ပျောက်ကွယ်သွားသည်။

သူ့နောက်တွင် ပုံရိပ်ယောင်ဦးချိုတစ်ခုသည် တုံ့ပြန်မှုပေးလိုက်ပုံရပြီး ညင်သာစွာတုန်ခါသွားသည်။

တစ်နှစ်အတွင်း၌ တခြားလူများက ကမ္ဘာတုန်သွားအောင် တိုးတက်လာခဲ့သည်ဆိုလျှင် ဟန်မူယဲ့က ကိုယ်ပိုင်ကမ္ဘာတစ်ခုကို ရရှိထားသည်။