အခန်း (၄၃၁)

နတ်ဘုရားသားရဲပါ့ရှားသည် ကမ္ဘာတုန်သွားစေနိုင်သော ဟိန်းသံနှင့်အတူ မိစ္ဆာတစ်သောင်းလျှို့ဝှက်နယ်မြေကို ပျက်သုဉ်းခြင်းပင်လယ်မှ သယ်ထုတ်သွားသည်။

သူက ပျက်သုဉ်းခြင်းပင်လယ်၏ဖိနှိပ်မှုနှင့် ကြေးခွံနက်ငါးမိစ္ဆာများ၏ကျူးကျော်မှုမှ ထွက်သွားတော့မည်။

သူက ဤလောကကို မကာကွယ်နိုင်သောကြောင့် ထွက်သွားရန်ရွေးချယ်ခြင်းသည် လက်တွေ့အကျဆုံးဖြစ်သည်။

ထိုပြောင်းလဲမှုကြောင့် ကြေးခွံနက်ငါးမိစ္ဆာများသည် လမ်းပျောက်သွားခဲ့သည်။

သူတို့ အမြဲလိုချင်နေခဲ့သော လျှို့ဝှက်နယ်မြေကို ပါ့ရှားသည် ပျက်သုဉ်းခြင်းပင်လယ်မှ သယ်ထုတ်သွားတော့မည်။

ပျက်သုဉ်းခြင်းပင်လယ်တွင်ကျန်ရှိနေသော အာကာသလမ်းကြောင်းရှစ်ခုသည် တုန်ခါသွားပြီး ပေါင်းစပ်နေသည်။

လောကကို လွှမ်းမိုးနိုင်သောအလင်းတန်းတစ်ခု ပေါ်ထွက်လာသည်။ အလွန်အားကောင်းသော မိစ္ဆာတစ်ယောက်၏အရှိန်အဝါများ လှုပ်ရှားလာသည်။

ဝိညာဉ်သံချပ်ကာမိစ္ဆာကလန်၏ ပြိုင်ဘက်ကင်းကျွမ်းကျင်သူတစ်ဦး ရောက်လာသည်။

ဝိညာဉ်သံချပ်ကာမိစ္ဆာကလန်မှာ ကျွမ်းကျင်သူများမရှိခြင်းမဟုတ်ပေ။ သူတို့က ကျွမ်းကျင်သူများကိုအသုံးပြုရန် မလိုလားခြင်းဖြစ်သည်။

အလင်းတန်း၏စွမ်းအားသည် အလွန်သန်မာပြီး ရှေးခေတ်နတ်ဘုရားသားရဲများနှင့် ယှဉ်နိုင်သည်။

ထိုမိစ္ဆာမျိုးရောက်လာခဲ့လျှင် လျှို့ဝှက်နယ်မြေတွင်ရှိသောလူများက တားဆီးနိုင်မည်မဟုတ်ပေ။

ထို့အပြင် အာကာသလမ်းကြောင်းထဲတွင် အရှိန်အဝါတစ်ခုထက်ပိုပြီး ရှိနေသည်။

ပျက်သုဉ်းခြင်းပင်လယ်တွင် လှိုင်းထန်လာပြီး ကျွမ်းကျင်သူများဆင်းသက်လာခြင်းကို တားဆီးနေပုံရသည်။

သို့သော် မဟာမိစ္ဆာများ ဆင်းသက်လာတော့မည်။

“ဘုန်း”

ကြေးခွံနက်ငါးမိစ္ဆာများသည် ရေထဲမှပျံသန်းထွက်လာပြီး နတ်ဘုရားသားရဲပါ့ရှားကို ဝိုင်းရံလိုက်သည်။

သူတို့က ပါ့ရှား၏ ကောင်းကင်ထောက်တိုင်နှင့်တူသော ခြေထောက်များကြောင့် ခန္ဓာကိုယ်များပျက်စီးသွားခဲ့သော်လည်း ဂရုမစိုက်ပေ။

မရေမတွက်နိုင်သော ငါးမိစ္ဆာများသည် နတ်ဘုရားသားရဲပါ့ရှား၏လမ်းကို ပိတ်ဆို့ထားသည်။

ပါ့ရှားက ဟိန်းဟောက်သည်။ ထို့နောက် ပါးစပ်ဖွင့်ပြီး ရှေ့တွင်ရှိနေသော ငါးမိစ္ဆာများကို ဝါးမြိုလိုက်သည်။

ငါးမိစ္ဆာအများအပြားသည် ပါ့ရှား၏ဦးခေါင်းသို့ ပြေးဝင်လာသည်။ ပါ့ရှားက ဒေါသတကြီးဟိန်းဟောက်ပြီး ခေါင်းကိုလှုပ်ခါ၍ ငါးမိစ္ဆာများအားလုံးကို သတ်ဖြတ်သည်။

ငါးမိစ္ဆာများ သေသွားသောအခါတွင် ပိုမိုများပြားသောငါးမိစ္ဆာများ ထပ်မံတိုးဝင်လာသည်။

ယခုအချိန်တွင် ငါးမိစ္ဆာများသည် အစွမ်းကုန်ကြိုးစား၍ နတ်ဘုရားသားရဲပါ့ရှားကို တားဆီးနေသည်။

“နတ်ဘုရားသားရဲအတွက် လမ်းရှင်းပေးလိုက်”

ဟန်မူယဲ့က ခပ်အုပ်အုပ်အော်ဟစ်သည်။

အစိမ်းရောင်မြေခွေးနှင့် အသက်ကိုးခုကြောင်မိစ္ဆာများ ပျံသန်းသွားကြသည်။ သူတို့လက်ထဲတွင်ရှိသောဓားအလင်းသည် ဝင်္ကပါအဖြစ် ပြောင်းလဲသွားသည်။

ကလန်အသီးသီးမှ ကျွမ်းကျင်သူများသည် တုံ့ဆိုင်းခြင်းမရှိဘဲ အပြင်ဘက်သို့ ပျံထွက်သွားပြီး ငါးမိစ္ဆာများနှင့် ရင်ဆိုင်လိုက်သည်။

အရေးကြီးသောအချိန်သို့ ရောက်နေသည်။

အာကာသလမ်းကြောင်းအတွင်းမှ မဟာမိစ္ဆာများ ရောက်လာတော့မည်။ သူတို့ မလွတ်မြောက်နိုင်လျှင် ကပ်ဘေးကြီးတစ်ခုနှင့် ရင်ဆိုင်ရလိမ့်မည်။

ဟန်မူယဲ့၏မျက်နှာထားက လေးနက်နေသည်။

ဟယ်ထျန်းကျန်းက ပတ်ဝန်းကျင်ကို တွန့်ဆုတ်စွာကြည့်သည်။

ထို့နောက် သူက အဝေးတစ်နေရာတွင် ဟွမ်ကျစ်ဟူ၏နောက်သို့လိုက်နေသော ကောင်းကင်ကြိုးကြာများကို ကြည့်သည်။

“ကောင်းကင်ကြိုးကြာသွေးမျိုးဆက်က ဘုံကိုးပါးကနေ ဆင်းသက်လာခဲ့တယ်”

“ငါတို့သွေးမျိုးဆက်ကို ကလန်ကြီးတွေရဲ့အစေခံ မဖြစ်စေချင်တဲ့အတွက် အင်မော်တယ်ရင်းမြစ်ကမ္ဘာကနေ ထွက်လာခဲ့တယ်”

ဟယ်ထျန်းကျန်းက ဟန်မူယဲ့ကို လှည့်ကြည့်သည်။

“ကောင်လေးဟန်၊ မင်းကို အဲဒီတောင်ပံတွေပေးလိုက်မယ်”

သူ့ခန္ဓာကိုယ်မှ ချီစွမ်းအင်အလင်းများ ပေါ်ထွက်လာသည်။

အားကောင်းသောလေဟာနယ်စွမ်းအားများ ပေါ်ထွက်လာပြီး ကမ္ဘာကို ဖျက်ဆီးနိုင်ပုံပေါ်သည်။

“သွမ်ကျိုးရှောင်က ငါ့ကို လင်းယုန်ငှက်တောင်ပံ ရှာပေးမယ်လို့ ပြောခဲ့တယ်။ အဲဒီကတိကို မမေ့လိုက်နဲ့”

ဟယ်ထျန်းကျန်း၏ခန္ဓာကိုယ်သည် ဧရာမကြိုးကြာဖြူတစ်ကောင်အဖြစ် ပြောင်းလဲသွားသည်။ သူ့နောက်ကျောတွင် ပုံရိပ်ယောင်တောင်ပံတစ်စုံရှိနေပြီး လောကကို လွှမ်းခြုံထားသည်။

“ငါက လေဟာနယ်ကိုဖြတ်သန်းပြီး ခရီးသွားနိုင်တယ်။ ဒါပေမဲ့ အိမ်မွေးသားရဲတစ်ကောင်အဖြစ်နဲ့ အင်မော်တယ်ရင်းမြစ်ကမ္ဘာမှာ ချုပ်နှောင်ခံခဲ့ရတယ်”

“ငါက လောကကိုလွှမ်းမိုးနိုင်ဖို့ မွေးဖွားလာတာပဲ”

ဟယ်ထျန်းကျန်းက အော်ဟစ်လိုက်သည်။ သူက ပုံရိပ်ယောင်တောင်ပံများကိုလှုပ်ရှားလိုက်ပြီး ရှေ့တွင် လေဟာနယ်အက်ကွဲကြောင်းတစ်ခု ဖန်တီးလိုက်သည်။

အက်ကွဲကြောင်းပေါ်လာသောအခါတွင် အာကာသ၏အငွေ့အသက်များ စိမ့်ဝင်လာသည်။

စွမ်းအားလှိုင်းတစ်ခုသည် အကောင်းဆုံးကြိုးစား၍ အက်ကွဲကြောင်းကို ပိတ်ဆို့ချင်သည်။

“ပွင့်စမ်း ....”

ဟယ်ထျန်းကျန်းက ရယ်မောလိုက်ပြီး တစ်ကိုယ်လုံး ပေါက်ကွဲသွားသည်။

အားကောင်းသောလေဟာနယ်စွမ်းအားများသည် လေဆင်နှာမောင်းတစ်ခုအဖြစ်ပြောင်း၍ လောကကို ထိုးခွဲလိုက်သည်။

ပုံရိပ်ယောင်ဆန်သော ကြယ်ကောင်းကင်ကို မြင်နိုင်သည်။

အဆုံးမရှိသော အာကာသတစ်ခုဖြစ်သည်။

နတ်ဘုရားသားရဲပါ့ရှားသည် ထိုလောကသို့ ပြေးဝင်သွားနိုင်လျှင် ရှင်သန်နိုင်ရန် အခွင့်အရေးရှိလိမ့်မည်။

“ဒါက ထိုက်တန်ရဲ့လား”

ဟန်မူယဲ့က သူ့ရှေ့တွင်ရှိသော ပုံရိပ်ယောင်ကိုကြည့်လိုက်ပြီး ညင်သာစွာမေးသည်။

ဟယ်ထျန်းကျန်း၏ပုံရိပ်သည် အချိန်မရွေးပျက်စီးသွားနိုင်သကဲ့သို့ မှိန်ဖျော့နေသည်။

ဟန်မူယဲ့၏စကားကို ကြားလိုက်ရသောအခါတွင် ဟယ်ထျန်းကျန်းက ပြုံးလိုက်ပြီး ခေါင်းခါသည်။

“အင်မော်တယ်ရင်းမြစ်ကမ္ဘာမှာ နှစ်ပေါင်းမရေမတွက်နိုင်အောင် ကျင့်ကြံထားတဲ့ အင်မော်တယ်တွေရှိတယ်။ သူတို့က ထူးခြားပြီး အလိုဆန္ဒတွေမရှိဘူး။ သူတို့က နှလုံးသားကင်းမဲ့တယ်”

“ငါက အဲ့ဒီလိုကျင့်ကြံခြင်းမျိုးကို အထင်သေးတယ်”

“ငါက လွတ်လပ်ချင်တယ်။ လောကကြီးက ကျယ်ပြန့်တယ်။ ငါက ခရီးသွားချင်တယ်”

“ငါက ဒီကမ္ဘာကို ရောက်လာခဲ့တဲ့အချိန်မှာ သွမ်ကျိုးရှောင်က နတ်ဘုရားသားရဲပါ့ရှားရဲ့ သွေးမျိုးဆက်နဲ့ ငါ့ကို အမြန်နှုန်းမှာ အနိုင်ယူခဲ့တယ်။ ငါ့တောင်ပံတွေကိုဖြတ်တောက်ဖို့ ရန်စခဲ့တယ်”

“သွမ်ကျိုးရှောင်က ငါ့ကို ဒီကမ္ဘာမှာ ပိတ်ထားခဲ့တယ်။ ငါက ဒီကမ္ဘာနဲ့ ဆက်သွယ်မှုရှိတယ်လို့ မင်းပြောနိုင်တယ်”

ဟယ်ထျန်းကျန်းက အောက်သို့ငုံ့ကြည့်သည်။ အောက်တွင် မရေမတွက်နိုင်သောမိစ္ဆာများ ရှိနေသည်။

ထိုမိစ္ဆာများသည် ကြောက်ရွံ့နေသောမျက်နှာထားဖြင့် မော့ကြည့်ရုံသာ တတ်နိုင်သည်။

သူတို့၏ကံကြမ္မာကို မသိနိုင်တော့ပေ။

ကမ္ဘာတစ်ခုလုံးကို ပျက်စီးသွားစေနိုင်သော ကပ်ဘေးမျိုးတွင် ခွန်အားမရှိသောမိစ္ဆာများသည် မည်သည့်အရာမှ မလုပ်နိုင်ပေ။

‘သန်မာတဲ့လူတွေက အားနည်းတဲ့လူရဲ့ကံကြမ္မာကို တာဝန်ယူပေးရမယ်”

ဟန်မူယဲ့က ညင်သာစွာပြောသည်။

ထိုအရာသည် ကျွမ်းကျင်သူတစ်ဦး၏ တာဝန်ဖြစ်သည်။

သူက ယခုအချိန်တွင် ကောင်းကင်တာအိုကို ထိန်းချုပ်ထားသောကြောင့် ဤကမ္ဘာတွင်ရှိသောသက်ရှိများကို ကာကွယ်ပေးရန် တာဝန်ရှိသည်။

သူက လက်မြှောက်လိုက်သောအခါတွင် ရွှေရောင်ချီစွမ်းအင်အလင်းက ဟယ်ထျန်းကျန်းကို လွှမ်းခြုံသွားသည်။

ရွှေအလင်းသည် အောက်သို့ကျဆင်းသွားပြီး ပေတစ်ရာရှည်လျားသော အပြာရောင်ကျောက်တုံးတစ်တုံး ဖြစ်သွားသည်။

နှစ်ထောင်ချီအကြာတွင် ဟယ်ထျန်းကျန်း၏ဝိညာဉ်သည် ပြန်လည်နိုးထလာနိုင်လိမ့်မည်။

“အခွင့်အရေးရှိရင် ခင်ဗျားအတွက် လင်းယုန်ငှက်တောင်ပံတစ်စုံ ရှာပေးထားမယ်”

ဟန်မူယဲ့က တီးတိုးရေရွတ်လိုက်ပြီး အဝေးသို့ကြည့်သည်။

မိစ္ဆာအလင်းတန်းသုံးခု ပေါ်ထွက်လာသည်။

ရှေးခေတ်နတ်ဘုရားသားရဲနှင့်ယှဉ်နိုင်သော အားကောင်းသည့် ဝိညာဉ်သံချပ်ကာမိစ္ဆာများ ရောက်လာသည်။

ဟန်မူယဲ့က အောက်တွင်ရှိသော လျှို့ဝှက်နယ်မြေကို ငုံ့ကြည့်သည်။

“ဘုန်း”

သူ့လက်ဝါးထဲမှ အဆုံးမရှိသောလျှပ်စီးကြောင်းများ ပေါ်ထွက်လာသည်။

ကောင်းကင်လမ်းလျှောက်သူများကို လေဟာနယ်စွမ်းအားများက လွှမ်းခြုံလိုက်သည်။

ကောင်းကင်တာအိုစွမ်းအားသည် ချိပ်စည်းအမှတ်တံဆိပ်နှင့်ပေါင်းစပ်ပြီး အာကာသလမ်းကြောင်းများ ဖန်တီးခဲ့သည်။

ချိပ်စည်းအမှတ်တံဆိပ်သည် ကမ္ဘာတစ်ခုကို ပိတ်ဆို့ထားနိုင်ပြီး အာကာသလမ်းကြောင်းဖွင့်လှစ်ရန်အတွက် သော့ချက်လည်းဖြစ်သည်။

အာကာသလမ်းကြောင်းသည် ကောင်းကင်လမ်းလျှောက်သူများကို မူလကမ္ဘာသို့ ပြန်ပို့နိုင်သည်။

ထိုလမ်းကြောင်းမှတစ်ဆင့် ဟန်မူယဲ့က ကမ္ဘာများ၏တည်နေရာအမှတ်အသားကိုလည်း သိနိုင်သည်။

လေဟာနယ်စွမ်းအားနှင့်အတူ ပတ်ဝန်းကျင်တွင် အက်ကွဲကြောင်းများပေါ်လာသည်။

လျှို့ဝှက်နယ်မြေနှင့်မသက်ဆိုင်သော အပြင်လူများသည် ကိုယ်ပိုင်ကမ္ဘာ၏ဆင့်ခေါ်ခြင်းကို ခံစားလိုက်ရသည်။

“မွေးစားအဖေ”

ဟွမ်ကျစ်ဟူက စိုးရိမ်စိတ်များနှင့် အော်ခေါ်သည်။ သို့သော် သူမကို ယွင်တိက ဆွဲခေါ်သွားပြီး အက်ကွဲကြောင်းထဲသို့ ဝင်သွားသည်။

ဟန်မူယဲ့၏ အမိန့်ဖြစ်သည်။

ပိုင်ဝူဟန်က ဟန်မူယဲ့ကိုကြည့်လိုက်ပြီး ညင်သာစွာသက်ပြင်းချ၍ တီးတိုးပြောသည်။

“ဂရုစိုက်ပါ”

ထို့နောက် သူမက အက်ကွဲကြောင်းထဲသို့ ဝင်သွားသည်။

ကမ္ဘာအသီးသီးမှ လက်ရွေးစင်များ ထွက်သွားကြသည်။

“အင်မော်တယ်ဟန်၊ ဂရုစိုက်ပါ”

“အရှင်၊ ဂရုစိုက်ပါ”

လွန်ခဲ့သောနှစ်တွင် ဟန်မူယဲ့က မိစ္ဆာတစ်သောင်းတံဆိပ်ကိုကိုင်ထားခဲ့သည်။ သူက တိုက်ခိုက်နိုင်စွမ်းကောင်းပြီး မျှတသောလူတစ်ယောက် ဖြစ်သည်။

ခမ်းနားသောဓားဝင်္ကပါသည် ကမ်းခြေကို နေ့စဉ်ဖိနှိပ်ထားသည်။ လူတိုင်းက ထိုဓားဝင်္ကပါကို မှီခိုနိုင်သည်။

တိုက်ပွဲက ပြင်းထန်နေသော်လည်း ဓားဝင်္ကပါအသက်ဝင်လာလျှင် ကြေးခွံနက်ငါးမိစ္ဆာများ သေဆုံးသွားကြလိမ့်မည်။

ဟန်မူယဲ့က တိုက်ခိုက်နိုင်စွမ်းကောင်းသည့်အပြင် ရက်ရောပြီး ချဉ်းကပ်ရလွယ်သည်။

သူက အားလပ်ချိန်များတွင် အစွမ်းကုန်ကြိုးစား၍ ကျွမ်းကျင်သူများ၏ သွေးမျိုးဆက်အားဖြည့်ပေးရန်တောင်းဆိုမှုကို ကူညီပေးခဲ့သည်။

သူ့ကြောင့် လူအများ၏သွေးမျိုးဆက်စွမ်းအားသည် ကမ္ဘာတုန်လောက်သည်အထိ ပြောင်းလဲသွားခဲ့သည်။

“ဟန်မူယဲ့၊ အသက်ရှင်လျက်ပြန်လာခဲ့ပါ”

ချင်းရီမင်က အော်ဟစ်လိုက်ပြီး ဟန်မူယဲ့ကို လက်သီးဆုပ်၍ နှုတ်ဆက်သည်။

“မင်းပြန်လာရင် သေရည်သောက်ဖို့ ဖိတ်လိုက်မယ်”

ထိုသို့ဖြင့် သူက တစ်ဖက်သို့လှည့်ပြီး အက်ကွဲကြောင်းထဲသို့ ဝင်သွားသည်။

အနက်ရောင်ချပ်ဝတ် အံ့ဖွယ်နေမင်းကိုယ်ရံတော်များကလည်း ဦးညွှတ်လိုက်ပြီး ထွက်သွားသည်။

“ဘုန်း”

လူသားအသွင်ပြောင်းထားသော ကြေးခွံနက်ငါးမိစ္ဆာကျွမ်းကျင်သူသည် လက်ဝါးချက်ကို ထုတ်ဖော်ခဲ့သည်။

လက်ဝါးအရိပ်သည် လျှို့ဝှက်နယ်မြေတစ်ခုလုံးကို ဖုံးအုပ်ထားသည်။

လေဟာနယ်အက်ကွဲကြောင်းများသည် အချိန်မရွေးပျက်စီးသွားနိုင်သကဲ့သို့ တုန်ခါလာသည်။

ထွက်မသွားရသေးသော ကောင်းကင်လမ်းလျှောက်သူများသည် ဖြူဖျော့သွားကြသည်။

ဟန်မူယဲ့က ပြေးဝင်လာသောလူသုံးယောက်ကို ကြည့်လိုက်ပြီး ပြုံးသည်။

“ငါက မင်းတို့ကိုမတားနိုင်လို့ သူတို့ကို ပြန်လွှတ်လိုက်တယ် ထင်နေတာလား”

ဟန်မူယဲ့က ခေါင်းခါလိုက်ပြီး ခန္ဓာကိုယ်ထဲမှ ဓားအလင်းများပေါ်ထွက်လာသည်။

“သူတို့ရှိနေရင် မလွတ်လပ်မှာစိုးရိမ်မိရုံပါ”

သူ့မျက်လုံးများက ပြင်းထန်စွာတောက်ပနေပြီး ကမ္ဘာတစ်ခုလုံးကို လောင်ကျွမ်းပစ်နိုင်ပုံပေါ်သည်။

“ငါတို့က စိတ်ကျေနပ်သည်အထိ တိုက်ခိုက်နိုင်မယ်လေ”

သူက စကားပြောပြီးသောအခါတွင် ရတနာရှစ်မျိုးယုရီသည် ဓားရှည်တစ်လက်အဖြစ်ပြောင်းလဲပြီး ဓားဆေးလုံးများနှင့် ကောင်းကင်စက်ဝန်းဓားဝင်္ကပါကို ဖန်တီးသည်။ ဓားအလင်းသည် မိုင်ထောင်ချီအထိ ချက်ချင်းပျံ့နှံ့သွားသည်။

ဟန်မူယဲ့က ကောင်းကင်တာအိုနှင့် ပေါင်းစပ်ပြီးသောအခါတွင် သူ့တိုက်ခိုက်နိုင်စွမ်းသည် ဤကမ္ဘာ၏ အကန့်အသတ်သို့ ရောက်လာသည်။

သူက နည်းစနစ်များကို လမ်းညွှန်ပေးရန်သာလိုအပ်သည်။ လျှို့ဝှက်နယ်မြေသည် စွမ်းအင်ကုန်ဆုံးမှုကို ထောက်ပံ့ပေးလိမ့်မည်။

“ဓားတစ်သောင်းတို့အိမ်အပြန်နည်းစနစ်ရဲ့ ပထမအဆင့်၊ ဓားတစ်သောင်းကနေ ဓားတစ်လက်အဖြစ် စုစည်းခြင်း”

”ဓားတစ်သောင်းတို့အိမ်အပြန်နည်းစနစ်ရဲ့ ဒုတိယအဆင့်၊ ဓားတစ်လက်ကနေ ဓားတစ်သောင်းအဖြစ် ခွဲထွက်ခြင်း”

ဓားအလင်းသည် ပေါင်းစပ်သွားပြီး အဆုံးမရှိသောအလင်းစီးကြောင်းများကို ထုတ်ပေးသည်။

ဓားတစ်သောင်းသည် ဓားတစ်လက်အဖြစ် ချက်ချင်းပြောင်းသွားပြီး ခုတ်ချသည်။

ထိုဓားသည် လက်ဝါးချက်ကိုထိုးခွဲလိုက်ပြီး ဓားတစ်သောင်းအဖြစ်ပြန်ပြောင်း၍ တိုက်ခိုက်လာသော ပြိုင်ဘက်ကင်းကျွမ်းကျင်သူကို ဝိုင်းရံလိုက်သည်။

“အဲ့ဒါဆိုရင် တတိယအဆင့်ကရော”

ဟန်မူယဲ့က ရေရွတ်သည်။ ထောင်ချီနေသောဓားများသည် ပုံရိပ်ယောင်ဆန်လာပြီး သွယ်ယှက်နေသော ဓားချည်မျှင်များ ဖြစ်သွားခဲ့သည်။

ဓားချည်မျှင်များသည် ဓားတစ်လက်အဖြစ် ပုံသွင်းခံလိုက်ရသကဲ့သို့ စုစည်းလာသည်။ ထို့နောက် ဖြည်းဖြည်းချင်း အစိမ်းရောင်ဓားတစ်လက်အဖြစ် ပြောင်းသွားသည်။

ထိုဓားသည် သုံးပေရှည်ပြီး ဓားသွားသည် သန့်စင်နေသည်။

သူက သုံးပေရှည်သောဓားကိုမြှောက်ပြီး ရန်သူကို သတ်ဖြတ်မည်။

ဓားအလင်း ကျဆင်းလာခဲ့သည်။ ငါးမိစ္ဆာ၏မျက်နှာထားသည် ပြောင်းလဲသွားပြီး ကောင်းကင်ကိုဖုံးလွှမ်းနိုင်သော ဧရာမငါးတစ်ကောင် ဖြစ်သွားသည်။

သုံးပေရှည်သောဓားသည် ဧရာမငါးမိစ္ဆာကို ခုတ်ချသည်။

“ဓားရဲ့ထက်မြိမှုက ငါ့လက်ထဲမှာပဲ”

ဟန်မူယဲ့က တည်ငြိမ်သောမျက်နှာထားဖြင့် ညင်သာစွာပြောသည်။

ထိုအချိန်တွင် လျှို့ဝှက်နယ်မြေ၏ ကောင်းကင်ပေါ်တွင် ဧရာမဓားတစ်လက်ပေါ်လာပြီး ခုတ်ချသည်။

ဓား၏ထက်မြိမှုသည် ပြိုင်ဘက်ကင်းသည်။

ဓား၏ထက်မြိမှုကို မည်သည့်အရာက တားနိုင်မည်နည်း။