ဓားကြယ်မြို့

"သစ်ရွက်နီဓားသူတော်စင်အရှင်မ၊ ငါ မင်းကို စိန်ခေါ်တယ်"

မြစ်နက်ဓားသူတော်စင်အရှင်က လီဖူချန်းကို အနိုင်မယူနိုင်ပေမယ့် သစ်ရွက်နီဓားသူတော်စင်အရှင်မကို ရှုံးနိမ့်မယ်လို့တော့ မဆိုလိုပါဘူး။

သူက ယင်ယန်ဓားသူတော်စင်အရှင်နဲ့မတူဘူး၊ သူက မြစ်နက်ဓားတာအိုအရင်းမြစ်စွမ်းအားကြောင်းတစ်ခုနဲ့ ချိတ်ဆက်ထားခဲ့တယ်။

သူက စင်မြင့်ပေါ်ကို မရောက်ခင် သူ့ရဲ့ဓားအလင်းက အရင်ရောက်ရှိသွားပြီး သစ်ရွက်နီဓားသူတော်စင်အရှင်မကို တိုက်ခိုက်လာတယ်။ အနက်ရောင်လှိုင်းက ပုံရိပ်ယောင်ဖြစ်ပြီး တစ်ချိန်တည်းမှာပဲ အစစ်အမှန်ဆန်တယ်။

"ဒါဆိုလဲ လာစမ်း"

သစ်ရွက်နီဓားသူတော်စင်အရှင်မက သူမရဲ့ဓားကို ဝှေ့ယမ်းလိုက်ပြီး အနီရောင်သစ်ရွက်တွေက ဟင်းလင်းပြင်မှ ထွက်ပေါ်လာတယ်။ အနီရောင်သစ်ရွက်တွေက ရောက်တတ်ရာရာလွင့်မျောနေပြီး သစ်ရွက်တွေဖြတ်သန်းသွားရာနေရာတိုင်းမှာ သတ်ဖြတ်ခြင်းဆန္ဒတွေ ပြည့်နေတယ်။

ဝုန်း ဝုန်း ဝုန်း......

အနီရောင်သစ်ရွက်တွေ ပြန့်ကျဲသွားသလို အနက်ရောင်လှိုင်းတွေက ပေါက်ကွဲထွက်သွားတယ်။

သူတို့နှစ်ယောက်စလုံးက အရင်းမြစ်စွမ်းအားနဲ့ ချိတ်ဆက်ထားတယ်။ အခုဆိုရင် သူတို့က ခွန်အားချင်းယှဉ်ပြိုင်နေပြီး နှစ်ယောက်စလုံးရဲ့ဓားပညာက အဆင့်မြင့်တယ်။

အခြားစင်မြင့်လေးခုမှာလည်း စိန်ခေါ်သူတွေ ရှိလာတယ်။

စိန်ခေါ်သူတွေက အခြေခံအားဖြင့် အထွတ်အထိပ်သူတော်စင်အရှင်တွေပါပဲ။ သူတို့မှာ ထိပ်ဆုံးငါးယောက်ထဲဝင်ဖို့ အခွင့်အရေးမရှိပေမယ့် ဒီအခွင့်အရေးကို အသုံးပြုကာ ပြိုင်ဘက်ကင်းသူတော်စင်အရှင်တွေနဲ့ လေ့ကျင့်နိုင်တယ်။

"ငါက ကြယ်လည်ဓားသူတော်စင်အရှင်ပဲ။ ကျေးဇူးပြုပြီး ငါ့ကို လမ်းညွှန်မှုအချို့ပေးပါ"

လီဖူချန်းရဲ့စင်မှာ အထွတ်အထိပ်ဓားတာအိုသူတော်စင်အရှင်တစ်ယောက်က ရောက်ရှိလာတယ်။

"ကောင်းပြီ" လီဖူချန်းက ခေါင်းညိတ်လိုက်တယ်။

သတ္တိကိုစုစည်းပြီးနောက် ကြယ်လည်ဓားသူတော်စင်အရှင်က လီဖူချန်းကို တိုက်ခိုက်လာတယ်။

သူ့ရဲ့ဓားပညာက ကြယ်မြစ်တစင်းလည်ပတ်နေတာနဲ့တူပြီး အလွန်လှတယ်။

လီဖူချန်းက ဖလှယ်ပေးချင်ပေမယ့် သူက အချိန်အများကြီးလည်း မဖြုန်းလိုဘူး။ သူက ဓားကွက်ရဲ့ချို့ယွင်းချက်ကို လက်ညှိုးဖြင့် ညွှန်ပြလိုက်တယ်။

ရှုံးနိမ့်သွားရင်တောင် ကြယ်လည်သူတော်စင်အရှင်က မပျော်ရွှင်ခြင်းမရှိပါဘူး။ အဲအစား သူက လီဖူချန်းကို ဦးညွှတ်လိုက်တယ်"ကျေးဇူးအများကြီးတင်တယ်"

ဓားကွက်တစ်ခုမှာ ချို့ယွင်းချက်တစ်ခုရှိရင် မပြီးပြည့်စုံဘူးလို့ ဆိုလိုတယ်။ မပြီးပြည့်စုံတဲ့ဓားကွက်တစ်ခုကို တစ်ဝက်တစ်ပျက်အန္တိမအဆင့်သို့ မတွန်းပို့နိုင်ပါဘူး။

အချိန်ကုန်ဆုံးလာသလို တစ်ယောက်မှ အခြားစင်မြင့်လေးခုကို မယှဉ်နိုင်ပါဘူး။ လက်ရှိအချိန်ထိ သစ်ရွက်နီဓားသူတော်စင်အရှင်မနဲ့မြစ်နက်ဓားသူတော်စင်အရှင်တို့က တိုက်ခိုက်နေသေးတယ်။

သူတို့နှစ်ယောက်က အတော်လေးညီမျှနေပြီး ပွဲပြတ်ဖို့က သိပ်မလွယ်လှပါဘူး။

စောစောက ယင်ယန်ဓားသူတော်စင်အရှင်အပေါ် သူမရဲ့အောင်ပွဲကြောင့် ဖြစ်လောက်တယ်၊ သစ်ရွက်နီဓားသူတော်စင်အရှင်မက အရှိန်အဟုန်ပြန်ရလာပြီး သူမရဲ့တိုက်ခိုက်မှုက ပိုခက်ထန်လာတယ်။ နှစ်နာရီကြာပြီးနောက် သူမက မြစ်နက်ဓားသူတော်စင်အရှင်ရဲ့ခံစစ်ကို ချိုးဖြတ်ခဲ့ပြီး သူ့ရင်ဘက်အပေါ် ဓားဒဏ်ရာတစ်ခုကို ချန်ရစ်ထားခဲ့တယ်။

မြစ်နက်ဓားသူတော်စင်အရှင်က ရလဒ်ကို လက်ခံမလိုဘူးဖြစ်နေတယ်၊ သူက လျှို့ဝှက်အရိပ်ဓားသူတော်စင်အရှင်ကို ဆက်လက်ယှဉ်ပြိုင်ခဲ့တယ်။

ဒါပေမယ့် လျှို့ဝှက်အရိပ်ဓားသူတော်စင်အရှင်က သစ်ရွက်နီဓားသူတော်စင်အရှင်မထက်တောင် ပိုသန်မာတယ်။ သူက မြစ်နက်ဓားသူတော်စင်အရှင်ကို အနိုင်ယူဖို့ ဆယ့်ငါးမိနစ်မျှသာ ယူခဲ့ရတယ်။

အဆုံးမှာတော့ ဓားသူတော်စင်တွေ့ဆုံပွဲရဲ့ထိပ်ဆုံးငါးယောက်ကို ဆုံးဖြတ်ခဲ့ပြီးပါပြီ။ သူတို့က လီဖူချန်း၊ လေတိမ်ဓားသူတော်စင်အရှင်၊ လျှို့ဝှက်အရိပ်ဓားသူတော်စင်အရှင်၊ ခံစားချက်မဲ့ဓားသူတော်စင်အရှင်နဲ့ သစ်ရွက်နီဓားသူတော်စင်အရှင်မတို့ပါပဲ။

"ပြိုင်ဘက်ကင်းဓားတာအိုသူတော်စင်အရှင်တွေက တကယ်ကို မယုံနိုင်စရာပဲ။ သူတို့တိုက်ခိုက်တာကို ကြည့်ရုံနဲ့ ငါက ဈာန်ဝင်စားခြင်းများစွာကို ရရှိခဲ့တယ်"

"တစ်ဝက်တစ်ပျက်အန္တိမအဆင့်ဓားပညာတွေမှာ ရှေးဦးအရှိန်အဝါ ပါဝင်တယ်။ အဲဒါတွေကို အချိန်ကြာမြင့်စွာကြည့်ရှုခြင်းဖြင့် ဈာန်ဝင်စားခြင်းကို အလိုအလျောက်ထုတ်လုပ်လိမ့်မယ်"

ဓားသူတော်စင်တွေ့ဆုံပွဲက မကြီးမားဘူးဆိုပေမယ့် ပရိသတ်တွေကို နောက်နယ်ပယ်အား ရှင်းရှင်းလင်းလင်း မြင်တွေ့ခွင့်ပြုတယ်။

"မင်းတို့ငါးယောက်လုံး ပြင်ဆင်ထားကြ။ သုံးရက်အတွင်း ငါတို့တွေ ကျားအင်ပါယာကြယ်ပိုင်နက်ရဲ့ဓားကြယ်မြို့ဆီ သွားကြမယ်"

သက်တံကောင်းကင်ဘုံအရှင်က ပြုံးပြီး သူ့မျက်လုံးတွေက လီဖူချန်းအပေါ် တစ်ခဏရပ်တန့်သွားတယ်။

"ဒီလိုအားကောင်းတဲ့ဓားတာအိုသူတော်စင်အရှင်တစ်ယောက်ကို မြင်တွေ့ဖို့က ရှားတယ်။ ဖြစ်နိုင်တာက သူက ဓားရေကန်ရဲ့တတိယစည်းဝိုင်းအထိ ဝင်ရောက်နိုင်လိမ့်မယ်"

အတိတ်တုန်းက မြင့်မြတ်နှလုံးသားဓားသူတော်စင်အရှင်က ဓားရေကန်ရဲ့အဌမစည်းဝိုင်းကိုသာ ဝင်ရောက်နိုင်ခဲ့တယ်။ လေတိမ်ဓားသူတော်စင်အရှင်နဲ့အခြားသူတွေက အပြင်ဘက်အကျဆုံးဒသမစည်းဝိုင်းမှာသာ ကျန်ရစ်နေခဲ့ရတယ်။

ဒါပေမယ့် ထိုအချိန်တုန်းက မြင့်မြတ်နှလုံးသားဓားသူတော်စင်အရှင်က အရင်းအမြစ်စွမ်းအားနဲ့ မချိတ်ဆက်ရသေးပါဘူး။

နောက်သုံးရက်ကြာပြီးနောက် ဓားသမားအစည်းအရုံးရဲ့လျှို့ဝှက်ခန်းမတစ်ခုအထဲမှာ။

"ဒါက ကြယ်ပိုင်နက်တည်နေရာရွှေ့ပြောင်းရေးအစီအရင်တစ်ခုပဲ။ ဒါက တစ်ယောက်ချင်းစီကို ပို့ဆောင်ဖို့အတွက် အထွတ်အထိပ်အဆင့်ဝိညာဉ်ကျောက်တုံးတစ်ဘီလီယံကို လိုအပ်လိမ့်မယ်။ မင်းတို့ငါးယောက် ဓားကြယ်မြို့ကို ရောက်ရှိတာနဲ့ တစ်ယောက်ယောက်က ထို‌နေရာမှာ မင်းတို့ကို လက်ခံလိမ့်မယ်။ ငါ လိုက်သွားမှာမဟုတ်ဘူး"

သက်တံဖြူကောင်းကင်ဘုံအရှင်က အထွတ်အထိပ်အဆင့်ဝိညာဉ်ကျောက်တုံးတစ်ဘီလီယံကို တတ်နိုင်ပေမယ့် အဲဒါက မလိုအပ်ပါဘူး။

"တစ်ယောက်စီအတွက် အထွတ်အထိပ်အဆင့်ဝိညာဉ်ကျောက်တုံးတစ်ဘီလီယံတောင်လား" ကြယ်ပိုင်နက်တည်နေရာရွှေ့ပြောင်းရေးအစီအရင်တစ်ခုကို အသုံးပြုဖို့ ဒီလောက်ဈေးကြီးမယ်လို့ လီဖူချန်းက မမျှော်လင့်ထားခဲ့ဘူး။

ကြယ်ပိုင်နက်တွေအတွင်းမှာ တည်နေရာရွှေ့ပြောင်းနိုင်ဖို့အတွက် ဈေးအကြီးဆုံးတည်နေရာရွှေ့ပြောင်းမှုက ထောင်သောင်းအနည်းငယ်ဖြစ်လိမ့်မယ်။ အချို့ခရီးတိုတည်နေရာရွှေ့ပြောင်းရေးတွေဆိုရင် အထွတ်အထိပ်အဆင့်ဝိညာဉ်ကျောက်တုံးငါးတုံးဆယ်တုံးက လုံလောက်ပါပြီ။

ဒါပေမယ့် သူတို့က ကပ်လျက်ကြယ်ပိုင်နက်တစ်ခုကို တည်နေရာရွှေ့ပြောင်းနေတာ မဟုတ်ဘူး၊ အဝေးကြီးမှာတည်ရှိတဲ့ကျားအင်ပါယာကြယ်ပိုင်နက်ဆီကို ရွှေ့ပြောင်းနေတာလေ။ ဒါကြောင့် ကုန်ကျစရိတ်က အများကြီးပိုမြင့်တယ်။

သူတို့ငါးယောက်က တည်နေရာရွှေ့ပြောင်းရေးအစီအရင်မှာ မတ်တပ်ရပ်ပြီးတာနဲ့ ၎င်းကို အသက်သွင်းလိုက်တော့တယ်။

အလင်းတိုင်တစ်ခုက ကောင်းကင်ကို ထိုးတက်သွားပြီး ဟင်းလင်းပြင်ကို ဝင်ရောက်သွားတယ်။

အလင်းတိုင်ထဲမှာ လူတိုင်းက မလှုပ်ရှားနိုင်ဖြစ်ပြီး သူတို့က သူတို့ရဲ့အတွေးကိုတောင် မလှည့်ပတ်နိုင်ဘူးဖြစ်နေတယ်။

ဒါပေမယ့် လီဖူချန်းကတော့ ချွင်းချက်တစ်ခုပေါ့၊ သူက သူ့ရဲ့စိတ်ဝိညာဉ်စွမ်းအားကို ထုတ်လွှတ်နိုင်တယ်။ အရင်ဦးဆုံး သူက တလက်လက်တောက်ပနေတဲ့ကြယ်ကောင်းကင်တစ်ခုကို မြင်လိုက်ရတယ်၊ ပြီးနောက် အဆုံးမဲ့အမှောင်ထုနဲ့ရှေးဦးနေရာလပ်ဇုန်ကိုပေါ့။

"အရှေ့ယူနီကွန်တိုက်ကြီး.....ထိုအင်းဆက်စစ်မြေပြင်က ကြယ်ပိုင်နက်တွေကြား နေရာလပ်ဇုန်တစ်ခုလား"

ကြယ်ပိုင်နက်တွေကြားမှာ အဆုံးမဲ့အမှောင်ရှေးဦးနေရာလပ်ဇုန်တစ်ခုရှိတယ်။ အတွင်းမှာ ကြယ်တစ်လုံးလုံးကို မြင်တွေ့ဖို့က အလွန်ခက်ခဲတယ်၊ ကြယ်တွေရှိရင်တောင် ကြယ်ပိုင်နက်ရဲ့ကမ္ဘာဆွဲအားမှလမ်းကြောင်းပြောင်းလာတဲ့ကြယ်အပျက်အစီးတွေ ဖြစ်ပါလိမ့်မယ်။

…

ကျားအင်ပါယာကြယ်ပိုင်နက်.....ဓားကြယ်မြို့။

ဒါက အလွန်ခမ်းနားကြီးကျယ်တဲ့မြို့ကြီးတစ်ခုပဲ။ မြို့ရဲ့အလယ်မှာ ဧရာမဓားတစ်လက်ရှိပြီး ဓားကို အဆုံးမဲ့ကြယ်တွေနဲ့ ဝန်းရံထားတယ်။

ဓားကြယ်မြို့ရဲ့ရင်ပြင်တွေထဲကတစ်ခုပေါ်မှာ ကြယ်ပိုင်နက်တည်နေရာရွှေ့ပြောင်းရေးအစီအရင်မျိုးစုံရှိတယ်။ ဒီကြယ်ပိုင်နက်တည်နေရာရွှေ့ပြောင်းရေးအစီအရင်တွေကို သုံးကာ အမျိုးမျိုးသောကြယ်ပိုင်နက်တွေဆီ တည်နေရာရွှေ့ပြောင်းနိုင်တယ်။

ဒီနေ့ခင်းပိုင်းမှာတော့ ကြယ်ပိုင်နက်တည်နေရာရွှေ့ပြောင်းရေးအစီအရင်တွေထဲကတစ်ခုက လင်းလက်သွားပြီး လီဖူချန်းတို့အဖွဲ့က ပေါ်ထွက်လာတယ်။

"ဒါက ဓားကြယ်မြို့လား"

သူတို့ငါးယောက်က ခေါင်းမော့လိုက်တယ်၊ ကောင်းကင်ထိတိုင်ရောက်ရှိနေတဲ့ဧရာမဓားကို မြင်တွေ့လိုက်မိတယ်။ ဓားရဲ့ပတ်ပတ်လည်မှာ အဆုံးမဲ့ကြယ်တွေက ဖြည်းဖြည်းချင်း လှည့်ပတ်နေတယ်။

"ဒီနေရာရဲ့ဓားချီက သိပ်သည်းလွန်းတယ်" လျှို့ဝှက်အရိပ်ဓားသူတော်စင်အရှင်က ကွဲပြားချက်ကို ချက်ချင်းသတိပြုမိသွားတယ်။

လေတိမ်ဓားသူတော်စင်အရှင်က ခေါင်းညိတ်လိုက်တယ်"ဓားကြယ်မြို့က ဓားသမားမြို့တစ်ခုပဲ။ ဒီနေရာရဲ့တစ်ဝက်ကျော်က ဓားသမားတွေကြီးပဲ။ ဒီလောာက်များတဲ့ဓားသမားတွေ စုဝေးနေမှတော့ ကောင်းကင်တာအိုရဲ့လှည့်ပတ်မှုကို သက်ရောက်ဖို့ လုံလောက်တယ်"

"အကြိုနတ်ဘုရားတွေကတောင် ဒီမြို့ကို ကျူးကျော်ဖို့ မဖြစ်နိုင်ဘူး" သစ်ရွက်နီဓားသူတော်စင်အရှင်မက ခန့်မှန်းလိုက်တယ်။

"တိုက်စစ်နဲ့ခံစစ်က စုစည်း‌မှုရှိတယ်။ မဆိုးဘူးပဲ"

လီဖူချန်းရဲ့မျက်လုံးတွေက ဧရာမဓားပေါ်မှာ ရှိတယ်။ ဧရာမဓားက ကြောက်စရာကောင်းတယ်လို့ သူ့ရဲ့မသိစိတ်က သူ့ကို ပြောပြခဲ့တယ်။ ၎င်းရဲ့စွမ်းပကားကို ထုတ်လွှတ်ရင် ကမ္ဘာကို ဖျက်ဆီးနိုင်တယ်။

"မင်းတို့က ကန့်လန့်ဖြတ်မြစ်ကြယ်ပိုင်နက်ကလား" သူတို့ငါးယောက်ရောက်ရှိလာချင်းချင်း ဓားတာအိုသူတော်စင်အရှင်တစ်ယောက်က သူတို့ကို လာရောက်ကြိုဆိုလာတယ်။

"ဟုတ်ပါတယ်" လေတိမ်ဓားသူတော်စင်အရှင်က ခေါင်းညိတ်လိုက်တယ်။

"ဓားရေကန်ဖွင့်ဖို့ တစ်လကျန်သေးတယ်။ မင်းတို့ရဲ့နေရာထိုင်ခင်းအတွက် ငါ စီစဉ်ထားပေးပြီးပြီ"

သူတို့က စကားပြောနေရင်း ဒီဓားတာအိုသူတော်စင်အရှင်ကို တစ်ဟုန်မူလဓားသူတော်စင်အရှင်လို့ခေါ်ပြီး ဓားကြယ်မြို့ရဲ့ဓားသမားအစည်းအရုံးရဲ့တာဝန်ခံတစ်ယောက်ဆိုတာကို သိလိုက်တယ်။

ကြယ်ပိုင်နက်အဆင့်ဓားသမားအစည်းအရုံးတွေနဲ့မတူညီတာကတော့ ကြယ်စုအဆင့်ဓားသမားအစည်းအရုံးတွေမှာ ပုံမှန်အဖွဲ့ဝင်တွေရဲ့အထက်မှာ တာဝန်ခံတွေရှိတယ်။ သူတို့က ကြယ်ပိုင်နက်အားလုံးမှာ အဖွဲ့ဝင်တွေကို လက်ခံဖို့ တာဝန်ရှိတယ်။ သူတို့ရဲ့အလုပ်တာဝန်တွေကြောင့် သူတို့ကို အထွတ်အထိပ်အဆင့်ဝိညာဉ်ကျောက်တုံးတွေ ပေးချေရတယ်။

လမ်းတစ်လျှောက်မှာ သူတို့ငါးယောက်က ပြိုင်ဘက်ကင်းဓားသူတော်စင်အရှင်မြောက်များစွာကို မြင်တွေ့နေရတယ်။

တစ်ဟုန်မူလဓားသူတော်စင်အရှင်က မိတ်ဆက်လိုက်တယ်" ဒါက လေမုန်တိုင်းကြယ်ပိုင်နက်ရဲ့ကမ္ဘာဦးဓားသူတော်စင်အရှင်ပဲ။ ဒီအချိန်အတောအတွင်း သူက ပြိုင်ဘက်ကင်းဓားတာအိုသူတော်စင်အရှင်ကိုးဆယ်‌ကျော်ကို အနိုင်ယူထားခဲ့တယ်။ သူ့အနေနဲ့ ဓားရေကန်ရဲ့ဒုတိယစည်းဝိုင်းကို ဝင်ရောက်ဖို့ အခွင့်အရေးတစ်ခုရှိတယ်"

"ဒုတိယစည်းဝိုင်းလား" သစ်ရွက်နီဓားသူတော်စင်အရှင်မက သိချင်စိတ်ပြင်းပျသွားတယ်။

တစ်ဟုန်မူလဓားသူတော်စင်အရှင်က ရှင်းပြလိုက်တယ်"ဓားရေကန်မှာ စည်းဝိုင်းဆယ်ဝိုင်းရှိတယ်။ ဝိုင်းပိုငယ်လေ၊ ကျင့်ကြံခြင်းအကျိုးသက်ရောက်မှုက ပိုကောင်းလေဖြစ်တယ်။ ပုံမှန်အားဖြင့် တတိယစည်းဝိုင်းကို ဝင်နိုင်တယ်ဆိုတာကတော့ အသာလွန်ဆုံးပြိုင်ဘက်ကင်းဓားတာအိုသူတော်စင်အရှင်ကို ဆိုလိုတယ်။ တစ်ယောက်ယောက်က ပထမစည်းဝိုင်းမှာ ကျင့်ကြံနိုင်ရင် သူတို့က ဓားတာအိုသူတော်စင်အရှင်တွေရဲ့အထွတ်အထိပ်မှာရပ်တည်နိုင်လိမ့်မယ်။ ကြယ်စုတစ်ခုလုံးမှာ ဒီလိုပုဂ္ဂိုလ်မျိုးက ငါးယောက်အောက်သာ ရှိတယ်"

"ဒီလိုလား" သစ်ရွက်နီဓားသူတော်စင်အရှင်မက လီဖူချန်းကို လှည့်ကြည့်လိုက်တယ်၊ လီဖူချန်းက ဘယ်စည်းဝိုင်းအထိ ဝင်နိုင်မလဲကို သူမက သိချင်လာမိတယ်။