တိုက်ပွဲ

“ကောင်းပါပြီ။ မင်းရဲ့ဖြေကြားမှုအတွက် ကျေးဇူးတင်ပါတယ်။”

ဖီးနစ်နီက ပြုံးပြီး ဟောက်ထျန်းကို လှည့်လိုက်တယ်။ "ဒဏ္ဍာရီ ဟောက်ထျန်း၊ ဒီနေ့ပွဲမှာ မင်းအနိုင်ရမယ်လို့ မင်းယုံကြည်လား"

“မင်းတွေ့မှာပါ။” ဟောက်ထျန်းက အစီအစဉ်မှူးကို ဂရုမစိုက်ဘဲ သူ့မျက်နှာက ဤသို့ပြောနေ၏ 'ငါအခု အာရုံစိုက်နေတယ်၊ ကျေးဇူးပြုပြီး ငါ့ကို မနှောင့်ယှက်ပါနဲ့။'

သူက အမြဲတမ်း အေးအေးဆေးဆေး နေတတ်သူဖြစ်ပြီး တိုက်ပွဲမစခင် တွေ့ဆုံမေးမြန်းတာကို ဘယ်တုန်းကမှ မကြိုက်ခဲ့ပေ။ တိုက်ပွဲမတိုင်မီ သူ၏စိတ်အခြေအနေကို ပြင်ဆင်ရန် အချိန်ကိုအသုံးပြုခြင်းသည် ပရော်ဖက်ရှင်နယ် လုပ်ရမည့်အရာဖြစ်သည်ဟု သူခံစားခဲ့ရသည်။

ထို့အပြင် သူ၏ပြိုင်ဘက်မှာ ကြယ်စင်စစ်တုရင်ဖြစ်သည်။ ဟောက်ထျန်းက သူ့အကြောင်း ဘာမှတ်ချက်မှ မပေးပေ။ ပရော်ဖက်ရှင်နယ် အသိုင်းအဝိုင်းတွင် ကြယ်စင်စစ်တုရင်သည် အငြိမ်းစားယူပြီးနောက် ၎င်း၏လုပ်ငန်းကို စတင်ခဲ့ကြောင်း လူတိုင်းသိကြသော်လည်း ၎င်း၏လုပ်ငန်းမှာ ဆိုးရွားပြီးနောက် ပြိုင်ပွဲအတွက် ပြန်လည်ဝင်ရောက်လာခဲ့သည်။ သူသည် သူ၏ကျော်ကြားမှုကို ငွေသားအချို့အဖြစ် ပြောင်းလဲရန် အသုံးပြုလိုသည်မှာ ထင်ရှားသည်။

မတူညီသည့်လမ်းကို လျှောက်ခဲ့ကြတာမို့ ဘာမှပြောစရာ ရှိမနေပေ။

ပရိသတ်အားလုံး ရယ်မောကြသည်။ ဟောက်ထျန်း၏ ပင်ကိုယ်စရိုက်ကို သူတို့ သိကြပြီး အားလုံးက သူ၏ အေးဆေးတည်ငြိမ်သော အမူအရာကို ကြည့်ရတာ နှစ်သက်ကြသည်။

ဖီးနစ်နီ၏ မျက်နှာသည် မည်သို့တုံ့ပြန်ရမည်ကို မသိသောကြောင့် အေးခဲသွားသည်။ သို့သော်လည်း သူမသည် ပရော်ဖက်ရှင်နယ်လိဂ်တွင် အတွေ့အကြုံအရှိဆုံး အစီအစဉ်မှူးများထဲမှ တစ်ဦးဖြစ်သဖြင့် သူမ၏ အဆင်မပြေမှုများကို မျိုသိပ်ကာ ဟောက်ထျန်းထံမှ ကျောခိုင်းလိုက်သည်။ “ကောင်းပြီ။ နှစ်ဦးစလုံး အနိုင်ရမည်ဟု ယုံကြည်နေပုံရတယ်။ စက္ကန့်သုံးဆယ် ရေတွက်မှုကို စလိုက်ကြရအောင်၊ သုညရောက်တာနဲ့ ပြိုင်ပွဲက တရားဝင်စတင်တော့မှာ ဖြစ်ပါတယ်!"

ဖန်သားပြင်တွင် စက္ကန့်သုံးဆယ်ကြာ အချိန်တိုင်းကိရိယာကို ပြသခဲ့ပြီး ကွင်းအတွင်းရှိ ပရိသတ်များအားလုံး ငြိမ်သက်သွားကာ ထောင်သောင်းချီသော မျက်လုံးများက ကွင်းပေါ်ရှိ လူနှစ်ယောက်ကို အာရုံစိုက်နေကြသည်။

စိတ်လှုပ်ရှားစရာကောင်းသော လေထုသည် ကွင်းနှင့် အားကစားကွင်းကို အေးခဲစေသည်။

ရေတွက်နေစဉ်အတွင်း ဒိုင်လူကြီးများက ပွဲအကြိုသုံးသပ်ချက်ကို စတင်လိုက်သည်။

"သူတို့နှစ်ယောက်လုံးက ‘တိုက်ခိုက်သူ’အတန်းအစားထဲက ဖြစ်ပုံရပြီး သူတို့နှစ်ယောက်လုံးက အဆင့် ၄၆ ပါ။ သူတို့က တူညီတဲ့အဆင့်မှာ ရှိနေတဲ့အတွက် မြင့်မားတဲ့အဆင့် ‘တိုက်ခိုက်သူ’တိုက်ပွဲကို မြင်တွေ့ရဖို့ မျှော်လင့်နိုင်ပါတယ်။ ဒါက မျိုးဆက်နှစ်ခုကြားက တိုက်ပွဲဖြစ်ပြီး၊ ဒီတိုက်ပွဲဟာ အခမ်းအနားတစ်ခုလို့ ခံစားရတယ်။ ဟောက်ထျန်းရဲ့ မရေမတွက်နိုင်သော နိုင်ပွဲများမှ အကဲဖြတ်ရရင် သူက အထွတ်အထိပ် အခြေအနေတွင် ရှိနေသည်ကို သံသယ ရှိစရာ မလိုပါဘူး။ ဒါ့အပြင်၊ ကြယ်စင်စစ်တုရင်က အခင်းအကျင်ကနေ ငါးနှစ်ကြာဝေးကွာပြီးနောက် သူ့ရဲ့ပုံစံကို ဆက်ထိန်းထားနိုင်ပါမလားဆိုတာကို စိုးရိမ်မိတယ်။"

အခြားဒိုင်လူကြီးက “အဲဒါကို စိတ်ပူစရာ မလိုပါဘူး။ ပရိုတွေအားလုံးက ပွဲမစမီခင် သူတို့ရဲ့ ကိုယ်ပိုင်အခြေအနေ ချိန်ညှိနည်းကို သိကြပြီးတော့ ကြယ်စင်စစ်တုရင်က ဝါရင့်ပြီးသားပါ၊ ဆိုလိုတာက ဟောက်ထျန်းထက် အတွေ့အကြုံပိုရှိသူဖြစ်တယ်။ ဒါက ပြင်းထန်တဲ့ မီးကုန်ယမ်းကုန်တိုက်ပွဲ ဖြစ်လိမ့်မယ်လို့ ခံစားမိပါတယ်”

ဟန်ရှောင်းက ထထိုင်ပြီး ကျောကို တည့်မတ်ကာ ကွင်းပေါ်ရှိ အုံ့မှိုင်းနေသော လေထုကို ကြည့်လိုက်သည်။ ဟောက်ထျန်းကို အကြာကြီး လေ့ကျင့်ပြီးနောက် ရလဒ်ကို မြင်ရဖို့ အချိန်တန်ပြီ။

“သုံး…နှစ်…တစ်…”

ဒိုင်း!

ရေတွက်မှု ပြီးသည်နှင့် ဟောက်ထျန်းက သူ့ခြေထောက်တွေကို မြေပြင်ကိုနင်းပြီး သူ့ခန္ဓာကိုယ်ကို စွမ်းအင်များ ဖုံးအုပ်ကာ တင့်ကားတစ်စီးလို ရန်သူထံ တဟုန်ထိုး ထိုးဖောက်ဝင်ရောက်သွားသည်။

ဘုန်း! ဗုန်း! ဘန်း!

‘တိုက်ခိုက်သူ’နှစ်ယောက်က လက်သီးချင်းဖလှယ်ကာ အပြန်အလှန် ကန်ကျောက်ကြသည်။ နှစ်ယောက်သား ခန္ဓာကိုယ်ပေါ် ကျရောက်လာသော လက်သီးသံများက နက်နဲ ကျယ်လောင်လှ၏။ သွေးတန်း၊ စွမ်းအင်ဘားနှင့် သက်လုံဘားကဲ့သို့သော နှစ်ဖက်စလုံး၏ အခြေအနေဘားများ ကျဆင်းသွားသည်ကို ပရိသတ်က မြင်နိုင်သည်။

ဝါရင့်ကစားသမားများသည် ဗီဒီယိုဂိမ်းထဲတွင် ဆော့နေသလို ခလုတ်အားလုံးကို ရိုက်ချိုးလေ့ရှိသည့် ကစားသမား အသစ်များကဲ့သို့ တိုက်ပွဲဝင်မည်မဟုတ်ပေ။ ‘တိုက်ခိုက်သူ’များအကြား အောက်ခြေအဆင့်တိုက်ပွဲတွင်ပင်၊ buffs မြင့်တင်မှုများကို ဆက်လက်အသက်သွင်းရန်အတွက် စကေးများ ချိန်ကိုက်အသုံးပြုမှုနှင့် စွမ်းအင်ဖြန့်ဝေနည်းတို့ကို နားလည်ရန်မှာ မရှိမဖြစ်လိုအပ်ပါသည်။ ၎င်းတို့သည် ရှောင်တိမ်းခြင်း နည်းစနစ်များကိုလေ့လာရန်၊ အချိန်ကိုက်မှုကို ပြန်လည်သတ်မှတ်ရန်၊ ပျက်စီးဆုံးရှုံးမှု တွက်ချက်ခြင်းနှင့် ကျွမ်းကျင်မှု ပြန်သုံးနိုင်မှုအချိန်တို့ကိုလည်း သင်ယူရန်လိုအပ်သည်။

လက်ရွေးစင်များ၏ တိုက်ပွဲတွင်၊ အသေးစိတ် အချက်အလက်လေးများက အောင်မြင်သူကို ဆုံးဖြတ်နိုင်သည်။

ကွင်းထဲရှိ လူနှစ်ဦးကြား တိုက်ပွဲသည် တိုက်ခိုက်ရေးသမား နှစ်ဦးစလုံး၏ သိမ်မွေ့သော နည်းစနစ်များဖြင့် ပြည့်နှက်နေသည်။ အချို့သော ပရိသတ်များက နားလည်သော်လည်း အခြားသူများက နားမလည်ကြပေ။ အဆုံးတွင်၊ နည်းစနစ်များကို ဖော်ထုတ်နိုင်လျှင် အရေးမကြီးပေ၊ ပရိသတ်အားလုံးသည် ပရော်ဖက်ရှင်နယ်တိုက်ပွဲတစ်ခုရှိ အထူးအငွေ့အသက်ကို ခံစားကြရသည်။

၎င်းကို စကားလုံးတစ်လုံးတည်းဖြင့် ဖော်ပြနိုင်သည် - တည်ငြိမ်ခြင်း။

သူတို့၏ အခြေအနေပြဘားများ ကျဆင်းမှုနှုန်းသည် သာမန်ကစားသမားများကြား တိုက်ပွဲထက် နှေးကွေးသည်။ ဆိုလိုသည်မှာ ကစားသမားနှစ်ဦးစလုံးသည် ရန်သူထံမှ တိုက်ခိုက်မှုအများအပြားကို ရှောင်လွှဲနိုင်သော သေးငယ်သောနည်းစနစ်များစွာကို အသုံးပြုခဲ့သည်ဟု ဆိုလိုသည်။ ဒါက ပရော်ဖက်ရှင်နယ် ကစားသမားများနှင့် သာမန်ကစားသမားတွေကြားက သိသာသော ကွာခြားချက်ပင်။

ဒိုင်လူကြီးများ၏ စကားများသည် စက်သေနတ်မှ ကျည်ဆန်များထက် ပိုမိုမြန်ဆန်စွာ ထွက်ပေါ်နေသည်။ တိုက်ရိုက်အစီရင်ခံ တင်ဆက်သူသည်လည်း ကျွမ်းကျင်လှပြီး ပရိသတ်များအတွက် အခြေအနေကို အလျင်အမြန် ခွဲခြမ်းစိတ်ဖြာပေးနေသည်။

“ကွင်းထဲမှာ ရှေ့မတိုးနောက်မသာ ဖြစ်နေတုန်းပါပဲ။ သူတို့က တစ်ယောက်နဲ့တစ်ယောက် အကဲစမ်းနေပြီး စကေးတချို့နဲ့ သာမန်တိုက်ခိုက်မှုတွေကိုပဲ အသုံးပြုနေပါသေးတယ်။ သူတို့နှစ်ယောက်လုံးရဲ့ သွေးအမှတ်တန်းတွေက ရှစ်ဆယ်ရာခိုင်နှုန်းအထက်မှာရှိပြီး အခု ပေါင်းစပ်တိုက်ခိုက်မှု ပြုလုပ်နိုင်ဖို့ကို ဘယ်သူက ဖမ်းဆုပ်နိုင်မလဲဆိုတာကို ကြည့်ရပါလိမ့်မယ်။”

တိုက်ပွဲတွင် ကစားသမားများ၏ မရေမတွက်နိုင်သော ပုံစံအများအပြ ရှိသော်လည်း combo ပေါင်းစပ်တိုက်ခိုက်မှုများကို အသုံးပြုခြင်းသည် ကစားသမားများကြားတွင် အမြဲတမ်း ရေပန်းအစားဆုံး နည်းစနစ်များထဲမှ တစ်ခုဖြစ်ပြီး အထူးသဖြင့် ‘တိုက်ခိုက်သူ’များက အသုံးများသည်။။ အကယ်၍ ၎င်းတို့သည် ကာကွယ်ရေးကို ဖြတ်ကျော်ပြီး ဟာကွက်သေးသေးလေး တွေ့ရလျှင်ပင် ကျွမ်းကျင်သော ကစားသမားများသည် ရန်သူ့သွေးတန်းကို အကြီးအကျယ်လျော့ကျနိုင်ပြီး ရန်သူကို ပေါင်းစပ်တိုက်ခိုက်မှုတစ်ခုဖြင့်ပင် အပြီးသတ်နိုင်၏။

'Girl and the Floating Island' ကဲ့သို့ပင် လူတစ်ဦးသည် လေထဲသို့ ပြုတ်ကျသည်နှင့် တစ်ပြိုင်နက် သူ၏ သွေးအမှတ် အများအပြား ဆုံးရှုံးသွားမည်ကို ရှောင်လွှဲ၍မရပေ။ ထို့အပြင်၊ ပရော်ဖက်ရှင်နယ်ကစားသမားများအနေနှင့် ဟောက်ထျန်းနှင့် ကြယ်စင်စစ်တုရင်တို့သည် ပေါင်းစပ်တိုက်ခိုက်မှုအနုပညာကို ကျွမ်းကျင်နေပြီး အမှားအယွင်းမရှိသလောက်နည်းပါးပါသည်။ ယခု၊ သူတို့သည် ပထမ ပေါင်းစပ်တိုက်ခိုက်မှုကို မည်သို့ စတင်နိုင်သည်ကို ကြည့်ရန် လိုအပ်သည်။

"ခဏနေဦး၊ ကြယ်စင်စစ်တုရင်က ဝင်တိုက်ပြီ!"

ထိုးနှက်မှုချင်း ဖလှယ်ပြီးနောက်၊ ကြယ်စင်စစ်တုရင်သည် ဆတ်ခနဲ့ ရှေ့သို့လှမ်းလိုက်ပြီး သူ၏ ရှေ့ခြေကို မြေပြင်ပေါ်သို့ နင်းလိုက်လေသည်။ မမြင်နိုင်သော လှိုင်းလုံးကြီးတစ်ခု ဖြတ်သွားပြီး ကွင်းတစ်ခုလုံး လှုပ်ယမ်းသွားသည်။

‘ပင့်တင်မှုစကေး [မြေလှိုင်း]’

နှစ်မီတာအတွင်း မည်သည့်ပစ်မှတ်မဆို လှိုင်းလုံးကြီးဖြင့် ထိပါက မြောက်တက်သွားနိုင်သည်။ ဒါက ရှားပါးစကေးဖြစ်ပြီး ဟောက်ထျန်းက အချိန်မီ မတုံ့ပြန်နိုင်ပေ။ သူ့ခြေထောက်များလွတ်သွားပြီး လေထဲသို့ သုံးဆယ်စင်တီမီတာလောက် မြောက်တက်သွား၏။

“ဒါက မကောင်းဘူး။ ရှားပါးစကေးတစ်ခုလို့ ထင်ရပါတယ်။ ဟောက်ထျန်း ထိသွားတယ်၊ ဒါပေမယ့် သူက အရမ်းတော့ မမြောက်တက်သွားဘူး။ ဒါကြောင့် ပေါင်းစပ်တိုက်ခိုက်မှုအတွက် ဟာကွက်မရှိဘူး... ကြယ်စင်စစ်တုရင်က ရှေ့ကို တိုးဝင်ပြီး ပေါင်းစပ်တိုက်ခိုက်မှုရဲ့ ပထမဆုံးလက်သီးနဲ့ ထိုးလိုက်တယ်။"

မြောက်တက်သွားသည့် အမြင့်က နိမ့်လေ၊ ပေါင်းစပ်တိုက်ခိုက်မှုတစ်ခု စတင်ရန် ခက်ခဲလေဖြစ်သော်လည်း ကြယ်စင်စစ်တုရင်သည် ဟာကွက်ကို အောင်မြင်စွာ တွေ့ရှိသွားသည်။ စကေးများနှင့် တိုက်ခိုက်မှုများစွာက ဟောက်ထျန်းကို တရစပ်တိုက်ခိုက်ခဲ့သည်။ ရောင်စုံစွမ်းအင်များက သူ့ခန္ဓာကိုယ်ပေါ်သို့ ဖြာကျလာပြီး ပေါင်းစပ်တိုက်ခိုက်မှု ခုနစ်ချက် ချက်ခြင်း ဆင်းသက်လာ၏။ ဟောက်ထျန်း၏ သွေးအမှတ်သည် သိသိသာသာ ကျဆင်းသွားသည်။

ဒိုင်လူကြီးက ခေါင်းယမ်းပြီး “ကြယ်စင်စစ်တုရင်က ပေါင်းစပ်တိုက်ခိုက်မှုတစ်ခုအတွက် ဟာကွက်သေးသေးလေးကို ဖမ်းဆုပ်နိုင်သေးတယ်။ တကယ်ကို အသက်ကြီးလေ ပညာရှိလေပဲ။ ဒီအခြေအနေကို ဟောက်ထျန်းက ဘယ်လိုတုံ့ပြန်မလဲဆိုတာ ကြည့်လိုက်ရအောင်။ ပြိုင်ပွဲမစခင် Black Phantom က [စွမ်းအင်ပေါက်ကွဲခြင်း] လို့ခေါ်တဲ့ အတန်းအစား တိုးတက်မှု အသိပညာကို ရောင်းချခဲ့တာ လူတိုင်းသိပါတယ်။ အဲဒါက စွမ်းအင်အများအပြားကို အသုံးပြုပြီး Rage မာန်ဟုန်ပြင်းတဲ့ အခြေအနေတစ်ခုကို လဲလှယ်ပေးနိုင်တယ်၊ ရန်သူတွေကို ပြန်လည်ချေမှုန်းဖို့အတွက် ဤစကေးက ရန်သူရဲ့ ပေါင်းစပ်တိုက်ခိုက်မှုကို ရပ်တန့်စေနိုင်ပေမယ့် စွမ်းအင်အများကြီးကို အသုံးပြုရမှာဖြစ်တယ်။ ဒီအဆင့်မှာရှိနေတဲ့ ကစားသမားတွေရဲ့ ပင်ကိုယ်အရည်အသွေးတွေအရဆိုရင် ဒီစကေးကို ပြိုင်ပွဲမှာ တစ်ကြိမ်ပဲ အသုံးပြုနိုင်တယ်။ သူတို့နှစ်ယောက်လုံး ဒီစကေးကို သေချာပေါက် လေ့လာထားပြီးဖြစ်လို့ ဟောက်ထျန်းက အရင်သုံးမှာလား ကြည့်လိုက်ရအောင်။”

လေထုထဲတွင် လွင့်မျောနေစဉ်၊ ဟောက်ထျန်းသည် ထိခိုက်နိုင်မှု လျော့သွားအောင် သူ၏ ခန္ဓာကိုယ်ကို ဘောလုံးတစ်လုံးလို ကွေးကောက်လိုက်သည်။ သွေးတန်းသည် ကျဆင်းနေသော်လည်း သူ၏ စိတ်အခြေအနေကို သက်ရောက်မှုမရှိပေ။ သူက အာရုံစိုက်ပြီး အခွင့်အရေးကို စောင့်နေ၏။

ရုတ်တရက်၊ သူသည် ပေါင်းစပ်တိုက်ခိုက်မှုတွင် အမှားတစ်ခုကို တွေ့ရှိခဲ့ပြီး၊ သူသည် ၎င်း၏ ခံစစ် အခြေအနေကို ပြောင်းလဲကာ လက်တစ်ဖက်ဖြင့် ကြယ်စင်စစ်တုရင်၏ လက်သီးကို ဖမ်းလိုက်ရင်း သူ့ခန္ဓာကိုယ်ကို လှည့်၍ ပြိုင်ဘက်၏ဦးခေါင်းပေါ်မှ ကျော်လိုက်ကာ ကြယ်စင်စစ်တုရင်၏ အနောက်ဘက်သို့ရောက်အောင် ကြိုးစားလိုက်သည်။

“သူ [တိမ်တိုက်ပြန်လာခြင်း] ကို သုံးတယ်။ အိုး၊ မဟုတ်ဘူး၊ စကေးက လေထဲရောက်နေချိန် လွတ်မြောက်မှုစကေး ဖြစ်ပေမယ့်၊ အောင်မြင်မှုနှုန်းက အရမ်းနည်းလွန်းတယ် - အောင်မြင်မှုနှုန်း အနည်းငယ်တိုးဖို့ဆိုရင် လက်စွမ်းအမှတ်က ပြိုင်ဘက်ထက် အနည်းဆုံး ဆယ်မှတ် ပိုမြင့်ဖို့လိုတယ်။ ဒါပေမယ့် သူတို့က အဆင့်တူဖြစ်တော့ သူတို့ရဲ့ ပင်ကိုယ်အရည်အသွေးတွေက အတူတူပဲ ဖြစ်သင့်တယ်။ ဒီစကေးသာ မအောင်မြင်ရင်၊ သူရွှေ့လို့မရတော့ဘူး၊ အဲဒီနောက် ကြယ်စင်စစ်တုရင်ရဲ့ နောက်ထပ် ပေါင်းစပ်တိုက်ခိုက်မှုတစ်ခုက သူ့ကို အပြီးသတ်လိုက်မယ်။ ကြည့်ရတာ ဟောက်ထျန်းက...”

ဟောက်ထျန်းသည် ကြယ်စင်စစ်တုရင်၏ နောက်ဘက်သို့ ထိုစကေးဖြင့် ပေါင်းစပ်တိုက်ခိုက်မှုမှ လွတ်မြောက်သွားသည်ကို ဒိုင်လူကြီးက ရုတ်တရက်မြင်လိုက်ရသဖြင့် သူပြောနေသည်ကို ရပ်တန့်လိုက်ရသည်။ ထို့နောက် နှောင့်နှေးမှုမရှိဘဲ၊ ဟောက်ထျန်း၏ တံတောင်ဆစ်သည် ကြယ်စင်စစ်တုရင်၏ ခေါင်းနောက်ဘက်သို့ ကျရောက်သွားပြီး သူ့ကို မူးဝေသွားစေသည်။

အခွင့်အရေးကို အသုံးချပြီး ဟောက်ထျန်းသည် ကြယ်စင်စစ်တုရင်ကို ပခုံးကိုဆွဲကိုင်ကာ အောက်ခြေမှ ဖြတ်ကန်ပြီး ကြယ်စင်စစ်တုရင်ကို အကာအကွယ်မရှိဘဲ လေထဲ၌ မျှောနေစေသည်။ ထို့နောက် ဟောက်ထျန်းသည် သူ၏ စွဲမက်ဖွယ်ကောင်းသော ပေါင်းစပ်တိုက်ခိုက်မှုကို လုပ်ဆောင်ရန် အချိန်ကျလေပြီ။

အခြေအနေက ရုတ်တရက်ပြောင်းသွားပြီး ပရိသတ်က တုန်လှုပ်သွားခဲ့တယ်။

"ဒီစကေးက ဘယ်လိုအောင်မြင်ခဲ့တာလဲ" ဒိုင်လူကြီးသည် ကြောင်အနေရန် အချိန်မရှိဘဲ မျက်လုံးများပြူးကာကာ အော်လိုက်သည်။ "အခု ဟောက်ထျန်းက တန်ပြန်တိုက်ခိုက်ရမယ့်အချိန်ပါ... ကြယ်စင်စစ်တုရင်ရဲ့ သွေးတန်းက ဘာလို့ ဒီလောက် မြန်မြန်ကျနေတာလဲ?"

ယခုဆိုလျှင်၊ ကြယ်စင်စစ်တုရင်၏ ပေါင်းစပ်တိုက်ခိုက်မှု တစ်ဝက်တစ်ပျက်က ဟောက်ထျန်း၏ သွေးအမှတ် နှစ်ဆယ့်ငါးရာခိုင်နှုန်းကို ဖယ်ထုတ်လိုက်သော်လည်း အနည်းငယ် တိုက်ခိုက်ခံရပြီးနောက်မှာတော့ ကြယ်စင်စစ်တုရင်သည် သူ၏ သွေးအမှတ် လေးဆယ်ရာခိုင်နှုန်းကို ဆုံးရှုံးသွားခဲ့ပြီဖြစ်သည်။

ထိုအကြောင်းရင်း၏ တစ်စိတ်တစ်ပိုင်းမှာ ကြယ်စင်စစ်တုရင်သည် မူးဝေသွားပြီး အဓိပ္ပါယ်မဖော်နိုင်တာကြောင့် ဖြစ်သော်လည်း၊ အဓိက အကြောင်းရင်းမှာ ဟောက်ထျန်း၏ ထိခိုက်ပျက်စီးစေမှုက အလွန်များသောကြောင့်ဖြစ်သည်။

အင်တာဖေ့စ်ပေါ်ရှိ ပျက်စီးကိန်းဂဏန်းများ ပေါ်လာရာ ကြယ်စင်စစ်တုရင်သည် သူ့မျက်လုံးများကို မယုံနိုင်ဖြစ်နေသည်။

"ဟောက်ထျန်းရဲ့ လက်စွမ်းအမှတ်က ငါနဲ့အတူတူ ရှိရမယ်။ [တိမ်တိုက်ပြန်လာခြင်း] အောင်မြင်ဖို့ ဘယ်လိုမှ မဖြစ်နိုင်ဘူး။”

စီးဆင်းနေသော စွမ်းအင်များသည် ဟောက်ထျန်း၏ လေးနက်သော အမူအရာကို မီးမောင်းထိုးပြနေပြန်သည်။

တကယ်တော့ သူက ကြယ်စင်စစ်တုရင်နဲ့ အဆင့်အတူတူပင်။ သို့သော်၊ သူ၏စကေးအဆင့်သည် ကြယ်စင်စစ်တုရင်သာမက အခင်းအကျင်းရှိ ပရော်ဖက်ရှင်နယ်ကစားသမားအားလုံးထက် များစွာမြင့်မားသည်။ ဟန်ရှောင်း၏ အတွေ့အကြုံအမှတ် ဆုကြေးငွေအားလုံးကို စကေးအဆင့်ကို တိုးမြှင့်ရန်အတွက် အသုံးပြု၏။ ထို့ကြောင့် [တိမ်တိုက်ပြန်လာခြင်း] အလုပ်ဖြစ်ခဲ့ပြီး သူ၏ ထိခိုက်ပျက်စီးစေမှုသည် မမျှော်လင့်ဘဲ မြင့်မားနေသည်။