အခန်း (၄၃၇)

အမျိုးသမီးက လူသားဖြစ်နေလျှင် မီးဖွားသောအခါ ရလဒ်သည် အလွန်ဆိုးဝါးနေလိမ့်မည်။

သားအိမ်ထဲတွင်ရှိသော ကလေးငယ်သည် မိခင်၏ သွေးနှင့်ချီများကို စုပ်ယူလိုက်သောကြောင့် မိခင်က သေဆုံးသွားရလိမ့်မည်။

ကျင့်ကြံခြင်းလောကတွင် မိစ္ဆာများနှင့်ပေါင်းဖက်ပြီး ကောင်းမွန်သောအဆုံးသတ်ကို ရရှိသူများသည် မဟာကျင့်ကြံသူကြီးများဖြစ်သည်။

သူတို့ပေးဆပ်ရသောတန်ဖိုးသည်လည်း အလွန်ကြီးမားသည်။

ယခင်က ဝမ်မော့ရှန်နှင့် အတူရှိနိုင်ရန်အတွက် ပိုင်ချင်းယွီသည် ကောင်းကင်မြေခွေးအမြီးကို ဖြတ်တောက်ခဲ့သည်။

နတ်မိမယ်ပီအိုနေးသည်လည်း မူမိသားစုခေါင်းဆောင်နှင့် လက်ထပ်ရန်အတွက် ဆုံးဖြတ်ချက်ချခဲ့ရသည်။

“လူသားနဲ့မိစ္ဆာတွေ ပေါင်းဖက်ဖို့အတွက် မဖြစ်နိုင်တာတော့မဟုတ်ဘူး။ သွေးမျိုးဆက်ကနေ အပြည့်အဝအဖြေရှာနိုင်တယ်”

ဟန်မူယဲ့က စဉ်းစားလိုက်ပြီး တီးတိုးပြောသည်။

သူက မိစ္ဆာတစ်သောင်းတံဆိပ်၏ပိုင်ရှင်ဖြစ်ပြီး ပျက်စီးခြင်းစကြဝဠာ၏ သွေးမျိုးဆက်အမွေအနှစ်အားလုံးကို ထိန်းချုပ်ထားသည်။

နတ်ဘုရားသားရဲများ၏သွေးမျိုးဆက်သည် အလွန်အားကောင်းပြီး လက်ဆင့်ကမ်းပေးနိုင်ရန် ခက်ခဲသည်။

နတ်ဘုရားသားရဲအများအပြားသည် အမွေအနှစ် ဆက်လက်ရှိနေစေရန်အတွက် သွေးမျိုးဆက်ကို ယာယီချိပ်ပိတ်ထားရန် ရွေးချယ်ကြသည်။ သူတို့၏ကလေးငယ်များ မွေးဖွားလာသောအခါတွင် ဖြည်းဖြည်းချင်း သွေးမျိုးဆက်များ နိုးထလာလိမ့်မည်။

မိစ္ဆာအများစုသည် နတ်ဘုရားသားရဲသွေးမျိုးဆက်၏ နိုးထခြင်းကို တောင့်မခံနိုင်ပေ။

ထို့ကြောင့် မိစ္ဆာမျိုးစိတ်ခွဲများ ပိုများလာသော်လည်း သွေးမျိုးဆက်စွမ်းအား လျော့နည်းလာရသည်။

ဟန်မူယဲ့နှင့်မူဝမ်တို့ စခန်းသို့ပြန်လာသောအခါတွင် ရှောင်ချူးနှင့် ရှောင်မိသားစု၏တပည့်များသည် ဧည့်ခံပွဲမှ ပြန်လာကြသည်။

ယခုအချိန်သည် နေဝင်သွားပြီဖြစ်သည်။

ရှောင်မိသားစု၏ ကုန်သည်အဖွဲ့သည် ကွင်းပြင်ထဲတွင် တဲရှစ်လုံး တပ်ဆင်လိုက်သည်။ ရှောင်ချူးက တဲတစ်လုံးရပြီး ဟန်မူယဲ့နှင့်မူဝမ်ကလည်း တဲတစ်လုံးရသည်။ ရှောင်မိသားစုတပည့်များနှင့် အလုပ်သမားများက ကျန်တဲခြောက်လုံးတွင် နေရာယူလိုက်ကြသည်။

တဲတစ်လုံးစီတွင် လူဆယ်ယောက်ကျော်နေထိုင်ရသောကြောင့် ရှောင်မိသားစု၏တပည့်များက အနည်းငယ် မကျေမနပ်ဖြစ်သွားသည်။ လူတချို့က တီးတိုးရေရွတ်လိုက်သော်လည်း ရှောင်ချူး၏အကြည့်ကြောင့် နာခံမှုရှိစွာဖြင့် တဲအတွင်းသို့ ဝင်သွားရသည်။

ဟန်မူယဲ့နှင့်မူဝမ်က မျက်နှာချင်းဆိုင်တွင် ထိုင်နေသည်။

မူဝမ်က အနည်းငယ် မသက်မသာဖြစ်သည်ဟု ခံစားလိုက်ရသည်။

သူမက လွန်ခဲ့သောသုံးနှစ်တွင် အစ်ကိုဟန်ပြန်မလာနိုင်ကြောင်း ကြားလိုက်ရသောကြောင့် ခံစားခဲ့ရသောဝမ်းနည်းမှုကို ပြန်တွေးမိသည်။

နတ်မိမယ်ပီအိုနေးက ဟန်မူယဲ့ပြန်လာလျှင် အရာအားလုံးကိုစွန့်လွှတ်၍ သူ့နောက်သို့လိုက်သွားမည်လားဟု မေးခဲ့သည်။ ထိုအချိန်တွင် သူမက ခိုင်မာစွာခေါင်းညိတ်ခဲ့သည်။

ဟန်မူယဲ့ပြန်လာသောအခါတွင် သူမ၏ပျော်ရွှင်မှုသည် မဖော်ပြနိုင်လောက်ပေ။

ထို့ကြောင့် သူမက လုပ်စရာရှိသည်များကို ဘေးပစ်ထားပြီး ဟန်မူယဲ့နှင့်အတူ အလယ်ပိုင်းကုန်းမြေသို့ လိုက်လာခဲ့သည်။

သို့သော် သူမက ဆုံးဖြတ်ထားသော်လည်း တိတ်ဆိတ်သောတဲအတွင်း၌ နှစ်ယောက်တည်းရှိနေသောအခါတွင် ကမောက်ကမဖြစ်လာသည်။

သူမက လမ်းပျောက်နေသည်။

ဟန်မူယဲ့ကလည်း အနည်းငယ်အံ့အားသင့်သွားသည်။

‘ညီမမူဝမ်ကို အံ့ဖွယ်ကိုးပါးတောင်မှာ နေခိုင်းခဲ့ရင် ငါတို့ရဲ့ကလေးတွေက ဟွမ်ကျစ်ဟူနဲ့ သက်တူရွယ်တူဖြစ်နေလောက်ပြီ’

‘ဟွမ်လောင်လျှိုက ဉာဏ်အများဆုံးပဲ’

သူတွေးမိသည်။

သူက ခေါင်းခါလိုက်ပြီး စာအုပ်တစ်အုပ်ကိုထုတ်၍ စားပွဲပေါ်တွင် တင်လိုက်သည်။ ထို့နောက် စုတ်တံက ညင်သာစွာရွေ့လျားသွားသည်။

ကွန်ဖြူးရှပ်တာအိုသည် လူတစ်ယောက်၏စိတ်ကို ငြိမ်သက်စေနိုင်သည်။ ကွန်ဖြူးရှပ်စာပေကို ကူးရေးလျှင် စိတ်အခြေအနေ တိုးတက်လာစေသည်။

ဟန်မူယဲ့က လေးနက်စွာ စာကူးရေးနေကြောင်း မြင်လိုက်ရသောအခါတွင် မူဝမ်က စိတ်သက်သာရာရစွာ သက်ပြင်းချသည်။ ထို့အပြင် သူမ၏မျက်လုံးထဲတွင် စိတ်ပျက်မှုများ ဖြတ်ပြေးသွားသည်။

သူမက ကျားရင်းမြစ်မြက်ပင်များကို ထုတ်ယူလိုက်ပြီး တစ်ပင်ချင်းစီသန့်ရှင်း၍ ချီစွမ်းအင်ဖြင့် ပိတ်လှောင်ထားလိုက်သည်။

ထို့နောက် သူမက တခြားဆေးပင်များကို သေချာကိုင်တွယ်နေသည်။

ဝိညာဉ်ဆေးပင်အချို့သည် ဆေးရည်အဖြစ်ပြောင်းလဲသွားရန်အတွက် မီးပြင်းဖိုနှင့် သန့်စင်ရန် လိုအပ်သည်။

မူဝမ်က ဝိညာဉ်ဆေးပင်များကို လေးနက်စွာကိုင်တွယ်နေသည်။

ထိုအာရုံစိုက်မှုမျိုးသည် အလွန်ရှားပါးသည်။

“ဘမ်း”

သူမ၏နောက်တွင်ပေါ်လာသော တုန်ခါမှုကြောင့် မူဝမ်က ထိတ်လန့်သွားသည်။ သူမ၏ရှေ့တွင်ရှိသော မီးပြင်းဖိုသည် တုန်ခါနေပြီး မီးခိုးများထွက်လာသည်။

ဝိညာဉ်ဆေးပင်များ ပျက်စီးသွားသည်။

မူဝမ်က ပျက်စီးသွားသောဆေးပင်များကို လျစ်လျူရှုထားပြီး နောက်သို့ လျင်မြန်စွာလှည့်ကြည့်သည်။ ဟန်မူယဲ့က ဖျော့တော့စွာပြုံးနေပြီး ရှေ့တွင်ရှိသော စုတ်တံအပိုင်းအစများကို ရှင်းလင်းနေသည်။

စုတ်တံသည် တစ်ပိုင်းတစ်စစီ ပျက်စီးသွားခဲ့သည်။

“ညီမမူအတွက် ဝင်္ကပါတစ်ခုလုပ်ပေးမယ်။ အာခီမီကို လေ့လာနေတဲ့အချိန်မှာ အနှောင့်အယှက်မဖြစ်တော့ဘူးပေါ့”

ဟန်မူယဲ့က ဝင်္ကပါပြားကိုထုတ်လိုက်ပြီး အသက်သွင်းတော့မည့်အချိန်တွင် ဝင်္ကပါပြားသည် ဘန်းခနဲ ပေါက်ကွဲသွားခဲ့သည်။

မူဝမ်က ရယ်လိုက်ပြီး လက်မြှောက်သည်။ ချီစွမ်းအင်အလင်းသည် သူတို့နှစ်ယောက်ကို ခွဲခြားလိုက်သည်။

“ညီမမူ၊ ဝင်္ကပါကို ဘယ်တုန်းကပြင်လိုက်တာလဲ”

ဟန်မူယဲ့က ညင်သာစွာမေးသည်။ ထို့နောက် ဝင်္ကပါသည် သူတို့နှစ်ယောက်ကို အာရုံမခံနိုင်အောင် ခွဲခြားထားကြောင်း သတိရလိုက်ပြီး ခေါင်းခါသည်။

သူက တင်ပျဉ်ခွေထိုင်လိုက်ပြီး ရှေ့တွင်ရှိသောစားပွဲကို ကြည့်သည်။

စာလုံးများကို တစ်ဝက်ရေးသားထားပြီး ကျန်တစ်ရွက်သည် မင်ရည်များဖြင့် ရှုပ်ပွနေသည်။

ထိုအရာသည် သူ့လက်ရှိအခြေအနေဖြစ်သည်။ သူ့ရုပ်ခန္ဓာခွန်အားသည် အလွန်သန်မာသောကြောင့် ထိန်းချုပ်နိုင်ရန် ခက်ခဲသည်။

သူက ဖြည်းဖြည်းချင်း မျက်လုံးမှိတ်သည်။ သူ့စိတ်အတွေးသည် စိတ်နယ်ပယ်မှထွက်ပေါ်လာပြီး ချီပင်လယ်နှင့် ဒန်ထျန်ထဲသို့ ဝင်သွားသည်။

ဟန်မူယဲ့က မိစ္ဆာတစ်သောင်းလျှို့ဝှက်နယ်မြေမှ စိတ်ကူးမယဉ်နိုင်လောက်သောအကျိုးအမြတ်များကို ရခဲ့သည်။

ရှေးဟောင်းသွေးမျိုးဆက်နှင့် အထွတ်အထိပ်အဆင့်ရတနာများ အမျိုးမျိုးရှိနေသည့်အပြင် ခွေဦးချိုနှင့် နတ်ဘုရားသားရဲပါ့ရှားကိုလည်း ရထားသည်။

ယခုအချိန်တွင် သူ့စိတ်နယ်ပယ်သည် ရွှေရောင်တောက်နေသည်။

သူ၏ ဝိညာဉ်လိပ်ပြာဓားသည် ကောင်းကင်နှင့်မြေကြီးကို ထောက်ပံ့နိုင်သည်။

သူ့ဝိညာဉ်သည် ကောင်းကင်အဆင့်ကို ကျော်ဖြတ်သွားပြီး မဟာတာအိုနှင့် သဟဇာတဖြစ်နေသည်။

သို့သော် သူက အစစ်အမှန်တာအိုပေါင်းစည်းခြင်းအဆင့် ကျင့်ကြံသူတစ်ဦး ဖြစ်လာချင်လျှင် ဝိညာဉ်ကို တာအိုနှင့်ပေါင်းစပ်ပြီး ကမ္ဘာကို ကိုယ်ပိုင်တာအိုနယ်မြေအဖြစ် ပြောင်းလဲရမည်။

ကောင်းကင်အံ့ဖွယ်ကမ္ဘာ၏ မဟာတာအိုသည် ဝမ်မော့ရှန်နှင့် ပေါင်းစပ်နေသည်။ အလယ်ပိုင်းကုန်းမြေတစ်ခုလုံးသည် သူ့နယ်မြေဖြစ်သည်။ အကယ်၍ ဟန်မူယဲ့က တာအိုနှင့်ပေါင်းစပ်ချင်လျှင် ဝမ်မော့ရှန်နှင့် ယှဉ်ပြိုင်ရလိမ့်မည်။

ဟန်မူယဲ့က ကောင်းကင်အံ့ဖွယ်ကမ္ဘာကို စောင့်ကြပ်ရန် စိတ်မဝင်စားသောကြောင့် ဝိညာဉ်အပိုင်းအစတစ်ခုကို မိစ္ဆာတစ်သောင်းတံဆိပ်ထဲတွင် ထားခဲ့သည်။ ထို့နောက် သူက ကိုယ်ပိုင်ဝိညာဉ်ကိုအသုံးပြုပြီး နတ်ဘုရားသားရဲပါ့ရှား၏ခန္ဓာကိုယ်ကို သန့်စင်ခဲ့သောကြောင့် ဝိညာဉ်စွမ်းအားများ ကုန်ဆုံးသွားသည်။

ထိုသို့ မပြည့်စုံသောဝိညာဉ်သည် ကောင်းကင်တာအို၏ အာရုံစိုက်ခြင်းကို ခံရမည်မဟုတ်ပေ။ ထို့ကြောင့် ဝမ်မော့ရှန်နှင့် အလိုလျောက်ယှဉ်ပြိုင်ခြင်းမျိုး မဖြစ်နိုင်ပေ။

ဓားဘုရင်ယွမ်ထျန်းကလည်း သူ့ကို သတိပေးခဲ့သည်။

စိတ်နယ်ပယ်ထဲတွင် အဆုံးမရှိသော ဝိညာဉ်စွမ်းအားများ လှည့်ပတ်နေသည်။ ထိုဝိညာဉ်စွမ်းအားသည် နတ်ဘုရားသားရဲ၏ခန္ဓာကိုယ်ကို သန့်စင်နေရုံတင်မကဘဲ ဝိညာဉ်လိပ်ပြာဓားကိုလည်း စုစည်းနေသည်။

အံ့ဖွယ်နေမင်းနည်းစနစ်ကို အခြေခံအနေဖြင့် အသုံးချထားပြီး ကိုယ်ပိုင်ကျင့်ကြံခြင်းနည်းစနစ်ဖြစ်သော အံ့ဖွယ်အနှစ်သာရတာအိုနည်းစနစ်ကို ကျင့်ကြံပြီးသောအခါတွင် ဟန်မူယဲ့၏ဝိညာဉ်က ချီပင်လယ်တွင်ရှိသော ဓားဆန္ဒနှင့် ပေါင်းစပ်သွားသည်။

သူက ကောင်းကင်အဆင့်သို့မရောက်သေးဘဲ ရွှေအမြုကိုလည်း မစုစည်းရသေးသော်လည်း ကိုယ်ပိုင်ကျင့်ကြံခြင်းလမ်းစဉ်ကို ရှင်းလင်းစွာနားလည်ထားသည်။

ချီစွမ်းအင်ကျင့်ကြံခြင်းသည် အကန့်အသတ်သို့ရောက်သွားလျှင် ရွှေအမြုတေတစ်ခု စုစည်းပြီး နောက်ဆုံးတွင် ဓားတာအို၏ ဝိညာဉ်သူငယ်ဖြစ်လာလိမ့်မည်။

ထိုဖြစ်စဉ်တွင် သူက ချီပင်လယ်တွင်ရှိသော ဓားဆန္ဒကို ဝိညာဉ်လိပ်ပြာဓား၊ ဝိညာဉ်စွမ်းအားနှင့် ပေါင်းစပ်ရန်လိုအပ်သည်။ ထိုစွမ်းအားသုံးခု ပေါင်းစပ်သွားပြီး နောက်ဆုံးတွင် မူလဝိညာဉ်ဖြစ်လာလိမ့်မည်။

သူ့မူလဝိညာဉ်သည် ဓားတစ်လက်ကဲ့သို့ ထက်မြိပြီး မရပ်တန့်နိုင်ပေ။

သို့သော် ထိုအရာအားလုံးအတွက် အားကောင်းသောခန္ဓာကိုယ်ကို လိုအပ်သည်။

နတ်ဘုရားသားရဲ၏ခန္ဓာကိုယ်ကို သန့်စင်ပြီး ခန္ဓာကိုယ်နှင့် ပေါင်းစပ်မှသာ အရာအားလုံးသည် မဖျက်ဆီးနိုင်အောင် ကြံ့ခိုင်နေလိမ့်မည်။

ဝိညာဉ်လိပ်ပြာဓားတွင် ရွှေရောင်အလင်းတန်း တစ်ထောင်ကျော်ရှိနေသည်။

ထိုအလင်းတန်းတစ်ခုချင်းစီသည် ပြီးပြည့်စုံသော ဝိညာဉ်လိပ်ပြာဓားကို ကိုယ်စားပြုသည်။

သူ့ချီပင်လယ်တွင် ခရမ်းရောင်ဓားရှည်သည် ဓားဆန္ဒတစ်သောင်းခန့်ကို စုစည်းထားသည်။

ယခင်က ဓားဆန္ဒသုံးထောင်ကိုစုစည်းပြီး ဓားမာန်ဟုန်အဖြစ်ပြောင်းရန် စီစဉ်ထားခဲ့သည်။ သို့သော် ယခုအချိန်တွင် ဓားဆန္ဒတစ်သောင်းရှိနေပြီး ဓားမာန်ဟုန်များကိုလည်း စုစည်းထားနိုင်သည်။

ဓာတ်စင်အမျိုးမျိုး၏ လိုက်ဖက်ညီမှုစွမ်းအားကြောင့် ဟန်မူယဲ့သည် လေ၊ မီး၊ ရေ၊ သစ်သားနှင့် မြေဓာတ်မျိုးဆက် ဓားနည်းစနစ်များကို ထုတ်ဖော်နိုင်သည်။

သူ့ဒန်ထျန်ထဲတွင် ဓားဆေးလုံး၁၃လုံး လွင့်မျောနေသည်။

ဓားဆန္ဒများမှ ဓားရှည်တစ်လက်စုစည်းနေပြီး ချီစွမ်းအင်များ သိပ်သည်းတော့မည်။

ထိုဓားရှည် ဖြစ်ပေါ်လာလျှင် ဟန်မူယဲ့သည် ဓားတာအို၏ ရွှေအမြုတေအဆင့်ကျင့်ကြံသူ ဖြစ်လာလိမ့်မည်။

ထိုအချိန်တွင် သူ့ကျင့်ကြံခြင်းနှင့်ခွန်အားများ ပြောင်းလဲသွားလိမ့်မည်။

သို့သော် ယခု သူက နတ်ဘုရားသားရဲကို သန့်စင်ရာတွင် အခက်တွေ့နေသည်။

သူ့ခွန်အားသည် စိတ်အခြေအနေနှင့် လိုက်ဖက်ညီမှုမရှိသောကြောင့် တိုက်ခိုက်နိုင်စွမ်းကို ချောမွေ့စွာထုတ်သုံးနိုင်ရန် ခက်ခဲနေသည်။

ဟန်မူယဲ့၏နောက်တွင် နတ်ဘုရားသားရဲပါ့ရှား၏အရိပ် ပေါ်လာသည်။ ထိုအရိပ်သည် လေဟာနယ်ကို ထိုးဖောက်ချင်သကဲ့သို့ ဖြည်းဖြည်းချင်း လွင့်မျောနေသည်။

ထိုသားရဲ၏ခန္ဓာကိုယ်ကို လေဟာနယ်စွမ်းအားများက ဖိနှိပ်ထားသည်။

ယခုအချိန်တွင် ဟန်မူယဲ့၏အဓိကခန္ဓာကိုယ် ရှိသောနေရာကို မည်သူမှမသိပေ။

သူက နတ်ဘုရားသားရဲပါ့ရှားကို သန့်စင်မပြီးမချင်း ထိုလျှို့ဝှက်ချက်အား ဖော်ထုတ်မည်မဟုတ်ပေ။

ချီစွမ်းအင်အတားအဆီးကြောင့် မူဝမ်က ဟန်မူယဲ့၏ကျင့်ကြံခြင်းကို မမြင်နိုင်ပေ။

သူမက ရှေ့တွင်ရှိသောမီးပြင်းဖိုကို ကြည့်လိုက်ပြီး သက်ပြင်းချသည်။

“အစ်မပိုင်ပြောခဲ့တာက တကယ်အဓိပ္ပာယ်ရှိတာပဲ ....”

ယခင်က အံ့ဖွယ်ကိုးပါးတောင်တွင် ပိုင်စုကျန်းသည် လူတချို့ကို အမှန်တကယ်ပင် လိုက်မမီနိုင်ကြောင်း ပြောခဲ့သည်။

အစွမ်းကုန်ထုတ်သုံးထားသော်လည်း ပိုမိုဝေးကွာသွားသောကြောင့် စွမ်းအားကင်းမဲ့ရသည်။

ယခုအချိန်တွင် မူဝမ်က ထိုခံစားချက်မျိုး ရနေသည်။

အစ်ကိုဟန်၏ကျင့်ကြံခြင်းသည် စိတ်ကူးမယဉ်နိုင်လောက်သောအဆင့်သို့ ရောက်နေသည်။

သူထိတွေ့ခဲ့သောကမ္ဘာများသည် သူမ စိတ်ကူးမယဉ်နိုင်သော ကမ္ဘာများဖြစ်သည်။

အစ်ကိုဟန်၏ကျင့်ကြံခြင်းသည် အလွန်စိတ်လှုပ်ရှားဖွယ်ကောင်းသည်။

သူမ၊ သူမကတော့ ကမ္ဘာမြေအဆင့်သို့မရောက်သေးသော ကျင့်ကြံသူလေးတစ်ဦးသာ ဖြစ်သည်။

သူမက မည်သို့ သူနှင့်အတူ ရှိနိုင်မည်နည်း။

သူမ၏လက်ဝါးထဲတွင် ဝိညာဉ်ဆေးပင်တစ်ပင်သည် ဖြည်းဖြည်းချင်းပျက်စီးသွားသည်။ မူဝမ်က ခါးသီးမှုကို ခံစားလိုက်ရသည်။

ညအချိန် ကုန်ဆုံးသွားပြီး နေမထွက်ခင် ကုန်သည်အဖွဲ့ ထွက်လာခဲ့သည်။

သူတို့က တခြားကလန်တစ်ခုဆီသို့ သွားရမည်။

ကလန်များဆီမှ ဝိညာဉ်ဆေးပင်နှင့် ဝိညာဉ်သတ္တုများ စုဆောင်းခြင်းသည် မခက်ခဲသော်လည်း စိန်ခေါ်မှုများရှိသည်။

အကျင့်စရိုက်အမျိုးမျိုးရှိသော မိစ္ဆာများနှင့်ဆက်သွယ်ရန်အတွက် ကျွမ်းကျင်မှုနှင့် အသိပညာ လိုအပ်သည်။

ရှောင်ချူးသည် ဝါရင့်ကျွမ်းကျင်သူတစ်ဦးဖြစ်သည်။ သူရောက်သွားသောနေရာတိုင်းတွင် ကောင်းမွန်စွာဆက်သွယ်နိုင်ပြီး လူငယ်များက အမိန့်နာခံကြသည်။

ရှောင်ချူး၏ပြောစကားအရ ဤစီးပွားရေးကို နောက်နှစ်အနည်းငယ်တွင် လူငယ်များဆီသို့ လွှဲပြောင်းပေးမည်ဖြစ်သည်။

သူက ရွှေအမြုတေအဆင့်တစ်ဝက်သို့ ရောက်နေသောကြောင့် အနာဂတ်တွင် ကျင့်ကြံခြင်းကို အာရုံစိုက်ရမည်။

အဆင့်နိမ့်ကျင့်ကြံသူများသည် ဆက်တိုက်လေ့ကျင့်ရသည်။ အလယ်အလတ်အဆင့်ကျင့်ကြံသူများသည် သင်ကြားရေးကို တာဝန်ယူသည်။ မဟာကျင့်ကြံသူများသည် နယ်မြေတစ်ခုကို စောင့်ကြပ်သည်။

အလယ်ပိုင်းကုန်းမြေနှင့် အနောက်ဘက်နယ်စပ်ကုန်းမြေတွင်လည်း အတူတူပင်ဖြစ်သည်။

ထိုအရာသည် ကျင့်ကြံခြင်းလောက၏ အမွေအနှစ်ဖြစ်နိုင်သည်။

မျိုးဆက်တစ်ခုသာရှိသော တစ်ကိုယ်တော်ကျင့်ကြံသူများနှင့် ရှားပါးသော ကောင်းကင်အထွတ်အထိပ်အဆင့်ကျင့်ကြံသူများသည် ချွင်းချက်ဖြစ်သည်။

ကုန်သည်အဖွဲ့သည် ရှောင်ယွမ်ကမ်းပါးရှိ ကလန်လေးနှစ်ခုမှ ဝိညာဉ်ဆေးပင်များကို စုစည်းခဲ့ပြီး အလယ်ပိုင်းကုန်းမြေသို့ ဦးတည်လိုက်သည်။

စစ်တပ်၏လှုပ်ရှားမှုကြောင့် အလယ်ပိုင်းကုန်းမြေသို့သွားသောလမ်းကြောင်းသည် ကျယ်ပြန့်နေသည်။ မြင်စီးထားသော အနီရောင်နှင့် အနက်ရောင်ချပ်ဝတ်စစ်သားများကို မကြာခဏ မြင်နိုင်သည်။

အလယ်ပိုင်းကုန်းမြေသို့ဦးတည်သွားသော လူများဖြင့်ပြည့်နေသည့် ကုန်သည်အဖွဲ့များကိုလည်း မြင်နိုင်သည်။

“သူတို့က စုစည်းထားတဲ့ ကုန်သည်အဖွဲ့တွေနဲ့ တောင်ပိုင်းဒေသရဲ့ မိသားစုလေးတွေပဲ”

ရှောင်ချူးက လူခုနစ်ယောက် ရှစ်ယောက်ခန့်သာရှိသော ကုန်သည်အဖွဲ့များနှင့် ရှေ့တွင်ရှိသော ကြီးမားသည့်လှည်းနှစ်စီးကို ညွှန်ပြသည်။