အခန်း (၄၄၇)

သူသည် တောင်နှင့်မြစ်များ၏ တရားဝင်နတ်တစ်ပါးဖြစ်သည်။

မြစ်ရေကြောင့်ဖြစ်ပေါ်လာသောနဂါးသည် ဟိန်းဟောက်လိုက်ပြီး ကောင်းကင်ပေါ်သို့ ထိုးတက်သွားသည်။

ကောင်းကင်နှင့်မြေကြီးအပြင် ပတ်ဝန်းကျင်မိုင်သုံးထောင်၏စွမ်းအားများ စုစည်းထားသောကြောင့် ထိုတိုက်ကွက်သည် အလွန်အားကောင်းသည်။

နတ်တစ်ပါး၏ ဒေါသဖြစ်သည်။

ရေနဂါးဆင်းရောက်မလာခင် ကောင်းကင်နှင့်မြေကြီး၏စွမ်းအားသည် တည်နေရာကို ပိတ်ဆို့လိုက်သည်။

လေထုထဲတွင် ပေါင်သန်းချီဖိအားကြောင့် လှုပ်ရှားနိုင်သောလူများ မရှိတော့ပေ။

ကောင်းကင်အဆင့်ကျွမ်းကျင်သူများပင် အချိန်တိုအတွင်း၌ ရုန်းမထွက်နိုင်ဘဲ တိုးဝင်လာသောရေနဂါးကို ကြည့်နေရသည်။

“ဘုန်း”

တာအိုတန်ခိုးရှင်များစုစည်းထားသော ချီစွမ်းအင်အလင်းများသည် ရေနဂါးကြောင့် ပျက်စီးသွားခဲ့သည်။

ဒါဇင်ချီနေသော ရွှေအမြုတေအဆင့်နှင့် ကောင်းကင်ဘုံတစ်ဝက်အဆင့်ကျွမ်းကျင်သူများသည် မြစ်ထဲသို့ ပြုတ်ကျလာကြသည်။

မြစ်ထဲသို့ကျလာသော ရွှေအမြုတေအဆင့်ကျွမ်းကျင်သူများသည် ကျောက်ဆောင်များအဖြစ် ပြောင်းလဲသွားသည်။

နတ်ဘုရားအင်းကွက်များသည် ကျောက်ဆောင်ကို ချိပ်ပိတ်လိုက်သည်။

ချီကျစ်ယွီက ဒါဇင်ချီသော ရွှေအမြုတေအဆင့်ကျွမ်းကျင်သူများကို တစ်ချက်တည်း ဖိနှိပ်လိုက်သည်။

ထိုအရာသည် အမွှေးတိုင်ပူဇော်ခြင်းမှတစ်ဆင့် တာအိုကိုရရှိထားသော အစစ်အမှန်သခင်တစ်ပါး၏ စွမ်းအားဖြစ်သည်။

ချီကျစ်ယွီက ကွမ်မြစ်ဝ၏ မိုင်သုံးထောင်ပတ်ဝန်းကျင်မှ ထွက်မသွားခဲ့လျှင် မဟာတာအို၏စွမ်းအားများကို အသုံးချ၍ ဝိညာဉ်သူငယ် ပဥ္စမအဆင့်ကျွမ်းကျင်သူတစ်ဦးကို တိုက်ခိုက်နိုင်သည်။

သူက အမွှေးတိုင်ပူဇော်ခြင်းမှတစ်ဆင့် တာအိုကို ရရှိခဲ့သည်။ ထို့အပြင် ဟန်မူယဲ့က တုန်းရှန်ဒေသ၏ အုပ်ချုပ်ရေးမှုချိပ်စည်းတံဆိပ်ကို အသုံးပြု၍ သူ့အား ထာဝရရှင်သန်ခြင်းကို ချီးမြှင့်ခဲ့သည်။

သူ့ခန္ဓာကိုယ် ပျက်စီးသွားခဲ့လျှင်ပင် မြစ်ရေစီးဆင်းနေပြီး မဟာတာအို တည်ရှိနေသ၍ အမွှေးတိုင်ပူဇော်ခြင်းမှတစ်ဆင့် ခန္ဓာကိုယ်ကို ပြန်လည်ဖွဲ့စည်းနိုင်သည်။

နတ်ဘုရားအလင်းများ ပေါ်ထွက်နေပြီး ထောင်ချီသောလူများ အရိုအသေပေးလိုက်သည်။

“ဒါက ဘယ်လိုလုပ်ပြီး ဖြစ်နိုင်မှာလဲ”

“ဒီနတ်ဘုရားတာအိုက အမွှေးနံ့သာပူဇော်ခြင်းစွမ်းအားကနေ ဖြစ်လာခဲ့တာလား”

“ဒါက တကယ့်ကို ခြေတစ်လှမ်းနဲ့ ကောင်းကင်အထိရောက်သွားတာပဲ ....”

ကောင်းကင်ထက်တွင် ကျင့်ကြံသူကြီးများက ဆိုးဝါးသောမျက်နှာထားဖြင့် နောက်ဆုတ်သွားကြသည်။

အကြွင်းအကျန်ဝိညာဉ်သာကျန်ရစ်သော ကွန်ဖြူးရှပ်တာအိုကျောင်းတော်သားတစ်ယောက်သည် ကောင်းကင်အဆင့်ကျင့်ကြံသူများကို စကားတစ်ခွန်းဖြင့် ဖိနှိပ်နိုင်သည်။

ကျင့်ကြံခြင်းလောကတွင် စည်းမျဉ်းများမရှိပေ။

‘ကျင့်ကြံခြင်းက ဒီလောက်တောင်လွယ်နေရင် လူတိုင်းက အမွှေးနံ့သာပူဇော်ခြင်းနဲ့ တာအိုကို ရှာဖွေနေကြတော့မှာလား’

“အစစ်အမှန်သခင်က ကိုယ်ထင်ပြလာပြီ။ အစစ်အမှန်သခင်က ကိုယ်ထင်ပြလာပြီ ....”

အောက်တွင် သာမန်လူသားများက ပျော်ရွှင်နေသောမျက်နှာထားဖြင့် တီးတိုးဆုတောင်းနေသည်။

စွမ်းအားမဲ့သော သာမန်လူသားများ လုပ်ဆောင်နိုင်သောအရာ သိပ်မရှိပေ။

လောကတွင် သာမန်လူသားများသည် မည်သည့်အရာကိုမှ မလုပ်နိုင်ပေ။

ချီကျစ်ယွီက လွှမ်းမိုးနိုင်စွမ်းရှိသောခွန်အားကို ဖော်ပြခဲ့သည်။ ထို့အပြင် သူက သာမန်လူများနှင့် ပူးပေါင်း၍ အလုပ်လုပ်ခဲ့ဖူးသည်။ ထို့ကြောင့် ထိုလူများက ပျော်ရွှင်သွားကြသည်။

လေထုထဲတွင် မမြင်နိုင်သော မျှော်လင့်ချက်စွမ်းအားများ ပိုမိုသိပ်သည်းလာသည်။

တာအိုကိုရရှိရန်အတွက် အမွှေးနံ့သာပူဇော်ခြင်းကို အသုံးပြုခဲ့သောအခါတွင် ကွန်ဖြူးရှပ်တာအို၏ လူသားဆန္ဒစွမ်းအားကဲ့သို့ မျှော်လင့်ချက်စွမ်းအားသည် လောင်စာဖြစ်သည်။

ရွှေအလင်းများနှင့်တောက်ပနေသော ချီကျစ်ယွီသည် ရေလှိုင်းများပေါ်တွင် ရပ်နေသည်။ သူ့နောက်တွင် အဆုံးမရှိသောရေခိုးရေငွေ့များ ရှိနေသည်။

သူက ရေစွမ်းအားကိုအသုံးပြုပြီး မဟာတာအိုကိုစုစည်း၍ နတ်ဘုရားတာအိုအတွက် အုတ်မြစ်ချခဲ့သည်။

သူက လူအများ၏ရှေ့တွင် နတ်ဘုရားစွမ်းအားများ ထုတ်ပြခဲ့ပြီး မျှော်လင့်ချက်စွမ်းအားကို စုစည်းခဲ့သည်။ ယနေ့အချိန်မှစ၍ ကွမ်မြစ်ဝသည် သူ့နယ်မြေဖြစ်လိမ့်မည်။

ရှစ်ယွမ်ကျီ၏မျက်နှာထားက မည်းမှောင်နေပြီး လှိုင်းလုံးများအောက်သို့ရောက်သွားသော လူများကို ကြည့်သည်။

လူအများစုသည် ဖူချန်တာအိုဂိုဏ်းမှဖြစ်သည်။ သူ့တပည့်များနှင့် ဂိုဏ်းသခင်လေးသည် ကွမ်မြစ်ဝတွင် ဖိနှိပ်ခံလိုက်ရသည်။

ထိုဆုံးရှုံးမှုမျိုးသည် နာကျင်ရသည်။

ယနေ့တွင် သူတို့ နောက်ဆုတ်လိုက်လျှင် ဖူချန်တာအိုဂိုဏ်းသည် ပျက်စီးသွားလိမ့်မည်။

သူတို့က အငြိုးမပြေနိုင်သောရန်သူများ ဖြစ်လာသောကြောင့် သေဆုံးသည်အထိ တိုက်ခိုက်ရမည်။

ရှစ်ယွမ်ကျီက အော်ဟစ်လိုက်ပြီး ပတ်ဝန်းကျင်တွင်ရှိသော ချီစွမ်းအင်အလင်းများသည် ဝင်္ကပါတစ်ခုအဖြစ် ပြောင်းလဲသွားသည်။ ရွှေစေတီတစ်ဆူ ပေါ်လာခဲ့သည်။

ရွှေစေတီသည် ပေတစ်သိန်းမြင့်မားပြီး အလွန်ဖိနှိပ်နိုင်စွမ်းရှိသည်။

အလွှာကိုးခုစေတီကို ကြေးဖြင့်ပြုလုပ်ထားပြီး အလွှာတိုင်းတွင် အင်းကွက်များ သွယ်ယှက်နေသည်။ အနက်ရောင်အင်းကွက်များသည် မှိန်ဖျော့ဖျော့ တောက်ပနေကြသည်။

ဓမ္မရတနာ ....

စေတီသည် အခြေအနေကို ဖိနှိပ်နိုင်စွမ်းရှိသော မှော်ရတနာတစ်ခုဖြစ်သည်။

ထိုစေတီတွင် လက်နက်ဝိညာဉ်မရှိသေးသော်လည်း စေတီ၏စွမ်းအားသည် နယ်မြေတစ်ခုကို ဖိနှိပ်နိုင်သည်။

ရွှေစေတီသည် မြည်ဟီးသံနှင့်အတူ ကျဆင်းလာသည်။

မြစ်ပေါ်တွင်ရှိသော ချီကျစ်ယွီနှင့် ဖုန့်ကျူးတို့၏ကိုယ်ပေါ်သို့ အဆုံးမရှိသောဖိအားများ ကျဆင်းလာပြီး မလှုပ်ရှားနိုင်အောင် တားဆီးလိုက်သည်။

ဓမ္မရတနာများသည် ကောင်းကင်နှင့်မြေကြီး၏စွမ်းအားကို ကိုယ်ပိုင်အဖြစ် ယာယီအသုံးချနိုင်သည်။

ဂိုဏ်းအကာအကွယ်ရတနာနှင့် ဝိညာဉ်သူငယ်နဝမအဆင့်တွင်ရှိသောစွမ်းအားကို ထုတ်ဖော်နိုင်သည်။

ချီကျစ်ယွီတွင် တရားဝင်ဘွဲ့ထူးတစ်ခုရှိပြီး အမွှေးနံ့သာပူဇော်ခြင်းဖြင့် တာအိုကိုရရှိလာသော်လည်း ထိုတိုက်ခိုက်မှုကို ခုခံနိုင်မည်မဟုတ်ပေ။

သူက ထိုရတနာနှင့် တိုက်ခိုက်ချင်လျှင် နတ်ဘုရားစွမ်းအားများ အနည်းဆုံးဆယ်ဆခန့် ပိုရှိနေရမည်။

အမွှေးနံ့သာပူဇော်ခြင်းဖြင့် တာအိုကိုရရှိလာလျှင် ကောင်းကင်ဘုံသို့ ချက်ချင်းရောက်သွားနိုင်သော်လည်း တိုက်ခိုက်နိုင်စွမ်းချင်းယှဉ်ကြည့်လိုက်လျှင် လိုအပ်နေလိမ့်မည်။

ရှစ်ယွမ်ကျီသည် သတ်ဖြတ်လိုစိတ်များဖြင့် ပြည့်နှက်နေသည်။

သူက ချီကျစ်ယွီကို တစ်ချက်တည်းဖြင့် သတ်ဖြတ်နိုင်လျှင် တာအိုဂိုဏ်းများသည် ရှုံးနိမ့်သွားမည်မဟုတ်ပေ။

တိမ်တိုက်များပေါ်တွင်ရှိသော မဟာကျင့်ကြံသူကြီးများသည် ပျော်ရွှင်သွားကြသည်။

အနိုင်အရှုံးကို ဆုံးဖြတ်နိုင်တော့မည်။

ကောင်းကင်ထက်တွင်ရှိသော ရွှေစေတီကိုကြည့်လိုက်ပြီး ချီကျစ်ယွီက မျက်မှောင်ကြုတ်သည်။ သူက လက်ကိုမြှောက်ပြီး ဖုန့်ကျူးကို ကာကွယ်သည်။

နတ်ဘုရားအလင်းများသည် သူ့ခန္ဓာကိုယ်ထဲမှ ပေါ်ထွက်လာပြီး စေတီကြောင့်ဖြစ်ပေါ်လာသောလှိုင်းများကို တည်ငြိမ်စေသည်။

သူက သေဆုံးခြင်းနှင့် ရင်ဆိုင်နေရသော်လည်း မျက်နှာထားပြောင်းလဲမသွားပေ။ သူက သာမန်လူသားများ၏ မျှော်လင့်ချက်စွမ်းအားကို သယ်ဆောင်ထားသည်။

ဟန်မူယဲ့က ခပ်ဟဟရယ်လိုက်ပြီး ခေါင်းညိတ်သည်။ သမင်ဖြူတောင်တန်း၏ချီကျစ်ယွီသည် မဆိုးပေ။ သူ့ရင်နှီးမြှုပ်နှံမှုများသည် အလကားဖြစ်မသွားခဲ့ပေ။

သူက ရွှေစေတီကို ကြည့်သည်။

ရွှေစေတီသည် ပြိုင်ဘက်ကင်းသောပုံစံဖြင့် ဆင်းသက်လာသည်။

ရှစ်ယွမ်ကျီ၏ရွေးချယ်မှုသည် မမှားပေ။

သူ့အမျှော်အမြင်နှင့် ဆုံးဖြတ်ချက်ပြတ်သားမှုတွင် အပြစ်ဆိုစရာ မရှိပေ။

သို့သော် သူက အချိန်မှားသွားသည်။

သူက ဒေသသုံးခု၏ အံ့ဖွယ်နေမင်းကိုယ်ရံတော်ခေါင်းဆောင်ရှေ့တွင် တောင်နှင့်မြစ်များ၏ တရားဝင်နတ်တစ်ပါးကို တိုက်ခိုက်ရန်အတွက် ဓမ္မရတနာကို ထုတ်သုံးခဲ့သည်။

သူ့တိုက်ခိုက်မှု အောင်မြင်သွားခဲ့လျှင် သားသတ်သမားလုဆိုသောနာမည်သည် အလကားဖြစ်သွားလိမ့်မည်။

“သတ်”

ဓားအလင်း မြင့်တက်လာသည်။

ဓားအလင်းသည် နဂါးနက်တစ်ကောင်ကဲ့သို့ အေးစက်စွာတောက်ပနေပြီး မိုင်တစ်ရာရှည်လျားသည်။

ဓားအလင်းသည် သေခြင်းရှင်ခြင်းနှင့်ပတ်သတ်ပြီး အံ့အားသင့်ဖွယ်ကောင်းသော ဆုံးဖြတ်ချက်ကို သယ်ဆောင်ထားသည်။

လုယန်၏အသံသည် သတ်ဖြတ်လိုစိတ်များဖြင့် ပြည့်နေသည်။

ဓားအလင်းသည် အေးစက်သောဓားဆန္ဒကို သယ်ဆောင်ထားပြီး သနားညှာတာမှု မပြခဲ့ပေ။ ကောင်းကင်တွင်ရှိသော ရွှေစေတီကို ထိုးခွဲလိုက်ပြီး ရှစ်ယွမ်ကျီ၏ခေါင်းကို ခုတ်ချသည်။

သူက မှော်ရတနာကို ဓားတစ်ချက်ဖြင့် ဖျက်ဆီးခဲ့သည်။

ကောင်းကင်ဘုံတစ်ဝက်အဆင့်တွင်ရှိနေသည်ဟုထင်ရသော လုယန်သည် ဓားအလင်းဖြင့် ဂိုဏ်းစောင့်ရတနာကို ဖျက်ဆီးခဲ့သည်။ ဓားအလင်းသည် ရပ်တန့်မသွားဘဲ ရှေ့ဆက်လာသည်။

လူတိုင်းက ဓားအလင်းကြောင့် အံ့အားသင့်သွားရသည်။

ဒေသသုံးခု၏ အံ့ဖွယ်နေမင်းကိုယ်ရံတောင်ခေါင်းဆောင်ဖြစ်သော သားသတ်သမားလု၊ လုယန် ....

ထိုဓားအလင်းသည် အမှန်တကယ်ပင် ကြမ်းတမ်းသည်။

အံ့ဖွယ်နေမင်းကိုယ်ရံတောင်များ၏ခွန်အားသည် အလွန်ကြောက်မက်ဖွယ်ကောင်းသည်။

“တာအိုရောင်းရင်းရှစ်ယွမ်ကျီ၊ ဂရုစိုက်ပါ”

ဖူချန်တာအိုဂိုဏ်း၏ တာအိုတန်ခိုးရှင်က အော်ဟစ်လိုက်ပြီး ပျံထွက်လာသည်။

သူ့လက်ထဲတွင်ရှိသော မြင်းမြီးကြာပွတ်သည် အလင်းတန်းတစ်ခုအသွင်ပြောင်းပြီး ဓားနှင့်ရင်ဆိုင်သည်။

တခြားကျင့်ကြံသူများကလည်း ပြေးထွက်လာသည်။ ဓားအလင်းနှင့် ချီစွမ်းအင်အလင်းများ ပြန့်ကျဲသွားပြီး အလင်းလွှာ သို့မဟုတ် ထက်မြိသောအလင်းတန်းများအဖြစ်ပြောင်း၍ လုယန်ကို တိုက်ခိုက်သည်။

ယနေ့တွင် ရှစ်ယွမ်ကျီကို မကာကွယ်နိုင်ခဲ့လျှင် အရှေ့တောင်ဒေသရှစ်ခု၏ တာအိုဂိုဏ်းများ ပြိုကွဲသွားလိမ့်မည်။

သူတို့က လုယန်ကို သတ်ဖြတ်နိုင်လျှင် တာအိုဂိုဏ်းများက တုန်းရှန်ဒေသကို ခွဲဝေယူနိုင်လိမ့်မည်။

ဟန်မူယဲ့၏မျက်နှာထားက ပြောင်းလဲမသွားဘဲ ခပ်ဟဟရယ်လိုက်ပြီး ခေါင်းခါသည်။

အလယ်ပိုင်းကုန်းမြေ၏ဂိုဏ်းများသည် ငြိမ်းချမ်းမှုနှင့် အသားကျနေပုံရသည်။ သူတို့က တိုက်ခိုက်ရမည့်နည်းလမ်းကို မသိတော့ပေ။

ယခုအချိန်တွင် ရှစ်ယွမ်ကျီကို ကယ်တင်လိုက်လျှင် လုယန်နှင့် သေဆုံးသည်အထိ တိုက်ခိုက်နိုင်လိမ့်မည်။

နာမည်ကြီးသော သားသတ်သမားလုသည် သာမန်ကောင်းကင်အဆင့်ကျွမ်းကျင်သူများကြောင့် ရပ်တန့်သွားမည်မဟုတ်ပေ။

“ဘုန်း”

ကောင်းကင်ထက်တွင် ချီစွမ်းအင်အလင်းများ မြင့်တက်လာသည်။ အဆုံးမရှိသောဓားအလင်းများ ပေါ်ထွက်လာပြီး ရေလှိုင်းများနှင့်ရောစပ်၍ ကောင်းကင်ပေါ်သို့ ထိုးတက်သွားသည်။

လုယန်သည် ဓားဖြင့် ခုတ်ချခဲ့သည်။

ဓားအလင်းသည် ကြမ်းတမ်းသောမီးတောက်များအဖြစ် ပြောင်းလဲသွားသည်။ ဓားနှင့်အတူ လေးပြင်းနှင့်မိုးခြိမ်းသံများ ရောပါလာသည်။

ဓားအရိပ်များသည် လောကတစ်ခုလုံးကို လွှမ်းမိုးသွားသည်။

မဟာတာအို၏စွမ်းအားများသည် ဓားအလင်းနှင့်သွယ်ယှက်သွားပြီး ရူးသွပ်နေသောခြင်္သေ့တစ်ကောင်အဖြစ် ပြောင်းလာသည်။ ခြင်္သေ့သည် ပါးစပ်ဖွင့်လိုက်ပြီးဟိန်းဟောက်သည်။ ထို့နောက် ခုန်အုပ်သည်။

ဧရာမခြင်္သေ့ကြီးက ရှစ်ယွမ်ကျီနှင့် ဖူချန်တာအိုဂိုဏ်း၏တန်ခိုးရှင်ကို မြိုချလိုက်သည်။

အဆုံးမရှိသောဓားအလင်းများသည် ကြိတ်ဆုံအသွင်ပြောင်း၍ မဟာကျင့်ကြံသူနှစ်ယောက်ကို တစ်ပိုင်းတစ်စစီ ဖြစ်သွားစေသည်။

သူက ဓားတစ်ချက်ဖြင့် အခြေတည်ဝိညာဉ်အဆင့်ကျင့်ကြံသူများကို သတ်ဖြတ်ခဲ့သည်။

ထိုအရာသည် ခေါင်းဆောင်လုယန်၏ စွမ်းအားဖြစ်သည်။

အောက်တွင် ချီကျစ်ယွီက ပြုံးသည်။ သူ့ကိုယ်ပေါ်တွင်ရှိသော နတ်ဘုရားအလင်းများ ဖြာထွက်လာပြီး ရေလှိုင်းများကို တည်ငြိမ်စေသည်။

ဤနေရာသည် သူ့နယ်မြေဖြစ်သည်။ မဟာတာအိုသည် သူ့ဆန္ဒအတိုင်း ဆောင်ရွက်ပေးသည်။

“သတ်”

လုယန်က အော်ဟစ်လိုက်ပြန်သည်။ ဓားအလင်းများ ပေါ်ထွက်လာပြီး ကြောက်ရွံ့နေသောကျင့်ကြံသူများဆီသို့ တိုးဝင်သွားသည်။

သားသတ်သမားလုသည် ဓားထုတ်ခဲ့သောကြောင့် စိတ်ကျေနပ်သည်အထိ သတ်ဖြတ်လိမ့်မည်။

“ဘုန်း”

ဓားချက်သည် တိမ်တိုက်များကို ထိုးခွဲသွားခဲ့သည်။

ထိုအလင်းသည် ကောင်းကင်ကို ပျက်စီးသွားစေသည်။

ကောင်းကင်ထက်တွင် မဟာကျင့်ကြံသူများ ချက်ချင်းလူစုခွဲသွားသည်။

တာအိုဂိုဏ်းများ၏အခြေအနေသည် ဟာသတစ်ခုဖြစ်လာသည်။

ဒေသသုံးခု၏ အံ့ဖွယ်နေမင်းကိုယ်ရံတော်ခေါင်းဆောင်ဖြစ်သော လုယန်သည် ဓားချက်များဖြင့် တာအိုတန်ခိုးရှင်များ၏ ဝိုင်းရံတိုက်ခိုက်မှုကို ဖြိုခွင်းခဲ့သည်။

ထိုအရာသည် အစစ်အမှန်စွမ်းအားဖြစ်သည်။

ဓားအလင်းသည် ဖြည်းဖြည်းချင်း ပျောက်ကွယ်သွားပြီး ချီစွမ်းအင်အလင်းများ ထွက်ပြေးသွားကြသည်။

သင်္ဘောပေါ်၌ ချင်းယုနွန်၏ခန္ဓာကိုယ်ပေါ်တွင်ရှိသော အဆောင်လက်ဖွဲ့များသည် ပြာကျသွားခဲ့သည်။

သူက ကြောင်အစွာဖြင့် ကုန်းပတ်ပေါ်တွင် ထိုင်မိသည်။

တာအိုဂိုဏ်းများ၏စွမ်းအားသည် လုယန်၏ဓားကို မတားနိုင်ခဲ့ပေ။

သူက ကွန်ဖြူးရှပ်တာအိုကို စွန့်ပယ်ပြီး တာအိုလမ်းစဉ်ကို လက်ခံခဲ့သည်။ သူက မည်သည့်အရာကို ရှာဖွေနေခဲ့သနည်း။

ဟန်မူယဲ့၏ပတ်ပတ်လည်တွင် မဖိနှိပ်နိုင်သောခွန်အားတစ်ခုရှိနေသည်။

သူက စိုးရိမ်နေပုံရသောမူဝမ်ကို လှည့်ကြည့်သည်။

“ညီမမူ၊ နန်းမြို့တော်ကိုသွားပြီး သင့်တော်တဲ့ဆိုင်တစ်ဆိုင် ရှာထားလိုက်ပါ။ ပြီးရင် ငါလာခဲ့မယ်”

“ငါတို့က ဆေးဆိုင်တစ်ဆိုင်ဖွင့်ဖို့ သဘောတူထားတယ်မဟုတ်လား”

မူဝမ်က နှုတ်ခမ်းကိုက်ထားပြီး ခေါင်းညိတ်သည်။

ဟန်မူယဲ့က အသက်ပြင်းပြင်းရှူသွင်းလိုက်ပြီး ဒေသအုပ်ချုပ်သူချိပ်စည်းတံဆိပ်ကို ကိုင်ထားပြီး ကောင်းကင်ကို ကြည့်သည်။

တာအိုဂိုဏ်းများသည် ဆက်တိုက်အစီအစဉ်ချနေသည်။

ချိပ်စည်းတံဆိပ်မရှိလျှင် တုန်းရှန်ဒေသသည် ဖိနှိပ်ခံရလိမ့်မည်။

လုယန်၏ဓားချက်သည် သန်မာသော်လည်း တာအိုဂိုဏ်းများအားလုံးကို မဆန့်ကျင်နိုင်ပေ။

အမွှေးတိုင်ပူဇော်ခြင်းအစီအစဉ်သည် ပျက်စီးသွားခဲ့သော်လည်း တာအိုဂိုဏ်းများသည် အလွန်နက်နဲသည်။ သူတို့က လုသားအဖကို ဝါးမြိုသွားနိုင်သည်။

“ဝီ”

လောကသည် တုန်ခါသွားသည်။

အရှေ့တောင်ဒေသရှစ်ခု၏အပေါ်တွင် ရွှေရောင်ချပ်ဝတ်လူရိပ်ကြီးတစ်ခုက ကောင်းကင်ကို လွှမ်းခြုံထားသည်။

အရှေ့ပင်လယ်တွင် အဆုံးမရှိသော အနက်ရောင်ရေစီးကြောင်းများ ပေါ်ထွက်လာသည်။ ဓားအလင်းကို အလင်းစီးကြောင်းများက တားဆီးထားသည်။

ကောင်းကင်ထက်တွင် လုယန်ကို လူများဝိုင်းထားသည်။

တုန်းရှန်ဒေသ၏အပေါ်တွင် ချီစွမ်းအင်အလင်းများ ပေါ်ထွက်လာသည်။

မဟာကျင့်ကြံသူကြီးတစ်ယောက် လှုပ်ရှားလာခဲ့သည်။

ကျွမ်းကျင်သူတစ်ယောက်က လုယန်၏လမ်းကြောင်းကို တားဆီးထားသည်။

တာအိုဂိုဏ်းများတွင် အရံအစီအစဉ်ရှိနေသည်။

ကောင်းကင်အံ့ဖွယ်ကမ္ဘာမှ အားကောင်းသော တွန်းကန်အားတစ်ခု ပေါ်ထွက်လာသည်။